1. Shu awˬ laꞈ gʼawˇ hpehꞈ la tuˬ maˍ piˇ ve lehˬ a shaꞈ htaꞈ ga piˇ ve kanˉ hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?

 Shu awˬ laꞈ gʼawˇ hpehꞈ la tuˬ maˍ piˇ ve lehˬ a shaꞈ htaꞈ ga piˇ ve kanˉ hpehꞈ ve yoˬ. Ngaˬ hui hkʼaˬ hkʼe te shiˍ gʼa ve le? Awˬ lawn chi ve Maꞈhtehˍ liꞈ 28:19, 20 hkʼaw Yeˍsuˆ kʼoˆ ve, ‘nawˬ hui kʼai leh, ngaˬ ve awˬ laꞈ gʼawˇ hpehꞈ la tuˬ ca te leh yawˇ hui htaꞈ Baˆtiˆsaˬ piˇ˗oˆ.’ Baˆtiˆsaˬ haꞈ yuˬ ve lehˬ a yeˇ uiˍ jaˇ. Ponˬ laˇ ve htaꞈ ngaˬ hui gʼa gaˇ ve kʼo, Baˆtiˆsaˬ gʼa haꞈ yuˬ cawˇ ve yoˬ. Baˆtiˆsaˬ haꞈ yuˬ gaˇ ve chaw lehˬ, yawˇ gʼa ponˬ tuˬ ve awˬ hkʼaˇ Yeˍsuˆ htaiˍ hkʼawꞈ laˇ ve leh kʼawꞈ teꞈ tu la ve htaꞈ gʼa yonˍ ve yoˬ. Chi htaꞈ pa taw, Pawˇluꞈ Hkriꞈ yaˇ htaꞈ kʼoˆ piˇ ve, ‘Yeˍsuˆ Hkriꞈ kʼawꞈ teꞈ tu la ve htaꞈ nawˬ hui yonˍ ve pa taw, chi beuꞈ Baˆtiˆsaˬ lehˬ nawˬ hui htaꞈ ponˬ laˇ ve yoˬ.’ (1 Peˍtruˆ 3:21) Hkʼe te leh, Baˆtiˆsaˬ haꞈ yuˬ leh Yeˍsuˆ ve awˬ laꞈ gʼawˇ hpehꞈ la ve chaw gʼa ponˬ tuˬ htaꞈ dawˇ law ve yoˬ.

2. 2 Tiˆmoˉseˍ liꞈ 4:1, 2 hkʼaw kʼoˆ ve, ngaˬ hui maˍ ve hkʼaˬ hkʼe ve chaw hpehꞈ cawˇ ve le?

² Shu awˬ laꞈ gʼawˇ hpehꞈ la tuˬ, ngaˬ hui “maˍ piˇ” puiˉ ve chaw gʼa hpehꞈ cawˇ ve yoˬ. (2 Tiˆmoˉseˍ 4:1, 2 gʼaw sheˍ.) Aˬ htoꞈ ma pa taw le? Yeˍsuˆ kʼoˆ ve, ‘nawˬ hui kʼai leh, ngaˬ ve awˬ laꞈ gʼawˇ hpehꞈ la tuˬ ca te˗o.’ Leh tcuh yaˇ Pawˇluꞈ kaꞈ kʼoˆ ve, “shaˍ tiꞈ te leh” kanˉ chi ve htaꞈ te chehˇ ve kʼo, “nawˬ awˬ to htaꞈ maˇ kʼoˆ, nawˬ ve hkawˇ htaꞈ gʼa kaˇ ve chaw teˇ hpaˍ htaꞈ maˇ kʼoˆ, nawˬ htaiˍ hkʼawꞈ piˇ tuˬ yoˬ.” Awˬ hkʼaˇ chi htaꞈ pa taw Pawˇluꞈ kʼoˆ ve, ‘nawˬ maˍ piˇ ve awˬ ceuˬ teˇ hpaˍ htaꞈ shaˍ tiꞈ te leh yeˬ chehˇ˗oˆ’ (1 Tiˆmoˉseˍ 4:16) Shu awˬ laꞈ gʼawˇ hpehꞈ la tuˬ ga piˇ ve lehˬ maˍ piˇ ve htaꞈ caˉ daꞈ ve pa taw, ngaˬ hui maˍ ve htaꞈ hkʼa dehꞈ cheuˬ la tuˬ te gaˇ ve yoˬ.

