1. N’nga ninoidhiwa a-vi ira basa loira anamafunjedha tovulumucha vingumi?

BASA loira anamafunjedha tibasa lovulumucha vingumi! N’nga ninoidhiwa a-vi vyevi? Yesu vyaongile liye lamulo lili va Mateu 28:19, 20, “liye atoonga ira: “Dhowani mumafunji-e atu amaziza othene, mwaabadizenga.” N’nga ninoidhiwan’ni vamwasa wa ubadizo? “Ubadizo njiikundu inonikami-a ira nivulumuwe. Mutu afunanga badiziwa unofwanela kaana iroromelo ira vulumuchiwa koodeya neri-a Yesu ukwide ndhila imbo-i thitho liye venyati-iwa ninga yoombolana. Ngumwasiwa namafunjedha Pedru atoonga na anamafunjedha ira: “Ubadizo unouvulumuchani nyo dhela movenyathi-iwa wa Yesu Kristu.” (1 Pe. 3:21) Ee-no namafunjedha mpya abadiziwanga liye unokala vazele ovulumuwana.

2. Lemba la 2 Timoteo 4:1, 2 linoongan’ni waanamafunji-a?

² Ira niire anamafunjedha, ninofwanela wenjedhela “dodoliso li-u lofunji-a.” (Muleri 2 Timoteo 4:1, 2.) Mwasiwa ngwan’ni? Yesu utoniva-a lamulo loi: “Dhowani mumafunji-e.” Rumiwi Paulo atoonga ira “wavilela” vabasa eli, “volaba vyevi weyo unodha vivulumucha weka thitho atu anafuna uvwelanga.” Vamaonelo apama Paulo aongile ira: “Wiire polepole na . . . vinafunji-a wee.” (1 Timo. 4:16) Namwasa oira funji-a kovwelana noira anamafunjedha ninofuna ira funji-ao ukale ofwanelela.

3. Va muru wen’na ninafuna nifunjedhen’ni vyoonga mutu unomfunji-a i-yo Bibilya?

³ Hora yothene ninokala naafunji-anga mamiliau aatu imbarimbari inofwanyeya Bibilyani. Ninga muongile i-yo yofunjedha ivirile, ninofuna niidhiwe mwemo munofwanela i-yo akami-a atu anjinji mwaaliwa ira takale anamafunjedha obadiziwa  a Kristu. Va yofunjedha yen’na, ninoona vyongo vyokwakwana vithanu vyevyo anamafunji-a vinofwanela aliwa irana ira takami-e anamafunjedha dhowa vasogolo fiedha badiziwa.

4. Mwasiwa ngwan’ni namafunji-a unofwanela vikondi-a voonga vyongo vinjinji vofunji-a Bibilya? (Onani thitho madhu achindo.)

⁴ I-yo ninodhiveliwa funji-a madhu a Nlungu. Mbwenye ninofwanela vilimbi-edha tapanya wi-u voonga vyevyo vinodhiveliwana i-yo. Ngumwasiwa akala munairi-a Nsanja ya namaing’anela, venango funjedha Bibilya wavapingoni, thitho funjedha Bibilya wavanyumbani namasogolela kanafwanela onga vinjinji, vofuna oni-a ira vinafunji-a nyoovyo pyokumela Bibilyani namafunji-a unofwanela vikondi-a a-onga vyothene viidhi liye vamwasa wenuo venango vamwasa wa Bibilyani. * (Juwau 16:12) Mu-iyani-e vyaidhinyo vya Bibilya va hora yabadiziwa nyo na viidhi nyo chineneeva. Vinooni-a ira vahora yeniyo nyo mwavwechecha makundo avadhuludhulu. (Aeb. 6:1) Vatovira vyawa vinjinji ira nyo mufunjedhe makundo malukulu aidhinyo vapeeno ngumwasiwa kamunofwanela m’mwandela vyongo vyothene namafunjedhinyu fendo imbo-ive.

5. (a) Movwelana na lemba la 1 Atezalonika 2:13, inofuna i-yo chini ira namafunjedhi-u avwecheche va vinofunjedha liye? (b) N’nga ninamlimbi-e a-vi namafunjedhi-u onga vyongo vinofunjedha liye?

