1. ¿Mbaʼérepa ikatu jaʼe ñane predikasión rupive umi hénte ikatuha ojesalva?

ÑAIPYTYVÕ jave umi héntepe oiko hag̃ua chuguikuéra Jesús disípulo, añetehápe ñaipytyvõ hína chupekuéra ojesalva hag̃ua. ¿Mbaʼérepa jaʼe upéva? Jesús omeʼẽrõ guare pe mandáto jatopáva Mateo 28:19, 20-pe heʼi vaʼekue: ‘Tapeho pemboʼe umi héntepe oiko hag̃ua chuguikuéra che disípulo, ha pevautisa chupekuéra’. ¿Mbaʼérepa iñimportantete jajevautisa? Pórke upéicharõ añoite ikatúta jajesalva ha jaikove pára siémpre. Pe ojevautisaséva oguerovia vaʼerã ikatuha oikove pára siémpre Jesús omano haguére ñanderehehápe ha orresusita rupi añoiténte. Upévare, apóstol Pedro heʼi vaʼekue umi kristiánope: ‘Pe vautísmo pendesalva hína avei koʼág̃a, Jesucrístope oñemoingove jey rupi’ (1 Ped. 3:21). Upéicharõ peteĩ persóna ojevautisa jave, orekóma pe esperánsa oikovévo pára siémpre.

2. Heʼiháicha 2 Timoteo 4:1, 2, ¿mbaʼépa oñehaʼãrõ pe oporomboʼévagui?

² Ikatu hag̃uáicha ñaipytyvõ umi héntepe oiko hag̃ua chuguikuéra Jesús disípulo, ‘ñandevale vaʼerã ñaporomboʼe hag̃ua’ (elee 2 Timoteo 4:1, 2). ¿Mbaʼérepa iñimportánte upéva? Pórke Jesús heʼi vaʼekue: ‘Tapeho pemboʼe umi héntepe oiko hag̃ua chuguikuéra che disípulo’. Apóstol Pablo heʼi vaʼekue Timotéope ‘osegi hag̃ua ojapo’ ko traváho, ‘pórke ojapóramo péicha ojesalváta haʼe ha avei umi ohendúva chupe’. Ndareíri voi Pablo heʼi Timotéope: ‘Siémprekena eñatende remboʼe lájare’ (1 Tim. 4:16). Ñande ñamboʼe jave umi héntepe, ñaipytyvõ hína chupekuéra ojesalva hag̃ua, upévare iñimportánte ñaporomboʼe porã.

3. ¿Mbaʼépa jahecháta ko artíkulope ñanepytyvõtava jajapo hag̃ua estúdio bíblico?

³ Ñande jajapo hína millones de estúdio bíblico ko múndo  tuichakuére. Péro jahecha haguéicha pe artíkulo ohasa vaʼekuépe, ñande ñaipytyvõse hetave estudiántepe ojevautisa hag̃ua. Ko artíkulope jahecháta 5 mbaʼe tekotevẽva avei ojapo káda instruktór oipytyvõ hag̃ua iñestudiántepe ikatu hag̃uáicha ojevautisa.

4. ¿Mbaʼérepa peteĩ instruktór ojejokokuaa vaʼerã ojapo jave peteĩ estúdio? (Ehecha avei pe nóta).

⁴ Ñandéve ningo ñandegustaiterei umi mbaʼe ñamboʼéva la Bíbliagui. Upéicha rupi, ikatu hína ñañeʼẽtereíma upévare. Péro noñeʼẽtereíri vaʼerã peteĩ omoakãva tahaʼe Ñemañaha Ñehesaʼỹijo, Estúdio bíblico kongregasionpegua, térã ñambostudia jave peteĩ persónape. Upévare jaipuru hag̃ua la Biblia ñaporomboʼe jave, jajejokokuaa vaʼerã ha ani ñamombeʼupase opa mbaʼe jaikuaáva peteĩ téxtogui térã peteĩ témagui * (Juan 16:12). Ñapensáramo umi mbaʼe jaikuaa vaʼekuére jajevautisárõ guare, katuete jahechakuaáta koʼág̃a jaikuaaha hetave mbaʼe. Upe tiémpope oiméne ñande jaikuaa rakaʼe umi mbaʼe iñimportantevévante omboʼéva la Biblia (Heb. 6:1). Heta áño haguépe ningo ñaaprende kuri umi mbaʼe jaikuaáva koʼág̃a, upévare ndovaléi ñamboʼese una vetépe entéro mbaʼe peteĩ estudiánte pyahúpe.

