XNAQʼTZBʼIL 42
Tzeʼn jaku qo onin tiʼj jun xjal tuʼn tjaw aʼ twiʼ (tkabʼin plaj)
«Kwentin ok tibʼa, ex qʼoʼnka kwent tiʼj ju xnaqʼtzbʼil in tqʼoʼna» (1 TIM. 4:16).
BʼITZ 77 At spikʼun twitz jun txʼotxʼ qlolj
AJU KʼELEL QNIKʼ TIʼJ *
1. ¿Tiquʼn in xi qqʼamaʼn qa jaku che klet xjal qa ma che ok te t-xnaqʼtzbʼen Jesús?
JAKU che klet xjal qa ma che ok te t-xnaqʼtzbʼen Jesús. ¿Tiquʼn in xi qqʼamaʼn jlu? Bʼaʼn tuʼn ttzaj qnaʼn qa kyaj tqʼamaʼn Jesús jlu toj Mateo 28:19 ex 20: «Kyxiʼye, kymanxe kye xjal tuʼn kyok te nxnaqʼtzbʼene», «ex tuʼn kybʼyan». Ojtzqiʼn quʼn qa nim toklen tuʼn tjaw aʼ twiʼ jun xjal tuʼntzun tklet. Aju xjal taj tuʼn tjaw aʼ twiʼ, nim toklen tuʼn tel tnikʼ tiʼj qa oʼkx jaku klet noq tuʼnju kyim Jesús tuʼn qpaj ex qa jaw anqʼin juntl maj. Tuʼntzunju, xi tqʼamaʼn apóstol Pedro jlu kye okslal: «Aju aʼ lu [...] jun yekʼbʼil tiʼj ju bʼyabʼl, aju ma qo klet tuʼn jaʼlo. [...] Tuʼnju o jatz anqʼin Jesucrist kyxol kyimni» (1 Ped. 3:21). Tuʼn jlu in nel qnikʼ tiʼj qa jaku tzʼanqʼin jun xjal te jumajx qa ma jaw aʼ twiʼ.
2. Ik tzeʼn in tzaj tqʼamaʼn 2 Timoteo 4:1 ex 2, ¿tiʼ il tiʼj tuʼn tbʼant quʼn?
2 Tuʼn kyok xjal te t-xnaqʼtzbʼen Jesús, nim toklen tuʼn tbʼant-xix qqʼon xnaqʼtzbʼil (kjawil uʼjit 2 Timoteo 4:1, 2). ¿Tiquʼn? Tuʼnju kyaj tqʼamaʼn Jesús jlu qe: «Kyxiʼye, kymanxe kye xjal tuʼn kyok te nxnaqʼtzbʼene [... ex] kyqʼonxe xnaqʼtzbʼil kye». Xi tqʼamaʼn apóstol Pablo te Timoteo tuʼn kukx tok tilil tuʼn tuʼn tbʼant aqʼuntl lu ex tqʼamatl jlu: «Qa ma tbʼinchaya jlu, axa ok kletel kyukʼix qeju in che bʼin tiʼj tyola». Tuʼntzunju, xi tqʼoʼn nabʼil lu te: «Qʼoʼnka kwent tiʼj ju xnaqʼtzbʼil in tqʼoʼna» (1 Tim. 4:16). Aj qonin kyiʼj xjal tuʼn kyok te t-xnaqʼtzbʼen Jesús, qaj tuʼn tbʼant quʼn toj tumel tuʼnju at toklen tukʼilju tuʼn qqʼon xnaqʼtzbʼil.
3. ¿Tiʼ qo xnaqʼtzal tiʼj toj xnaqʼtzbʼil lu?
