1. Engtin nge zirtîr siamna chu nun chhanhimna hna a ni tih kan hriat?

ZIRTIR siamna chu nun chhanhimna hna a ni tak zet a! Chu chu engtin nge kan hriat? Matthaia 28:19, 20-a chhinchhiah Isua thupêkah, ani chuan: “Chutichuan, kal ula, . . . zirtîrahte siam ula, . . . baptis ula,” tiin a sawi a ni. Baptisma chan chu eng ang taka pawimawh nge a nih? Chhandam nih kan duh chuan baptisma kan chang tûr a ni. Baptisma chan tumte chuan chhandamna chu tlanna inthawina atâna Isua thihna leh a thawhlehna avâng chauhva neih theih a ni tih an ring tlat tûr a ni. Chutiang a nih avângin, tirhkoh Petera chuan Kristian unaute hnênah: “(Baptisma) chuan Isua Krista thawhlehna avângin tûnah a chhandam che u,” tiin a hrilh a. (1 Pet. 3:21) Chuvângin, zirtîr tharin baptisma a chan hian chatuana nun beiseina a nei thei a ni.

2. Timotheia thawn hnih 4:1, 2-a sawi angin, eng ang zirtîrtu nge kan nih ang?

² Zirtîr siam tûr chuan ‘zirtîr thiamna’ kan tihhmasâwn a ngai a ni. (2 Timothea 4:1, 2 chhiar rawh.) Engvângin nge? Isua’n: “Kal ula, . . . zirtîrahte siam ula, . . . zirtîr rawh u,” tia thu a pêk avângin. Tirhkoh Paula’n chu hna thawka kan “awm reng” chuan, “chutiang tiin nangmah leh i thu ngaithlatute chu i chhandam dâwn zuk nia,” tiin a sawi a. Tichuan, chhan ṭha tak neiin: “I zirtîrnaah chuan fîmkhur la,” tiin a sawi bawk. (1 Tim. 4:16) Zirtîrna leh zirtîr siamna chu a inzawm tlat avângin, kan zirtîrna chu a ṭha thei ang ber nihtîr kan duh a ni.

3. He thuziakah hian Bible zirna kaihhruai dân chungchângah eng nge kan sawiho vang?

 ³ Mi maktaduai tam takte chu Bible-a kan hmuh thutak kan zirtîr reng a. Mahse, thuziak hmasaa kan hriat tâk ang khân, baptisma changa Isua Krista zirtîrte ni tûra a tam thei ang berte kan ṭanpui theih dân hriat chu kan duh a ni. He thuziakah hian zirlaite’n baptisma chang thei tûra hma an sâwn theih nâna zirtîrtute tih ngai thil panga sawiho a ni ang.

4. Engvângin nge zirtîrtu chuan Bible zirna a kaihhruai hunah insûmtheihna a neih ang? (Footnote en rawh.)

⁴ Pathian Thu aṭanga kan thu zirtîrte chu kan ngaina hle a. Chuvângin, kan thu ngainat zâwngte chu chipchiar taka sawi kan duh mai thei. Mahse, Vênnainsâng Zirna emaw, Kohhrana Bible Zirna emaw, in lama Bible zirna emaw kan kaihruai a nih pawhin, a kaihruaitu chuan thu a sawi tam lutuk tûr a ni lo. Bible chu zirtîrtu nihtîr tûr chuan, zirtîrtu chuan Bible chungchâng a hriat zawng zawngte hrilhfiah tum lo tûra insûmtheihna a neih a ngai a ni. * (Joh. 16:12) Baptisma i chan tirha Bible hriatna i neih leh tûna i hriatna neih chu khaikhin rawh. Baptisma i chan lai chuan Bible zirtîrna bul puite chauh i hria pawh a ni thei. (Heb. 6:1, 2) Tûna i neih ang hriatna nei tûr chuan kum tam tak i zir a ngai ngei ang; chuvângin, zirlai thar chu vawi khatah thil zawng zawng zirtîr tum suh.

5. (a) Thessalonika thawn khat 2:13 nêna inmilin, kan Bible zirpui chu a thu zir aṭangin eng nge hre thiam tûra kan duh? (b) Engtin nge zirlai chu a thu zirte sawi chhâwng tûra kan fuih theih?

