1. Tuneluki ñahi netu mudimu wakwilisha atumbanji hikwamwina mawumi awantu?

MUDIMU wakwilisha atumbanji himudimu wakwamwina mawumi awantu. Tuneluki ñahi? Yesu chahanineñayi lushimbi ludi haMatewu 28:19, 20, wahosheli nindi: “Yenu mwakelishi . . . atumbanji, muyipapatisheña.” Kupapatishewa kwalemenadi? Hakwila nawu muntu yakahandi watela kupapatishewa. Muntu wunakupapatishewa watela kukuhwelela nindi wamwinu wekala kwoku muloña Yesu wadihanini nakutufwila nawa amusañwili. Dihafumini kapostolu Petulu kuyileja akwawu akwaKristu nindi: “Chipapatishu . . . nichena chinakuyamwina enu . . . kuhitila mukusañuka kwaYesu Kristu.” (1 Pet. 3:21) Dichi neyi kambanji wamuha yapapatishewa wukwikala nakuchiñeja kwakwikala nawumi wahaya nyaaka.

2. 2 Timotewu 4:1, 2 yatulejañadi etu antañishi?

² Hakwila nawu twilishi atumbanji, twatela kwiluka ‘chakutañisha chiwahi.’ (Tañenu 2 Timotewu 4:1, 2.) Muloñadi? Muloña Yesu watulejeli nindi: “Yenu mwakelishi . . . atumbanji, muyipapatisheña.” Kapostolu Pawulu wahosheli nindi “kolelaku chikupu” kuniwu mudimu “muloña mukwila mwenimu, wakadaamwina eyi aweni ninowu akutiyililaña.” Muloña wachumichi Pawulu wahosheli nindi: “[shaku] muchima kuntañishilu yeyi.” (1 Tim. 4:16) Chineli ntañishilu yetu yinakundami kukwilisha atumbanji, yatela kwikala yayiwahi hama.

3. Tukuhanjekadi muchinu chibaaba kutalisha hakulombola atudizi aBayibolu?

³ Mpinji yejima tunakudizisha mamiliyoni awantu chalala chamuBayibolu. Neyi chashimwini chibaaba chinafumihu,  tunakukeña kwiluka chakukwasha antu amavulu kulonda ekali atumbanji twaYesu Kristu apapatishewa. Muchinu chibaaba tukuhanjeka hayuma yikwawu yitanu yatela kwilayi ntañishi wejima hakwila nawu yakwashi kadizi kulonda yapapatishewi.

4. Muloñadi ntañishi chatela kubulilayi kuhosha nankashi hampinji yinakulombolayi kadizi waBayibolu? (Talenu cheñi tumazu twaheshina.)

⁴ Twakeña yuma yitwatañishaña kufuma Mwizu daNzambi. Dichi, chumichi chinateli kuletesha kuhosha nankashi hayuma yitwakeña. Ilaña hela chakwila tunakulombola Kaposhi Kakutalila, Kudiza Bayibolu haChipompelu hela Atudizi aBayibolu, muntu wunakulombola hatela kusweja kuhoshahuku. Hakwila nawu Bayibolu yizati mudimu wayu wakutañisha, ntañishi bayi yaswejaña kuhosha hayuma yejima yelukayi hanoyu nsañu yamuBayiboluku. * (Yow. 16:12) Esekejenu yuma yamuBayibolu yimwelukili hampinji yimwapapatisheweli nayimuneluki chayinu mpinji. Hadaha yina mpinji mwelukili hohu yuma yantesha. (Heb. 6:1) Hanahiti yaaka yayivulu hakwila nawu mudizi yuma yimweluka chayinu mpinji, dichi bayi mufwilaña kumudizisha kadizi yuma yejima hampinji yimuku.

5. (a) Kwesekeja na 1 Atesalonika 2:13, yumanyi yitunakukeña kadizi wetu yeluki kutalisha hayuma yinakudizayi? (b) Tunateli kumukolesha ñahi kadizi wetu kuhosha yuma yinakudizayi?