3 Tkyaqil seman in xi qqʼoʼn xnaqʼtzbʼil tiʼj Tyol Dios kye nim millón xjal. Ex ik tzeʼn el qnikʼ tiʼj toj xnaqʼtzbʼil kyaj, qaj tuʼn qonin kyiʼj mas xjal tuʼn tjaw aʼ kywiʼ. Toj xnaqʼtzbʼil lu, kʼelel qnikʼ tiʼj jweʼ tiʼchaq jaku bʼant quʼn tuʼntzun qonin kyiʼj xjal tuʼn tjaw aʼ kywiʼ.
TZʼAJBʼENX TYOL DIOS QUʼN AJ QQʼON XNAQʼTZBʼIL
4. ¿Tiquʼn il tiʼj tuʼn tok qxqʼuqin qibʼ aj qqʼon xnaqʼtzbʼil tiʼj Tyol Dios? (Ax ikx qʼonka twitza tiʼj tqanil).
4 Qkyaqilx qgan tuʼn qqʼon xnaqʼtzbʼil tiʼj Tyol Dios. Tuʼntzunju, bʼalo qaj tuʼn qyolin nim ambʼil tiʼj. Pero mintiʼ tuʼn qyolin nim ambʼil aj tex qʼet Xnaqʼtzbʼil tiʼj uʼj Aju Xqʼuqil, Xnaqʼtzbʼil tiʼj Tyol Dios kye kʼloj okslal moqa aj t-xi qqʼoʼn xnaqʼtzbʼil kye xjal, sino mas bʼaʼn tuʼn tajbʼen Tyol Dios quʼn. Tuʼn tbʼant jlu, nim toklen tuʼn tok qxqʼuqin qibʼ ex tuʼn miʼn t-xi qchikʼbʼaʼn tkyaqilju ojtzqiʼn quʼn tiʼj jun xnaqʼtzbʼil moqa tiʼj jun texto (Juan 16:12). * Bʼaʼn tuʼn qximen tiʼj jniʼ qojtzqibʼil at jaʼlo tiʼj Tyol Dios tukʼilju ojtzqiʼn quʼn tej tjaw aʼ qwiʼ. Bʼalo oʼkx ojtzqiʼntoq qe xnaqʼtzbʼil nim kyoklen quʼn (Heb. 6:1). Qa xi tiʼn ambʼil tuʼn tten qojtzqibʼil at jaʼlo, miʼn tzʼok tilil quʼn tuʼn tel tnikʼ xjal tiʼj tkyaqil xnaqʼtzbʼil toj chʼin ambʼil.
5. a) Ik tzeʼn in tzaj tqʼamaʼn 1 Tesalonicenses 2:13, ¿tiʼ qaj tuʼn tel tnikʼ xjal tiʼj? b) ¿Tiʼ jaku bʼant quʼn tuʼntzun ttzaj tqʼamaʼn xjal qe tiʼ in kubʼ tnaʼn tiʼjju in nel tnikʼ tiʼj?
5 Qaj tuʼn tel tnikʼ xjal tiʼj qa atz toj Tyol Dios in jatz xnaqʼtzbʼil in xi qyekʼin te (kjawil uʼjit 1 Tesalonicenses 2:13). Tuʼn tbʼant jlu quʼn, qqaninx tiʼ t-ximbʼetz at tiʼj xnaqʼtzbʼil in nel tnikʼ tiʼj. Miʼn t-xi qchikʼbʼaʼn tkyaqil taqikʼ Tyol Dios te, sino qqʼamanx te tuʼn ttzaj tchikʼbʼaʼn junjun. Qo onin tiʼj tzeʼn jaku kubʼ tbʼinchaʼn aju in tzaj tqʼamaʼn Tyol Dios. Qqaninx xjel te tuʼntzun ttzaj tqʼamaʼn tiʼ t-ximbʼetz moqa tiʼ in kubʼ tnaʼn tiʼj jun taqikʼ Tyol Dios in jaw tuʼjin (Luc. 10:25-28). Jun techel, jaku txi qqanin jlu te: «¿Alkye tmod Jehová in nel tnikʼa tiʼj toj taqikʼ Tyol Dios lu?», «¿Tzeʼn jaku tzʼonin taqikʼ Tyol Dios lu tiʼja?», «¿Tiʼ in kubʼ tnaʼna tuʼnju ma tzʼel tnikʼa tiʼj?» (Prov. 20:5). Mas nim toklen tuʼn tok tkʼujlaʼn xjal aju in nel tnikʼ tiʼj ex tuʼn tkubʼ tbʼinchaʼn twitzju tuʼn tel tnikʼ tiʼj nim xnaqʼtzbʼil.
