ARTIKLE YA KULONGOKA 42
Faso ya kusadisa ba yina ke longoká Biblia na kukwenda tii na bateme—Kitini 2
“Sala ntangu nyonso keba na nge mosi mpe na malongi ya nge.”—1 TIM. 4:16.
NZIMBU 77 La lumière dans un monde enténébré
YINA BETO KE LONGOKA *
1. Wa’ faso beto me zaba ti kisalu ya predikasion ke vuukisá luzingu ya bantu?
KISALU ya predikasion ke vuukisá luzingu ya bantu! Wa’ faso beto me zaba yawu? Ntangu Yesu pesá musiku yina ke na kati Matayi 28:19, 20, yandi zonzá: “Beno kwenda, [. . .] beno kumisa bantu bilandi [. . .], beno pesa bawu bateme.” Samu na yinki ya ke mbote mingi na kuzwa bateme? Beto me lunga kuzwa bateme si beto ke na nsatu ya kuvuuka. Muntu yina ke na nsatu ya kuzwa bateme zola ndima ti, yandi lenda kuzwa luzingu ya ntangu nyonso kaka samu Yesu kufwa samu na beto mpe yandi vumbuka na lufwa. Ni mambu yayi apotre Piere zonzá na bampangi ya yandi bakristo: “Bateme [. . .] [ke] na vuukisá beno ntangu yayi [. . .] na nzila ya kuvumbuka na lufwa ya Yesu Kristo.” (1 Pi. 3:21) Na yawu, ntangu disiple ya malu-malu ke zwá bateme, yandi lenda vanda na kivuvu ya kuzinga ntangu nyonso.
2. Yinki ke na zonza 2 Timote 4:1, 2, na faso ya beto ya kulonga Biblia?
2 Na kukumisa bantu badisiple, beto zola zaba kulonga na faso ya mbote. (Tanga 2 Timote 4:1, 2.) Samu na yinki? Samu Yesu zonzá na beto: “Beno kwenda, [. . .] beno kumisa bantu bilandi [. . .], beno longa bawu.” Apotre Paul zonzá na “kulemba ve” na kisalu yayi, “na kusalak’ yawu beto ke vuukisa beto mosi mpe ba yina ke na wá beto.” Ni na yawu Paul zonzá: “Sala ntangu nyonso keba [. . .] na malongi ya nge.” (1 Tim. 4:16) Beto ke na nsatu ya kubongisa faso ya beto ya kulonga bantu si beto zola ba kuma badisiple. Na yawu, beto ke nwana samu na kuyidika malongi ya beto.
3. Yinki beto ke zonzila na artikle yayi na yina me tadila faso ya beto ya kulonga bantu Biblia?
3 Na zulu ya ntoto nyonso, beto ke longoká Biblia na bamilion ya bantu. Kasi faso me zonza artikle yina me luta, beto zola zaba faso beto lenda sadisa dyaka ya kulutila ba yina ke longoká Biblia na kuzwa bateme. Na artikle yayi, beto ke zonzila bamambu 5 yina beto nyonso zola sala, samu na kusadisa ba yina ke longoká Biblia na kukwenda tii na bateme.
SADILA BIBLIA NTANGU NGE KE LONGÁ
Lomba na mpangi yina zaba mingi na kimpeve na kusadisa nge na kusadila dyaka Biblia na faso ya mbote (Tala baparagrafe 4-6) *
4. Samu na yinki muntu yina ke longá Biblia ke zonzá ve mingi? (Tala note ya yisi ya paje.)
4 Beto ke zolá mambu ya Biblia yina beto ke longá. Na yawu, ya lenda puse beto na kuzonza mingi mpe na kukumisa masolo yinda. Kasi, muntu yina ke twadisá Yinzo ya Kengidi, kulongoka ya Biblia na kati kimvuka to na kati ya famiye, zolá zonza ve mingi. Beto nyonso zola sadila Biblia ntangu beto ke longá, kasi beto zola sala keba na kuzonza ve mingi. Mpe kusosa ve kuzonzila badetaye nyonso ya verse to ya mambu yina beno ke na zonzilaka. * (Yoa. 16:12) Kanisa na mambu ya Biblia yina nge zabá ntangu nge kuzwá bateme mpe yina nge me zaba bubu yayi. Ya lenda vanda ti, ntangu nge zwá bateme, nge zabá kaka malongi ya ntete ya Biblia. (Ebr. 6:1) Ya lomba na nge bamvula na kuzaba mambu ya Biblia yina nge me zaba bubu yayi. Na yawu, kusosa ve kufulusa yintu ya muntu yina ke na longoká na nge na malongi.
