EKICWEKA C’OKWEGA 42
Oku turi kubasa kukwasa abegi ba Bibuli kuhika aha kubatizibwa—Ekicweka ca kabiri
‘Oyerinde iwe wenka, kandi n’omu bi ori kwegesa.’—1 TIM 4:16.
ECESHONGORO CA 77 Omushana Omu Nsi Erimu Omwirima
EMPINYE *
1. Nitumanya tuta ku okuhindura abantu abegi guri omurimo oguri kurokora amagara?
OKUHINDURA abantu abegi ni omurimo oguri kurokora amagara! Eco nitukimanya tuta? Obwire obu Yesu yagambire ekiragiro ekiri omuri Matayo 28:19, 20, akagira ati: ‘Mugende muhindure abantu abegi nimubabatiza.’ Okubatizibwa kwine guha mugasho? Kwinire omugasho abari kwenda kurokoka. Abari kwenda kubatizibwa bashemerire kubanza bayikiriza ku ekirituma barokoka ari oku Yesu yatuferire kandi akazoka. Eyo ni yo nshonga entumwa Petero yagambire Abakristo bagenzi beye ngu: ‘Amizi ago ni co kishushani cago agabakiza omu kubatizibwa ahabw’okuzoka kwa Yesu Kristo.’ (1 Pet 3:21) Obwe rero omuntu yabatizibwa, nagira amasiko g’okwija kurokoka.
2. Ebiri omuri 2 Timoseo 4:1, 2 nibituhiga kukora ki itwe abegesa?
2 Kugira ngu tuhindure abantu abegi, tushemerire kumanya ‘kwegesa’ ge. (Shoma omuri 2 Timoseo 4:1, 2.) Ahabw’enki? Ni ahabw’okuba Yesu akaturagira ngu: ‘Mugende, muhindure abantu abegi nimubegesa.’ Entumwa Paulo akagamba ku ‘wagumizamu’ kukora ogo murimo, ‘orije kwejuna kandi okajuna n’abari kukuhurira.’ Nambwenu Paulo akagamba ngu: ‘Oyerinde iwe wenka, kandi n’omu bi ori kwegesa.’ (1 Tim 4:16) Ahabw’okuba okwegesa kwine obuzare n’okuhindura abantu abegi, nitwenda ngu tumanye kwegesa ge.
3. Ni enki eki twaza kushwijuma omuri eki kicweka?
3 Nitwegesa abantu bingi munonga omu nsi yona amazima g’omuri Bibuli. Konka nk’oku twakirebire omu kicweka ecabandize eki, nitwenda kumanya oku turi kubasa kukwasa abingi omuri bo kuba abegi ba Yesu Kristo ababatizibwe. Omuri eki kicweka, twaza kushwijuma ebintu bitano ebi ababurizi bashemerire kukora kugira ngu bakwase abegi ba Bibuli kuhika aha kubatizibwa.
KORESA BIBULI WABA ORI KWEGESA
Shaba omwegesa omanyiririre akukwase kukoresa Bibuli waba ori kwegesa (Reba paragurafu ya 4-6) *
4. Ahabw’enki omwegesa ashemerire kwerinda yaba ari kwegesa omwegi wa Bibuli? (Reba n’obugambo bw’ahaasi.)
4 Nitukunda ebi turi kwegesa omu Kigambo ca Ruhanga. Obwe rero, nitubasa kugwa omu mutego g’okugamba byingi. Konka, ori kwebembera Omunara g’Omurinzi, Ecegeso ca Bibuli c’ekibina, ninga shi okuramya kw’eka tashemerire kugamba byingi. Kugira ngu omwegesa areke Bibuli ebe ni yo yayegesa, ashemerire kwerinda kushoborora buri kantu kona aku ari kumanya ahari Bibuli. * (Yoh 16:12) Geranisa ebi wabire ori kumanya obwire obu wabatizibwe n’ebi ori kumanya hati. Okabanza wayega enyegesa za Bibuli z’okubandizaho. (Heb 6:1) Okamara emyaka myingi kugira ngu omanye ebintu ebi ori kumanya hati; obwe rero otagezaho kubyegesa omwegi wa Bibuli musya omurundi gumwe.
5. (a) Tukuratize ebiri omu 1 Batesalonika 2:13, ni enki eki turi kwenda ngu abegi bamanye aha bi bari kwega? (b) Ni bata oku turi kubasa kuhiga omwegi kugambira abandi ebi ari kwega?