6. Aj qxiʼ qʼol xnaqʼtzbʼil, ¿tiquʼn bʼaʼn tuʼn t-xi qqʼoʼn txokbʼil kyiʼj erman ya at kyojtzqibʼil tiʼj tuʼn kyqʼon xnaqʼtzbʼil?
6 ¿In xipe qqʼoʼn txokbʼil kyiʼj erman ya at kyojtzqibʼil tiʼj tzeʼn tuʼn qqʼon xnaqʼtzbʼil tuʼn kyxiʼ qukʼil? Qatzun ma txiʼ jun qukʼil, bʼaʼn tuʼn t-xi qqanin te tzeʼn qo qʼon xnaqʼtzbʼil ex qa in najbʼen Tyol Dios quʼn. Tuʼn tbʼant-xix qqʼon xnaqʼtzbʼil, nim toklen tuʼn tkubʼ qin qibʼ (jaku tzʼok tmojbʼaʼna tukʼil Hechos 18:24-26). Ax ikx jaku txi qqanin te erman qa in nel tnikʼ xjal tiʼj xnaqʼtzbʼil. Qa qo elex bʼet jun seman moqa mas, jaku txi qqʼamaʼn te tuʼn t-xiʼ qʼol xnaqʼtzbʼil akux in qo meltzʼaj. Iktzun tten kʼelel tnikʼ xjal tiʼj qa nim toklen xnaqʼtzbʼil. Miʼn kubʼ qximen qa oʼkx qe jaku qox qʼonte xnaqʼtzbʼil te xjal ex qa mlayx txiʼ juntl te qxel. Qaj tuʼn tchʼiy tamiwbʼil xjal tukʼil Jehová ex tuʼn tten mas tojtzqibʼil tiʼj.
QQʼONX XNAQʼTZBʼIL TUKʼIL TZALAJBʼIL EX QEʼK QKʼUʼJ TIʼJ
7. ¿Tiʼ jaku tzʼonin tiʼj jun xjal tuʼn ttzalaj tiʼjju in nel tnikʼ tiʼj?
7 Nim toklen tuʼn tel kynikʼ xjal tiʼj qa in qo tzalaj kyiʼj xnaqʼtzbʼil ateʼ toj Tyol Dios ex qa qʼuqli qkʼuʼj tiʼj (1 Tes. 1:5). Kʼonil jlu tiʼj tuʼn ttzalaj tiʼjju in nel tnikʼ tiʼj. Bʼalo jaku txi qqʼamaʼn te tzeʼn o che onin nabʼil toj Tyol Dios qiʼj. Tuʼn jlu kʼelel tnikʼ tiʼj qa ax ikx jaku che onin nabʼil toj Tyol Dios tiʼj.
8. ¿Tiʼ juntl tiʼ jaku bʼant quʼn tuʼn tonin xnaqʼtzbʼil tiʼj xjal ex tiquʼn?
8 Akux in qo qʼon xnaqʼtzbʼil, jaku qo yolin kyiʼj erman in che ok weʼ twitz nya bʼaʼn ik tzeʼn te xjal ex tzeʼn o che ex twitz. ¿Jakupe tzʼonin techel in kubʼ tqʼoʼn jun erman at toj kʼloj okslal tiʼj? Qa ikju, qqʼamanx te erman tuʼn t-xiʼ qukʼil qʼol xnaqʼtzbʼil. Ax ikx jaku qo yolin kyiʼj tbʼanel techel at toj kʼloj xnaqʼtzbʼil «Chʼexpaj kyanqʼibʼil tuʼn Tyol Dios», aju at toj jw.org. * Jaku che onin xnaqʼtzbʼil ex video lu tiʼj tuʼn tel tnikʼ tiʼj qa jaku tzaj tiʼn tbʼanel te qa ma chex tbʼiʼn nabʼil toj Tyol Dios.
