ZAJ KAWM 42
Pab Tus Kawm Vajlugkub Ua Kevcai Raus Dej—Zaj 2
“Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas.”—1 TIMAUTES 4:16.
ZAJ NKAUJ 77 Ci Kaj Nrig Rau Lub Ntiajteb Tsaus Ntuj Nti
ZAJ NO THAM TXOG DABTSI? *
1. Ua cas peb thiaj paub tias tes haujlwm mus coj neeg los ua Yexus cov thwjtim yog ib tes haujlwm uas yuav cawm tau neeg txojsia?
TES HAUJLWM mus coj neeg los ua Yexus cov thwjtim yog ib tes haujlwm cawm neeg txojsia. Yexus sam hwm rau nws cov thwjtim hauv Mathais 28:19, 20 tias: ‘Cia li mus qhia txhua haivneeg kom lawv los ua kuv cov thwjtim thiab muab lawv ua kevcai raus dej.’ Ua kevcai raus dej tseem ceeb npaum li cas? Yog peb xav tau txojsia nyob mus ib txhis ces peb yuav tsum ua kevcai raus dej. Tus uas ua kevcai raus dej yuav tsum ntseeg tias nws yuav tau txojsia ntev dhawv mus ib txhis vim Yexus twb tuag txhiv peb thiab sawv hauv qhov tuag rov los lawm. Tus tubtxib Petus thiaj hais rau cov Khixatia tias: “Qhov uas ua kevcai raus dej uas nimno pab nej dim los ntawm qhov uas Yexus Khetos ciaj sawv rov los.” (1 Petus 3:21, NWT ) Yog li ntawd thaum ib tug ua kevcai raus dej lawm ces nws cia siab tau tias nws yuav tau txojsia nyob mus ib txhis.
2. Ob Timautes 4:1, 2 hais tias cov uas qhia Vajlugkub rau lwm tus yuav tsum ua li cas?
2 Peb yuav tsum txawj qhia peb thiaj coj tau tibneeg los ua Yexus cov thwjtim. (Nyeem 2 Timautes 4:1, 2.) Yexus sam hwm tias: ‘Qhia kom lawv paub coj raws li txhua yam uas kuv tau qhia rau nej lawm.’ Tus tubtxib Paulus hais tias peb yuav tsum rau siab ua tes haujlwm no ‘rau qhov tej ntawd yuav pab tau peb thiab pab tau cov neeg uas mloog peb qhia kom dim lub txim.’ Qhov uas peb qhia lwm tus tseem ceeb heev. Paulus thiaj hais li no: ‘Koj yuav tsum ua tib zoo saib tej uas koj qhia seb koj qhia li cas.’—1 Timautes 4:16.
3. Hauv zaj no peb yuav tham txog dabtsi?
3 Peb qhia Vajlugkub rau tsheej plhom leej thoob plaws ntiajteb. Tiamsis zoo li zaj uas peb kawm tas los no, peb xav paub seb peb yuav ua li cas peb thiaj pab tau coob tus ntxiv los ua kevcai raus dej. Hauv zaj no peb yuav tham txog 5 yam uas peb yuav tsum tau ua los pab cov kawm Vajlugkub ua kevcai raus dej.
SIV PHAU VAJLUGKUB LOS QHIA
Thov ib tug uas txawj qhia Vajlugkub pab kom koj txawj siv phau Vajlugkub mus qhia lwm tus (Saib nqi 4-6) *
4. Vim li cas tus qhia Vajlugkub yuav tsum tsis txhob tham ntau ntau? (Saib cov lus hauv qab taw qhia.)
4 Peb nyiam phau Vajlugkub heev ces tej thaum peb yuav tham ntau ntau thaum peb qhia Vajlugkub rau lwm tus. Tiamsis peb yuav tsum tsis txhob ua li ntawd. Txawm tus coj kev kawm Phau Tsom Faj Rau Lub Koom Txoos lossis Lub Koom Txoos Kev Kawm Vajlugkub lossis tus qhia Vajlugkub rau lwm tus los yuav tsum nco ntsoov tsis txhob hais lus ntau ntau. Txhua tus uas qhia Vajlugkub rau lwm tus yuav tsum siv phau Vajlugkub los qhia es tsis txhob piav ua phab ua pheev txog ib puas tsav yam uas nws paub. * (Yauhas 16:12) Muab piv txwv li no: Thaum koj ua kevcai raus dej koj tsuas paub qho yam txog phau Vajlugkub xwb. (Henplais 6:1) Twb yog ntev heev tom qab koj mam li paub tej uas koj paub nimno. Yog li ntawd tsis txhob qhia ib puas tsav yam uas koj paub txog phau Vajlugkub rau tus uas nyuam qhuav kawm tshiab.
