1. Ino tulishi buyani ayi incito yesu yakushimikila ilapulusha bantu?

INCITO yakucafwa bantu kuba bashikwiiya ni ncito yeenga yapulusha bantu! Ino tulishi buyani? Yesu ndyaakapa mulawo ngotucana pa Mateyo 28:19, 20, wakaamba ayi: “Kamuya mukaiishe bantu . . . , kwaamba ayi babe bashikwiiya, akubabombeka.” Ino nceebonshi kubombekwa kulayandika? Muntu uli woonse alyeelete kubombekwa kwaamba ayi akapuluke. Muntu usuni kubombekwa alyeelete kushoma kwaamba ayi inga wacana buumi butamaani ceebo cakwaamba ayi Yesu wakatufwita akubushikwa. Nceceeco mutumwi Pita ncaakalwiitila Beneklistunyina ayi: “Kubombekwa uko kumupulusha bulya kwiinda mukubushikwa kwakwe Yesu Klistu.” (1 Pita 3:21) Aboobo na shikwiiya mupya wabombekwa, inga walangila kuba abuumi butamaani kunembo.

2. Ino 2 Timoti 2:24, 25 ilaamba ayi tulyeelete kuba beshikwiisha bali buyani?

² Kwaamba ayi tucafwe muntu kuba shikwiiya, tulyeelete kuba “mufundishi wiisha kabotu.” (Amubelenge 2 Timoti 2:24, 25.) Ino nceebonshi? Yesu wakatupa mulawo wakwaamba ayi: “Kamuya mukaiishe bantu, . . . kwaamba ayi babe bashikwiiya.” Mutumwi Paulo wakaamba ayi “kotolelela” muncito iyo, “ceebo mukucita boobo ulaakulipulusha omwiine alimwi abaabo bakukutika.” Nceceeco Paulo ncakaambila ayi: “Bikila maano . . . ku kwiisha kwako.” (1 Timo. 4:16) Mukwiinga tulyeelete kwiisha bantu kwaamba ayi babe bashikwiiya, tulyeelete kunookwiisha kabotu.

3. Ino nshiinshi nsheshi twiiye mumutwi uyu pamakani ashiiyo sha Baibo?

³ Tulacita shiiyo sha Baibo abantu baanji nsengwe yoonse. Ano bweenka mbotwakeeya mumutwi wamana, tulisuni kushiba  nsheenga twaciita kwaamba ayi tucafwe baanji kuba bashikwiiya bakwe Yesu Klistu bakabombekwa. Mumutwi uyu, tutokwiiya shintu shimwi shosanwe shikwiisha uli woonse nshaeelete kucita kwaamba ayi acafwe shikwiiya kuya panembo akubombekwa.

4. Ino nceebonshi shikwiisha taeelete kunokwaamba bunene ndyatoocita ciiyo ca Baibo? (Amubone futunoti.)

⁴ Tulyasuni abuumbi makani ngotwiisha kuswa mu Maswi akwe Lesa. Aboobo inga twasuna kubandika shiinji. Nacibi boobo, inga caba ayi tutootanjilila Ciiyo ca Njashi Yamulindilishi, Ciiyo ca Baibo Calibungano, na ciiyo ca Baibo muncito yakushimikila, uyo utoocita ciiyo taeelete kwaamba bunene. Shikwiisha uli woonse alisuni kusebensesha kabotu Baibo ndyaatokwiisha, aboobo alyeelete kuleya kwaamba bunene akusansulula shoonse nshacishi palilembo na mutwi utobandikwa. * (Joni 16:12) Amuyeeye nshomwakalinga kucishi kuswa mu Baibo ndyemwakabombekwa anshomushi pacecino ciindi. Mpashi ciindi ndyemwakabombekwa mwakalinga kushibo njiisho shitaanshi shamu Baibo. (Ebu. 6:1) Cakamutolela myaaka kwaamba ayi mwiiye nshemushi pacecino ciindi, aboobo amuleye kwiisha shikwiiya mupya shintu shiinji paciindi comwi.

5. (a) Kweelana a 1 Bene Tesalonika 2:13, ino nshiinshi nshetusuni ayi shikwiiya ashibe? (b) Ino inga twacita buyani kwaamba ayi tucafwe shikwiiya kwaamba pashintu nshatokwiiya?

