MUTWE WA KUFUNDA 42
Bya Kufunjisha Muntu Baibolo Kufika ne ku Lubatizhilo—Lubaji 2
‘Saka wita muchima obe mwine ne ku byo ufunjisha.’—1 TIMO. 4:16.
LWIMBO 77 Kyeya Kisamine mu Ntanda Muji Mfishi
BIJI MU UNO MUTWE *
1. Twayuka byepi kuba’mba mwingilo wa kufunjisha bantu kwikala ke baana ba bwanga ke mwingilo ukapulusha bantu?
MWINGILO wa kufunjisha bantu kwikala ke baana ba bwanga ke mwingilo wanema bingi ukapulusha bantu. Twayuka byepi? Kimye Yesu kyo apaine mukambizho wanembwa pa Mateo 28:19, 20, waambile’mba: “Yainga na kufunjisha bantu . . . kwikala ke baana . . . ba bwanga, ne kwibabatizha.” Lubatizhilo lwanemena ka? Twafwainwa kubatizhiwa pa kuba’mba tukapuluke. Muntu ubena kukeba kubatizhiwa wafwainwa kwitabila kuba’mba tukekala na bumi bwa myaka ne myaka na mambo a kuba’mba Yesu witufwijile ne kusanguka. O ene mambo mutumwa Petelo o abuujijile bakwabo bena Kilishitu amba: “Lubatizhilo . . . lubena kwimupulusha.” (1 Pe. 3:21) Onkao mambo, inge mwana wa bwanga wa katataka wabatizhiwa, wikala na luketekelo lwa kwikala na bumi bwa myaka.
2. Kinembelo kya 2 Timoti 4:1, 2 kyamba’mba twafwainwa kwikala bafunjishi ba mutundu ka?
2 Pa kuba’mba tufunjishe bantu kwikala ke baana ba bwanga, twafwainwa kwikala na “busendwe bwa kufunjisha.” (Tangai 2 Timoti 4:1, 2.) Mambo ka? Mambo Yesu wakambizhe’mba: “Yainga na kufunjisha bantu . . . kwikala ke baana . . . ba bwanga.” Mutumwa Paulo waambile’mba “kosela” mu uno mwingilo, “mambo mu kuba bino ukepulusha obe mwine ne boba bakumvwa.” Kyo kyalengejile Paulo kwamba’mba: ‘Saka uta muchima ku kufunjisha.’ (1 Timo. 4:16) Onkao mambo, pa kuba’mba tukwashe bantu kwikala baana ba bwanga, twafwainwa kufunjishanga bulongo.
3. Ñanyi bintu byo tusakufunda mu uno mutwe?
3 Mwaya ntanda yonse ya panshi, tubena kufunjisha biumbi ne biumbi bya bantu bukine bwa mu Baibolo. Pano bino, byonka byo twafunjile mu mutwe wafumako, twafwainwa kuyuka bya kukwasha bavula kubatizhiwa ne kwikala baana ba bwanga ba kwa Yesu Kilishitu. Mu uno mutwe, tusakwisamba bintu bikwabo bitanu byafwainwa kuba mufunjishi pa kuba’mba akwashe ye afunjisha Baibolo kuyilako palutwe ne kubatizhiwa.
INGIJISHAINGA BAIBOLO PA KUFUNJISHA
Ipuzhaiko musapwishi wayuka kufunjisha kuba’mba emukwasheko kuyuka bya kwingijisha bulongo Baibolo pa kufunjisha (Monai mafuka 4-6) *
4. Mambo ka mufunjishi o afwainwa kuchinuzhukila kulolobwela pa kufunjisha muntu Baibolo? (Monai ne tubyambo twa munshi.)
4 Twatemwa bingi bintu byo tufunjisha biji mu Mambo a Lesa. Kino kyakonsha kwitulengela kulolobwela pa kwamba pa bintu byo twatemwa bingi. Pano bino, pa kutangijila Lufunjisho lwa Kyamba kya Usopa, Lufunjisho lwa Baibolo lwa Kipwilo, nangwa pa kufunjisha muntu Baibolo, ubena kutangijila lufunjisho kechi wafwainwa kwamba byavula ne. Mufunjishi yense wa Mambo a Lesa pa kuba’mba afunjishe bulongo, wafwainwa kuchinuzhuka kulumbulula byonse byo ayuka pa kinembelo kya mu Baibolo nangwa pa mutwe umo. * (Yoa. 16:12) Esakanyai bintu byo mwayukile pa Baibolo kimye kyo mwabatizhiwe ne byo mwayuka luno. Kyamweka kimye kyo mwabatizhiwenga, mwafunjiletu mafunjisho anema a mu Baibolo. (Hebe. 6:1) Papichile myaka yavula bingi pa kuba’mba muyuke bintu byo mwayuka luno. Onkao mambo, kange mufunjishenga ye mufunjisha Baibolo byonse byo mwayuka pa kimye kimo ne.
