1. Zultu siternak rian cu mi nunnak khamhnak rian a si ti kha zeitindah kan hngalh khawh?

ZULTU siternak rian cu mi nunnak khamhnak rian a si. Zeitindah kan hngalh khawh? Matthai 28:19, 20 ah Jesuh nih hitin nawl a kan pek: “Va kal u law, . . . ka zultu ah va ser hna u . . .  tipilnak va pe hna.” Tipil in a biapitnak kong he aa tlaiin zeidah kan hngalh? Zungzal nunnak hmuh kan duh ahcun tipil kan in a hau. Tipil in a duhmi pakhat nih zungzal nunnak hmuh khawhnak lam pakhat cu Jesuh cu kan caah a thi i a thoṭhan ti kha a zumh a hau. Cucaah lamkaltu Peter nih zumtukhat pawl kha “atu i nanmah aan khamhtu hna tipil innak [cu] . . . Jesuh Khrih thihnak in a thawhṭhannak thawngin” a si tiah a ti hna. (1 Pet. 3:21) Cucaah zultu thar cu tipil a in tikah zungzal nunnak ruahchannak a ngei kho.

2. Cawnpiaktu ṭha pakhat in 2 Timote 4:1, 2 ah a chim bantukin zeidah kan tuah awk a si?

² Zultu an si khawh nakhnga “cawnpiak” awkah cawnpiaktu ṭha kan si a hau. (2 Timote 4:1, 2 rel.) Zeicah? Zeicahtiah Jesuh nih hitin nawl a kan pek: “Va kal u law, . . . ka zultu ah va ser hna u . . . , va cawnpiak hna u.” Lamkaltu Paul nih “nangmah naa khamh hlei ah na bia a theimi kha na khamh khawh hna nakhnga” mah rian kha “teima tein” ṭuan tiah a ti. Cun hitin a ti: “Nangmah kha ṭha tein i ralring law na cawnpiaknak zong kha i ralring fawn.” (1 Tim. 4:16) Cucaah zultu si hna seh ti kan duh ahcun kan cawnpiakmi hna kha ṭha tein kan bawmh hna a hau.

3. Baibal cawnpiaknak kong he aa tlaiin hi capar ah zei kong dah kan i ruah hna lai?

³ Mi nuai tampi nih Baibal biatak an hngalh khawh nakhnga  hmaan tein kan cawnpiak hna. Asinain a hmasa capar ah kan cawn cang bantukin Khrih Jesuh zultu si awkah tipil in ding tiangin an ṭhancho khawh nakhnga mi pawl kha zeitindah kan bawmh khawh hna timi kong kha hngalh kan duh. Hi capar ah Baibal a cawngmi hna kha tipil in ding tiangin an ṭhancho khawh nakhnga bawmh awkah Baibal cawnpiaktu pakhat cio nih an tuah awk a simi a kong panga kha kan i ruah hna lai.

4. Baibal cawnpiaktu nih Baibal a cawnpiak hna tikah zeicah bia tampi a chim awk a si lo? (A tanglei fianternak zoh.)

⁴ Baibal in midang cawnpiak kha kan duh. Cucaah a kong kha tampi chim kan duh men hna lai. Asinain Cawn Awk Vennak Innsang, Khrihfabu Baibal Cawnnak asiloah Baibal cawnpiaknak kan tuah tikah caan tlaitu nih tam tuk in chim awk a si lo. Cawnpiaktu kip nih an cawnpiak hna tikah Baibal kha hmualngei tein hman an duh. Cucaah Baibal caang asiloah a konglam he aa tlaiin tam tuk in chim lo awkah an i ralrin a hau. * (Johan 16:12) Tipil na in lio le atu ah na hngalhmi Baibal kong kha tahchunh. Tipil na in lio ahcun a hrampi Baibal cawnpiaknak kong lawng kha na hngalh men lai. (Heb. 6:1) Asinain a tu bantukin Baibal kong na hngalh khawh nakhnga kum tampi a caan na rak pek. Cucaah Baibal a cawngkami kha voikhatte ah a konglam dihlak cawnpiak awkah i zuam hlah.

5. (a) Baibal kan cawnpiakmi nih 1 Thesalon 2:13 ningin zeidah hngalthiam seh ti kan duh? (b) Baibal kan cawnpiakmi nih a cawnmi kong kha a chim nakhnga zeitindah tha kan pek khawh?