5 Nitwenda ngu abegi bamanye ku ebi bari kwega biri kuruga omu Kigambo ca Ruhanga. (Shoma omu 1 Batesalonika 2:13.) Eco nitubasa kukikora tuta? Higa omwegi kugambira abandi aha bi ari kwega. Omu mwanya g’okuguma ori kushobororera omwegi ebyahandikirwe, mushabe abe ni we owabikushobororera. Kwasa omwegi kureba oku Ekigambo ca Ruhanga kiri kumukwataho. Mubuze ebibuzo ebiri kumukwasa kugamba eki ari kutekateka aha byahandikirwe ebi yashoma. (Luk 10:25-28) Ecokureberaho: Nobasa kumubuza ngu: “Ni bata oku eki cahandikirwe cakukwasize kumanya gumwe omu mitwarize ya Yehova?” “Ebi wayega omuri Bibuli nibibasa kukugasira bita?” “Ebi bintu ebi wayega nibituma wayehurira ota?” (Enf 20:5) Ec’omugasho, ti obwingi bw’ebintu ebi omwegi ari kumanya, ahobwe ni oku ari kukunda ebi ari kwega kandi akabita omu nkora.
6. Ahabwenki kiri kirungi kuza kwegesa omwegi wawe ori n’abandi baburizi abari kumanya kwegesa ge?
6 Mbehi waba oyine omwegi wa Bibuli nokunda kutwarayo abandi baburizi abari kumanya kwegesa ge? Waba ori kukikora basyoya, nobasa kubabuza eki bari kutekateka aha ku ori kwegesa n’oku ori kukoresa Bibuli. Oshemerire kwecureza waba ori kwenda kuba omwegesa murungi. (Geranisa n’Ebyakozirwe 18:24-26.) Nobasa n’okubuza omwegesa ori kumanya kwegesa ge yaba omwegi wawe ari kucenga ebi ori kumwegesa. Nambwenu nobasa kushaba ogo mwegesa kwegesa omwegi wawe waba otariho. Eco nikija kutuma omwegi wawe yaguma ari kwega kandi kitume yashoborocerwa ku kwega kimwinire omugasho. Otatekateka ku omwegi ari owawe wenka kandi ku hatariho ondijo ori kubasa kumwegesa. Ahobwe noba ori kwenda ngu omwegi wawe atunguke ahike aha kubatizibwa.
YEREKA KU NOKUNDA EBI ORI KWEGESA KANDI KU NOBYESIGA
Gambira omwegi ebyokureberaho ebiramukwase kushoborocerwa oku ari kubasa kugendera aha misinge ya Bibuli (Reba paragurafu ya 7-9) *
7. Ni enki ekirije kukwasa omwegi wawe kukunda ebi ari kwega?
7 Omwegi ashemerire kureba ku nokunda ebi Bibuli eri kwegesa kandi ku nobyesiga. (1 Tes 1:5) Eco kiryatuma yakizaho kukunda ebi ari kwega. Caba kiri kubasika, mugambire oku wagasirwe ahabw’okugendera aha misinge ya Bibuli. Eco nikija kutuma na we yayerebera ku omuri Bibuli harimu obuhabuzi oburi kubasa kumukwasa.
8. Ni enki ekindi eki ori kubasa kukora kugira ngu okwase omwegi wa Bibuli, kandi shi ahabw’enki oshemerire kukikora?
8 Mwaba muri kwega, gambira omwegi wawe ebyokureberaho by’Abakristo abarabire omu mbera nk’ezi arimu bakazisingura. Nobasa kwija na bamwe omuri abo kugira ngu bamugambire ebi barabiremu. Ninga shi nobasa kumurondera enkuru eziri aha rubuga rwa jw.org ahari kugira ngu: “Bibuli nehindura amagara g’abantu.” * Ebyo bicweka hamwe na za vidiyo nibyija kukwasa omwegi kureba omugasho g’okugendera aha misinge ya Bibuli.
9. Ni bata oku ori kubasa kuhiga omwegi wawe kugambira abanyabuzare na banywani beye ebi ari kwega?
9 Mbehi omwegi yaba ayine owu batasine, na we nayega Bibuli? Yaba atari kwega, nobasa kumweta ngu bege bari hamwe. Higa omwegi wawe kugambira abanyabuzare na banywani beye ebi ari kwega. (Yoh 1:40-45) Okakikora ota? Nobasa kukikora ori kumubuza ngu: “Ni bata oku ori kubasa kushobororera abanyabuzare bawe eyi nyegesa?” Ninga shi: “Ni kiha cahandikirwe eki ori kubasa kukoresa ori kubishobororera abanywani bawe?” Omuri obwo buryo noba ori kumanyiza omwegi wawe kuba omwegesa murungi. Rero yayijuza ebiri kushabwa nabasa kutandika kuburira n’ekibina ari omuburizi otakabatizibwe. Nobasa kubuza omwegi yaba hine ondijo owu ari kumanya ori kwenda kwega Bibuli. Yaba ari kumumanya, hika ori kumuronda omwegese muri hamwe. Mwereke vidiyo eri kugira ngu: Oku turi kwegyesa Bibuli? *
