1. Ngapi omu twa yi diva asi sirugana sokutulisa po varongwa mulyo unene?

SIRUGANA sokutulisa po varongwa, ngasi parura vantu. Ngapi omu twa yi diva? Apa Jesus ga geve mpangera ezi za kara mwaMateusa 28:19, 20, age kwa tente asi: ‘Zendeni, . . . mu ka tulise po varongwa . . . , nokuvakuhwa.’ Ngapi omu kugwana ekuho ya kara nomulyo? Kugwana ekuho kuna kara sininke esi twa hepa kurugana yipo ngava ka tu parure. Muntu ogu ana hara kugwana ekuho, ga hepa kuyipura nawa-nawa asi ose ngatu ka gwana tupu eparu, morwa Jesus ga tu fira. Eyi yiyo nye mupositoli Peturusa ga tjangerere Vakriste vakwawo asi: ‘Ekuho kuna kumuparura ntaantani . . . kupitira mevhumbuko lyaJesus Kristusa.’ (1 Pet. 3:21) Yipo nye, apa muntu a gwana ekuho, age kuvhura a kare nehuguvaro lyokukaparuka narunye komeho.

2. Kuliza na-2 Timoteusa 4:1, 2, varongi musinke tuna hara kukara?

² Mokutulisa po varongwa, twa hepa kukara varongi wovawa. (Resa 2 Timoteusa 4:1, 2.) Morwasinke? Morwa Jesus kwa tu tantera asi: ‘Zendeni, . . . mu ka ninke varongwa . . . , nokukavaronga.’ Mupositoli Paurusa kwa tente asi twa hepa ‘kukovekeda’ ngorooro mosirugana esi ‘yeeyi nsene tu yi rugana, nga tu paruka kumwe nava vana kutupurakena.’ Morwa konda ozo, Paurusa kwa tente hena asi: “O litakamese nyamoge nerongo lyoge.” (1 Tim. 4:16) Mokumona asi mokutulisa po varongwa ntudi twa hepa kuvaronga, yipo nye twa hepa kukara varongi wovawa.

3. Yisinke natu ka zogera mosirongwa esi?

³ Ngesi ose kuna kuronga mamiliyona govantu Bibeli. Nye ngwendi momu ka tu yi zogerere mosirongwa sa ka pita, tuna  hara tu dive omu natu vatera vantu wovanzi yipo va ya kare varongwa vaJesus Kristusa ava va gwana ekuho. Mosirongwa esi tatu ka zogera yininke yitano eyi va hepa kurugana varongi yipo va vatere varongwa vawo va ture po ezokomeho dogoro kekuho.

4. Morwasinke murongi na nyokerera po kuuyunga unene nsene kuna kurugana elirongo lyoBibeli? (Tara nonkango dokonhi.)

⁴ Ose kwa hara unene yininke eyi atu rongo kutundilira moBibeli. Yipo nye, ose nampo kusimwitira yininke yoyinzi. Nye, yi kare asi kuna kupitisira elirongo lyoRuhungu ndi kuna kurugana elirongo lyoBibeli lyombungakriste ndi elirongo lyoBibeli nomurongwa goge, mupitisili ga hepa kunyokera po kuuyunga yininke yoyinzi. Nkenye murongi ga hepa kuruganesa nawa Bibeli nsene ta rongo. Yipo nye, ga hepa kutakamesa asi ga ha uyunga unene. Pasihonena, kapisi a faturura nayinye eyi ga diva kuhamena velise zongandi ndi sirongwa.  * (Joh. 16:12) Gazadara ko kediwo eli wa kere nalyo lyoBibeli apa wa gwene ekuho ntani neli ono kara nalyo ngesi. Nsene o gazadara ko, kuvhura o dimburure asi nare ove kwa divire tupu madi goBibeli. (Heb. 6:1) Ayo kwa ku gusire nomvhura dononzi komeho oya kare nediwo eli ono kara nalyo ngesi. Yipo nye, nyokera po kuronga murongwa goge yininke nayinye posiruwo simwe tupu.

5. (a) Kuliza 1 Vatesaronika 2:13, yisinke tuna hara kuvatera varongwa vetu va kwate egano? (b) Ngapi omu natu korangeda murongwa a uyunge kuhamena yininke eyi ana kulironga?