⁵ Kan zirpuite’n an thu zirte chu Bible thu a ni tih an hriat kan duh a. (1 Thessalonika 2:13 chhiar rawh.) Engtin nge kan hriattîr theih? Zirlai chu a thu zirte mi dangte hnêna hrilh chhâwng tûrin fuih la. Bible chângte chu hrilhfiahsak reng aiin, ani chu hrilhfiah tûrin sâwm zâwk ang che. Pathian Thute a nunpui theih dân hre thiam tûrin ṭanpui la. A Bible châng chhiarte a hriatthiam dân a sawichhuah theih nân zawhnate zâwt ang che. (Lk. 10:25-28) Entîr nân, heti hian zâwt rawh: “Engtin nge he Bible châng hian Jehova miziate zînga pakhat hre thiam tûra a ṭanpui che?” “Engtin nge he Bible thutak hi i hlâwkpui theih ang?” “Engtin nge tûna i Bible châng chhiar hi i ngaih?” tiin. (Thuf. 20:5) Zirlaiin Bible chungchâng a hriat tam lam ni lovin, a thu hriatte a ngainat a, a nunpui hi a pawimawh ber a ni.

6. Engvângin nge Bible zirna kan kaihhruai huna thiltawn ngah thuchhuahtu hruai chu a ṭhat mai theih?

 ⁶ I Bible zirpuinaah thiltawn ngah tak thuchhuahtute chu i hruai ṭhîn em? I hruai ṭhîn a nih chuan, zirna i kaihhruai dân leh Bible i hman dân chungchângah an ngaih dânte i zâwt thei a. Zirtîrtu thiam lehzual nih i duh chuan i inngaitlâwm tûr a ni. (Tirhkohte 18:24-26 nên khaikhin rawh.) Chumi hnuah, thiltawn ngah thuchhuahtu chu i zirpuiin a thu zirte a hre thiam nia a hriat leh hriat loh zâwt ang che. Chawlhkâr khat emaw, chu aia rei emaw i awm dâwn loh chuan, ani chu zirna lo kaihruai tûrin i sâwm thei bawk. Chu chuan zirna chu pelh lo tûr leh zirna neih a pawimawhzia hre tûrin zirlai chu a ṭanpui ang. “Nangma” zirpui a nih avângin zirna chu mi dang kaihhruai theih loh tûrah ngai ngai suh. Tihah chuan, thutak a zirnaa hma a sâwn zêl theih nân, a tâna ṭha ber tûr chu i duhsak si a.

7. Zirlai chu a thil zira phûrna nei tûrin engin nge ṭanpui ang?

⁷ Zirlai chuan i phûrzia leh Bible thutakte i rin nghehzia a hmuh a ngai a. (1 Thes. 1:5) Chutiang chuan, a thil zirah phûrna a nei lehzual ngei ang. A remchân chuan, Bible thu bulte nunpuinain mi mal taka a ṭanpui dân che chu hrilh ang che. Tichuan, Bible-ah hian a hlâwkpui theih kaihhruaina ṭha tak tak a awm tih a hria ang.

8. Zirlai ṭanpui tûrin eng thil dang nge i tih theih a, engvângin nge chutianga i tih ang?

⁸ Bible in zir laiin, i zirpui chu a tawh ang harsatna tâwk vetu unaute thiltawn leh an hneh theih dânte chu hrilh la. Zirlaiin a hlâwkpui theih tûr thiltawn neitu kohhrana unau tuemaw chu zirna in neih hunah hruai ang che. A nih loh leh, jw.org-a “Thutakin Nun A Thlâk,” * tihah chuan thiltawn ṭha tak tak i hmuh thei bawk. Chûng thuziakte leh video-te chuan zirlai chu Bible thu bulte nunpui a finthlâkzia hre tûrin a ṭanpui ang.

9. Engtin nge zirlai chu a chhûngte leh a ṭhiante hnêna a thu zirte hrilh tûra i fuih theih?

⁹ I zirpui chu kawppui nei a nih chuan, a kawppui chu zirnaah a tel ve em? A tel lo a nih chuan, tel ve tûrin sâwm la. A chhûngte leh ṭhiante hnêna a thu zirte hrilh tûrin fuih ang che. (Joh. 1:40-45) Engtin  nge i fuih theih? Heti hian i zâwt thei a ni: “Engtin nge i chhûngte hnênah he thutak hi i hrilhfiah ang?” A nih loh leh, “I ṭhiante hnêna he thutak hrilhfiah nân eng Bible châng nge i hman ang?” tiin. Chutianga i tih chuan, zirlai chu zirtîrtu ni tûrin i zirtîr a ni ang a. Baptisma chang lo thuchhuahtu nih a tlin hunah rawngbâwlnaah a tel ṭan thei ang. Zirlai chu Bible zir duh tuemaw hriat a neih leh neih loh i zâwt thei a. A hria a nih chuan, ani chu be pawh nghâlin, Bible zirpui tûrin sâwm la. Bible Zirnaah Eng Nge Thleng Ṭhîn? * tih video chu chhuahsak ang che.

