1. Thukaminya thuthi ngoku omubiiri w’eriyira abigha ni w’erilhamya esyongebe?

OMUBIIRI w’eriyira abigha ni w’erilhamya esyongebe! Thukaminya thuthi? Yesu abere akaha ekihano ekiri omu Matayo 28:19, 20, mwabugha athi: “Mughende, muyire abigha . . . , mubatizayebo.” Busana naki ni kikulhu eribatizibwa? Ni kindu ekikayithaghisibawa okwa bakasondekanaya omulhamu. Oyuwanzire eribatizibwa atholere in’ikirirya ngoku omulhamu akathokekana kundi Yesu mwaholha busana nethu kandi ku mwalhubuka. Ky’ekyaleka omukwenda Petero iniabwira Abakristayo balikyabo athi: ‘Olhubatizo [ni] busana n’erilhama lyenyu erilhamibwa busana n’erilhubuka lya Yesu Kristo.’ (1 Pet. 3:21) Neryo omwigha akabya akabatizibwa, akathunga amaha w’erisyabyaho kera na kera.

2. Ngoku kiri omu 2 Timoteo 4:1, 2, thutholere ithwabya bakangirirya abali bathi?

² Eriyira abigha, thutholere ithw’igha “erikangiriryabo . . . ndeke.” (Soma 2 Timoteo 4:1, 2.) Busana naki? Kundi Yesu mwathulhaghira athi: “Mughende, muyire abigha . . . , mukangirirayebo.” Omukwenda Paulo mwabugha athi ‘thuyitsinge’ omwa mubiiri oyu, ‘kusangwa mwamakolha muthya mwasyayilhamya haghuma n’abakabahulikirira.’ Kwesi, ky’ekyaleka Paulo iniabugha athi: “Wutheghaye erikangirirya lyawu.” (1 Tim. 4:16) Kundi erikangirirya lihambene n’eriyira abigha, thwanzire erikangirirya lyethu iryuwana ndeke.

3. Omo mwatsi ono, ni byahi ebyo thukendi kaniako ebihambire okweghesya abigha be Biblia?

³ Mughulhu wosi thukakangiriraya esyomiliyoni sy’abandu  ekwenene ye Biblia. Aliwe ngoku kiri omo mwatsi awahwere, thwanzire eriminya ngoku thwanga wathikya abangyi b’okw’ibo eribya bigha ba Yesu Kristo ababatizibirwe. Omo mwatsi ono, thukendi kania okwa bindi bindu bithano ebyo obuli mukangirirya atholere iniakolha eriwathikya omwigha erikulha-kulhana erihika okw’ibatizibwa.

4. Busana naki omukangirirya atholere iniabya n’omubere w’eriyikakirya akakangirirya omwigha? (Lebaya n’omwatsi ahikwa.)

⁴ Thwanzire ebyo thukakangiriraya ebiri omwa Kinywe kya Nyamuhanga. Neryo thwangana yisanga ithuli okw’ikania binene. Aliwe, mbulha wukasondolha Erigha ly’Akaleberyo, Erigha lye Biblia ery’Ekithunga, kutse omwigha, siwutholere wukakania binene. Erithoka erikolesya ndeke e Biblia, omukangirirya atholere iniabya n’omubere w’eriyikakirya kandi syatholere akasoborera obuli kindu ekyo asi ekihambire okwa mulhondo mulebe kutse oko mwatsi we Biblia. * (Yn. 16:12) Lengekanaya okwa byo wabya wasi okwa Biblia wukabatizibwa n’ebya wasi lino. Wukabatizibwa wangabya iwabya wasi esyongangirirya esy’omusingyi sisa. (Ebr. 6:1) Wamabirighunza myaka mingyi eriminya ebyo wasi lino, neryo siwutholere wukakangirirya omwigha obuli kindu murundi mughuma.

5. (a) Ngoku kiri omwa 1 Abanya Tesalonika 2:13, ni kyahi ekyo thwanzire omwigha wethu iniaminya okwa bya ak’igha? (b) Thwanga hira thuthi omwa mwigha mw’omuhwa w’erikania oko by’ak’igha?