HIGA OMWEGI WAWE KURONDA ABANYWANI OMU KIBINA
Higa omwegi kugira abanywani omu kibina (Reba paragurafu ya 10-11) *
10. Nk’oku biri kugambwa omu 1 Batesalonika 2:7, 8, ni bata oku omwegesa ari kubasa kutoreza ecokureberaho ca Paulo?
10 Abegesa bashemerire kwereka abegi ku bari kubakunda kandi ku bari kubafaho. Barebe nka benetata na banyanyazi b’omu biro by’omu misho. (Shoma omu 1 Batesalonika 2:7, 8.) Tikiri kuborobera kuhika bari kureka abanywani babo b’omu nsi n’okuhindukira kimwe kugira ngu bahereze Yehova. Tushemerire kubakwasa kutunga abanywani barungi omu kibina. Ba omunywani w’omwegi wawe ori kumara na we obwire, hatari omu kwega kusha ahobwe n’omu zindi mbera. Wamuterera esimu, okamusindikira mesegi, ninga shi okamutayayira, mazima nikimwereka ku ori kumufaho.
11. Ni enki eki turi kwenda ngu abegi bitu batunge omu kibina kandi ahabw’enki?
11 Hariho enfumu eri kugira ngu: “Agaterine nigata igufa.” Obwe rero, nitubasa kugamba ngu: “Ab’omu kibina bona nibayamba omu kutunguka k’omwegi.” Ni yo nshonga abegesa barungi bari kukwasa abegi babo kumanyana n’ab’omu kibina abari kubasa kubakwasa kugira obunywani na Yehova. Abegi nibabasa kushemerererwa kwekwatanisa n’abanywani abari kubasa kubaha obuyambi bw’omu by’omwika n’omu nyehurira. Nitwenda ngu omwegi ahurire ku ari ow’omu kibina kandi ku ari owu omu ka yitu y’eby’omwika. Nituba turi kwenda ngu rukundo eyi benetata na banyanyazi bari kumukunda ebe ari yo yamuhiga. Eco nikituma kwemereza obunywani obu ayine n’abantu abatari kuramya Yehova camworobera. (Enf 13:20) Abanywani beye aba kare bamwanga naba ari kumanya ku arije kutunga abanywani barungi omu kitongore ca Yehova.—Mak 10:29, 30; 1 Pet 4:4.
GUMA ORI KUGAMBA AHA KWEHA YEHOVA N’OKUBATIZIBWA
Mporampora, omwegi oyine omutima murungi nabasa kuhika aha ntego y’okubatizibwa! (Reba paragurafu ya 12-13)
12. Ahabw’enki tushemerire kugamba n’ebegi bitu aha bikwatirine n’okweha Yehova n’okubatizibwa?
12 Guma ogambe otarabire aha rubaju aha bikwatirine n’okweha Yehova n’okubatizibwa. Enshonga eri kutuma twayegesa omuntu Bibuli ni okumukwasa kuhika aha kubatizibwa. Wamara amezi mace ori kwegesa omwegi kandi ari kwija omu nterane, ashemerire kuba ari kumanya ku turi kwenda kumukwasa kuba Omuhamya wa Yehova.
13. Ni biha bintu ebi omwegi ashemerire kukora kugira ngu ahike aha kubatizibwa?
13 Hariho ebintu byingi ebi omwegi ori kwenda kuhika aha kubatizibwa ashemerire kukora. Ec’okubanza: Omwegi ashemerire kumanya Yehova, akamukunda kandi akamwikiriza. (Yoh 3:16; 17:3) Naba munywani wa Yehova kandi atandika kwekwatanisa n’ekibina. (Heb 10:24, 25; Yak 4: 8) Nareka emitwarize mibi kandi ayehana ebicumuro byeye. (Byak 3:19) Nambwenu, okwikiriza kweye nikutuma yagambira abandi ebi ari kwikiriza. (2 Kor 4: 13) Bwanyima, nayeha Yehova kandi ayereka abandi ku yamwehire ari kubatizibwa. (1 Pet 3:21; 4:2) Eryo ku ni izoba eriri kushemeza munonga! Omwegi yahika aha ntego zeye, omusime kandi omuhige kugumizamu kukikora asyo.
KURATANA OKU OMWEGI WAWE ARI KUTUNGUKA
14. Ni bata oku omwegesa ari kubasa kushwijuma oku omwegi ari kutunguka?
14 Tushemerire kwehangana twaba turi kukwasa omwegi kutunguka kugira ngu ahike aha kweha Yehova n’okubatizibwa. Konka nabwe, tushemerire kureba yaba ari kwenda kuhereza Yehova. Mbehi noreba ebimanyiso ebiri kwereka ku omwegi ari kugezaho korobera ebiragiro bya Yesu? Ninga we nayenda kweyegera amazima g’omuri Bibuli kusha?
