1. Vɛɛ naŋ looku yɛ sina maa wali piŋiaa la yoomoo wali dimiaa yooŋgu kɛndɔɔ cho ni?

WALI piŋi yoomula waŋchieeya wo wali dimiaa yooŋgu kɛndɔɔ cho ni. Vɛɛ naŋ looku yɛ hei sina? Mɛɛ Chiisu wa buɛiyaa nduaa dimullo le ma tosa nyɛ cho o Maatiu 28:​19, 20 niŋndo, mbo dimi aa, “La kɔ o ŋwaŋnda chiee lo . . . mi la siiŋguu nda buɛiyaa ni . . . mi la yiŋ nda.” Le yɛɛ yiŋɔɔ cho yɛ nyɛ sɔvɛ bɛndu? Kanifuule, mɛɛ miŋ sɔla yiŋɔɔ malaŋ naŋ sɔla pioŋɔɔ. Lelaŋ, wana yeema yiŋɔɔ wo nɔ mbo sina maa o Chiisu niŋ naŋ sɔla pioŋɔɔ ni. O nɔ mbo laalaŋ maa sala baŋaa Chiisu wo a fulasɛiniŋ ndɔɔ cho hunɔɔ tosa ni mbo sɔla yoomu fafɛɛŋndo. Le saboo hoo Pitɛ wana Chiisu vem hɔlte ndɔ wo dimul chaaŋaa nduaa Kilisiɔŋnda ni aa, “Yiŋɔɔ kumbul nya nɛiyo le pioŋɔɔ sɔlaa . . . sanaa a miiŋgu Chiisu Kiliti miiŋgu yoomu wo.” (1 Pitɛ 3:​21) Lelaŋ te wana cho Baabuiyo pɛɛkoo wo sɔla pɛ yiŋɔɔ, mɛɛ ndu bɛɛ nɔla mbo nɔ tiindaŋndo le pioŋɔɔ sɔlaa.

2. Te o hiŋ pɛ a waŋnda Baabuiyo pɛɛkoo okɔɔ, sila yɛɛ Timoti Diiŋ Ndɔɔ 4:​1, 2 ke yɛ naa?

² Mɛɛ miŋ kindiŋ le sinaa mɛɛ wana pɛɛku waŋnda Baabuiyo yɛ, malaŋ naŋ siiŋguu nda buɛiyaa Chiisuaa. (Nuawɔ Timoti Diiŋ Ndɔɔ 4:​1, 2.) Le yɛɛ? Kanifuule, mi Chiisu dimul naa aa, “La kɔ o ŋwaŋnda chiee lo . . . mi la siiŋguu nda buɛiyaa ni . . . mi la pɛɛku nda.” Mi Pɔɔl wana Chiisu vem hɔlte ndɔ wo bɛɛ dimi maa naŋ nɔ “miŋ hiou lachi” a wallo hoo tosaa. Mbo dimi maa te ŋ tosa lende pɛ, ‘mɛɛ ŋ cho naapila piŋi a wanaa cho naa nilaŋ yaŋɔɔ wa.’ Le saboo hoo o dimi vɛlɛ pɛŋ ni aa: “Mandaŋ a nyɛ ŋ cho waŋnda pɛɛkoo wo.” (1 Timo. 4:​16) Te o wa pɛ aa mɛɛ miŋ pɛɛku waŋnda malaŋ nda simnuŋ buɛiyaa Chiisuaa, mɛɛ ŋ nɔ miŋ kindiŋ le nda pɛɛkoo nyɛkɛndɛi.

3. Yɛɛ naŋ cho yɛ yaasiaa a waŋnda pɛɛkoo Baabuiyo okɔɔ o buŋgɛi hei niŋ?

 ³ Chieeŋndo balɔɔ silɔ, ŋ cho hau waŋnda o miiliɔŋndaŋ niŋ pɛɛkoo tonya cho o Baabuiyo niŋndo. Kɛ a mɛɛ naŋ pɛɛku o buŋgɛi naŋ hiou ve niŋ yɛ, ŋ nɔ miŋ kindiŋ le waŋnda haa malaa ma yiŋ nduyɛ ma simnuŋ buɛiyaa Chiisuaa. Lelaŋ o buŋgɛi hei niŋ, ŋ cho chɔɔlu yaasiaa sɔɔŋ ŋuɛɛnu ŋ wana pɛɛkaa kɛ kɛ nɔ mbo tosa le wana o cho pɛɛkoo wo malaa mbo suliŋ le yiŋɔɔ wo.