5. (1) Raws li 1 Thexalaunikes 2:13, peb xav kom tus kawm Vajlugkub to taub li cas txog qhov uas nws kawm? (2) Peb yuav ua li cas tus kawm Vajlugkub thiaj qhia seb nws xav li cas txog tej nws kawm?
5 Peb xav kom tus kawm Vajlugkub paub tias tej nws kawm yog los ntawm phau Vajlugkub los. (Nyeem 1 Thexalaunikes 2:13.) Yuav ua li cas peb thiaj ua tau li ntawd? Tsis txhob pheej ua tus piav tej nqi Vajlugkub xwb tiamsis hais kom nws piav seb nws to taub li cas. Pab nws pom tias Vajtswv Txojlus yuav pab tau nws lub neej. Nug nws seb nws xav li cas txog tej nqi Vajlugkub uas nws nyeem. (Lukas 10:25-28) Koj kuj nug nws li no: “Nqi Vajlugkub no qhia koj li cas txog Yehauvas?” “Nqi Vajlugkub no yuav pab tau koj li cas?” “Koj xav li cas txog tej uas koj kawm no?” (Pajlug 20:5, TT ) Qhov tseem ceeb tshaj tsis yog qhov uas tus kawm Vajlugkub kawm tau ntau npaum li cas tiamsis yog qhov uas nws nyiam tej nws kawm thiab muab coj los siv hauv nws lub neej.
6. Thaum peb mus qhia Vajlugkub rau ib tug, vim li cas zoo rau peb coj ib tug txawj qhia Vajlugkub nrog peb?
6 Thaum koj mus qhia Vajlugkub rau ib tug koj puas coj ib tug uas txawj qhia Vajlugkub nrog koj mus thiab? Yog koj ua li ntawd koj kuj nug seb nws xav li cas txog qhov uas koj qhia Vajlugkub rau tus ntawd thiab koj puas siv phau Vajlugkub los qhia. Nug tus txawj qhia seb puas ntxim li tus kawm Vajlugkub to taub tej nws kawm. Thaum peb txo hwjchim thiab thov lwm tus pab peb ces peb yuav txawj qhia Vajlugkub dua. (Muab piv rau Tes Haujlwm 18:24-26.) Peb yeej xav kom tus kawm Vajlugkub kawm tsis tu ncua. Yog koj tsis khoom qhia tus kawm Vajlugkub li ib ob lub lim tiam ces nco ntsoov tias lwm tus los kuj qhia tau Vajlugkub rau nws thiab. Yog koj thov lwm tus mus pab qhia rau koj ces tus kawm Vajlugkub yuav pom tias qhov uas nws kawm Vajlugkub tseem ceeb heev.
MUAJ SIAB ZIM QHIA
Qhia tus kawm Vajlugkub txog cov uas tau hloov lawv lub neej raws li phau Vajlugkub hais, tus kawm Vajlugkub thiaj yuav paub muab tej uas nws kawm coj los siv hauv nws lub neej (Saib nqi 7-9) *
7. Peb yuav ua li cas tus kawm Vajlugkub thiaj yuav kub siab kawm?
7 Tus kawm Vajlugkub yuav tsum pom tias koj nyiam thiab ntseeg tej uas phau Vajlugkub qhia, nws thiaj li yuav kub siab kawm. (1 Thexalaunikes 1:5) Yog tias zoo qhia ces koj kuj qhia rau nws seb phau Vajlugkub pab tau koj li cas. Yog koj ua li no nws yuav pom tias phau Vajlugkub yuav pab tau nws thiab.
