1. Sape shatai ai bungli gaw asak hkye ai bungli re ai hpe anhte gara hku chye lu ai kun?

SAPE shatai ai bungli gaw asak hkye ai bungli re. Gara hku chye lu ai kun? ‘Pru sa nna . . . sape shatai let . . . baptisma jaw mu’ ngu Mahte 28:19, 20 hta Yesu hkang da ai. Hkalup hkam na matu kade daram ahkyak ai kun? Hkye la hkrum mayu yang dai gaw ra nan ra ai lam re. Hkalup hkam mayu ai wa gaw Yesu si hkam nna, bai hkrung rawt ai lam a majaw sha, htani htana asak lu mai ai hpe kam ra ai. Dai majaw, kasa Petru gaw Hkristan ni hpe ndai hku tsun da ai: “Si ai kaw na Yesu Hkristu bai hkrung rawt wa ai a marang e nanhte gaw hka lup hkam la ai hte hkye hkrang la ai hkrum manit dai.” (1 Pe 3:21, JCLB) Hkalup hkam sai sape nnan gaw, htani htana asak myit mada lam lu mai ai.

2. 2 Timohti 4:1, 2 hta tsun da ai hte maren anhte gara zawn re ai sara byin ging ai kun?

² Sape shatai na matu “sharin shaga ai” ladat rawt jat ra ai. (2 Timohti 4:1, 2 hpe hti u.) Hpa majaw kun? ‘Pru sa nna . . . sape shatai let . . . baptisma jaw mu’ ngu Yesu anhte hpe hkang da ai majaw re. “Na a hkum hpe mung, nang hpe madat mara ai ni hpe mung, nang hkye hkrang la lu na” matu, dai bungli hta “agrin nga u” ngu kasa Pawlu tsun ai. Akyu nga ai majaw, Pawlu ndai hku tsun da ai: “Na a sharin shaga ai lam hpe mung, a sadi nga u.” (1 Tm 4:16) Sharin ya ai lam hte sape shatai ai bungli gaw matut mahkai nga ai majaw, kaja htum sharin ya mayu ga ai.

3. Ndai sumhpa hta Chyum Laika sharin ya ai hte seng nna anhte hpa hpe chye lu na kun?

³ Chyum Laika tengman lam ni hpe wan hku law ai masha ni hpe anhte ayan sharin ya nga ai. Raitim, shawng na sumhpa  hta tsun da ai hte maren, Yesu Hkristu a hkalup hkam da sai sape ni byin wa na matu, grau nna karum ya lu ai lam ni hpe anhte chye mayu ga ai. Ndai sumhpa hta, hkalup hkam ai du hkra rawt jat wa na matu, sharin ya ai ni naw galaw ra ai lam 5 hpe hkaja lu na re.

4. Chyum Laika sharin ya ai shaloi sharin ya ai wa gaw hpa majaw ga law law n shaga ging ai kun? (Lawu matsing hpe mung yu u.)

⁴ Chyum Laika kaw nna sharin ya ai hpe anhte ra sharawng ai. Dai majaw, anhte ra sharawng ai lam hpe grai tsun dan mayu ai. Sin Langchyi Hkaja Ai Lamang, Hpung Chyum Laika Hkaja Ai Lamang, Chyum Laika Hkaja Ai Lamang hpe woi awn ai wa gaw ga law law n shaga ging ai. Sharin ya ai shaloi, Chyum Laika hpe tang du hkra akyu jashawn mayu ai. Dai majaw, ga law law n shaga na matu sadi ra ai. Chyum daw (sh) dai Chyum daw hte seng ai lam yawng hpe n sanglang dan ging ai. * (Yhn 16:12) Nang hkalup hkam ai aten hte ya aten na Chyum Laika machye machyang hpe shingdaw yu u. Dai aten hta nang gaw, Chyum Laika madung lam ni hpe sha chye na da ai rai na re. (Heb 6:1) Ya du hkra nang chye da ai lam ni hte seng nna hkaja na matu shaning law law aten la ra ai. Dai majaw, Chyum ga sharin nnan hpe kalang ta yawng sharin na matu hkum shakut.

5. (a) 1 Htesaloni 2:13 hku nga yang Chyum ga sharin gaw shi hkaja ai lam kaw nna chye na hkra anhte hpa galaw lu ai kun? (b) Chyum ga sharin hpe shi hkaja ai lam hte seng nna tsun dan na matu gara hku n-gun jaw mai ai kun?

