CILONGESA 42
Twasa Kukwasa Bati Batukalilongesa Nabo Mbimbiliya Babambwitike—Mutamba 2
“Linyunge yobe babenya, co lalo ilula bilongesa byobe.”—1 TIMA 4:16.
MWASO 77 Liseli Mwa Lifasi la Lififi
BILI MUNO MU CILONGESA *
1. Tuzibuka bati ngwetu cipangi ca kupwisa banu bandongesi cobola banu?
CIPANGI ca kupwisa banu bandongesi cobola banu. Tuzibuka bati ngoco? Yesu watwanene lishiko lije lili ku mukanda wa Mateo 28:19, 20. Washikile ngwendi: ‘Yeni na kupwisa banu bandongesi, co bambwitikeni.’ Cimbwitiko capwa bati ca seho? Munu banapande tahi kumumbwitika asinoni akawane mwonyo wa myaka yoshe. Baje baya ku cimbwitiko banapande kukulahela ngwabo kutsa kwa Yesu na kusanguka kwendi kukekwo kubakwasa bakawane mwonyo wa myaka yoshe. Mukemwo kapositolo Petulu walekele bakwabo baka-Kilistu ngwendi: “Kumbwitika cije . . . cinamyobola ha kusanguka kwa Yesu Kilistu.” (1 Petu 3:21) Ngeci, nga munu bamumbwitika, co akala na lilabelelo lya kukayoya myaka yoshe.
2. Mukanda wa 2 Timateo 4:1, 2 utushongangeya tulinge bika ha kupwa balongesi?
2 Tunapande kubwezelela ku “butongwe bwa kulongesa” mangana tupwise banu bandongesi. (Tandeni 2 Timateo 4:1, 2, NWT.) Mwafwa bika? Mwafwa Yesu watushikile ngwendi: ‘Yeni na kupwisa banu bandongesi, co balongeseni.’ Kapositolo Paulu watushongangeyeye ngwendi ‘tutwaleleleho’ kulinga eci cipangi. Nga tulingamo, co ‘tulyamena yetu babenya na baje batutolilila.’ Bikebyo byalingisile Paulu endeke ngwendi: “Ilula bilongesa byobe.” (1 Tima 4:16) Tushaka kulongesa mu butongwe mangana tupwise banu bandongesi.
3. Bika bitusimutwiya muno mu cilongesa?
3 Tuli na kulongesa banu babangi busunga buli mu Mbimbiliya. Oloni ngwe mutunamwena mu cilongesa cinahu, tushaka tukwase banu babangi batukalilongesa nabo bapwe bandongesi ba Yesu Kilistu ba kumbwitika. Muno mu cilongesa, tusimutwiya ha byuma bikwabo bitanu byanapande kulinga mulongesi mangana akwase munu ya kalilongesa nendi akole ku sipilitu na kumumbwitika.
PANGESENI MBIMBILIYA OMWO MULONGESA
Lombeni muka-kwambulula uje azibuka mwamubwa kwambulula amilongese mwakupangesela Mbimbiliya mu butongwe (Taleni palagilafu 4-6) *
4. Mwafwa bika mulongesi kapandele kwendeka byuma byabingi nga atwamenena cilongesa? (Taleni lalo na majwi a kwinikila)
4 Twazema byuma bya mu Lijwi lya Njambi bitukalongesa banu. Ngeci, tunasa kwendeka byabingi ha simbu ya kulongesa. Oloni munu uje atwamenena cilongesa ca Kaposhi ka Kukengela, Cilongesa ca Mbimbiliya ca Cikungulukilo nambe Cilongesa ca Mbimbiliya, kapandele kwendeka byabingi. Nga muka-kutwamenena cilongesa ca Mbimbiliya ashaka kupangesa mwamubwa Mbimbiliya, co kapandele kwendeka byoshe byazibuka ha ñanda ibali na kusimutwiya. * (Yowa 16:12) Esekeseni byuma bimwazibukile ha simbu ibamimbwitikile na byuma bimunazibuka ha simbu ino. Hamo ha simbu ije mwazibukile lika bilongesa bya maputukilo bya mu Mbimbiliya. (Heve 6:1) Kuneti myaka yaingi asina mwete ha kuzibuka byuma bimunazibuka ha simbu ino. Ngeci, keti mulongese munu imukalilongesa nendi byuma byabingi ha simbu imo lika.