3. Liꞈ hpu maˍ ve awˬ hkʼaˇ awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 ³ Chi teˇ hkui ngaˬ hui laiˉ lanˬ gʼaˇ htaꞈ Liꞈ hpu maˍ piˇ chehˇ ve yoˬ. Yaꞈ hkʼaˇ, peuˬ taˉ ve teˇ lawn hkʼaw gʼa henˇ ve, yawˇ hui uiˍ la mvuh la leh Baˆtiˆsaˬ haꞈ yuˬ tuˬ hkʼaˬ hkʼe ga piˇ gʼa ve ngaˬ hui shiˍ gaˇ ve yoˬ. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ ga piˇ ve, Liꞈ hpu maˍ ve chaw hkʼaˬ hkʼe gʼa te cawˇ ve awˬ lawn chi ve hkʼaw 5 hkʼaˇ htaꞈ teˇ geh henˇ tuˬ yoˬ.

4. Aˬ htoꞈ ma te ngaˬ hui a shu yawˇ awˬ to htaꞈ gʼa yuˬ tiˍ cawˇ ve le? (Awˬ maiˉ htaꞈ nyi sheˍ.)

⁴ Ngaˬ hui Liꞈ hpu hkʼaw ve awˬ ceuˬ maˍ ve htaꞈ haꞈ ve pa taw, chi ve htaꞈ caˉ daꞈ ve ngaˬ hui kʼoˆ ve anˇ tuˬ maˇ loˍ. Liꞈ hpu maˍ ve chaw, Shaw nyi kuiˬ Taꞈ yehˬ sheh kʼai paˍ, Hkriꞈ yaˇ awˬ moˍ Liꞈ hpu henˇ ve sheh kʼai paˍ hpehꞈ ve htawˇ maˇ kʼoˆ, tawˇ chi ma ma maˇ yaw cawˇ. Ngaˬ hui hkʼaˬ hkʼe htaˇ maˍ ve htawˇ, Liꞈ hpu htaꞈ hkʼa dehꞈ yehˇ gaˇ ve yoˬ. Chi htaꞈ pa taw, a shu yawˇ awˬ to htaꞈ yuˬ tiˍ leh Liꞈ hpu hkʼaw ngaˬ hui shiˍ ve hkʼa peu˗eˬ maˇ kʼoˆ maˍ piˇ cawˇ. * (Yoˇhanˬ 16:12) Nawˬ Baˆtiˆsaˬ haꞈ yuˬ htaˇ ve htaꞈ dawˇ nyi sheˍ. Chi ve teˇ yanˇ lehˬ nawˬ Liꞈ hpu hkʼaw ve awˬ lawn hkʼa dehꞈ maˇ shiˍ sheˍ ve yoˬ hehˉ. Chi teˇ hkui shiˍ ve hkʼe shiˍ htaˇ nawˬ awˬ yanˇ laiˉ hkʼawꞈ gʼa yehˇ ve yoˬ hehˉ. Chi htaꞈ pa taw, nawˬ shiˍ ve hkʼe leˇ haˆ haˆ taˇ kʼoˆ maˍ piˇ.—Heˍbrehˇ 6:1.

5. (a) 1 Hteˇsaˍlawˇniˆ liꞈ 2:13 hkʼaw kʼoˆ taˍ ve hkʼe, Liꞈ hpu henˇ ve chaw htaꞈ ngaˬ hui hkʼaˬ hkʼe na gʼa tcuh gaˇ ve le? (b) Liꞈ hpu henˇ ve chaw yawˇ gʼa henˇ taˍ ve awˬ ceuˬ htaꞈ kʼoˆ tuˬ ngaˬ hui hkʼaˬ hkʼe ga piˇ cawˇ ve le?