4. Le yɛɛ wana pɛɛkaa nɔ yɛ mbo dɔu ndupila o mandaa bɛŋgu te o wa pɛ waŋndo Baabuiyo pɛɛkoo? (Tofa tɛɛsiaa amatou.)

⁴ Ŋ kaala bɔɔ nyɛ naŋ pɛɛku waŋnda o Diom Mɛlɛkaa niŋndo. Lelaŋ, lepum miŋ kuɛ le hiouwɔɔ ba a suɛi te ŋ wa nda pɛ pɛɛkoo. Kɛ o kpeekpei niŋ, te ŋ wa pɛ pɛɛku Bandu Mɛŋgɛlaa tosaa, pɛɛku Baabui kundaa, ɔɔ waŋndo Baabuiyo pɛɛkoo, ŋ nɔ miŋ soo tau le. Ŋ nɔ miŋ chɛl mi Baabuiyo soo le naa. Kɛ le mi hei yɔŋnuŋ, wana cho chilaŋ chuaa o pɛɛkoo niŋndo nɔ mbo dɔu ndupila o mandaa bɛŋgu. O nɔ mbo kindiŋ le nyɛ o nyɛ tɛɛsiaa o bolle Baabuileŋ niŋ ɔɔ o pɛllo niŋ te. * (Chɔŋ 16:​12) Yiyaŋndɔ a mɛɛ kpɛ num oo sina Baabuiyo a teleŋ ŋ sɔla yiŋɔɔ wo yɛ. Te a tuu pɛ kɔl kalu Baabui num oo nɔ o teleŋ koŋ niŋndo a o ŋ nɔ suŋ suŋndo, o kuɛɛ hiou yɛ? Naapum o teleŋ koŋ niŋ, sɔɔŋ tasoŋ ko num oo sina o Baabuiyo niŋ ni. (Hibu. 6:​1) O cho o wɔsila biŋgi bɛŋgu le ŋ sɔla kɔl kalu Baabui ŋ nɔ suŋ suŋndo le. Lelaŋ, kindiŋ le wana kandu Baabuiyo pɛɛkoo sɛnɛiyo sɔɔŋ ŋ sina woŋ chɔmndo o lepilɛ niŋ te.

5. (a) A mɛɛ Tɛsaloniaŋ Tasoo 2:​13 dimi yɛ, yɛɛ naŋ nɔ yɛ miŋ mala wana naŋ cho Baabuiyo pɛɛkoo wo mbo sina a nyɛ o cho pɛɛkoo wo okɔɔ? (b) Vɛɛ naŋ mala yɛ ndu le mbo dimul waŋnda a nyɛ o cho pɛɛkoo wo okɔɔ?

⁵ Ŋ nɔ miŋ mala wana naŋ cho pɛɛkoo wo le mbo sina maa o Baabuiyo niŋ nyɛ naŋ cho ndu pɛɛkoo wo fula ni. (Nuawɔ Tɛsaloniaŋ Tasoo 2:​13.) Vɛɛ naŋ tosa yɛ hei? Dɛɛniaa wana ŋ cho pɛɛkoo wo le mbo wa waŋnda dimullo a nyɛ o cho pɛɛkoo wo okɔɔ. Wa ndu bolii Baabuiye tɛɛsiallo teleŋ o teleŋ te. Kɛ, wa ndu nyunaa le mbo tɛɛsial num mɛɛ o bii ndi bila yɛ. Mala ndu mbo che mɛɛ Diom Mɛlɛkaa piiliaŋ yoomu ndɔɔ yɛ. Soliŋ nyunalaŋ kpeku nyɛkɛndɛi le mbo wa fɛɛsɛŋ le suɛi ɔɔ le num malaa ma sina yiyaŋ ndɔɔ a nyɛ o cho pɛɛkoo wo okɔɔ. (Luku 10:​25-28) Le taamaseliiyo, a nyuna ndu aa, “Yɛɛ cho yɛ suliŋ Chɛhowaa o bolle Baabuileŋ ndeŋ niŋ?” “Vɛɛ nyɛ ŋ pɛɛku hoo o Baabuiyo niŋndo mala yɛ num?” “Vɛɛ ŋ yiyaŋ yɛ a ndu okɔɔ?” (Pulɔ. 20:​5) O cho mɛɛ kpɛ wana ŋ cho Baabuiyo pɛɛkoo wo sina sɔɔŋ yɛ le cho suɛi sɔvɛ le. Kɛ kaala o nɔ le nyɛ o cho pɛɛkoo wo a mɛɛ kpɛ o cho ndu dɔwɔɔ o wali niŋ yɛ cho suɛi ni.

