1. Nemene la ka anyipicine laka, jëne mele la huliwa ne cainöj me inine la itre atr?

 AME la easa cainöj me inine la itre atr, ke easë hi lai a amele angatr! Nemene la ka anyipicine lai? Öni Iesu ngöne Mataio 28:19, 20: “Inine jë la nöjei atr . . . Bapataiso angatre jë.” Öni Tusi Hmitrötr, nyipiewekë troa xomi bapataiso matre hane mel epine palua. Ame la ka ajane troa xomi bapataiso ke, loi e xecie koi angeic laka, jëne la thupene mel me melehmaca i Iesu, ijije hi tro sa mel epine palua. Hnei Peteru aposetolo hna cinyihan, ka hape: ‘Ame la bapataiso, tre kola amele nyipunie enehila . . . jëne la mele hmaca i Iesu Keriso.’ (1 Pet. 3:21) Celë hi matre, ame la kola bapataisone la ketre atr, tro hë angeic a mel.

2. Thenge la 2 Timoteo 4:1, 2, nemene la nyine tro sa kuca matre troa atreine hamë ini?

² Maine easa ajane troa inine la itre atr, loi e tro sa maca me “atreine hamë ini.” (E jë la 2 Timoteo 4:1, 2.) Pine nemen? Pine laka, hnei Iesu hna upi së troa “inine la nöjei atr.” Ketre, hnei Paulo aposetolo hna ithuecatre koi së troa “qale catre” ngöne la huliwa cili ke, ‘tro hë sa amele së, me itre ka drei së.’ Celë hi matre öni nyidrë: “Wai eö kö, me itre ini hnei eö hna hamën.” (1 Tim. 4:16) Eje hi, maine easa ajane troa inine la itre atr, loi e tro sa pane maca troa hamë ini.

3. Nemene la hne së hna troa ce wang ngöne la tane mekun celë?

³ Easa inine la itre nyipici qa hnine la Tusi Hmitrötr kowe la itre milio lao atr e cailo fen. Ngo tune lo hne së hna ce wang, easa ajane tro la itre ka ini tus a xomi bapataiso. Ame ngöne la tane mekun celë, tro sa ce wang la faifi lao  ewekë nyine troa kuca hnene la ka hamë ini, matre xatuane la hnainin troa xomi bapataiso.

4. Pine nemene matre loi e tro la ka hamë ini a xomihni troa ithanata atrun ngöne la kola ini tus? (Wange ju la ithuemacany.)

⁴ Eje hi laka, ka tru koi së la itre nyipici qa hnine la Tusi Hmitrötr. Celë hi matre, easa ajane troa qaja asë la itre hne së hna atre. Ngo ame la easa ini tus memine la ketre atr, loi e tro sa xomihni troa ithanata atrun, tune la itre ka iujine la Ita Ne Thup maine Ini Tusi Hmitrötr Ne La Ekalesia. Loi e troa huliwane la Tusi Hmitrötr me qaja la ka ijij göne la ketre xötr maine tane mekun pena. * (Ioane 16:12) Ketre, loi e troa qaja la eisapengönene la itre hne së hna atre ekö qëmekene tro sa xomi bapataiso me enehila. Ame lo easa xötrei xomi bapataiso, maine jë trotrohnine hi së la itre ini ka tru. (Heb. 6:1) Thupene la itre macatre, hne së hna xome la itre xaa ini qa hnine la Tusi Hmitrötr. Celë hi matre, tha tro kö sa aca tro qaja la itre ini cili kowe la hnainin.

5. (a) Thenge la 1 Thesalonika 2:13, nemene la hne së hna ajane troa trotrohnine hnene la hnainin? (b) Tro sa xatua angeic tune kaa troa qaja la mekuna i angeic göne la ini tus?