⁵ Liꞈ hpu henˇ ve chaw Liꞈ hpu hkʼaw gʼa henˇ ve awˬ ceuˬ Gʼuiˬ sha ve tawˇ hkawˇ hpehꞈ ve tehꞈ yawˇ htaꞈ na gʼa tcuh gaˇ ve yoˬ. (1 Hteˇsaˍlawˇniˆ 2:13 gʼaw sheˍ.) Chi ngaˬ hui hkʼaˬ hkʼe te gʼa tuˬ le? Ngaˬ hui Liꞈ hpu awˬ tawn ceh tiˉ kʼoˆ maˍ piˇ ve aꞈ kehˉ yawˇ gʼa henˇ taˍ ve awˬ ceuˬ htaꞈ kʼoˆ tuˬ ngaˬ hui awˬ gʼaˇ piˇ sheˍ. Yawˇ gʼa henˇ taˍ ve awˬ ceuˬ ngaˬ hui htaꞈ kʼoˆ maˍ laˇ tcuh cawˇ ve yoˬ. Liꞈ hpu hkʼaw yawˇ htaꞈ hkʼaˬ hkʼe caˉ daꞈ ve leh hkʼaˬ hkʼe yuˬ yehˇ gʼa ve yawˇ mawˬ tuˬ ngaˬ hui ga piˇ gʼa ve yoˬ. Liꞈ hpu awˬ tawn yawˇ gʼa gʼaw ve hkʼaˬ hkʼe dawˇ ve na piˇ sheˍ. (Luˉkaꞈ 10:25-28) Tawˇ pa haˉ te kʼo, “Liꞈ hpu awˬ tawn chi Yaˬhoˉvaˬ ve te hkʼaˇ dawˇ hkʼaˇ nawˬ hkʼaˬ hkʼe mawˬ ve le?”, “Henˇ chehˇ ve awˬ ceuˬ chi nawˬ awˬ pon awˬ bon hkʼaˬ hkʼe cawˬ ve le?”, “Nawˬ henˇ gehˇ sheˍ ve awˬ lawn htaꞈ hkʼaˬ hkʼe dawˇ ve le?” Na hkawˇ chi teˇ hpaˍ yawˇ htaꞈ na piˇ sheˍ. (Tawˇ naˉ ve 20:5) Liꞈ hpu henˇ ve chaw yawˇ hkʼaˬ hkʼe taw shiˍ ve htaꞈ a yeˇ uiˍ ve maˇ heˆ. Yaꞈ hkʼaˇ, yawˇ henˇ ve awˬ ceuˬ htaꞈ haꞈ leh yuˬ yehˇ ve a yeˇ uiˍ jaˇ.

6. Awˬ viˉ awˬ nyi hpehꞈ laˬ jaw ve chaw htaꞈ shiˍ leh Liꞈ hpu teˇ geh maˍ˗e ve aˬ htoꞈ ma te daꞈ jaˇ ve le?

⁶ Awˬ viˉ awˬ nyi hpehꞈ laˬ jaw ve chaw htaꞈ shiˍ leh Liꞈ hpu henˇ chehˇ ve chaw geh Liꞈ hpu ca maˍ˗e jaw˗aw laˇ? Nawˬ Liꞈ hpu yehˇ leh maˍ ve awˬ hkʼaˇ hkʼaˬ hkʼe kʼai ve yawˇ htaꞈ na piˇ sheˍ. Nawˬ Liꞈ hpu maˍ ve hkʼa dehꞈ cheuˬ gaˇ ve kʼo, nyi ma gʼa nuˇ  nehˬ cawˇ ve yoˬ. (Tcuh yaˇ 18:24-26 htaꞈ tehˆ daꞈ sheˍ.) Nawˬ geh Liꞈ hpu henˇ ve chaw henˇ ve awˬ ceuˬ htaꞈ na gʼa˗aw laˇ? tehꞈ, teˇ geh kʼai ve chaw htaꞈ na nyi piˇ sheˍ. Nawˬ maˇ chehˇ htaˇ kʼo yawˇ nawˬ awˬ tanˬ Liꞈ hpu maˍ piˇ tcuh kaꞈ gʼa ve yoˬ. Chi hkʼe te ve kʼo, nawˬ geh Liꞈ hpu henˇ chehˇ ve chaw hkʼaˬ htaˆ kaꞈ Liꞈ hpu gʼa henˇ leh Liꞈ hpu henˇ ve a yeˇ uiˍ jaˇ ve tehꞈ yawˇ shiˍ la ve yoˬ. Nawˬ tiˉ veh tiˍ taˍ leh nawˬ geh Liꞈ hpu henˇ chehˇ ve chaw hpehꞈ ve ceh taˇ dawˇ. Shu nawˬ awˬ tanˬ Liꞈ hpu maˇ maˍ piˇ gʼa taˬ tehꞈ taˇ dawˇ. Liꞈ hpu henˇ ve chaw htaꞈ Liꞈ hpu maˍ piˇ leh uiˍ la mvuh la gʼa tcuh gaˇ ve yoˬ.