5. a) Heʼiháicha 1 Tesalonicenses 2:13, ¿mbaʼépa jaipota ñane estudiánte ohechakuaa? b) ¿Mbaʼéichapa ikatu ñamokyreʼỹ ñane estudiántepe oñeʼẽ hag̃ua umi mbaʼe oaprendévare?

⁵ Ñande jaipota ñane estudiánte ohechakuaa umi mbaʼe oaprendéva hína ndouiha ñandehegui, síno Ñandejára Ñeʼẽgui (elee 1 Tesalonicenses 2:13). ¿Mbaʼéichapa ikatu jajapo upéva? Ñamokyreʼỹ chupe oñeʼẽ hag̃ua umi mbaʼe oaprendévare. Jaiko rangue siémpre jaexplika ñane estudiántepe umi téxto bíblico, jajerure chupe toexplika jepi ñandéve umi téxto. Ñaipytyvõ ñane estudiántepe ohecha hag̃ua mbaʼéichapa Ñandejára Ñeʼẽ ikatu oipytyvõ chupe hekovépe. Jajapo umi pregúnta ñanepytyvõtava jaikuaa hag̃ua mbaʼépa haʼe opensa pe téxto oleévare (Luc. 10:25-28). Por ehémplo ikatu ñaporandu: “¿Mbaʼe kualidápa nde rehechakuaa Jehová orekoha releévo ko téxto?”. “¿Mbaʼéichapa ko mbaʼe reaprendéva la Bíbliagui ikatu ideprovécho ndéve?”. “¿Mbaʼéichapa reñeñandu reaprende rire koʼã mbaʼe?” (Prov. 20:5). Pe iñimportantevéva ningo ndahaʼéi heta mbaʼémapa oikuaa pe estudiánte, síno omombaʼe ha ojapópa hína umi mbaʼe oaprendéva.

6. ¿Mbaʼérepa iporã jajerure peteĩ ermáno ikatupyrývape oho hag̃ua ojapo ñanendive ñande estúdio?

⁶ ¿Ñandépa jajerurémava peteĩ ermáno ikatupyrývape oho hag̃ua ojapo ñanendive peteĩ estúdio bíblico? Oiméramo upéicha, ñaporandúkena chupe mbaʼépa opensa jajapo lájare ñande estúdio ha jaipuru porãpa hína la Biblia  ñaporomboʼe jave. Ñaneumílde vaʼerã jaipotáramo oiko ñandehegui peteĩ instruktór ikatupyrýva (ekompara Hechos 18:24-26 heʼívare). Upe rire ñaporandu pe ermánope mbaʼépa haʼe opensa pe estudiántere, ohechakuaápa hese ontendeha hína upe ostudiáva. Ikatu avei jajerure pe ermánope ojapo hag̃ua pe estúdio nañaimemoʼãi mbaʼéramo una térã hetave semána. Upéicharõ ojesegíta ojejapo pe estúdio, ha ohechaukáta pe estudiántepe iñimportanteha osegi ostudia. Aníkena arakaʼeve ñapensa térã jaʼe: “Kóva che estudiánte hína ha ndaipotái voi ótro ombostudia chupe”. Amo ipahápe, ñande jaipotánte pe iporãvéva pe estudiántepe g̃uarã, ha hiʼãite ñandéve osegi oaprendeve Jehovágui.

7. ¿Mbaʼéichapa ikatu ñaipytyvõ pe estudiántepe ovyʼa hag̃ua umi mbaʼe oaprendévare hína?

