1. Giunsa nato pagkahibalo nga ang paghimog tinun-an makaluwas ug kinabuhi?

ANG paghimog tinun-an makaluwas ug kinabuhi! Giunsa nato pagkahibalo? Sa dihang gihatag ni Jesus ang sugo diha sa Mateo 28:19, 20, siya miingon: “Adtoa ninyo ang mga tawo . . . ug tudloi sila aron mahimong akong mga tinun-an. Bawtismohi sila.” Unsa ka importante ang pagpabawtismo? Kinahanglanon ni aron ang usa maluwas. Ang magpabawtismo kinahanglang motuo nga ang kaluwasan naposible lang tungod kay si Jesus namatay alang kanato ug gibanhaw. Kanay hinungdan nga giingnan ni apostol Pedro ang mga isigka-Kristohanon: ‘Ang bawtismo nagaluwas kaninyo karon pinaagi sa pagkabanhaw ni Jesu-Kristo.’ (1 Ped. 3:21) Busa kon ang usa ka bag-ong tinun-an magpabawtismo, may paglaom siya nga maluwas.

2. Sumala sa 2 Timoteo 4:1, 2, angay nga unsa tang klaseha sa magtutudlo?

² Sa paghimog tinun-an, kinahanglang ugmaron nato ang “maayong paagi sa pagpanudlo.” (Basaha ang 2 Timoteo 4:1, 2.) Ngano? Tungod kay si Jesus nagsugo kanato: “Adtoa ninyo ang mga tawo . . . ug tudloi sila aron mahimong akong mga tinun-an.” Si apostol Pablo miingon nga ‘magpadayon’ ta nianang buluhatona, ‘kay sa pagbuhat niini maluwas nato ang atong kaugalingon ug kadtong maminaw nato.’ Busa may maayong rason si Pablo dihang siya miingon: “Tagda kanunay ang . . . imong pagpanudlo.” (1 Tim. 4:16) Kay ang pagtudlo konektado sa paghimog tinun-an, gusto nato nga maayo kaayo ang atong paagi sa pagtudlo.

3. Niining artikuloha, unsay atong hisgotan bahin sa pag-Bible study?

 ³ Sa tibuok kalibotan, milyonmilyon ang gidumalahag pagtuon. Pero sumala sa gihisgotan sa miaging artikulo, gusto natong mahibaloan kon sa unsang paagi makatabang ta sa mas daghan pa nga mahimong tinun-an ni Jesu-Kristo. Niining artikuloha, hisgotan nato ang lima pa ka butang nga kinahanglan natong himoon aron matabangan ang study nga mouswag ug magpabawtismo.

4. Nganong angay tang magpugong sa kaugalingon dihang mag-Bible study? (Tan-awa sab ang footnote.)

⁴ Ganahan kaayo ta sa atong ginatudlo gikan sa Pulong sa Diyos. Busa gusto tingali nato nga magsigeg estorya bahin niana. Pero, magdumala man ta sa Pagtuon sa Bantayanang Torre, Pagtuon sa Kongregasyon sa Bibliya, o mag-Bible study, kinahanglan nga dili kita ang magsigeg estorya. Aron ang Bibliya maoy magtudlo, kinahanglan nga magpugong ta sa kaugalingon ug dili nato isulti ang tanan natong nahibaloan bahin sa usa ka teksto o topiko sa Bibliya. * (Juan 16:12) Itandi ang imong kahibalo sa Bibliya karon sa imong nahibaloan niadtong gibawtismohan ka. Tingali sa una, pangunang doktrina lang ang imong nasabtan. (Heb. 6:1) Gidangtag daghang tuig una nimo makat-oni ang imong nahibaloan karon, busa ayaw paulanig daghang impormasyon ang imong study.

5. (a) Base sa 1 Tesalonica 2:13, unsay gusto natong masabtan sa study sa iyang pagtuon? (b) Sa unsang paagi madasig nato ang study nga mosulti bahin sa mga butang nga iyang nakat-onan?