7. Liꞈ hpu henˇ ve chaw yawˇ gʼa henˇ taˍ ve awˬ ceuˬ htaꞈ haꞈ leh ha lehˬ tuˬ hkʼaˬ hkʼe ga piˇ gʼa ve le?

⁷ Nawˬ haꞈ pehnˇ ve, nyi ma pfuhˇ ve, Liꞈ hpu hkʼaw awˬ tehˬ ve htaꞈ yonˍ ve tehꞈ Liꞈ hpu henˇ ve chaw htaꞈ mawˬ tcuh sheˍ. (1 Hteˇsaˍlawˇniˆ 1:5) Yawˇ chi hkʼe gʼa mawˬ htaˇ, yawˇ gʼa henˇ taˍ ve awˬ ceuˬ htaꞈ haꞈ leh ha lehˬ tuˬ yoˬ. Liꞈ hpu hkʼaw nawˬ gʼa henˇ ve awˬ ceuˬ nawˬ awˬ pon awˬ bon hkʼaˬ hkʼe gʼa ve yawˇ htaꞈ kʼoˆ maˍ piˇ sheˍ. Liꞈ hpu hkʼaw yawˇ gʼa henˇ ve awˬ ceuˬ yawˇ awˬ pon kaꞈ awˬ bon cawˬ ve tehꞈ mawˬ tuˬ yoˬ.

8. Liꞈ hpu henˇ ve chaw htaꞈ nawˬ hkʼaˬ hkʼe ga piˇ gʼa sheˍ ve le? Leh aˬ htoꞈ ma te nawˬ chi hkʼe te cawˇ ve le?

⁸ Liꞈ hpu teˇ geh henˇ htaˇ, Liꞈ hpu henˇ ve chaw gʼa hpuˇ ve hkʼa shuˍ awˬ viˉ awˬ nyi kaꞈ gʼa hpuˇ ve awˬ lawn kʼoˆ maˍ piˇ leh awˬ viˉ awˬ nyi shoꞈ shaꞈ ve awˬ lawn cawˬ htaˇ hkʼaˬ hkʼe te gu gʼa ve yawˇ htaꞈ, kʼoˆ maˍ piˇ sheˍ. Awˬ viˉ awˬ nyi ve awˬ lawn htaꞈ Liꞈ hpu henˇ ve chaw awˬ bon gʼa tuˬ, awˬ viˉ awˬ nyi teˇ gʼaˇ gʼaˇ htaꞈ shiˍ leh teˇ geh Liꞈ hpu ca maˍ˗e sheˍ. Liꞈ hpu yawˇ ve a shaꞈ teꞈ hkʼaˇ daꞈ la tuˬ ga piˇ gʼa ve tehꞈ shiˍ tuˬ, Vehˆsaiˉ jw.org * hkʼaw “Liꞈ hpu a shaꞈ htaꞈ pa gʼa ve” yawˇ htaꞈ VDO chi nyi tcuh sheˍ.

