တၢ်မၤလိ ၄၂
ဒ်သိး ပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ ကဒိးဘျၢထံအဂီၢ် နမၤစၢၤအီၤကသ့ဒ်လဲၣ်—အကူာ် ၂
“ပလီၢ်နသးလၢနကစၢ်ဒၣ်နဲအဂ့ၢ်, ဒီးလၢတၢ်သိၣ်တၢ်သီအဂ့ၢ်တက့ၢ်.”—၁ တံၤမသ့း ၄:၁၆.
တၢ်သးဝံၣ် ၇၇ တၢ်ကပီၤလၢ ဟီၣ်ခိၣ်တၢ်ခံးကျါ
တၢ်မၤလိအံၤ အတၢ်တိာ်ပာ် *
၁. တၢ်လဲၤဒုးကဲထီၣ် ပှၤဂၤလၢခရံာ်အပျဲၢ်အဘီၣ်တၢ်မၤ မ့ၢ်ဝဲတၢ်မၤပူၤဖျဲး ပှၤသးသမူန့ၣ် ပသ့ၣ်ညါဘၣ်ဒ်လဲၣ်.
တၢ်လဲၤဒုးကဲထီၣ် ပှၤဂၤလၢခရံာ်အပျဲၢ်အဘီၣ် တၢ်မၤန့ၣ် မ့ၢ်ဝဲတၢ်မၤပူၤဖျဲး ပှၤသးသမူလီၤ. ပသ့ၣ်ညါဘၣ်လၢ ကျဲဒ်လဲၣ်. ဖဲ မးသဲ ၂၈:၁၉, ၂၀ န့ၣ်ယ့ၣ်ၡူး မၤလိာ်ဝဲလၢ “လဲၤဒုးကဲထီၣ်ပှၤ . . . လၢယပျဲၢ်ယဘီၣ် . . . ဒီးဘျၢအီၤ” တက့ၢ်. ပကဘၣ်သ့ၣ်ညါလၢ တၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်ထဲလဲၣ်. ပမ့ၢ်အဲၣ်ဒိး ဒိးန့ၢ်ဘၣ် တၢ်အုၣ်က့ၤခီၣ်က့ၤန့ၣ် ပကဘၣ်ဒိးဘျၢထံလီၤ. ပှၤလၢအဲၣ်ဒိး ဒိးဘျၢထံန့ၣ် အကဘၣ်နာ်ဝဲလၢ ပဒိးန့ၢ်ဘၣ် တၢ်မူလီၤထူလီၤယိာ်သ့ ခီဖျိလၢ ယ့ၣ်ၡူးတူၢ်သံသးလၢပဂီၢ် ဒီးဂဲၤဆၢထၢၣ် သမူထီၣ်က့ၤဝဲအဃိလီၤ. လၢတၢ်န့ၣ်အဃိ တၢ်မၢဖိပ့းတရူး တဲဘၣ်ခရံာ်ဖိတဖၣ်လၢ “တၢ်ဒိးဘျၢပသး အုၣ်က့ၤခီၣ်က့ၤ စ့ၢ်ကီး ပှၤခဲကနံၣ်အံၤ, . . . ယွၤလၢယ့ၣ်ၡူးခရံာ် အတၢ်ဂဲၤဆၢထၢၣ်က့ၤ အဃိလီၤ.” (၁ ပ့းတရူး ၃:၂၁) အဃိ ပှၤလၢအဒိးဘျၢထံ ဝံၤသီသီတဖၣ်န့ၣ် အတၢ်မုၢ်လၢ်အိၣ်လၢ ကအိၣ်မူဘၣ် လီၤထူလီၤယိာ်လီၤ.
၂. ဒ် ၂ တံၤမသ့း ၄:၁, ၂ ပာ်ဖျါထီၣ်ဝဲအသိး ပကဘၣ်မ့ၢ် ပှၤသိၣ်လိတၢ်ဖိဒ်လဲၣ် တကလုာ်လဲၣ်.
၂ ဒ်သိးပကဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အဂီၢ် ပကဘၣ်ကဲထီၣ် ပှၤသိၣ်လိတၢ်ဖိ လၢအဂ့ၤလီၤ. (ဖး ၂ တံၤမသ့း ၄:၁, ၂ တက့ၢ်.) ဘၣ်မနုၤအဃိလဲၣ်. မ့ၢ်လၢယ့ၣ်ၡူး မၤလိာ်ပှၤလၢ “လဲၤဒုးကဲထီၣ်ပှၤ . . . လၢယပျဲၢ်ယဘီၣ် ဒီးသိၣ်လိသီလိအီၤ” တက့ၢ်. ဘၣ်ဃးဒီး တၢ်မၤအံၤန့ၣ် တၢ်မၢဖိပီလူးတဲဝဲလၢ “အိၣ်လၢအပူၤဆိးလၢအပူၤတက့ၢ်. အဂ့ၢ်ဒ်အံၤ, နမ့ၢ်မၤဒ်န့ၣ်ဒီး, နကအုၣ်က့ၤခီၣ်က့ၤ နသးဒၣ်နဲ, ဒီးပှၤလၢအနၢ်ဟူတၢ် လၢနၤတဖၣ်လီၤ.” ဒီးအဆဲးတဲဝဲလၢ “ပလီၢ်နသးလၢန . . . တၢ်သိၣ်တၢ်သီအဂ့ၢ်တက့ၢ်.” (၁ တံၤမသ့း ၄:၁၆) ဒ်သိးပကဒုးကဲထီၣ် ပှၤဂၤလၢခရံာ် အပျဲၢ်အဘီၣ်အဂီၢ် ပကဘၣ်မ့ၢ်ပှၤလၢ အသိၣ်လိတၢ်သ့ဂ့ၤဂ့ၤလီၤ.
၃. လၢတၢ်မၤလိအံၤအပူၤ ပကတဲသကိး ပှၤသိၣ်လိတၢ်ဖိတဖၣ် ကဘၣ်မၤဝဲ တၢ်မနုၤလဲၣ်.