⁵ Ninofuna ira namafunjedhi-u avwecheche pama ira vinofunjedha liye ndi madhu ovudheleliwa a Nlungu. (Muleri 1 Atezalonika 2:13.) Ninaviire a-vi vyevi? Mlimbi-eni namafunjedhinyu ira aonge vyevyo vinofunjedha liye malo moira nyo mum’mwandelengave malemba namafunjedhinyu, mumva-e pata ira naliyene aongenga malemba enango. Mumkami-e namafunjedhinyu ona mwemo madhu a Nlungu munakuzele aliwa ingumi yee. Mufukenga vyofuka vinam’mwiri-e ira athuulelenga malemba anoleri liye. (Luka 10:25-28) Mofwanafwani-a, mumfuke ira: “N’nga lemba leli liukami-idheni a-vi ona makalelo a Yohova?” “N’nga nyo munoganyali a-vi no funjedha imbarimbari ya Bibilya?” “N’nga nyo munodhivwa a-vi na vinofunjedha nyo?” (Sang. 20:5) Inofuneya vinjinji kai viidhi namafunjedhuo mbwenye mwemo munodhiveliwana liye vo-indi-edha basa viidhi liye.

6. Mwasiwa ngwan’ni vinokala pama i-yo mtukula namafunji-a wadodoliso vodhowa mafunji-a namafunjedhi-u?

⁶ Mwafunji-anga Bibilya nyo munodhowecha vambo-i na namafunji-a mwinango wadodoliso? Akala munoira e-no nyo munooda mvepa liye onga maonelwee moda  munofunji-edhelecha liye, thitho nyo munooda onga munoirelecha nyo vofunji-a ira muone ira vinofunji-a nyo mbamakundo okumela Bibilyani. Nyo munofwanela kala oviyevi-a ira muwenjedhele dodoliso linyu lofunji-a. (Mulandani-e na Mayirelo 18:24-26.) Mwaira e-no, mumfuke namafunji-a wadodoliso akala unoona ira namafunjedha unovwechecha imbarimbari. Nyo thitho munooda mvepa fwinyuo ira aodenga mfunji-a namafunjedhinyu nyo mwakumavo. Vyevi vinooda kaathei-a funjedhao thitho vinomlimbi-a namafunjedha ona funeya wa funjedhawee. Kamuthuulele ira liye ngunamafunjedhinyu mweka venango onanga ira kavali mutu unofuna mfunji-a. Vofiya e-ni, nitoona ira nyo munomfunela vyapama namafunjedhinyu ira liye adhowe vasogolo movwelana na imbarimbari inofunjedha liye.

7. N’nga inaode mkami-a namafunjedha chini ira aode dhiveliwana vinofunjedha liye?

⁷ Namafunjedha unofwanela ona chidwi ina nyo thitho uvwa vinororomela nyo makundo anofwanyeya Bibilyani. (1 Atez. 1:5) Mwaira ee-no mo-okaikela namafunjedhinyu unooda kala waimwerumweru na vinomfunji-a nyo. Akala ti-eno munooda m’mwandela mwemo makundo a Bibilyani muukami-edheni aliwa vaingumi yinyu. Voi e-no liye unooda vwechecha ira Bibilya linoonga malangi-o apama thitho anaode mganyali-a.

8. N’nga munaire a-vi ira mudhowenave funjedha Bibilya, nga mwasiwa ngwan’ni vyevyo pyapama?

⁸ Mwari mofunjedha Bibliya mum’mwandelenga namafunjedhinyu vifwanafwani-o vyaatu ale taguman’nena nyarwa, thitho moda mwadhimali-edhe aliwa. Nyo munooda mdhowana mutu wa pingoni mwinyu uguman’nena nyarwa dholandana ninga dhiguman’nena namafunjedhinyu. Venango nyo munooda m’mwandela vyoireya vinofwanyeya va jw.org va ikundu yoi Baibulo Limasintha Anthu. * Mavidiyo anafwanyeya va muru weniyo tanooda mkami-a namafunjedhinyu ona mwemo munawenjelele liye vo-arela makundo a Bibilyani va ingumi yee.