⁵ Thwanzire omwigha iniaminya ngoku ebyo ak’igha bikalhua omwa Kinywe kya Nyamuhanga. (Soma 1 Abanya Tesalonika 2:13.) Ekyo thwanga kikolha thuthi? Hira omo mwigha mw’omuhwa w’erikania okwa by’ak’igha. Omwakanya k’eribera erisoborera omwigha y’amasako we Biblia, bugha wuthi akusoborere amaghuma w’okw’igho. Wathikaya omwigha erilhangira ngoku Ekinywe kya Nyamuhanga kikamuhambako ahabwiwe. Mubulhaye ebibulyo ebikendi leka iniabugha amalengekania n’eriyowa liwe okwa masako agho akasoma. (Lk. 10:25-28) Ng’eky’erileberyako, mubulhaye: “Erisako eri lyamakuwathikya lithi erilhangira omughuma w’okwa mibere ya Yehova?” “Ekwenene ye Biblia eyi yanga kughasira yithi?” “Wanga bugha wuthiki okwa bya wam’igha ebi?” (Emi. 20:5) Ekikulhu kutsibu, omwigha atholere inianza ebyo amathaminya n’eribighenderako, butsira ng’asi bingahi.

6. Busana naki kyangabya kibuya erighenda okwa mwigha wawu n’omuthuliri oyuwasi ndeke erikangirirya?

⁶ Wunewathaghenda oko mwigha wawu  n’abathuliri abasi erikangirirya ndeke? Kyamabya ikwakiri kithya, iwangana babulya nga mubakalhangira bathi emibere wuk’egheserayamo kandi nga wukakolesaya wuthi e Biblia. Wutholere iwayikehya wamabya wanzire eryuwania emibere yawu y’erikangirirya. (Linganisaya Emibiri 18:24-26.) Enyuma waho, bulhaya omuthuliri oyuwasi ndeke erikangirirya, omwigha ng’amwakanayitheghereraya ebyo ak’igha. Kandi iwangana saba omuthuliri iya n’oyo erigha n’omwigha wawu wamabya isiwendibyaho ahabw’ewiki kutse kwilhaba. Ekyo ikikendi leka omwigha iniabya inianemwigha kandi inialhangira omughaso w’erigha liwe. Isiwayowa wuthi oyu ni mwigha “wawu” kandi nga sihali owundi oyuwanga mweghesya. Kundi nibya, wukasunzira omwigha wawu y’ebibuya, nuku angalholha embere erigha bingyi ebihambire okwa kwenene.

7. Ni kyahi ekikendi wathikya omwigha erianza eby’ak’igha?

⁷ Omwigha wawu akayithagha erilhangira omuhwa wawu kandi ku wukaligha ekwenene ye Biblia. (1 Tes. 1:5) Neryo iniangananza kutsibu eby’ak’igha. Kyamayithaghisibwa, mubwire iwe ngoku wabirighasirwa omw’ighendera okwa misingyi ye Biblia. Neryo iniakendi minya ngoku e Biblia yiri mw’amenge nayu awanganamughasira.

8. Ni kindi kyahi ekyo wanga kolha eriwathikya omwigha we Biblia, kandi busana naki?

⁸ Muk’igha, bwira omwigha wawu okwa by’erileberyako by’abalikyethu ababya bawithe ebitsibu ebiri ng’ebiwe kandi ababirisingurabyo. Iwangana ghenda na mulikyethu oyo eky’erileberyako kiwe kyangana wathikya omwigha. Kutse iwanganabana ebyalholirweko ebikahimba okwa jw.org ebikabera eryasira omwa “E Biblia Yikahindulha Esyongebe.” * Emyatsi ng’eyo n’esyovidiyo bikendi wathikya omwigha wawu erilhangira ngoku ni ky’amenge erighendera okwa misingyi ye Biblia omo ngebe yiwe.