⁷ Pe estudiánte ohecha vaʼerã ñande ñanekyreʼỹha ha jagueroviaha umi mbaʼe la Biblia omboʼéva (1 Tes. 1:5). Upéicha ndahasyivéta avei ovyʼa hag̃ua umi mbaʼe oaprendévare hína. Ha opyta porãramo, ikatu ñamombeʼu chupe mbaʼéichapa la Biblia ñanepytyvõma raʼe ñandéve. Upéicha haʼe ohechakuaáta la Bíbliape oĩha heta konsého porã ideprovéchotava avei chupe.

8. ¿Mbaʼépa avei ikatu jajapo ñaipytyvõ hag̃ua ñane estudiántepe, ha mbaʼérepa jajapo vaʼerã upéva?

⁸ Pe estúdio aja, ñamombeʼúkena ñane estudiántepe oĩha ermáno ha ermanakuéra ombohovái vaʼekue avei umi situasión ijetuʼúva haʼe ohasáva hína. ¿Oĩpa peteĩ ermáno ñane kongregasiónpe ikatúva oipytyvõ ñane estudiántepe iñehémplo rupive? Upéicharõ jajerure chupe oho hag̃ua ñanendive jajapo hag̃ua pe estúdio. Térã ikatu jaheka peteĩ experiénsia iporãva jw.org-pe, umi artíkulo héravape “La Biblia okambia chupekuéra”. * Koʼã artíkulo ha vidéo oipytyvõta ñane estudiántepe ohechakuaa hag̃ua la Biblia ikatuha oajuda chupe okambia hag̃ua.

9. ¿Mbaʼéichapa ikatu ñamokyreʼỹ ñane estudiántepe oñeʼẽ hag̃ua umi mbaʼe oaprendévare ihentekuéra ha iñamigokuérape?

⁹ Oiméramo pe estudiánte omenda térã oñakompaña, ¿ostudiápa hína avei la Biblia upe iñirũ? Oiméramo nahániri, ikatu ñainvita avei chupe ñanemoirũ hag̃ua pe estúdio aja. Ñamokyreʼỹkena ñane estudiántepe omombeʼu hag̃ua umi mbaʼe oaprendéva umi ihentekuéra ha iñamigokuérape (Juan 1:40-45). ¿Mbaʼéichapa ikatu jajapo upéva? Ikatu ñaporandu chupe:  “¿Mbaʼéichapa nde reexplikáne kóva ne hentekuérape?”, térã “¿Mbaʼe téxtopa reipurúne reexplika hag̃ua ko mbaʼe peteĩ ne amígope?”. Péicha ñamboʼéta hína ñane estudiántepe oiko hag̃ua avei chugui peteĩ instruktór. Ha ág̃a okumpli vove umi rrekisíto oiko hag̃ua chugui peteĩ puvlikadór no vautisádo, haʼe ikatútama avei osẽ opredika pe kongregasióndi. Ikatu ñaporandu chupe haʼépa ndoikuaái hína peteĩ persóna ostudiasévape avei la Biblia. Ha oiméramo oikuaa, pyaʼe porã ñañekomunika vaʼerã upe persónandi ha jaofrese chupe peteĩ estúdio bíblico. Upearã jahechauka chupe pe vidéo “¿Mbaʼéichapa rojapo peteĩ estúdio bíblico?”. *

10. Heʼiháicha 1 Tesalonicenses 2:7, 8, ¿mbaʼéichapa peteĩ instruktór ikatu osegi Pablo ehémplo?

¹⁰ Umi instruktór ohechauka vaʼerã oñeinteresaha iñestudiántere, ohecháma vaʼerã chupekuéra ermáno térã ermánaicha (elee 1 Tesalonicenses 2:7, 8). Ijetuʼu ningo pe estudiántepe oheja hag̃ua umi iñamigokuéra mundopeguápe ha okambia umi mbaʼe tekotevẽvape oservi hag̃ua Jehovápe. Upévare ñaipytyvõ vaʼerã chupe otopa hag̃ua iñamigorã kongregasiónpe. Ñañamiga vaʼerã ñane estudiántere, ha ndahaʼéi vaʼerã jahasáva tiémpo hendive jastudia javénte la Biblia, síno umi ótro moméntope avei. Og̃uahẽ mboyve ñande estúdio día, ikatu ñahenói chupe, ñamondo peteĩ mensáhe térã jahasakuévonte jaha javisita chupe, upéva ohechaukáta añetehápe ñañeinteresaha hese.