⁵ Easa ajane tro la hnainin a trotrohnine laka, itre Trengewekë i Akötresie la itre hnei angeic hna inin. (E jë la 1 Thesalonika 2:13.) Nemene la nyine tro sa kuca? Ithuecatre jë koi angeic troa qaja la mekuna i angeic göne la ini tus. Tha tro kö sa canga qejepengöne la itre xötr. Loi e tro pe sa sipo angeic troa qaja la hnei angeice hna trotrohnin. Ketre, xatua angeice jë troa thele la aqane troa trongëne la itre ini ne la Tusi Hmitrötr. Nyipiewekë fe tro sa hnying matre atre la mekuna i angeic göne la itre xötr hna e. (Luka 10:25-28) Maine jë tro sa hnyingë angeic ka hape: “Nemene la thiina i Iehova ka mama ngöne la xötre celë?” “Nemene la aqane xatua eö hnene la mekun celë?” “Nemene la mekuna i eö göne la ini celë?” (Ite Edomë 20:5) Ame la ka sisitria ke, tha ene kö la troa kapa la nöjei ini hnene la hnainin. Loi e tro pe angeic a hniin me trongëne la itre ini cili.

6. Pine nemene matre loi e tro sa ce tro memine la ketre trejin ka macaj matre troa kuca la ini tusi së?

⁶ Hapeu, hne së kö hna hane ce tro memine la ketre trejin ka macaj matre troa kuca la ini tusi së? Maine eje hi, hnyingë  angeice jë la mekuna i angeic göne la aqane iujine së la ini tus me aqane huliwane së la Tusi Hmitrötr. Maine easa ajane troa maca troa hamë ini, loi e tro sa hetre hni ne ipië. (Wange ju fe la Itre Huliwa 18:24-26.) Ketre, hnyingë angeice jë ka hape, trotrohnine kö la hnainin la itre ini hna ce wang. Nge maine easa mekun troa paatre koi caas maine itre wiik, loi e tro sa ahnithe koi angeic la ini tusi së matre troa sisedrëne la ini tus. Tro ha mama kowe la hnainin laka, ka sisitria catre troa inine la Tusi Hmitrötr. Tha tro kö sa mekun laka, ini tusi së nge pëkö ka atreine troa nyihnai së. Easa ajane tro la hnainin a kapa la itre nyipici qa hnine la Tusi Hmitrötr me acatrene la lapaune i angeic koi Iehova.

7. Nemene la ka troa xatuane la hnainin troa wangatrune la itre hnei angeic hna inin?

⁷ Loi e tro sa amamane kowe la hnainin la madrine së me mejiune së ngöne la easa ini tus me angeic. (1 Thes. 1:5) Tro hë angeice lai a wangatrune la itre hnei angeic hna inin. Loi e tro fe sa qaja koi angeic la itre eloin hne së hna kapa qa ngöne la hna trongëne la itre trepene meköti ne la Tusi Hmitrötr. Tro hë angeic a öhne laka, hetrenyi e hnine la Tusi Hmitrötr la itre eamo ka lolo thatraqane la mele i angeic.

8. Nemene la nyine tro sa kuca matre troa nyixane la ini tusi së, nge pine nemene matre ka nyipiewekë?

⁸ Loi e tro sa qaja kowe la hnainin la itre jol hna melën hnene la itre xaa trejin, memine la aqane cile angatr kowe la itre jole cili. Ijije hi tro sa könëne la itre trejine cili troa sine la ini tusi së, matre xatuane la hnainin. Ketre, hetrenyi la itre xaa tulu ngöne la sit jw.org, ngöne la hna hape, “Saze Hë La Mel, Hnei Tusi Hmitrötr.” * Jëne la itre tane mekun me itre video cili, tro la hnainin a trotrohnine la enyipiewekëne la itre trepene meköti ne la Tusi Hmitrötr.