⁵ Tunakukeña kadizi wetu yeluki nindi yuma yinakudizayi yinakufuma muBayibolu. (Tañenu 1 Atesalonika 2:13.) Tunateli kwila ñahi mwenimu? Mukoleshenu kadizi yahosheña hayuma yinakudizayi. Chatela mumulumbulwileña kadizi wenu yuma yejima yamuBayibolu, mulejenu yayilumbulwili. Mukwashenu kadizi yelukeña Izu daNzambi chidinamukundami. Mwihulenu malwihu akumukwasha kulumbulula yuma yinadiziyi. (Luka 10:25-28) Chakutalilahu, mwihulenu nenu: “Indi iyi Nsona yinakukwashi ñahi kwiluka chilwilu chaNzambi?” “Yuma yiwunadizi muBayibolu yinakukwashi ñahi?” “Wunatiyi ñahi nayuma yiwunadizi?” (Yish. 20:5) Chuma chasweja kulema hiyuma yinakeñiyi nichinakuzatishayi yuma yinelukiyi bayi kukumina dakuyiluka hohuku.

6. Muloñadi chichawahila kuya namukwakushimwina wakulukila kudi kadizi waBayibolu?

⁶ Neyi mukweti kadizi waBayibolu, komana mwayañaku nawakwakushimwina akulukila mukudizisha? Neyi mwayaña nawu, yihulenu yuma yinamoniwu chimwalombolaña  kadizi nichimunakuzatisha chiwahi Bayibolu hakudizisha. Mwatela kwikala adizoza neyi munakukeña kwikala antañishi amawahi. (Esekejenu Yilwilu 18:24-26.) Kuhiñahu, mwihulenu mukwakushimwina wakulukila neyi chakwila kadizi wenu nakutiyishisha chalala. Mwatela cheñi kumuleja iwu mukwakushimwina kwinza nakumudizisha neyi munakufumahu hadi mulungu hela nyilungu. Chumichi chikumukwasha kadizi kudiza mpinji yejima nawa chikumukwasha kwiluka nawu kudiza kwalema. Bayi mutoñojokaña nenu iwu hikadizi “wenu” nawa kwosi muntu mukwawu watela kumudizishaku. Muloña chuma chimunakufwila hikumukwasha kadizi kutwalekahu kudiza nakwiluka yuma yayivulu kutalisha hachalala.

7. Yumanyi yinateli kukwasha kadizi kukeña yuma yinakudizayi?

⁷ Kadizi watela kumona nindi mwakeña nawa mwakuhwelela chalala chamuBayibolu. (1 Tes. 1:5) Chumichi chikumukwasha kukeña yuma yinakudizayi. Neyi chinatwesheki, mulejenu Bayibolu chiyinayikwashi muchihandilu chenu. Nkumininaku wukwiluka nindi Bayibolu yikweti yuma yalema yayivulu yinateli kumukwasha niyena.

8. Yumanyi yimwatela kwila hakwila mukwashi kadizi waBayibolu, nawa munateli kwila ñahi mwenimu?

⁸ Hampinji yimunakudiza, mulejenu kadizi wenu yakutalilahu yawantu adiña nakukala kunesekani nakwindi nichakushindiliwu. Munateli kusendaku muntu wamuchipompelu wukweti chakutalilahu chinateli kumukwasha kadizi. Hela munateli kuwana nsañu yinateli kumushika hamuchima yidi ha jw.org muyibaaba yinakwila nawu “Bayibolu Yahimpaña Yihandilu yaWantu.” * Yibaaba yamuchidiwu nimavidiyo anateli kumukwasha kadizi kwiluka chichalemena kuzatisha yishina yamuBayibolu muchihandilu chindi.