⁵ Baibal kan cawnpiakmi nih Baibal in a cawnmi kong kha hngalthiam seh ti kan duh. (1 Thesalon 2:13 rel.) Zeitindah kan tuah khawh? A cawn khawhmi thil kong kha chim dingin tha pe. Nangmah nih Baibal kong kha fianter zungzal loin amah kha a kong pakhat khat kha fianter. Amah tein Baibal phunglam zulh khawh ning kong kha a hngalh nakhnga bawm. Biahalnak na tuahnak thawngin a relmi kong he aa tlaiin a ruahnak le a intuarnak kha chim awkah a bawmh lai. (Luka 10:25-28) Tahchunhnak ah hitin hal: “Mah Baibal caang nih Jehovah a sining pakhatkhat kha hngalh awkah zeitindah aan bawmh?” “Mah Baibal biatak in zeitindah ṭhathnemhnak na hmuh khawh?” “Na cawnmi kong he aa tlaiin zeitindah na ruah?” (Ptb. 20:5) A biapi bikmi cu Baibal na cawnpiakmi nih zeitlukin dah a hngalh timi si loin a hngalhmi kong kha zeitlukin dah a sunsak i a nunnak ah a hman ti kha a si.

6. Baibal cawnpiaknak kan tuah lioah hmuhtonnak a ngeimi thawngthanhtu he kalṭi cu zeicah a ṭhat?

 ⁶ Baibal cawnpiaknak na tuah lioah, hmuhtonnak a ngeimi a dang thawngthanhtu pawl kha na sawm bal hna maw? Na sawm hna ahcun Baibal cawnpiaknak na tuahmi kha zeitindah an ruah tiah na hal khawh hna. Cun Baibal ṭha tein na hmang maw, hmang lo timi kong he aa tlaiin an ruahnak zong kha na hal khawh hna. Cawnpiaktu ṭha si dingin na ṭhancho khawh nakhnga aa toidormi na si a hau. (Lamkaltu 18:24-26 he tahchunh.) Hmuhtonnak a ngeimi thawngthanhtu kha Baibal ka cawnpiakmi nih a cawnmi kha a hngalhthiam lai tiah na ruat maw tiah hal. Zarhkhat asiloah zarhkhat leng na um lo ding a si ahcun mah thawngthanhtu kha Baibal cawnpiaknak kha amah nih tuah dingin bawmhnak na hal khawh. Cutin na tuah ahcun hmaan tein Baibal cawnpiaknak na tuah khawh lai i Baibal a cawngmi zong nih Baibal cawnnak cu a biapi tukmi a si ti kha a hngalhthiam lai. Cun Baibal “na” cawnpiakmi nih Baibal cawnpiaknak cu midang he tuah khawh a si lo timi ruahnak a ngei lai lo. Baibal na cawnpiakmi caah a ṭha bikmi kha na duhpiak, cuaah Baibal biatak kong kha tam deuh in cawng peng kho seh ti na duh.

7. A cawnmi kong ah lungthawhnak a ngeih nakhnga Baibal a cawngmi pakhat kha zeinihdah a bawmh lai?

⁷ Baibal na cawnpiakmi nih na lungthawhnak le Baibal ah na hmuhmi biatak kong na zumh kha a hngalh a hau. (1 Thes. 1:5) Cutin na tuah ahcun a cawnmi kong he aa tlaiin hngalh duhnak a ngei deuh lai. Aa tlak ahcun Baibal biatak ningin na nunmi nih na nunnak ah aan bawmh ning kong kha chim. Mah tikah Baibal ah aa telmi zulh awk a tlakmi lamhruainak hna kha a hun hngalh lai i mah in ṭhathnemhnak a hmu kho ve lai.

8. Baibal na cawnpiakmi bawmh awkah zeidah na tuah khawh rih, zeicah cutin na tuah awk a si?

⁸ Baibal cawnpiaknak na tuah lioah amah bantukin buaibainak a tong i a tei khomi a dang unau pawl i an hmuhtonnak kong kha chim. Baibal na cawnpiakmi nih midang sinin ṭhathnemhnak a hmuh khawh nakhnga Khrihfabu chung i unau pakhatkhat kha naa kalpi khawh hna. Asiloah jw.org/my ah taarmi “Baibal Nih An Nunning A Thlen” * timi capar chung i thazaang a pemi hmuhtonnak pakhatkhat kha kawl. Cu bantuk capar le video hna nih Baibal  na cawnpiakmi kha a nunnak ah Baibal phunglam zulh cu fim a si ti kha hngalh awkah a bawmh lai.

9. Baibal na cawnpiakmi nih a cawnmi kong kha a chungkhar le a hawile sinah a chim khawh nakhnga zeitindah tha na pek khawh?

