CHIHANDE CHAKULINANGULA 42
Mwakunangwila Mutu naKumuhetesa kuLumbapachiso—Chihanda 2
“Lilamenga ove ivene, nakuhaka muchima kukunangula chove.”—CHIMO. 1, 4:16.
MWASO 77 Kumunyika muKaye kaMilima
YUMA NATUSHIMUTWILA *
1. Twatachikiza ngachilihi ngwetu mulimo wakunangula vatu vapwenga tumbaji wapwa wakuyovola vatu?
MULIMO wakunangula vatu vapwenga tumbaji, wapwa wakuyovola vatu. Mujila muka? Hali Mateu 28:19, 20, Yesu ahanyine lushimbi ngwenyi: “Yenunga mukanangule vatu . . . vakapwe tumbaji, mukavambapachise.” Uno lumbapachiso lwalemena halihi? Mutu himutu vatela kumumbapachisa numba vakamulwile. Mutu uze mwasaka kumumbapachisa atela kufwelela ngwenyi kuyovoka chenyi chapendamina hakufwa chaYesu. Echi chikiko kaposetolo Petulu alwezelelele vakwavo vaka-Kulishitu ngwenyi: “Lumbapachiso . . . luli nakumilwila . . . kuhichila mukusanguka chaYesu Kulishitu.” (Petu. 1, 3:21) Shikaho, nge kambaji wamuhya vanamumbapachisa, eji kutalililanga jino kukayoya haya myaka yosena.
2. Kweseka na WaChimoteu 2, 4:1, 2, kunangula chetu chatela kupwa ngachilihi?
2 Hakusaka tunangule vatu vapwenga tumbaji, twatela kuhotola ‘uhashi wetu wakunangula.’ (Tangenu WaChimoteu 2, 4:1, 2.) Mwomwo ika? Mwomwo Yesu ahanjikile ngwenyi: “Yenunga mukanangule vatu . . . vakapwe tumbaji, mukavambapachise.” Kaposetolo Paulu nawa alwezele Chimoteu ngwenyi, “kakachilanga” mumulimo kana “mwomwo hakulinga ngocho naulilwila ove ivene nakulwila vaze navakwivwilila nawa.” Ngocho amulwezele ngwenyi: “[Haka] muchima kukunangula chove.” (Chimo. 1, 4:16) Hakusaka vatu tuli nakunangula vapwenga tumbaji, twatela kuvanangulanga kanawa.
3. Vyuma muka natushimutwila muchihande chino?
3 Mukaye kosena, tuli nakunangula vatu vavavulu chikuma muchano wamuMbimbiliya. Oloze ngana muze twashimutwilanga muchihande chinafumuho, chuma twatela kufwila shina kutachikiza mwakuvakafwila mangana vapwenga tumbaji twaYesu Kulishitu vakumbapachisa. Muchihande chino natushimutwila vyuma vikwavo vitanu vize atela kulinga muka-kunangula mangana akafwe mutu ali nakunangula atengamo kumumbapachisa.
ZACHISENUNGA MBIMBILIYA HAKUNANGULA
Lwezenu muka-kwambulula wakulindunuka mangana amikafwe mwakuzachishila Mbimbiliya nge muli nakunangula mutu (Talenu palangalafu 4-6) *
4. Mwomwo ika muka-kunangula atela kupwa namuchima wakulikanyisa nge ali nakutwaminyina chilongesa chaMbimbiliya? (Talenu nawa kwinyikila chamwishi.)
4 Twazanga vyuma tweji kunangulanga vatu muMazu aKalunga. Ngocho tunahase kufwila kuhanjika vyuma vyavivulu nge tuli nakunangula mutu. Olozenyi, katwatela kuhanjikanga vyavivuluko numba nge tuli nakutwaminyina Chilongesa chaKaposhi Kakutalila chipwe Chilongesa chaMbimbiliya chaChikungulwilo chipwe chilongesa chaMbimbiliya chahazuvo. Hakusaka kuzachisa Mbimbiliya, muka-kunangula atela kupwa namuchima wakulikanyisa nakulihenda kukuhanjika vyuma vyosena vize atachikiza havesi vanatange chipwe hachihande vali nakushimutwila. * (Yowa. 16:12) Achishinganyekenu hachinyingi mwapwile nacho omu vamimbapachishile, nachinyingi muli nacho oholyapwa. Pamo halwola kana mwatachikijile vyuma vyavindende kaha. (Hepe. 6:1) Vyuma munatachikiza oholyapwa munalinangulavyo hamyaka yayivulu, shikaho kanda kushinganyeka ngwenu mutu muli nakunangula mwavitachikiza halwola lumweko.
