1. Bichi biyerekene oku akasi k’okujira abanafunzi kali kasi k’okuyokola akalamo?

AKASI k’okujira abanafunzi kali kasi k’okuyokola akalamo! Nka gurhe rhumenyere ntyo? Amango Yesu ahanaga erhegeko lili omu Matayo 28:19, 20, aderha ntya: “Mugende, . . . mujire abanafunzi . . . , munababatize.” Kamaro kachi obubatizo bugwerhe? Rhukwanene rhubatizwe akaba rhulonzeze kupata akalamo k’esiku n’amango. Omuntu walonza kubatizwa akwanene ayemere oku chintu chiguma chonyine chakarhuma rhwapata akalamo k’esiku n’amango, kuli kubona oku Yesu arhufiraga anafuka. Che charhumaga entumwa Petro yabwira ababo Bakristu ntya: “Obubatizo bubachungwire bunola . . . Kugerera obufuke bwa Yesu Kristu.” (1 Pe. 3:21) Che chirhumire amango omwanafunzi amabatizwa, anapata obulangalire b’okulama esiku n’amango.

2. Olwandiko lwa 2 Timoteo 4:1, 2 luderhere rhube balimu ba nyabachi?

² Okujira abanafunzi kuhemere rhukomeze “obufundi bwerhu b’okuyigiriza,” k’okuderha rhube balimu benja. (Osome 2 Timoteo 4:1, 2.) Bulagurhe? Bulala Yesu alirhuhere erhegeko liderhere ntya: “Mugende, . . . mujire abanafunzi . . . , mubayigirize.” Entumwa Paulo yaliderhere “oku osere” mw’akola akasi, “bulala omukujira ntyo wachiyokola woyo wenyine na balala bakuyunviriza.” Che charhumaga Paulo aderha ntya mw’olula lwandiko: “Ogenderere kugerereza . . . okuyigiriza kwawe.” (1 Ti. 4:16) Bulala bihemere rhugwarhe obuhashe b’okuyigiriza abantu, rhulonzeze okuyigiriza kwerhu kube kwinja bwenene.

3. Bichi rhwaganirira mu gunola mwazi oku bilolere amafunzo me Biblia?

³ Rhuli rhwaongoza amamiliyoni m’amafunzo me Biblia omu gulu lyoshi. Aliko nk’okurhwabonaga omu mwazi gwageraga, rhulonzeze rhumenye gurhe rhwakarhabala banene mu bo, babe banafunzi ba Yesu Kristu babatizwe. Mu gunola mwazi,  rhwabona bindi bintu birhano omwalimu akwanene ajire y’arhabala omwanafunzi wage we Biblia ajire amaja-mbere kuhikira obubatizo.

4. Bulagurhe omwalimu akwanene kugwarha engeso y’okuchigala amango ali aongoza efunzo lye Biblia? (Olole n’amahugulo m’eshishi.)

⁴ Rhunasima ebi rhunayigiriza birhengere omu Chinwa cha Mungu. Che chirhumire hali oku rhwakalonza kuderha binene eju ya byo. Aliko, kube kuongoza Efunzo ly’Omunara g’Omulanzi, changwa Efunzo lye Biblia lye Chibaga, changwa efunzo lye Biblia ahambuga, omwigiriza arhakwanene kuderha binene. Y’omwalimu akolesa Ebiblia omu kuyigiriza, akwanene agwarhe engeso y’okuchigala arhanakwanene afasiriye buli chintu choshi amenyere eju ya lwandiko lulebe changwa eju ya mwazi gulebe. * (Yoh. 16:12) Uhuzanye obumenyi bwe Biblia waligwerhe amango wabatizwaga n’ob’okola ogwerhe zene. Bibonekene oku amango wabatizwaga walimenyere enyigirizo z’omusinji ze Biblia zonyine. (Ebr. 6:1) Byalikuhemere myaka minene y’oyiga oby’omenyere zene, che chirhumire orhakwanene kuyigiriza omwanafunzi we Biblia muhyahya ebintu byoshi oku liguma.

5. a) Nk’oku olwandiko lwa 1 Watesalonike 2:13 luderhere, bichi rhulonzeze omwanafunzi werhu amenye birhengerere omu funzo lyage? b) Gurhe rhwakahiba omwanafunzi werhu omurhima ayinje abwira abandi oku by’ali ayiga?

