1. Saide u sa taki a peleikiwooko e yeepi sama fu tan a libi?

A PELEIKIWOOKO e yeepi sama fu tan a libi. Saide u taki a sani ya? Di Yesesi be sende den bakaman fi en fu go du a wooko ya, a be taigi den aini Mateyesi 28:19, 20 taki: ‘U go, da u meke sama toon mi bakaman. U mu dopu den.’ Saide dopu pelensipali? We, efu wi á dopu, u ná o fende a teego libi. Wan sama di wani dopu mu e biibi taki na a dede di Yesesi dede gi u, opo pasi gi u fu fende a teego libi. Neen meke apostel Peitilisi be taigi den Kelesten aini a ten fi en taki: ‘Dopu e fii sama tu, fu di den e biibi Yesesi Kelestesi di weki baka’ (1 Peit. 3:21). Neen meke a te wan sama dopu fosi a sa fende a teego libi.

2. Sowtu taanga-sikin 2 Timotiyesi 4:1, 2 e gi u?

² Efu u wani yeepi sama fu toon Yesesi bakaman, u mu toon ‘bun leliman’. (Leisi 2 Timotiyesi 4:1, 2.) Saide? Yesesi taki u mu ‘meke sama toon en bakaman. Ma a taki u mu leli den tu’. Apostel Pawlesi taki u mu tan du a wooko ya, da ‘wi anga den sama di e aliki u, o fende a libi’. Neen meke Pawlesi e gi u taanga-sikin fu ‘tan poti pakisei na a fasi fa wi e leli sama’ (1 Tim. 4:16). Efu u wani yeepi sama fu toon Yesesi bakaman, u mu leli den. Neen meke u mu meke moiti fu toon bun leliman.

3. San wi o luku aini a artikel ya?

³ A omen miliyun sama e sutudeli Beibel a hii goontapu.  Ma enke fa u be luku aini a artikel di pasa, da u wani yeepi den sama ya fu dopu. Neen meke wi o luku feifi sani aini a artikel ya di u mu du efu u wani yeepi den Beibelsutudi fu u fu dopu.

4. Saide wi á mu e taki ipi tumisi te wi e sutudeli anga wan sama? (Luku a maiki tu.)

⁴ U lobi den sani di u leli aini Beibel, neen meke son yuu wi e wani taki fu ala den sani di u sabi. Ma te wi e holi A Wakititolen-sutudi, a kemeente Beibelsutudi, efuso te wi e sutudeli anga wan sama, wi á mu e taki ipi tumisi. A san Beibel e taki u wani leli sama, neen meke u mu meke moiti dwengi useefi. A á de fanowdu fu taigi a sutudi ala san i sabi fu wan tekisi, efuso wan toli fu Beibel * (Yoh. 16:12). Luku a iseefi, da i pakisei san i be sabi fu Beibel di i be dopu biginbigin, anga san i sabi nownow. Kande a ten de a den moo pelensipali leli fu Beibel namo i be sabi (Heb. 6:1). A omen yali i teke fu leli ala den sani di i sabi nownow. Neen meke gaantangi, ná wani leli a sutudi ala den sani ya a wan pasi.

5. (a) Enke fa 1 Tesalonikasama 2:13 e soi, da san den sutudi mu fusutan te wi e sutudeli anga den? (b) Fa u sa yeepi wan sutudi fu taki fa ai pakisei fu den sani di ai leli?

⁵ U wani den Beibelsutudi fu u fusutan taki a san sikiifi aini a Wowtu fu Gadu wi e leli den. (Leisi 1 Tesalonikasama 2:13.) Fa u sa du a sani ya? Meke a sutudi taigi i fa ai denki fu son toli aini Beibel. Pe fi yu e taigi en ala yuu san wan tekisi wani taki, a moo bun fu akisi en san a fusutan di a leisi a tekisi. Yeepi en fu si fa enseefi sa wooko anga den sani di a leli aini Beibel. Poti akisi di o yeepi en fu taki fa ai fii, efuso san ai pakisei fu a tekisi di a leisi (Luk. 10:25-28). Kande i sa akisi en taki: ‘Sowtu manii fu Yehofa yu e si te i luku a tekisi ya?’ ‘Saide i taki a sani de?’ ‘Fa i sa wooko anga a sani di i leli ya?’ (Odo 20:5) Holi a pakisei taki a moo pelensipali sani, a ná on fuu wan sama sabi, ma na a wooko di ai wooko anga den sani di a sabi.