11. ¿Mbaʼépa ñande jaipota ñane estudiánte otopa kongregasiónpe, ha mbaʼérepa?

¹¹ Peteĩ ñeʼẽnga Africapegua heʼi: “Oñekotevẽ peteĩ puévlo kompletoite oñemongakuaa hag̃ua peteĩ mitã”. Ñande ikatu avei jaʼe: “Oñekotevẽ peteĩ kongregasión kompletoite ojejapo hag̃ua peteĩ disípulo”. Upéicha rupi, umi instruktór ikatupyrýva oipytyvõ iñestudiántepe oikuaa hag̃ua ótrope kongregasiónpe. Koʼã ermáno ha ermanakuéra ikatu avei oipytyvõ chupe oñemoag̃uive hag̃ua Jehováre. Pe estudiánte ningo ikatu ovyʼa ojeheʼávo Ñandejára puévlore, ha umi ermáno ikatu oipytyvõ chupe oiko hag̃ua Jehová amigoitéramo, ha omokyreʼỹ chupe ombohovái jave umi provléma. Ñande jaipota káda estudiánte oñandu orekoha peteĩ lugár kongregasiónpe ha haʼeha ñane família. Ñande jaipota káda estudiánte oĩse pe família tuichaitévape, oĩháme ermáno ha ermanakuéra oporohayhuetéva. Péicha ifasilvéta chupe ohejaite hag̃ua umi iñamista noipytyvõmoʼãiva chupe oñemoag̃ui hag̃ua Jehováre (Prov. 13:20). Umi iñamigokuéra yma guare omboykéramo chupe, haʼe oikuaáta ikatuha otopa iñamigorã Jehová organisasiónpe (Mar. 10:29, 30; 1 Ped. 4:4).

12. ¿Mbaʼérepa jaʼe vaʼerã ñane estudiántepe iñimportanteha peteĩ persóna oñemeʼẽ Jehovápe ha ojevautisa?

¹² Pyʼỹinte jaʼe vaʼerã ñane estudiántepe mbaʼeichaitépa iñimportánte peteĩ persóna oñemeʼẽ Jehovápe ha ojevautisa. Ñande ningo jastudia voi pe persónandi ikatu hag̃uáicha oservi Jehovápe ha ojevautisa. Ostudia rire unos kuánto mése, ha koʼýte oho rire rreunionhápe, pe estudiánte ontende vaʼerã ñande ñaipytyvõseha chupe oiko hag̃ua chugui testígo de Jehová.

13. ¿Mbaʼe mbaʼépa tekotevẽ ojapo pe estudiánte ojevautisa hag̃ua?

¹³ Peteĩ estudiánte ojevautisaséva ojapo vaʼerã heta mbaʼe ikatu hag̃uáicha ojevautisa. Primeroite voi, haʼe oikuaa ha ohayhu vaʼerã Jehovápe ha ojerovia hese (Juan 3:16; 17:3). Oiko vaʼerã chugui Jehová amígo ha avei umi ermanokuéra kongregasionpegua amígo (Heb. 10:24, 25; Sant. 4:8). Mbeguekatúpe pe estudiánte ombyasy vaʼerã umi mbaʼe vai ojapo vaʼekue ha ndojapovéima (Hech. 3:19). Avei omombeʼu vaʼerã ótrope umi mbaʼe koʼág̃a ogueroviáva (2 Cor. 4:13). Upéi haʼe oñemeʼẽ vaʼerã Jehovápe ha ohechauka ojapóma hague upéva ojevautisávo (1 Ped. 3:21; 4:2). ¡Ajépa enterove javyʼaiterei upe díape! Pe estudiánte ojapo vove umi mbaʼe tekotevẽva ojevautisa hag̃ua, jasegi vaʼerã jafelisita chupe, ha kontinuadoite ñamokyreʼỹ chupe osegi hag̃ua ojapo koʼã mbaʼe.

14. ¿Mbaʼéichapa peteĩ instruktór ikatu ohecha oprogresápa hína iñestudiánte?