9. Munateli kumukolesha ñahi kadizi wenu kulejaku chisaka chindi niamabwambu jindi yuma yinakudizayi?

⁹ Neyi kadizi wasumbula hela wasumbuka, komana mwinikwindi niyena nakudiza? Neyi wadizaña wanyi, mutambikenu kulonda niyena yawanikiku mpinji yimunakudiza. Mukoleshenu kadizi wenu yalejeñaku chisaka chindi hela amabwambu jindi yuma yinakudizayi. (Yow. 1:40-45) Munjilanyi? Munateli kumwihula nenu: “Munateli kulumbulula ñahi iyi  nsañu kudi chisaka chenu?” hela “Nsonanyi yimunateli kuzatisha kudi mukwenu hakwila yeluki nindi yuma yimunakuhosha yalala?” Muniyi njila mukumudizisha kadizi wenu kwikala ntañishi. Neyi nashikihu dehi, nateli kwikala mukwakushimwina wabula kupapatishewa. Munateli kumwihula kadizi neyi kudihu muntu mukwawu wunakukeña kudiza Bayibolu. Neyi yeteja, hoshenu nanowu muntu swayi-swayi nawa tachikenu kudiza nindi. Mutalishenu vidiyo yaYumanyi Yamwekanaña haKudiza Bayibolu? *

10. Neyi chinashimuniwu ha 1 Atesalonika 2:7, 8, ntañishi nateli kumwimbujola ñahi Pawulu?

¹⁰ Antañishi atela kwakamenaña atudizi awu. Yimonenuña nenu akekala amanakwenu niahela kumbidi. (Tañenu 1 Atesalonika 2:7, 8.) Chinateli kuyikalila kuleka amabwambu jawu amukaayi nikuhimpa yuma yejima hakwila amukalakeleña Yehova. Twatela kuyikwasha kulonda ekali nawamabwambu alala muchipompelu. Neyi mumutemeshelañaku foni, kumutemeshelaku meseji hela kumwendela ifuku dimunakubula kudiza chikumwekesha nawu mwamukeña.

11. Tunakukeña atudizi etu kuwanadi muchipompelu, nawa muloñadi?

¹¹ Kwekala chishimu chakwila nawu: “Mwana hiyamukulishaña kudi muntu wumuku.” Dichi tunateli kuhosha netu: “Chipompelu chejima chinateli kuzataku mudimu wakwilisha kambanji.” Dichaleteshaña antañishi aBayibolu akuluka yitembi kulejaku akwawu muchipompelu hadi atudizi awu kulonda ayikwasheñaku. Dichi atudizi aBayibolu akutachika kudikunda nawantu jaNzambi anateli kuyikwasha kwikala amabwambu jaYehova nikuyikwasha neyi adi nakukala. Tunakukeña kadizi kwiluka nindi himuntu wamuchipompelu nawa wamuchisaka chetu chakuspiritu. Tunakukeña yekali muchisaka chetu chawakwaKristu. Chumichi chikumukwasha kuleka kudikunda nawantu anateli kubula kumukwasha kumukeña Yehova. (Yish. 13:20) Neyi antu adikundileña nindi amudiwula, wukwiluka nindi nateli kuwana amabwambu alala mukuloñesha kwaYehova.—Maku 10:29, 30; 1 Pet. 4:4.

12. Muloñadi chitwatela kuhoshela nankashi hakudihana nikupapatishewa kwawakwaKristu nakadizi wetu?

¹² Hoshenuña nankashi chichalemena kudihana nikupapatishewa. Chuma chacheni  chitwayidizishilaña antu Bayibolu hikuyikwasha kulonda ekali atumbanji apapatishewa. Hanyima yakwila kadizi nadizi dehi Bayibolu hadi tukweji twantesha nawa yatachika kupompa, watela kwiluka nindi nkeñelu yakudiza Bayibolu hikumukwasha kutachika kumukalakela Yehova nikwikala Chinsahu Chindi.

