1. Wii wise mer tas ti aarwayt fer tisipele mache tuut leepe rete?

TI AARWAYT fer tisipele mache tuut leepe rete! Wii wise mer es? In Mateus 28:19, 20, Yeesus hot tiise kepoot kep: ‘Keet, macht tisipele, un tuut se taafe.’ Wii wichtich is sich taafe lose? Meyer thërfe uns taafe fer tas eewiche leepe kriin. Yemant woo sich taafe lose wil, mus klaape tas mer khene ploos eewiche leepe kriin wayl Yeesus is fer uns kextorep un is fom toot uf kextii. Weeche tas, hot te aphostel Pheeter fer ti kriste kesaat: ‘Ti taaf tuut aych yets rete, torich Yeesus Kristus sayn ufxtaye fom toot.’ (1 Ped. 3:21) Tan, wën een naye tisipel lost sich taafe, tee tuut sich in tëm weech fom retung tuun.

2. Tëm noo 2 Timóteo 4:1, 2, was fer sorte leerer sole mer sin?

² Fer tisipele mache, prauche mer kexik leerer wëre. (Lees 2 Timóteo 4:1, 2.) * Warom? Wayl Yeesus hot uns kexikt: ‘Keet, macht tisipele un tuut se in lërne.’ Te aphostel Phaul hot kesaat tas es neetich is sich in tiise aarwayt “wayter hale”, wayl wëns tuu soo machst, “tuust tuu tich selepst rete un tii woo tich aan heere”. Tes weeche, Phaul hat een kuut uersach fer se saan: ‘Tuu wayter acht iwer tayn inlërnung kepe.’ (1 Tim. 4:16) Wayl tisipele mache tuut paysamer xafe mit kuut in lërne, meyer wole tas unser inlërnung wërt te pest woos khan sin.

3. In tiise artikel, was tuun mer noo kuke iwer Piipel xtuutye fiire?

 ³ Meyer tuun milyoone Piipel xtuutye welt wayt fiire. Awer, wii te letste artikel kesaat hot, meyer wole wise wii khene mer mee fon tiise Piipel xtutënte helfe pis aan te taaf hin khome. In tiise artikel, meyer tuun finef anere tinge noo kuke woo yeete leerer praucht mache fer sayn xtutënte helfe pis aan taaf hin khome.

4. Warom praucht een leerer selepst kontrol tsayche wën eyer een Piipel xtuutyum fiirt? (Kuk aach ti noote.)

⁴ In te meyerst tsayt, wën mer tuun een sache kërn hon, tuun mer fiil iwer tas xpreche. Un meyer liipe ti inlërnunge fon te Piipel. Awer, wën yemant fiirt Te Wachthorm Xtuutyum, ti Kemaynt Piipel Xtuutyum orer een Piipel xtuutyum aans haus, tee sol net tsu fiil xpreche. Fer ti Piipel in lërne lose, te leerer praucht selepst kontrol tsayche un net fersuuche aus leye ales was tee wees iwer een Piipel tekst orer sache. * (João 16:12) Tenk traan iwer wii fiil wust tuu fon te Piipel wëns tuu tich taafe kelos host un wii fiil mee tuust tuu yets wise. Woerxaynlich, wëns tuu tich taafe kelos host, wust tuu ploos ti wichtichste inlërnunge fon te Piipel. (Heb. 6:1) Es hot yoore ketauert pis tuu kelërnt host ales was tuu hayt weest. Tes weeche, fersuuch net fer een naye xtutënt ales uf een mool lërne.

5. (a) Tëm noo 1 Tessalonicenses 2:13, was wole mer tas unser xtutënt ferxteet iwer tëm sayn xtuutyum? (b) Wii khene mer te xtutënt uf muute fer se xpreche iwer ti tinge woo tee am lërne is?