5. a) Faso ke na zonzá 1 Batesalonika 2:13, yinki beto ke na nsatu muntu yina ke longoká na beto zaba? b) Wa’ faso beto lenda nata bawu na kuzonza mambu yina ba ke na longoká na bantu ya nkaka?
5 Beto zola ti ba yina ke longoká na beto, zaba ti, mambu yina ba ke na longoká me katuka na kati ya Biblia. (Tanga 1 Batesalonika 2:13.) Wa’ faso beto lenda sala yawu? Nata bawu na kuzonza na bantu ya nkaka mambu yina ba ke na longoká. Ya vanda ve kaka ni nge muntu ke zonzá na yandi yinki verse ke na lakisa, kasi lomba yandi na kusala yawu. Sadisa yandi na kutala ti mambu yina beno me longoka na kati ya Biblia, me tadila mpe yandi. Na manima ya kutanga verse, yufula yandi bakestion yina ke sadisa yandi na kubasisa yina ke na yandi na kati ya ntima. (Luke 10:25-28) Na kifwani, nge lenda yufula yandi: “Wa’ faso verse yayi ke na sadisá nge na kutala mosi ya bifu ya mbote ya Yehova?” “Wa’ faso malongi ya Biblia yayi lenda sadisa nge na luzingu ya nge?” “Yinki mambu yayi nge me longoka ke na salá nge na ntima?” (Bin. 20:5) Yina me lutila mbote ke ve yina yandi zaba, kasi faso yandi ke zolá yawu mpe ke sadilá yawu.
6. Samu na yinki ya ke mbote na kunata mpangi yina zaba mingi na kimpeve na kukwenda longoka na muntu?
6 Nge me natá deja bampangi yina zaba mingi na kimpeve na kukwenda longoka Biblia na muntu yina ke longoká na nge? Nge lenda lomba bawu yinki ba ke na kanisa na faso ya nge ya kulonga mpe si nge me sadila Biblia na faso ya mbote. Nge zola vanda ya kukuluka si nge zola kubongisa faso ya nge ya kulonga. (Tala Bis. 18:24-26.) Na manima, lomba na mpangi yina zaba mingi na kimpeve, si yandi ke na tala ti muntu yina ke longoká na nge ke na simbá mambu yina yandi ke na longoká. Dyaka, nge lenda lomba na mpangi yina na kulongoka na muntu yango si nge ke vanda okipe na kati ya semaine mosi to mingi. Ya ke sadisa muntu yina ke longoká na nge na kukontinye kulongoka ba-semaine nyonso mpe na kutala ti ya ke mbote na kulongoka Biblia. Kukanisa ve ti kaka ni “nge” me lunga kulongoka na yandi. Na nyonso, nge zola yina ke mbote samu na yandi samu yandi kontinye kulongoka mambu ya Biblia.
LAKISA TI NGE KE NDIMÁ MPE KE ZOLÁ MAMBU YINA NGE KE LONGÁ
Zonzila yandi masolo ya bampangi yina salá bachanjema na luzingu ya bawu, samu ya sadisa yandi na kutala faso yandi mpe lenda sadila mambu yina yandi ke na longoká (Tala baparagrafe 7-9) *
7. Yinki ke sadisa muntu yina ke longoká na nge na kuzola mambu yina yandi ke na longoká?
7 Muntu yina ke longoká na nge zola tala ti nge ke zolá mpe ke ndimá mambu yina nge ke longá. (1 Tes. 1:5) Ya ke sala ti yandi zola mpe mambu yina yandi ke na longoká. Si okazion me talana, nge lenda zonza na yandi faso mambu ya Biblia sadisá nge na luzingu ya nge. Na yawu, yandi mpe lenda tala ti mambu ya Biblia ke sadisa yandi.