¹⁴ Ñanepasiénsia vaʼerã ñaipytyvõ jave ñane estudiántepe ikatu hag̃uáicha oñemeʼẽ Jehovápe ha ojevautisa. Péro avei tekotevẽ jahecha oimépa haʼe añetehápe oservise hína Jehovápe. ¿Ohechaukápa pe estudiánte oñehaʼãha hína okumpli umi mbaʼe Jesús omanda vaʼekue? ¿Térãpa ostudiánte oikuaase rupi hetave mbaʼe la Bíbliagui?

15. ¿Mbaʼéichapa pe instruktór ohechakuaáta pe estudiánte oprogresaha hína ohóvo?

¹⁵ Pyʼỹinte jahecha vaʼerã mbaʼe mbaʼépepa oprogresa ohóvo ñane estudiánte. Por ehémplo, ¿heʼípa ohayhuha Jehovápe? ¿Oñemboʼépa chupe? (Sal. 116:1, 2). ¿Oleesépa la Biblia? (Sal. 119:97). ¿Oho memépa rreunionhápe? (Sal. 22:22). ¿Ojapópa umi kámbio ohechaukáva ojapoha umi mbaʼe oaprendéva hína? (Sal. 119:112). ¿Omombeʼúpa umi mbaʼe oaprendéva ifamília ha iñamigokuérape? (Sal. 9:1). Ha iñimportanteveha, ¿ohechaukápa oipotaha oiko chugui testígo de Jehová? (Sal. 40:8).  Péro pe estudiánte ndoprogresáiramo ni peteĩva koʼã mbaʼépe, ñañehaʼã vaʼerã jaikuaa mbaʼépa ojoko hína chupe. Ha jaikuaa rire upéva, ñañemongeta hendive mborayhúpe péro ñanesinséro hendive, péicha ikatúta ñaipytyvõ chupe oikotevẽhápe. *

16. ¿Mbaʼépa ohechaukáta ñandéve ndajastudiavéima vaʼerãha peteĩ persónandi?

¹⁶ Iporãta pyʼỹinte ñañeporandu jasegi vaʼerãpa jastudia hína peteĩ persónandi. Por ehémplo ikatu ñañeporandu: “¿Ojepreparápa pe estudiánte káda estudiorã? ¿Haʼépa ndohoséi hína rreunionhápe? ¿Ndohejáipa hína umi mbaʼe vai ojepokuaáva ojapo? ¿Neʼĩrapa oheja pe rrelihión fálsa?”. Ñakontestáramo no koʼã pregúntape ha jasegíramo jastudia peichagua persónandi, haʼetéta ñamboʼéva hína peteĩ noñemboykueséivape oytakuaa hag̃ua. ¿Maʼerãpa jasegíta jastudia pe estudiánte añetehápe nomombaʼéiramo hína umi mbaʼe oaprendéva ha nokambiaséiramo?

17. ¿Mbaʼépa ojapo vaʼerã entéro instruktór ikatu hag̃uáicha siémpre oñatende omboʼe lájare, heʼiháicha 1 Timoteo 4:16-pe?

¹⁷ Ñande ningo jajagarra ensério pe rresponsavilida jarekóva jajapo hag̃ua disípulo, ha ñaipytyvõse ñane estudiántepe oprogresa hag̃ua ojevautisa peve. Upévare jaipurúta la Biblia ñamboʼe jave chupe, jahechaukáta ñanekyreʼỹha ha jagueroviaha umi mbaʼe ñamboʼéva. Ñamokyreʼỹta ñane estudiántepe otopa hag̃ua iñamigorã kongregasiónpe. Pyʼỹinte jaʼéta chupe iñimportanteha peteĩ persóna oñemeʼẽ Jehovápe ha ojevautisa, ha pyʼỹinte avei jahecháta oprogresápa hína ohóvo ñane estudiánte (ehecha pe rrekuádro “ ¿Mbaʼépa ojapo vaʼerã pe instruktór?”). Javyʼaiterei ningo ikatu haguére jajapo avei ko traváho oipytyvõtava umi héntepe ojesalva hag̃ua. Ñande jajapose opa ikatúva ñaipytyvõ hag̃ua ñane estudiántepe ikatu hag̃uáicha ojevautisa.