⁵ Meyer wole tas unser xtutënt ferxteet tas ales was tee lërnt khomt fon te Piipel. (Lees 1 Tessalonicenses 2:13.) * Wii khene mer tas mache? Tuu te xtutënt uf muute fer se xpreche iwer ti tinge woo tee am lërne is. Xtats imer ti Piipel tekste tsu tëm aus leye, ferlang tëm fer welche fon te tekste fer tich aus leye. Helef te xtutënt se mërke wii Kot sayn Wort tuut in sayn leepe phase. Tuu tëm frooche mache, woo tuun tëm helfe saan was eyer mënt un wii tuut eyer sich xpiire iwer ti tekste woo eyer leest. (Luc. 10:25-28) Tsum payxpiil, froo tëm: ‘Wii hot tiise tekst tich keholef een fon Yeehoowa sayn kwaliteete mërke?’ ‘Wii khanst tuu nutse kriin fon tiise piiplix woerheet?’ ‘Wii xpiirst tuu tich iwer ti tinge woos tuu kraat kelërnt host?’ (Pro. 20:5) Tas haupste is net wii fiil te xtutënt wees, awer wii fiil tuut eyer liipe un aan wëne was eyer wees.

6. Warom khan es kuut sin, een leerer woo fiil speryens hot, fer een Piipel xtuutyum mit nëme?

 ⁶ Wëns tuu een Piipel xtuutyum fiirst, tuust tuu als mool puplikatoore woo fiil speryens hon, mit nëme? Tuu khanst tëne ferlange fer se saan was tii mëne iwer ti aat wiis tuu tas xtuutyum fiirst, orer eps tuu tuust ti Piipel kuut penutse. Tuu must teemuutich sin, wëns tuu wilst een peser leerer wëre. (Kuk aach Atos 18:24-26.) Noo heyer, froo te puplikatoer ep tee mënt tas te xtutënt ferxteet was tee am lërne is. Wëns tuu tuust eene orer tswaay woche fat plaype, tuu khanst fer tiise selwiche puplikatoer ferlange fer tas Piipel xtuutyum fer tich fiire. Tan, tas xtuutyum tuut net noo lose, un te xtutënt tuut mërke wii wichtich tas xtuutyum is. Tuu nii mëne tas tas xtuutyum is “taynes” un tas nimant anere khan es fiire. Am ën, tuu wilst was is peser fer te xtutënt, tas eyer khan wayter mee iwer ti woerheet lërne.

7. Was tuut een xtutënt helfe muutich plaype mit was tee am lërne is?

⁷ Te xtutënt praucht mërke tas tuu liipst un klaapst aan was ti Piipel in lërnt. (1 Tes. 1:5) Tan, tsiimlich sicher, tas wërt tëm laychter muutich plaype mit was tee am lërne is. Fiilaycht khanst tuu tëm saan wii hot ti Piipel tich in tayn leepe keholef. Tan, tuut tee mërke tas ti Piipel nutslich is un khan tëm aach helfe.

8. Was noch khanst tuu mache fer tayn xtutënt helfe, un weeche was is tas kuut?

⁸ Torich tas Piipel xtuutyum, fertseel mit tayn xtutënt iwer anere priiter un xwestere woo hate propleeme eenliche wii tëm sayns un woo hon tëne iwerkhom. Tuu khanst yemant fon te kemaynt fer tas xtuutyum nëme woo khan een kuute payxpiil fer te xtutënt sin. Orer, khanst tuu ufmuutiche speryense in tëm site jw.org fine, in te sekwëns “Ti woerheet tuut leepe ënere”. * Soo sorte artikele un wiiteos tuun tayn xtutënt helfe se mërke tas ti Piipel khan tëm helfe sayn leepe ferpesere.