⁵ Tulisuni kwaamba ayi shikwiiya ashibe ayi nshatokwiiya shitooswa mu Baibo. (Amubelenge 1 Bene Tesalonika 2:13.) Ino nshiinshi nsheenga twaciita? Amuyuminishe shikwiiya kwaamba pamakani ngatokwiiya. Muciindi cakunoomusansulwita Malembo lyoonse, amulwiite shikwiiya kwaamba ayi amusansulwite. Amumucaafwe kubona mbweenga wakonkela Maswi akwe Lesa. Amumwiipushe miipusho yeenga yamucafwa kwaamba mbwayeeya alimwi ambwalinyumfwa pamalembo ngabelenga. (Luka 10:25-28) Kucakubonenaako, amumwiipushe ayi: “Ino ngumubo nshi wakwe Yehova ngomweeya kuswa kulilembo ili?” “Ino makani aya ngomweeya kuswa mu Baibo inga amucafwa buyani?” “Ino mutolinyumfwa buyani pamakani aya ngomweeya?” (Tus. 20:5) Cintu ciyandika abuumbi teshi kufula kwa makani shikwiiya ngwaashi, sombi nkusuna akukonkela nshatokwiiya.

6. Ino nceebonshi ncintu cibotu kuyaako ashikushimikila ucishi kabotu kwiisha kuciiyo?

⁶ Sa mulayaako abeshikushimikila bamwi bacishi kwiisha kabotu, ndyemutooya kushiiyo shanu? Na mwacita boobo, inga mwabeepusha  kumulwiita mbomwacita ciiyo alimwi na mwalinga kusebensesha kabotu Baibo ndyemwalinga kwiisha. Mulyeelete kuliceesha na mulisuni kuba shikwiisha ucishi kwiisha kabotu. (Amweelanye a Milimo 18:24-26.) Pesule, amumwiipushe shikushimikila ucishi kwiisha kabotu na shikwiiya atoonyumfwishisha nshatokwiiya. Alimwi inga mwamusenga ayi akamucitileko ciiyo na mulaakuswawo kwansondo yomwi na kwiindaawo. Kucita boobo kulaakupa kwaamba ayi ciiyo citolelele akucafwa shikwiiya kubona kuyandika kwa ciiyo. Amuleye kulinyumfwa ayi ici nciiyo “cangu” alimwi taakuwo umwi weenga wayaako. Alimwi ncakutatoonsha kwaamba ayi mulisuni kwaamba ayi shikwiiya Baibo wanu atolelele kwiiya shiinji akuya panembo.

7. Ino nciinshi ceenga cafwa shikwiiya kukondwa anshatokwiiya?

⁷ Shikwiiya alyeelete kubona kwaamba ayi amwebo mulisuni akushoma Baibo nshoiisha. (1 Tesa. 1:5) Lyalo alakwe alaakuba ukondetwe anshatokwiiya. Mpashi inga mwamulwiitako kukonkela njiisho shamu Baibo mbokwamucafwa mubuumi bwanu. Ici cilaakumupa kushiba kwaamba ayi alakwe Baibo inga yamucafwa mubuumi.

8. Ino nshiinshi shimwi nsheenga mwaciita kwaamba ayi mucafwe shikwiiya, alimwi ino nceebonshi?

⁸ Ndyemutoocita ciiyo ca Baibo, amulwiite shikwiiya shakubonenaako sha bamakwesu abenankashi bakacikonsha kukoma mapensho eelene aayo ngaacite. Mpashi inga mwayaako a shikushimikila umwi wamulibungano ucite cakubonenaako ceenga cacafwa shikwiiya. Na mpashi inga mwalangoola makani ashakacitika acanika pa jw.org. Makani ayo na mavidyo inga acafwa shikwiiya kushiba kwaamba ayi njiisho shamu Baibo inga shamucafwa mubuumi bwakwe.

9. Ino inga mwacita buyani kwaamba ayi mucafwe shikwiiya kunoolwiitako beshikamukowa alimwi abeshicibusa bakwe nshatokwiiya?