15. Ni biha bimanyiso ebi omwegesa ari kubasa kumanyiraho yaba omwegi ari kutunguka?
15 Guma oshwijume oku omwegi wawe ari kutunguka. Ecokureberaho: Mbehi nayereka ku ari kukunda Yehova? Mbehi nashaba Yehova? (Zab 116:1, 2) Mbehi nakunda kweshomesa Bibuli? (Zab 119:97) Mbehi nayija omu nterane burijo? (Zab 22:22) Mbehi ari kukora empinduka omu kubaho kweye? (Zab 119:112) Mbehi yatandikire kugambira abanyabuzare na banywani beye ebi ari kwega? (Zab 9:1) Ekiri kukira byona, mbehi nayenda kuba Omuhamya wa Yehova? (Zab 40:8) Omwegi yaba atari kutunguka, koresa obwenge egezeho kumanya enshonga kandi mukiganireho omu businge, konka otari kumushereka. *
16. Ni enki ekiri kwereka ku oshemerire kureka kwegesa omwegi?
16 Guma ori kwebuza yaba oshemerire kugumizamu kwegesa omwegi. Yebuze ngu: ‘Mbehi omwegi tari kutebekanisa? Mbehi tari kwenda kwija omu nterane? Mbehi acayine emitwarize mibi? Mbehi acayekwatanisa n’edini y’ekishuba?’ Waba wagarukamu ngu “yego,” wagumizamu kumwegesa noba ori nk’ori kwegesa omuntu koga konka atari kwenda ngu amizi gamuzeho! Omwegi yaba atari kukunda ebi ari kwega kandi atari kuhinduka, ahabw’enki ori kugumizamu kumwegesa?
17. Tukuratize ebiri omuri 1 Timoseo 4:16, ni enki eki abegesa ba Bibuli bona bashemerire kukora?
17 Omurimo g’okuhindura abantu abegi nitugutwara nk’og’omugasho, kandi nituba turi kwenda kukwasa abegi bitu ba Bibuli kutunguka bakahika aha kubatizibwa. Ni yo nshonga turije kukoresa Bibuli, tukakunda ebi turi kwegesa kandi tukereka ku nitubyesiga. Nitwija kuhiga omwegi kurondera abanywani omu kibina. Nitwija kuguma turi kugamba aha kwehayo n’okubatizibwa, kandi tukuratane oku omwegi ari kutunguka. (Reba akashanduku akari kugira ngu: “ Ebi abegesa bashemerire kukora kugira ngu bakwase abegi kuhika aha kubatizibwa.”) Nitushemererwa ku turi kwekwatanisa omuri ogu murimo oguri kurokora amagara! Reka tumaririre kukora cona ekiri kubasika tukwase abegi ba Bibuli kuhika aha kubatizibwa.
ECESHONGORO CA 79 Beegyese Kwongyera Kutunguuka
^ par. 5 Twaba turi kwegesa omwegi wa Bibuli, nituba twine omugisha g’okumukwasa kumanya oku Yehova ari kwenda ngu atekateke kandi agire eki yakora. Eki kicweka caza kutukwasa kumanya oku turi kubasa kukizaho kwegesa ge.
^ par. 4 Reba ekicweka ekiri kugira ngu: “Waaba Nooyegyesa Omuntu Baibuli Yetantare Ebi,” omu Obuheereza n’Oku Turikutwaza Akatabo k’Okukoresa k’Okwamwenda 2016.
^ par. 8 Za ahari TURI BAHA? > EBYABIREHO.
^ par. 9 Ahari JW Library®, za ahari MEDIA > ENTERANE ZITU N’OKUBURIRA > EBI TURI KUKORESA OMU KUBURIRA.
^ par. 15 Reba ekicweka ekiri kugira ngu: “Rukundo eyi ori kukunda Yehova n’okumusima nibituma wabatizibwa,” n’ekiri kugira ngu: “Mbehi oyetegwire kubatizibwa?,” omu Munara g’Omurinzi g’Okwakashatu 2020.
^ par. 77 EBISHUSHANI: Bwanyima y’okwegesa Bibuli, munyanyazi omanyirire yayijusya omwegesa ku atashemerire kugamba byingi yaba ari kwegesa.
^ par. 79 EBISHUSHANI: Omu kwega Bibuli, omukazi yayega oku ari kubasa kuba omukazi murungi. Bwanyima, yagambira omushija weye ebi yayega.
^ par. 81 EBISHUSHANI: Omwegi n’omushija weye bari kushemerererwa omu ka ya munywani wabo owu babugine aha Nju y’Obukama.