8. Yinki dyaka nge lenda sala na kusadisa muntu yina ke longoká na nge, mpe samu na yinki nge zola sala yawu?
8 Ntangu beno ke na longoká, zonzila yandi masolo ya bampangi yina kutaná na bamambu faso ya yandi. Nge lenda nata mpangi mosi ya kimvuka yina ekzample ya yandi lenda sadisa muntu yina ke longoká na nge. To nge lenda kuzwa masolo ya nkaka yina ke sadisa yandi na jw.org na rubrik “ La Bible transforme des vie. ” * Ba-artikle mpe bavideo yina yandi ke talá, ke nata yandi na kutala ti Biblia lenda sadisa yandi na kusala bachanjema na luzingu ya yandi.
9. Wa’ faso nge lenda nata muntu yina ke longoká na nge na kuzonza na bantu ya famiye ya yandi mpe bakamarade ya yandi mambu ya Biblia?
9 Si yandi ke ya kukwela, kento to bakala ya yandi ke longoka mpe Biblia? Si ve, bokila yandi na kuvanda na beno ntangu beno ke longoká. Sadisa yandi na kuzonza na bantu ya famiye ya yandi mpe bakamarade ya yandi mambu yina yandi ke longoká. (Yoa. 1:40-45) Wa’ faso ya kusadisa yandi? Nge lenda yufula yandi: “Wa’ faso nge lenda zonzila mambu yayi na bantu ya famiye ya nge?” to “Wapi verse ya Biblia nge lenda sadila na kuzonzila mambu yayi na kamarade ya nge?” Na faso yina, nge ke sadisa yandi na kuzaba bien faso ya kulonga. Nyonso yayi ke puse yandi na kubanda kupreche na kimvuka. Nge lenda yufula yandi si yandi zaba muntu ya nkaka yina ke na nsatu ya kulongoka Biblia. Si yandi zaba, kuvingila ve, bokila muntu yina mpe bika yandi longoka na muntu yango. Lakisa yandi video Comment se passe un cours biblique ? *
SADISA YANDI NA KUVANDA NA BAKAMARADE NA KATI YA KIMVUKA
Sadisa yandi na kuvanda na bakaramade na kati ya kimvuka (Tala baparagrafe 10-11) *
10. Faso ke na zonzá 1 Batesalonika 2:7, 8, wa’ faso baproklamatere lenda landa ekzample ya Paul?
10 Baproklamatere zola kipe bantu yina ke longoká na bawu. Samu ti ba lenda kuma batemwe ya Yehova na bilumbu ke kwiza. (Tanga 1 Batesalonika 2:7, 8.) Ya lenda vanda mpasi na bawu na kubika bakaramade ya bawu yina ke ve batemwe mpe kusala bachanjema samu na kusadila Yehova. Beto zola sadisa bawu na kuzwa bakamarade ya mbote na kati ya kimvuka. Vanda kamarade samu na yandi na kulutisá bantangu na yandi, ve kaka na ntangu yina beto ke longoká, kasi na ba-okazion kaka mpe. Mwa appel, mwa mesaje, to mwa visite ke lakisa yandi ti nge ke kipeke yandi.
11. Yinki beto zola ti bantu yina ke longoká na beto kuzwa na kati ya kimvuka, mpe samu na yinki?
11 Ba ke zonzá ti: “Bantu nyonso na bwala ke tulá diboko na kukulisa mwana.” Na yawu beto lenda zonza mpe ti: “Bantu nyonso na kimvuka ke tulá diboko samu na kukumisa muntu disiple.” Ntangu baproklamatere ke sadisá bantu yina ke longoká na bawu na kuzaba bampangi ya nkaka na kati ya kimvuka, bampangi yina lenda sadisa mpe bantu yango na kuvanda na kikamarade ya ngolo na Yehova. Bantu yina ke longoká na beto lenda tala kilengi na kusala kikamarade na bisadi ya Yehova yina lenda pesa bawu kuraje ntangu ba ke lutisá bantangu ya mpasi. Beto zola ti mosi na mosi ya ba yina ke longoká na beto tala ti, ba ke na plase ya bawu na kati ya kimvuka, mpe na kati ya famiye ya beto ya kimpeve. Beto zola ti luzolo yina ke talaná na kati ya beto, benda ba yina ke longoká na beto. Ya ke sala ti ya vanda ve mpasi na bawu na kubika bakamarade yina ke sadilá ve Yehova. (Bin. 13:20) Si bakamarade ya yandi yina, manga yandi, yandi zaba ti, yandi lenda kuzwa bakamarade ya mbote na kati ya organizasion ya Yehova.—Mrk. 10:29, 30; 1 Pi. 4:4
ZONZILA MINGI MAMBU YA KUPESA LUZINGU NA YEHOVA MPE BATEME
Ya ke na bima yina muntu yina ke longoká Biblia zola sala avant na kuzwa bateme! (Tala baparagrafe 12-13)