9. Liꞈ hpu henˇ chehˇ ve chaw yehˬ kʼa, leh awˬ chawˇ htaꞈ kʼoˆ maˍ piˇ tuˬ nawˬ awˬ gʼaˇ hkʼaˬ hkʼe te piˇ gʼa ve le?

⁹ Liꞈ hpu henˇ ve chaw awˬ ca cawˬ˗oˬ ve kʼo, awˬ ca geh teˇ geh henˇ˗aw laˇ? Yawˇ ve awˬ ca Liꞈ hpu maˇ henˇ sheˍ ve kʼo, teˇ geh Liꞈ hpu henˇ la tuˬ jehˬ piˇ nyi sheˍ. Yawˇ gʼa henˇ taˍ ve awˬ ceuˬ awˬ viˉ awˬ nyi, yehˬ kʼa, leh awˬ chawˇ htaꞈ kʼoˆ maˍ piˇ tuˬ awˬ gʼaˇ piˇ sheˍ. (Yoˇhanˬ 1:40-45) Chi ve nawˬ hkʼaˬ hkʼe te gʼa tuˬ le? “Awˬ lawn chi ve yehˬ kʼa hkʼaw ve chaw leh awˬ viˉ awˬ nyi htaꞈ nawˬ hkʼaˬ hkʼe kʼoˆ maˍ piˇ gʼa tuˬ le?” Maˇ heˆ leh “Liꞈ hpu hkʼaˬ ve teˇ tawn yehˇ leh nawˬ ve awˬ chawˇ htaꞈ kʼoˆ maˍ piˇ gʼa tuˬ le?” tehꞈ nawˬ geh Liꞈ hpu henˇ ve chaw htaꞈ na nyi piˇ sheˍ. Nawˬ chi hkʼe te ve kʼo, yawˇ Liꞈ hpu maˍ tuˬ gu hehnˇ taˍ tcuh˗oˬ. Yawˇ te keunˍ ve kʼo, Baˆtiˆsaˬ maˇ haꞈ yuˬ sheˍ htaˇ hto toˇ ve chaw te gʼa ve yoˬ. Chi hkʼoˆ kaꞈ, Liꞈ hpu henˇ  gaˇ ve chaw a shu cawˬ sheˍ ve le tehꞈ yawˇ htaꞈ na nyi piˇ gʼa ve yoˬ. Cawˬ ve kʼo, nawˬ oˇ ve teˇ gʼaˇ htaꞈ laꞈ haˉ caˉ daꞈ leh Liꞈ hpu henˇ tuˬ jehˬ piˇ sheˍ. Ngaˬ hui Liꞈ hpu hkʼaˬ hkʼe te henˇ ve le? * yawˇ htaꞈ VDO nyi tcuh sheˍ.

10. 1 Hteˇsaˍlawˇniˆ liꞈ 2:7, 8 hkʼaw kʼoˆ taˍ ve hkʼe, Liꞈ hpu maˍ ve chaw Pawˇluꞈ ve awˬ lawn htaꞈ hkʼaˬ hkʼe henˇ yuˬ gʼa ve le?

¹⁰ Liꞈ hpu maˍ ve chaw Liꞈ hpu henˇ ve chaw htaꞈ dawˇ haˍ leh a yeˇ yuˬ ve tehꞈ shiˍ tcuh sheˍ. Maˇ maw kʼo, yawˇ kaꞈ awˬ viˉ awˬ nyi hpehꞈ la tuˬ tehꞈ dawˇ sheˍ. (1 Hteˇsaˍlawˇniˆ 2:7, 8 gʼaw sheˍ.) Yawˇ awˬ chawˇ te jaw ve chaw htaꞈ maˇ kʼawꞈ te leh Yaˬhoˉvaˬ ve kanˉ te tuˬ yawˇ ve te hkʼaˇ dawˇ hkʼaˇ pa tuˬ maˇ sha. Chi htaꞈ pa taw, yawˇ Hkriꞈ yaˇ awˬ moˍ hkʼaw awˬ tehˬ ve awˬ chawˇ cawˬ tuˬ nawˬ gʼa ga piˇ ve yoˬ. Liꞈ hpu henˇ htaˇ ceh maˇ heˆ awˬ nu ve awˬ yanˇ htaˇ htawˇ yawˇ htaꞈ awˬ chawˇ te piˇ tuˬ, awˬ hkʼeun hkʼaw tawˇ yaw piˇ ve, liꞈ bvuhꞈ feu piˇ ve, maˇ heˆ leh yawˇ geh ca guiˇ˗e ve yoˬ. Nawˬ chi hkʼe te ve kʼo, nawˬ yawˇ htaꞈ dawˇ haˍ leh a yeˇ yuˬ ve tehꞈ hpeuꞈ maw piˇ ve yoˬ.

11. Ngaˬ hui geh Liꞈ hpu henˇ ve chaw htaꞈ Hkriꞈ yaˇ awˬ moˍ hkʼaw aˬ htoꞈ ma mawˬ tcuh gaˇ ve le? Leh aˬ htoꞈ ma pa taw le?