9. N’nga nyo munaode nlimbi-a a-vi namafunjedhinyu ira aodenga onga vile vinofunjedha liye wa abalee venango waafwee?

⁹ Akala ira namafunjedhuo ngothela venango ngotheliwa fwee unokalecha vevo? Akala kai e-no munooda m’mwitanela vanafunjedha  nyoovo. Mumlimbi-enga namafunjedhinyu ira aodenga onga vinofunjedha liyevyo na abalee venango afwee. (Juwau 1:40-45) Moi a-vi? Nyo munooda mfuka ira: “N’nga nyo munaawandele a-vi abalinyu imbarimbariyi?” Venango ira “tilemba liivi lina-indi-edhe nyo basa vom’mwandela fwinyu?” Mwandhila dhedhi nyo munooda mkozeeli-edha namafunjedhinyu ira akale namafunji-a. Ee-no akala ira liye unana fwanelela unooda roma fwanyeyanga vabasa lodhowa malaleya liye kala namalaleya o-obadiziwa. Munooda mfuka namafunjedha Bibilya akala utoidhiwa mutu unafuna funjedha Bibilya. Akala evyo vitoireya munooda m’mongana mutuo mombaranya thitho munooda mva-a liye ira amfunji-enga. Mum’moni-e vidiyo yoi Kodi Phunziro la Baibulo Limachitika Bwanji? *

10. Movwelana na lemba la 1 Atezalonika 2:7, 8, namafunji-a una-arele a-vi ifwanafwani-o ya Paulo?

¹⁰ Anamafunji-a tanofwanela oni-a chidwi yaimbarimbari wa anamafunjedhiwa. Voonela vifwanafwani-o vya abali na arongola owarala mwauzimu. (Muleri 1 Atezalonika 2:7, 8.) Kai vyokweya waaliwa ira taode i-yachi uxamwaliwa na atu ta-anaroromela malemba ira taode chinja vomlambela Yohova. Ninofwanela akami-a vofwanya afwiwa aimbarimbari pingoni. Nyo mukale fwee wavarimani kai hora yofunjedhave kabe mbwenye na hora ya-anafunjedha nyo vomligarela vomrumi-edhana milanyu venango dhowa mawaredha waniwa vyevyo vinooni-a ira i-yo ninom-bala liye.

11. N’nga ninafuna ira anamafunjedhi-u tafwanye n’ni pingoni, thitho mwasiwa ngwan’ni?

¹¹ Vyatoongiwa ira: “Vinafuneela kaana vandhe ira niode lela mwana.” Vinofuna vithapulele ira: “Vanofuneya pingo ira niode fwanya anamafunjedha.” Ngumwasiwa namafunji-a Bibilya wadodoliso unoakami-a anamafunjedhee fwanya atu enango pingoni enao anaode mlimbi-a. Anamafunjedha anooda dhiveliwa vwelana naatu a Nlungu enao anaode alimbi-a no zindiyela vyauzimu. Ninafuna ira namafunjedha uliwethene adhivwenga ira uli ikundu ya pingo wabanja lauzimu. Ninafuna ira taode landeya na ubali-u waudhivela Waukristau. Ee-no vinokala vyo-orucha wa liye i-yachi waredhana atu anjinji ta-anamlimbi-a ira amdhiveli-enga Yohova Nlungu. (Sang. 13:20) Akala axamwali analiye ndulimu tanomkonda liye unodha idhiwa ira unodha fwanya afwee aimbarimbari mu gulu la Yohova.—Marku 10:29, 30; 1 Pe. 4:4.

12. Mwasiwa ngwan’ni ninooda m’mongana namafunjedhi-u mwasa odhivelela na badiziwa mwa Ukristau?

¹² Ongani mothathuwa mwasa odhivelela dhowa mabadiziwa ninga Kristau. Mwaimbarimbari ifunelo yi-u yodhowanave funjedha Bibilya kumkami-a mutu ira aode kala namafunjedha obadiziwa. Vira wa medi mingasi angali namafunjedha Bibilya ofwanelela pyofwanela thitho akala utoroma gumaneya va migumano, namafunjedha Bibilya unooda vwechecha mwasa unafunjedhela liye Bibilya thitho mkami-a liye roma mlambela Yohova ninga m’mbo-i wa Mboni dha Yohova.