5. (a) Kwesakana na byaamba 1 Tesalonika 2:13, tukeba ye tufunjisha Baibolo kuyuka ka? (b) Twakonsha kutundaika byepi ye tufunjisha Baibolo kubuulako bakwabo bintu byo abena kufunda?
5 Tukeba ye tufunjisha Baibolo kumvwisha byo abena kufunda mu Mambo a Lesa. (Tangai 1 Tesalonika 2:13.) Twakonsha kuba byepi bino? Twafwainwa kutundaika ye tufunjisha kubuulako bakwabo bintu byo abena kufunda. Kechi mwafwainwa kulumbululangatu Binembelo kimye kyonse ne, bino mwafwainwa kumwipuzha naye wimulumbulwilako bimo. Mukwashai kumona Mambo a Lesa byo akonsha kumukwasha mu bwikalo bwanji. Ipuzhainga mepuzho akonsha kumulengela kwamba byo alanguluka pa binembelo byo atanga. (Luka 10:25-28) Mwakonsha kwipuzha mepuzho nabiji ano: “Kino kinembelo kimukwasha byepi kuyuka kyubilo kimo kya Yehoba?” “Kino kishinka kya mu Baibolo kyakonsha kwimukwasha byepi?” “Byo mwatanga bimulengela kumvwa byepi?” (Maana 20:5) Kintu kyo twafwainwa kutapo muchima kechi kukwasha ye tufunjisha Baibolo kuyuka bintu byavula ne, bino ke kumukwasha kwingijisha bintu byo ayuka.
6. Mambo ka o kyanemena kusenda musapwishi wayuka kufunjisha ku muntu ye tufunjisha Baibolo?
6 Nanchi musendako basapwishi bayuka kufunjisha pa kuya na kufunjisha muntu Baibolo nyi? Inge mwauba bino, mwakonsha kwibepuzha bemubuulako byo baji kumona inge kya kuba mwajikwingijisha Baibolo bulongo pa kufunjisha nangwa ne. Inge mukeba kuwamishako busendwe bwenu bwa kufunjisha, mwafwainwa kwipelula. (Esakanyaiko Byubilo 18:24-26.) Kabiji mwafwainwa kwipuzha musapwishi wayuka kufunjisha kwimubuulako inge kya kuba ye mufunjisha ubena kukwatakanya bukine nangwa ne. Kabiji mwakonsha kwambila yenka uno musapwishi kutangijila lufunjisho inge mwafumapo pa mulungu umo nangwa ibiji. Kino kikalengela lufunjisho kutwajijila kwa kubula kukilaukilapo, kabiji kikalengela ye mufunjisha kuyuka buneme bwa kufunda. Kange mwikale na milanguluko ya kuba’mba yenu bene bena lufunjisho kafwako mukwabo wakonsha kumufunjishako ne. Mukeba kuba’mba ye mufunjisha atwajijile kumwenamo mu lufunjisho, onkao mambo, kechi wafwainwa kukilaukilanga pa kufunda ne.
FUNJISHAINGA NA KIZAKU NE KUMWESHA’MBA MWASHIINWA
Shimikizhainga ye mufunjisha Baibolo mashimikila a bantu bapimpwile byubilo byabo na mambo a kulondela mafunde a mu Baibolo (Monai mafuka 7-9) *
7. Ki ka kikakwasha muntu ubena kufunda Baibolo kutemwa bintu byo abena kufunda?
7 Muntu ye mufunjisha wafwainwa kumona’mba mwatemwa ne kwitabila bifunjisha Baibolo. (1 Tesa. 1:5) Umvwe mwauba bino, naye ukatemwa bingi bintu byo abena kufunda. Inge kyakonsheka, mubuulai byo mwamwenamo mu kulondela mafunde a mu Baibolo. Kino kikamukwasha kuyuka’mba mu Baibolo muji mafunde akonsha kumukwasha ne aye.
8. Ñanyi bintu bikwabo byo mwakonsha kuba pa kuba’mba mukwashe ye mufunjisha Baibolo, kabiji mambo ka o mwafwainwa kubila bino?