⁹ Na shikwiiya ali mucikwati, sa beebaye na bakaakwe abalo batokwiiya? Na tabatokwiiya, amubeete paciiyo. Amumuyuminishe shikwiiya kunoolwiita beshikamukowa alimwi abeshicibusa bakwe nshatokwiiya. (Joni 1:40-45) Munshila nshi? Mpashi inga mwamwiipusha ayi: “Ino cancine ici inga mwacisansulula buyani kuli shikamukowa?” na “Ino ndilembo nshi ndyeenga mwasebensesha kwaamba ayi mucafwe mubyaanu?” Kucita boobo kulacafwa shikwiiya kwiiya bwakwiisha. Lyalo na  weelela, inga watalika kwaabanamo lubasu muncito yakushimikila mbuli shikushimikila utana kubombekwa. Inga mwamwiipusha na kuli bamwi mbwaashi beenga basuna kwiiya Baibo. Na nkobali, amubandike akwe muntu uyo akubamba bubaambo bwakwiiya akwe Baibo. Amumutondeshe kavidyo kacite mutwi utokwaamba ayi Ino Ciiyo ca Baibo Cilacitwa Buyani? *

10. Kweelana a 1 Bene Tesalonika 2:7, 8, ino shikwiisha inga wacikonkela buyani cakubonenaako cakwe Paulo?

¹⁰ Beshikwiisha balyeelete kutondesha kubikila maano kuli shikwiiya wabo. Amubone shikwiiya mbuli muntu weshi akabe mukwesu na nankashi kunembo. (Amubelenge 1 Bene Tesalonika 2:7, 8.) Teshi cuubu shikwiiya kushiya beshicibusa mbakalinga kucite akwaalula buumi kwaamba ayi eelele kusebensela Yehova. Tulyeelete kumucafwa kushiba mbweenga wacana beshicibusa bancine mulibungano. Amube shicibusa wakwe kwiinda mukucana ciindi cakuba akwe pomwi paciindi cimwi kuteshibo paciindi ndyemutokwiiya akwe. Inga mwatondesha ayi mulamubikila maano kwiinda mukumutuminako fooni, meseji, na kumufwakashilako.

11. Ino nshiinshi nshetusuni ayi shikwiiya akacane mulibungano, alimwi ino nceebonshi?

¹¹ Kuli kashimpi kakwaamba ayi: “Mushi woonse uleelikwaamo kwaamba ayi mwaana akule kabotu.” Aboobo inga twaamba ayi: “Libungano lyoonse lileelikwaamo kwaamba ayi shikwiiya aye panembo.” Nceceeco abo bacishi kabotu kwiisha Baibo balacafwa shikwiiya wabo kushiba bamwi mulibungano beenga bamuyuminisha. Lyalo shikwiiya inga wasangalala akucanika pomwi abantu bakwe Lesa, abo beenga bamucafwa kutola panembo bushicibusa bwakwe a Yehova akumuyuminisha na wacana mapensho. Tulisuni kwaamba ayi shikwiiya uli woonse anoolinyumfwa kuba lubasu lwa libungano alimwi amukwashi wesu wakumushimu. Tulisuni kwaamba ayi asene pafwiifwi amukwashi wesu wabamakwesu abenankashi bacite lusuno. Lyalo cilaakuba cuubu kwaamba ayi acileeke kucanika abantu batabete kabotu. (Tus. 13:20) Na bantu mbaakalinga kucanikaabo kale kale bamutalamuka, alaakushiba kwaamba ayi inga wacana beshicibusa bancinencine mulibunga lyakwe Yehova.​—Maako 10:29, 30; 1 Pita 4:4.

12. Ino nceebonshi tulyeelete kubandika pamakani akulyaaba akubombekwa?

¹² Lyoonse mulyeelete kubandika pa kuyandika kwa kulyaaba kuli Yehova alimwi  akubombekwa. Mukwiinga luyaando lwakwiiya Baibo amuntu nkumucafwa kwaamba ayi atalike kusebensela Yehova akubombekwa. Pesule lyakwiiya Baibo kwa myeenshi iniini alimwi bunene bunene na watalika akusa kumabungano, alyeelete kushiba ayi tulisuni kumucafwa kuba Kamboni wakwe Yehova.