5. (a) Kwesekesa na 1 Tesalonika 2:13, byuma muka bitushaka ngwetu munu itukalilongesa nendi azibuke? (b) Twasa kukwasa bati munu itukalilongesa nendi asimutwiye ha byuma byali na kulilongesa?
5 Tushaka ngwetu munu itukalilongesa nendi azibuke ngwendi byuma byalilongesa bitunda mu Lijwi lya Njambi lya kuhwiminina. (Tandeni 1 Tesalonika 2:13.) Twasa kulinga bati ngoco? Mwaneni simbu ya kusimutwiya ha byuma byali na kulilongesa. Keti mulumbunune bisoneka byoshe bimutanda, mulombeni alumbununeko bimo. Mukwaseni azibuke mwakupangesela byuma byali na kulilongesa mu Mbimbiliya mu kuyoya kwendi. Mwihuleni bihula bije bimikwasa muzibuke biyongola byendi ha byuma byali na kutanda mu Mbimbiliya. (Luka 10:25-28) Cakumwenako, mwasa kumwihula ngweni: “Cifwa muka ca Yehova cimunananguka mu cisoneka citunatanda?” “Awa majwi atunatanda asa kumikwasa bati?” “Muliziba bati ha byuma bimunalilongesa aha ha cisoneka?” (Visi 20:5) Cuma ca seho cinapu kukwasa munu imukalilongesa nendi azeme byuma byali na kulilongesa na kubipangesa. keti kushaka lika ngweni azibuke byabingi.
6. Bika kwapwila kwakubwa kuya na baka-kwambulula baje bazibuka mwamubwa kulongesa ku bilongesa byetu?
6 Mukai na baka-kwambulula baje bazibuka mwamubwa kulongesa ku bilongesa byeni bya Mbimbiliya ndi? Nga muyako naumo, co munima ya kulilongesa, mulombeni amileke mumunatwamenenamo cilongesa nomwo mumunapangesela Mbimbiliya. Kulikehesa kumikwasa mubwezelele ku butongwe bweni bwa kulongesa. (Esekeseni Vilinga 18:24-26.) Munima ya cilongesa, ihuleni muka-kwambulula imunende nendi amileke indi munu imunakala na kulongesa nakala na kuzibisisa. Nga mukakala kweka ha calumingo cimo nambe kutubakana, mwasa kulomba owo muka-kwambulula atwamenene cilongesa ceni. Nga mulinga ngoco, co munu imukalilongesa nendi atwaleleleho kulilongesa, co lalo ananguka ngwendi kulilongesa kwapwa kwa seho. Keti musinganyeke ngweni “yeni” lika munapande kumulongesa. Cuma cakama cimutonda cinapu kumukwasa atwaleleleho kulilongesa busunga na kukola ku sipilitu.
MWESENI NGWENI MWAZEMA BIMULONGESA NA KUBIKULAHELA
Lekeni munu imukalilongesa nendi byuma bimo byalingiwa mu kuyoya kwa banu mangana mumukwase kuzibuka mwakupangesela binangulo bya mu Mbimbiliya (Taleni palagilafu 7-9) *
7. Bika bikwasa muka-kulilongesa Mbimbiliya azeme byali na kulilongesa?
7 Muka-kulilongesa napande kunanguka ngwendi mwazema, co lalo mwakulahela busunga bwa mu Mbimbiliya. (1 Tesa 1:5) Co nasa kuzema manene byuma byalilongesa. Nga citaba, mulekeni mukunamikwasela kupangesa binangulo bya mu Mbimbiliya. Co ananguka ngwendi mu Mbimbiliya muli binangulo bije byasa kumukwasa.