၃ ပသိၣ်လိပှၤ အကကွဲၢ်တဖၣ်လၢ လံာ်စီဆှံတၢ်မ့ၢ်တၢ်တီ ကိးနံၤဒဲးလီၤ. ဘၣ်ဆၣ် ဒ်တၢ်မၤလိလၢ အပူၤကွံာ်တခါအသိး ပအဲၣ်ဒိးလၢ ပပှၤမၤလိလံာ်စီဆှံဖိ ကကဲထီၣ် ခရံာ်အပျဲၢ်အဘီၣ်ဒီး ကဒိးဘျၢထံလီၤ. လၢတၢ်မၤလိအံၤအပူၤ ပကတဲသကိးတၢ်ဂ့ၢ်ယဲၢ်ခါ လၢပှၤသိၣ်လိတၢ်ဖိတဖၣ် ကဘၣ်မၤဝဲ ဒ်သိးကမၤစၢၤ အပှၤမၤလိလံာ်စီဆှံဖိလၢ ကတုၤထီၣ်ထီၣ်ဘး လၢကဒိးဘျၢထံအဂီၢ်လီၤ.
သူလံာ်စီဆှံလၢ ကသိၣ်လိတၢ်အဂီၢ်
သံကွၢ် ဒီပုၢ်ဝဲၢ်လၢ အအိၣ်ဒီးတၢ်လဲၤခီဖျိအါတဂၤ လၢကမၤစၢၤနၤ ဒ်သိးနကမၤဂ့ၤထီၣ် တၢ်သိၣ်လိလံာ်စီဆှံအဂီၢ်တက့ၢ် (ကွၢ်လံာ်အဆၢ ၄-၆) *
၄. ပှၤလၢအသိၣ်လိတၢ်န့ၣ် ဘၣ်မနုၤအဃိ အဝဲကဘၣ်အိၣ်ဒီး တၢ်ကီၤသူၣ်ကီၤသးလဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)
၄ ပသိၣ်လိ ကစၢ်ယွၤအကလုၢ်ကထါန့ၣ် မုာ်ဒိၣ်မးလီၤ. တဘျီတခီၣ် ပကတဲတၢ်လၢ ပဘၣ်သူၣ်ဘၣ်သးအီၤတဖၣ်န့ၣ် ကအါတလၢလီၤ. ဘၣ်ဆၣ်သနာ်က့ နမ့ၢ်ဖီၣ် တၢးထီခိးတၢ် တၢ်မၤလိမ့ၢ်ဂ့ၤ, တၢ်အိၣ်ဖှိၣ်တၢ်မၤလိ လံာ်စီဆှံမ့ၢ်ဂ့ၤ ဒီးတၢ်သိၣ်လိပှၤဂၤ လံာ်စီဆှံမ့ၢ်ဂ့ၤန့ၣ် နတဘၣ်တဲတၢ် အါတလၢဘၣ်. ဒ်သိး နကသူလံာ်စီဆှံလၢ နကသိၣ်လိတၢ်အဂီၢ် နကဘၣ်အိၣ်ဒီး တၢ်ကီၤသူၣ်ကီၤသးလီၤ. ဒီးတၢ်ဂ့ၢ်လၢ နသ့ၣ်ညါတဖၣ်မ့ၢ်ဂ့ၤ လံာ်စီဆှံအဆၢမ့ၢ်ဂ့ၤန့ၣ် နတဘၣ်ၡဲပၠးအီၤခဲလၢာ် တဘျီဃီဘၣ်. * (ယိၤဟၣ် ၁၆:၁၂) ဆိကမိၣ်ကွၢ် နတၢ်သ့ၣ်ညါလံာ်စီဆှံ ဖဲနဒိးဘျၢထံသီသီအခါ ဒီးခဲအံၤန့ၣ်တက့ၢ်. ဖဲန့ၣ်အခါ နကသ့ၣ်ညါထဲ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိတဖၣ်လီၤ. (ဧ့ၤဘြံၤ ၆:၁) တၢ်လၢနသ့ၣ်ညါအီၤ ခဲအံၤန့ၣ် မ့ၢ်လၢနမၤလိတ့ၢ်အီၤ လၢအနံၣ်အါမးလံအဃိ ဖဲနသိၣ်လိ ပှၤမၤလိ လံာ်စီဆှံဖိ သီသီအခါ တဘၣ်တဲပၠးအီၤ တၢ်ဂ့ၢ်ခဲလၢာ် တဘျီဃီဘၣ်.
၅. (က) ဒ် ၁ သ့းစၤလနံ ၂:၁၃ ပာ်ဖျါထီၣ်ဝဲအသိး ပအဲၣ်ဒိးလၢ ပပှၤမၤလိလံာ်စီဆှံဖိ ကနၢ်ပၢၢ်ထီၣ် တၢ်ဂ့ၢ်မနုၤလဲၣ်. (ခ) ပဟ့ၣ်ဂံၢ်ဟ့ၣ်ဘါ ပပှၤမၤလိလံာ်စီဆှံဖိတဖၣ်လၢ ကတဲဖျါထီၣ်တၢ်လၢ အမၤလိဘၣ်ဝဲတဖၣ် ကသ့ဒ်လဲၣ်.
၅ ပအဲၣ်ဒိးလၢ ပပှၤမၤလိလံာ်စီဆှံဖိ ကသ့ၣ်ညါဝဲလၢ တၢ်လၢအမၤလိဝဲန့ၣ် ဟဲလၢလံာ်စီဆှံအပူၤလီၤ. (ဖး ၁ သ့းစၤလနံ ၂:၁၃ တက့ၢ်.) ပမၤအီၤဒ်န့ၣ် ကသ့ဒ်လဲၣ်. ဟ့ၣ်ဂံၢ်ဟ့ၣ်ဘါ နပှၤမၤလိလံာ်စီဆှံဖိ လၢအကတဲဖျါထီၣ် တၢ်လၢအမၤလိဘၣ်ဝဲ တဖၣ်န့ၣ်တက့ၢ်. လၢနကၡဲပၠးအီၤ လံာ်စီဆှံအဂီၢ် မၢအီၤလၢ အဝဲကၡဲပၠးက့ၤနၤတက့ၢ်. မၤစၢၤနပှၤမၤလိလံာ်စီဆှံဖိလၢ အဝဲကသ့ၣ်ညါဝဲလၢ အအိၣ်မူမၤထွဲဝဲ လံာ်စီဆှံအတၢ်ဟံးစုနဲၣ်ကျဲ လၢအတၢ်အိၣ်မူအပူၤ ကသ့အဂီၢ်န့ၣ်တက့ၢ်. သံကွၢ်အီၤတၢ်သံကွၢ်တဖၣ်လၢ အဝဲကပာ်ဖျါထီၣ် အတၢ်ဆိကမိၣ် ဒီးအတၢ်တူၢ်ဘၣ် ဘၣ်ဃးဒီး လံာ်စီဆှံအဆၢလၢ အဖးဝဲန့ၣ်တက့ၢ်. (လူၤကၣ် ၁၀:၂၅-၂၈) အဒိ သံကွၢ်အီၤလၢ “လံာ်စီဆှံတဆၢအံၤ မၤစၢၤနၤလၢ နသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါတဖၣ်ဒ်လဲၣ်. တၢ်လၢနမၤလိအီၤလၢ လံာ်စီဆှံအပူၤန့ၣ် အမၤစၢၤနၤဒ်လဲၣ်. တၢ်လၢနမၤလိဘၣ်အီၤတဖၣ်န့ၣ် နထံၣ်အီၤဒ်လဲၣ်.” (ကတိၤဒိ ၂၀:၅) တၢ်လၢအရ့ဒိၣ်ကတၢၢ်န့ၣ် တမ့ၢ်လၢ နပှၤမၤလိလံာ်စီဆှံဖိ ကဘၣ်သ့ၣ်ညါ တၢ်ဂ့ၢ်အါအါဘၣ်. လၢတၢ်န့ၣ်အလီၢ် တၢ်လၢအမၤလိဘၣ်ဝဲန့ၣ် ကဘၣ်နုာ်လီၤလၢ အသးပူၤဒီး အိၣ်မူမၤထွဲဝဲလီၤ.