⁵ Anhte gaw shanhte hpe Chyum Laika sharin ya ai lam ni hpe chye na shangun mayu ai. (1 Htesaloni 2:13 hpe hti u.) Gara hku galaw lu na kun? Sharin la wa ai lam ni hte seng nna tsun dan na matu n-gun jaw u. Chyum daw ni hpe tinang gaw ayan sanglang dan na malai, shi hpe sanglang dan shangun u. Chyum Laika hpe shi nan tatut hkan sa lu hkra karum ya u. Shi hti ai Chyum daw ni hte seng nna gara hku myit ai, hkamsha ai ngu ai lam hpe tsun dan na matu, ga san ni san u. (Luk 10:25-28) Ga shadawn, ndai hku san u: “Ndai Chyum daw gaw Yehowa a atsam ningja langai hpe mu wa hkra nang hpe gara hku karum ya ai kun?” “Ndai Chyum Laika tengman lam kaw nna gara hku akyu lu la mai ai kun?” “Nang sharin la wa ai lam hte seng nna gara hku hkamsha ai kun?” (Gsh 20:5) Ahkyak htum gaw shi kade daram chye ai lam n re ai sha, shi chye wa ai hpe kade daram tsawra ai, kade daram tatut hkan sa ai gaw ahkyak htum re.

6. Mahkrum madup nga ai hkaw tsun masha hpe Chyum ga sharin hpang de shaga sa ai gaw hpa majaw kaja ai kun?

⁶ Mahkrum madup nga ai hkaw tsun masha ni hpe Chyum ga sharin hpang de shaga sa ga  ai kun? Rai yang, nang sharin ya ai lam hte Chyum Laika hpe gara hku akyu jashawn nga ai lam hte seng nna shi a ningmu hpe san mai ai. Sharin ya ai atsam rawt jat mayu yang shagrit shanem ra ai. (Kas 18:24-26 hte shingdaw yu u.) Chyum ga sharin gaw sharin la wa ai lam ni hpe chye na ai kun? ngu ai hpe mung hkaw tsun masha hpe san yu u. Nang gaw bat langai, lahkawng daram bu hkawm na nga yang, malai hku nna sharin da ya mai na kun ngu nna dai hkaw tsun masha hpe san yu u. Rai yang, matut hkaja lu nna dai hku hkaja ai gaw kade daram ahkyak ai hpe Chyum ga sharin chye wa na re. “Na a” Chyum ga sharin hpe kadai mung n lu sharin ya ai ngu nna galoi mung n mai hkamsha ai. Chyum ga sharin a matu kaja htum hpe sha nang ra sharawng na re. Dai majaw tengman lam hpe matut hkaja lu hkra galaw u.

7. Chyum ga sharin gaw sharin la wa ai lam hte seng nna myit rawt wa na matu hpa gaw karum ya lu ai kun?

⁷ Chyum Laika hta lawm ai lam ni hpe nang tsawra nna kam ai lam shi chye hkra galaw ra ai. (1 Ht 1:5) Rai yang, shi sharin la wa ai lam ni hte seng nna shi mung myit rawt wa na re. Htap htuk ai nga yang, Chyum Laika npawt tara ni hte maren asak hkrung ai majaw, nang hpe karum ya wa ai lam shi hpe tsun dan u. Chyum Laika hta shi akyu lu la mai ai, tatut re ai lam matsun ni lawm ai lam shi chye wa na re.

8. Na a Chyum ga sharin hpe karum ya lu na matu hpa naw galaw lu ai kun? Dai hku galaw na matu hpa majaw ahkyak ai kun?

⁸ Chyum Laika hkaja nga ai laman, shi a manghkang hte maren hkrum ga nna, dai hpe tawt lai lu wa ai hpunau nauna ni a lam hpe tsun dan u. Shi akyu lu la mai ai nawku hpung kaw nna marai langai ngai hpe shaga sa mai ai. jw.org/mya hta mara da ai daw matut sumhpa ni re ai “Chyum Laika Gaw Prat Hpe Galai Shai Ya” * ngu ai hta lawm ai n-gun jaw ya lu ai mahkrum madup ni hpe mung tam mai ai. Dai zawn sumhpa ni hte video ni gaw prat hta Chyum Laika npawt tara hte maren, asak hkrung yang kade daram hpaji rawng ai hpe na a Chyum ga sharin mu wa na re.

9. Nta masha ni hte manang ni hpe tinang hkaja da ai lam hpe bai tsun dan na matu Chyum ga sharin hpe gara hku n-gun jaw na kun?