5. (a) Kweseka naWavaka-Tesolonyika 1, 2:13, chuma muka twatela kukafwa chilongesa chetu atachikize? (b) Tunahase kukolezeza ngachilihi chilongesa chetu ahanjikenga havyuma ali nakulinangula?
5 Twasaka vatu tuli nakunangula vatachikize ngwavo vyuma tuli nakuvanangula vinafumu muMazu aKalunga vahwima. (Tangenu Wavaka-Tesolonyika 1, 2:13.) Chuma muka nachitukafwa tulinge ngocho? Kolezezenu chilongesa chenu ahanjike havyuma ali nakulinangula. Muchishishisa chakumulumbunwina visoneka vyosena, mulwezenu avilumbunune ikiye. Mukafwenu amone ngwenyi vyuma ali nakulinangula muMbimbiliya vinahase kumukafwa. Muhulisenu mwivwenga vishinganyeka vyenyi hachisoneka munatange. (Luka 10:25-28) Chakutalilaho, muhulisenu ngwenu: “Uno echi chisoneka chinakunangula vilinga muka vyaYehova?” “Chishina kana chinahase kukunganyalisa ngachilihi?” “Uli nakwivwa ngachilihi havyuma unalinangula lelo?” (Vishi. 20:5) Chuma chachilemu chikuma atela kulinga mutu shina kuzanga vyuma vize ali nakulinangula nakuvizachisa, keshi kuvitachikiza kahako.
6. Mwomwo ika chapwila chamwaza kuya namuka-kwambulula wakulindunuka kuchilongesa chetu?
6 Kutala lwola lumwe mweji kuyanga namuka-kwambulula wakulindunuka kuchilongesa chenu tahi? Nge mukiko, kaha muhulisenu amilweze vyuma munalingi kanawa hakunangula chilongesa chenu, nakumona nawa numba nge muli nakuzachisa Mbimbiliya hakunangula. Kaha nawa mwatela kupwa vakulinyisa numba mupwenga vaka-kunangula vakuhya. (Esekesenuko Vilinga 18:24-26.) Kufumaho, muhulisenu amilweze numba nge chilongesa chenu ali nakwivwishisa muchano nyi chiku. Kaha nawa nge tunafumuho chalumingo chimwe chipwe vyavivulu, tunahase kusela ndumbwetu kana anangulenga chilongesa chetu. Echi nachilingisa ou chilongesa amone kulema chakulinangula nakuhona kuvulyama. Kanda kushinganyeka ngwenu chilongesa kana wenu ukawenuko, kaha nawa ngwenu naweka mwamunangula wauchi. Oloze mwatela kumukafwa atwaleho lika kulinangula muchano nakuzovoloka.
NANGULENUNGA NATWIMA NAKUKUNYUKA
Lwezenu chilongesa chenu mijimbu yavatu yize yinahase kumukafwa akavangizenga jindongi jamuMbimbiliya (Talenu palangalafu 7-9) *
7. Vyuma muka vinahase kulingisa chilongesa chenu azange vyuma ali nakulinangula?
7 Chilongesa chenu atela kumimona muli nakuhanjika nakukunyuka havyuma muli nakumunangula muMbimbiliya. (Teso. 1, 1:5) Echi chinahase kumulingisa azange vyuma ali nakulinangula. Nge chinahase mulwezenu omwo kukavangiza jindongi jamuMbimbiliya chinamikafwe mukuyoya chenu. Echi chinahase kumulingisa amone ngwenyi kukavangiza jindongi jamuMbimbiliya nachimunganyalisa naikiye.