၆. ဖဲပမၤလိပှၤဂၤ လံာ်စီဆှံအခါ ပမ့ၢ်လဲၤကိးဃုာ်ဒီး ပှၤလၢအတၢ်လဲၤခီဖျိ အိၣ်အါန့ၣ် ဘၣ်မနုၤအဃိ ကဲဘျုးဝဲလဲၣ်.
၆ ဖဲပမၤလိပှၤဂၤလံာ်စီဆှံအခါ မ့ၢ်ပလဲၤကိးဃုာ်ဒီး ပှၤလၢအတၢ်လဲၤခီဖျိ အိၣ်အါစ့ၢ်ကီးဧါ. နမ့ၢ်လဲၤကိးအဝဲသ့ၣ်န့ၣ် သံကွၢ်အီၤလၢ ယသိၣ်လိလံာ်စီဆှံဒီး ယသူလံာ်စီဆှံလၢ တၢ်မၤလိအပူၤ သ့ဂ့ၤဂ့ၤဧါန့ၣ်တက့ၢ်. နမ့ၢ်အဲၣ်ဒိးလၢ နသိၣ်လိတၢ်ကဂ့ၤထီၣ်န့ၣ် နကဘၣ်အိၣ်ဒီး တၢ်ဆီၣ်လီၤသးလီၤ. (ထိၣ်သတြီၤဒီး မၤတၢ် ၁၈:၂၄-၂၆ တက့ၢ်.) ဖဲန့ၣ်ဝံၤအလီၢ်ခံ သံကွၢ်ပှၤလၢ အလဲၤပိာ်နခံလၢ မ့ၢ်ယပှၤမၤလိတၢ်ဖိ နၢ်ပၢၢ်ဝဲတၢ်လၢ အမၤလိဝဲတဖၣ်ဧါ. ဒီးဖဲနလဲၤသိၣ်လိ လံာ်စီဆှံတချုးဘၣ်အခါ နမၢအီၤလၢ အဝဲကလဲၤသိၣ်လိန့ၢ်တၢ် လၢနလီၢ်သ့လီၤ. နမ့ၢ်မၤဒ်န့ၣ်န့ၣ် နပှၤမၤလိလံာ်စီဆှံဖိ ကမၤလိဘၣ်တၢ်ထီဘိ ဒီးအဝဲကသ့ၣ်ညါဝဲလၢ တၢ်မၤလိလံာ်စီဆှံန့ၣ် မ့ၢ်တၢ်လၢအရ့ဒိၣ် လၢအဂီၢ်လီၤ. နတဘၣ်ဆိကမိၣ်လၢ အဝဲအံၤမ့ၢ် “ယ” ပှၤမၤလိလံာ်စီဆှံဖိလီၤ ဒီးပှၤအဂၤဟဲမၤလိအီၤ လံာ်စီဆှံတသ့ဘၣ်န့ၣ်တဂ့ၤ. နီၢ်နီၢ်န့ၣ် ပအဲၣ်ဒိးတၢ်အဂ့ၤကတၢၢ်လၢ ပပှၤမၤလိလံာ်စီဆှံဖိအဂီၢ်လီၤ. အဃိ ဒ်သိးအဝဲကဆဲး လဲၤထီၣ်လဲၤထီအဂီၢ် အဝဲကဘၣ်ဆဲး မၤလိတၢ်ထီဘိလီၤ.
ပာ်ဖျါထီၣ်လၢ နအိၣ်ဒီးတၢ်အဲၣ် ဒီးတၢ်လၢနသိၣ်လိန့ၣ် နာ်လၢအမ့ၢ်အတီ
တဲပၠး နပှၤမၤလိလံာ်စီဆှံဖိ ဘၣ်ဃးဒီး ပှၤလၢအအိၣ်ဒီး တၢ်လဲၤခီဖျိလၢ အဆီတလဲအတၢ်အိၣ်မူ ဒီးမၤထွဲ လံာ်စီဆှံ အတၢ်ဟံးစုနဲၣ်ကျဲတဖၣ် အဂ့ၢ်တက့ၢ် (ကွၢ်လံာ်အဆၢ ၇-၉) *
၇. တၢ်မနုၤ ကမၤစၢၤ ပှၤမၤလိလံာ်စီဆှံဖိလၢ ကသးအိၣ် တၢ်လၢအမၤလိဝဲန့ၣ်လဲၣ်.
၇ ပှၤမၤလိလံာ်စီဆှံဖိ ကဘၣ်ထံၣ်ဝဲလၢ တၢ်မ့ၢ်တၢ်တီလၢ နသိၣ်လိအီၤတဖၣ်န့ၣ် နအဲၣ်အီၤ ဒီးနာ်အီၤသပှၢ်တၢၢ်လီၤ. (၁ သ့းစၤလနံ ၁:၅) အဝဲမ့ၢ်ထံၣ်ဝဲဒ်န့ၣ်မး ကသးအိၣ်တၢ်လၢ အမၤလိဘၣ်ဝဲတဖၣ်လီၤ. ဘၣ်သ့ၣ်သ့ၣ် နကတဲပၠးအီၤလၢ နအိၣ်မူမၤထွဲ ဒ်လံာ်စီဆှံ အတၢ်ဟံးစုနဲၣ်ကျဲန့ၣ် အကဲဘျုးဝဲဒ်လဲၣ်. အဃိ အဝဲကသ့ၣ်ညါဝဲလၢ လံာ်စီဆှံ အတၢ်ဟံးစုနဲၣ်ကျဲန့ၣ် မၤစၢၤအီၤသ့ဝဲလီၤ.