⁵ Tuna hara varongwa vetu va kwate egano asi eyi vana kulironga kuna kutunda moNonkango daKarunga. (Resa 1 Vatesaronika 2:13.) Ngapi omu natu yi rugana? Korangeda murongwa goge a tantere ko wopeke kuhamena eyi ana kulironga. Mevango lyokumufatwilira nkenye apa matjangwa, mu pura a faturure ko omu ana kugakwata egano. Vatera murongwa goge a dimburure asi Nonkango daKarunga yige nawa-nawa dina tamba. Mu pura mapuro aga naga mu vatera a uyunge omu ana kugazara ndi omu ana kulizuvha kuhamena matjangwa aga ana resa. (Ruk. 10:25-28) Pasihonena, mu pura asi: “Ngapi omu etjangwa eli lina kuvatere o dimburure yikara yimwe yaJehova?” “Ngapi omu yininke eyi ono lirongo moBibeli nayi kuvatera?” “Ngapi omu ono kulizuvha kuhamena yininke eyi ono lirongo?” (Yis. 20:5) Sininke somulyo sesi asi kapisi asi ediwo lyokuhura kupi ga kara nalyo murongwa, nye ga hepa kuhara eyi a lirongo nokuyitura pasirugana.

6. Morwasinke ya karera nomulyo o ze kelirongo lyoge lyoBibeli kumwe nomuzuvhisi ogu ga kara noudivi?

⁶ Apa o rugana elirongo lyoBibeli, ove kusimba ko vazuvhisi vamwe ava va kara noudivi ndi? Nsene ove kuyirugana, kuvhura o  va pure monkedi omu o rugana elirongo lyoge ntani nsene asi ove sili kuna kuruganesa Bibeli monkedi zongwa. Wa hepa kulinunupika nsene ono hara kukara murongi gomuwa. (Hetakanesa Yirugana 18:24-26.) Ntani kuvhura o pure hena muzuvhisi ogu ga kara noudivi nsene asi murongwa goge kuna kukwata egano usili womoBibeli. Kuvhura o pure muzuvhisi ogo hena yipo a lironge nomurongwa goge apa ngo dira kukara po ure wosivike ndi yivike yongandi. Eyi ngayi ninkisa elirongo lyoBibeli li twikire ntani ngayi vatera murongwa goge a dimburure omu elirongo lyoBibeli lya kara nomulyo. Wa ha gazara asi murongwa ogo goge tupu gelike, kwato gokuvhura kumuronga. Yosili, ove ono hara murongwa goge a twikire kulironga usili womoBibeli.

7. Yisinke nayi vatera murongwa yipo a hafere eyi ana kulironga?

⁷ Murongwa ga hepa ku yi dimburura asi ove kuronga noupampi ntani wa pura nawa-nawa eyi azi rongo Bibeli. (1 Tes. 1:5) Ano eyi ngayi mu tumangeda nage a hafere eyi ana kulironga. Kuvhura o mu tantere omu Bibeli za ku vatera o tjindje eparu lyoge. Nsene o yi rugana ngoso, age nga ya dimburura asi nage kuvhura zi mu vatere Bibeli meparu.

8. Yisinke hena wa hepa kurugana ntani morwasinke no yi ruganena?

⁸ Pelirongo lyeni lyoBibeli, tantera murongwa goge kuhamena yihonena yovanavazinyetu vamwe ava va ligwanekerere nomaudigu ngwendi gendi ntani nomu va ga fundire po. Mokuninka asi murongwa goge a gwanene mo uwa, kuvhura o piture ko munazinyetu gumwe ogu ga ligwanekerere noudigu ngwendi womurongwa goge. Ndi kuvhura o gwane yihonena yimwe yokukorangeda eyi ya kara momaRuhungu ganare koruha “Bibeli kurundurura eparu lyovantu” ntani kuvhura hena kuyigwana ko jw.org. * Yirongwa yangoso ntani novidiyo dangoso nga di vatera murongwa goge a dimburure asi ayo mulyo kutura pasirugana nompango domoBibeli meparu lyendi.