⁹ Baibal na cawnpiakmi cu innchunghawi a ngei cangmi a si ahcun a innchunghawi tah nan sinah Baibal a cawng ve maw? A cawn lo ahcun cawn ve dingin sawm. Cun Baibal na cawnpiakmi kha a cawnmi kong kha a chungkhar le a hawile sinah chim ve dingin tha pe. (Johan 1:40-45) Zeitindah tha na pek khawh? A sawhsawh tein hitin na hal khawh: “Mah biatak kong hi na chungkhar sinah zeitindah na fianter khawh?” asiloah “Na hawile nih an cohlan nakhnga zei Baibal caang dah na hman lai?” Cutin na halnak thawngin Baibal na cawnpiakmi kha cawnpiaktu si awkah na bawmh khawh lai. Cun sining a tlinh tikah tipil a ing rih lomi thawngthanhtu in phungchimnak ah aa hun i tel kho. Baibal na cawnpiakmi kha a hngalhmi ah Baibal cawn a duhmi an um rih maw tiah na hal khawh. An um a ti ahcun amah he Baibal cawnpiaknak tuah awkah pehtlaihnak tuah colh hna. Baibal Cawnnak Zeitindah An Tuah? timi video kha hmuhsak. *

10. Baibal cawnpiaktu pakhat nih 1 Thesalon 2:7, 8 ah a chim bantukin Paul kha zeitindah aa zohchunh khawh?

¹⁰ Cawnpiaktu hna nih an cawnpiakmi hna cungah pumpak siaherhnak an ngeih a hau. Annih zong Khrihfabu unau an hung si kho men. (1 Thesalon 2:7, 8 rel.) Asinain vawlei mi hna he i hawikomh ti lo le Jehovah biak awkah a herhmi thlennak tuah cu an caah a fawi men lai lo. Cucaah Khrihfabu chungah hawikom ṭha an hmuh khawh nakhnga kan bawmh hna a hau. Baibal nan cawn lio lawngah si loin caan dang zongah amah he caan nan hmanṭinak thawngin Baibal na cawnpiakmi he hawikom si khawh i zuam. Phone chawnh, cakuat asiloah chikkhat na va lennak thawngin a cungah siaherhnak taktak na ngeih kha langhter.

11. Baibal kan cawnpiakmi hna nih Khrihfabu chungah zeidah hmu hna seh ti kan duh, zeicah?

¹¹ Africa phungtlukbia ah hitin a ti: “Khua kip nih ngakchia pawl an ṭhan nakhnga an bawmh hna a hau.” Hitin kan chim khawh: “Khrihfabu nih zultu an siter hna a hau.” Cucaah Baibal cawnpiaktu hna nih an cawnpiakmi kha anmah cungah a ṭhami huham a ngei khomi Khrihfabu chung i midang he theihhngalhnak an tuahmi hna cu a ṭha tukmi a si. Pathian miphun pawl he an i hawikomh tikah unau pawl nih Jehovah hawikom ṭha si awkah an bawmh khawh  i buaibainak a ton tikah tha an pek khawh. Baibal kan cawnpiakmi hna nih Khrihfabu ka ngei i thlaraulei chungkhar ah kaa tel timi ruahnak ngei hna seh ti kan duh. Cun dawtnak a ngeimi vawleicung pumpi i unau rual ah i tel hna seh ti zong kan duh. Mah nih Jehovah dawt awkah a bawm lomi hna he i hawikomhnak kha ngol awkah a fawiter lai. (Ptb. 13:20) A hmasa i a hawile nih an hlawt hmanhah Jehovah bupi chungah hawikom ṭha ka hmuh khawh hna ti kha a hngalh lai.—Mar. 10:29, 30; 1 Pet. 4:4.

12. Baibal kan cawnpiakmi kha Khrihfa pumpeknak le tipil innak kong zeicah kan chimh a herh?

¹² Khrihfa pumpeknak le tipil innak kong kha atu le atu chim. Baibal cawnpiaknak kan tuahnak a ruang cu tipil a ingmi zultu an hung si khawh nakhnga bawmh kha a si. Hmaan tein Baibal a cawn hnu thla tlawmpal chung ah le a hleiin a hun i pumh hnuah Baibal a cawngmi nih Jehovah Tehte pakhat a si khawh nakhnga bawmh kan duh ti kha a hngalhthiam a hau.