8 Kimye kyo mubena kufunjisha muntu Baibolo, ambaipo pa balongo ne banyenga bapichilepo mu makatazho epasha na o abena kupitamo ne byo beashinjile. Pa kuya na kumufunjisha, mwakonsha kuyako na musapwishi wapichilepo mu bintu bimo byo akonsha kufunjilako. Nangwa mwakonsha kumonapo jishimikila jakonsha kumutundaika pa jw.org pa bibaaba bya kuba’mba “Baibolo Upimpula Bwikalo Bwa Bantu.” * Bibaaba bya uno mutundu ne mavidyo byakonsha kukwasha ye mufunjisha Baibolo kumona buneme bwa kwingijisha mafunde a mu Baibolo mu bwikalo bwanji.
9. Mwakonsha kutundaika byepi ye mufunjisha kubuulako balongo banji ne balunda nanji bintu byo abena kufunda?
9 Inge kya kuba ubena kufunda Baibolo wasongola nangwa kusongolwa, nanchi mwinakwanji naye ubena kufunda nyi? Inge kechi ufunda ne, mwakonsha kumwitako kutanwapo kimye kyo mubena kufunda. Tundaikai ye mufunjisha kubuulako balongo banji ne balunda nanji bintu byo abena kufunda. (Yoa. 1:40-45) Mwakonsha kuba byepi kino? Mwakonsha kwipuzha’mba: “Mwakonsha kulumbulwila byepi ba mu kisemi kyenu kino kishinka?” nangwa’mba “Ñanyi kinembelo kyo mwafwainwa kwingijisha pa kukwasha mulunda nenu kumvwisha kino kishinka?” Inge ke mube bino, ko kuba’mba mubena kumufunjisha kwikala mufunjishi. Kepo inge wafikilamo, wakonsha kwikala musapwishi wabula kubatizhiwa ne kutendeka kusapwila pamo na kipwilo. Mwakonsha kwipuzha muntu ye mufunjisha inge kujipo muntu mukwabo ye ayuka wakonsha kukeba kufunda Baibolo. Inge wimubuulapo umo, bukiji bukiji monañanai na yeo muntu ne kumumwesha byo tufunda Baibolo. Mutambishai vidyo wa kuba’mba Kikala Byepi pa Kufunda Baibolo? *
TUNDAIKAI YE MUFUNJISHA KWIKALA NA BALUNDA MU KIPWILO
Tundaikai ufunda Baibolo kwikala na balunda mu kipwilo (Monai mafuka 10-11) *
10. Kwesekana na byaamba 1 Tesalonika 2:7, 8, mufunjishi wakonsha kufunjilako ka kwi Paulo?
10 Bafunjishi bafwainwa kuta muchima bantu bo bafunjisha. Monainga bantu bo mufunjisha amba bakekala balongo ne banyenga yetu mu kipwilo. (Tangai 1 Tesalonika 2:7, 8.) Kechi kibapelela kusha balunda nabo ba ku ntanda ne kupimpula bwikalo bwabo pa kuba’mba bengijilenga Yehoba ne. Twafwainwa kwibakwasha kutaana balunda ba kine mu kipwilo. Ikalai balunda na muntu ye mufunjisha Baibolo kupichila mu kumonapo kimye kya kupwanañana nanji kechi kwikalatu nanji kimye kyo mufunda Baibolo ne. Kumutuminako foni nangwa tubyambo pa foni, nangwa kumufwakesha pa bimye bikwabo kumwesha kuba’mba mwamuta bingi muchima.
11. Tukeba bantu bo tufunjisha Baibolo kutaana ka mu kipwilo, kabiji mambo ka?
11 Kishimpi kimo kyamba’mba: “Muzhi yense wingijila pamo pa kukomesha mwana.” Twakonsha kwamba’mba: “Kipwilo kyonse kingijila pamo pa kukwasha muntu kwikala mwana wa bwanga.” O ene mambo bafunjishi ba Mambo a Lesa o bakwashisha bo bafunjisha kuyuka balongo ne banyenga mu kipwilo. Bano balongo ne banyenga bakonsha kukwasha bafunda Baibolo kufwenya kwipi ne Yehoba ne kwibatundaika inge kebapite mu makatazho. Tukeba bonse bafunda Baibolo kuyuka’mba nabo ke lubaji lwa kipwilo kabiji baikala ke kisemi kyetu kya ku mupashi. Tukeba bafunda Baibolo kukasuluka kupwanañana na kisemi kyetu kya balongo ne banyenga. Kino kikebakwasha kuleka kupwanañana na bantu babula kwibakwasha kutemwa Yehoba. (Maana 13:20) Inge baleka kupwanañana na bantu bo bapwanañananga nabo kala, bafunda Baibolo bakayuka’mba bakonsha kutaana balunda ba kine mu jibumba ja Yehoba.—Mako 10:29, 30; 1 Pe. 4:4.