9. Wii khanst tuu eene xtutënt uf muute mit sayn familye un froynte fertseele iwer was tee am lërne is?

⁹ Wën te xtutënt ferhayrat is, tuut sayn fraa orer man aach xtutiire? Wëns net, tuu tii orer tee in laate fer aach in tëm xtuutyum khome. Tuu tayn xtutënt uf muute fer mit sayn familye un mit sayn froynte fertseele iwer was tee am lërne is. (João 1:40-45) Wii? Tuu khanst  frooe: ‘Wii teest tuu tiise inlërnung fer tayn familye aus leye?’ orer ‘Was fer tekst teest tuu penutse fer tiise phunkt fer tayn froynt pewayse?’ In tiise aat, tuust tuu tayn xtutënt iipe fer eene leerer wëre. Tan, wën eyer fërtich is, khan tee aan fange mit te kemaynt preetiche. Tuu khanst tayn xtutënt frooe ep tee yemant khënt woo fiilaycht teet kërn ti Piipel xtutiire. Un wën tee yemant khënt, tuu klaych mit te persoon xpreche un een Piipel xtuutyum aan piite. Tsaych tëm te wiiteo Was pasiirt in een Piipel xtuutyum? *

10. Tëm noo 1 Tessalonicenses 2:7, 8, wii khan eene leerer Phaul sayn payxpiil noo mache?

¹⁰ Ti leerer mise tsayche tas se sich wërklich mit sayn xtutënte khimere. Tuu tëne aan siin wii tayne futuer priiter un xwestere in te kemaynt. (Lees 1 Tessalonicenses 2:7, 8.) * Es is net tëne laycht sayn froynte in te welt im xtich lose un al ti ënerunge woos neetich sin mache fer Yeehoowa tiine. Mer prauche tëne helfe woere froynte in te kemaynt fine. Say een froynt fer tayn xtutënt. Tuu tsayt mit tëm fertraype, net ploos torich tas Piipel xtuutyum, awer aach in anere xtune. Wëns tuu tëm telefoniirst, een pexeet xikst, orer aan tëm sayn haus maaye keest, tsaychst tuu tas tuu tuust tich wërklich mit tëm khimere.

11. Was wole mer tas unser xtutënt in te kemaynt fint, un weeche was?

¹¹ In Afrika, kepts een xprooch woo saat: “Fer een khint tsiie, ale in te pikaat prayche helfe.” Meyer khene saan: “Fer een tisipel mache, ale in te kemaynt prayche helfe.” Tes weeche, kuute leerer tuun sayn xtutënte helfe anere in te kemaynt khëne lërne, woo khene tëne helfe tichter tsu Yeehoowa khome. Soo, tuun ti xtutënte ti keleechenheet kriin fer mit Kot sayn folek plaype, woo khan tëne kaystlich un emotsyonaal unerxtitsung kepe. Mer wole tas yeete xtutënt xpiirt tas eyer eene plats in te kemaynt hot un tas eyer een teel fon unser kaystlich familye is. Meyer wole tas eyer sich ketsoo xpiirt fer unser liiplich pruuterxaft. Tan, es tuut tëm laychter sin noo lose ëng froyntxaft hon mit layt woo tuun tëm net helfe Yeehoowa liipe. (Pro. 13:20) Wën ti layt — woo tëm sayn froynte waare — tëm im xtich lose, tee tuut xon sicher sin tas eyer khan woere froynte in Yeehoowa sayn orkanisatsyoon fine. (Mar. 10:29, 30; 1 Ped. 4:4)

12. Warom sole mer mit unser xtutënte xpreche iwer ti tetikatsyoon un taaf?

¹² Tuu tich net xeeme fer iwer ti tetikatsyoon un taaf xpreche. Am ën, wën mer mit yemant xtutiire, unser tsiil is tëm helfe Yeehoowa tiine un sich taafe lose. Noo tas te xtutënt hot xon fer phaar moonate xtutiirt, un hauptseechlich noo tas eyer hot aan kefang in te fersamlunge khome, tee praucht ferxteen tas mer wole tëm helfe eene fon Yeehoowa sayn Tsayer wëre.

