1. Be imhan rẹ lẹn yẹ ghe iwẹnna nan rẹ miẹn ẹbho fan, ọle iwẹnna itẹmhọn Osẹnobulua khin?

IWẸNNA nan rẹ miẹn ẹbho fan, ọle iwẹnna itẹmhọn Osẹnobulua khin! Be imhan rẹ lẹn ọnan yẹ? Bhi Matthew 28:​19, 20, Jesu da yọle: “Bha ha khian dọ re ẹbho kiẹn edibo. . . . Gbe ele ruẹ bhi amẹn.” Bezẹle nin imianmẹn da yi emhin kpataki? Ranmhude ọ dẹ sabọ rẹkpa mhan miẹn umiẹnfan. Ọkhẹke nin ọria nọn guanọ nin ọle mianmẹn rẹọbhọ ghe, ranmhude iJesu yu ọbhi olukhọ nọnsẹmhan yẹ riọ kpanọ bhi uu, ọle zẹle nin mhan ha da sabọ miẹn umiẹnfan. Ọnan zẹle nin Peter nin odibo da gbẹn ji Kristiẹn yọle: “Ọne imianmẹn nan sẹyẹ wo miẹn bha fan nian . . . rẹ na bhi obọ uriọkpanọ nin Jesu riọkpanọ bhi uu.” (1 Pet. 3:21) Bhiriọ, ọria ha mianmẹn, ọle hi ghe ọne ọria muegbe nin ọle rẹ miẹn umiẹnfan.

2. Be ọkhẹke nin mhan rẹ ha man emhin yẹ beji 2 Timothy 4:​1, 2 rẹman?

² Ọkhẹke nin mhan lẹn ebi a rẹ man ẹbho emhin nọnsẹn yẹ nin mhan da sabọ rẹkpa ele kiẹn edibo nesi Jesu. (Tie 2 Timothy 4:​1, 2.) Bezẹle nin mhan da ta iriọ? Ranmhude Jesu taman mhan ghe, nin mhan dọ re ẹbho kiẹn edibo yẹ ha man ele emhin. Paul nin odibo da taman mhan ghe, nin mhan hẹi zobọ bhi ọne iwẹnna nan, ranmhude, ẹmhọn Osẹnobulua nin mhan ta dẹ sabọ miẹn mhan fan bi ẹbho ne ka mhan ehọ. Ọnan zẹle nin Paul da yẹ yọle ghe nin mhan “gbẹlokotọ bhi . . . uwedẹ nin [mhan] rẹ man emhin.” (1 Tim. 4:16) Beji a miẹn ghe, mhan ha man ẹbho emhin nọnsẹn mhan ha da sabọ rẹkpa ele kiẹn edibo nesi Jesu, ọkhẹke nin mhan dọnmhegbe manman guẹ ebi a rẹ man emhin yẹ.

3. Be imhan ha zilo nyan bhi ọne uhọnmhọn-ọta nan?

³ Mhan wo man ẹbho ne bunbun iBaibo bhi ọne otọ agbọn nan rebhe. Sokpan, beji mhan ka luẹ bhi uhọnmhọn-ọta nọn gbera,  ọkhẹke nin mhan lẹn ebi mhan ha rẹ rẹkpa ele yẹ, nin ene bunbun da sabọ dọ kiẹn edibo nesi Jesu. Bhi ọne uhọnmhọn-ọta nan, mhan dẹ zilo nyan emhin isẹn nin ọria nọn man ọria iBaibo ha lu, nin ọle da sabọ rẹkpa ọne ọria lu re alo yẹ mianmẹn.