13. Ino shikwiiya alyeelete kucita nshi kwaamba ayi eelele kubombekwa?

¹³ Kuli shiinji shikwiiya Baibo usuni kubombekwa nshaeelete kucita! Cakutaanguna, alyeelete kushiba Yehova, kumusuna alimwi akumushoma. (Joni 3:16; 17:3) Lyalo alyeelete kuba shicibusa wakwe Yehova abamakwesu abenankashi mulibungano. (Ebu. 10:24, 25; Jemu. 4:8) Lyalo mukuya kwaciindi, alyeelete kulinyumfwa cibiibi pashintu shibiibi nshaakalinga kucita alimwi akucileka. (Milimo 3:19) Alimwi alyeelete kulwiitako bamwi nshaashoma. (2 Koli. 4:13) Lyalo alyeelete kulyaaba kuli Yehova alimwi akutondesha kulyaaba kwakwe kwiinda mukubombekwa. (1 Pita 3:21; 4:2) Alimwi ubu bulaba bushiku busangalasha abuumbi kumuntu uli woonse! Na shikwiiya atoocita nshaeelete kucita kwaamba ayi abombekwe, amumuluumbe. Alimwi amutolelele kumuyuminisha kuya panembo.

14. Ino shikwiisha inga wacita buyani kwaamba ayi ashibe na shikwiiya atooya panembo?

¹⁴ Tulyeelete kukalika moyo ndyetutocafwa shikwiiya kwaamba ayi aye panembo akubombekwa. Nacibi boobo, tulyeelete kumwiipusha na alisuni kusebensela Yehova Lesa. Sa shikwiiya atootondesha ayi alakonkela milawo yakwe Yesu, na mpashi alisunibo kwiiya makani asangalasha amu Baibo?

15. Ino inga twashiba buyani ayi shikwiiya atooya panembo?

¹⁵ Lyoonse amubone na shikwiiya atooya panembo. Kucakubonenaako, sa alaamba mbwaalinyumfwa pali Yehova? Sa alapaila kuli Yehova? (Kulu. 116:1, 2) Sa alanyumfwa kabotu kubelenga Baibo? (Kulu. 119:97) Sa alesa kumabungano lyoonse? (Kulu. 22:22) Sa kuli nshakaalula mubuumi kwaamba ayi atondeshe ayi atokonkela nshatokwiiya? (Kulu. 119:112) Sa wakatalika kulwiitako beshikamukowa alimwi abeshicibusa nshatokwiiya? (Kulu. 9:1) Alimwi ciyandika abuumbi, sa alisuni kuba Kamboni wakwe Yehova? (Kulu. 40:8) Na taakuwo nabi comwi ncaatoocita pasheeshi nshetwaambawo, munshila yeenga taimukalashi, amweeleshe kushiba citolengesha alimwi akubandikaakwe  kabotu, sombi cakuteenda mweela. *

16. Ino nshiinshi sheelete kutupa kucileka kwiisha muntu?

¹⁶ Ciindi aciindi amweeleshe kubona na inga mwatolelela aciiyo nabi sobwe. Amuliipushe ayi: ‘Sa shikwiiya alaalilwa kulibambila? Sa taasuniiwo kusa kumabungano? Sa watolelela amibo itabete kabotu? Sa watolelela kuya kubupailishi bwakubeca?’ Na cikumbulo kumiipusho yoonse iyi ngu ee, kutolelela kwiiya akwe inga kwaba anga nkwiisha muntu bwa kusamba pamaanshi utasuni kutontola! Na shikwiiya tatotondesha kulumba pashintu nshatokwiiya alimwi taasuni kwaalula buumi bwakwe, tatweelete kutolelela kwiiya akwe.

17. Kweelana a 1 Timoti 4:16, ino shikwiisha Baibo uli woonse alyeelete kucita buyani?

¹⁷ Kukumanisha mukuli wesu wakwiisha bantu kuba bashikwiiya ncintu ciyandika abuumbi, aboobo tulisuni kucafwa shiiyo shesu sha Baibo kuya panembo akubombekwa. Nceceeco tulisuni kusebensesha bunene Baibo ndyetutokwiisha alimwi akwaamba munshila itoondesha mbotusuni akushoma nshetutokwiisha. Tulayuminisha shikwiiya kucana beshicibusa mulibungano. Alimwi tulayuminisha kuyandika kwa kulyaaba akubombekwa, lyalo ciindi aciindi kubona na shikwiiya atooya panembo. (Amubone kabokosi kacite mutwi utokwaamba ayi “ Shikwiisha Nshaeelete Kucita Kwaamba ayi Acafwe Shikwiiya Kuya Panembo Akubombekwa.”) Tulikondetwe kwaamba ayi twakapekwa coolwe cakwabanaamo lubasu muncito iyi ipulusha bantu! Atube bashinishite kucita nsheenga twacikonsha kwaamba ayi tucafwe shiiyo shesu sha Baibo kuya panembo akubombekwa.