1. ¿Nitre mada mikadre ja tötikaka Bibliabätä ye köböire raba nemente nire ye ñobätä nita niere?

NITRE mikadre ja tötikaka Bibliabätä ye köböire rabaite nire. ¿Ñobätä nie raba nikwe? “Mun nän, amne nitre [...] mika ja töitikaka siba tibe amne munkwe niaratre ngöka ñöte” niebare Jesukwe Mateo 28:19, 20 yete ye nikwe ngwandre törö jai. Aune nire tö rababätä kwäre, yekäre ütiäte krubäte rabadre ja ngökö ñöte ye gare nie. Jesús ja nire biani ni ütiäre aune ganinkröta yebe köböire ni rabaite kwäre yei tödekadre nire tö ja ngökai ñöte yekwe. Yebätä apóstol Pedro kukwe ne niebare nitre kristiano ie: “Jesukristo krütani, biti Ngöbökwe mikaninta nire, ye köböire abko nita nebe dianintari abko ni ngökata ñöte tä bä mike” (1 Ped. 3:21). Ye medenbätä, nire tä ja ngökö ñöte yete ja käne raba tödeke nüna kärekäre yei.

2. 2 Timoteo 2:24 tä niere erere, ¿nikwe diridre ño ribeta nie yete?

² Nitre mada mikadre ja tötikaka yekäre ni rabadre “Ngöbö kukwei dirire kuin” (ñäkädre 2 Timoteo 2:24 yebätä). ¿Ñobätä? Ñobätä ñan aune Jesukwe niebare: “Mun nän, amne nitre [...] mika ja töitikaka siba tibe amne [...] kukwe diribare tikwe munye, ye erere munkwe diri jökrä ietre”. Timoteo ja di ngwandre jankunu sribi ye nuainkäre apóstol Pablo kukwe ne niebare ie: “Ye erere makwe ja ngibia au ne ngwane, ni kwati ma kukwei nuaka abko Ngöbökwe dianditari siba mabe gwaire”. Ye arabätä Pablokwe mäträbare krörö Timoteobätä: “Kukwe diri makwe [o mätä dirire ño], yebtä makwe töbika kuin” (1 Tim. 4:16). Nita dirire ño ye köböire nitre raba nemen ja tötikaka Bibliabätä, ye medenbätä nikwe ja di ngwandre dirikäre bäri kwin.

3. ¿Dre rabai gare nie kukwe ja tötikara nekänti?

 ³ Bämän kratire kratire nita kukwe metre Bibliabätä ye driere nitre kwati ie. Rababa gare nie kukwe ja tötikara käne yebätä erere, nikwe dre nuaindre nitre dimikakäre nirien kukwe ja üairebiti aune ja ngökakäre ñöte ye ni tö mikai gare jai. Kukwe ketarike nitre dirikä rabadre nuainne nitre ja tötikaka ngwankäre ja ngökö ñöte ye rabai gare nie kukwe ja tötikara nekänti.

4. ¿Ñobätä ni iti tötikata Bibliabätä ngwane ni dirikä ye ñan rabadre blite krubäte? (Nota mikadre ñärärä arato).

⁴ Ni jökrä töta nemen kukwe Ngöbökwe ye driei. Aisete nita nemen blite krubätebätä. Akwa ja tötika Ni Mikaka Mokre yebätä ye jie ngwanta ngwane, täräbätä ja tötikata konkrekasionte ye jie ngwanta ngwane o nita ni iti tötike ngwane ñan blitadre krubäte. Bäri kwin diridre Biblia yebiti. Yekäre, ni dirikä ñaka rabadre blite krubäte kukwe gare ie yebätä o bersikulo meden gare ie yebätä (Juan 16:12). * Töbike kukwe nebätä: ¿kukwe gare mäi Bibliabätä nengwane ye erere nämäne gare mäi mäkwe ja ngökani ñöte ye ngwane? Ñakare. Kukwe metre Bibliabätä nämäne gare braibe mäi (Heb. 6:1). Kukwe rabadre gare mäi Bibliabätä yekäre kä nikani raire ta. Ye medenbätä, mäkwe ñaka kukwe jökrä drie batibe ni ja tötikaka mäkwe yei.