6. Te a wa pɛ kɔlaŋ waŋndo Baabuiyo pɛɛkoo, le yɛɛ o bɛnda yɛ ma dimul wana chaa pɛɛkoo wo le mbo liila num?

⁶ Te a wa pɛ kɔlaŋ waŋndo Baabuiyo pɛɛkoo,  baa ma dimul pa puaapiliaa a ndepiliaa chaa pɛɛkoo wa le ma liila num? Te a kuɛ pɛ nya opilɛ mi pɛɛkoo chuu, nyuna ndu le mbo chɔm num naa ŋ nɔ le hiouwɔɔ lachioo tosaa wa. Le taamaseliiyo, a nyuna ndu te mi num aa soliŋ Baabuiyo kpeku nyɛkɛndɛi. A nɔ ma wa wana tusiaŋ te a yeema pɛ ma simnuŋ wana chaa pɛɛkoo nyɛkɛndɛiyo. (Tuuwɔ Walta. 18:​24-26) A nyuna vɛlɛ puaapilɛnɔɔ ɔɔ ndepilɛnɔ nya kuɛ koŋ ndo te wana ŋ cho pɛɛkoo wo cho pɛ biyɔɔ nyɛ o cho pɛɛkoo wo bila. Nduyɛ te a wa pɛ kɔlaŋ inɛ le teleŋ vilɛi, a dimul ndu le mbo koma wa wana koŋ pɛɛkoo haaa ma miiŋgu. Keŋ tosa mi pɛɛkoo hiou lachi nduyɛ mi wana ŋ cho pɛɛkoo wo bɛɛ sina maa pɛɛku ndɔɔ cho nyɛ sɔvɛ. Fɛŋ bɛɛ yiyaŋ naa maa “numpilɛ” le nɔ wana ŋ cho pɛɛkoo wo le. Nduyɛ maa, wana cheleŋ nɔ mbo pɛɛku ndu le le. Numpila bɛɛ sina maa le mbo keleŋa hiouwɔɔ lachioo tosa o tonyaa niŋ, mɛɛ mi pɛɛku ndɔɔ wa tosaŋndo lɔɔ o lɔɔ.

7. Yɛɛ tosa yɛ mi wana ŋ cho Baabuiyo pɛɛkoo wo hɛnaŋ a nyɛ o cho pɛɛkoo wo?

⁷ A nɔ ma wa wuye wuye te a wa pɛ waŋndo Baabuiyo pɛɛkoo nduyɛ ma chɔm maa a laalaŋ nyɛ ŋ cho ndu pɛɛkoo wo. (1 Tɛsa. 1:​5) Keŋ tosa ni mbo yusa kɔl nduyɛ mbo hɛnaŋ a nyɛ o cho pɛɛkoo wo. Te o bɛnda pɛ, tɛɛsial ndu mɛɛ sawala mandaala Baabuiyo la cho num malaa yɛ. Okoŋ, ndu bɛɛ cho sina maa Baabuiyo nɔla mbo mala ndu le bahawɛilaŋ solioo o yoomu ndɔɔ niŋ.