8. Peb yuav pab tus kawm Vajlugkub li cas ntxiv thiab vim li cas peb yuav tau ua li ntawd?
8 Thaum koj qhia Vajlugkub rau nws, qhia rau nws txog cov kwvtij nkauj muam uas muaj teeb meem ib yam li nws thiab phau Vajlugkub pab tau lawv li cas. Yog muaj ib tug hauv koj lub koom txoos uas yuav pab tau nws, coj tus ntawd nrog koj mus thiab. Lossis yog koj nrhiav tau tej qauv zoo hauv “Vajlugkub Kho Tau Lub Neej” * hauv jw.org/hmn koj kuj muab rau nws saib thiab. Tej ntaub ntawv thiab yeeb yaj kiab no yuav pab nws paub muab phau Vajlugkub coj los siv hauv nws lub neej.
9. Koj yuav txhawb tus kawm Vajlugkub li cas nws thiaj qhia tej nws kawm rau nws cov txheeb ze thiab phoojywg?
9 Yog tus koj qhia Vajlugkub rau muaj txij nkawm, puas muaj ib tug qhia Vajlugkub rau nws? Yog tsis muaj ces caw nws los nrog neb kawm. Txhawb kom tus kawm Vajlugkub qhia txog tej uas nws kawm rau nws cov txheeb ze thiab phoojywg. (Yauhas 1:40-45) Koj yuav ua li cas txhawb tau nws li ntawd? Tej zaum koj kuj nug nws tias: “Yog koj xav qhia qhov uas koj kawm no rau koj tsev neeg, koj yuav qhia li cas?” lossis “Koj yuav siv nqi Vajlugkub twg los qhia koj cov phoojywg?” Thaum koj ua li no ces lwm hnub nws yuav paub mus qhia lwm tus. Ces thaum twg nws mus tshaj tawm tau lawm ces nws mam li mus nrog cov kwvtij nkauj muam mus qhia Vajlugkub. Koj kuj nug nws seb nws puas paub lwm tus uas xav kawm Vajlugkub thiab. Yog nws paub ces mus nrog tus ntawd tham seb nws puas xav kawm Vajlugkub nrog koj thiab tso zaj yeeb yaj kiab Kev Kawm Vajlugkub Zoo Li Cas? * rau tus ntawd saib.
TXHAWB KOM NWS NTAUS PHOOJYWG NROG COV NYOB HAUV LUB KOOM TXOOS
Txhawb tus kawm Vajlugkub kom ntaus phoojywg nrog cov nyob hauv lub koom txoos (Saib nqi 10-11) *
10. Raws li 1 Thexalaunikes 2:7, 8, cov qhia Vajlugkub yuav xyaum Paulus tus qauv li cas?
10 Koj yuav tsum qhia tus kawm Vajlugkub tias koj hlub tshua nws tiag. Saib nws ib yam li nws yog peb ib tug kwvtij nkauj muam. (Nyeem 1 Thexalaunikes 2:7, 8.) Yeej tsis yoojyim rau ib tug neeg hloov nws lub neej los teev tiam Yehauvas thiab tso nws cov phoojywg uas tsis teev tiam Yehauvas tseg. Yog vim li ntawd koj yuav tsum pab kom nws muaj phoojywg zoo hauv lub koom txoos. Tsis txhob mus qhia Vajlugkub rau nws nkaus xwb tiamsis siv sijhawm nrog nws ua ub ua no ua ke thiab. Thaum koj hu xov tooj nrog nws tham, ntaus ntawv mus rau nws lossis mus xyuas nws, nws yuav paub tias koj yeej hlub tshua nws tiag.
11. Vim li cas peb xav kom cov kawm Vajlugkub ntaus phoojywg nrog cov nyob hauv lub koom txoos?
11 Muaj ib zaj paj lug hais tias: “Tag nrho ib lub zej zog sib pab tu, tus menyuam thiaj loj hlob.” Peb kuj hais tau tias: “Tag nrho cov hauv lub koom txoos sib pab thiaj coj tau ib tug los ua Yexus tus thwjtim.” Twb yog vim li ntawd peb thiaj xav kom tus kawm Vajlugkub ntaus phoojywg hauv lub koom txoos. Cov kwvtij nkauj muam yuav pab tau nws txav ze Yehauvas thiab lawv yuav pab tau nws thaum nws muaj kev nyuaj siab. Peb xav kom tus kawm Vajlugkub pom tias cov kwvtij nkauj muam yog nws tsev neeg thiab ncawg lawv thiaj tsis nyuaj rau nws tso nws tej phoojywg uas tsis teev tiam Yehauvas tseg. (Pajlug 13:20) Yog nws cov qub phoojywg tsis xav ua dabtsi nrog nws lawm los nws paub tias nws muaj phoojywg zoo hauv Yehauvas lub koom haum.—Malakaus 10:29, 30; 1 Petus 4:4.