10. Thessalonika thawn khat 2:7, 8-naa sawi angin, engtin nge zirtîrtute chuan Paula entawn tûr siam chu an zui theih?

¹⁰ Zirtîrtute chuan zirlaite chungah mi mal ngaihsakna dik tak an lantîr tûr a ni a. Anni chu thlarau lama an unau la ni tûrte angin an thlîr tûr a ni. (1 Thessalonika 2:7, 8 chhiar rawh.) An tân khawvêl lama an ṭhiante kawm tawh loh leh Jehova rawng an bâwl theih nâna a ṭûl anga insiamrem chu thil awlsam a ni lo. Chuvângin, kohhranah ṭhian ṭhate nei tûrin kan ṭanpui a ngai a. Bible in zir lai chauh ni lovin, ni dangahte pawh hun hmanpuiin a tân ṭhian ni ang che. Zirna in neih leh hmaa phone-a biak te, SMS thawn te, leh rei lo tê va tlawhnate chuan amah i ngaihsakzia a târ lang ang.

11. Kan Bible zirpuite chu kohhranah eng nge nei tûra kan duh a, engvângin nge?

¹¹ Africa thufing pakhat chu: “Naupang pakhat enkawl seilian tûr chuan khaw pum ṭanrual a ngai,” tih a ni a. Chutiang bawkin, “Zirtîr pakhat siam tûr chuan kohhran pum ṭanrual a ngai,” tiin kan sawi thei ang. Chuvângin, zirtîrtuin kohhrana unau dangte hre tûra zirlai a ṭanpui hian, chûng unaute chuan zirlai chu Jehova hnaih lehzual tûrin an ṭanpui thei a. Chutiang chuan, thlarau lam leh rilru lama amah ṭanpui theitu Pathian mite nêna inkawmho chu nuam a ti thei ang. Zirlai tinte chu kohhrana hmun nei nia inhriatna leh thlarau lam chhûngkaw zînga tel ve nia inhriatna nei tûrin kan duh a. Kan Kristian inunauna duhawm tak hîpa an awm chu kan duh a ni. Chu chuan Jehova be lotute kawm loh chu an tân a tiawlsam lehzual ang a. (Thuf. 13:20) Tûn hmaa a ṭhiante’n an kâwm duh tawh lo a nih chuan, Jehova inawpna pâwlah ṭhian dik tak a nei thei tih a hria ang.—Mk. 10:29, 30; 1 Pet. 4:4.

12. Engvângin nge kan zirpui chu Kristian inpumpêkna leh baptisma channa chungchâng kan sawipui ang?

¹² Inpumpêk a, baptisma chan a pawimawhzia chu sawipui ṭhîn ang che. Dik tak chuan, Bible zirna kaihhruainain a tum chu, baptisma chang zirtîr ni tûra zirlai ṭanpui hi a ni. Thla engemaw zât mumal taka zirna in neih hnuah, a bîk takin, inkhâwmahte a tel ṭan hnuah, zirlai chuan Bible zirnain a tum chu Thuhretute zînga mi nia Jehova rawngbâwl thei tûra amah ṭanpui hi a ni tih a hre thiam tûr a ni.