⁵ Rhulonzeze omwanafunzi werhu we Biblia amenye bwinja oku eby’ali ayiga birhengerere omu Chinwa cha Mungu. (Osome 1 Watesalonike 2:13.) Nka gurhe rhwakajira ntyo? Ohire omwanafunzi wawe omurhima abwire abandi oku by’ali ayiga. Ahali oyinje wafasiria omwanafunzi wawe ngasi lusiku amandiko me Biblia, omubwire naye akufasirie maguma mumo. Orhabale omwanafunzi amenye nka gurhe eby’ali ayiga omu Chinwa cha Mungu bimulolere bwage-bwage. Omubaze ebibazo byakarhuma aderha ebi muli oku murhima, k’okuderha, ebyawazize na gurhe ali achiyunva eju y’eby’ali asoma omu mandiko. (Lu. 10:25-28) Omufano, omubaze ntya: “Gurhe olula lwandiko lukurhabere obone ngeso nguma omu ngeso za Yehova?” “Nka gurhe wakayunguka n’obola bukweri buli omu Biblia?” “Gurhe ochiyunvirhe eju y’ebi wamamala kuyiga?” (Mez. 20:5) Ech’akamaro bwenene, arhali bingana gurhe omwanafunzi amenyere, s’ahubwe kangana gurhe asimire n’okukolesa eby’amenyere.

6. Bulagurhe kuli kwinja okugenda n’omuhubiri ogwerhe obufundi b’okuyigiriza amango rhwamajayiga n’omwanafunzi werhu?

⁶ Amango wamaja kuyiga n’omwanafunzi, k’onagenda n’abahubiri bagwerhe obufundi  b’okuyigiriza? Amango wamagenda nabo, wakababwira balole gurhe oli wayigiriza balole n’akaba oli wakolesa Ebiblia bwinja amango oli wayigiriza. Okwanene obe mwirhohye akaba olonzeze obe mwalimu mwinja. (Huzanya na Matendo 18:24-26.) Oku buzinda, obaze omuhubiri ogwerhe obufundi b’okuyigiriza akubwire akaba abwene oku omwanafunzi wawe anayunvirhe bwinja eby’ayigire omu Biblia. Wakanabwira oyola muhubiri yon’oyola ayige n’omwanafunzi wawe akaba woyo orhabaho mu boso liguma changwa maboso manene. Okujira ntyo kwarhuma omwanafunzi agenderere kuyiga n’okumuyereka bwinja oku efunzo lili ly’akamaro bwenene. Orhawazaga chiro oku elyola funzo lili “lyawe” n’oku nta windi muntu wakaliongoza. Rhumenyere oku oshondere omwanafunzi wawe amenja, bobola akajira amaja-mbere omu kugenderera kuyiga okuli.

7. Bichi byakarhabala omwanafunzi asimiswe n’eby’ali ayiga?

⁷ Bihemere omwanafunzi wawe abone ok’osimire onayemerere okuli kuli omu Biblia. (1 Te. 1:5) Ahola nkabaga naye anaj’asimiswa bwenene n’eby’ali ayiga. Wakamubwira nka gurhe okulama nk’oku amakanuni me Biblia maderhere, kwakurhabere omu kalamo kawe. Anaj’abona oku amakanuni mali omu Biblia makamurhabala naye.

8. Bichi bindi wakajira y’orhabala omwanafunzi wawe we Biblia, na nka gurhe okwanene kujira ntyo?

⁸ Amango muli mwayiga, obalire omwanafunzi wawe eju ya bene-berhu na bali-berhu balihurene n’ebibazo bili nk’ebyage, aliko babihima. Amango wamaja kuyiga n’omwanafunzi wawe, wakagenda na muntu muguma w’omuchibaga, ey’omufano gwage gwakayungula omwanafunzi wawe. Changwa wakapata emifano ehirire omurhima oku jw.org omu myazi ekulikirene “Biblia Inabadilisha Maisha ya Watu.” * Emyazi eli nk’eyola n’evideo, byakarhabala omwanafunzi abone bulagurhe kuli kwinja okukolesa amakanuni me Biblia omu kalamo kage.