4. Bezẹle nọn bha da khẹke nin mhan ha talọ gbe sade mhan man ọria iBaibo? (Fẹ ebi a gbẹn ọbhi otọ ọle ghe.)

⁴ Ranmhude mhan manman hoẹmhọn iman-emhin ne ribhi Baibo, ọ ki wo ha ghọn mhan rẹ manman ha talọ sade mhan man ẹbho iBaibo. Ọrẹyiriọ, ahamiẹn mhan man ẹbho iBaibo, la mhan sun iluẹmhin ọsi ebe Ọkhẹughe la iluẹmhin Baibo ọsi agbotu, ọ bha khẹke nin mhan ha talọ gbe. Ahamiẹn mhan guanọ nin mhan ha noo iBaibo nọnsẹn sade mhan man ọria emhin, mhan ida ha talọ gbe bhi ọne iluẹmhin. Mhan ida ha dọnmhegbe rẹ ta emhin rebhe nin mhan lẹnlẹn rẹji eji mhan tiele bhi Baibo. * (John 16:12) Uwẹ ha re ebi uwẹ lẹnlẹn ẹlẹnan nian rẹ khọkhọ ebi uwẹ lẹn ẹghe nin uwẹ rẹ wo la mianmẹn fo, uwẹ ki dọ kere ghe, uwẹ dọ lẹn emhin ne bunbun nian. Asabọmiẹn iman-emhin ne lẹkhẹ ọkpa uwẹ lẹn otọ ọle ọkuẹsẹ uwẹ mianmẹn. (Heb. 6:1) Yere ghe, ọ iyi osukpa uwẹ rẹ lẹn emhin rebhe nin uwẹ lẹnlẹn ẹlẹnan, bhiriọ, hẹi wo re osukpa man ọne ọria emhin rebhe.

5. (a) Beji 1 Thessalonians 2:13 rẹman, be imhan guanọ nin ọria nin mhan man ọle iBaibo lẹn otọ ọle? (b) Be imhan ha rẹ sabọ rẹkpa ọria nin mhan man ọle iBaibo yẹ, nin ọle da sabọ ha taman ẹbho emhin nin ọle luẹ?

⁵ Mhan guanọ nin ọria nin mhan man ọle iBaibo daghe ghe, Baibo emhin nin mhan man ọle le na vae. (Tie 1 Thessalonians 2:13.) Be imhan ha rẹ sabọ lu ọnan yẹ? Taman ọlẹn nin ọle ha taman ẹbho emhin nin ọle luẹ. Hẹi wo ha gbotọ iBaibo fanọn an man ọlẹn ẹghe rebhe, sokpan, ha re otọ nanlẹn rẹ tobọle ha gbotọ iBaibo fanọn an ẹgheso. Rẹkpa ọle daghe ebi iman-emhin ne ribhi Baibo rẹ rẹso ọle yẹ. Nọọn ọlẹn inọnta nọn ha rẹkpa ọle talọ nyan ẹji bha tiele bhi Baibo. (Luke 10:​25-28) Bhi ọsi ijiẹmhin, uwẹ sabọ rẹ nọọn ọlẹn: “Ikpẹ ọsi Jehova nela uwẹ daghe bhi ọne iBaibo nan?” “Be emhin nin uwẹ luẹle bhi ọne iBaibo nan ha rẹ rẹkpa uwẹ yẹ?” “Ọne emhin nin uwẹ luẹle nan be ti uwẹ bhọ?” (Prov. 20:5) Ebe lu uhọnmhọn emhin nẹ hi, nin ọria nin mhan man ọle iBaibo hoẹmhọn emhin nin ọle luẹ, yẹ ha re obọ rẹkhan ọlẹn, ọ iyi nin ọle rẹ gheghe luẹ emhin ne bunbun.