13. Baptisma chang thei tûra zirlai tih ngai chu eng nge ni?

¹³ Bible zirlai taima tak chuan zawi zawiin baptisma chan duhna a nei thei a. A hmasain, zirlai chuan Jehova chungchâng hriatna te, amah hmangaihna te, leh rinnate a rawn nei ṭan a. (Joh. 3:16; 17:3) Chumi hnuah, Jehova leh kohhrana unaute nêna inlaichînna ṭha a nei a ni. (Heb. 10:24, 25; Jak. 4:8) A tâwpah, a thil chîn ṭha lote chu hnâwlin, a thil sual tihte chu a bânsan thei a. (Tirh. 3:19) Chutih rualin, a rinna chuan mi dangte hnêna thutak hrilh tûrin a chêttîr a ni. (2 Kor. 4:13) Tichuan, Jehova hnênah mi mala inpumpêkna neiin, baptisma a chang ta a ni. (1 Pet. 3:21; 4:2) Chu chu unau zawng zawngte tân ni hlimawm a va ni tak êm! Zirlaiin a thiltum hlen tûra hma a lâk laiin, ani chu tih tak zetin fak la, kawng dika kal chhunzawm zêl tûrin fuih mawlh mawlh ang che.

14. Zirtîrtu chuan zirlai hmasâwn dân chu engtin nge a chhût theih?

¹⁴ Zirlai chu inpumpêk a, baptisma chang thei khawpa hma sâwn tûra kan ṭanpuinaah dawhtheihna kan neih a ngai a. Chutih rualin, Pathian Jehova rawngbâwl a duh tak tak tih kan hriat a ngai a ni. Zirlai chuan Isua thupêkte zawm a tum tih a lantîr em? Nge ni a, Bible hriatna neih mai chauh a duh zâwk?

15. Zirtîrtu chuan zirlai hnên aṭangin eng hmasâwnnate nge a beisei ang?

¹⁵ Zirlai hmasâwnnate chu ngun takin chîk ṭhîn ang che. Entîr nân, Jehova chunga a rilru put hmangte a târ lang ṭhîn em? Jehova hnênah a ṭawngṭai ṭhîn em? (Sâm 116:1, 2) Bible chhiar chu nuam a ti em? (Sâm 119:97) Inkhâwmahte a tel ziah em? (Sâm 22:22) A nunah inthlâk danglamnate a nei em? (Sâm  119:112) A thu zirte chu a chhûngte leh a ṭhiante hnênah a hrilh ṭan tawh em? (Sâm 9:1) A pawimawh ber chu, Jehova Thuhretu nih a duh em? (Sâm 40:8) Zirlaiin chûng dinhmunahte hmasâwnna a neih loh chuan, a chhante chu hriat tum la, chumi hnuah, ngilnei tak leh tlang takin sawipui ang che. *

16. Eng hunah nge Bible zirna tihtâwp a ngaih mai theih?

¹⁶ Mi tuemaw chu Bible zirpui zawm zêl tûr a nih leh nih loh a khât tâwkin chhût ṭhîn ang che. Heti hian inzâwt rawh: ‘Zirlai chu zir tûr atân a inbuatsaih em? Inkhâwma tel chu a hreh em? Chîn dân ṭha lote a la nei em? Sakhaw dik lovah a la tel reng em?’ tihte hi. A chhânna chu ‘aw’ tih a nih chuan, chutiang mi nêna Bible zir zawm zêl chu tui huh hlau tak tuemaw tui hleuh dân zirtîr tum ang a ni ang! Zirlaiin a thu zirte ngaihhlutna leh inthlâk danglam duhna a neih loh chuan, engvângin nge ani chu i zirpui zawm zêl ang?

17. Timothea thawn khat 4:16-a sawi angin, Bible zirtîrtute chuan eng nge an tih ang?

¹⁷ Zirtîr siam tûra kan mawhphurhna chu kan ngaih pawimawh êm avângin, kan Bible zirpuite chu baptisma an chan thlenga hmasâwn tûra ṭanpui kan duh a ni. Chuvângin, Bible chu zirtîrtu nihtîrin, phûrna leh rin nghehna neiin kan zirtîr ang. Zirlai chu kohhranah ṭhiante siam tûrin kan fuih ang a. Chu bâkah, Pathian hnêna inpumpêk a, baptisma chan chu thiltuma nei tûrin kan fuih ṭhîn ang a, a hmasâwnnate chu a khât tâwkin kan chhût ṭhîn bawk ang. (Phêk 13-naa “ Baptisma Chan Thlenga Zirlaite Ṭanpui Tûra Zirtîrtute Tih Ngai Chu,” tih bâwm chu en rawh) He nun chhanhim theihna hnaa kan tel theih avângin kan va hlim tak êm! Baptisma an chan thlenga Bible zirlaite ṭanpui tûra theih tâwp chhuah zawm zêl chu i tum tlat ang u.