8. Yɛɛ ŋ nɔ yɛ vɛlɛ ma tosa le wana ŋ cho Baabuiyo pɛɛkoo wo malaa nduyɛ, le yɛɛ keŋ cho yɛ i sɔvɛ?

⁸ Naapum wana ŋ cho Baabuiyo pɛɛkoo wo nɔ simultaŋ tau o yoomoo niŋ. Puaapiliaa a ndepiliaa apum bɛɛ ndaa nɔ simultaŋ maa ndu kɛ ma tiuba le laŋ yomɔɔ. Lelaŋ te la wa pɛɛkoo pɛ, dimul ndu a taamasi ndaa okɔɔ. Te a sina pɛ maa taamasi wana cho o kundaa niŋndo nɔla mbo mala wana ŋ cho pɛɛkoo wo, dimul ndu mbo liila num le ndu pɛɛkoo. Te koŋ te, a nuuviaa sɔɔŋ yɔŋnaŋ dɛɛniaa ndu kɔllo woŋ o Jw.org o suɛi lebolle hei bɛŋgu, “Baabuiyo Siŋga Yoomulaŋ.” * Sɔɔŋ yɔŋnaŋndoŋ muŋ a vidueila cho loŋ ndaŋ la tosa mbo sina maa sawala mandaala Baabuiyo la nɔla mi la mala ndu mbo tosa hiouwɔɔ lachioo o yoomu ndɔɔ niŋ.

9. Vɛɛ ŋ mala yɛ wana ŋ cho Baabuiyo pɛɛkoo wo le mi ndu bɛɛ kandu wanayaŋ ndɔŋ a chaaŋaa nduaa dimullo nyɛ o cho pɛɛkoo wo?

⁹ Te o yɔŋ pɛ aa wana ŋ cho Baabuiyo pɛɛkoo wo nɔ pɔnɔɔ ɔɔ lanɔɔ, baa wana nda cho o nɔɔ niŋndo bɛɛ cho pɛɛkoo? Te o kendu wɔ pɛɛku le, mɛɛ dimul ndu le mbo sɔɔŋguu nya ikɛi te la wa pɛɛkoo pɛ. Dɛɛniaa wana ŋ cho pɛɛkoo wo le  mbo dimul wanayaŋ ndɔŋ a chaaŋaa nduaa nyɛ o cho pɛɛkoo wo. (Chɔŋ 1:​40-45) Vɛɛ ŋ mala yɛ ndu mbo tosa hei? Naapum a nyuna ndu aa, vɛɛ ŋ tɛɛsial lɛ yuŋgu numndo tonya ŋ pɛɛku hoo wo? Ɔɔ, bolle Baabuile kuɛɛ ŋ soliŋ yɛ kpeku le chaaŋ num malaa mbo bii hei bila? Te a pɛɛku pɛ waŋndo Baabuiyo o nɛiyo hoo choo, mɛɛ malaa ŋ cho ndu koŋ ni le mi ndu bɛɛ simnuŋ wana pɛɛkaa. Okoŋ, te o tosa pɛ hiouwɔɔ lachioo nduyɛ mbo suliŋ, o nɔla mbo simnuŋ wana dimiaa yooŋgu kɛndɛ yiŋ ndɔ le wo nduyɛ mbo kandu fulaa a kundaa latulu. A nyuna vɛlɛ wana nya cho pɛɛkoo wo te o sina pɛ wana cheleŋ nɔ yeemɛi le Baabuiyo pɛɛkoo wo. Te o chɔm num pɛ wana koŋ, kindiŋ ma che ndu nduyɛ ma keleŋa kɛɛsiaa tosa le ndu pɛɛkoo. Chɔm ndu vidueiyo hoo, Vɛɛ Naŋ Pɛɛku yɛ Baabuiyo a Waŋnda? *