9. ¿Tzeʼn jaku qo onin tiʼj xjal tuʼn tyolin kyukʼil toj tja ex kyukʼil tamiw tiʼjju in nel tnikʼ tiʼj?
9 Qa o mojeʼ xjal ex mintiʼ in xnaqʼtzan tukʼil, jaku txi qqʼoʼn txokbʼil tiʼj tukʼil tuʼntzun tok tbʼiʼn xnaqʼtzbʼil. Ax ikx, bʼaʼn tuʼn t-xi qqʼamaʼn te xjal tuʼn tyolin tiʼjju in nel tnikʼ tiʼj kyukʼil toj tja moqa kyukʼil tamiw (Juan 1:40-45). Jaku txi qqanin jlu te: «¿Tzeʼn jaku txi tchikʼbʼaʼna xnaqʼtzbʼil lu kye toj tjaya?». Moqa «¿alkye taqikʼ Tyol Dios jaku tzʼajbʼen tuʼna tuʼn t-xi tchikʼbʼaʼna jlu te tamiwa?». Atzun jun tumel jaku qo onin tiʼj xjal tuʼn tbʼant tqʼon xnaqʼtzbʼil. Ajtzun tbʼant tten, jaku tzʼex pakbʼal kyukʼil erman toj kʼloj okslal. Jaku txi qqanin te qa ojtzqiʼn jun xjal tuʼn, aju taj tuʼn tel tnikʼ tiʼj Tyol Dios. Qa ma tzaj tqʼamaʼn qa at jun, bʼaʼn tuʼn qxiʼ jyolte xjal ex qqaninx te qa taj tuʼn t-xnaqʼtzan tiʼj Tyol Dios. Qyekʼinx video te, aju tok tbʼi ¿Tzeʼn in xi qʼet jun xnaqʼtzbʼil tiʼj Tyol Dios? *
QO ONIN TIʼJ XJAL TUʼN TOK TAMIWEN TIBʼ KYUKʼIL ERMAN
10. Ik tzeʼn in tzaj tqʼamaʼn 1 Tesalonicenses 2:7 ex 8, ¿tzeʼn jaku tzʼel qkanoʼn tiʼj techel kyaj tqʼoʼn apóstol Pablo?
10 Nim toklen tuʼn tok qkʼujlaʼn qe xjal in che xnaqʼtzan qukʼil. Qo ximen tiʼj qa che okel te qerman (kjawil uʼjit 1 Tesalonicenses 2:7, 8). Kwest jaku tzʼel kye tuʼn tkyaj kytzaqpiʼn qe kyamiw ex tuʼn kybʼant chʼixpubʼil kyuʼn tuʼn kyajbʼen te Jehová. Tuʼntzunju, qo onin kyiʼj tuʼn kykanet axix tok kyamiw toj kʼloj okslal. Qa ma tzʼel qpaʼn ambʼil tuʼn qten kyukʼil ex nya oʼkx aj t-xi qqʼoʼn xnaqʼtzbʼil kye, kbʼel qyekʼin qa qaj tuʼn qok te kyamiw. Kbʼel qyekʼin qa in qo ximen kyiʼj aj kyxi qllamarin, aj t-xi qsamaʼn jun mensaje kye moqa aj qikʼ jun rat kyukʼil.
11. ¿Tiʼ qaj tuʼn tkanet kyuʼn xjal in che xnaqʼtzan tiʼj Tyol Dios ex tiquʼn?