8. Vyuma vyeka muka mwatela kulinga numba mukafwe chilongesa chenu, kaha mwomwo ika?
8 Nge muli nakulinangula, mulwezenu vyakutalilaho vyavatu vamwe vaze vahichile muukalu ali nakuhitamo navyuma valingile numba vahonese ukalu kana. Chakutalilaho, munahase kuya nandumbwetu umwe uze munamono ngwenu chakutalilaho chenyi nachikafwa chilongesa chenu. Chipwe munahase kumutangila chihande chimwe havihande vyamujimangazini jaKaposhi Kakutalila vyakwamba ngwavo “Mbimbiliya Yeji Kwalumunanga Kuyoya chaVatu” navihande vyeka vyahakeyala yetu ya jw.org. Vihande vyakufwana ngana navimukafwa alumune kuyoya chenyi hakukavangiza jindongi jamuMbimbiliya.
9. Namuhasa kukolezeza ngachilihi chilongesa chenu alwezengako masepa jenyi navausoko vyuma ali nakulinangula?
9 Kachi nge chilongesa chenu atwama muulo, kutala namuka-mahyenyi vali nakumunangula Mbimbiliya tahi? Nge chiku, kaha mulanyenu apwengangako nge munakulinangula. Kolezezenu chilongesa chenu alwezengako masepa navausoko, vyuma ali nakulinangula. (Yowa. 1:40-45) Namuhasa kulinga ngachilihi ngocho? Munahase kumuhulisa ngwenu: “Uno chisoneka kana nauchilumbununa ngachilihi kuvausoko wove?” chipwe ngwenu “Nauzachisa ngachilihi chisoneka kana hakukafwa sepa lyove?” Kumuhulisa vihula kana, nachimukafwa apwenga muka-kunangula. Ngocho nge nazovoloka lyehi, nahase kutamo jino kupwa muka-kwambulula wakuzeneka kumbapachisa. Munahase nawa kumuhulisa amilweze nge kuli mutu weka uze ali nakusaka kulinangula Mbimbiliya. Nge namilweze lyehi, kaha tambukilenu mutu kana nakumulweza vyachilongesa chaMbimbiliya. Mutalisenu vindiyo yakwamba ngwavo Vyuma Muka Vyeji Kusolokanga haChilongesa chaMbimbiliya? *
MUKOLEZEZENU ALIKATE NAVANDUMBWENU MUCHIKUNGULWILO
Kolezezenu chilongesa chenu alikate navandumbwenu muchikungulwilo (Talenu palangalafu 10-11) *
10. Kweseka na Wavaka-Tesolonyika 1, 2:7, 8, muka-kunangula nahase kulondezeza ngachilihi Paulu?
10 Vaka-kunangula vatela kusolola ngwavo vazanga vilongesa javo. Vatela kutachikiza ngwavo vatu kana kulutwe navakapwa vandumbwavo vakushipilitu. (Tangenu Wavaka-Tesolonyika 1, 2:7, 8.) Chipwe ngocho kachapwa chachashi kuseza masepa javo vakukaye nakwalumuna vilinga vyavo mangana vazachile Yehovako. Shikaho twatela kuvakafwa vatunge usepa navandumbwetu muchikungulwilo. Zamisenu usepa wenu hakushikamanga navo keshi nge halwola muli nakulinangula kahako, oloze nahalwola luze kamweshi nakulinangulako. Vatuminenunga shinga chipwe mujimbu wahashinga chipwe kuvatambukila hamakumbi aze kamwalinangulako, mangana musolole ngwenu mwavazakama.
11. Vyuma muka twatela kukafwa vilongesa jetu vawane muchikungulwilo, kaha mwomwo ika?
11 Chishimo chimwe ngwacho: “Njamba afwila makunga kuvula.” Etu nawa tunahase kuhanjika ngwetu: “Chikungulwilo chosena chatela kuzachila hamwe numba vakafwe mutu apwenga kambaji.” Echi chikiko cheji kulingisanga vaka-kunangula vakwipangweji vakafwe vilongesa javo valikate navandumbwavo muchikungulwilo mangana vamukafwe azovoloke. Echi nachilingisa chilongesa alikate navatu jaKalunga vaze vanahase kumukafwa apwenga sepa lyaYehova, nakumuvendejeka nge ali nakumona ukalu. Twatela kukafwa vilongesa jetu vosena vamone ngwavo vatwama muchikungulwilo kaha nawa vali mutanga yakushipilitu. Twatela kuvakafwa vamone ngwavo vandumbwetu vatwama nazangi, mangana navakiko vafwile kwiza muchikungulwilo. Nge natulinga ngocho, kaha nachivashiwila kwecha kulikata navatu vaze navasaka kuvasosolola kuli Yehova. (Vishi. 13:20) Ngocho numba nge masepa jenyi navamuhunga, mwejiva ngwenyi mwawana masepa vamwenemwene muliuka lyaYehova.—Mako 10:29, 30; Petu. 1, 4:4.