6. Bezẹle nọn da yi emhin nọn mhẹn, sade mhan re ọria nọn guẹ ebi a rẹ man emhin rẹkhan egbe dọ man ọria iBaibo?

⁶ Uwẹ be ne ibhio mhan ne guẹ ebi a rẹ man emhin rẹkhan egbe, sade uwẹ khian dọ man ọria iBaibo? Ahamiẹn uwẹ lu iriọ, nọọn ele si uwẹ man ọne ọria emhin beji ọkhẹke, bi si uwẹ  noo iBaibo nọnsẹn. Ọkhẹke nin uwẹ ha mhọn idegbere sade uwẹ guanọ nin uwẹ ha lu re alo bhi uwedẹ nan rẹ man ẹbho emhin. (Yẹ fẹ Acts 18:​24-26 ghe.) Sẹyẹ, nọọn ọne obhio mhan si ọle riale emhin nin uwẹ man ọne ọria le gene mun ọne ọria ẹlo kore. Ahamiẹn uwẹ ida miẹn otọ rẹ dọ man ọne ọria emhin bhi uzana ọkpa la ebe gbera iriọ, taman ọne obhio mhan nin ọle dọ rẹkpa uwẹ man ọne ọria emhin. Bhiriọ, bha ida gbẹdẹ iluẹmhin. Ọnan ki rẹkpa ọne ọria nọn luẹ emhin rẹ daghe ghe emhin kpataki iluẹmhin nin bha lu khin. Hẹi ha mhọn ọlẹn bhi ọkhọle ghe, uwẹ ọkpa hi ọnọn ha sabọ ha man ọria nin uwẹ man ọle iBaibo emhin. Bhi ọsi ẹmhọanta, uwẹ guanọ nan ha luẹ eria nin uwẹ man ele iBaibo emhin nọnsẹn, beji ele ha da sabọ ha lu re alo bhi ẹmhọanta nin ele luẹ.

7. Be ha sabọ rẹkpa ọria nin uwẹ man ọle iBaibo rẹ dọ hoẹmhọn emhin nin ọle luẹ?

⁷ Ọkhẹke nin ọria nin mhan man ọle Baibo daghe ghe, iman-emhin ne ribhi Baibo ti mhan bhọ, ghe mhan rẹọbhi ene iman-emhin. (1 Thess. 1:5) Bhiriọ, ene emhin nin ọle luẹ ki manman ha ti ọle bhọ. Uwẹ sabọ rẹ taman ọlẹn ebi adia ne ribhi Baibo sẹ rẹ rẹkpa uwẹ yẹ. Ọnan ki rẹkpa ọle daghe ghe adia ne ribhi Baibo dẹ yẹ sabọ rẹkpa ọle.

8. Emhin ọbhebhe nela ọkheke nin uwẹ lu nin uwẹ da sabọ rẹkpa ọria nin uwẹ man ọle iBaibo? Elele nela ha nabhọre sade uwẹ lu iriọ?

⁸ Beji uwẹ ha rẹ ha man ọria emhin, ha taman ọlẹn ijiẹmhin ọsi eria ne yẹ miẹn ọnọghọ bii ọne ọle ye bi ebi ele rẹ sabọ khọn ọlẹn miotọ yẹ. Ahamiẹn uwẹ lẹn obhio mhan nin ijiẹmhin nọnsọle ha sabọ rẹkpa ọne ọria, uwẹ sabọ rẹ re ọle rẹkhan egbe dọ man ọle emhin. Sẹyẹ, uwẹ sabọ rẹ guanọ ijiẹmhin ọsi ibhio mhan bhi jw.org rẹ man ọne ọria. Uhọnmhọn-ọta nọn yọle, “The Bible Changes Lives,” * ọle uwẹ ha da miẹn ene ijiẹmhin. Okha bi vidio kẹkẹ ne ribhi enin dẹ sabọ rẹkpa ọria nin uwẹ man ọle iBaibo rẹ daghe ghe, ọ dẹ ha yi emhin ẹwanlẹn sade ọle re obọ rẹkhan adia ne ribhi Baibo.

9. Be uwẹ ha rẹ rẹkpa ọria nin uwẹ man ọle iBaibo yẹ nin ọle da sabọ ha taman imọẹ ọle bi ene ribhi azagba-uwa nọnsọle emhin nin ọle luẹ?