⁹ Chyum ga sharin gaw dinghku hte rai yang, shi a ningrum ningtau mung hkaja nga ai kun? N hkaja shi yang, arau hkaja na matu saw shaga u. Nta masha ni, manang ni hpe tinang sharin la wa ai lam ni hpe tsun dan na matu n-gun jaw u. (Yhn 1:40-45) Gara hku galaw lu na kun? Nang ndai hku san mai ai: “Na a nta  masha ni hpe ndai lam hte seng nna gara hku tsun dan na kun?” (sh) “Na a manang hpe gara Chyum daw hte tsun dan na kun?” Dai lam hku nna na a Chyum ga sharin hpe atsawm sharin ya lu ai wa byin hkra shaman ya lu na re. Shi atsam rawt jat wa ai shaloi, hkalup n hkam shi ai hkaw tsun masha hku nna, hkaw tsun bungli hta shang lawm mai na re. Chyum Laika hkaja mayu ai ni nga ai kun? ngu nna shi hpe san mai ai. Nga yang, shi hte arau sa nna, Chyum Laika hkaja na matu saw shaga u. Chyum Laika Sharin Ai Lamang Hpe Gara Hku Galaw A Ta? * ngu ai video hpe madun u.

10. 1 Htesaloni 2:7, 8 hku nga yang sharin ya ai ni gaw Pawlu a kasi ningli hpe gara hku hkan sa mai na kun?

¹⁰ Sharin ya ai ni gaw tinang a Chyum ga sharin ni hpe atsawm lanu lahku ra ai. Shanhte hpe hpunau nauna byin wa na ni hku nna mu mada u. (1 Htesaloni 2:7, 8 hpe hti u.) Yehowa hpe nawku daw jau lu hkra galai shai na matu, mungkan na manang ni hpe kau da na matu n loi ai. Nawku hpung hta manang ajet mu tam hkra shanhte hpe karum ya ra ai. Chyum ga sharin ai aten hta sha n-ga, kaga aten ni hta mung shi hpe aten jaw ai hku nna manang tai ya u. Kaga aten ni hta, phone shaga ai, laika sa ai (sh) chyahkring chyahkra sa chyai ai hku nna shi hpe teng sha lanu lahku ai lam madun u.

11. Chyum ga sharin ni hpe nawku hpung hta hpa hpe mu tam shangun mayu ai kun? Hpa majaw kun?

¹¹ “Mare masha shagu gaw ma langai bau maka ai hta jawm karum ya ra ai” ngu ai ga malai nga ai. Dai hte maren, “sape langai byin wa na matu mung nawku hpung ting jawm karum ya ra ai” ngu anhte hkamsha ai. Dai majaw, Chyum Laika sharin ya ai ni gaw, tinang a Chyum ga sharin hpe kaja ai hku shingkang ka-up ya lu ai nawku hpung kaw na ni hte shachyen ya ai. Rai yang, shanhte hpe madi shadaw ya lu ai, wenyi lam hta n-gun jaw ya lu ai Karai a masha ni hte arau kanawn mazum lu na re. Nawku hpung shang masha langai hku nna, wenyi lam hta nta masha langai hku nna shi hkamsha hkra anhte karum ya mayu ai. Hpunau nauna ni hpe mung tsawra shangun mayu ai. Rai yang she, Yehowa hpe tsawra hkra n karum ya lu ai masha ni hte kanawn mazum ai lam hpe kau da lu na re. (Gsh 13:20) Mungkan na manang ni gaw shi hpe n kanawn mat ai rai yang mung, Yehowa a uhpung hta jet ai manang ni tam mai ai hpe shi chye wa na re.​—Mrk 10:29, 30; 1 Pe 4:4.

12. Anhte a Chyum ga sharin hpe Hkristan apnawng ai hte hkalup hkam ai lam hpe hpa majaw tsun dan ging ai kun?

¹² Hkristan apnawng ai hte hkalup hkam ai lam hte seng nna dan dan leng leng tsun dan  u. Anhte Chyum Laika sharin ya ai bandung gaw, marai langai hpe hkalup hkam ai sape byin wa hkra karum ya na matu re. Chyum Laika hkaja ai shata loi mi na wa nna, zuphpawng ni lung hpang wa ai hpang, Chyum Laika hkaja ai a yaw shada lam gaw Yehowa Sakse langai hku nna Yehowa hpe nawku daw jau na matu re ai lam shi chye ging ai.