6. Saide a bun fu tyai peleikiman di abi ondoofeni go a den sutudi fu u?

⁶ Yu e tyai peleikiman di abi ondoofeni go a den sutudi fi i? I sa akisi den efu den si enke yu e koboloiki Beibel bun te  yu e leli sama. Efi i wani toon wan moo bun leliman, i mu abi sakafasi. (Luku Toli 18:24-26 tu.) I sa akisi a peleikiman di abi ondoofeni efu a si enke a sutudi e fusutan den sani di yu e leli en. Efi yu á poi go na a sutudi wan wiki, efuso moo langa, i sa akisi aseefi peleikiman ya fu holi peesi gi i, da a sutudi ná o misi nawan wiki. A sani ya o soi en tu taki a sutudeli di ai sutudeli pelensipali. Te yu e sutudeli anga wan sama yu á mu fii enke taa sama á poi sutudeli anga en fu di a yu abi a sutudi. Bika a ná a sama di e sutudeli anga en pelensipali, ma a go a sama mu go a fesi.

7. San o yeepi wan sutudi fu lobi den sani di ai leli?

⁷ A fasi fa yu e taki mu e soi taki i lobi den sani di yu e leli den sutudi fi i. Den mu poi si taki yu e biibi den sani di yu e leli den (1 Tes. 1:5). A sani ya o meke a sutudi seefi wani sabi moo. Kande i sa gi en toli fu den wini di i fende di i du san Beibel taki. A so a o si taki enseefi o fende wini efu a wooko anga den sani di ai leli aini Beibel.

8. San a wan taa fasi fa i sa yeepi a sutudi fi i? Saide a bun fu du a sani ya?

⁸ Te yu e sutudeli anga wan sama, i sa gi en toli fu baala anga sisa di be abi denseefi sowtu polobelema di a abi. Kande i sa akisi wan fu den baala efuso sisa ya fu kon anga i na a sutudi. I sa luku ondoofenitoli fu sama a jw.org tu, na a pisi di den e kai ‘Bijbel e kenki sma libi.’ * Den sowtu toli ya o yeepi a sutudi fi i fu si taki enseefi o fende wini te ai wooko anga den sani di ai leli aini Beibel.

9. Fa i sa yeepi wan sutudi fu taigi en famii anga mati san ai leli?

⁹ Efu a sama di yu e sutudeli anga en toow, i sa akisi a toowpaa fi en fu sidon anga u te wi e sutudeli. Gi a sutudi taanga-sikin fu taigi den famii anga den mati fi en den sani di ai leli (Yoh. 1:40-45). Fa i sa du a sani ya? Kande i sa akisi en taki: ‘Fa i be o yeepi wan famii fi i fu fusutan a pisi di u luku ya?’, efuso ‘Sowtu tekisi i be o leisi fu soi wan mati fi i saide yu e biibi a sani ya?’ A so yu e yeepi a sutudi fi enseefi toon wan bun leliman.  Da bakaten enseefi sa bigin peleiki anga a kemeente. I sa akisi a sutudi efu a sabi taa sama di wani sutudeli Beibel tu. Efu taa sama de di wani sutudeli, meke moiti wantenwanten fu taki anga a sama, da i akisi en efu a wani sutudeli Beibel anga i. I sa soi en a felon di den e kai Fa wi e sutudeli Beibel anga sama? *

10. Enke fa 1 Tesalonikasama 2:7, 8 e soi, da fa u sa waka a Pawlesi baka?

¹⁰ U mu e booko wi ede anga den sama di wi e sutudeli anga den. I mu e si den enke sama di o toon i baala efuso sisa dyonson. (Leisi 1 Tesalonikasama 2:7, 8.) A ná o makiliki gi den fu fika den mati di den be abi, efuso fu bigin du sani enke fa Yehofa wani. Neen meke u mu yeepi den meke mati aini a kemeente. Iseefi mu meke mati anga a sutudi fi i. A ná te u mu sutudeli namo i mu e taki anga en, ma i sa telefon akisi en fa ai go anga en. I sa go luku en tu den dei di u nai sutudeli. Te yu e du den sani ya, da a sutudi o si taki yu e booko yu ede anga en.

11. San u wani den sutudi fu u fende aini a kemeente? Sowtu wini den o fende fu a sani ya?

¹¹ Sama lobi taki: ‘Wan sama wawan á poi kiya wan pikin.’ A sani ya a tuu. A letiso a de anga den Beibelsutudi fu u tu. U wawan ná o poi yeepi den fu toon wan Kotoigi. Neen meke u mu yeepi den sutudi fu u fu meke mati aini a kemeente di sa yeepi den fu go a fesi. Den mati ya o yeepi den tu fu den anga Yehofa toon moo bun mati. U wani yeepi den sutudi fu u fu fii taki denseefi de aini a gaan osufamii fu Yehofa. U wani den si den baala anga sisa aini a kemeente enke den famii. A sani ya o meke a moo makiliki gi den fu fika mati di nai gi den taanga-sikin fu dini Yehofa (Odo 13:20). Efu den mati di a be abi fosi á wani paa anga en moo fu di a bigin dini Yehofa, a ná o booko en ede tumisi, bika a sabi taki a o fende bun mati aini a olikanisâsi.​—Malik. 10:29, 30; 1 Peit. 4:4.