⁵ Gusto natong masabtan sa atong study nga ang iyang gitun-an naggikan sa Pulong sa Diyos. (Basaha ang 1 Tesalonica 2:13.) Unsaon nato nâ paghimo? Dasiga ang imong study nga mosulti bahin sa mga butang nga iyang nakat-onan. Imbes ikaw ang kanunayng mopatin-aw sa teksto, hangyoa siya nga siyay mosaysay sa pipila ka teksto. Tabangi siya nga makita kon sa unsang paagi ang Pulong sa Diyos mapadapat kaniya. Pagsuknag mga pangutana nga motabang niya sa pagpahayag kon unsay iyang hunahuna ug pagbati sa teksto nga iyang gibasa. (Luc. 10:25-28) Pananglitan, pangutan-a siya: “Sa unsang paagi kining tekstoha nakatabang nimo nga makita ang usa sa mga hiyas ni Jehova?” “Sa unsang paagi makabenepisyo ka niini nga kamatuoran sa Bibliya?” “Unsay imong gibati sa bag-o lang nimong nakat-onan?” (Prov. 20:5) Ang pinakaimportante, dili kon unsa ka daghan ang nahibaloan sa study, kondili kon unsa ka dako ang iyang pagpabili niini ug kon giunsa niya kini pagpadapat.

6. Nganong maayo nga mag-uban tag eksperyensiyadong igsoon sa atong pag-Bible study?

 ⁶ Dihang mag-Bible study, mag-uban ba kag eksperyensiyadong mga igsoon? Kon mao, puwede nimo silang pangutan-on kon unsay iyang naobserbahan sa imong pagdumala ug kon ang Bibliya bay imong gipatudlo. Kinahanglan nga magmapainubsanon ka aron mouswag sa imong pagpanudlo. (Itandi ang Buhat 18:24-26.) Dayon, pangutan-a ang eksperyensiyadong igsoon kon para niya nasabtan ba sa study ang iyang gitun-an. Puwede sab nimong hangyoon ang maong igsoon nga maoy modumala kon dili ka makadumala sulod sa usa o pipila ka semana. Makatabang kana nga mahimong regular ang pagtuon ug makita sa study ang kaimportante niana. Ayaw paghunahuna nga “imo” ra gyod siyang study ug walay laing maka-study niya. Siyempre, gusto nimo ang pinakamaayo para sa imong study aron magpadayon ang iyang pagkat-on sa kamatuoran.

7. Unsay makatabang sa study nga maeksayted sa iyang ginatun-an?

⁷ Kinahanglang makita sa study ang imong kadasig ug madungog ang imong kombiksiyon bahin sa mga kamatuoran nga gitudlo sa Bibliya. (1 Tes. 1:5) Mahimong makatabang nâ niya nga maeksayted sa iyang ginatun-an. Tingali imo siyang sultihan kon sa unsang paagi ang pagsunod sa mga prinsipyo sa Bibliya nakatabang nimo. Pinaagi niana, makita niya nga ang Bibliya dunay praktikal nga giya nga makahatag sab niyag kaayohan.

8. Unsa pay imong mahimo sa pagtabang sa imong study, ug nganong himoon nimo kana?

⁸ Panahon sa pagtuon, estoryahi ang imong study bahin sa mga igsoon nga parehas niyag problema ug milampos sa paghimog kausaban. Puwede kang mag-uban ug igsoon nga dunay personal nga eksperyensiya nga makatabang sa imong study. O kaha puwede kang mangitag makapatandog nga mga eksperyensiya diha sa jw.org sa seryeng “Ang Bibliya Makabag-o sa Kinabuhi.” * Ang maong mga artikulo ug video makatabang sa study nga makita nga maayo gyong ipadapat ang mga prinsipyo sa Bibliya.