၈. နမၤစၢၤ နပှၤမၤလိလံာ်စီဆှံဖိ ကသ့လၢကျဲဒ်လဲၣ် ဒီးဘၣ်မနုၤအဃိ နဘၣ်မၤအီၤဒ်န့ၣ်လဲၣ်.
၈ ဖဲနသိၣ်လိ လံာ်စီဆှံအဆၢကတီၢ်န့ၣ် တဲဘၣ်နပှၤမၤလိ လံာ်စီဆှံဖိ လၢဒီပုၢ်ဝဲၢ်တနီၤ အတၢ်လဲၤခီဖျိလၢ အလီၤဂာ်ဒီးအီၤ ဒီးအဝဲသ့ၣ်လဲၤခီဖျိဝဲန့ၢ် ဒ်လဲၣ်န့ၣ်တက့ၢ်. နလဲၤကိးဃုာ်ဒီး ဒီပုၢ်ဝဲၢ်လၢ အလဲၤခီဖျိဘၣ် တၢ်ကီတၢ်ခဲတဖၣ် လၢကကဲထီၣ်တၢ်မၤစၢၤလၢ နပှၤမၤလိလံာ်စီဆှံဖိ အဂီၢ်န့ၣ်တက့ၢ်. တကးဒံးဘၣ် နထံၣ်န့ၢ် တၢ်လဲၤခီဖျိလၢ jw.org အပူၤ ဒီးကွၢ်တၢ်ဂ့ၢ်လၢအမ့ၢ် “လံာ်စီဆှံဆီတလဲ ပတၢ်အိၣ်မူ” * တက့ၢ်. တၢ်ဂ့ၢ်ဒီးတၢ်ဂီၤမူတဖၣ်န့ၣ် ကမၤစၢၤ နပှၤမၤလိလံာ်စီဆှံဖိလၢ ကသ့ၣ်ညါထီၣ်ဝဲ လံာ်စီဆှံ အတၢ်ဟံးစုနဲၣ်ကျဲတဖၣ် ကဲဘျုးဝဲလၢ အတၢ်အိၣ်မူအပူၤလီၤ.
၉. နဟ့ၣ်ဂံၢ်ဟ့ၣ်ဘါ နပှၤမၤလိလံာ်စီဆှံဖိလၢ တၢ်လၢအမၤလိဘၣ်ဝဲတဖၣ်န့ၣ် ကတဲဘၣ် အဟံၣ်ဖိဃီဖိ ဒီးအတံၤသကိးတဖၣ် ကသ့ဒ်လဲၣ်.
၉ နပှၤမၤလိလံာ်စီဆှံဖိ မ့မ့ၢ်ပှၤလၢအဆီဟံၣ်ဆီဃီန့ၣ် မ့ၢ်အသးသမူတံၤသကိး မၤလိလံာ်စီဆှံစ့ၢ်ကီးဧါ. အဝဲမ့ၢ်တမၤလိ လံာ်စီဆှံဒံးဘၣ်န့ၣ် ကွဲမုာ်အီၤလၢ အကမၤလိဃုာ်တၢ် ဒီးသုတက့ၢ်. ဒီးဟ့ၣ်ဂံၢ်ဟ့ၣ်ဘါ နပှၤမၤလိလံာ်စီဆှံဖိလၢ တၢ်လၢအဝဲမၤလိ ဘၣ်ဝဲတဖၣ်န့ၣ် အကတဲဘၣ်က့ၤ အဟံၣ်ဖိဃီဖိ ဒီးအတံၤသကိးတဖၣ်တက့ၢ်. (ယိၤဟၣ် ၁:၄၀-၄၅) နမၤအီၤကသ့လၢ ကျဲဒ်လဲၣ်. သံကွၢ်အီၤယိယိဖိလၢ “တၢ်မ့ၢ်တၢ်တီတခါအံၤ နကၡဲပၠး နဟံၣ်ဖိဃီဖိဒ်လဲၣ်. ဖဲနတဲပၠး နတံၤသကိး တၢ်ဂ့ၢ်အံၤအခါ နကသူလံာ်စီဆှံ ဖဲလဲၣ်တဆၢလဲၣ်.” နမ့ၢ်မၤအီၤဒ်န့ၣ်န့ၣ် နကမၤစၢၤဘၣ် နပှၤမၤလိလံာ်စီဆှံဖိ လၢကကဲထီၣ် ပှၤသိၣ်လိတၢ်ဖိတဂၤလီၤ. လၢခံ အဝဲမ့ၢ်တုၤထီၣ်ထီၣ်ဘးန့ၣ် အဝဲကမ့ၢ် ပှၤစံၣ်တဲၤတဲလီၤတၢ်ဖိလၢ အတဒိးဘျၢဘၣ် ထံဒံးဘၣ်န့ၣ်လီၤ. နသံကွၢ် နပှၤမၤလိလံာ်စီဆှံဖိလၢ အဝဲသ့ၣ်ညါပှၤလၢ အသးအိၣ် မၤလံာ်စီဆှံန့ၣ် အိၣ်ဧါ. အသ့ၣ်ညါဝဲမ့ၢ်အိၣ်န့ၣ် ဆဲးကျိးဒီး ပှၤတဂၤန့ၣ်လၢ အဆိအချ့ ဒီးတဲဘၣ်အီၤလၢ နအဲၣ်ဒိးမၤလိ လံာ်စီဆှံဒီးအီၤလီၤ. ဒုးကွၢ်အီၤ တၢ်ဂီၤမူလၢအမ့ၢ် “တၢ်မၤလိလံာ်စီဆှံန့ၣ် ပှၤမၤအီၤဒ်လဲၣ်” * တက့ၢ်.
ဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိ လၢကရ့ဒီးပှၤလၢ တၢ်အိၣ်ဖှိၣ်အပူၤ
ဟ့ၣ်ဂံၢ်ဟ့ၣ်ဘါ ပှၤမၤလိ လံာ်စီဆှံဖိ ဒ်သိးကရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်တက့ၢ် (ကွၢ်လံာ်အဆၢ ၁၀-၁၁) *
၁၀. ဒ် ၁ သ့းစၤလနံ ၂:၇, ၈ ပာ်ဖျါထီၣ်ဝဲအသိး ပှၤသိၣ်လိတၢ်ဖိ ကွၢ်လိမၤဒိး စီၤပီလူးကသ့ဒ်လဲၣ်.
၁၀ ပှၤလၢအသိၣ်လိတၢ်တဖၣ်န့ၣ် ကဘၣ်ပာ်ဖျါထီၣ် တၢ်သူၣ်အိၣ်သးအိၣ်လၢ ပှၤမၤလိလံာ်စီဆှံဖိတဖၣ် အဖီခိၣ်လီၤ. နကဘၣ်ထံၣ် အဝဲသ့ၣ်လၢခါဆူညါန့ၣ် ကကဲထီၣ်ဝဲ နဒီပုၢ်ဝဲၢ်မုၣ်ခွါလၢ နီၢ်သးတခီလီၤ. (ဖး ၂ သ့းစၤလနံ ၂:၇, ၈ တက့ၢ်.) အဝဲသ့ၣ်ဘၣ်ပာ်တ့ၢ်ကွံာ် အတံၤသကိးလၢ တၢ်ချၢဒီး မၤတၢ်ဆီတလဲလၢ ကမၤယဟိဝၤယွၤ အတၢ်မၤအဂီၢ်န့ၣ် တညီဝဲဘၣ်. ပကဘၣ်မၤစၢၤအဝဲသ့ၣ် လၢကထံၣ်န့ၢ် တံၤသကိးနီၢ်နီၢ်လၢ တၢ်အိၣ်ဖှိၣ်အပူၤလီၤ. နကဘၣ်ရ့ဒီး နပှၤမၤလိလံာ်စီဆှံဖိန့ၣ် တမ့ၢ်ထဲနမၤလိအီၤ လံာ်စီဆှံအခါဘၣ်. ဒီးလၢတၢ်ဆၢကတီၢ်အဂၤစ့ၢ်ကီး နရ့ဒီးအီၤသ့လီၤ. နမ့ၢ်ကိးအီၤလၢ လီတဲစိ, ဆှၢန့ၢ်အီၤ မဲးစ့း ဒီးလဲၤဟးအိၣ်သကိးအီၤန့ၣ် နပာ်ဖျါထီၣ်လၢ နသူၣ်အိၣ်သးအိၣ်အီၤနီၢ်နီၢ်လီၤ.
၁၁. ပအဲၣ်ဒိးလၢ ပပှၤမၤလိလံာ်စီဆှံဖိ ကဒိးန့ၢ်ဘၣ်တၢ်မနုၤလၢ တၢ်အိၣ်ဖှိၣ်အပူၤလဲၣ် ဒီးဘၣ်မနုၤအဃိလဲၣ်.
၁၁ တၢ်ကတိၤဒိတခါ တဲဝဲလၢ “ဖိသၣ်တဂၤကဒိၣ်ထီၣ် အဂီၢ်လိၣ်ဘၣ်ဝဲ သဝီဒီတဖျၢၣ် အတၢ်မၤစၢၤလီၤ.” ဒ်န့ၣ်အသိး ပတဲသ့စ့ၢ်ကီးလၢ “ပှၤကကဲထီၣ်ခရံာ် အပျဲၢ်အဘီၣ်တဂၤအဂီၢ် လိၣ်ဘၣ်ဝဲ တၢ်အိၣ်ဖှိၣ်ဒီတဖျၢၣ် အတၢ်မၤစၢၤလီၤ.” ပှၤသိၣ်လိ လံာ်စီဆှံဖိလၢအဂၤန့ၣ် မၤစၢၤအပှၤမၤလိ လံာ်စီဆှံဖိလၢ ကသ့ၣ်ညါထီၣ်ဝဲ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ ဒ်သိးဒီပုၢ်ဝဲၢ်တဖၣ်အံၤ မၤစၢၤအဝဲသ့ၣ်လၢ ကဘူးထီၣ်ဒီး ယဟိဝၤယွၤအဂီၢ်လီၤ. ခီဖျိလၢ ပှၤမၤလိလံာ်စီဆှံဖိတဖၣ်န့ၣ် ရ့လိာ်ဘၣ်အသးဒီး ယွၤအခ့အပှၤတဖၣ်အဃိ ပှၤသ့ၣ်တဖၣ်အံၤ မၤစၢၤအဝဲသ့ၣ်လၢ နီၢ်ခိဒီးနီၢ်သးသ့လီၤ. ပအဲၣ်ဒိးလၢ ပပှၤမၤလိလံာ်စီဆှံဖိ တူၢ်ဘၣ်ဝဲလၢ ပတူၢ်လိာ်အဝဲသ့ၣ်ဒီး ပအဲၣ်အဝဲသ့ၣ် ဒ်ပဟံၣ်ဖိဃီဖိလၢ နီၢ်သးတခီအသိးလီၤ. တကးဒံးဘၣ် ပအဲၣ်ဒိးလၢအဝဲသ့ၣ် ကသ့ၣ်ညါဘၣ်ဝဲ ပဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်လီၤ. ပမ့ၢ်မၤဒ်န့ၣ်န့ၣ် ကမၤစၢၤအဝဲသ့ၣ် လၢအတရ့လိာ်အသး ဘူးဘူးတံၢ်တံၢ်ဒီး ပှၤတၢ်ချၢလၢအတအဲၣ် ယဟိဝၤယွၤဘၣ်န့ၣ်လီၤ. (ကတိၤဒိ ၁၃:၂၀) ဒီးအဝဲသ့ၣ် အတံၤသကိးလၢ အရ့တ့ၢ်ဝဲတဖၣ် မ့ၢ်ပာ်တ့ၢ်ကွံာ်အီၤ သနာ်က့ အကဒိးန့ၢ်ဘၣ်က့ၤ တံၤသကိးနီၢ်နီၢ်လၢ ယဟိဝၤယွၤ အတၢ်ကရၢကရိ အပူၤလီၤ.—မၢ်ကူး ၁၀:၂၉, ၃၀; ၁ ပ့းတရူး ၄:၄.