11 In kyqʼamaʼn xjal te África qe yol lu: «Il tiʼj tuʼn tonin jun tnam tuʼn tchʼiy jun kʼwal». Chʼixmi axju jaku txi qqʼamaʼn tiʼj jun xjal in xnaqʼtzan: «Il tiʼj tuʼn tonin jun kʼloj okslal tiʼj tuʼntzun tok te t-xnaqʼtzbʼen Jesús». Tuʼntzunju, in nok tilil quʼn tuʼn tok kyojtzqiʼn junjuntl erman aju xjal in xnaqʼtzan qukʼil tuʼntzun kyonin tiʼj. Iktzun tten jaku txi onit tuʼn tchʼiy toj tokslabʼil ex tuʼn ttzalaj toj ttnam Jehová. Qaj tuʼn tkubʼ kynaʼn xjal qa nim kyoklen toj kʼloj okslal ex qa in che ok qqʼoʼn ik tzeʼn qtzik moqa qitzʼin. Qa ma bʼant jlu quʼn, mas nya kwest jaku tzʼela toj kywitz tuʼn tkyaj kytzaqpiʼn qe kyamiw mintiʼ in che ajbʼen te Jehová (Prov. 13:20). Qa ma tzʼel ikʼun kyuʼn tamiw, jaku tzʼok qeʼ tkʼuʼj tiʼj qa che kanetel axix tok tamiw toj ttnam Jehová (Mar. 10:29, 30; 1 Ped. 4:4).
QNAʼNX TE TUʼN T-XI TQʼAMAʼN TE JEHOVÁ TUʼN TAJBʼEN TE EX TUʼN TJAW Aʼ TWIʼ
12. ¿Tiquʼn nim toklen tuʼn qyolin tukʼil xjal in xnaqʼtzan tiʼjju tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ?
12 Miʼn qo xobʼ tuʼn t-xi qqʼamaʼn te xjal tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ. ¿Tiquʼn? Tuʼnju aj qqʼon xnaqʼtzbʼil, qaj tuʼn tjaw aʼ twiʼ xjal ex tuʼn tajbʼen te Jehová. Qa ya ma tzikʼ junjun xjaw in xnaqʼtzan xjal tiʼj Tyol Dios ex qa ya in pon kyoj chmabʼil, nim toklen tuʼn tel tnikʼ tiʼj qa in xi qʼet xnaqʼtzbʼil te tuʼn tok te testigo de Jehová.
13. ¿Alkyeqe tiʼchaq in bʼant tuʼn jun xjal tuʼntzun tjaw aʼ twiʼ?
13 Qa ax tok taj xjal tuʼn tajbʼen te Jehová, kbʼantel junjun tiʼchaq tuʼn tuʼntzun tjaw aʼ twiʼ. Tnejel, ktel tojtzqibʼil tiʼj Jehová ex kʼokel tkʼujlaʼn. Ax ikx ktel qʼuqbʼil tkʼuʼj tiʼj (Juan 3:16; 17:3). Yajxitl, in nok tamiwin tibʼ tukʼil Jehová ex kyukʼil erman (Heb. 10:24, 25; Sant. 4:8). Aj tbʼet ambʼil, in kyaj ttzaqpiʼn nya bʼaʼn ex in najtz tiʼj tanmi (Hech. 3:19). Akux in pon ambʼil lu, in nonin qʼuqbʼil tkʼuʼj tiʼj tuʼn tyolin tiʼj axix tok kyukʼil xjal (2 Cor. 4:13). Te bʼajsbʼil, in xi tqʼamaʼn te Jehová qa taj tuʼn tajbʼen te ex in jaw aʼ twiʼ (1 Ped. 3:21; 4:2). Qkyaqilx in qo tzalaj aj in pon qʼij lu. Akux in chʼiy tamiwbʼil xjal tukʼil Jehová, qqʼamanx tbʼanel yol te ex qo onin tiʼj tuʼn kukx tok tilil tuʼn.