13. Was fer xrite praucht een xtutënt kepe fer pis aan te taaf hin khome?

¹³ Xrit noo xrit, een eerlich Piipel xtutënt khan pis aan taaf hin khome! Eyerst, tuut te xtutënt Yeehoowa khëne un tuut lërne wii tëm liipe un aan tëm klaape. (João 3:16; 17:3) Tan, tuut te xtutënt een froyntxaft mit Yeehoowa un mit te priiter un xwestere in te kemaynt paue. (Heb. 10:24, 25; Tia. 4:8) Mit te tsayt, tuut te xtutënt sich peroye fon te xlechte tinge woo eyer kemacht hat, un lost noo tëne mache. (Atos 3:19) Un aach, sayn klaape tuut tëm uf rechne fer iwer ti woerheet mit te anere fertseele. (2 Cor. 4:13) Tan, tuut eyer sich tetikiire — sayn leepe tsu Yeehoowa ferxpreche — un noo heyer tuut eyer sich taafe lose. (1 Ped. 3:21; 4:2) Un was fer een frooes taach is tas fer al! Wii te xtutënt yeete eene fon tiise xrite kept, tuu tëm eerlich loope un tëm uf muute wayter aan tiise weech keen.

14. Wii khan te leerer noo kuke ep te xtutënt is am forem keen?

¹⁴ Meyer prauche ketultich sin wër mer eene xtutënt helfe pis aan te tetikatsyoon un taaf forem keen. Awer meyer mise aach raus fine ep eyer wërklich wil Yeehoowa tiine. Tuut tayn xtutënt tsayche tas eyer suucht Yeesus sayn kepoote aan heere? Orer wil eyer ploos interesante tinge fon te Piipel lërne?

15. Was tuut fer te leerer tsayche tas te xtutënt is wërklich am forem keen?

¹⁵ Tuu reekelmeesich noo kuke wii wayt is te xtutënt xon forem kang. Tsum payxpiil, tuut eyer sayn xpiirunge noo Yeehoowa tsayche? Tuut eyer tsu Yeehoowa peete? (Sal. 116:1, 2) Tuut eyer kërn ti Piipel leese? (Sal. 119:97) Tuut eyer reeklich aan te fersamlunge khome? (Sal. 22:22) Hot eyer  ënerunge in sayn leepe kemacht? (Sal. 119:112) Hot eyer xon aan kefang mit sayn familye un froynte fertseele iwer was tee am lërne is? (Sal. 9:1) Un tas haupste: wil eyer wërklich eene fon Yeehoowa sayn Tsayer wëre? (Sal. 40:8) Wën te xtutënt keet aan khee eene fon tiise phunkte forem, tuu mit kexik raus fine weeche was, un tan tuu mit tëm liiplich, awer eerlich, xpreche. *

16. Was fer tinge khene tsayche tas mer sole noo lose mit yemant xtutiire?

¹⁶ Tsayt noo tsayt, froo tich eps tuu solst wayter mit yemant xtutiire. Tuu tich frooe: ‘Tuut te xtutënt sich fer tas xtuutyum in richte? Wil eyer in te fersamlunge keen? Hot eyer sayn xlechte kewoonheete neewer kelos? Hot eyer ti falx relichyoon hiner kelos?’ Wën ti antwort ‘nee’ is, wayter mit tëm xtutiire is wii fersuuche yemant xwime lërne, wën ti persoon wil sich net nas mache! Wën te xtutënt net weyert xetst fer was tee am lërne is, orer is net wilich fer ënerunge mache, warom wayter mit tëm xtutiire?

17. Tëm noo 1 Timóteo 4:16, was mise al ti Piipel leerer mache?

¹⁷ Meyer tuun ërnst aan nëme unser flicht fer tisipele mache, un mer wole unser xtutënte helfe pis aan taaf hin khome. Tes weeche, lose mer ti Piipel in lërne, un tuun mer tsayche tas mer liipe un tas mer klaape aan was mer in lërne. Meyer tuun aach te xtutënt uf muute froynte in te kemaynt mache. Un mer tuun eftas xpreche iwer ti tetikatsyoon un taaf, un tsayt noo tsayt noo kuke wii wayt is te xtutënt xon forem kang. (Kuk te khaste “ Was prauche ti leerer mache fer ti xtutënte helfe pis aan taaf hin khome” im sayt 13.) Meyer sin froo tas mer khene mit xafe in tiise aarwayt woo leepe rete tuut! Meyer wole unser pestes mache fer unser xtutënte helfe pis aan taaf hin khome.