8. Byuma muka bikwabo bimunasa kulinga mangana mukwase munu imukalilongesa nendi, co mwafwa bika?
8 Omwo mulilongesa na munu Mbimbiliya, mulekeni byuma bibalingile banu baje bahyanene bukalu bwa kulifwa na buje bwanaliwana nabwo. Litangwa limo, mwasa kuya hamo na ndolome nambe ndokazi uje waliwanene nobwo bukalu mangana akamukwase. Co lalo mwasa kupangesa muzimbu wa mu kuyoya wa ha webusaiti yetu ya jw.org mu Ingilishi ha mutamba wa “Mbimbiliya Ikatengulula Kuyoya kwa Banu.” * Mizimbu ya cifwa eci na mavidio bikwasa munu imukalilongesa nendi amone seho ya kupangesa binangulo bya mu Mbimbiliya.
9. Mwasa kushongangeya bati munu imukalilongesa nendi alekeko baka-naanga yendi na babusamba bendi byali na kulilongesa?
9 Nga munu imukalilongesa nendi ali mu bulo, kuma muka-limbo lyendi nendi akalilongesa ndi? Nga ngweni embwe, co mulanyeni akale hamo neni ha simbu ya kulilongesa. Shongangeyeni munu imukalilongesa nendi alekeko baka-naanga yendi na babusamba bendi byali na kulilongesa. (Yowa 1:40-45) Mwasa kulinga bati ngoco? Mwasa kumwihula ngweni: “Mwasa kulumbununa bati eyi simpi kuli baka-naanga yeni?” nambe ngweni “Mukanda muka umunasa kupangesa mangana mulumbunwine kabusamba keni eyi simpi?” Nga mulinga ngoco, co mukwasa munu imukalilongesa nendi apwe mulongesi. Co nga apwisamo byuma bitondeka, nasa kupwa muka-kwambulula wa kujeneka kumbwitika. Mwasa kwihula munu imukalongesa indi azibukako banu bamo baje bashaka kulilongesa Mbimbiliya. Nga kubali, simutwiyeni nabo muzibuke indi mwasa kushangumuka kulilongesa nabo. Bamweseni vidio ya Bika bikalingiwa ha cilongesa ca mbimbiliya? *
MUSHONGANGEYENI AWANE BABUSAMBA MU CIKUNGULUKILO
Shongangeyeni munu imukalilongesa nendi alikwatasane na bandolome na bandokazi mu cikungulukilo (Taleni palagilafu 10-11) *
10. Ngwe mubanamwesa ku 1 Tesalonika 2:7, 8, baka-kwambulula basa kutembwinina bati Paulu?
10 Baka-kwambulula banapande kwaka mbunge banu babakalilongesa nabo. Bamoneni ngweni basa kupwa bandolome na bandokazi beni mu cikungulukilo. (Tandeni 1 Tesalonika 2:7, 8.) Kukabakaluwila kwecela kulikwatasana na babusamba babo ba ku kaye na kutengulula buyoye bwabo mangana bapangele Yehova. Ngeci, tunapande kubakwasa bawane babusamba mu cikungulukilo. Pweni kabusamba ka munu imukalongesa. Waneni simbu yeka ya kukasikama nendi keti lika ha simbu imukalilongesa. Nga mumutumina foni, kumusonekela kamuzimbu nambe kwita ku njubo yendi mu kushaka lika kuzibuka mwanendukila, co mumwesa ngweni mwamwaka mbunge.
11. Tushaka ngwetu banu batukalilongesa nabo bawane bika mu cikungulukilo, co mwafwa bika?
11 Cisimo cimo ngwaco: “Kusema likalyobe, kulela mbunga.” Mu ngila imolika, tunasa kwendeka ngwetu: “Kubanga cikungulukilo coshe cipangele hamo asina twase kukwasa munu apwe ndongesi.” Mukemwo balongesi ba bitongwe, bakakwasa banu babakalongesa balizibuke na bandolome na bandokazi mu cikungulukilo mwafwa basa kubakwasa. Co balikwatasana na bandolome na bandokazi mu cikungulukilo baje basa kubatakamesa nga baliwana na bukalu na kubakwasa balikute busamba na Yehova. Tushaka ngwetu munu itukalilongesa nendi alizibe ngwendi nakundama ku naanga yetu ya ku sipilitu. Tushaka lalo ngwetu alikwatasane na bandolome na bandokazi mu cikungulukilo mangana kumupwile kwakwasi kwecela kulikwatasana na banu baje kubamukwasa kuzema Yehova. (Visi 13:20) Co nga babusamba bendi becela kulikwatasana nendi, akulahela ngwendi asa kuwana babusamba mu munga ya Yehova.—Mako 10:29, 30; 1 Petu 4:4.