QQʼONK QWITZ TIʼJ QA IN CHʼIY TOJ TOKSLABʼIL
14. ¿Tzeʼn jaku tzʼel qnikʼ tiʼj qa in chʼiy xjal toj tokslabʼil?
14 Il tiʼj tuʼn tten qpasens aj qonin tiʼj jun xjal tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ. Pero kpol ambʼil tuʼn tel qnikʼ tiʼj qa taj xjal tuʼn tajbʼen te Jehová moqa miʼn. ¿In nokpe tilil tuʼn tuʼn t-xi tnimen qe tkawbʼil Jesús? ¿Moqa in xnaqʼtzan noq tuʼnju tgan tuʼn tel tnikʼ kyiʼj xnaqʼtzbʼil toj Tyol Dios?
15. ¿Tzeʼn jaku kubʼ tyekʼin jun xjal qa in chʼiy toj tokslabʼil?
15 Aj tikʼ junjun ambʼil, qo ximen tiʼj alkyeqe chʼixpubʼil in che bʼant kyuʼn xjal. Jun techel, ¿in tzajpe tqʼamaʼn tiʼ in tnaʼn tiʼj Jehová? ¿In nelpe tpaʼn ambʼil tuʼn tnaʼn Dios? (Sal. 116:1, 2). ¿Tganpe tuʼn tuʼjin tiʼj Tyol Dios? (Sal. 119:97). ¿Kukxpe in pon kyoj chmabʼil? (Sal. 22:22). ¿Ope che bʼant chʼixpubʼil tuʼn toj tanqʼibʼil? (Sal. 119:112). ¿In yolinpe kyukʼil toj tja ex kyukʼil tamiw tiʼjju o tzʼel tnikʼ tiʼj? (Sal. 9:1). Ex aju mas nim toklen, ¿tajpe tuʼn tok te testigo de Jehová? (Sal. 40:8). Qa mintiʼ jun kyxol qe jlu in bʼant tuʼn, qqʼonk tilil tuʼn tel qnikʼ tiʼj tiquʼn, ex yajxitl, qo yolin tiʼj tukʼil toj tumel ex tukʼil kʼujlabʼil. *
16. ¿Toj alkye ambʼil jaku kyaj qtzaqpiʼn jun xnaqʼtzbʼil tiʼj Tyol Dios?
16 At tikʼ junjun ambʼil, bʼaʼn tuʼn qximen tiʼj qa kukx kxel qqʼoʼn xnaqʼtzbʼil te jun xjal ex bʼaʼn tuʼn tkubʼ qxjelin jlu: «¿In bʼajpe tbʼinchaʼn tten tiʼj xnaqʼtzbʼil? ¿Tajpe tuʼn t-xiʼ kyoj chmabʼil? ¿Ope kyaj ttzaqpiʼn qe nya bʼaʼn in bʼant tuʼn? ¿Ope kyaj ttzaqpiʼn okslabʼil nya ax tok?». Qa ma tzʼel qnikʼ tiʼj qa mintiʼ in nok tilil tuʼn xjal ex kukx in xi qqʼoʼn xnaqʼtzbʼil te, in nok jlu ik tzeʼn qaj tuʼn t-xi qxnaqʼtzaʼn te jun xjal tuʼn tbʼant tnadarin, pero nya taj tuʼn tkuʼx toj aʼ. Qa mintiʼ in nok tqʼoʼn xjal toklen xnaqʼtzbʼil ex qa mintiʼ in bʼant chʼixpubʼil tuʼn, maslo bʼaʼn qa ma kyaj qtzaqpiʼn xnaqʼtzbʼil.