NCO NTSOOV THAM TXOG KEVCAI RAUS DEJ
Yog tus kawm Vajlugkub rau siab hloov nws lub neej ces nws yeej yuav ua tau kevcai raus dej! (Saib nqi 12-13)
12. Vim li cas peb yuav tsum nco ntsoov qhia rau tus kawm Vajlugkub tias tseem ceeb heev rau peb muab peb tus kheej cob rau Yehauvas thiab ua kevcai raus dej?
12 Qhov uas peb mus qhia Vajlugkub rau ib tug neeg twb yog peb xav pab nws los teev tiam Yehauvas. Vim li ntawd peb yuav tsum nco ntsoov qhia rau nws tias qhov uas ib tug muab nws tus kheej cob rau Yehauvas thiab ua kevcai raus dej tseem ceeb npaum li cas. Thaum koj kawm Vajlugkub nrog nws tau ob peb hlis lossis thaum nws pib tuaj kev sib txoos lawm, nws yuav tsum to taub tias peb xav pab nws los ua Yehauvas ib tug Timkhawv.
13. Tus kawm Vajlugkub yuav tau ua dabtsi ua ntej nws ua kevcai raus dej?
13 Muaj tej yam uas tus kawm Vajlugkub yuav tau ua ua ntej nws ua kevcai raus dej. Nws yuav tsum paub thiab hlub Yehauvas thiab muaj kev ntseeg. (Yauhas 3:16; 17:3) Nws yuav tsum ntaus phoojywg nrog Yehauvas thiab cov kwvtij nkauj muam hauv lub koom txoos. (Henplais 10:24, 25; Yakaunpaus 4:8) Tus kawm Vajlugkub yuav tau hloov nws lub neej thiab tso tej yam uas tsis haum Yehauvas siab tseg. (Tes Haujlwm 3:19) Nws yuav tau mus qhia nws txojkev ntseeg rau lwm tus. (2 Kauleethaus 4:13) Thiab muab nws tus kheej cob rau Yehauvas thiab ua kevcai raus dej. (1 Petus 3:21; 4:2) Hnub uas nws ua kevcai raus dej, sawvdaws yuav zoo siab heev! Thaum koj pom tias nws pib hloov nws lub neej kom nws thiaj ua tau kevcai raus dej, nco ntsoov qhuas thiab txhawb nws.
XAV SEB NWS PUAS HLOOV NWS LUB NEEJ RAWS LI TEJ NWS KAWM
14. Peb yuav ua li cas peb thiaj paub tias tus kawm Vajlugkub xav teev tiam Yehauvas?
14 Peb yuav tsum ua siab ntev thaum peb pab tus kawm Vajlugkub los ua kevcai raus dej. Tiamsis peb yuav tsum xyuas seb nws puas xav teev tiam Vajtswv Yehauvas tiag. Koj puas pom tias nws yeej xyaum ua li Yexus tej lus sam hwm? Lossis nws tsuas kawm tej uas nws xav paub hauv phau Vajlugkub xwb?
15. Yuav ua li cas peb thiaj paub tias tus kawm Vajlugkub xav ua kevcai raus dej?
15 Yog peb xav paub seb tus kawm Vajlugkub puas xav teev tiam Yehauvas ces xav seb nws puas nyiam tham txog Yehauvas. Nws puas thov Yehauvas? (Phau Ntawv Nkauj 116:1, 2) Nws puas nyeem phau Vajlugkub? (Phau Ntawv Nkauj 119:97) Nws puas niaj zaus tuaj kev sib txoos? (Phau Ntawv Nkauj 22:22) Nws puas hloov nws lub neej raws li tej nws kawm? (Phau Ntawv Nkauj 119:112) Nws puas tham txog tej nws kawm nrog nws tsev neeg thiab nws cov phoojywg? (Phau Ntawv Nkauj 9:1) Thiab qhov tseem ceeb tshaj, nws puas xav los ua Yehauvas ib tug Timkhawv? (Phau Ntawv Nkauj 40:8) Yog muaj tej yam no uas tus kawm Vajlugkub ua tsis tau ces ua tib zoo nug nws thiab nrog nws tham seb yog vim li cas. *