⁹ Ahamiẹn ọne ọria nin uwẹ man ọle iBaibo bọ ọdọ la re okhuo, ọne ọdọ ọle la okhuo ọle be luẹ iBaibo? Ahamiẹn ọle isẹ luẹ iBaibo, ha tie ọle nin ọle dọ deba bha sade ibha luẹ emhin. Taman ọria nin uwẹ man ọle iBaibo ghe, nin ọle ha taman imọẹ ọle bi ene ribhi azagba-uwa nọnsọle emhin nin ọle luẹ. (John 1:​40-45) Be uwẹ ha rẹ ta ọnan man ọlẹn yẹ? Uwẹ sabọ rẹ nọọn ọlẹn yọle: “Be uwẹ ha rẹ man ene ribhi  azagba-uwa nọnsẹ ọne emhin nan nin uwẹ luẹle yẹ?” la “Ijela uwẹ ha tie bhi Baibo rẹ gbotọ ọne emhin nan nin uwẹ luẹle fanọn an man ọmọẹ ẹ?” Uwẹ ha lu inian, ọne ọria ki yẹ kiẹn ọnọn sabọ man ọria emhin. Ahakizẹbue, ọle ki sẹ ọria nọn ha sabọ ha deba agbotu tẹmhọn Osẹnobulua. Uwẹ sabọ yẹ rẹ nọọn ọlẹn si ọle lẹn ọria ọbhebhe nọn guanọ nin ọle luẹ iBaibo. Ahamiẹn ọle re ọria man uwẹ, hẹi ria ẹghe a rẹ bu ọne ọria dọ ha man ọle iBaibo. Re ividio nọn yọle, Be Sunu bhi Iluẹmhin IBaibo? * man ọne ọria.

10. Be imhan ha rẹ sabọ re egbe khọkhọ ijiẹmhin ọsi Paul nan gbẹn ọbhi 1 Thessalonians 2:​7, 8 yẹ?

¹⁰ Ọkhẹke nin mhan ji ẹmhọn eria nin mhan man ele iBaibo santuẹ mhan an. Ha ghe ele bii eria ne ha sabọ kiẹn ibhio ẹ bhi ẹghe odalo. (Tie 1 Thessalonians 2:​7, 8.) Ọ iyi emhin nọn lẹkhẹ nin ele rẹ fi ikeke gbe imọẹ ele ne iga iJehova, bi nin ele rẹ fi iẹnlẹn nọnsele denọ dọ ha lu iho nọnsi Jehova. Bhiriọ, ọkhẹke nin mhan rẹkpa ele zẹ imọẹ ọsaje bhi ẹkẹ agbotu. Ọ iyi ẹghe nin bha rẹ luẹ iBaibo kugbe ọkpa ọkhẹke nin uwẹ rẹ ha sẹbhi eji ọle ye. Guanọ ẹghe ọbhebhe rẹ ha rẹ ẹnẹ ji ọle nin bha da sabọ ko sikẹ egbe bii imọẹ. Ahamiẹn uwẹ re ifoni rẹ tie ọle, la gbẹn ebe ji ọle, la uwẹ re ẹnẹ ji ọle, ọle ki lẹn sẹbhọ ghe ẹmhọn ọlẹn gene rẹtẹ uwẹ.

11. Bezẹle nọn da khẹke nin mhan rẹkpa eria nin mhan man ele iBaibo ha mhọn imọẹ bhi ẹkẹ agbotu?

¹¹ Ẹbho tale ghe, “Ọ iyi otuọnkpa bẹẹ ọmọn.” Bhiriọ, mhan dẹ sabọ yọle ghe, “Ọrebhe bhi ẹkẹ agbotu kuobọgbe rẹkpa ọria kiẹn odibo.” Ranmhude ọnan, ahamiẹn mhan rẹkpa ọria nin mhan man ọle iBaibo lẹn ibhio mhan ne ribhi ẹkẹ agbotu, ene ibhio mhan ki sabọ rẹkpa ọle sikẹ iJehova. Ọne ọria ki sabọ ha deba ele muobọ, bhiriọ ele ki sabọ ha rẹkpa ọle khọn ọnọghọ nin ọle miẹn. Mhan guanọ nin ene imhan man ele iBaibo lẹn sẹbhọ ghe, ele mhọn ọne ele ye bhi ẹkẹ agbotu, ghe ọkpa bhi ene ga iJehova ele ki khin. Mhan guanọ nin ele manman ha sikẹ ene ribhi ẹkẹ agbotu. Ọnan ki re ọle lẹkhẹ nin ele rẹ rẹban ikolu ọsi ẹbho ne ida sabọ rẹkpa ele hoẹmhọn iJehova. (Prov. 13:20) Ahamiẹn ẹbho nin ọle ka ne muobọ khẹ fi ikeke gbe ọle, ọle ida ha kpokpo egbe ranmhude ọle ki mhọn imọẹ ọsaje bhi ẹkẹ agbotu nọnsi Jehova.​—Mark 10:​29, 30; 1 Pet. 4:4.

