1. Aw wi no se fɔ mek disaypul na wok we de sev pipul dɛn layf?

FƆ MEK pipul dɛn bi disaypul na wok we de sev layf. Aw wi no dat? We Jizɔs bin de gi di kɔmand we de na Matyu 28:​19, 20, i bin se: “Una go, . . . mek pipul dɛn bi mi disaypul . . . , una baptayz dɛn.” Wetin mek i impɔtant fɔ mek pipul dɛn baptayz? Na bikɔs we pɔsin baptayz dat go ɛp fɔ mek i gɛt layf we go de sote go. Di wan we de baptayz fɔ biliv se di wangren tin we go mek i gɛt layf we go de sote go na we Jizɔs bin day fɔ wi ɛn gɛt layf bak. Na dat mek apɔsul Pita bin tɛl in kɔmpin Kristian dɛn se: “Baptizim . . . insɛf de sev una . . . tru di layf we Jizɔs Krays gɛt bak.” (1 Pit. 3:​21) So we pɔsin baptayz, dat de mek i gɛt op fɔ gɛt layf we go de sote go.

2. Uskayn ticha dɛn 2 Timoti 4:​1, 2 se wi fɔ bi?

² Fɔ mek pipul dɛn bi disaypul, wi nid fɔ bi gud ticha “bay we [wi] de tich fayn.” (Rid 2 Timoti 4:​1, 2.) Wetin mek? Na bikɔs Jizɔs bin kɔmand wi se: “Una go, . . . mek pipul dɛn bi mi disaypul . . . , una tich dɛn.” Di apɔsul Pɔl bin se wi fɔ du dis wok “ɔltɛm,” ‘bikɔs we wi de du dat, wi go sev wisɛf ɛn di wan dɛn we de lisin to wi.’ I bin tɔk bak se: “Kɔntinyu fɔ pe atɛnshɔn to yusɛf ɛn di we aw yu de tich.” (1 Tim. 4:​16) Wi nid fɔ sabi tich fayn bikɔs na we wi ebul fɔ tich fayn na in go mek pipul dɛn bi disaypul.

3. Wetin wi go tɔk bɔt insay dis atikul bɔt aw fɔ kɔndɔkt Baybul stɔdi?

³ Wi de kɔndɔkt bɔku bɔku Baybul stɔdi dɛn ɔlsay na di wɔl. Bɔt as wi bin dɔn lan na di atikul we de bifo  dis wan, wi want fɔ no aw wi go ɛp bɔku pan dɛn Baybul studɛnt dɛn de fɔ baptayz ɛn bi Jizɔs Krays in disaypul. Insay dis atikul, wi go tɔk bɔt ɔda fayv tin dɛn we ɛni ticha nid fɔ du fɔ ɛp in Baybul studɛnt te i baptayz.

4. Wetin mek wi nɔ fɔ tɔk tumɔs we wi de kɔndɔkt Baybul stɔdi? (Rid di futnot.)

⁴ Wi lɛk wetin wi de tich frɔm Gɔd in Wɔd. So sɔntɛnde wi kin want fɔ tɔk bɔku bɔt wetin wi lɛk. Bɔt ilɛk wi de kɔndɔkt Wachtawa stɔdi, Kɔngrigeshɔn Baybul Stɔdi, ɔ wi de stɔdi pɔsin na in os, wi nɔ fɔ tɔk tumɔs. Fɔ lɛ ɛni ticha yuz di Baybul fɔ tich, i fɔ tek tɛm mek i nɔ tɔk ɔl wetin i no bɔt di skripchɔ ɔ di tɔpik we dɛn de tɔk bɔt. * (Jɔn 16:​12) Tink bɔt wetin-ɛn-wetin yu bin sabi bɔt di Baybul di tɛm we yu bin baptayz ɛn kɔmpia am to wetin yu sabi naw. I go bi se di tɛm we yu baptayz, na simpul simpul tin dɛn yu bin sabi bɔt di Baybul. (Ibru. 6:​1) Nɔto wangren de yu sabi ɔl wetin yu sabi rayt naw, so nɔ tray fɔ tich yu Baybul studɛnt ɔltin wantɛm wantɛm.

5. (a) Akɔdin to 1 Tɛsalonians 2:​13, wetin wi want mek wi studɛnt ɔndastand frɔm in stɔdi? (b) Aw wi go ɛnkɔrej wi studɛnt fɔ tɔk bɔt di tin dɛn we i de lan?