9. Tro sa xatuane tune kaa la hnainin troa ce thawa la itre hnei angeic hna inin kowe la fami me itre sinee i angeic?

⁹ Tune kaa e ka faipoipo la hnainin maine ka ce lapa pena memine la ketre atr? Ka ini tusi kö la föi angeic? Maine waea, loi e troa hane hë angeic troa sine la ini  tus. Loi e tro fe sa ithuecatre kowe la hnainin troa ce thawa la itre hnei angeic hna inin kowe la hnepe lapa i angeic me itre sinee. (Ioane 1:40-45) Maine jë tro sa hnyingë angeic ka hape: “Nemene la aqane tro eö a qejepengöne la nyipici celë kowe la fami eö?” maine “Nemene la xötr hnei eö hna troa xom matre anyipicine kowe la sinee i eö la mekun celë?” Easë hi lai a xatua angeic troa hamë ini. Nge maine ijiji angeice hë, loi e tro sa ithuecatre kowe la hnainin troa hane cainöj. Ijije fe tro sa hnyingë angeic la itre xan ka ajane troa ini Tusi Hmitrötr, matre amamane la video hna hape, Nemene La Aqane Trongene La Ini Tusi Epun? *

10. Thenge la 1 Thesalonika 2:7, 8, tune kaa la aqane hamë ini Paulo, nge nemene la aqane tro sa nyitipu nyidrë?

¹⁰ Nyipiewekë tro sa wangatrune la itre ka ini tus me easë. Loi e tro sa goeë angatr ceitu me itre ka troa xötrethenge Iesu. (E jë la 1 Thesalonika 2:7, 8.) Eje hi, tha ka hmaloi kö koi angatr troa nue la itre sinee i angatr ka tha hmi kö, me saze aqane mel matre nyihlue i Iehova. Ngo loi e tro sa xatua angatr troa hetre nyipi sinee e hnine la ekalesia. Loi e tro fe sa nyisinee i angeic. Tha tro hmekuje kö sa wai angeic matre troa ini tus, ngo loi e tro fe sa xomi ijine troa ce lapa me angeic. Nyipiewekë tro sa hë angeic me cinyany maine wai angeic pena. Tro hë lai a mama koi angeic laka, ka tru angeic koi së.

11. Nemene la hne së hna ajane kowe la hnainin?

¹¹ Kola qaja ngöne la ketre edromë e Afrique, ka hape: “Hnëqa ne la tribu asë troa hetrune la nekönatr.” Ijije hi tro sa qaja ka hape: “Hnëqa ne la ekalesia asë troa xatuane la hnainin troa xötrethenge Iesu.” Eje hi, loi e tro sa hane tro fë la hnainin kowe la itre xaa trejin ka maca, matre tro angatr a hamë ithuecatre koi angeic me xatua angeic ngöne la itre ijine jol. Ame la aja së, tre, tro la hnainin a öhn laka, ka nyipiewekë angeic e hnine la ekalesia, ene la lapa ka cahae i Iehova. Loi e troa mama koi angeic la ihnimi së. Tro hë lai a hmaloi koi angeic troa iananyi hnyawa memine la itre atr ka tha hnimi Iehova kö. (Ite Edomë 13:20) Ketre, maine troa nuetriji angeic elany hnene la itre sinee i angeic, ngo xecie koi angeic laka, hetre itre nyipi sinee e hnine la organizasio i Iehova.—Mar. 10:29, 30; 1 Pet. 4:4.

12. Pine nemene matre loi e tro sa amamane kowe la hnainin la enyipiewekëne la troa sa xepu me xomi bapataiso?

¹² Loi e tro sa amamane kowe la hnainin la enyipiewekëne la troa sa xepu me xomi bapataiso. Eje hi, ame la aja së, tre, tro la hnainin a hane nyihlue i Iehova me xomi bapataiso. Maine itre treu hë ne angeic a ini tus me sine la itre icasikeu, loi e tro angeic a trotrohnine laka, kola ini angeic troa ketre Temoë Iehova.