10. A mɛɛ Tɛsaloniaŋ Tasoo 2:​7, 8 chɔm yɛ, vɛɛ naŋ cho waŋnda Baabuiyo pɛɛkoo wa tual lɛ taamasi Pɔɔllo kɔɔli?

¹⁰ Ŋ nɔ miŋ chɔm yeemɛi kpeekpeiye o wanaa naŋ cho Baabuiyo pɛɛkoo wa niŋ nduyɛ miŋ che nda maa puaapiliaa a ndepiliaa naa nda cho hunɔɔ wa ni. (Nuawɔ Tɛsaloniaŋ Tasoo 2:​7, 8.) Ŋ nɔ miŋ kɛsiŋ o kɔl maa o cho suɛi bɛɛŋ le ma mal chaŋyaŋ nda nɔ o chieeŋndo niŋndoŋ te. Nduyɛ, o ve vɛlɛ suɛi bɛɛŋ le ma tosa siŋgaŋnda yeemaŋ nda o ba le Chɛhowa piɛiyo laŋ te. Lelaŋ, mɛɛ miŋ mala nda le chaŋyaŋ sɔviɔŋ nuuviaa o kundaa niŋ. Numpila fɛŋ nɔ ma kindiŋ le chaŋyɛi kpɛɛluŋnde nɔɔ a wana ŋ cho pɛɛkoo wo. O cho ko o paale nya pɛɛku leŋ choo le ŋ nɔ ma wa kɔlaŋ o ndu lo le. Kɛ, a nɔ ma wa ndu kɔlaŋ yilɔɔ o palɛi cheleŋ choo. A veelu ndu vɛlɛ o foŋndo choo ɔɔ ma yɔŋ ndu yooŋgoo. Te a wa pɛ muŋ ndoo tosaa, o cho sina kɛsɛ maa a buulaŋ a ndu.

11. Yɛɛ naŋ nɔ yɛ miŋ mala wanaa naŋ cho pɛɛkoo wa ma sɔla o kundaa niŋ, nduyɛ le yɛɛ?

¹¹ Kisiaa dimi taloo aa: “Wana pilɛ vilu chua le.” Naa bɛɛ nɔla miŋ dimi aa: “Wana pilɛ nɔla mbo siiŋguu waŋndo buɛi Chiisoo le.” Le hei, mi puaapiliaa a ndepiliaa chaa pɛɛkoo wa mala wanaa nda cho pɛɛkoo wa le ma holnuŋ wanaa nɔ taamasi kɛndɔɔ o kundaa niŋnda. Mi wanaa ndaa pɛɛkaa haa tuei chaŋyɛi kɛndɛi yeela a puaapiliaa a ndepiliaa. Nduyɛ, mi keŋ mala nda le ma sɔɔŋguu Chɛhowa ikɛi kpɛɛluŋ. Ŋ nɔ miŋ tosa a sabu mi wanaa naŋ cho Baabuiyo pɛɛkoo wa sinaŋ nyɛkɛndɛi o kundaa niŋ nduyɛ maa a cho wanaa sɔvɛ o yuŋgu Chɛhowaa niŋ. Ŋ nɔ miŋ mala nda ma tuei kaala cho naa tɛɛŋ o kunda leKilisiɔŋndo niŋndo yeela nduyɛ ma holnuŋ puaapiliaa a ndepiliaa. Okoŋ, i cho wa tɛtɛlɛ le ma keluŋ chaŋyaŋ kuuna nda Chɛhowa piɛiyo woŋ kɔɔli. (Pulɔ. 13:​20) O yɔŋ bɛɛ mi wanaa wa paandu chaaŋaa ndaa o chieeŋndo niŋnda kɛɛ nda, a buulaŋ te. Kanifuule, a sina maa a nɔ chaŋyaŋ sɔviɔŋ o kɔɔna Chɛhowa niŋ.—Maki 10:​29, 30; 1 Pitɛ 4:​4.

12. Le yɛɛ naŋ nɔ yɛ miŋ wa wana naŋ cho pɛɛkoo wo dimullo maa Kilisiɔŋnda nɔ ma yɔŋguŋ o Mɛlɛka lo nduyɛ ma sɔla yiŋɔɔ?

¹² Te la wa pɛɛkoo pɛ, o bɛnda ma wa wana ŋ cho pɛɛkoo wo dimullo maa i cho bɔɔ suɛi sɔvɛ le mi Kilisiɔŋnɔɔ yɔŋguŋ o Chɛhowa lo nduyɛ mbo sɔla yiŋɔɔ. Kpeleŋ naa pɛŋ cho koŋ ni le waŋnda Baabuiyo pɛɛkoo. Lelaŋ te ŋ pɛɛku pɛ waŋndo Baabuiyo le paŋguŋ tiŋ nduyɛ mbo kandu hunɔɔ o bɔŋaŋndaŋ, ŋ nɔ miŋ tosa mbo sina maa ŋ yeema ndu malaa mbo simnuŋ Sei Chɛhowaa.

