MUTWE WAKULILONGESA 42
Chize Mutuhasa Kukwasa Alongi a Mbimbiliya Hanga Ajame ni Kwapapachisa—Chihanda 2
“Kanyama kuli yena mwene ni ku longeso lie.”—1 TIMO. 4:16.
MWASO 77 Pangu mu Chifuchi cha Milima
CHIKUMA CHILEMU *
1. Kuchi tunanyingika ngwetu, mulimo wa kutayisa tumbaji wakulamwina mwono wa atu?
MULIMO wa kutayisa tumbaji wakulamwina mwono wa atu! Kuchi tunachinyingika? Muze Yesu ahanyine shimbi yili ha Mateu 28:19, 20, yamba ngwenyi: “Yeenu nukatayise tumbaji . . . , nikuapapachisa.” Mumu liaka upapachiso uli ulemu? Mumu muukwasa mutu hanga akamulamwine. Mutu yoze unazange hanga amupapachise katamba kutayiza ngwenyi, makamulamwina mumu lia ukuule wa Yesu. Kashika postolo Petulu ambile kuli mandumbu jenyi akwa-Kristu ngwenyi: “Upapachiso unanulamwina haliapwila . . . kupalikila ku uhindukilo wa Yesu Kristu.” (1 Petu. 3:21 NM.) Hachino, muze mutu mamupapachisa mahasa kupwa ni kutalatala cha mwono wa mutolo.
2. Kulita ni 2 Timoteu 4:1, 2, yika alongeshi atamba kulinga?
2 Mba tuhase kutayisa tumbaji twatamba kupwa ni utotombo wa kulongesa. (Tanga 2 Timoteu 4:1, 2.) Mumu liaka? Mumu Yesu kambile ngwenyi: “Yeenu nukatayise tumbaji . . . , nikualongesa.” Postolo Paulu kambile hanga tunyongonone mu mulimo wacho, ‘mumu ha kulinga chino mutukalilamwina yetwene ni waze akutwivwa nawa.’ Kashika kuli chikuma chize Paulu ambilile ngwenyi: “Kanyama . . . ku longeso lie.” (1 Timo. 4:16) Amu kulongesa chinatale ha mulimo wa kutayisa tumbaji, kashika twatamba kululieka majila jetu akulongeselamo.
3. Yika mutulilongesa ha mutwe uno hakutwala ku kusongwela malongeso a Mbimbiliya?
3 Musono tunasongwela tununu a tununu a malongeso a Mbimbiliya. Alioze ngwe chize twamona ha mutwe wapalika, twatamba kunyingika chize mutukwasa alongi jacho hanga aapapachise ni kupwa tumbaji twa Yesu. Ha mutwe uno, mutulilongesaho yikuma yikwo yitano yize hita longeshi atamba kulinga mba akwase longi yenyi ajame ni kumupapachisa.
ZACHISA MBIMBILIYA MUZE UNALONGESA
Eta kuli umwe ndumbu yoze wajama hanga akukwase kuzachisa Mbimbiliya muze unalongesa (Tala maparagrafu 4-6) *
4. Mumu liaka longeshi katambile kuhanjika chinji muze anasongwela longeso lia Mbimbiliya? (Tala maliji mushi lia lifwo.)
4 Yetu twakuzanga chinji yize twakulongesa kukatuka mu Mbimbiliya. Kashika mutuhasa kuzanga kuhanjika chinji ha yuma yacho. Hachino, chipwe ngwe unasongwela Longeso lia Kaposhi wa Kutalila, Longeso lia Mbimbiliya lia Chikungulwila hanji longeso lia Mbimbiliya, kasongo katambile kuhanjika chinji. Mba tuzachise Mbimbiliya ha kulongesa, longeshi katamba kukeya hanga achine kuhanjika chinji hanji kulumbununa yuma yeswe yize ananyingika hakutwala ku chimwe chisoneko cha Mbimbiliya. * (Yoa. 16:12) Tesa chinyingi cha Mbimbiliya chize wapwile nacho muze te machikupapachisa ni chize uli nacho haliapwila. Muze akupapachishile kota te unanyingika wika yuma yikehe hakutwala ku Mbimbiliya. (Hepre. 6:1) Kwapalikile miaka yinji mba upwe ni chinyingi chize uli nacho musono, kashika kanda weseka kulongesa longi ye yuma yeswe yize unanyingika ha chisuho chimuwika.