16. Thaum twg zoo rau peb tso tseg tsis kawm Vajlugkub rau ib tug lawm?
16 Muaj tej thaum koj yuav tsum xav seb puas tsim nyog koj kawm Vajlugkub nrog nws ntxiv lawm. Xav seb tus kawm Vajlugkub puas npaj ua ntej neb kawm Vajlugkub? Nws puas mus kev sib txoos? Nws puas tau tso tej yam uas tsis haum Vajtswv siab tseg? Nws puas tau tso nws txojkev ntseeg qub tseg? Yog nws tsis tau ua tej no li thiab nws pheej tsis hloov nws lub neej raws li tej nws kawm ces tej zaum tsis tsim nyog mus qhia Vajlugkub rau nws ntxiv lawm. Yog peb pheej qhia Vajlugkub rau ib tug zoo li no ces zoo ib yam li peb qhia ib tug neeg uas twb tsis nyiam kov dej ua luam dej.
17. Raws li 1 Timautes 4:16, cov qhia Vajlugkub yuav tsum ua li cas?
17 Peb yeej mob siab mus coj tibneeg los ua Yexus cov thwjtim thiab peb xav pab cov kawm Vajlugkub ua kevcai raus dej. Twb yog li ntawd peb yuav tau siv phau Vajlugkub thaum peb qhia lawv thiab muaj siab zim qhia. Peb yuav tau txhawb kom cov kawm Vajlugkub ntaus phoojywg nrog cov nyob hauv lub koom txoos. Thiab peb yuav tau nco ntsoov qhia rau lawv tias qhov uas muab lawv tus kheej cob rau Yehauvas thiab ua kevcai raus dej tseem ceeb npaum li cas. Tsis tas li ntawd xwb peb yuav tau ua zoo xav seb lawv puas hloov lawv lub neej raws li tej lawv kawm. (Mus saib lub ntsiab me “ Pab Tus Kawm Vajlugkub Los Ua Kevcai Raus Dej.”) Peb zoo siab tias peb ua tes haujlwm mus cawm tibneeg txojsia! Yog li ntawd rau siab ntso ua li koj ua tau los pab cov kawm Vajlugkub ua kevcai raus dej.
ZAJ NKAUJ 79 Pab Lawv Nyob Ruaj Khov
^ nqe 5 Yog ib qho koob hmoov zoo uas Yehauvas cia peb qhia Vajlugkub rau lwm tus. Peb pab qhia kom lawv txawj xav thiab txawj ua kom haum Yehauvas siab. Zaj no peb yuav tham ntxiv tias peb yuav ua li cas peb thiaj txawj qhia lwm tus.
^ nqe 4 Mus saib phau Lub Neej Thiab Tes Haujlwm Phau Kawm lub 9 Hlis xyoo 2016 zaj hu ua “Thaum Qhia Vajlugkub Yuav Tau Zam Dabtsi?”
^ nqe 8 Mus rau NTSIG TXOG PEB > LUB NEEJ.
^ nqe 9 Hauv jw.org/hmn mus rau VAJLUGKUB TEJ LUS QHIA > KAWM VAJLUGKUB NROG YEHAUVAS COV TIMKHAWV.
^ nqe 15 Mus saib Phau Tsom Faj lub 3 Hlis xyoo 2020 zaj kawm hu ua “Ua Kevcai Raus Dej Vim Koj Hlub Yehauvas” thiab “Koj Puas Tau Xav Ua Kevcai Raus Dej?”
^ nqe 77 COV DUAB: Thaum kawm Vajlugkub rau ib tug tas, tus muam uas paub tab pab tus uas qhia Vajlugkub kom nco ntsoov ua ntsuas hais lus ntau dhau.
^ nqe 79 COV DUAB: Tus kawm Vajlugkub kawm tias nws yuav ua li cas nws thiaj ua tau ib tug niam tsev zoo. Tom qab ntawd nws qhia nws tus txiv txog tej nws kawm.
^ nqe 81 COV DUAB: Tus kawm Vajlugkub thiab nws tus txiv mus xyuas ob niam txiv uas nkawd ntsib tom Tsev Nceeg Vaj.