13. Yɛɛ wana ŋ cho Baabuiyo pɛɛkoo wo nɔ yɛ mbo tosa le mbo suliŋ le yiŋɔɔ?

¹³ Tuupa mi wana cho Baabuiyo pɛɛkoo wo suliŋ le yiŋɔɔ, o nɔ fɛŋ mbo komal kpeleŋ ndaŋ lapum. O tasoo, o nɔ mbo sina Chɛhowa, mbo kaala ndu nduyɛ mbo dɔu tiindaŋndo o ndu niŋ. (Chɔŋ 3:​16; 17:​3) Te keŋ faŋaŋ pɛ, o kindiŋ niko le chaŋyɛi kpɛɛluŋnde nɔɔ a Chɛhowa vɛlɛ a puaapiliaa a ndepiliaa cho o kundaa niŋnda. (Hibu. 10:​24, 25; Chemi. 4:​8) O hei niŋ, o nɔ mbo kel suei le sɔɔŋ wɔɔŋ o wa paandu tosaa woŋ nduyɛ mbo pɛŋgi muŋ tosaa. (Walta. 3:​19) Siŋgaŋnda o cho wa laŋ tosaa laŋ a tiindaŋ ndɔɔ cho ndu nyindɔɔ mbo kandu waŋnda dimullo a nyɛ o cho pɛɛkoo wo okɔɔ. (2 Kɔliŋ. 4:​13) Okoŋ, mbo yɔŋgu yoomu ndɔɔ o Chɛhowa lo nduyɛ mbo sɔla niko yiŋɔɔ yɔɔfɛɛ. (1 Pitɛ 3:​21; 4:​2) O paale ndɔle yiŋaa leŋ choo, mi wana o wana dɔunuŋ nyaale tau. Te wana ŋ cho pɛɛkoo wo wa pɛ komallo kpeleŋnda cho le yiŋɔɔ laŋ, wa ndu chandɔɔ. Dɛɛniaa ndu le mbo hiou lachi a kindi kindiŋndo o nɛi koŋ choo.

14. Vɛɛ naŋ looku yɛ sina te wana naŋ cho Baabuiyo pɛɛkoo wo cho pɛ hiouwɔɔ lachioo tosaa?

¹⁴ Biuwɔŋndo yeemaŋ naa o ba tau te ŋ wa pɛ wana naŋ cho Baabuiyo pɛɛkoo wo malaa le mbo yɔŋguŋ o Chɛhowa lo nduyɛ mbo suliŋ le yiŋɔɔ. Kɛ o wa bɛɛ lende, ŋ nɔ miŋ kindiŋ le sinaa te o nɔ pɛ yeemɛi le Chɛhowa Mɛlɛka piɛiyo. Baa a cho ndu pa chɔɔ kindiŋndo le sawala Chiisulaŋ diikɔŋndo? Ɔɔ, pɛɛkoo koni o yeema ni le Baabuiyo sinaa?

15. Vɛɛ ŋ looku yɛ sina maa wana ŋ cho Baabuiyo pɛɛkoo wo cho kindiŋndo le yiŋɔɔ sɔlaa?

¹⁵ O bɛnda ma wa wana ŋ cho pɛɛkoo wo mɛɛndaŋndo le sinaa mɛɛ kpɛ o cho hiouwɔɔ lachioo tosaa yɛ. Le taamaseliiyo, baa mbo chɔm pa balika melaa le Chɛhowa o balta ndɔlaŋ niŋ? Baa mbo piɛi pa o ndu lo? (Sam 116:​1, 2) O hɛnaŋ pa a diomndaŋ veeloo o Baabuiyo niŋ? (Sam 119:​97) O cho pa kɔlaŋ o bɔŋaŋndaŋ lɔɔ o lɔɔ? (Sam 22:​22) O kandu niŋ pa siŋgaŋndaŋ lapum tosaa o yoomu ndɔɔ niŋ? (Sam 119:​112) Baa  o kandu niŋ pa wanayaŋ ndɔŋ a chaaŋaa nduaa dimullo nyɛ o cho pɛɛkoo wo? (Sam 9:​1) Kɛ i hiou kpou ve, baa o yeema pa kpeekpei mbo simnuŋ Sei Chɛhowaa? (Sam 40:​8) Te o yɔŋ pɛ aa wana ŋ cho pɛɛkoo wo cho hiouwɔɔ lachi tosa o sɔɔŋ muŋ ŋ kɛ kɛ niŋ te, mɛɛ soliŋ taasi numndo kpeku le sinaa nyɛ cho ndu kuunaa wo. Kindiŋ mi la suukaŋ bɛɛŋ bɛɛŋ o hei choo kɛ viŋ ndu tonyaa le. *