13. Nemene la nyine troa kuca hnene la hnainin qëmekene troa xomi bapataiso?

¹³ Hetre nyine tro la hnainin a kuca qëmekene troa xomi bapataiso. Loi e tro angeic a pane atrepengöi Iehova hnyawa, me acatrene la ihnim me lapaune i angeic koi Nyidrë. (Ioane 3:16; 17:3) Celë hi aqane tro angeic a acatrene la aqane imelekeu i angeic me Iehova me hetre nyipi sinee e hnine la ekalesia. (Heb. 10:24, 25; Iako. 4:8) Thupene lai, loi e tro la hnainin a nuetrije la itre hna majemine kuca ka ngazo me ietra. (Itre hu. 3:19) Nge pine laka, catrecatre la lapaune i angeic, tro hë angeice a tro fë la nyipici koi itre xan. (2 Kor. 4:13) E cili, tro hë angeice a sa xepu koi Iehova me xomi bapataiso. (1 Pet. 3:21; 4:2) Drei la madrine ka tru kowe la ekalesia! Loi e tro palahi sa qaja aloine me ithuecatre kowe la hnainin ngöne la angeic a kuca la itre ewekë celë.

14. Tune kaa la aqane tro sa waipengöne la aqane kökötre hnene la hnainin?

¹⁴ Nyipiewekë tro sa atreine xomihni aqean, ngöne la easa xatuane la hnainin. Ngo loi e tro sa thele troa atre laka, hetre aja i angeice troa nyihlue i Iehova. Loi e tro sa isa hnying ka hape, “Hapeu, angeice kö a thele troa trongëne la itre hna amekötin hnei Iesu? Maine angeice hi a ajane troa atre la itre mekune qa hnine la Tusi Hmitrötr?”

15. Nemene la itre hnying ka troa xatuane la ka hamë ini troa waipengöne la hnainin?

¹⁵ Loi e tro palahi sa waipengöne la aqane kökötre la hnainin ngöne la nyipici. Hapeu, angeice kö a fe la hni angeic koi Iehova me thith? (Sal. 116:1, 2) Angeice kö a e Tusi Hmitrötr? (Sal. 119:97) Angeice kö a sine la itre icasikeu? (Sal. 22:22) Angeice fe kö a thele troa saze la mele i  angeic? (Sal. 119:112) Hapeu, angeice kö a qaja kowe la fami angeic me itre sinee, la itre hnei angeic hna inin? (Sal. 9:1) Aja i angeice kö troa ketre atre Anyipici Iehova? (Sal. 40:8) Maine easa öhn laka, pëkö hnei angeice hna kuca matre troa kökötre ngöne la nyipici, loi e tro sa hnying me ithanata hnyawa me angeic. *

16. Nemene la itre hnying ka xatua së troa wang e tro palahi sa sisedrën maine nue la ini tus?

¹⁶ Maine hetre ka ini tusi me easë, loi e tro sa wange laka, tro kö sa sisedrën maine nue pena la ini tus. Loi e tro sa isa hnying ka hape: ‘Angeice kö a hnëkën la ini tusi angeic? Angeice kö a sine la itre icasikeu? Hnei angeice kö hna nuetrije la itre hna majemine ka ngazo, memine la hmi angeice hnapan?’ Maine pëkö hnei angeic hna kuca ke, kösë easa ini angeic troa aj ngo xele pe angeice troa si! Maine tha madrine kö la hnainin nge xele angeice troa saze, hapeu, tro kö sa sisedrëne la ini tus?

17. Thenge la 1 Timoteo 4:16, nemene la nyine troa kuca hnene la itre ka hamë ini?

¹⁷ Ketre hnëqa ka sisitria la troa inine la itre atr, nge easa ajane troa xatuane la hnainin troa xomi bapataiso. Celë hi matre, easa huliwane la Tusi Hmitrötr, nge easa madrin me mejiun ngöne la easa hamë ini. Easë fe a ithuecatre kowe la hnainin troa thele sinee e hnine la ekalesia. Ketre, easa waipengöne la aqane kökötre angeic ngöne la nyipici, me amamane la enyipiewekëne troa sa xepu me xomi bapataiso. (Wange ju la hna eköhagen götrane 13, “ Nyine Troa Kuca Hnene La Ka Hamë Ini.”) Nyipici, easa madrine troa sine la huliwa ne iamele, ene la huliwa ne cainöj me inine la itre atr. Catre pi së xatuane la itre hnainin troa xomi bapataiso!