5. (a) Kulita ni 1 A-Tesalonika 2:13, yika tunazange hanga longi yetu anyingike hakutwala ku longeso lia Mbimbiliya? (b) Kuchi mutuhasa kukolweza umwe longi kuhanjika hakutwala ku yize analilongesa?
5 Tunazange hanga longi yetu anyingike ngwo, yuma yize analilongesa yinakatuka mu Mbimbiliya. (Tanga 1 A-Tesalonika 2:13.) Kuchi mutuhasa kuchilinga? Kolweza longi ye hanga ahanjike hakutwala ku yuma yize analilongesa. Shimbu ulumbunwine longi yisoneko yeswe, mwite hanga neye akulumbunwine yimwe. Kwasa longi kumona chize Liji lia Zambi linatale hali iye. Muhule yihula yize muyimukwasa kuhanjika chize anevu ku mbunge hakutwala ku yisoneko yize anatange. (Luka 10:25-28) Chakutalilaho, muhule ngwe: “Kuchi chisoneko achi chakukwasa kumona chimwe chitanga cha Yehova?” “Kuchi muhasa kuyuka ha kukaula maliji a chisoneko chino?” “Kuchi unevu hakutwala ku yuma yino walilongesa?” (Yishi. 20:5) Chuma chilemu hi unji wa yinyingi ko yize longi mapwa nayo, alioze chili kuzanga yize analilongesa.
6. Mumu liaka chili chipema kuya ni ndumbu yoze wajama ku longeso lietu lia Mbimbiliya?
6 Shina wakuya ni kusongwela malongeso a Mbimbiliya ni mandumbu waze ajama? Nyi wakuya no, muhasa kwahula yize ayo akunyonga hakutwala ku chize wakusongwela longeso lia Mbimbiliya, ni chize wakuzachisa Mbimbiliya muze unalongesa. Nyi unazange kupwa longeshi mupema, watamba kupwa mukwa-kulikehesa. (Tesa ni Yili. 18:24-26.) Hula nawa ndumbu wacho hanga akulweze nyi yuma yize unalongesa, longi kanayivu. Nyi mukalakala nenyi ha jimwe poso, muhasa kumwita hanga akukwase kusongwela longeso lia Mbimbiliya. Chino muchikwasa longi hanga anunge ni kulemesa longeso lienyi lia Mbimbiliya. Kanda unyonga ngwe, au kali wika longi “ye” nawa ngwo niumwe katambile kumusongwela longeso lia Mbimbiliya. Chuma chilemu chize unazange chili ngwo, longi ye ajame ku ufulielo.
LONGESA NI CHISEKE HAMWE NI SHINDAKENYO
Lweza longi ye yakulitakana nayo ya mandumbu amwe waze alumwine mwono wo, hanga amone chize mahasa kukaula yize analilongesa ku mwono wenyi (Tala maparagrafu 7-9) *
7. Yika muyihasa kukwasa longi wa Mbimbiliya kuzanga yize analilongesa?
7 Longi ye katamba kumona ngwo, wakuzanga ni kufuliela ha umwenemwene wa Mbimbiliya uze wakulongesa. (1 Tesa. 1:5) Chino muchimukwasa kuzanga yize analilongesa. Nyi muchilita, mulweze chize kukaula shimbi ja Mbimbiliya chakukwasa ku mwono we. Chino muchimukwasa kumona ngwo, mu Mbimbiliya muli usongwelo upema uze muuhasa kumukwasa.