တဲဘၣ်ပှၤမၤလိလံာ်စီဆှံဖိလၢ ကပာ်လီၤဖီတၢၣ်လၢ ကဟ့ၣ် လုၢ်ထီၣ်သးဒီး ကဒိးဘျၢထံအဂီၢ်
ဒ်သိး ပှၤမၤလိလံာ်စီဆှံဖိ အကတုၤထီၣ်ထီၣ်ဘးလၢ ကဒိးဘျၢထံအဂီၢ် တၢ်လၢအကဘၣ်မၤဝဲ တဆီဘၣ်တဆီန့ၣ် အိၣ်ဝဲလီၤ (ကွၢ်လံာ်အဆၢ ၁၂-၁၃)
၁၂. ဘၣ်မနုၤအဃိ ပကဘၣ်တဲဘၣ် ပပှၤမၤလိလံာ်စီဆှံဖိ ဘၣ်ဃးဒီး တၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံလဲၣ်.
၁၂ နကဘၣ်တဲဘၣ် နပှၤမၤလိလံာ်စီဆှံဖိလၢ တၢ်ဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးတၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ပမၤလိပှၤဂၤလံာ်စီဆှံန့ၣ် ပတၢ်တိာ်ပာ်မ့ၢ်ဝဲ ဒ်သိး ပကမၤစၢၤအဝဲသ့ၣ်လၢ အကမၤယဟိဝၤယွၤတၢ်မၤဒီး ဒိးဘျၢထံလီၤ. ဖဲပမၤလိဘၣ်တၢ်ဒီးအဝဲသ့ၣ် စှၤကိာ်လါဝံၤအလီၢ်ခံ ဒီးအဝဲသ့ၣ် မ့ၢ်ဟဲထီၣ်တၢ်အိၣ်ဖှိၣ်လံန့ၣ် အဝဲသ့ၣ်ကဘၣ်သ့ၣ်ညါဝဲလၢ တၢ်မၤလိလံာ်စီဆှံန့ၣ် ကမၤစၢၤအဝဲသ့ၣ်လၢ အကစးထီၣ်မၤ ယဟိဝၤယွၤအတၢ်မၤ ဒ်ပှၤအုၣ်အသးတဂၤ အသိးလီၤ.
၁၃. ဒ်သိးပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ ကဒိးဘျၢထံအဂီၢ် အကဘၣ်ခါထီၣ်ခီၣ်ခါ ဒ်လဲၣ်.
၁၃ ပှၤမၤလိလံာ်စီဆှံဖိလၢ အအဲၣ်ဒိးဒိးဘျၢထံန့ၣ် တၢ်လၢအကဘၣ်မၤဝဲဒၣ် တဆီဘၣ်တဆီအိၣ်ဝဲလီၤ. အဆိကတၢၢ် အဝဲကဘၣ် သ့ၣ်ညါထီၣ်ယဟိဝၤယွၤ ဒီးအဲၣ်အီၤ ဒီးနာ်န့ၢ်အီၤလီၤ. (ယိၤဟၣ် ၃:၁၆; ၁၇:၃) လၢခံအဝဲကဲထီၣ်ဘၣ် ယဟိဝၤယွၤ အတံၤသကိး ဃုာ်ဒီး ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ စ့ၢ်ကီးလီၤ. (ဧ့ၤဘြံၤ ၁၀:၂၄, ၂၅; ယၤကိာ် ၄:၈) တကးဒံးဘၣ် ပှၤမၤလိလံာ်စီဆှံဖိ ကပာ်တ့ၢ်ကွံာ် လုၢ်လၢ်လၢအတဂ့ၤဘၣ်တဖၣ် ဒီးတဆဲးမၤဝဲလၢၤဘၣ်. (မၤတၢ် ၃:၁၉) ဒီးတၢ်မ့ၢ်တၢ်တီ လၢအနာ်ဝဲတဖၣ်န့ၣ် အဝဲကတဲဘၣ်က့ၤ ပှၤအဂၤစ့ၢ်ကီးလီၤ. (၂ ကရံၣ်သူး ၄:၁၃) ဝံၤဒီး အဝဲဟ့ၣ်လုၢ်ထီၣ်အသးလၢ ယဟိဝၤယွၤအအိၣ်ဒီး ပာ်ဖျါထီၣ် အတၢ်ဟ့ၣ်လုၢ်ထီၣ်သးအံၤ ခီဖျိလၢအဒိးဘျၢထံလီၤ. (၁ ပ့းတရူး ၃:၂၁; ၄:၂) ဒီးမုၢ်နံၤလၢ အဝဲဒိးဘျၢထံန့ၣ် ပှၤသးခုဝဲကိးဂၤဒဲးလီၤ. ဖဲနပှၤမၤလိလံာ်စီဆှံဖိ ခါထီၣ်ခီၣ်ခါလၢ ကဒိးဘျၢထံအခါ စံးပတြၢၤအီၤ ဒီးဟ့ၣ်ဂံၢ်ဟ့ၣ်ဘါအီၤ လၢအကဆဲးမၤတၢ်ဒ် အဖီတၢၣ်အိၣ်ဝဲ အသိးန့ၣ်တက့ၢ်.
တဘျီတခီၣ် နဘၣ်သံကွၢ်လီၤနသးလၢ မ့ၢ်နပှၤမၤလိလံာ်စီဆှံဖိ လဲၤထီၣ်လဲၤထီဧါ
၁၄. ဒ်သိး ပှၤသိၣ်လိတၢ်ဖိ ကသ့ၣ်ညါဝဲလၢ အပှၤမၤလိလံာ်စီဆှံဖိ လဲၤထီၣ်လဲၤထီဧါန့ၣ် အကဘၣ်မၤဝဲ တၢ်မနုၤလဲၣ်.
၁၄ ဖဲပမၤစၢၤ ပပှၤမၤလိလံာ်စီဆှံဖိလၢ ကတုၤထီၣ်ထီၣ်ဘးလၢ တၢ်ဟ့ၣ်လုၢ်ထီၣ်သးဒီး တၢ်ဒိးဘျၢထံအခါ ပကဘၣ်အိၣ်ဒီး တၢ်ဝံသးစူၤလီၤ. ဘၣ်ဆၣ် ပကဘၣ်သ့ၣ်ညါလၢ မ့ၢ်အဝဲသးအိၣ်မၤ ယဟိဝၤယွၤအတၢ်မၤ စ့ၢ်ကီးဧါ. မ့ၢ်နပှၤမၤလိလံာ်စီဆှံဖိ ပာ်ဖျါထီၣ်လၢ အဝဲဂုာ်ကျဲးစၢး အိၣ်မူမၤထွဲ ဒ်ယ့ၣ်ၡူးအတၢ်မၤလိာ် တဖၣ်အသိးဧါ. မ့တမ့ၢ် အဝဲအဲၣ်ဒိး မၤလိထဲ တၢ်မ့ၢ်တၢ်တီလၢ လံာ်စီဆှံအပူၤ တဖၣ်လီၤဧါ.