12. Saide u mu e soi wan sutudi taki dopu pelensipali?

¹² I mu e soi en ala yuu saide a pelensipali taki wan sama paamisi Yehofa taki a o dini en da a dopu. Bika a di u  wani sama toon dopu Kotoigi meke wi e sutudeli Beibel anga den. Te wan sama sutudeli Beibel wantu mun, neen ai go a den komakandaa, enseefi o si taki a di u wani a toon wan Kotoigi fu Yehofa meke wi e sutudeli Beibel anga en.

13. San wan sutudi mu du efu a wani dopu?

¹³ Fosi wan Beibelsutudi dopu, a mu sabi sama a Yehofa. A mu e biibi tu taki Yehofa e du san a taki ala yuu (Yoh. 3:16; 17:3). Baka dati, en anga Yehofa o toon mati. A o meke mati anga den baala anga sisa aini a kemeente tu (Heb. 10:24, 25; Yak. 4:8). Bakaten te en anga Yehofa toon mati, a o hati en taki a be e du sani di Yehofa á lobi, da a o tapu anga den sani ya (Toli 3:19). A o bigin paati den sani di a leli anga taawan (2 Kor. 4:13). Baka dati a o paamisi Yehofa aini begi taki a o libi enke fa a wani, da a dopu fu soi sama taki en a wan Kotoigi fu Yehofa (1 Peit. 3:21; 4:2). A dei de o de wan piisii dei gi en anga den taa baala anga sisa. Te wan sutudi e meke moiti fu du den sani di a leli, i mu e gafa en fu a moiti di ai meke. Gi en taanga-sikin fu go doo.

14. Fa u sa luku efu wan sutudi e go a fesi?

¹⁴ U mu abi pasensi te wi e yeepi wan sama fu dopu. Ma te u sutudeli wan pisiten anga a sama kaba, u mu luku efu a wani dini Yehofa tuutuu. I si enke ai meke moiti fu du den sani di a leli? Efuso na a sutudi namo e switi gi en fu di ai leli sani di a á be sabi ete?

15. San o yeepi i fu sabi efu wan sutudi e go a fesi?

¹⁵ I mu e luku efu wan sutudi e go a fesi. Den sani di ai taki e soi taki a lobi Yehofa? A gwenti begi? (Ps. 116:1, 2) A lobi leisi Beibel? (Ps. 119:97) Ai meke moiti fu de na ala den komakandaa? (Ps. 22:22) A fasi fa ai libi e soi taki a bigin du den sani di ai leli? (Ps. 119:112) A bigin taigi en famii anga den mati fi en san ai leli? (Ps. 9:1) A wani toon wan Kotoigi fu Yehofa? (Ps. 40:8) Efu a sutudi nai du nawan fu den sani ya, meke moiti fu fusutan san e tapu en, da i luku fa i sa yeepi en. I mu taki kiin anga en, ma i mu du a sani ya a wan switifasi. *

16. On ten a be o bun fu tapu a sutudi anga wan sama?

 ¹⁶ Son leisi a de fanowdu fu luku efu i mu tapu wan sutudi. Efi i wani sabi efi i mu du a sani ya, akisi iseefi taki: ‘A sutudi e seeka enseefi te u mu sutudeli? Ai meke moiti fu kon a den komakandaa? A tapu anga son wan fu den sani di a be e du? Ai go a wan falisi keliki ete?’ Den akisi ya o yeepi i fu si efi i mu tapu a sutudi. Efu a sama nai meke moiti fu du den sani ya, da a leti enke i wani leli wan sama suwen, ma a á wani en sikin nati. I si enke a de fanowdu fu tan sutudeli anga wan sama di nai meke moiti fu du den sani di ai leli?

17. Enke fa 1 Timotiyesi 4:16 e soi, da san ala peleikiman mu du?

¹⁷ Wi e si a wooko di Yesesi gi u fu yeepi sama toon en bakaman enke wan pelensipali sani, neen meke wi e meke ala moiti fu yeepi den sutudi fu u fu go a fesi te enke den dopu. Fu man du a sani ya, u mu e koboloiki Beibel ala yuu te wi e leli sama. A fasi fa wi e taki mu soi taki u lobi den sani di wi e leli sama, u mu soi tu taki wi e biibi den sani ya. U mu yeepi den sutudi fu meke mati aini a kemeente. U mu e taigi den ala yuu saide a pelensipali fu paamisi Yehofa taki wi o dini en da u dopu. Boiti dati, u mu e luku efu a sutudi e go fesi pikinpikin. (Luku a faki ‘ San i mu du fu yeepi wan sama fu dopu?’) Ai bigi gi u taki wi abi a gaandi fu du a wooko ya di e yeepi sama fu fende a libi. Neen meke wi o meke ala moiti fu yeepi den sutudi fu u fu go fesi fu den sa dopu.