¹¹ Aˍfaˍriˆkaˆ miˬ guiˬ lo chaw mawˇ hkawˇ kʼoˆ ve, “yaˇ teˇ gʼaˇ uiˍ la htaˇ gaˬ kʼo, teˇ hkʼaˆ hkʼaw ve chaw gʼa ga daꞈ ve yoˬ.” Chi ve hkʼa shuˍ shuˍ “chaw teˇ gʼaˇ awˬ laꞈ gʼawˇ hpehꞈ la tuˬ Hkriꞈ yaˇ awˬ moˍ hkʼaw ve chaw hkʼa peu˗eˬ gʼa ga daꞈ ve yoˬ.” Liꞈ hpu henˇ ve chaw Hkriꞈ yaˇ awˬ moˍ hkʼaw henˇ yuˬ tuˬ daꞈ ve chaw htaꞈ shiˍ daꞈ tuˬ, Liꞈ hpu maˍ ve chaw gʼa ga piˇ ve yoˬ. Liꞈ hpu henˇ ve chaw awˬ viˉ awˬ nyi chi teˇ hpaˍ htaꞈ shiˍ daꞈ˗oˬ htaˇ, awˬ chawˇ te ve kʼo yawˇ Yaˬhoˉvaˬ geh meuˆ daꞈ maˇ la tuˬ yawˇ hui ga piˇ gʼa ve yoˬ. Yawˇ shoꞈ shaꞈ ve gʼa hpuˇ htaˇ kaꞈ awˬ gʼaˇ piˇ gʼa ve yoˬ. Awˬ viˉ awˬ nyi haꞈ daꞈ ve htaꞈ yawˇ mawˬ tcuh gaˇ leh yawˇ kaꞈ Hkriꞈ yaˇ awˬ moˍ hkʼaw ve chaw teˇ gʼaˇ hpehꞈ ve tehꞈ shiˍ tcuh gaˇ ve yoˬ. Yawˇ chi hkʼe gʼa mawˬ htaˇ, Yaˬhoˉvaˬ htaꞈ maˇ haꞈ ve chaw geh awˬ chawˇ maˇ te tuˬ sha ve yoˬ. (Tawˇ naˉ ve 13:20) Yawˇ awˬ chawˇ te jaw ve chaw htaꞈ maˇ te˗o htaˇ, Yaˬhoˉvaˬ ve kanˉ hkʼaˇ hkʼaw awˬ tehˬ ve awˬ chawˇ cawˬ ve tehꞈ yawˇ shiˍ la ve yoˬ.—Maˍkuˆ 10:29, 30; 1 Peˍtruˆ 4:4.

12. Liꞈ hpu henˇ ve chaw awˬ to chiˇ aꞈ leh Baˆtiˆsaˬ haꞈ yuˬ tuˬ awˬ lawn, aˬ htoꞈ ma te ngaˬ hui kʼoˆ piˇ cawˇ ve le?

¹² Liꞈ hpu henˇ ve chaw awˬ to chiˇ aꞈ leh Baˆtiˆsaˬ haꞈ yuˬ tuˬ, teˇ hkui teˇ hkui kʼoˆ maˍ piˇ sheˍ. Chi a yeˇ uiˍ jaˇ ve awˬ lawn hpehꞈ ve yawˇ htaꞈ kʼoˆ maˍ piˇ sheˍ. Liꞈ hpu henˇ ve chaw htaꞈ Liꞈ hpu maˍ piˇ ve lehˬ, yawˇ Baˆtiˆsaˬ haꞈ yuˬ leh Yaˬhoˉvaˬ ve kanˉ te la tuˬ dawˇ law ve yoˬ. Chi htaꞈ pa taw, yawˇ hkʼaˬ htaˆ kaꞈ Liꞈ hpu henˇ ve hkʼaˬ nyiˇ ha pa maˇ gaˬ sheˍ kaꞈ yawˇ hpawnˬ daꞈ la˗oˬ htaˇ, Liꞈ hpu henˇ ve lehˬ  Yaˬhoˉvaˬ ve Shaˉhkiˆhkanˍ ve chaw hpehꞈ la tuˬ henˇ ve yawˇ gʼa na gʼa cawˇ ve yoˬ.

13. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ yawˇ aˬ htoꞈ ma gʼa te cawˇ ve le?