၁၅. ပှၤသိၣ်လိတၢ်ဖိ ကသ့ၣ်ညါဝဲလၢ အပှၤမၤလိလံာ်စီဆှံဖိ တုၤထီၣ်ထီၣ်ဘးလၢ တၢ်ဒိးဘျၢထံ ကသ့ဒ်လဲၣ်.
၁၅ သမံသမိးကွၢ် နပှၤမၤလိလံာ်စီဆှံဖိ အတၢ်ဒိၣ်ထီၣ်ထီထီၣ် ထီဘိတက့ၢ်. အဒိ မ့ၢ်အပာ်ဖျါထီၣ် အတၢ်အဲၣ်လၢ ယဟိဝၤယွၤ အဖီခိၣ်ဧါ. မ့ၢ်အဃ့ဘါထုကဖၣ်လၢ ယဟိဝၤယွၤအအိၣ်ဧါ. (စံးထီၣ်ပတြၢၤ ၁၁၆:၁, ၂) မ့ၢ်အဖးလံာ်စီဆှံမုာ်ဧါ. (စံးထီၣ်ပတြၢၤ ၁၁၉:၉၇) မ့ၢ်အထီၣ် တၢ်အိၣ်ဖှိၣ်ရိဖှိၣ် ထီဘိဧါ. (စံးထီၣ်ပတြၢၤ ၂၂:၂၂) မ့ၢ်အဝဲမၤ တၢ်ဆီတလဲ ဒ်တၢ်လၢအမၤလိ ဘၣ်ဝဲအသိးဧါ. (စံးထီၣ်ပတြၢၤ ၁၁၉:၁၁၂) တၢ်လၢအမၤလိ ဘၣ်ဝဲတဖၣ်န့ၣ် မ့ၢ်အတဲဘၣ် အဟံၣ်ဖိဃီဖိဒီး အတံၤအသိးတဖၣ်ဧါ. (စံးထီၣ်ပတြၢၤ ၉:၁) တၢ်လၢအရ့ဒိၣ်ကတၢၢ်န့ၣ် မ့ၢ်အဝဲအဲၣ်ဒိး ကဲထီၣ် ယဟိဝၤပှၤအုၣ်အသး တဂၤဧါ. (စံးထီၣ်ပတြၢၤ ၄၀:၈) နပှၤမၤလိလံာ်စီဆှံဖိ မ့ၢ်တမၤဝဲဒ် တၢ်ဂ့ၢ်တဖၣ်အံၤ တခါခါဒံးဘၣ်န့ၣ် လၢတၢ်ကူၣ်သ့အပူၤ သံကွၢ်အီၤလၢ ဘၣ်မနုၤအဃိလဲၣ် ဝံၤဒီး တဲသကိးတၢ်ဂ့ၢ်တဖၣ်အံၤ ဒီးအီၤတက့ၢ်. *
၁၆. ပကဘၣ်ပတုာ်မၤလိ လံာ်စီဆှံဒီးပှၤဂၤ လၢအခါဖဲလဲၣ်.
၁၆ သံကွၢ်လီၤနသးလၢ မ့ၢ်နကြၢးဆဲးမၤလိ လံာ်စီဆှံဒီး ပှၤလၢနမၤလိအီၤတဖၣ်ဧါ. သံကွၢ်လီၤနသးလၢ “မ့ၢ်နပှၤမၤလိ လံာ်စီဆှံဖိ ကတဲာ်ကတီၤ ပာ်စၢၤတၢ်ဂ့ၢ်လၢ အကမၤလိဝဲတဖၣ်ဧါ. မ့ၢ်အဝဲထီၣ် တၢ်အိၣ်ဖှိၣ်ရိဖှိၣ် မုာ်စ့ၢ်ကီးဧါ. မ့ၢ်အဆဲးအိၣ်ဒီး လုၢ်လၢ်လၢ အတဂ့ၤဘၣ် တဖၣ်ဒံးဧါ. မ့ၢ်အဆဲးအိၣ်လၢ တၢ်ဘူၣ်တၢ်ဘါလၢ အဂၤတဖၣ်အပူၤဒံးဧါ. တၢ်စံးဆၢမ့မ့ၢ်ဝဲ မ့ၢ်ခဲလၢာ် ဒီးပမ့ၢ်ဆဲးမၤလိအီၤ လံာ်စီဆှံဒံးန့ၣ် ကလီၤဂာ်ဒ် ပှၤလၢအအဲၣ်ဒိး ပှီၢ်ထံသ့ ဘၣ်ဆၣ်တအဲၣ်ဒိးလၢ အလိၤကဘၣ်စီၣ်ဘၣ်. ပပှၤမၤလိလံာ်စီဆှံဖိ မ့ၢ်တပာ်လုၢ်ပာ်ပှ့ၤ တၢ်လၢအမၤလိ ဘၣ်ဝဲတဖၣ် ဒီးမ့ၢ်တမၤ တၢ်ဆီတလဲဘၣ်န့ၣ် ပမ့ၢ်ဆဲးမၤလိ လံာ်စီဆှံဒီးအဝဲသ့ၣ် သနာ်က့ အဘျုးတအိၣ်ဘၣ်.
၁၇. ဒ် ၁ တံၤမသ့း ၄:၁၆ ပာ်ဖျါထီၣ်ဝဲအသိး ပှၤသိၣ်လိလံာ်စီဆှံဖိ ကဘၣ်မၤ တၢ်မနုၤလဲၣ်.