8. Yika nawa watamba kulinga hanga ukwase longi ye, nawa mumu liaka watamba kuchilinga?
8 Muze unalilongesa ni longi ye, mulweze chize Mbimbiliya yakwashile mandumbu amwe waze apwile ni kapinda ngwe yoze iye ali nenyi ni chize amukumbile. Muhasa kuya ku zuwo lia longi ye ni umwe ndumbu wa mu chikungulwila chenu, yoze chilweza chenyi muchihasa kuyukisa longi ye. Hanji muhasa kuwana yilweza yipema ha site jw.org ha chikuma chinambe ngwo, “Mbimbiliya Yakwalumuna Mwono wa Atu.” * Yilweza yacho ni yinema, muyikwasa longi ye kumona ulemu wakukaula shimbi ja Mbimbiliya ku mwono wenyi.
9. Kuchi muhasa kukolweza longi ye hanga apwe ni kuhanjika ni asoko ni masepa jenyi yuma yize analilongesa?
9 Nyi longi ye hanambate, shina mutu yoze alimbata nenyi neye kanalilongesa? Nyi ka, musanyike hanga neye alilongese. Kolweza longi ye hanga apwe ni kuhanjika ni asoko ni masepa jenyi yuma yize analilongesa. (Yoa. 1:40-45) Kuchi mahasa kuchilinga? Muhule ngwe: “Kuchi muhasa kulumbununa yuma yize unalilongesa kuli asoko je?” hanji ngwo, “Chisoneko chika muhasa kuzachisa ha chikuma chino hanga uhanjike ni sepa lie?” Chino muchisolola ngwo, unafumbu longi ye hanga apwe longeshi. Hachino, muze majama, iye mahasa kupwa mukwa-kwambujola yoze kanda achimupapachisa. Muhasa kuhula longi ye nyi kananyingika umwe mutu yoze unazange kulilongesa Mbimbiliya. Nyi matayiza, fupa kuhanjika ni mutu wacho ni kawashi hanga uputuke kulilongesa nenyi Mbimbiliya. Musolwele chinema chinambe ngwo, Kuchi Longeso lia Mbimbiliya Akulilinga? *
KOLWEZA LONGI YE APUTUKE KULIKATA NI MANDUMBU MU CHIKUNGULWILA
Kolweza longi ye hanga apwe ni masepa mu chikungulwila (Tala maparagrafu 10-11) *
10. Kulita ni 1 A-Tesalonika 2:7, 8, kuchi longeshi mahasa kwimbulula chilweza cha Paulu?
10 Alongeshi katamba kuzanga alongi jo ni mbunge yeswe, ha kwamona ngwo kwasala hakehe mapwa mandumbu jetu. (Tanga 1 A-Tesalonika 2:7, 8.) Hi chashi ko kuli ayo kuhichika masepa jo waze keshi kuwayila Yehova ni kwalumuna mwono hanga amulingile. Twatamba kwakwasa hanga apwe ni masepa apema mu chikungulwila. Pwako sepa lia longi ye ha kupalikisa nenyi mashimbu, hi wika ko muze nunalilongesa, alioze ni ha mashimbu akwo nawa. Kusanyika longi ku telefone, kumutumina mesage hanji kuya ni kumumeneka muchisolola ngwo, wakulihulumba hali iye.
11. Yika tunazange hanga alongi jetu awane mu chikungulwila, nawa mumu liaka?
11 Atu kakwamba ngwo, “Mwana wa mu chihunda hi wa mutu umuwika ko.” Mutuhasa kwamba ngwetu, mba mutu apwe kambaji kakufupiwa ukwaso wa chikungulwila cheswe. Kashika alongeshi ajama, kakusolola alongi jo kuli mandumbu mu chikungulwila waze mahasa kwakwasa kukola ku ufulielo. Muze longi maputuka kulikata ni mandumbu mu chikungulwila, ayo mahasa kumukwasa kupwa sepa lia Zambi ni kumutakamisa muze mapalika mu kapinda. Tunazange hanga hita longi alivwe ngwo, neye kali chihanda cha chikungulwila, usoko wetu wa ku spiritu. Tunazange hanga hita longi amone zango lize liatwama mukachi ketu. Chino muchimukwasa kulisapula ni atu waze keshi kumukwasa kukundama kuli Yehova. (Yishi. 13:20) Nyi masepa jenyi akulu mamusapula, iye mapwa ni shindakenyo ngwenyi, mawana masepa amwenemwene mu ululikiso wa Yehova.—Marku 10:29, 30; 1 Petu. 4:4.