13. Yumanyi yatela kwilayi kadizi hakwila nawu yopapatishewi?

¹³ Kudi yuma yayivulu yatela kwilayi kadizi waBayibolu wunakukeña kupapatishewa. Chatachi, kadizi watela kumwiluka Yehova, kumukeña nikumukuhwelela. (Yow. 3:16; 17:3) Kuhiñahu kadizi wukwikala ibwambu daYehova nikudikunda nachipompelu. (Heb. 10:24, 25; Yak. 4:8) Mukuhita kwampinji, kadizi wukudanakena nshidi jindi nawa wukuleka kwila yuma yatama. (Yilw. 3:19) Dichi, wukutachika kulejaku akwawu yuma yinakuhweleliyi. (2 Kor. 4:13) Nkumininaku wukudihana kudi Yehova nikumwekesha kudihana kwindi kuhitila mukupapatishewa. (1 Pet. 3:21; 4:2) Hanidi ifuku dinapapatishewiyi antu akuzañalala. Neyi kadizi nakwila yuma yejima yatela kwilayi hakwila nawu yopapatishewi, muhamekenuña nikumukolesha kulonda yatwalekihu kwila yumiyi.

14. Ntañishi nateli kwiluka ñahi chinakuyilaku kadizi hambidi?

¹⁴ Twatela kwikala adiwunjika neyi tunakukwasha atudizi kulonda adihani nikupapatishewa. Ilaña mpinji yikwawu twatela kwiluka neyi chakwila nakufwila kumukalakela Yehova Nzambi. Komana kadizi nakumwekesha nindi nakulondela nshimbi jaYesu? Tahindi nakukeña hohu kwiluka nsañu yamuBayibolu?

15. Yumanyi yatela kushinshikayi ntañishi mudi kadizi neyi chakwila nakuyilaku hambidi hela nehi?

¹⁵ Mpinji yejima monenuña chinakuyilaku kadizi hambidi. Chakutalilahu komana wamwekeshaña nindi wamukeña Yehova? Walombaña kudi Yehova? (Mas. 116:1, 2) Komana watañaña Bayibolu? (Mas. 119:97) Wapompaña mpinji yejima? (Mas. 22:22) Komana nahimpi yilwilu yindi? (Mas. 119:112) Natachiki kulejaku chisaka chindi niakwawu yuma yinakudizayi? (Mas. 9:1) Chuma chabadika kulema, komana nakukeña kwikala Chinsahu chaYehova? (Mas. 40:8) Neyi kadizi nakwila wanyi iyi yuma, mwihulenu mukubabala chuma chinakuletesha nawa hanjekenu  nindi chachiwahi nawa chakadi kuhita mumbadi. *

16. Yumanyi yinateli kumwekesha nawu mwatela kuleka kumudizisha kadizi?

¹⁶ Mumpinji-mumpinji dihulenuña neyi chakwila mwatela kutwalekahu kudiza namuntu hela nehi. Dihulenu nenu: ‘Komana kadizi waloñeshaña wanyi? Komana wakeña wanyi kupompa? Wuchidi nayilwilu yatama? Komana wuchidi kuya munsakililu yakutwamba?’ Neyi ñakwilu yidi nawu eña, kutwalekahu kudiza naniwu muntu chidi neyi munakudizisha muntu wunakukeña kubula kuzowa chakusala. Neyi chakwila kadizi wakeña wanyi yuma yinakudizayi nawa nakukeña wanyi kuhimpa yilwilu yindi, mwatela kuleka kudiza nindi.

17. Kwesekeja na 1 Timotewu 4:16, yumanyi yatela kwilawu antañishi aBayibolu?

¹⁷ Twalemesha mudimu wetu wakwilisha atumbanji nawa tunakufwila kuyikwasha atudizi etu aBayibolu kulonda ashikihu nikupapatishewa. Dimuloña waweni wukuletesha tuzatisheña Bayibolu hakutañisha nawa tukumwekesha netu twakeña nikukuhwelela yuma yitunakutañisha. Tukumukolesha kadizi kulonda yekali nawamabwambu muchipompelu. Nawa tukukonkomwenaña chichalemena kudihana nikupapatishewa, mumpinji-mumpinji tukumonaña kadizi chinakuyilaku hambidi. (Talenu chikasha chidi hefu 13, chinakwila nawu “ Yuma Yatela Kwilayi Ntañishi Yikumukwasha Kadizi Kulonda Yapapatishewi.”) Twazañalalaña hakuzataku iwu mudimu wakwamwina mawumi awantu. Tuzateña hakumina ñovu jetu kulonda tukwashi atudizi aBayibolu kushikahu nikupapatishewa.