9. Nka gurhe wakahira omwanafunzi omurhima ahwanze kubwira abantu b’omulala gwage na bera bage oku eby’ali ayiga?

⁹ Akaba omwanafunzi ashabire changwa ashabirwe, eba changwa mukage naye anayiga si? Akaba nanga, wakamubwira naye abeho amango muli mwayiga. Ohire omwanafunzi wawe omurhima ayinje abwira abantu b’omulala gwage na bera bage oku by’anayiga. (Yoh. 1:40-45) Nka gurhe wakajira ntyo? Wakaba  nka wamubaza ntya: “Gurhe wakafasiria obula bukweri oku bantu b’omulala gwawe?” changwa “Lwandiko luhe wakakolesa y’oyemeza mwira wawe obula bukweri?” Omu kujira ntyo, waba ey’oli wakomeza omwanafunzi gurhe akaba mwalimu. Amango amayeneza ebi hemerwe, akaba muhubiri orhaza batizwa n’okuhwanza kuhubiri n’echibaga. Wakabaza omwanafunzi akaba hali owindi muntu amenyere osimire ayige Ebiblia. Akaba aliho, olambagirire oyola muntu juba-juba n’okuhwanza kuyiga naye. Omuyereke evideo Gurhe Rhunayigiriza Abantu Ebiblia? *

10. Nk’oku ebinwa bili omu 1 Watesalonike 2:7, 8 biyerekene, nka gurhe omwalimu akayiga omufano gwa Paulo?

¹⁰ Abalimu bakwanene kuyereka abanafunzi babo olukogo n’okubayereka oku babalagireko bwenene. Mubabone nka bene-berhu na bali-berhu b’omusiku zayinjire. (Osome 1 Watesalonike 2:7, 8.) Birhabayorehere kulekana na bera babo b’omugulu n’okuhindamuka loshi nk’okubihemere yi bakolera Yehova. Bihemere rhubarhabale bagwarhe abera b’okuli omu chibaga. Obe mwira w’omwanafunzi wawe omu kugeza ebisanzi haguma naye, arhali mpu amango muli mwayiga Ebiblia konyine s’aliko n’ebindi bisanzi. Okuhamagala abanafunzi oku telefone, okubayandikira emesaje, changwa okubalambagirira bugeke, kwaka bayereka oku kweri obalagireko.

11. Bichi rhulonzeze abanafunzi berhu bagwarhe omu chibaga, na bulagurhe?

¹¹ Banaderha oku: “Omwana aba waboshi.” Kumbe rhwakaderha oku: “Echibaga choshi chinarhabala omu kujira omwanafunzi.” Che chirhumire amango abalimu benja be Biblia bamarhabala abanafunzi babo bamenye abandi bantu nabo bakabarhabala bagwarhe obwira bukomere haguma na Yehova. Abanafunzi bakaja basima kuchiheba haguma n’olubaga lwa Mungu, n’abola bene-berhu na bali-berhu bakabarhala babe bera benja ba Yehova n’okubaheba omurhima amango bamagwarha ebibazo. Rhusimire buli mwanafunzi achiyunve oku hali echamalire omu chibaga n’oku ali mugumu w’omulala gwerhu gw’ekiroho. Rhulonzeze asimiswe n’omulala gwerhu g’obuzigire gwa bene-berhu na bali-berhu. Ahola byanaja byamuyorohera okulekana n’obwira bwa bantu barhakamubarhabala azigire Yehova. (Mez. 13:20) Nk’abera bage bamamujahika, amenya oku apata abera b’okuli omu chibaga cha Yehova.​—Mk. 10:29, 30; 1 Pe. 4:4.

12. Bulagurhe rhukwanene kuganirira haguma n’omwanafunzi werhu eju y’okuchihana emwa Yehova n’okubatizwa?

¹² Ozigane kuganirira eju y’akamaro kaliho nk’omuntu ahanire akalamo kage emwa Yehova  n’okubatizwa. Omuhigo gwerhu gukulu g’okuongoza efunzo lye Biblia, kuli kurhabala omuntu abe mwanafunzi wa Yesu obatizwe. Mu myezi migeke omwanafunzi ahwanzize kuyiga Ebiblia oku kahunda, n’ahanene akaba akola ahika oku mbuganano, akwanene amenye bwinja oku omuhigo g’oyiga Ebiblia kuli kumurhabala arhondere kukolera Yehova nka mugumu w’omu Bahamirizi bage.