SHINDAKENYA ULEMU WA KULIHANA KULI YEHOVA NI UPAPACHISO
Hakehe-hakehe longi wa Mbimbiliya yoze wakusa tachi mahasa kujama ni kumupapachisa! (Tala maparagrafu 12-13)
12. Mumu liaka twatamba kuhanjika ni alongi jetu hakutwala ku kulihana kuli Yehova ni kwapapachisa?
12 Watamba kuhanjika yisuho yinji ni longi ye hakutwala ku chikuma cha kulihana kuli Yehova ni kumupapachisa. Mumu chikuma chilemu chize chakututwala kulilongesa Mbimbiliya ni atu, chili kwakwasa awayile Yehova ni kwapapachisa. Muze mukupalika amwe tukweji ni kulilongesa ni umwe mutu chipi-chipi muze maputuka kuya ku kukunguluka, iye katamba kunyingika ngwo, tunazange kumukwasa hanga apwe Chela cha Yehova.
13. Yika longi wa Mbimbiliya atamba kulinga mba amupapachise?
13 Kuli yuma yinji yize longi yoze unazange hanga amupapachise atamba kulinga! Chitangu, longi katamba kunyingika Yehova, kumuzanga ni kumufuliela. (Yoa. 3:16; 17:3) Hachino, longi mapwa sepa lia Yehova ni kuputuka kulikata ni mandumbu mu chikungulwila. (Hepre. 10:24, 25; Tia. 4:8) Hakehe-hakehe, longi maputuka kwecha kulinga yuma yipi ni kulikonyeka ku shili yenyi. (Yili. 3:19) Mba hi maputuka kulweza akwo yuma yize analilongesa. (2 Kori. 4:13) Hachino, malihana kuli Yehova ni kumupapachisa. (1 Petu. 3:21; 4:2) Lino liakupwa tangwa lia uwahililo kuli eswe! Muze longi ye masa tachi hanga alumune mwono wenyi ni kulinga yuma yalita, watamba kumuchichimieka ni kumukolweza hanga anunge ni kulinga yuma yacho.
HENGWOLA MASHIMBU ESWE NYI LONGI YE KANAJAME
14. Kuchi longeshi mahasa kuhengwola longi yenyi hanga anyingike nyi kanajame?
14 Twatamba kupwa yimbovu muze tunakwase longi ajame hanga alihane kuli Zambi ni kumupapachisa. Alioze twatamba nawa kunyingika nyi iye kanazange kulingila Yehova. Shina longi ye kanasolola ngwo kakwononokena shimbi ja Yesu? Nyi kanazange wika kulilongesa Mbimbiliya?
15. Yuma yika muyihasa kukwasa longeshi kumona nyi longi yenyi kanajame?
15 Hengwola mashimbu eswe umone nyi longi ye kanayi ni kujama. Chakutalilaho: Shina kakulweza Yehova chize akwivwa? Kakulemba kuli Yehova? (Samu 116:1, 2) Shina kakuzanga kutanga Mbimbiliya? (Samu 119:97) Kakuya ku kukunguluka mashimbu eswe? (Samu 22:22) Shina kanalumuna mwono wenyi kulita ni yize akulilongesa? (Samu 119:112) Haputuka kuhanjika ni asoko ni masepa jenyi hakutwala ku yize akulilongesa? (Samu 9:1) Chahiana ulemu, shina kanazange kupwa Chela cha Yehova? (Samu 40:8) Nyi longi ye keshi kulinga nichimwe chuma chize twatongola, eseka kunyingika mumu liaka, hanyima mba munushimutwina ha chikuma chacho ni zango. Alioze mulweze yuma yeswe zwalala. *