12. Bezẹle nọn da khẹke nin mhan ha tẹmhọn iregbeguẹ nin Jehova bi imianmẹn man ọria nin mhan man ọle iBaibo?

¹² Ha taman ọria nin uwẹ man ọle iBaibo ẹmhọn iregbeguẹ nin Jehova bi imianmẹn. Rẹkpa ọle lẹn ghe emhin kpataki ene emhin  nan veva khin bhi iẹnlẹn nọnsẹmhan. Bhi ọsi ẹmhọanta, ranmhude mhan guanọ nin mhan rẹkpa ẹbho mianmẹn yẹ kiẹn ẹdibo nesi Jesu, ọle zẹle nin mhan da man ele iBaibo. Ahamiẹn uki eso gbera nin mhan munhẹn ha man ọria iBaibo, manman nọn sade ọle munhẹn ha yo ikolo oga, ọkhẹke nin mhan ji ọle lẹn ghe, ebezẹle nin mhan da man ọle iBaibo hi, mhan guanọ nin ọle kiẹn ọkpa bhi Esali Jehova.

13. Oẹ kẹkẹ nela ọkhẹke nin ọria zẹ nin ọle da sẹ ọria nọn ha sabọ mianmẹn?

¹³ Emhin kẹkẹ ribhọ nin ọria nin mhan man ọle iBaibo ha lu nin ọle da sabọ sẹ ọria nọn ha mianmẹn. Oẹ nin ọle ha ka zẹ hi, ọle ki lẹn Jehova yẹ hoẹmhọn ọlẹn. Sẹyẹ, ọle ki ha mhọn urẹọbhọ da Ọle. (John 3:16; 17:3) Ọle ha ki lu ọnan fo, ọle ki dọnmhegbe kiẹn ọmọẹ iJehova yẹ deba ene ribhi agbotu nọnsọle ha muobọ. (Heb. 10:​24, 25; Jas. 4:8) Bhiriọ, ọle ki rẹban emhin ne imhẹn, yẹ fidenọ bhi olukhọ nọnsọle. (Acts 3:19) Sẹyẹ, ọle ki yẹ ha taman ẹbho emhin nin ọle luẹ. (2 Cor. 4:13) Ọle ha ki lu enan rebhe fo, ọle ki re egbe guẹ nin Jehova yẹ dọ mianmẹn. (1 Pet. 3:21; 4:2) Ukpẹdẹ eghọnghọn, ọle ukpẹdẹ nin ọle ha miamẹn khin rẹji ọrebhe. Beji ọne ọria ha rẹ ha zẹ ene oẹ nan kẹkẹ, ha khuẹnmhẹn ọlẹn, uwẹ ha yẹ taman ọlẹn ghe nin ọle hẹi zobọ bhọ rẹ ha lu re alo.

14. Be imhan ha rẹ sabọ fẹghe si ọria nin mhan man ọle iBaibo lu re alo yẹ?

¹⁴ Ọkhẹke nin mhan ha mhọn iziẹngbe da ọria beji mhan ha rẹ ha rẹkpa ọle, nin ọle da sabọ re egbe guẹ nin Jehova yẹ mianmẹn. Ọrẹyiriọ, man ha zẹ luẹ ọle emhin, ọkhẹke nin mhan gbẹlokotọ fẹghe si ọle bhọ muegbe nin ọle rẹ vae dọ ga iJehova. Ọkhẹke nin mhan nọọn egbe man ene inọnta nan: “Emhin soso be ribhọ ne rẹman ghe ọle dọnmhegbe rẹ re obọ rẹkhan ibhude nesi Jesu? La, ọle be guanọ nin ọle deba mhan luẹ iBaibo nin ọle da gheghe lẹn ọlẹn?”

15. Inọnta eso nela ọkhẹke nin mhan ria eria nyan nin mhan da sabọ lẹn si ẹbho nin mhan man ele iBaibo lu re alo nin ele da miamẹn?