12. Samu na yinki beto zola zonzila na muntu yina ke longoká na beto mambu ya kupesa luzingu na Yehova mpe bateme?
12 Zonzila mingi mambu ya kupesa luzingu na Yehova mpe bateme. Rezon yina ke natá beto na kulongoka na muntu ni ya kusadisa yandi na kusadila Yehova mpe na kuzwa bateme. Na manima ya kulongoka Biblia na kati ya mwa bangonda, mpe si yandi me banda deja kukwiza na balukutakanu, yandi zolá zaba ti, beto zola kusadisa yandi na kukuma mosi ya batemwe ya Yehova.
13. Yinki muntu yina ke longoká Biblia zola sala avant na kuzwa bateme?
13 Ya ke na bima yina muntu yina ke longoká Biblia zola sala avant na kuzwa bateme! Ya ntete, yandi ke longoka na kuzaba mpe kuzola Yehova mpe kutula kiminu na Yandi. (Yoa. 3:16; 17:3) Yandi ke tunga kikamarade ya ngolo na Yehova mpe na bampangi ya kimvuka. (Ebr. 10:24, 25; Zaki 4:8) Mpe yandi ke nyonga mambu ya yimbi yina yandi vandá salá mpe ke vutukila dyaka ve yawu. (Bis. 3:19) Dyaka, yandi ke zonzila na bantu ya nkaka malongi yina yandi ke ndimaka. (2 Ko. 4:13) Na manima, yandi ke pesa luzingu ya yandi na Yehova, mpe ke lakisa yawu pwelele na bateme. (1 Pi. 3:21; 4:2) Ya ke kilumbu mosi ya kilengi mingi samu na muntu nyonso! Ntangu yandi ke na salá bima yina me lunga samu na kukwenda tii na bateme, kontinye na kufelisite yandi. Mpe sadisa yandi na kulemba ve.
VANDA NA KIFU YA KUTALÁ SI MUNTU YINA KE LONGOKÁ NA NGE KE NA KULA NA KIMPEVE
14. Wa’ faso proklamatere lenda zaba si muntu yina ke longoká na yandi ke na kula na kimpeve?
14 Beto zolá vanda na ntima ya yinda ntangu beto ke na sadisá muntu yina ke longoká Biblia na kuzwa bateme. Kasi beto ke mpe na nsatu ya kuzaba si yandi zola kusadila Yehova. Yandi ke na lakisá kwandi ti yandi ke na salá bangolo na kulanda misiku ya Yesu? To yandi ke zola kaka masolo ya Biblia samu na kulutisa ntangu?
15. Yinki ke lakisa proklamtere ti muntu yina ke longoká na yandi me yidama samu na kuzwa bateme?
15 Ntangu nyonso, sosa kuzaba si muntu yina ke longoká na nge ke na kula na kimpeve. Nge lenda yufula: Yandi ke sambilá kwandi Yehova? Yandi ke zonzilá kwandi yandi mambu yina ke na yandi na ntima? (Nku. 116:1, 2) Yandi ke zolá kwandi kutanga Biblia? (Nku. 119:97) Yandi ke kwandi na kifu ya kukwiza na balukutakunu? (Nku. 22:22) Yandi me sala kwandi bachanjema na luzingu ya yandi? (Nku. 119:112) Yandi me banda kwandi kuzonzila mambu yina yandi ke longoká na bantu ya famiye ya yandi? (Nku. 9:1) Yina me lutila nyonso, yandi ke kwandi na nsatu ya kukuma temwe ya Yehova? (Nku. 40:8) Si yandi ke na salá ve bangolo na mambu nyonso yayi beto me zonzila, sosa kuzaba samu na yinki mpe na malembe nyonso, solola na yandi pwelele na mambu yango. *