9. Ngapi omu no korangeda murongwa yipo a tantere ko vakaume vendi nekoro lyendi eyi ana kulironga?

⁹ Nsene murongwa ogu o lirongo nage ga kwara, mulikwali gwendi nage kulironga ndi? Nsene pira, mu zigida nage a ya kare pelirongo lyoBibeli. Korangeda murongwa goge a tantere ko vekoro lyendi novakaume vendi eyi ana kulironga. (Joh. 1:40-45) Ngapi omu no yi rugana? Kuvhura o mu  pure asi: “Ngapi omu nomu vhura kufatwilira sitwa esi vekoro lyeni?” ndi “etjangwa musinke muna hara kukaruganesa yipo mu ka fatwilire vakaume veni?” Monkedi zangoso, ove kuna kumudeura yipo nga kare murongi komeho. Makura apa nga wapera kukara muzuvhisi, age kuvhura nga twikire kuzuvhisa novanavazinyetu. Kuvhura o pure murongwa goge nsene ana diva ko gumwe ogu ana hara kulironga Bibeli. Nsene kweli, hetekera ko kugwana muntu ogo nokutameka kulironga nage. Mu likida vidiyo Ngapi ava rugana elirongo lyoBibeli? *

10. Kuliza 1 Vatesaronika 2:7, 8, ngapi omu murongi na honena Paurusa?

¹⁰ Varongi woBibeli va hepa kukara nosinka kovarongwa vawo. Tara varongwa woge asi komeho nawo ngava kara vapuli vakwetu. (Resa 1 Vatesaronika 2:7, 8.) Ayo kapisi ureru kwawo mokusiga vakaume vawo vanare womouzuni ntani va ture po marunduruko va karere Jehova. Twa hepa kuvavatera va gwane vakaume wovawa mombungakriste. Tulisa po ukaume nomurongwa goge pokukara nendi poyiruwo yapeke nye kapisi pelirongo lyeni tupu lyoBibeli. Nsene o mu tjangera mbudi ndi o mu bele, ngoyi likida asi wa kara nosinka kwendi.

11. Yisinke tuna harere varongwa vetu va gwane mombungakriste ntani morwasinke?

¹¹ Pwa kara sisewe simwe esi asi tanta asi: “Vantu navenye womomukunda vava hepa yipo va vhure kurera munona gumwe.” Mokulifana, kuvhura tu uyunge asi: “Mokuvatera murongwa gumwe, mbungakriste nazinye za hepa kulihameka mo.” Eyi yiyo nye a yi ninkisa varongi woBibeli wovawa va vatere varongwa vawo va lidive nava womombungakriste. Vanavazinyetu kuvatera varongwa owo yipo va tulise po elikwatakano lyenene kumwe naJehova ntani kuvakorangeda apa ava piti momaudigu. Tuna hara kuvatera nkenye murongwa, yipo a lizuvhe asi nage kwa hamena kombungakriste ntani tuna hara nkenye murongwa a ya hamene kepata lyovapuli vakwetetu. Ano eyi ngayi mu vatera a hagekese po ukaume novantu ava ngava dira kumuvatera a hare Jehova. (Yis. 13:20) Nsene asi vakaume vendi vanare ngava mu ligora, age nga kara nehuguvaro asi simpe kuvhura a gwane vakaume wovawa mombunga zaJehova.—Mar. 10:29, 30; 1 Pet. 4:4.

12. Morwasinke natu uyungira novarongwa vetu kuhamena eligawo nekuho?

¹² Tantera murongwa goge nkenye apa mulyo gokuligava nokugwana ekuho. Konda zeyi atu lirongere Bibeli novarongwa  kuna kara zokuvavatera va gwane ekuho nokukarera Jehova. Konyima zomakwedi gongandi apa murongwa a tameke kulironga Bibeli ntani unene po apa a tameke kuwiza komapongo, ga hepa kuyikwata egano asi sitambo selirongo kuna kara mokumuvatera a tameke kukarera Jehova nga gumwe goNombangi daJehova.