13. Bichi omwanafunzi akwanene akole yi ajira amaja-mbere kuhikira obubatizo?

¹³ Hali bintu biguma omwanafunzi we Biblia akwanene ajire akaba alonzeze abatizwe! Ech’oburhanzi, omwanafunzi akwanene amenye n’okuzigira Yehova n’okugwarha obuyemere muye. (Yoh. 3:16; 17:3) Ahola omwanafunzi anaba mwira wa Yehova, n’okuba mwira wa bane-berhu na bali-berhu b’omu chibaga. (Ebr. 10:24, 25; Yak. 4:8) Buzinda, omwanafunzi analeka ebijiro bibi n’okuhungama ebyaha byage. (Mdo. 3:19) Kandi, anayinja abwira abandi oku by’akola ayemerere. (2 Ko. 4:13) Anaj’achihana emwa Yehova n’okuyerakana oku achihanire omu kubatizwa. (1 Pe. 3:21; 4:2) Olola lusiku, bubabusime bunene kubuli muntu! Amango omwanafunzi ali ajira ebintu bihemerwe y’abatizwa, ogenderere kumuheba omurhima agenderere kujira ntyo.

14. Nka gurhe omwalimu akagerereza amaja-mbere m’omwanafunzi?

¹⁴ Rhukwanene rhube bantu b’okulindira amango rhuli rhwarhabala omwanafunzi ajire amaja-mbere kuhika amango achihana n’okubatizwa. Aliko bishubire kurhuhema, rhuyinje rhwalola akaba anagwerhe enyorha y’okukolera Yehova Mungu. K’ahali eby’obwene omwanafunzi ali ajira biyerekene oku ali achihangana kukenga amarhegeko ma Yesu? Changwa alonzeze kuyiga konyine ebintu bisimisize bili omu Biblia?

15. Bichi byakayereka omwalimu oku omwanafunzi y’ajira amaja-mbere?

¹⁵ Ogerereze amaja-mbere omwanafunzi ali ajira buli mango. Omufano, anali abwira Yehova okuntu ali achiyunva si? Anasalira Yehova si? (Zb. 116:1, 2) Anasima kusoma Ebiblia si? (Zb. 119:97) Anaja oku mbunganano oku kahunda si? (Zb. 22:22) Hali engeso ahindamwire omu kalamo kage si? (Zb. 119:112) Arhondere kubwira abantu b’omulala gwage na bera bage oku by’ali ayiga si? (Zb. 9:1) Ech’akamaro bwenene, k’alonzeze kuba Muhamirizi wa Yehova si? (Zb. 40:8) Akaba nta njira chiro n’enguma mw’ezola ayerekene mw’amaja-mbere, ochihangane  omenye bulagurhe, onaganire naye wazi aliko oku bukenge. *

16. Bichi byakakuyereka oku bihemere oleke kuyiga n’omwanafunzi we Biblia?

¹⁶ Buli mango oleme wachibaza akaba wakagenderera kuyiga na muntu mulebe. Ochibaze ntya: ‘K’omwanafunzi ali agambwa kurheganya ebi rhulirhwayiga? Arhasima kuja oku mbuganano si? Achigenderere kujira ebijiro bibi si? Achili omu dini ly’obubeshi si?’ Akaba wakachubiza nechi kw’ebyola bibazo, okugenderera kuyiga naye, kunali nka kuyigiriza omuntu kuyoga orhasimire aje kw’amenji! Akaba omwanafunzi arhavire asima eby’ali ayiga, arhanalonzeze kuyindamula akalamo kage, bulagurhe ogenderere kuyiga naye?

17. Nk’oku olwandiko lwa 1 Timoteo 4:16 luderhere, bichi abalimu boshi be Biblia bakwanene bajire?

¹⁷ Rhukwanene rhubone oku akasi kerhu k’okujira abanafunzi, kali k’akamaro bwenene, rhunalonzeze kurhabala abanafunzi be Biblia bajire amaja-mbere kuhikira obubatizo. Che chirhumire birhuhemere rhukolese Ebiblia amango rhuli rhwayigiriza, rhunayerekane oku rhusimire rhunayemerere ebi rhuli rhwayigiriza. Bihemere rhuhire omwanafunzi omurhima alonze abera omu chibaga. Kandi birhuhemere rhuchiseze oku muhigo g’okuchihana emwa Yehova n’okubatizwa n’okugerereza buli mango amaja-mbere m’omwanafunzi. (Olole echisanduku “ Ebi Abalimu be Biblia Bakwanene Kujira yi Barhabala Abanafunzi Babo Bahikire Obubatizo.”) Rhugwerhe busime bunene okubona oku nerhu rhuli rhwakola kw’akola akasi k’okuyokola akalamo! Rhuhigirire okujira okwerhu koshi rhugalire yi rhurhabala abanafunzi berhu be Biblia bajire amaja-mbere kuhikira obubatizo.