9. Wangahira wuthi omo mwigha wawu mw’omuhwa w’eribwira abahughu n’abanywani biwe okwa by’ak’igha?

⁹ Omwigha amabya iniane omwa butheke, mbwino omwanze wiwe nayu anemw’igha? Amabya isyal’igha, mubwire wuthi nayu ayiyunge okw’igha eryo. Hira omo mwigha wawu mw’omuhwa w’eribwira abahughu n’abanywani biwe okwa by’ak’igha. (Yn. 1: 40-45) Wuthi? Iwangana mubulya: “Wanga soborera wuthi abahughu bawu ekwenene eyi?” kutse “N’isako lyahi eryo wangakolesya erisoborera munywani wawu y’eki?” Omwa nzira eyi, iwukendibya iwukathendeka omwigha wawu eribya mukangirirya. Neryo amabiritholera, iniakendi tsuka erisangira omw’ithulira ng’omuthuliri oyuthabatizibirwe. Iwangana bulya omwigha ng’anasi mundu mulebe oyuwanganza erigha e Biblia. Amakubwirayo, aho n’aho sondekanaya omundu oyo n’erimubwira okwa ndegheka y’erigha Biblia. Mukanganaye evidiyo Erigha e Biblia Likabya Lithi? *

10. Ngoku kiri omwa 1 Abanya Tesalonika 2:7, 8, omukangirirya angagherererya athi eky’erileberyako kya Paulo?

¹⁰ Abakangirirya batholere ibakangania ku batsomene kutsibu abigha babu. Mubalhangire ng’abakayabya balikyethu. (Soma 1 Abanya Tesalonika 2:7, 8.) Sikyolhobire ibo erileka abanywani babu ab’omwa kihugho n’erikolha esyombinduka syosi esikayithaghisibawa erithoka erikolera Yehova. Thutholere ithwabawathikya eribana abanywani b’okwenene omwa kithunga. Ibya munywani w’omwigha wawu omw’isiba nayu butsira omughulhu muk’igha lisa aliwe n’okwa bundi buthuku. Erimutherera, erimuthumira emeseji, kutse erimubungira isi buthuku bw’erigha kikakanganaya ku wumutsomene kutsibu.

11. Ni kyahi ekya thwanzire abigha bethu ibabana omwa kithunga, kandi busana naki?

¹¹ Kikanabughawa kithi: “Erikulibwa ly’omwana ni butaka obwosi.” Ithwangana bugha thuthi: “Omwigha ni w’ekithunga kyosi.” Ky’ekikaleka abakangirirya be Biblia abasi ndeke ibawathikya abigha babu eriminya abandi omwa kithunga abanga bawathikya eriyithunda hakuhi na Yehova. Neryo abigha ibanganabya banywani b’abandu ba Nyamuhanga, abanga bawathikya bunyakirimu kandi abanga bahumulikania omughulhu bawithe ebitsibu. Thwanzire obuli mwigha iniayowa ini w’okwa kithunga kandi w’okw’ihiika lyethu ly’obunyakirimu. Thwanzire omwigha iniayithunda hakuhi n’olhughanda lhw’abalikyethu Abakristayo abawithe olhwanzo. Neryo ikikendi mwolhobera erileka obunywani n’abandu abathe banga muwathikya erianza Yehova. (Emi. 13:20) Abanywani biwe abo bamamughana, iniakendi minya ngoku anganabana abanywani b’okwenene omwa kithunga kya Yehova.​—Mk. 10:29, 30; 1 Pet. 4:4.

12. Busana naki thutholere ithwabwira omwigha wethu okw’iyihayo n’eribatizibwa?

¹² Mughulhu wosi ambi iwabya iwunemukania okwa mughaso w’eriyihayo n’eribatizibwa. Kundi nibya, ekilhubirirwa kyethu eky’eryeghesya omwigha ly’erimuwathikya eribya mwigha oyubatizibirwe. Omwigha amabirigha ahabw’amezi make kandi kutsibu-tsibu amabiritsuka erihindana, atholere iniaminya ngoku ekighendererwa ky’erigha ly’erimuwathikya eritsuka erikolera Yehova ng’Omwema wiwe.