SHINDAKANYENU HAKULEMA CHAKULIHANA NALUMBAPACHISO
Nge namukafwa chilongesa chenu, kaha mukuhita chalwola mwatamo kumumbapachisa (Talenu palangalafu 12-13)
12. Mwomwo ika twatela kulweza chilongesa chetu kulema chakulihana kuli Yehova nalumbapachiso?
12 Mwatela kuvakafwa vatachikize ovyo chapwila chachilemu mutu kulihana kuli Yehova nakumumbapachisa. Twatela kutachikiza ngwetu chuma chachilemu twafwila hakunangula vatu Mbimbiliya shina kuvakafwa mangana vapwenga tumbaji vakumbapachisa. Kachi nge munalinangula lyehi hatukweji vavandende, chikumanyi nge naputuka lyehi kukunguluka, chilongesa atela kwijiva ngwenyi, chuma vali nakumunangwila Mbimbiliya shina mangana vamukafwe apwenga Chinjiho chaYehova nakumuzachila.
13. Vyuma muka atela kulinga chilongesa mangana atengamo kumumbapachisa?
13 Kuli vyuma vyavivulu vize atela kulinga chilongesa uze ali nakusaka kumumbapachisa. Chatete, atela kutachikiza Yehova nakumuzanga, nakumufwelela. (Yowa. 3:16; 17:3) Echi nachimulingisa atunge usepa wakukola naYehova navandumbwetu muchikungulwilo. (Hepe. 10:24, 25; Yako. 4:8) Kutwala muze, atela kwecha vilinga vyavipi nakupihilila nakwalumuka. (Vili. 3:19) Kaha kupwa nalufwelelo nachimulingisa alwezeko vakwavo vyuma ali nakulinangula. (Koli. 2, 4:13) Kufumaho, nahase jino kulihana kuli Yehova nakumumbapachisa. (Petu. 1, 3:21; 4:2) Chikupu vene, likumbi lyalumbapachiso lyapwa hilikumbi lyakuwahilila. Nge chilongesa chenu ali nakuzovoloka mangana atengamo kumumbapachisa, kaha mwatela kumusangejeka nakumukolezeza atwaleho lika kuzovoloka.
KEKESENUNGA KUZOVOLOKA CHENYI
14. Muka-kunangula atela kukekesa ngachililhi kuzovoloka chachilongesa chenyi?
14 Twatela kupwa namuchima wakutalilila chikoki hakusaka tukafwe mutu azovoloke nakulihana vamumbapachise. Oloze twatela nawa kumukekesa nakumona nge ali nakusaka kuzachila Yehova Kalunga nyi chiku. Kutala munamono ngwenu chilongesa chenu ali nakweseka hakumina ngolo jenyi kwononoka jishimbi jaYesu tahi, nyi pamo ali nakusaka kaha kulinangula vyuma vyamwaza vyatwama muMbimbiliya?
15. Vyuma muka vyatela kulingisa muka-kunangula amone ngwenyi chilongesa chenyi ali nakuzovoloka?
15 Kekesenunga kuswakumwe kuzovoloka chachilongesa chenu. Chakutalilaho, lihulisenu ngwenu, kutala eji kusololanga nge azanga Yehova tahi? Uno eji kulombanga kuli Yehova tahi? (Samu 116:1, 2) Kutala eji kulivwisanga kuwaha kutanga Mbimbiliya tahi? (Samu 119:97) Kutala eji kukungulukanga lwola lwosena tahi? (Samu 22:22) Kutala nalumunako chiyoyelo chenyi tahi? (Samu 119:112) Kutala ali nakulwezako vausoko namasepa vyuma ali nakulinangula tahi? (Samu 9:1) Chachinenenyi, kutala ali nakusaka kupwa Chinjiho chaYehova tahi? (Samu 40:8) Kachi nge munamono ngwenu keshi nakuzovolokako, kaha mwatela kukekesa mujila yakuzangama muwane vyuma vili nakumuhonesa, nakushimutwila jino nenyi mujila yakalemesa. *