KIMYE KYONSE AMBAINGA PA KWIPANA NE LUBATIZHILO
Ufunda Baibolo wakonsha kufikilamo kubatizhiwa inge wafikizha bikebewa (Monai mafuka 12-13)
12. Mambo ka o twafwainwa kwambilanga pa kwipana ne lubatizhilo pa kufunjisha muntu Baibolo?
12 Ambainga pa ene mambo o kyanemena muntu kupana bumi bwanji kwi Yehoba ne kubatizhiwa. Kine kintu kyo tufunjishisha bantu Baibolo ke kwibakwasha kwikala baana ba bwanga babatizhiwa. Inge mwafunda na muntu pa bañondo bacheche kabiji kikatakata inge watendeka ne kupwila, wafwainwa kuyuka ene mambo o abena kufunjila Baibolo kuba’mba tukeba kumukwasha kwikala Kamonyi wa Yehoba.
13. Ñanyi bintu byafwainwa kuba ufunda Baibolo pa kuba’mba afikilemo kubatizhiwa?
13 Kuji bintu bimo byafwainwa kuba ufunda Baibolo pa kuba’mba afikizhe kikonkwanyi kya kubatizhiwa. Patanshi, ufunda Baibolo wafwainwa kuyuka Yehoba, kumutemwa, ne kumwitabila. (Yoa. 3:16; 17:3) Apa bino waikala mulunda ne Yehoba ne na balongo ne banyenga mu kipwilo. (Hebe. 10:24, 25; Yako. 4:8) Mu kuya kwa kimye, waleka miteeto yatama ne kulapila ku bundengamambo bwanji. (Byu. 3:19) Kabiji lwitabilo lwanji lwakonsha kumulengela kubuulako bakwabo bukine bo afunda. (2 Ko. 4:13) Apa bino wipana mwine kwi Yehoba ne kumwesha kwipana kwanji kupichila mu kubatizhiwa. (1 Pe. 3:21; 4:2) Kabiji juba ja lubatizhilo ke juba jiletela bonse lusekelo. Kimye ufunda Baibolo kyo abena kuba bino bintu pa kuba’mba afikizhe kikonkwanyi kya kubatizhiwa, mwafwainwa kumutakaikanga ne kumutundaika kutwajijila kuyilako palutwe.
PA KIMYE PA KIMYE PIMAINGA NGYALUTWE YA MUNTU YE MUFUNJISHA
14. Mufunjishi wakonsha kuyuka byepi amba ye afunjisha ubena kukomenako nangwa ne?
14 Twafwainwa kutekanya pa kukwasha bo tufunjisha kukomenako kufika ku kwipana ne kubatizhiwa. Kabiji twafwainwa kuyuka inge ukeba kwingijila Yehoba Lesa. Nanchi mubena kumonapo biyukilo bimwesha’mba ye mufunjisha ubena kukookela mikambizho yapaine Yesu nyi? Nangwa abya ukebatu kufunda bishinka bya mu Baibolo nyi?
15. Ñanyi biyukilo mufunjishi byo afwainwa kuyukilako inge ye afunjisha ubena kukomenako?
15 Kimye kyonse esekainga kumona inge ye mufunjisha ubena kuyilako palutwe. Mwakonsha kwiipuzha mepuzho nabiji a kuba’mba, nanchi umwesha byo atemwa Yehoba nyi? Abya ulomba kwi Yehoba nyi? (Sala. 116:1, 2) Nanchi wiyowa kutanga Baibolo nyi? (Sala. 119:97) Upwila kimye kyonse nyi? (Sala. 22:22) Abya ubena kupimpula bwikalo bwanji nyi? (Sala. 119:112) Nanchi watendeka kubuulako balongo banji ne balunda nanji bintu byo abena kufunda nyi? (Sala. 9:1) Ne kyakilamo kunema, abya ubena kukeba kwikala Kamonyi wa kwa Yehoba nyi? (Sala. 40:8) Inge kya kuba ufunda Baibolo kechi ubena kuyilako palutwe mu ino mbaji ne, esekai kuyuka kibena kulengela ne kwisamba nanji mu jishinda jawama kwa kubula kupita mu mbaji. *