¹³ Liꞈ hpu henˇ ve chaw awˬ meu˗eˇ awˬ meu˗eˇ uiˍ la mvuh la ve kʼo, Baˆtiˆsaˬ haꞈ yuˬ gʼa ve yoˬ. Awˉ lawˉ teˇ ceuˬ Liꞈ hpu henˇ ve chaw Yaˬhoˉvaˬ htaꞈ shiˍ˗oˬ leh haꞈ ve kʼo, yawˇ htaꞈ yonˍ ve yoˬ. (Yoˇhanˬ 3:16; 17:3) Peuˬ leh yawˇ Yaˬhoˉvaˬ leh awˬ viˉ awˬ nyi geh kaꞈ meuˆ daꞈ tuˬ yoˬ. (Heˍbrehˇ 10:24, 25; Yaˍkoˆ 4:8) Yawˇ venˇ baˆ dawˇ hpfuhˆ leh maˇ daꞈ ve awˬ ceuˬ maˇ kʼawꞈ te˗o. (Tcuh yaˇ 3:19) Yawˇ yonˍ ve awˬ ceuˬ shu htaꞈ hto maˍ piˇ tuˬ yoˬ. (2 Kawˇrenˍhtuˆ 4:13) Awˬ leh meuˇ htaˇ yawˇ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ yoˬ. (1 Peˍtruˆ 3:21; 4:2) Liꞈ hpu henˇ ve chaw Baˆtiˆsaˬ haꞈ yuˬ ve awˬ nyi htaˇ lehˬ, ngaˬ hui teˇ gʼaˇ le le ha lehˬ jaˇ. Liꞈ hpu henˇ ve chaw awˬ meu˗eˇ awˬ meu˗eˇ uiˍ la mvuh la ve ngaˬ hui mawˬ htaˇ chiˇ mvuh piˇ leh yawˇ gʼaˇ hteꞈ uiˍ la mvuh la leh Baˆtiˆsaˬ haꞈ yuˬ tuˬ awˬ gʼaˇ piˇ sheˍ.

14. Liꞈ hpu henˇ ve chaw uiˍ la mvuh la ve htaꞈ Liꞈ hpu maˍ ve chaw hkʼaˬ hkʼe te chaˬ nyi gʼa tuˬ le?

¹⁴ Liꞈ hpu henˇ ve chaw uiˍ la mvuh la leh awˬ to chiˇ aꞈ leh Baˆtiˆsaˬ haꞈ yuˬ tuˬ ngaˬ hui ga piˇ htaˇ gʼa yeunˇ hkanˍ cawˇ ve yoˬ. Awˬ yanˇ teˇ yanˇ htaˇ Liꞈ hpu henˇ ve chaw Yaˬhoˉvaˬ ve kanˉ te gaˇ ve naˍ ngaˬ hui gʼa shiˍ cawˇ ve yoˬ. Liꞈ hpu henˇ ve chaw Yeˍsuˆ ve tawˇ hkawˇ htaꞈ coˇ caˇ leh na yuˬ ve, maˇ heˆ leh yawˇ Liꞈ hpu hkʼaw ve cuˇ yiˍ htaꞈ ceh shiˍ gaˇ leh henˇ ve htaꞈ nawˬ shiˍ ve laˇ?

15. Liꞈ hpu henˇ ve chaw uiˍ la mvuh la ve htaꞈ Liꞈ hpu maˍ ve chaw hkʼaˬ hkʼe te shiˍ gʼa tuˬ le?

¹⁵ Liꞈ hpu henˇ ve chaw uiˍ la mvuh la chehˇ˗aw laˇ, hkʼaˬ htaˆ kaꞈ chaˬ nyi sheˍ. Tawˇ pa haˉ te kʼo, yawˇ Yaˬhoˉvaˬ htaꞈ hkʼaˬ hkʼe dawˇ ve, yawˇ Yaˬhoˉvaˬ geh bon lawˬ ve awˬ lawn kaꞈ kʼoˆ maˍ laˇ˗aw laˇ? (Chiˇ mvuh ve 116:1, 2) Yawˇ Liꞈ hpu gʼaw ve dawˇ cawˇ˗aw laˇ? (Chiˇ mvuh ve 119:97) Yawˇ hkʼaˬ htaˆ kaꞈ hpawnˬ daꞈ˗e˗aw laˇ? (Chiˇ mvuh ve 22:22) Yawˇ gʼa henˇ taˍ ve hkʼe gʼaꞈ te˗aw laˇ? (Chiˇ mvuh ve 119:112) Yawˇ gʼa henˇ taˍ ve awˬ ceuˬ yehˬ kʼa hkʼaw ve chaw leh awˬ chawˇ htaꞈ kʼoˆ maˍ piˇ˗aw laˇ? (Chiˇ mvuh ve 9:1) Leh a yeˇ uiˍ jaˇ ve lehˬ yawˇ Yaˬhoˉvaˬ ve Shaˉhkiˆhkanˍ ve chaw hpehꞈ gaˇ˗aw laˇ? (Chiˇ mvuh ve 40:8) Chi ve hkʼa peu˗eˬ Liꞈ hpu henˇ ve chaw maˇ gʼaꞈ te ve kʼo, aˬ htoꞈ ma te yawˇ maˇ gʼaꞈ te ve le, tehꞈ hteˇ˗ehꞈ na nyi piˇ sheˍ. *