5. a) 1 Tesalonicenses 2:13 tä niere erere, ¿kukwe drieta ni ja tötikaka ie yebätä dre rükadre gare ie ni tö? b) ¿Kukwe drieta ni ja tötikaka ie ye tuin ño ie aune töita ñobätä ye rabadre gare nie yekäre dre nuaindre?

⁵ Kukwe drieta ni ja tötikaka ie ye tä Bibliabätä rabadre gare ie yei ni tö (ñäkädre 1 Tesalonicenses 2:13 yebätä). Yekäre, kukwebätä ja tötikata kwe ye tuin ño ie ye niedre kwe nie nikwe ribedre ie. Ñan ni aibe käkwe texto jökrä mikadre gare, ñakare aune texto ruäre ye ni ja tötikaka käkwe mikadre gare nikwe ribedre ie. Dre drieta Bibliakwe yebiti niara raba ja trä tuin ño ye ni raba driere ie. Bersikulobätä ñäkäta kwe ye tuin ño ie aune töita ñobätä mikadre gare kwe yekäre, nikwe kukwe ruäre ngwandretari ie dimikakäre kukwe ye mike gare (Luc. 10:25-28, TNM). Ñodre, ni raba ne kwrere ngwentari ie: “¿Texto nekänti Jehová töita ño o tä ja ngwen ño ye jutuani mäi? ¿Kukwe metre Bibliabätä ne raba mä dimike ño? ¿Kukwe nibi gare mäi yebätä jata nemen ruin ño mäi?” (Prov. 20:5). Kukwe keta kabre rabadre gare ni ja tötikaka ie ye ñan ai bäri ütiäte, ñakare aune kukwe nüke gare ie ye niara tä tarere aune mike täte yebrä ütiäte.

6. ¿Ja mräkä ie diri gare kwin ye ni rikadre ngwena ni tötike jabe ye ñobätä kwin krubäte?

⁶ ¿Ja mräkätre ie diri gare krubäte ye mä tärä niken ngwena ni tötike jabe? Ye erere ngwane nita ni tötike ño nibi tuin ie ye nikwe  ngwandretari ie. Nita dirire Biblia yebiti nibi tuin ie o ño nikwe ngwandretari ie arato. Ni tö ja tuai dirikä kwin ngwane, ütiäte krubäte ja töi mikadre bobre (Hechos 18:24-26 mikadre ñärärä arato). Arato ni ja tötikaka nibe ie kukweta nüke gare o ño ye nikwe ngwandretari ja mräkä yei. Nane ni rikadre kä madakänti bämän krati o bäri te ngwane, ja mräkä ye käkwe ni ja tötikaka nikwe ye tötikadre ken ni täte ni raba niere ie. Ye köböire niara tötikai jankunu aune ja tötika ye ütiäte rabai tuin ie. Ni aibe raba ni ja tötikaka nibe ye tötike ye nikwe ñaka nütüdre. Kukwe kwin rabadre ni ja tötikaka nibe ye kräke aune ririadre kukwe ja üairebiti ye ie ni tö abokän bäri ütiäte.

7. ¿Kukwebätä ni ja tötikaka tä ja tötike ye käkwe kä mikadre jutobätä yekäre dre nuaindre?

⁷ Kukwe Bibliabätä drieta nikwe ye nita tarere aune era ni kräke ye ütiäte krubäte jutuadre ni ja tötikaka nikwe ie (1 Tes. 1:5). Ye köböire kukweta nüke gare ie ye käi rabai bäri jutobätä. Kukwe ja jie ngwankäre Bibliabätä yekwe ni dimikanina ño nüne bäri kwin ye ni raba niere ni ja tötikaka nikwe ie. Ye köböire kukwe ye raba niara dimike arato raba nemen tuin ie.