⁵ Wi want wi studɛnt fɔ ɔndastand se wetin i de lan de kɔmɔt frɔm di Baybul. (Rid 1 Tɛsalonians 2:​13.) Bɔt aw wi go du dat? Ɛnkɔrej yu studɛnt fɔ tɔk bɔt di tin dɛn we i de lan. Nɔto yu nɔmɔ fɔ go de ɛksplen skripchɔ dɛn to yu studɛnt, bifo dat, aks am mek insɛf ɛksplen sɔm pan dɛn to yu. Ɛp di studɛnt fɔ si aw Gɔd in Wɔd go bɛnifit am. Ask am kwɛstyɔn dɛn we go mek i tɔk wetin i tink ɔ aw i fil bɔt di skripchɔ we i rid. (Lyuk 10:​25-28) Fɔ ɛgzampul, yu kin aks am se: “Aw dis skripchɔ dɔn ɛp yu fɔ si wan pan Jiova in kwaliti dɛn?” “Aw yu go bɛnifit frɔm wetin yu dɔn lan frɔm di Baybul?” “Aw yu fil bɔt wetin yu jɔs dɔn lan?” (Prɔv. 20:​5) Di tin we impɔtant nɔto fɔ mek di studɛnt no bɔku tin, bɔt na fɔ mek i lɛk ɛn du wetin i de lan.

6. Wetin mek i go fayn fɔ mek yu go wit pɔsin we rili sabi tich we yu de go kɔndɔkt yu Baybul stɔdi?

⁶ We yu de go kɔndɔkt Baybul stɔdi, yu kin ɛva go wit pɔblisha dɛn we rili  sabi tich? If yu de du dat, na fɔ aks dɛn wetin dɛn tink bɔt di we aw yu de kɔndɔkt di stɔdi ɛn if yu de yuz di Baybul fɔ tich. Na fɔ put yusɛf dɔŋ if dɛn tɛl yu sɔntin we yu nid fɔ du fɔ mek yu bi gud ticha. (Luk Akt 18:​24-26.) Afta dat, aks di pɔblisha if i tink se di studɛnt de ɔndastand wetin i de lan. If yu nɔ go de fɔ sɔm tɛm, yu kin aks di sem pɔblisha fɔ kɔndɔkt di stɔdi fɔ yu. Dat go mek di stɔdi kɔntinyu, ɛn di studɛnt go no se di stɔdi na impɔtant tin. Nɔ ɛva fil se na “mi” stɔdi so nɔbɔdi nɔ fɔ du am fɔ mi. Yu want mek di studɛnt go bifo ɛn kɔntinyu fɔ lan mɔ bɔt di Baybul.

7. Wetin go mek di studɛnt gladi fɔ wetin i de lan?

⁷ Yu studɛnt nid fɔ si se yu lɛk ɛn biliv wetin yu de tich am frɔm di Baybul. (1 Tɛs. 1:​5) Dat go mek insɛf gladi fɔ wetin i de lan. Sɔntɛm yu kin tɛl am aw di Baybul dɔn ɛp yu. Dat go mek insɛf si se di Baybul gɛt fayn advays dɛn we go ɛp insɛf.

8. Us ɔda tin yu go du fɔ ɛp yu Baybul studɛnt? Wetin mek yu go du dat?

⁸ We una de stɔdi, na fɔ tɛl yu Baybul studɛnt bɔt brɔda ɛn sista dɛn we bin gɛt di sem kayn prɔblɛm dɛn we i gɛt ɛn wetin bin ɛp dɛn. Yu kin briŋ wan pɔblisha frɔm di kɔngrigeshɔn we in ɛgzampul go ɛp yu studɛnt. Ɔ yu kin fɛn fayn ɛkspiriɛns dɛn na jw.org ɔnda di say we se “The Bible Changes Lives.” * Dɛn atikul ɛn fim dɛn de go ɛp yu studɛnt fɔ si se di Baybul go ɛp am fɔ mek chenj dɛn na in layf.