16. Chaw teˇ hpaˍ hpaˍ geh Liꞈ hpu caˉ leh maˇ maˍ tuˬ, nawˬ shiˍ tuˬ aˬ htoꞈ ma ga laˇ ve le?

¹⁶ Chaw teˇ hpaˍ hpaˍ geh caˉ leh Liꞈ hpu maˍ piˇ  cawˇ˗aw laˇ, teˇ hkui teˇ hkui chaˬ nyi sheˍ. A shu yawˇ awˬ to htaꞈ na nyi cawˇ ve, ‘yawˇ Liꞈ hpu henˇ tuˬ gu˗aw laˇ?’ ‘Yawˇ hpawnˬ daꞈ ve maˇ laˬ gaˇ ve laˇ?’ ‘Yawˇ te hkʼaˇ dawˇ hkʼaˇ maˇ pa ve laˇ?’ ‘Yawˇ maˇ heˆ heˆ ve bon liˇ hkʼaw chehˇ sheˍ ve laˇ?’ Chi teˇ hpaˍ te chehˇ sheˍ ve chaw geh Liꞈ hpu kʼawꞈ maˍ chehˇ ve kʼo, iˉ kaˆ lawehˇ gaˇ leh iˉ kaˆ maˇ nehˆ gaˇ ve chaw htaꞈ shuˍ ve yoˬ. Yawˇ gʼa henˇ ve htaꞈ awˬ hpfuhˇ maˇ shiˍ leh yawˇ ve te hkʼaˇ dawˇ hkʼaˇ awˬ tehˬ awˬ na maˇ pa gaˇ ve kʼo, ngaˬ hui yawˇ htaꞈ Liꞈ hpu kʼawꞈ maˍ piˇ ve aˬ htoꞈ ma awˬ bon cawˬ ve le?

17. 1 Tiˆmoˉseˍ liꞈ 4:16 hkʼaw kʼoˆ taˍ ve hkʼe, Liꞈ hpu maˍ ve chaw teˇ gʼaˇ le le aˬ htoꞈ ma gʼa te cawˇ ve le?

¹⁷ Shu awˬ laꞈ gʼawˇ hpehꞈ la tuˬ ga piˇ ve awˬ vuiˬ lehˬ a yeˇ uiˍ jaˇ ve tehꞈ ngaˬ hui tawnˇ taˍ cawˇ ve yoˬ. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ ngaˬ hui ga piˇ gaˇ ve yoˬ. Chi htaꞈ pa taw, ngaˬ hui ha lehˬ leh yonˍ gʼa ve hkʼaw yawˇ htaꞈ Liꞈ hpu maˍ piˇ gaˇ ve yoˬ. Liꞈ hpu henˇ ve chaw Hkriꞈ yaˇ awˬ moˍ hkʼaw awˬ chawˇ cawˬ tuˬ ngaˬ hui ga piˇ gaˇ leh, yawˇ awˬ to chiˇ aꞈ leh Baˆtiˆsaˬ haꞈ yuˬ tuˬ awˬ lawn kʼoˆ piˇ gaˇ ve yoˬ. Liꞈ hpu henˇ ve chaw uiˍ la mvuh la chehˇ˗aw laˇ, teˇ hkui teˇ hkui chaˬ nyi cawˇ ve yoˬ. (Awˇ ceˍ awˇ fa “ Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ htaˇ hkʼa gaˬ, Liꞈ hpu maˍ ve chaw hkʼaˬ hkʼe gʼa te cawˇ ve le?” htaꞈ nyi sheˍ.) Shu ve a shaꞈ htaꞈ ga piˇ ve kanˉ ngaˬ hui kaꞈ teˇ gʼaˇ gʼa te ve ha lehˬ jaˇ! Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ maˍ piˇ ve ngaˬ hui te gʼa ve hkʼe coˇ caˇ leh te cawˇ ve yoˬ.