8. ¿Dre dre mada nuain raba ni ja tötikaka ye dimikakäre bäri aune ye erere nuaindre ye ñobätä ütiäte?

⁸ Ni ja tötikaka tä ja tuin kukwe ño ben ye erere ja mräkätre ruäre käkwe ja tuani aune kä ngwani nüke ño kwetre jai ye ni raba mike gare ietre nita niaratre tötike Bibliabätä ngwane. Ja mräkä ye erere tärä konkrekasion nikwe te ngwane, ¿ni raba niken ngwena jabe ne kwe ni ja tötikaka ye dimikadre kwe? Jän, ni raba nuainne. Arato sección kädekata “Biblia niaratre töi kwitani” tä jw.org yete, * känti ja mräkätre tä kukwe kwin mike gare yebiti ni raba ni ja tötikaka nikwe ye dimike. Nita Biblia tuenmetre ja jie ngwen ngwane, kukwe meden kwin tä nemen nikwe ye rabai gare ie kukweta ükaninte yete aune video ruäre tä mikani yete yebiti.

9. ¿Ni ja tötikaka töi mikadre blite mräkätre kwe aune ja ketamuko kwe ben kukweta nüke gare ie yebätä yekäre nikwe dre nuaindre?

⁹ Ni ja tötikaka ye muko tärä ngwane, ¿muko tä ja tötike Bibliabätä arato? Ñakare ngwane, ni raba nübaire ja tötike siba. Ne madakäre, ni ja tötikaka ye rabadre blite ja mräkätre kwe aune ja ketamuko kwe ben kukwebätä ja tötikata kwe yebätä ye nikwe niedre ie (Juan 1:40-45). Ni ja tötikaka töi mikadre blite kukwebätä ja tötikata kwe yebätä mräkä kwe aune ja ketamuko kwe ben yekäre ni raba kukwe ne kwrere ngwentari ie: “¿Kukwe ne mä raba mike gare ño mä mräkä  ie?” o “¿texto medenbiti mä raba kukwe ne mike gare ja ketamuko mäkwe ie?”. Ye erere nuainta ngwane ni ja tötikaka ye tötikata ne kwe rabadre ni dirikä kwin ja känenkäre. Aune rabaira juto kukwe driekäre jämi ja ngökö ñöte ngwane, raba kukwe driere konkrekasion ben. Ni mada gare ni ja tötikaka ie abokän tö ja tötikai Bibliabätä ye nikwe ngwandretari ie. Jän niedre kwe nie ngwane, bengwairebe nikwe blitadre ni yebe aune nikwe ja tötika driedre ie. Video ¿Nunta nitre tötike ño Bibliabätä? ye nikwe mikadre tuare ie arato. *

10. ¿Apóstol Pablo kukwe kwin bämikani mikata gare 1 Tesalonicenses 2:7, 8 ye erere ni dirikä raba ja ngwen ño?

¹⁰ Ni dirikä ye ja töi mikadre bökän ni ja tötikaka kwe yebätä aune ja brukwä tätebiti. Ni ja tötikaka ye rabadre tuin ie ja mräkä konkrekasionte ja känenkäre ye erere (ñäkädre 1 Tesalonicenses 2:7, 8 yebätä). Ni ja tötikaka käkwe ja ketamuko käne kwe ye tuanemetre aune ja töi kwitadre kwe kukwe keta kabrebätä Jehová mikakäre täte ye ñaka nuäre kräke. Ye medenbätä nikwe niaratre dimikadre ja ketamuko kwin känene konkrekasionte. Ni ñan tä kä denkä jai ja tötikakäre ben aibe, ñakare aune nita kä denkä jai jondron mada nuainkäre ben ngwane, ni ja ketamuko metre kwe nita bämike ie. Nita ñäke kökräte ta ie, kukwe juen ie o tuinbiti köbö madate ngwane, ni töita bökänbätä nikwe bämikai ie.