¹⁵ Ẹghe rẹ sẹ ẹghe, ha fẹghe si ọria nin uwẹ man ọle iBaibo lu re alo. Bhi ọsi ijiẹmhin, ọle be rẹman ghe ẹmhọn iJehova ti ọle bhọ? Ọle be nan erọnmhọn ji ọlẹ? (Ps. 116:​1, 2) Ọ be ti ọle bhọ rẹ ha tie iBaibo? (Ps. 119:97) Ọle be vae bhi ikolo oga ẹghe rebhe? (Ps. 22:22) Ọle be sẹ fi emhin soso denọ bhi iẹnlẹn nọnsọle? (Ps. 119:112) Ọle be sẹ ha taman ene ribhi azagba-uwa nọnsọle bi imọẹ ọle emhin nin ọle luẹ? (Ps. 9:1) Ọnọn lu uhọnmhọn emhin nẹ hi, ọle be  muegbe nin ọle rẹ kiẹn ọkpa bhi Esali Jehova? (Ps. 40:8) Ahamiẹn ọle bha sẹ lu ene emhin nan soso, dọnmhegbe fẹghe ebezẹle, uwẹ ha yẹ re ẹwanlẹn deba ọle zilo ọle. *

16. Be imhan ha fẹghe nin mhan rẹ lẹn si man dẹ zobọ bhọ rẹ ha man ọria emhin?

¹⁶ Sade uwẹ guanọ nin uwẹ lẹn si ọ sẹyẹ khẹke nin uwẹ deba ọria ha luẹ iBaibo, ọkhẹke nin uwẹ fẹghe si ọ yẹẹ ọne ọria rẹ ha muegbe iluẹmhin ọbhi otọ, si ọ yẹẹ ọle rẹ ha vae bhi ikolo oga, si ọle re obọ sibhi emhin ọbe re, bi si ọle sibhi oga ohoghe re. Ahamiẹn uwẹ sẹyẹ man ọria Baibo arẹmiẹn ọle bha muegbe rẹ lu ene emhin nan, uwẹ ki diabe ọria nọn ho nin ọle man ọria ebi a rẹ gua ẹdẹ yẹ, sokpan ọne ọria iguanọ nin ọle re egbe so amẹn. Ahamiẹn ọne ọria bha muegbe rẹ fidenọ bhi iẹnlẹn, la emhin nin ọle luẹ iti ọle bhọ, ọ bha khẹke nin mhan sẹyẹ ha man ọle emhin.

17. Beji 1 Timothy 4:16 tale, be imhan ha lu nin mhan da sabọ guẹ ebi a rẹ man ọria iBaibo yẹ?

¹⁷ Ẹlo nọn ghanlẹn mhan rẹ ghe ọne iwẹnna nin Jesu mun nin mhan rẹ dọ re ẹbho kiẹn edibo. Bhiriọ, mhan guanọ nin mhan ha rẹkpa ẹbho nin mhan man ele iBaibo, nin ele da sabọ sẹ eria ne ha mianmẹn. Ọnan zẹle nin mhan da rẹ ọhubhudu noo iBaibo rẹ man ele emhin, yẹ ji ele lẹn ghe mhan rẹọbhi ebi mhan man ele le. Mhan dẹ rẹkpa ele ha mhọn imọẹ esili bhi ẹkẹ agbotu. Mhan dẹ yẹ wo ha taman ele ghe, emhin kpataki hi iregbeguẹ nin Jehova bi imianmẹn khin. Ẹghe rẹ sẹ ẹghe, mhan dẹ ha fẹghe si ele lu re alo. (Fẹ ọne ẹkpẹti ghe nọn yọle, “ Ebe Khẹke Nin Ọria Nọn Man Ọria IBaibo Lu Nin Ọle Da Sabọ Rẹkpa Ọne Ọria Mianmẹn.” Apapale 13 bhi ọne ebe nan, ọle ọ ye) Ọ manman ti mhan bhọ ghe mhan dẹ sabọ deba lu ọne iwẹnna nan nọn ha sabọ miẹn eria fan. Bha ji mhan rebhe dọnmhegbe rẹ ha rẹkpa ẹbho nin mhan man ele iBaibo rẹ ha lu re alo, nin ele da sabọ miamẹn.