9. Sa unsang paagi madasig nimo ang imong study nga isulti sa iyang pamilya ug mga higala ang iyang nakat-onan?

⁹ Kon minyo ang imong study, nagtuon pod ba ang iyang kapikas? Kon wala, imbitaha ang kapikas nga moapil sa pagtuon. Dasiga ang imong study nga isulti sa iyang pamilya  ug mga higala ang iyang nakat-onan. (Juan 1:40-45) Sa unsang paagi? Puwede nimo siyang pangutan-on: “Unsaon nimo pagpatin-aw niini nga kamatuoran sa imong pamilya?” o “Unsang teksto ang imong gamiton aron mapamatud-an nimo kini sa imong higala?” Niining paagiha, mabansay nimo siya nga mahimong magtutudlo. Dayon kon kuwalipikado na siya, makaapil na siya sa pagsangyaw ingong di-bawtismadong magmamantala. Mahimo nimong pangutan-on ang imong study kon duna ba siyay kaila nga gusto pong magtuon. Kon duna, kontaka dayon ang maong tawo ug tanyagig pagtuon sa Bibliya. Ipakita kaniya ang video nga Sa Unsang Paagi Ginahimo ang Bible Study? *

10. Base sa 1 Tesalonica 2:7, 8, sa unsang paagi masundog nato si Pablo?

¹⁰ Kinahanglan tang magpakitag personal nga interes sa atong mga study. Isipa sila ingong umaabot nga mga igsoon. (Basaha ang 1 Tesalonica 2:7, 8.) Dili sayon para kanila nga biyaan ang ilang mga higala sa kalibotan ug mohimog gikinahanglang mga kausaban sa pag-alagad kang Jehova. Kinahanglang tabangan nato sila nga makakitag tinuod nga mga higala diha sa kongregasyon. Suora ang imong study pinaagi sa paggahin ug panahon kaniya dili lang dihang mag-Bible study kondili sa ubang higayon usab. Ang pagtawag, pag-text, o pagduaw kaniya sa mga adlaw nga dili mo mag-study magpakita nga duna kay personal nga interes kaniya.

11. Unsay gusto nato nga makita sa atong study diha sa kongregasyon, ug ngano?

¹¹ Ang usa ka panultihon nag-ingon: “Gikinahanglan ang tibuok baryo sa pagpadako sa usa ka bata.” Makaingon sab ta: “Gikinahanglan ang tibuok kongregasyon sa paghimog usa ka tinun-an.” Busa kon tabangan nato ang atong study nga masuod sa ubang igsoon sa kongregasyon, ang maong mga igsoon makatabang sab kaniya nga masuod kang Jehova. Pinaagi niana, siya malipay sa pagpakig-uban sa mga igsoon, kinsa makahatag niyag espirituwal ug emosyonal nga tabang. Gusto natong mobati ang study nga ganahan tang makauban siya ug bahin siya sa atong espirituwal nga pamilya. Gusto nato nga madani siya sa atong mahigugmaon nga Kristohanong panag-igsoonay. Pinaagi niana, mahimong sayon para niya nga mohunong sa pagpakig-uban sa mga tawo nga dili makatabang niya sa paghigugma kang Jehova. (Prov. 13:20) Kon likayan na siya sa iyang kanhing mga kauban, nahibalo siya nga makakita siyag tinuod nga mga higala sa organisasyon ni Jehova.​—Mar. 10:29, 30; 1 Ped. 4:4.

12. Nganong angay natong hisgotan sa atong study ang bahin sa pagpahinungod ug pagpabawtismo?

¹² Kinahanglang hisgotan nimo pirme kon unsa ka importante ang pagpahinungod kang Jehova ug ang pagpabawtismo. Kon buot hunahunaon, ang atong tumong sa pag-Bible study mao ang pagtabang sa usa ka tawo nga mahimong bawtismadong tinun-an. Human sa pipila ka bulan nga pagtuon ug ilabina kon makatambong nag tigom ang study, siya kinahanglang makasabot nga ang katuyoan sa pagtuon mao ang pagtabang kaniya nga mahimong Saksi ni Jehova.