11. ¿Dre kwandre ni ja tötikaka ie konkrekasionte aune ñobätä ni tö ye erere ie?

¹¹ Nitre nünanka África tä kukwe ne niere krubäte: “Juta keteiti ribeta monso iti ngübakäre”. Ye erere arato ni raba kukwe ne kwrere niere: “Ja mräkätre konkrekasionte ye jökrä ribeta ni iti dimikakäre nemen ja tötikaka Jesukwe”. Ye medenbätä, ni dirikä kwin ye tä ja mräkätre mada konkrekasionte ye mike gare ni ja tötikaka ie ñobätä ñan aune ja mräkätre ye raba kukwe kwin bämike ie aune raba dimike ja kete kwin Jehovabe aune ye köböire ni ja tötikaka ye dimikata gwairebe ja üairebiti aune kukwe ño ben tä ja tuin yebätä. Ni ja tötikaka ye ütiäte konkrekasionte aune ja rabadre ruin ie nitre ja mräkäre ja üairebiti ngätäite siba yei ni tö. Nikwe dimikai ne kwe ja rabadre ruin kwin ie ja mräkätre ngätäite ngwane, rabai bäri nuäre kräke ja ketamuko känekäne kwe ñaka tä dimike Jehova tarere ye tuenmetre (Proverbios 13:20). Aune ja ketamuko känekäne kwe ye käkwe trö kwitai ie ngwane, juta Jehovakwe nete ja ketamuko erametre raba kwen ie ye täi gare ie (Mar. 10:29, 30, TNM; 1 Ped. 4:4).

12. ¿Ñobätä nikwe blitadre ni ja tötikaka ben ja diankata mento Ngöbö kräke aune ja ngökata ñöte yebätä?

¹² Ja diandrekä mento Ngöbö kräke aune ja ngökadre ñöte yebätä käre mäkwe blita ñan kä jüräbe kwärä ñobätä ñan aune nita ni iti tötike Bibliabätä ngwane, nita nuainne ne kwe ni ye ja ngökadre ñöte aune Jehová mikadre täte kwe. Ni niena ni iti tötike sö ruäre te aune niena ja ükökrö nibe gätäbätä ngwane, nita niara tötike dimikakäre ja mike testiko Jehovakwe ye tädre gare metre ie.

13. ¿Ni ja tötikaka tä dre dre nuainne ja ngökakäre ñöte?

¹³ Ni ja tötikaka bökän Bibliabätä tö ja ngökai ñöte ngwane tä kukwe ruäre nuainne jatäri. Kena, tä Jehová mike gare jai, tä tarere aune tödekebiti (Juan 3:16, TNM; 17:3, TNM). Biti tä nemen ja ketamuko Jehovakwe aune ja mräkätre konkrekasionte yekwe (Heb. 10:24, 25; Sant. 4:8). Kätä niken ta ngwane, ñan tä kukwe käme ye nuainne mada aune kukwe käme nuainbare kwe yebätä ja ruin ngite ie aune tä ja töi kwitebätä (Hech. 3:19, TNM). Arato, tä tödeke yebätä tä blite kukwe metre yebätä nitre madabe (2 Cor. 4:13). Mrä mada tä ja denkä mento Ngöbö kräke aune tä ja ngökö ñöte kukwe ye bamikakäre (1 Ped. 3:21; 4:2). Erametre köbö yeta nüke ngwane, kätä nemen juto ni jökräbätä. Ye medenbätä, ni ja tötikaka tä niken kukwe ne erere nuainne kwin jatäri ngwane, batire batire nikwe kwin niedre bökän ie aune nikwe töi mikadre nuainne jankunu.

14. ¿Ni ja tötikaka tä nirien o ño ye raba nemen gare ño dirikä kwe ie?