¹³ Vang’ono na vang’ono, namafunjedha Bibilya unooda saka ifunelo yobadiziwa! Yoroma namafunjedha unooda m’mwidhiwa Yohova nomdhiveliwana thitho liye kaana iroromelo injinji wa Yohova. (Juwau 3:16; 17:3) Namafunjedhuo unokaana uxamwali na Yohova thitho unongo vwelana na pingo. (Aeb. 10:24, 25; Tiy. 4:8) Vanduli vee, namafunjedhuo unooda i-yachi iranga vyongo vyothakala no chinyuwa vyodawa. (Mayir. 3:19) Va-eni iroromelo yee inom’mwiri-a ira awandele enango vya imbarimbari. (2 Akor. 4:13) Voi ee-no unovivelela wa Yohova na onechecha vipambulela liye badiziwa. (1 Pe. 3:21; 4:2) Leli tidambo lodhiveliwi-a pingo vinjinji. Hora iliyothene inodhowa liye vasogolo nyo kamuwezedhele msimba wee namafunjedhinyuo. Dhowananive mlimbi-a namafunjedhinyu ira afiyedhe kaana makalelo ofwanelela.

14. N’nga namafunji-a unafuneela pendan’ni dhowa vasogolo wa namafunjedha?

¹⁴ Ninofuneela kala oleva rima vomkami-a namafunjedha dhowa wee vasogolo no dhivelela fiedha badiziwa. Mbwenye hora dhinango ninofuneela zindiela akala ira liye unomlabela Yohova Nlungu. Nyo munoona makalelo a namafunjedha vanadhilimbi-edha liye a-relanga malangi-o a Yesu? Venango liye unofuna funjedha makundo a Bibilya baa-i?

15. N’nga namafunji-a unofwanela mpenda vizindiyelo viivi ona ira namafunjedhee unodhowa vasogolo?

¹⁵ Mumpende hora dhothene dhowa sogolo wa namafunjedha vinaira liye. Mofwanafwani-a, liye madhwee unoonga vyonga vyovwelana  na vya Yohova? Liye unolobela wa Yohova? (Masal. 116:1, 2) Liye unodhiveliwana leri Bibilya? (Masal. 119:97) Liye unogumaneya vamigumanoni hora dhothene? (Masal. 22:22) Liye unooda chinja vyoira vyee mwa makalelo a ingumi yee? (Masal. 119:112) Liye unoonga vinofunjedha liye naabalee venango afwee? (Masal. 9:1) Mbwenye yofuneya, liye unofuna kala m’mbo-i wa Mboni dha Yohova? (Masal. 40:8) Akala ira namafunjedhuo kana-arela vyothene vyevi dhilimbi-edheni fwanya ira mwasiwa ngwan’ni, voi ee-no munooda mtapanyana moriya rima thitho mo-ovira mambalo. *

16. N’nga inofuna oni-a ira ni-iyachi funjedha na mutu chini?

¹⁶ Muoni-enga ira hora dhinjinji munodhowanave funjedha na mutu. Mudhifuke ira: ‘N’nga namafunjedha unoimwanana kozeela funjedhao? Liye kanofuna dhowa migumanoni? N’nga utokaanave vilemeelo vyothakala? Liye ulive m’mbo-i wa religiau lonama?’ Yowakula yakala ee, dhowanave funjedha na liye inakala ninga munafunji-a mutu a-mbelela mbwenye liye kanafuna nyeta! Akala ira namafunjedhuo kanasimba vile vinofunjedha liye a-funanga chinja, munoona a-vi i-yachi funjedha na liye?

17. Movwelana na lemba la 1 Timoteo 4:16, n’nga anamafunji-a othene tanafwanela iranga n’ni?

¹⁷ Ninoona ira izo yofunji-a anamafunjedha chofuneya vinjinji, thitho ninofuna ira nikami-e anamafunjedha ira tadhowe vasogolo fiyedhela badiziwa. Ula ngumwasiwa ninorumela ira Bibilya lifunji-enga thitho nifunji-enga mombaranya thitho mosikimiza. Ninolimbi-a namafunjedhuo ira awaredhenga na atu enango apingoni. Thitho ninogogomedhela mwasa odhivelela no badiziwa, oni-a mwemo namafunjedhuo mudhowele liye vasogolo. (Onani kwadhuru “ Vinofwanela ira namafunji-a ira amkami-e namafunjedha fiedha badiziwa.”) Nili odhiveliwa volaba basa lovulumucha vingumi vyevi! Nikale osikimiza rima irana vyothene vinaode i-yo ira anamafunjedha Bibilya odhowa vasogolo tadhowenave fiyedhela badiziwa.