16. Vyuma muka vyatela kutulingisa twechenga kulinangula namutu Mbimbiliya?
16 Mukuhita chalwola, kekesenunga mumone nge chakutamo kutwalaho kulinangula nenyi nyi chiku. Lihulisenu ngwenu: ‘Kutala chilongesa chami eji kuhitulukilanga chimweza shimbu kanda tulinangule tahi? Kutala keshi nakusaka kuya nakukungulukako tahi? Uno achili navilinga vyavipi tahi? Kutala achili nakulikata naliuka lyakwitava chamakuli tahi?’ Kachi nge namukumbulula vihula kana ngwenu eyo, kaha nachiwaha kwecha kumunangula, mwomwo nge namutwalaho kumunangula, kaha nachifwana nge muli nakunangula mutu kuhala okunyi kazanga kupwa mumeyako. Shikaho mwatela kwecha kulinangula namutu uze kamona vyuma ali nakulinangula kupwa vyavilemu, chipwe kwalumuna chiyoyelo chenyiko.
17. Kweseka naWaChimoteu 1, 4:16, chuma muka vatela kulinga vaka-kunangula vatu Mbimbiliya?
17 Twamona mulimo wakunangula vatu vapwenga tumbaji kupwa waulemu, ngocho twasaka kukafwa vilongesa jetu vatengamo kuvambapachisa. Echi chikiko cheji kutulingisanga tuzachise Mbimbiliya hakunangula vatu, nakuvanangula natwima nakukunyuka. Tweji kukolezezanga vilongesa jetu valikwate usepa navandumbwetu muchikungulwilo. Kaha nawa tweji kuvalwezanga ovyo chapwila chachilemu kulihana kuli Yehova nakuvambapachisa, nakukekesanga kuzovoloka chavo kuswakumwe. (Talenu lipwata lyakwamba ngwavo “Vyuma Vatela Kulinga Vaka-Kunangula Numba Vanangule Mutu naKumuhetesa kuLumbapachiso.”) Twapwa vakuwahilila chikuma hakuzata ou milimo wakuyovola vatu. Shikaho tufwilenu kuzata kweseka noho hakumina ngolo jetu mangana tukafwe vilongesa jetu vazovoloke nakuvambapachisa.
MWASO 79 Vanangulenu Vapwenga vaKumika
^ par. 5 Kunangula vatu Mbimbiliya wapwa himulimo waulemu chikuma, mwomwo wapwa wakukafwa vatu vatachikize mwaya muchima waYehova nakulingamo. Chino chihande nachishimutwila vyuma vikwavo twatela kulinga mangana tuhotole uhashi wetu wakunangula.
^ par. 4 Talenu chihande chakwamba ngwavo, “Lihendenu kuVyuma Evi Omu Namutwaminyinanga Vilongesa” muMukanda waKukunguluka chaChiyoyelo naMulimo waSeptember 2016.
^ par. 9 Yenu ha JW Library®, haze vanasoneka ngwavo MEDIA > OUR MEETINGS AND MINISTRY > TOOLS FOR THE MINISTRY.
^ par. 15 Talenu chihande chakwamba ngwavo, “Kuzanga Yehova naKumusakwilila Nachimilingisa Vamimbapachise” nachakwamba ngwavo, “Kutala Munalizange Kumimbapachisa Tahi?” muKaposhi Kakutalila waMarch 2020.
^ par. 76 MAZU AKULUMBUNUNA MUVWIMBIMBI: Ndumbwetu wakulindunuka ali nakukafwa ndumbwenyi akehesengako kuhanjika chikuma nge vali nakulinangula.
^ par. 78 MAZU AKULUMBUNUNA MUVWIMBIMBI: Chilongesa vali nakumunangula vyuma atela kulinga numba apwenga pwevo wamwenemwene. Kufumaho, ali nakulwezako lunga lyenyi vyuma nalinangula.
^ par. 80 MAZU AKULUMBUNUNA MUVWIMBIMBI: Ou chilongesa nalunga lyenyi vanayi nakushikama nandumbwetu uze vatungile nenyi usepa omu vayile kuZuvo yaWangana.