၁၇ ပကမၤလၢပှဲၤပမူဒါလၢ တၢ်ဒုးကဲထီၣ် ပှၤဂၤလၢ ခရံာ်အပျဲၢ်အဘီၣ်န့ၣ် မ့ၢ်တၢ်လၢအရ့ဒိၣ် ဒိၣ်မးလီၤ. ဒီးပအဲၣ်ဒိးလၢ ပပှၤမၤလိ လံာ်စီဆှံဖိတဖၣ် ကတုၤထီၣ်ထီၣ်ဘးလၢ ကဒိးဘျၢထံ အဂီၢ်လီၤ. လၢတၢ်န့ၣ်အဃိ ဖဲပသိၣ်လိပှၤဂၤအခါ ပသူလံာ်စီဆှံ ဒီးပာ်ဖျါထီၣ်လၢ နအိၣ်ဒီးတၢ်အဲၣ် ဒီးတၢ်လၢနသိၣ်လိန့ၣ် နာ်လၢအမ့ၢ်အတီတက့ၢ်. ပကဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိလၢ ကရ့ဒီးပှၤလၢ တၢ်အိၣ်ဖှိၣ်အပူၤလီၤ. ဒီးပကတဲဘၣ် ပှၤမၤလိလံာ်စီဆှံဖိလၢ ကပာ်လီၤဖီတၢၣ်လၢ ကဟ့ၣ်လုၢ်ထီၣ်သးဒီး ကဒိးဘျၢထံအဂီၢ် ဒီးတဘျီတခီၣ် ပဘၣ်သံကွၢ်လီၤပသးလၢ မ့ၢ်ပပှၤမၤလိလံာ်စီဆှံဖိ လဲၤထီၣ်လဲၤထီဧါ. (ကွၢ်တၢ်လွံၢ်နၢၣ် လၢကဘျံးပၤ ၁၃ “ ဒ်သိး ပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ ကဒိးဘျၢထံအဂီၢ် ပှၤသိၣ်လိတၢ်ဖိ ကဘၣ်မၤတၢ်မနုၤလဲၣ်” တက့ၢ်.) ပပၣ်ဃုာ်ဘၣ်လၢ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ် အဃိ ပသးခုဒိၣ်မးလီၤ. မ်ပကဂုာ်ကျဲးစၢး အဂ့ၤကတၢၢ် ဒ်သိးပပှၤမၤလိ လံာ်စီဆှံဖိ ကတုၤထီၣ်ထီၣ်ဘးလၢ ကဒိးဘျၢထံန့ၣ်တက့ၢ်.
တၢ်သးဝံၣ် ၇၉ သိၣ်လိအဝဲသ့ၣ်ဒ်သိး ကအိၣ်ဂၢၢ်ဆိးကျၢၤအဂီၢ်
^ လံာ်အဆၢ. 5 ဖဲပမၤလိပှၤဂၤ လံာ်စီဆှံအခါ ပအိၣ်ဒီးတၢ်ခွဲးတၢ်ယာ်လၢ ပမၤစၢၤဘၣ် ပှၤမၤလိလံာ်စီဆှံဖိလၢ ကဆိကမိၣ် ဒီးမၤတၢ်ဒ် ယဟိဝၤယွၤ အတၢ်ဘၣ်သး အိၣ်ဝဲအသိးလီၤ. တၢ်မၤလိတခါအံၤ ကမၤစၢၤပှၤလၢ ပမၤဂ့ၤထီၣ် ပတၢ်သိၣ်လိ အကျိၤအကျဲတဖၣ် ကသ့ဒ်လဲၣ်န့ၣ်လီၤ.
^ လံာ်အဆၢ. 4 ကွၢ်တၢ်ဂ့ၢ်လၢအမ့ၢ် “ဖဲနမၤလိလံာ်စီဆှံအခါ ဟးဆှဲးတၢ်လၢ ကကဲထီၣ်တၢ်ကီတၢ်ခဲ” လၢ လါစဲးပတ့ဘၢၣ် ၂၀၁၆, ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တက့ၢ်.
^ လံာ်အဆၢ. 8 လဲၤလၢ ABOUT US > EXPERIENCES တက့ၢ်.
^ လံာ်အဆၢ. 9 ကွၢ်လၢ JW Library®, လၢ MEDIA > OUR MEETINGS AND MINISTRY > TOOLS FOR THE MINISTRY တက့ၢ်.
^ လံာ်အဆၢ. 15 ကွၢ်တၢ်ဂ့ၢ်လၢအမ့ၢ် “တၢ်အဲၣ်ဒီးတၢ်စံးဘျုးစံးဖှိၣ်က့ၤ ယဟိဝၤယွၤန့ၣ် ကထိၣ်ဟူးထိၣ်ဂဲၤထီၣ်နၤလၢ နကဒိးဘျၢထံ” ဒီး “မ့ၢ်နတုၤထီၣ်ထီၣ်ဘးလၢ နကဒိးဘျၢထံအဂီၢ်လံဧါ” လၢ တၢးထီခိးတၢ် လါမၢ်ၡး ၂၀၂၀ တက့ၢ်.
^ လံာ်အဆၢ. 77 တၢ်တဲဖျါထီၣ် တၢ်ဂီၤအခီပညီ– ဖဲတၢ်မၤလိလံာ်စီဆှံ ဝံၤအလီၢ်ခံ ဒီပုၢ်ဝဲၢ်မုၣ်လၢ အအိၣ်ဒီးတၢ်လဲၤခီဖျိတဂၤ မၤစၢၤဝဲဒီပုၢ်ဝဲၢ်မုၣ်လၢ အသိၣ်လိလံာ်စီဆှံန့ၣ်လၢ အတတဲတၢ်အါတလၢ ဖဲအသိၣ်လိ လံာ်စီဆှံအခါန့ၣ်လီၤ.
^ လံာ်အဆၢ. 79 တၢ်တဲဖျါထီၣ် တၢ်ဂီၤအခီပညီ– ဖဲတၢ်မၤလိလံာ်စီဆှံ အဆၢကတီၢ် ပှၤမၤလိလံာ်စီဆှံဖိ မၤလိဘၣ်ဝဲလၢ ကဘၣ်ကဲထီၣ်မါလၢ အဂ့ၤဒ်လဲၣ်န့ၣ်လီၤ. လၢခံ အဝဲတဲဘၣ်အဝၤ တၢ်လၢအမၤလိ ဘၣ်ဝဲတဖၣ်လီၤ.
^ လံာ်အဆၢ. 81 တၢ်တဲဖျါထီၣ် တၢ်ဂီၤအခီပညီ– ပှၤမၤလိလံာ်စီဆှံဖိ ဒီးအဝၤန့ၣ် ရ့လိာ်အသးဒီး ဒီပုၢ်ဝဲၢ်လၢ တၢ်အိၣ်ဖှိၣ်အပူၤ လၢဒီပုၢ်ဝဲၢ်နီၢ်ဒီမါဝၤ ခံဂၤန့ၣ်အဟံၣ်လီၤ.