13. Yininke musinke ga hepa kurugana murongwa komeho a gwane ekuho?

¹³ Pwa kara yininke yokulisiga-siga eyi ga hepa kurugana murongwa komeho a gwane ekuho. Sokuhova, murongwa ga hepa kudiva Jehova nokumuhara ntani nokutura epuro mwendi. (Joh. 3:16; 17:3) Murongwa ga hepa hena kutulisa po elikwatakano naJehova ntani nokuwiza komapongo. (Heb. 10:24, 25; Jak. 4:8) Konyima ga hepa kuhageka yininke yoyidona ntani nokulitezurura kononzo dendi. (Yirug. 3:19) Kugusa ko oyo, epuro lyendi lya hepa kumutumangeda a tantere ko wopeke usili womoBibeli. (2 Kol. 4:13) Konyima zoyo, ga hepa kuligava kwaJehova nokugwana ekuho. (1 Pet. 3:21; 4:2) Eli kuna kara ezuva lyoruhafo sili. Ngomu murongwa ana kusikisa mo yitambo oyo, wa hepa kumupandadeka ntani nokumukorangeda a twikire kuza komeho.  

14. Ngapi omu murongi na konakona ezokomeho lyomurongwa gwendi?

¹⁴ Ngomu tuna kuvatera murongwa goBibeli a ture po ezokomeho dogoro a ka gwane ekuho, twa hepa kulididimikira. Nye twa hepa simpe kudivilisa nsena sili ana kara neharo lyokukarera Jehova. Poyili eyi ono kumona eyi yina kukulikida asi age kuna kulimburukwa konompangera daJesus ndi? Ndi age kuna hara tupu kulironga yininke yoyiwa moBibeli?

15. Yininke musinke ga hepa kutarurura murongi, yipo a dive nsene murongwa kuna kutura po ezokomeho?

¹⁵ Konakona nkenye apa ezokomeho eli ana kutura po murongwa. Pasihonena, age kutantera Jehova malizuvho gendi ndi? Age kukanderera kwaJehova ndi? (Epis. 116:1, 2) Age kuhafera kuresa Bibeli ndi? (Epis. 119:97) Age kuwiza nkenye apa komapongo ndi? (Epis. 22:22) Ga tura po marunduruko gamwe meparu lyendi ndi? (Epis. 119:112) Ga tameka kutantera ko vekoro lyendi novakaume vendi eyi ana kulironga ndi? (Epis. 9:1) Somulyo po, age ana hara kukara Mbangi zaJehova ndi? (Epis. 40:8) Nsene murongwa kapi ana kutura po ezokomeho mononkedi odo, hetekera  ko kudiva asi morwasinke ntani yi zogereni monkedi zongwa zombili. *

16. Yininke musinke yimwe nayi likida asi ngesi kuvhura o hagekese po elirongo lyoBibeli?

¹⁶ Lipura nyamoge poyiruwo noyiruwo nsene asi kuvhura o twikire kulironga nomurongwa goge. Pasihonena, kuvhura o lipure asi: ‘Murongwa gwange kuliwapaikira komeho tu ka lironge ndi? Age ga hara kuwiza komapongo ndi? Age kurugana simpe yirugana yoyidona ndi? Age simpe kwa hamena koukarelikarunga woyimpempa ndi?’ Nsene o dimburura asi kapi ana kuyisikisa mo kutwikira kulironga nomuntu ogo, ta yi fana ngwendi ono hara kuronga muntu omu ava zogo, nye age kapi ga hara kuhwilira momema. Nsene asi murongwa goge kapi a hafere eyi ana kulironga ntani kapi ana kutura po malitjindjo, eyi kulikida asi kapi ana hara kulironga.

17. Kuliza 1 Timoteusa 4:16, yisinke va hepa kurugana varongi woBibeli?

¹⁷ Ayo mulyo tu sikise mo situmbukira setu sokuninka varongwa ntani tuna hara kuvatera varongwa woBibeli va ture po ezokomeho dogoro kekuho. Yipo nye, twa hepa kuruganesa Bibeli apa atu rongo varongwa ntani twa hepa kuronga noupampi nokuyilikida asi twa yi pura eyi tuna kuvaronga. Twa hepa kukorangeda varongwa va tulise po vakaume wovawa mombungakriste. Ntani hena twa hepa kutantera varongwa vetu mulyo gokuligava kwaJehova nokugwana ekuho. Ano poyiruwo noyiruwo twa hepa kukonakona ezokomeho eli vana kutura po. (Tara kakende “ Eyi va hepa kurugana varongi yipo va vatere varongwa ngava gwane ekuho.”) Ose tuna hafa kweyi atu lihameke mosirugana esi ngasi parura vantu! Tu tokomeneni kurugana paapa twa hulira tu vatere varongwa vetu woBibeli va ture po ezokomeho dogoro ngava gwane ekuho.