MULEKENI SEHO YA KULIKUNDIKA NA CIMBWITIKO
Mukwita kwa simbu, munu imukalilongesa nendi eta ha kumumbwitika (Taleni palagilafu 12-13)
12. Mwafwa bika tunapande kulumbunwina mwamubwa munu itukalilongesa nendi bya kulikundika na cimbwitiko?
12 Lumbunwineni mwamubwa munu imukalilongesa nendi bya kulikundika na cimbwitiko. Mutukalilongesa Mbimbiliya na banu, cilengo cetu cikapu ca kubakwasa babambwitike mangana bapangele Yehova. Munima ya kulilongesa na munu ha bingonde byabindondo lika, co lalo nga nashangumuka kukunguluka, mukwaseni azibuke ngwendi muli na kulilongesa nendi mwafwa mushaka kumukwasa apwe Mukaleho wa Yehova.
13. Byuma muka byanapande kulinga munu mangana ete ha kumumbwitika?
13 Kuli byuma bimo byanapande kulinga munu mangana ete ha kumumbwitika. Ca kulibanga, napande kuzibuka Yehova, kumuzema na kumukulahela. (Yowa 3:16; 17:3) Napande lalo kulikuta busamba na Yehova na kulikwatasana na cikungulukilo. (Heve 10:24, 25; Yako 4:8) Co lalo, napande kwecela kulinga byuma byabibi na kushangumuka kulinga byabibwa. (Vili 3:19) Kutundaho, likulahelo lyendi linapande kumushongangeya alekeko bakwabo byuma byali na kulilongesa. (2 Koli 4:13) Co alikundike kuli Yehova na kumumbwitika. (1 Petu 3:21; 4:2) Eli likapu litangwa lyalibwa manene kuli yetu boshe, co tukabwahelela. Nga munu imukalilongesa nendi alinga byuma byoshe bitunasimutwiya bije bimukwasa ete ha kumumbwitika, mushangaleni na kumushongangeya atwaleleleho kulinga ngoco.
SIMBU NA SIMBU, ILULENI MWALI NA KUKOLELA KU SIPILITU MUNU IMUKALONGESA
14. Mulongesi asa kwilula bati munu yakalongesa?
14 Tunapande kukwata mbunge omwo tukwasa munu itukalongesa akole ku sipilitu na kweta ha kumumbwitika. Oloni simbu imo, tunapande kumwilula tumone indi ali na lishungu lya kupangela Yehova Njambi. Kuma kuli byuma bimo bimunananguka bimwesa ngwabyo munu imukalongesa ali na kwononoka mashiko a Yesu ndi? Indi ashaka lika kuzibuka biñanda bya mu Mbimbiliya?
15. Bika byasa kukwasa mulongesi azibuke indi munu yakalongesa basa kumumbwitika?
15 Simbu yoshe, munapande kuzibuka mwali na kukolela ku sipilitu munu imukalongesa. Cakumwenako, akendeka mwakalizibila hali Yehova ndi? Akalombela kuli Yehova ndi? (Myaso 116:1, 2) Washaka kutanda Mbimbiliya ndi? (Myaso 119:97) Akai na kukunguluka simbu yoshe ndi? (Myaso 22:22) Natengulula futisi yendi ndi? (Myaso 119:112) Nashangumuka kulekako babusamba na baka-naanga yendi byuma byali na kulilongesa ndi? (Myaso 9:1) Cihula ca seho cimunapande kulihula eci: Ashaka kupwa Mukaleho wa Yehova ndi? (Myaso 40:8) Nga cikumbululo ku bihula bili helu cinapu embwe, zibukeni bili na kulingisa ngoco, co simutwiyeni nendi mu kasingimiko na kumukwasa azibuke byanapande kulinga. *