17. Ik tzeʼn in tzaj tqʼamaʼn 1 Timoteo 4:16, ¿tiʼ kbʼantel quʼn aj qqʼon xnaqʼtzbʼil tiʼj Tyol Dios?
17 Nimxix toklen toj qwitz tuʼn qonin kyiʼj xjal tuʼn kyok te t-xnaqʼtzbʼen Jesús. Qaj tuʼn qonin kyiʼj qeju in che xnaqʼtzan qukʼil tuʼn tjaw aʼ kywiʼ. Tuʼntzunju, kʼajbʼel Tyol Dios quʼn aj qqʼon xnaqʼtzbʼil, qo yolil tukʼil tzalajbʼil ex kʼokel qeʼ qkʼuʼj tiʼjju in xi qqʼamaʼn. Qo onil tiʼj xjal tuʼn tok tamiwin tibʼ kyukʼil erman, kxel qqʼamaʼn te qa nim toklen tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ ex kʼokel tilil quʼn tuʼn tel qnikʼ tiʼj qa in chʼiy toj tokslabʼil. (Qʼonka twitza tiʼj recuadro « Aju kbʼantel quʼn aj qqʼon xnaqʼtzbʼil»). ¡Nimxix in qo tzalaj tuʼnju in qo onin tiʼj aqʼuntl tuʼn kyklet xjal! Tuʼn tkyaqilju ma tzʼel qnikʼ tiʼj, tzʼok tilil quʼn tuʼn qonin kyiʼj xjal in che xnaqʼtzan qukʼil tuʼn tjaw aʼ kywiʼ.
BʼITZ 79 Kyxnaqʼtzanxe tuʼn kyweʼxix
^ taqik' 5 Jun oklenj te qe aj t-xi qqʼoʼn xnaqʼtzbʼil tiʼj Tyol Dios te jun xjal, tuʼnju in xi qyekʼin te tzeʼn taj Jehová tuʼn t-ximen, tuʼn tkubʼ tnaʼn ex tuʼn t-xi tbʼinchaʼn qe tiʼchaq. Ktzajel tqʼoʼn xnaqʼtzbʼil lu junjuntl nabʼil qe tzeʼn tuʼn tbʼant-xix qqʼon xnaqʼtzbʼil.
^ taqik' 4 Qʼonka twitza tiʼj xnaqʼtzbʼil «Miʼn bʼant jlu tuʼna aj t-xi tqʼoʼna xnaqʼtzbʼil tiʼj Tyol Dios», aju etz toj Uʼj te aqʼuntl toj chmabʼil te septiembre te 2016.
^ taqik' 8 Txiʼya jatumel in tzaj tqʼamaʼn TQANIL KYIʼJ TESTIGOS DE JEHOVÁ > AJU IN NIKʼ KYIʼJ TESTIGOS DE JEHOVÁ.
^ taqik' 9 Txiʼya toj jw.org, jatumel in tzaj tqʼamaʼn KʼUBʼIL UʼJ > VIDEOS > QE QCHMABʼILE EX QPAKBʼABʼILE > ONBʼIL TUʼN QPAKBʼAN.
^ taqik' 15 Qʼonka twitza kyiʼj xnaqʼtzbʼil «In nonin qkʼujlabʼil at tiʼj Jehová tuʼn tjaw aʼ qwiʼ» ex «¿Ope bʼant ttena tuʼn tjaw aʼ twiʼya?», aju etz toj uʼj Aju Xqʼuqil te marzo te 2020.
^ taqik' 77 TQANIL TIʼJ TILBʼILAL: Otoqxi che bʼaj qʼon kabʼe ermana xnaqʼtzbʼil, in xi tqʼamaʼn ermana at mas tojtzqibʼil te ermana in qʼon xnaqʼtzbʼil qa mas bʼaʼn tuʼn miʼn tyolin nim.
^ taqik' 79 TQANIL TIʼJ TILBʼILAL: Akux in kʼamon xuʼj xnaqʼtzbʼil, in nel tnikʼ tiʼj tzeʼn jaku tzʼok te jun tbʼanel xuʼjilbʼaj.
^ taqik' 81 TQANIL TIʼJ TILBʼILAL: In tzalaj xuʼj tukʼil tchmil akux ateʼ tja juntl ermana ok tojtzqiʼn toj Ja te Chmabʼil.