13. Chyum ga sharin gaw hkalup hkam ai du hkra rawt jat wa na matu hpa ni galaw ra ai kun?

¹³ Hkalup hkam mayu ai Chyum ga sharin galaw ra ai lam law law nga ai. Shawng nnan, Yehowa hpe chye chyang ra nna, tsawra ra ai, kamsham ra ai. (Yhn 3:16; 17:3) Yehowa hte hku hkau lam kaja ra ai sha n-ga, nawku hpung kaw na hpunau nauna ni hte mung hku hkau ra ai. (Heb 10:24, 25; Yak 4:8) Angwi ngwi hte Chyum ga sharin gaw, n kaja ai akyang lailen ni hpe tawn kau da ra nna, shi a yubak mara ni a matu, myit malai lu ra ai. (Kas 3:20) Ya, shi kamsham da ai lam ni hpe kaga ni hpe mung tsun dan ra ai. (2 Ko 4:13) Dai hpang, Yehowa kaw shi hkum shi apnawng nna, dai apnawng ai lam hpe hkalup hkam ai hku nna madun ra ai. (1 Pe 3:21; 4:2) Dai shani gaw yawng grai kabu ai shani re. Chyum ga sharin gaw hkalup hkam na matu shakut nga ai shaloi, myit majing hte shakawn ya nna, dai lam ni hpe matut galaw na matu n-gun jaw u.

14. Sharin ya ai wa gaw Chyum ga sharin a rawt jat ai lam hpe gara hku maram yu na kun?

¹⁴ Chyum ga sharin gaw, apnawng nna hkalup hkam ai du hkra rawt jat wa na matu, karum ya ai shaloi anhte myit galu ra ai. Raitim, shi gaw Yehowa hpe nawku daw jau mayu ai kun? Yesu a hkang da ai lam ni hpe shakut nna hkan sa nga ai kun? Chyum Laika machye machyang hpe sha chye mayu ai kun? ngu ai hpe mung maram yu ra ai.

15. Chyum ga sharin a rawt jat ai masa hpe sharin ya ai wa gaw gara hku maram yu na kun?

¹⁵ Chyum ga sharin a rawt jat ai lam hpe ayan na maram yu u. Ga shadawn, Yehowa hte seng nna shi a hkamsha lam hpe madun ai kun? Yehowa kaw akyu hpyi ai kun? (Shk 116:1, 2) Chyum Laika hti ai hpe ra sharawng ai kun? (Shk 119:97) Zuphpawng ni hpe ayan lung nga ai kun? (Shk 22:22) Shi a prat hta galai shai ra ai lam ni hpe shi galaw nga ai kun? (Shk 119:112) Sharin la wa ai lam ni hpe nta masha ni hte manang ni hpe tsun dan nga ai kun? (Shk 9:1) Ahkyak htum lam gaw Yehowa Sakse langai byin mayu ai kun? (Shk 40:8) Dai lam ni kaw nna langai ngai hpe n galaw ai nga yang, hpa majaw re ai hpe chye hkra galaw nna, dai lam hte seng nna  tsawra myit hte dan dan leng leng bawngban u. *

16. Gara aten hta marai langai hte hkaja ai lam hpe hkring kau ra na kun?

¹⁶ Marai langai ngai hte nang matut sharin na kun? n sharin ging ai kun? ngu ai hpe maram yu u. Tinang hkum tinang ndai hku san yu u: ‘Chyum ga sharin gaw tau hkrau hkyen lajang da ai lam n nga ai kun? Zuphpawng n kam lung ai kun? N kaja ai akyang lailen ni naw nga ai kun? Shut shai ai nawku htung a hpung shang masha naw re ai kun?’ Mahtai gaw re ai nga yang, shi hpe matut sharin ai gaw, hka n madi mayu ai wa hpe shakut nna hka hpung yawt sharin ya ai hte bung mat na re. Shi gaw sharin la ai lam ni hpe manu n shadan ai, galai shai ai lam ni n galaw mayu ai nga yang, hpa majaw matut sharin na kun?

17. 1 Timohti 4:16 hku nga yang Chyum ga sharin ya ai ni gaw hpa galaw ra ai kun?

¹⁷ Sape shatai ai bungli gaw anhte a matu grai ahkyak ai majaw, Chyum ga sharin ni hpe hkalup hkam ai du hkra rawt jat wa na matu, karum ya mayu ga ai. Dai majaw, sharin ya ai shaloi Chyum Laika hpe akyu jashawn nna, myit rawt let kamhpa myit hte sharin ya ai. Nawku hpung kaw nga ai ni hte manang galaw na matu, anhte n-gun jaw ai. Apnawng nna hkalup hkam ai lam hpe ahkyak shatai tsun nna, shi a rawt jat ai lam hpe maram yu ai. (“ Chyum Ga Sharin Ni Hkalup Hkam Ai Du Hkra Rawt Jat Na Matu Sharin Ya Ai Ni Galaw Ra Ai Lam” ngu ai lawk hpe yu u.) Asak hkye ai bungli hta shang lawm lu ai majaw anhte grai kabu ai. Hkalup hkam na matu, atsam hpring hkra Chyum ga sharin ni hpe karum ya lu ai lam yawng hpe galaw lu u ga.