9. Aw yu go ɛnkɔrej yu studɛnt fɔ tɛl in famili ɛn in padi dɛn bɔt wetin i de lan?

⁹ If yu studɛnt mared, in man ɔ in wɛf de stɔdi? If i nɔ de stɔdi, yu kin aks am fɔ jɔyn di stɔdi. Ɛnkɔrej yu studɛnt fɔ tɛl in famili ɛn in padi dɛn bɔt wetin i de lan. (Jɔn 1:​40-45) Aw yu go du dat? Yu kin aks am se: “Aw yu go ɛksplen dis to yu famili?” ɔ “Us skripchɔ yu go yuz fɔ pruv to yu padi se dis na tru?” If yu du dat, yu go de tren yu studɛnt fɔ bi ticha. Dɔn we i kwalifay, i go bigin prich wit di kɔngrigeshɔn ɛn  bi ɔnbaptayz pɔblisha. Yu kin aks di studɛnt if i sabi ɔda pɔsin we go lɛk fɔ stɔdi di Baybul. If i sabi pɔsin, na fɔ kɔl am ɔ go na in os ɛn aks am if i go lɛk fɔ stɔdi di Baybul wit yu. Sho am di fim we nem Wetin Kin Apin pan Ɛni Baybul Stɔdi? *

10. Akɔdin to 1 Tɛsalonians 2:​7, 8, aw Baybul ticha go falamakata Pɔl in ɛgzampul?

¹⁰ Ticha dɛn fɔ bisin bɔt dɛn studɛnt dɛn. Dɛn fɔ si dɛn as pipul dɛn we go bi dɛn brɔda ɛn sista dɛn na di kɔngrigeshɔn. (Rid 1 Tɛsalonians 2:​7, 8.) I nɔ izi fɔ mek dɛn lɛf dɛn padi dɛn we dɛn bin gɛt ɛn mek chenj dɛn fɔ sav Jiova. Wi nid fɔ ɛp dɛn fɔ fɛn tru tru padi dɛn na di kɔngrigeshɔn. Bi yu Baybul studɛnt in padi bay we yu de spɛn tɛm wit am ɛn nɔ jɔs go to am di tɛm we una gɛt fɔ stɔdi. We yu kɔl am, sɛn mɛsej to am, ɔ go fɛn am ivin di tɛm dɛn we una nɔ gɛt fɔ stɔdi, dat de sho se yu rili bisin bɔt am.

11. Wetin wi want mek wi studɛnt dɛn gɛt insay di kɔngrigeshɔn? Wetin mek?

¹¹ Wan parebul se: “Na wan pɔsin de bɔn bɔt nɔto wan pɔsin de mɛn.” So wi go se: “Na wan ol kɔngrigeshɔn go ɛp fɔ mek pɔsin bi disaypul.” Na dat mek gud Baybul ticha de sho in studɛnt to ɔda brɔda ɛn sista dɛn we go ɛp am fɔ go nia Jiova mɔ ɛn mɔ. Dɛn brɔda ɛn sista dɛn de go ɛp di studɛnt fɔ gɛt tayt padi biznɛs wit Jiova ɛn dɛn go ɛnkɔrej am we i gɛt prɔblɛm. Wi want ɔl wi Baybul studɛnt dɛn fɔ gɛt tayt padi biznɛs wit wi brɔda ɛn sista dɛn. Dat go mek i izi fɔ mek i lɛf fɔ kip kɔmpin wit pipul dɛn we nɔ de ɛp am fɔ lɛk Jiova. (Prɔv. 13:​20) Da tɛm de, if di wan dɛn we i bin de kip kɔmpin wit avɔyd am, i no se i go gɛt tru tru padi dɛn insay Jiova in ɔganayzeshɔn.—Mak 10:​29, 30; 1 Pit. 4:​4.

12. Wetin mek wi fɔ tɔk to wi studɛnt bɔt fɔ gi in layf to Jiova ɛn baptayz?

¹² Yu fɔ go de tɔk to yu studɛnt bɔt wetin mek i impɔtant fɔ mek pɔsin gi in layf to Jiova ɛn baptayz. Di rizin we  mek wi de stɔdi wit pɔsin na fɔ ɛp am fɔ sav Jiova ɛn baptayz. Afta sɔm mɔnt we di studɛnt dɔn de stɔdi fast fast ɛn mɔ we i dɔn bigin atɛnd mitin, i nid fɔ ɔndastand se di rizin we mek i de stɔdi di Baybul na fɔ ɛp am fɔ bi Jiova Witnɛs.