16. Byuma muka bimikwasa muzibuke ngweni munapande kulikela kulilongesa na munu?
16 Simbu na simbu munapande kulihula bihula binatako mangana muzibuke indi munapande kutwalelelaho kulongesa munu imukalongesa. Lihuleni ngweni: ‘Akonowa kulibwahesela cilongesa ndi? Kashakele kukunguluka ndi? Acili na tulingolingo tumo twatubi ndi? Acili mu bulombelo bwa makuli ndi?’ Nga mwakumbulula ngweni eyo, co kutwalelelaho kulilongesa na munu wa cifwa eci kunapu lika ngwe kulongesa munu mwakulapela uje kashakele kukobela mu ndonga. Nga munu imukalilongesa nendi kashaka byali na kulilongesa, co lalo shendi kutenguluka, cacibwa kulikela kulilongesa nendi.
17. Kwesekesa na 1 Timateo 4:16, byuma muka bibanapande kulinga baka-kwambulula boshe?
17 Twamona cipangi ca kupwisa banu bandongesi kupwa ca seho, co tushaka kukwasa banu batukalongesa Mbimbiliya bakole ku sipilitu na kweta ha kubambwitika. Ngeci tushaka kupangesa Mbimbiliya omwo tulongesa na kukwasa banu batukalongesa bamone ngwabo twakulahela byuma bitukalongesa, co twabizema. Tukashongangeya banu batukalilongesa nabo balikwatasane na bandolome na bandokazi mu cikungulukilo. Co lalo tukabashongangeya ngwetu balikundike kuli Yehova na kubambwitika. Tukabelula mangana tuzibuke mubali na kukolela ku sipilitu. (Kengeni cipalo ca “ Byanapande Kulinga Mulongesi Mangana Akwase Munu Yakalongesa Mbimbiliya Bamumbwitike” ha liputa 13.) Twabezika kupanga eci cipangi ca kwobola myonyo ya banu. Twesekeni mutwasela mwoshe kukwasa banu batukalilongesa nabo Mbimbiliya babambwitike.
MWASO 79 Mubalute Kuli Batiye
^ par. 5 Omwo tulongesa banu Mbimbiliya, tushaka kubakwasa basinganyeke na kulinga byuma mwashakela Yehova. Muno mu cilongesa, tusimutwiya ha byuma bikwabo bije bitukwasa tubwezelele ku butongwe bwetu bwa kulongesa.
^ par. 4 Tandeni ñanda ya “Jenjukeni Ebi Byuma Nga Mutwamenena Cilongesa ca Mbimbiliya” ije ili mu Mukanda wa Biwano wa Buyoye na Cipangi Cetu wa September 2016.
^ par. 8 Nyatekeni ha ABOUT US > EXPERIENCES.
^ par. 9 Ha JW Library®, nyatekeni ha MEDIA > OUR MEETINGS AND MINISTRY > TOOLS FOR THE MINISTRY.
^ par. 15 Tandeni ñanda ya “Kuzema Yehova Kumishongangeya Bamimbwitike” neyi ya “Mwalibwahesela Kumimbwitika Ndi?” ije ili mu Kaposhi ka Kukengela ka March 2020.
^ par. 77 KULUMBUNUNA CIKUPULO: Munima ya kulilongesa na munu Mbimbiliya, ndokazi uje azibuka mwamubwa kwambulula akwasa ndokazi nakala na kutwamenena cilongesa mangana keti endeke byabingi ha simbu ya kutwamenena cilongesa.
^ par. 79 KULUMBUNUNA CIKUPULO: Ha simbu ya cilongesa ca Mbimbiliya muka-kulilongesa azibuka byanapande kulinga ha kupwa munakazi wa kushomboka. Munima ya cilongesa, alekako munalume wendi byanalilongesa.
^ par. 81 KULUMBUNUNA CIKUPULO: Uje muka-kulilongesa Mbimbiliya na munalume wendi, banai na kusikama ku njibo ya ndokazi ibanakaliwanene nendi ku Njubo ya Bumwene.