16. Yika muyihasa kutukwasa kumona nyi twatamba kwecha kulilongesa ni umwe longi?
16 Hengwola mashimbu eswe hanga umone nyi muchilita kununga ni kulilongesa ni umwe longi. Lihule ngwe: ‘Shina longi yami kakululieka longeso lienyi? Kakuzanga kuya ku kukunguluka? Shina machinunga ni kulinga yuma yipi? Kutala machinunga ni kuya ku yingeleja yenyi?’ Nyi wakumbulula ngwe ewa, kununga ni kulilongesa ni mutu wa mutapu au, chili ngwe kulongesa mutu kusana yoze kasolo kunjila mu meya! Nyi ngwe longi ye keshi kuzanga yize akulilongesa, kasolo kwalumuna mwono wenyi, kununga ni kulilongesa nenyi chili chamokomoko.
17. Kulita ni 1 Timoteu 4:16, yika alongeshi atamba kulinga?
17 Twakulemesa chinji chiteli chetu cha kutayisa tumbaji, nawa tunazange kukwasa alongi jetu hanga asenye kulutwe ni kwapapachisa. Kashika twatamba kuzachisa Mbimbiliya muze tunalongesa, kulongesa ni chiseke hamwe ni shindakenyo. Kukolweza longi ye hanga apwe ni masepa mu chikungulwila. Chikwo nawa, twatamba kushindakenya ha chikuma cha kulihana kuli Yehova ni kumupapachisa ni kuhengwola hita shimbu nyi longi kanasenye kulutwe. (Tala mushete “ Yize Alongeshi Atamba Kulinga Mba Akwase Alongi Aapapachise.”) Twakuwahilila ha kulihana mu mulimo uno wakulamwina mwono wa atu! Kashika, tunungenu ni kusa tachi hanga tululieke majila jetu akulongeselamo ni kukwasa alongi jetu a Mbimbiliya hanga aapapachise.
MWASO 79 Alongesenu Ajame
^ kax. 5 Kusongwela malongeso a Mbimbiliya, chakutwaha uhashi wa kukwasa atu anyingike chize Yehova anazange hanga ayo anyonge, evwe ni kulinga yuma. Mutwe uno, muulumbununa chize mutuhasa kululieka majila jetu akulongeselamo.
^ kax. 4 Tala chikuma, “Miheto Yize Twatamba Kwehuka Muze Tunasongwela Longeso Lia Mbimbiliya,” ha Mukanda Wakuzachisa ha Kukunguluka cha Mwono Wetu ni Mulimo Wetu wa Setembro 2016.
^ kax. 8 Yako ha SANGO JA YETU > YAKULITAKANA NAYO.
^ kax. 9 Mu JW Library®, yako ha YINEMA > KUKUNGULUKA NI MULIMO WETU > YUMA YAKUZACHISA MU MUNDA.
^ kax. 15 Tala mitwe yinambe ngwo, “Zango ni Kusakwila Yehova Yakukwasa Mutu Hanga Amupapachise” ni “Hiwalilulieka Hanga Akupapachise?” ha Kaposhi wa Kutalila wa Março 2020.
^ kax. 77 ULUMBUNWISO WA YIZULIE: Hanyima lia limwe longeso lia Mbimbiliya, umwe ndumbu wa pwo wajama kanakwase ndumbu wa pwo yoze wasongwela longeso liacho ha yize atamba kulinga mba ahone kupwa ni kuhanjika chinji muze analongesa.
^ kax. 79 ULUMBUNWISO WA YIZULIE: Umwe longi wa Mbimbiliya muze analilongesa yamona chize mahasa kupwa pwo mupema. Hanyima, kanalweza mukwo-lunga yize alilongesa.
^ kax. 81 ULUMBUNWISO WA YIZULIE: Longi yomwene ni mukwo-lunga kali ku zuwo lia ndumbu wa pwo yoze alinyingikanga nenyi mu Zuwo lia Wanangana.