13. Ni byahi ebyo mwigha atholere erikolha eritholera eribatizibwa?

¹³ Kiika okwa kiika, omwigha oyutsomene iniangana hika okwa kilhubirirwa ky’eribatizibwa! Eky’erimbere, Omwigha akaminya Yehova, erimwanza, n’erimwikirirya. (Yn. 3:16; 17:3) Neryo iniabya munywani wa Yehova n’abalikyethu omwa kithunga. (Ebr. 10:24, 25; Yak. 4:8) Erighunzerera, omwigha inialeka emibere mibi n’eriyisubamu. (Emib. 3:19) Ebyo bine aho, erikirirya liwe iryaleka inianza eribwira abandi okwa kwenene. (2 Kor. 4:13) Neryo iniayihayo oku Yehova n’eribatizibwa. (1 Pet. 3:21; 4:2) Kandi okwa kiro ekyo, obuli mundu akatsema! Omwigha akendibya ane muberererya obuli kiika, ambi iwamusima erilhua okwa muthima n’erimuhira mw’omuhwa w’erilholha embere.

14. Omukangirirya angalebya athi erikulha-kulhana ly’omwigha?

¹⁴ Thutholere ithwaghumisirizya thukawathikya omwigha erikulha-kulhana erihika okw’iyihayo n’eribatizibwa. Aliwe okwa bundi buthuku, thutholere ithwaminya ngananzire erikolera Yehova Nyamuhanga. Wunemulhangira ebiminyikalho ebikakanganaya ngoku omwigha anemulengaho erighendera okwa bihano bya Yesu? Kutse anzire eriminya ebya Biblia yikabugha bisa?

15. Ni byahi ebikendi kangania omukangirirya ngoku omwigha anemukulha-kulhana?

¹⁵ Mughulhu wosi ibya iwunemulebya erikulha-kulhana ly’omwigha. Ng’eky’erileberyako, akana kanganaya eriyowa eryo awithe oku Yehova? Akanasaba Yehova? (Esy. 116:1, 2) Akanatsemera erisoma e Biblia? (Esy. 119:97) Anemuhindana mughulhu wosi? (Esy. 22:22) Anabirikolha esyombinduka esikayithaghisibawa? (Esy. 119:112) Anabiritsuka eribwira  abahughu biwe n’abanywani okwa by’ak’igha? (Esy. 9:1) Ekikulhu kutsibu, ananzire eribya Mwema wa Yehova? (Esy. 40:8) Omwigha amabya isyali kolha n’ekighuma ky’okw’ebi, omwa menge lengaho eriminya ekikaleka neryo kanaya nayu oko mwatsi oyo omwa lhukeri n’omw’ithendi bisirira. *

16. Ni byahi ebyanga kangania nga wuleke omwigha?

¹⁶ Ibya iwunemulebya nga wunalhole embere erigha n’omundu. Yibulhaye: ‘Mbwino omwigha syali thegheka? Syali anza eriasa okwa mihindano? Akinawithe emitse yiwe mibi? Akine omwa dini y’amabehi?’ Erisubirya lyamabya ini ee, erilholha embere erigha nayu liri ng’erikangirirya omundu eriziha kandi isyanzire eritsapa! Omwigha amabya isyanzire ebyo ak’igha kandi isyanzire erikolha esyombinduka, busana naki iwalholha embere erigha nayu?

17. Ngoku kiri omu 1 Timoteo 4:16, ni byahi ebyo abakangirirya abosi be Biblia batholere ibakolha?

¹⁷ Thukalhangira omubiiri wethu w’eriyira abigha mwa mukulhu, kandi thwanzire eriwathikya abigha bethu be Biblia erikulha-kulhana erihika okw’ibatizibwa. Ky’ekikendi leka ithwakolesya e Biblia erikangirirya n’eryeghesya n’omuhwa kandi ithunakakasirye. Thukendi hira omo mwigha mw’omuhwa w’erithunga abanywani omwa kithunga. Kandi thukendi hira omuwatho okwa kilhubirirwa ky’eriyihayo n’eribatizibwa, n’eribera erilebya erikulha-kulhana ly’omwigha. (Lebaya akasanduko okwa lhupapura 13, “ Ebyo Abakangirirya Batholere Ibakolha Eriwathikya Abigha Erihika okw’Ibatizibwa.”) Thutsemire erisangira omwa mubiiri w’erilhamya esyongebe oyu! Thuthwemu erikolha ekyosi-kyosi eriwathikya abigha be Biblia erikulha-kulhana erihika okw’ibatizibwa.