¹⁴ Nikwe kukwe ngübadre bätärekä ni ja tötikaka dimikakäre nememe ja diandrekä mento kwe Ngöbö kräke aune ja ngökadre ñöte kwe ye ngwane. Akwa kä ye näre te, niara tö Jehová mikai täte o ñakare ye ni rabadre mike gare jai. ¿Ni ja tötikaka ye tä ja di ngwen kukwe nuain mananbare Jesukwe ye mike täte tuin mäi? ¿O tä ja tötike Bibliabätä ñobätä ñan aune kukweta nemen gare ie ye jerekäbe tuin kwin ie yebätä?

15. ¿Kukwe meden meden tä mike gare ni ja tötikaka ye tä nirien ja üairebiti?

¹⁵ Ni ja tötikaka ye tä nirien o ño ja üairebiti ye nane nane nikwe mikadretari ñärärä. ¿Ye raba nemen gare ño nie? Töbike kukwe nebätä: ¿Jehová tare kwe ye mikata gare kwe? ¿Tä orare ie? (Sal. 116:1, 2). ¿Ñäkädre Bibliabätä ye tuin kwin ie? (Sal. 119:97). ¿Tä niken käre gätäbätä?  (Sal. 22:22). ¿Drebätä ja töi kwitadre kwe yebätä ja töi kwitanina kwe? (Sal. 119:112). ¿Kukweta nüke gare ie yebätä tä blite mräkätre kwe ben aune ja ketamuko kwe ben? (Sal. 9:1). Aune bäri utiäte: ¿niara tö ja mikai testiko Jehovakwe? (Sal. 40:8). Kukwe kädrite ye keteiti ni ja tötikaka ñaka tä nuainne jire ngwane, ñobätä ñan tä nemen nuäre kräke ye nikwe ja di ngwandre mike gare jai, biti nikwe blitadre bökän kukwe yebätä ben akwa töi jämebiti. *

16. ¿Ñongwane ni iti tötikadre ñaka mada?

¹⁶ Ne madakäre, ni tötikata nikwe ye nikwe tötikadre jankunu ya, ye nane nane nikwe töbikadretaribätä arato. Ni raba kukwe ne kwrere ngwentari jai: “¿Niara tä ja ükete ja tötika ye jökrä kräke? ¿Tö ja ükaikrö gätäbätä ye tuin nie? ¿Kukwe kämekäme nuain nämäne käne kwe ye tuaninametre kwe? ¿Ñan niena ja mrite iglesia ngwarbe ngwarbe yebe?”. Kukwe kädrite ye ñan nuainta jire kwe aune kukwe drieta ie ye ñan tä mike ütiäte jai aune ñan töita jire ja töi kwitakäre ngwane, ¿se drekäre tötikadre jankunu? Ye abokän ni iti ñan tö ja mikai tibo ie mätä jübaka driere jankunu ye erere, ngwarbekäre nuainta.

17. 1 Timoteo 4:16 tä niere erere, ¿ni dirikä jökrä käkwe dre nuaindre?

¹⁷ Nitre mikadre ja tötikaka Jesukwe ye sribi tuin ütiäte krubäte nie aune nuainta bökän nikwe. Ni tö nitre ja tötikaka ye dimikai ne kwe ja ngökadre ñöte kwetre. Ye medenbätä, nikwe diridre Biblia yebiti aune kukwe drieta nikwe ye nita tarere aune era ni kräke ye erere nikwe bämikadre ni ja tötikaka okwäte. Nikwe niaratre dimikai ja ketamuko kwin känene konkrekasionte, käre nikwe blitadre bentre ja diandrekä mento Ngöbö kräke aune ja ngökadre ñöte yebätä aune nane nane niaratre tä nirien ño ja üairebiti ye nikwe mikadretari ñärärä. (Recuadro “ Ni dirikä käkwe ne nuaindre” ye mikadre ñärärä). Sribi ne köböire ni kwati raba nemen kwäre aune kätä juto krubäte nibätä sribi ne nuainbätä. Yebätä, nikwe ja di ngwandre täte ni ja tötikaka dimikakäre ja ngökö ñöte.