16. Twakonsha kuyuka byepi amba kechi twafwainwa kutwajijila kufunjisha muntu ne?
16 Pa kimye pa kimye mwafwainwa kwiipuzhanga inge mwakonsha kutwajijila kufunjisha muntu nangwa ne. Mwafwainwa kwiipuzha mepuzho nabiji ano: ‘Nanchi ye mfunjisha kechi unengezha lufunjisho nenyi? Kechi ukeba kupwila nenyi? Nanchi ukiji na miteeto yanji yatama nyi? Abya watwajijila kuya mu bupopweshi bwa bubela nyi?’ Inge mwakumbula’mba ee, ko kuba’mba kutwajijila na kufunjisha yeo muntu kijitu nobe mubena kufunjisha muntu bya kowa ubula kukeba kuzoba na mema. Inge kya kuba ufunda Baibolo kechi watemwa bintu byo abena kufunda ne, kabiji kechi ukeba kupimpula bwikalo bwanji ne, mambo ka a kutwajijila na kumufunjisha?
17. Kwesakana na byaamba 1 Timoti 4:16, Bafunjishi ba Mambo a Lesa bonse bafwainwa kuba byepi?
17 Kyanema bingi kwingila mwingilo wetu wa kukwasha bantu kwikala baana ba bwanga, kabiji tukeba kukwasha bo tufunjisha Baibolo kukomenako kufika ne ku lubatizhilo. O ene mambo o twingijishisha bulongo Baibolo pa kufunjisha ne kufunjisha na kizaku saka twashiinwa. Twafwainwa kutundaika ye tufunjisha kwikala na balunda mu kipwilo. Kabiji twafwainwa kwambangapo kimye kyonse pa kikonkwanyi kya kwipana ne kubatizhiwa. Pa kimye pa kimye, twafwainwa kupimanga ngyalutwe ya muntu ye tufunjisha Baibolo. (Monai kakitenguluzha ka kuba’mba “ Bafunjishi byo Bafwainwa Kuba pa Kuba’mba Bakwashe bo Bafunjisha Kufikilamo Kubatizhiwa.”) Tuji bingi na lusekelo pa kwingilako uno mwingilo wa kupulusha bantu. Twayai tutwajijile kwingila papelela bulume bwetu kukwasha bo tufunjisha Baibolo kufikilamo kubatizhiwa.
LWIMBO 79 Bafunjishai Bekale Bakosa
^ jifu. 5 Pa kufunjisha bantu Baibolo, twikala na mwingilo wa kwibakwasha kuyuka Yehoba byo akeba’mba balangulukenga ne kuba. Uno mutwe usakulumbulula byo twakonsha kuwamishako busendwe bwetu bwa kufunjisha.
^ jifu. 4 Monai kibaaba kya kuba’mba “Bintu byo Twafwainwa Kubula Kuba pa Kufunjisha Bantu Baibolo” mu Mutanchi wa Kupwila kwa Bwikalo ne Mwingilo wa mu September 2016.
^ jifu. 8 Chintai panembwa’mba BAKAMONYI BA KWA YEHOBA > BYAMWEKELE.
^ jifu. 9 Mu JW Library®, chintai pa MEDIA > OUR MEETINGS AND MINISTRY > TOOLS FOR THE MINISTRY.
^ jifu. 15 Monai mutwe wa kuba’mba “Kutemwa Yehoba ne Kumusanchila Kukemutundaika Kubatizhiwa,” ne wa kuba’mba “Nanchi Mwafikilamo Kubatizhiwa Nyi?” mu Kyamba kya Usopa kya March 2020.
^ jifu. 77 KULUMBULULA BIPIKICHALA: Byo bafuma pa lufunjisho, nyenga wabanda mu bukine wakwasha nyenga wajikutangijila lufunjisho kukepeshako kwamba pa kufunjisha muntu.
^ jifu. 79 KULUMBULULA BIPIKICHALA: Kimye kyo babena kufunda, ufunda Baibolo wafunda bya kwikala muka kusongolwa wawama. Palutwe kacheche, wabuulako mwatawanji byo aji kufunda.
^ jifu. 81 KULUMBULULA BIPIKICHALA: Ufunda Baibolo ne bamwata wanji babena kwiyowa kupwanañana na mulunda nabo umo ye bataaine ku Nzubo ya Bufumu.