13. Unsay kinahanglang himoon sa study aron siya mabawtismohan?

¹³ Ang sinserong Bible study anam-anam nga makakab-ot sa iyang tumong nga magpabawtismo. Una, ilhon ug higugmaon niya si Jehova ug magpakita siyag pagtuo Kaniya. (Juan 3:16; 17:3) Dayon, makigsuod siya kang Jehova ug sa mga igsoon sa kongregasyon. (Heb. 10:24, 25; Sant. 4:8) Ngadtongadto, biyaan niya ang daotang mga buhat ug maghinulsol siya sa iyang mga sala. (Buh. 3:19) Isulti sab niya sa uban ang kamatuoran. (2 Cor. 4:13) Dayon, magpahinungod siya kang Jehova ug simbolohan kana pinaagi sa pagpabawtismo. (1 Ped. 3:21; 4:2) Makapalipay gyod nang adlawa para sa tanan! Sa dihang himoon sa study ang maong mga butang, hatagi siyag kinasingkasing nga komendasyon ug dasiga siya nga padayon kanang himoon.

14. Sa unsang paagi masusi nato ang pag-uswag sa study?

¹⁴ Kinahanglan tang magmapailobon dihang tabangan nato ang study nga mokuwalipikar sa bawtismo. Pero, kinahanglan sab natong sayron kon gusto ba gyod niyang moalagad kang Jehova nga Diyos. Duna bay mga timailhan nga naningkamot siya sa pagsunod sa mga sugo ni Jesus, o gusto lang niyang makabaton ug kahibalo sa Bibliya?

15. Unsang mga timailhan sa pag-uswag ang atong panid-an sa atong study?

¹⁵ Regular nga susiha ang pag-uswag sa imong study. Pananglitan, ginasulti ba niya ang iyang pagbati bahin kang Jehova? Nagaampo ba siya kang Jehova? (Sal. 116:1, 2) Ganahan ba siyang mobasag Bibliya? (Sal. 119:97) Regular ba siya sa pagtambong sa mga tigom? (Sal. 22:22) Nakahimo na ba siyag mga kausaban sa iyang kinabuhi? (Sal. 119:112) Ginasulti na ba niya sa iyang pamilya ug mga higala ang iyang nakat-onan?  (Sal. 9:1) Labaw sa tanan, gusto ba niyang mahimong Saksi ni Jehova? (Sal. 40:8) Kon ang study walay pag-uswag sa bisan hain niining mga bahina, mataktikanhong sayra kon ngano. Dayon, hisgoti kaniya ang maong butang sa mahigugmaon pero prangka nga paagi. *

16. Unsay ilhanan nga angay nang undangon ang pag-study?

¹⁶ Matag karon ug unya, susiha kon angay pa bang ipadayon ang pag-study. Pangutan-a ang kaugalingon: ‘Ang study ba dili mangandam sa pagtuon? Dili ba siya ganahang motambong sa mga tigom? Nagpadayon pa ba gihapon siya sa iyang daotang binuhatan? Membro pa ba gihapon siya sa bakak nga relihiyon?’ Kon oo ang tubag, ang padayong pag-study kaniya sama rag pagtudlog langoy sa usa nga dili gustong mabasa! Kon ang study wala gyoy pagpabili sa iyang nakat-onan ug dili gustong mohimog kausaban, nganong ipadayon pa man nimo ang pag-study kaniya?

17. Sumala sa 1 Timoteo 4:16, unsay kinahanglang himoon natong tanan?

¹⁷ Giisip nato nga importante kaayo ang pagtuman sa atong responsibilidad nga maghimog tinun-an, ug gusto natong tabangan ang atong study nga mouswag ug magpabawtismo. Kanay rason kon nganong ang Bibliya maoy atong patudloon ug kita manudlo nga may kadasig ug kombiksiyon. Atong dasigon ang atong study nga makigsuod sa mga igsoon sa kongregasyon. Atong ipasiugda ang tumong nga magpahinungod ug magpabawtismo, ug regular natong susihon ang iyang pag-uswag. (Tan-awa ang kahon nga “ Kon Unsay Angay Natong Himoon Aron Matabangan ang Bible Study nga Magpabawtismo.”) Malipayon kaayo ta nga makaapil niining nagaluwas ug kinabuhi nga buluhaton! Hinaot nga himoon nato ang atong maarangan sa pagtabang sa atong Bible study nga magpabawtismo.