16. Teleŋ kuɛɛ o bɛnda yɛ ma yiyaŋ le pɛɛkoo kiolɔɔ a waŋndo?

¹⁶ Teleŋndaŋ lapum, a nɔ ma nyunaŋ te o bɛnda pɛ ma hiou lachi a pɛɛku waŋndo tosaa. Nyunaŋndɔ aa, ‘Baa wana ya cho hoo pɛɛkoo wo bɛɛndiaŋ pa le pɛɛku ndɔɔ? Baa o nɔ i yeema le lakɔ o la bɔŋaŋ te? O cho wɔ pa kaala wɔɔŋndaŋ tosaa? O cho wɔ pa kɔlaŋ o kaŋnde ndɔleŋ?’ Te o yɔŋ pɛ aa sɔɔŋ muŋ kpou cho tonya a ndu okɔɔ, mɛɛ o bɛnda ma kɛɛsiaa te a nɔ pɛ ma hiou lachi a ndu pɛɛkoo. Kanifuule, pɛɛku waa lende wa ko maa kindiŋndo le wana yeema delɔɔ o peeloo le wo saanaa chɔmndo. Te wana ŋ cho pɛɛkoo wo chue nyɛ o cho pɛɛkoo wo o sɔvɛ le, nduyɛ mbo kɛɛ vɛlɛ le siŋgaŋndaŋ tosaa, mɛɛ ɔɔ le sabu ŋ cho hiouwɔ lachi a ndu pɛɛkoo wo?

17. A mɛɛ Timoti Tasoo 4:​16 dimi yɛ, yɛɛ naŋ cho waŋnda Baabuiyo pɛɛkoo wa kpou nɔ yɛ miŋ tosa?

¹⁷ O cho bɔɔ i sɔvɛ le miŋ tosa wali naŋ nɔ le waŋnda siiŋgoo buɛiyaa Chiisuaa wo. Nduyɛ, ŋ yeema miŋ mala wanaa naŋ cho Baabuiyo pɛɛkoo wa le ma suliŋ le yiŋɔɔ. Le hei te ŋ wa nda pɛɛkoo pɛ, ŋ nɔ miŋ soliŋ Baabuiyo kpeku. Ŋ nɔ vɛlɛ miŋ wa wuye wuye nduyɛ miŋ chɔm maa ŋ laalaŋ nyɛ naŋ cho nda pɛɛkoo wo. Ŋ nɔ miŋ dɛɛniaa nda le ma nuuviaa chaŋyaŋ o kundaa niŋ. Ŋ wa nda dimullo lɔɔlɔɔ maa a nɔ ma yɔŋguŋ o Chɛhowa lo nduyɛ ma sɔla yiŋɔɔ. O bɛnda vɛlɛ miŋ wa mɛɛndaŋndo te a cho pɛ hiouwɔɔ lachioo tosaa. (Tofa kɔfoo hoo o peele 13 choo, “ Mɛɛ Naŋ Mala Wanaa Naŋ Cho Pɛɛkoo Wa Ma Suliŋ le Yiŋɔɔ Yɛ.”) Ŋ cho bɔɔ a kɔl kɛndɛ le mɛɛ naa bɛɛ cho wali piŋiaa la yoomoo hoo tosaa yɛ. Maa i wa kɛɛsiaa naa le kindiŋndo o nɛi o nɛi niŋ le wanaa naŋ cho Baabuiyo pɛɛkoo wa malaa ma sɔla yiŋɔɔ.