16. Na wapi ntangu nge zola bika kulongoka na muntu?
16 Baka ntangu ya kutala si nge ke kontinye kaka kulongoka na yandi. Nge lenda yufula: ‘Yandi ke prepareke ve baleson ya yandi? Yandi ke zola ve kukwiza na balukutakanu? Yandi ke na kontinyeke kaka na bifu ya yandi ya yimbi? Yandi ke ntete na kontinye na kukwenda na dibuundu yina yandi vandá?’ Si ya ke faso yina, kukontinye kulongoka na yandi ke nete nge ke na lakisá nage na muntu yina ke ve na nsatu maza kuzwa yandi! Si muntu yina ke longoká na beto ke na zola ve mambu yina beto ke na longak’ yandi mpe ke na salá ata bachanjema na luzingu ya yandi, samu na yinki kukontinye kulongoka na yandi?
17. Faso ke na zonzá 1 Timote 4:16, yinki baproklamatere nyonso zola sala?
17 Beto ke baká na ntima mosi responsabilite ya beto ya kukumisa bantu badisiple, mpe beto ke zolá kusadisa ba yina ke longoká na beto na kukwenda tii na bateme. Na yawu, ya ke mbote na kusadila Biblia samu na kulonga bantu mpe kulakisa bawu ti beto ke zolá mambu yina beto ke longá. Beto zola sadisa bawu na kuzwa bakamarade ya mbote na kati ya kimvuka. Mpe beto zola zonzila mingi mambu ya kupesa luzingu na Yehova mpe bateme. Dyaka vandá na kifu ya kutalá si muntu yina ke longoká na nge ke na kulá na kimpeve. (Tala tablo , “Yinki beto zolá sala samu na kunata ba yina ke longoká na beto tii na bateme.”) Beto ke na kilengi mingi ya kutula diboko na kisalu yayi ke vuukisá luzingu ya bantu! Beto zolá sala nyonso yina beto lenda sala samu na kusadisa ba yina ke longoká Biblia na beto na kukwenda tii na bateme.
NZIMBU 79 Qu’ils tiennent ferme dans la foi !
^ par. 5 Kulongoka Biblia na bantu ke kisalu mosi ya valere yina Yehova me pesa beto. Beto lenda sadisa ba yina ke longoká na beto na kukanisa mpe na kusala bamambu na faso yina Yehova ke zolaka. Artikle yayi ke zonzila pwelele wa’ faso beto lenda bongisa faso ya beto ya kulonga bantu.
^ par. 4 Tala artikle “ Pièges à éviter lors d’un cours biblique ” na Cahier Vie et ministère ya Septembre 2016.
^ par. 8 Kota na QUI SOMMES-NOUS ? > TÉMOIGNAGES ET ANECDOTES.
^ par. 9 Na JW Library®, kota na MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
^ par. 15 Tala ba-artikle ya kulongoka: “Luzolo mpe kifu ya kutondá Yehova ke nata nge na bateme” mpe “Nge me yidama samu na kuzwa bateme?” na Yinzo ya Kengidi ya Mars 2020.
^ par. 77 YINA BAFOTO KE NA ZONZILAKA: Na manima ya kulongoka na muntu, mpangi ya kento yina zaba mingi na kimpeve ke na sadisa mpangi ya nkaka ya kento na kutala ti yandi me lunga kuzonza ve mingi ntangu yandi ke longoká na muntu.
^ par. 79 YINA BAFOTO KE NA ZONZILAKA: Na kati ya kulongoka, muntu yina ke longoká Biblia ke na zaba faso ya kuvanda kento ya mbote. Na manima, yandi ke na zonzilá mambu yina yandi me longoka, na bakala ya yandi.
^ par. 81 YINA BAFOTO KE NA ZONZILAKA: Kento yango na bakala ya yandi ke na lutisá ntangu ya kilengi na yinzo ya mpangi mosi yina ba kutaná na Salle du Royaume.