13. Baibal a cawngmi pakhat nih tipil a in khawh nakhnga zeidah a tuah a hau?

¹³ Duhsah tein Baibal a cawngmi pakhat nih tipil in ding timi a hmuitinh kha a tlinh khawh. Pakhatnak, Baibal a cawngmi nih Jehovah Pathian kha a hun hngalh, a hun dawt i a hun zumh. (Johan 3:16; 17:3) Mah tikah Jehovah he hawikom an hung si i Khrihfabu i unau pawl he zong hawikom an hung si. (Heb. 10:24, 25; Jeim 4:8) A donghnak ah Baibal a cawngmi nih a ṭha lomi ziaza kha a hlawt i a sualnak kha aa ngaichih. (Lam. 3:19) Mah lengah atu i a zumhnak kong kha midang zong a chimh hna. (2 Kor. 4:13) Cun amah le amah kha Jehovah sinah aa pumpe i tipil a innak thawngin aa pumpeknak kha a langhter. (1 Pet. 3:21; 4:2) Mah ni cu a hopoah caah a nuam tukmi ni a si. Baibal na cawnpiakmi nih tipil a in khawh nakhnga a herhmi thil a tuah tikah thangṭhat peng. Cun mah thil kha tuah peng ding zongin tha pe.

14. Cawnpiaktu nih a cawnpiakmi a ṭhancho kha zeitindah a hngalh khawh?

¹⁴ Baibal kan cawnpiakmi kha tipil in dingin a ṭhancho khawh nakhnga kan bawmh tikah kan lung a sau a hau. Asinain Jehovah Pahtian biak a duh taktak maw ti zong kan hngalh a hau. Jesuh nawlpekmi zulh awkah aa zuam kha a langhter maw? Asiloah Baibal chung i lungthawh awk ngai a simi a kong lawng kha dah cawn a duh?

15. Cawnpiaktu nih a cawnpiakmi cu tipil in dingin sining a tlinh ti kha zeinihdah a hngalhter lai?

 ¹⁵ Baibal a cawngmi kha a ṭhancho le cho lo hmaan tein dothlat a hau. Tahchunhnak ah, Jehovah kong he aa tlaiin a intuarnak kong kha a langhter maw? Jehovah sinah thla a cam maw? (Salm 116:1, 2) Baibal rel kha a duh maw? (Salm 119:97) Hmaan tein aa pum maw? (Salm 22:22) A nunning he aa tlaiin a herhmi thlennak a tuah maw? (Salm 119:112) A chungkhar le a hawile sinah a cawnmi kong kha a chim maw? (Salm 9:1) A biapi bikmi cu Jehovah Tehte pakhat si kha a duh maw? (Salm 40:8) Baibal a cawngmi nih mah kong he aa tlaiin pakhat hmanh a ṭhancho lo ahcun zeicah a ṭhancho lo ti kha hngalh awkah i zuam law mah kong he aa tlaiin hlangfang tein i ruahṭi u. *

16. Mi pakhat he Baibal cawnnak kha zeitikah dah kan ngol awk a si?

¹⁶ Mi pakhat he Baibal cawnnak ka tuah ti lai maw, tuah ti lai lo ti kha nangmah le nangmah i hal lengmang. Hitin i hal: ‘Baibal a cawngmi nih a cawn dingmi caah i timhtuah loin a um maw? I pumh duh ti loin tah a um maw? A ṭha lomi ziaza hna tah a tuah peng rih maw? A hmaan lomi biaknak ah aa tel peng rih maw?’ Cutin a si peng rih ahcun ṭhancho a duh lomi mi pakhat he Baibal cawn peng dingin i zum hlah. Baibal a cawngmi nih a cawnmi kha a sunsak taktak lo i thlennak a tuah lo ahcun Baibal cawnpiaknak kha ngol khawh a si.

17. Baibal cawnpiaktu dihlak nih 1 Timote 4:16 ningin zeidah an tuah awk a si?

¹⁷ Zultu siternak rian ṭuan cu a biapi tukmi a si i Baibal kan cawnpiakmi hna kha tipil in dingin ṭhancho awkah bawmh kan duh hna. Cucaah cawnpiaknak ah Baibal kha kan hman lai i lungtho tein le zumhnak he kan cawnpiak hna lai. Baibal kan cawnpiakmi hna kha Khrihfabu chungah hawikom i ser dingin tha kan pek hna lai. Pumpeknak le tipil innak kong kha kan chimh hna lai, cun Baibal kan cawnpiakmi hna an ṭhancho le cho lo kha kan i hal lai. (“ Baibal Cawnpiaktu Nih A Cawnpiakmi Tipil In Dingin A Ṭhancho Nakhnga A Tuah Awk A Simi” timi cahmai 13 i rinli kulh ah zoh.) Mah nunnak a khamhmi rian kan ṭuan khawh caah kan i lawm tuk. Baibal kan cawnpiakmi kha tipil in dingin a ṭhancho khawh nakhnga kan si khawh chungin bawmh kan duh.