13. Wetin Baybul studɛnt fɔ du fɔ mek i baptayz?

¹³ Di Baybul studɛnt nid fɔ du difrɛn tin dɛn fɔ mek i go baptayz. Fɔs, di studɛnt fɔ no Jiova, lɛk Am, ɛn put fet pan Am. (Jɔn 3:​16; 17:​3) Dɔn di studɛnt go bi padi to Jiova ɛn di brɔda ɛn sista dɛn na di kɔngrigeshɔn. (Ibru. 10:​24, 25; Jems 4:​8) As tɛm de go, di studɛnt go fil sɔri bɔt di bad tin dɛn we i bin de du ɛn i go lɛf fɔ du dɛn. (Akt 3:​19) I go tɛl ɔda pipul dɛn bɔt di tru tin dɛn we i de lan. (2 Kɔr. 4:​13) Dɔn i go gi in layf to Jiova ɛn sho ɔlman se i dɔn du dat bay we i baptayz. (1 Pit. 3:​21; 4:​2) Ɔlman kin gladi da de de! We di studɛnt de du tin dɛn we i fɔ du fɔ mek i baptayz, na fɔ go de tɛl am tɛnki ɛn ɛnkɔrej am fɔ kɔntinyu fɔ go bifo.

14. Aw di ticha go no if di Baybul studɛnt de go bifo?

¹⁴ Wi nid fɔ peshɛnt we wi de ɛp wi Baybul studɛnt fɔ kwalifay fɔ baptayz. Bɔt wi nid fɔ no bak if i want fɔ sav Jiova Gɔd. Di studɛnt de sho se i de tray fɔ obe Jizɔs in kɔmand dɛn? Ɔ i jɔs want fɔ lan bɔt tin dɛn frɔm di Baybul?

15. Aw di Baybul ticha go no se di studɛnt de rɛdi fɔ baptayz?

¹⁵ Go de chɛk aw di studɛnt de du. Fɔ ɛgzampul, i de tɔk bɔt aw i de fil bɔt Jiova? I kin pre to Jiova? (Sam 116:​1, 2) I kin ɛnjɔy fɔ rid di Baybul? (Sam 119:​97) I kin atɛnd di mitin dɛn ɔltɛm? (Sam 22:​22) I de mek chenj dɛn na in layf fɔ sho se i de du wetin i de lan? (Sam 119:​112) I dɔn bigin tɛl in famili ɛn in padi dɛn bɔt wetin i de lan? (Sam 9:​1) Ɛn di tin we impɔtant pas ɔl, i want fɔ bi Jiova Witnɛs? (Sam 40:​8) If di studɛnt nɔ de du ɛni wan pan dɛn tin  dɛn ya, na fɔ tray fɔ no wetin mek ɛn nɔ shem fɔ tek tɛm tɔk to am bɔt dat. *

16. Ustɛm wi fɔ stɔp fɔ stɔdi wit pɔsin?

¹⁶ As tɛm de go, na fɔ go de aks yusɛf if yu fɔ kɔntinyu fɔ stɔdi wit pɔsin. Aks yusɛf dɛn kwɛstyɔn dɛn ya: ‘Di studɛnt nɔ kin pripia fɔ di stɔdi? I nɔ want fɔ atɛnd mitin? I stil gɛt bad abit dɛn? I stil de na lay lay rilijɔn?’ If di ansa to dɛn kwɛstyɔn dɛn ya na yɛs, ɛn yu kɔntinyu fɔ stɔdi wit di pɔsin, i go tan lɛk yu de tray fɔ tich pɔsin fɔ swim bɔt di pɔsin nɔ want fɔ sok. If di studɛnt nɔ rili lɛk wetin i de lan ɛn i nɔ want fɔ mek chenj dɛn na in layf, yu tink se yu fɔ kɔntinyu fɔ stɔdi wit am?

17. Akɔdin to 1 Timoti 4:​16, wetin ɔl Baybul ticha dɛn fɔ du?

¹⁷ Wi wok fɔ mek pipul dɛn bi disaypul na sɔntin we rili impɔtant to wi ɛn wi want fɔ ɛp wi Baybul studɛnt dɛn fɔ baptayz. Na dat mek wi go yuz di Baybul fɔ tich ɛn wi go sho se wi lɛk ɛn biliv wetin wi de tich. Wi go ɛnkɔrej di studɛnt fɔ mek padi dɛn na di kɔngrigeshɔn. Wi go de tɔk to di studɛnt bɔt fɔ gi in layf to Jiova ɛn baptayz, ɛn wi go de chɛk aw i de du. (Luk di bɔks we de na pej 13 we de sho  wetin ticha dɛn fɔ du) Wi gladi fɔ tek pat pan dis wok we de sev layf. Lɛ wi mekɔp wi maynd fɔ du ɔl wetin wi ebul fɔ ɛp wi Baybul studɛnt dɛn fɔ kwalifay fɔ baptayz.