1. Kouma nou kone ki travay predikasion pe sov lavi bann dimounn?

TRAVAY predikasion pe sov lavi bann dimounn! Kouma nou konn sa? Kan Zezi ti donn lord ki trouv dan Matie 28:19, 20, li ti dir: “Fer zot vinn mo bann disip; batiz zot.” Kifer li inportan ki nou pran batem? Nou bizin pran batem si nou anvi viv pou touletan. Enn kikenn ki anvi batize bizin krwar ki li kapav gagn lavi pou touletan gras-a sakrifis ek rezireksion Zezi. Se pou sa rezon-la ki lapot Pier ti dir bann Kretien: “Batem ki pe sov zot asterla . . . par rezireksion Zezi Kris.” (1 Pier 3:21) Alor, kan enn kikenn pran batem, li kapav ena lespwar pou viv pou touletan.

2. Dapre 2 Timote 4:1, 2, ki kalite ansegnan nou bizin ete?

² Pou nou fer bann disip, nou bizin devlop nou kapasite pou ansegne. (Lir 2 Timote 4:1, 2.) Kifer? Parski Zezi inn donn nou lord: “Fer zot vinn mo bann disip; . . . Montre zot met anpratik.” Lapot Pol ti dir ki bizin “persevere” dan sa travay-la, parski se “koumsamem to pou sov tomem anmemtan ki to sov bann ki ekout twa.” Akoz sa, lapot Pol ti dir: “Vey lor . . . lansegnman ki to done.” (1 Tim. 4:16) Pou nou fer bann dimounn vinn bann disip Zezi, nou bizin ansegn zot. Akoz sa, nou bizin ansegn zot dan meyer fason ki ena.

3. Ki nou pou examine dan sa lartik-la?

³ Nou pe fer bann milyon letid Labib partou lor later. Me kouma nou ti trouve dan lartik avan, nou anvi kone kouma nou kapav ed sa bann dimounn-la pou vinn bann  disip Zezi ek pou pran batem. Dan sa lartik-la, nou pou koz lor sink kitsoz ki sak ansegnan Labib bizin fer pou li kapav ed so etidian pou progrese ziska batem.

4. Kifer enn ansegnan Labib bizin pa koz tro boukou? (Get not.)

⁴ Nou kontan bann verite ki nou ansegne dan Labib. Alor, kitfwa nou pou anvi koz boukou lor bann lansegnman ki nou kontan. Selman, parey kouma enn frer ki fer letid Latour Degard ouswa letid Biblik lasanble, enn ansegnan ki pe fer enn letid Labib, li osi li bizin pa koz tro boukou. Pou ki li ansegn Labib dan meyer fason, enn ansegnan bizin pa koz tro boukou. Fode pa li esey explik tou seki li kone lor enn verse Labib ouswa lor enn size. * (Zan 16:12) Reflesi lor seki to ti kone lor Labib kan to ti fek pran batem ek lor seki to kone azordi. Sa lepok-la, kitfwa to ti konpran zis bann lansegnman inportan lor Labib. (Ebre 6:1) To finn pran plizir lane pou aprann tou seki to kone azordi. Alor, pa esey ansegn to etidian tou seki to kone enn sel kout.

5. (a) Dapre 1 Tesalonisien 2:13, ki nou anvi nou etidian konpran konsernan so letid? (b) Kouma nou kapav ankouraz nou etidian pou koz lor seki li pe aprann?

⁵ Nou anvi ki nou bann etidian konpran ki seki zot pe aprann sorti dan Labib. (Lir 1 Tesalonisien 2:13.) Kouma nou kapav fer sa? Ankouraz to etidian pou koz lor seki li pe aprann. Olie ki to touletan explik li bann verse Labib, demann li pou explik twa sertin parmi sa bann verse-la. Ed to etidian pou trouve kouma Labib kapav ed li personelman. Poz li bann kestion ki pou ankouraz li pou dir seki li panse ek seki li resanti konsernan sa bann verse-la. (Lik 10:25-28) Par exanp, to kapav demann li: “Kouma sa verse-la ed twa pou trouv bann kalite Zeova?” “Kouma seki to finn aprann dan Labib kapav ed twa?” “Ki to resanti konsernan seki to fek aprann?” (Prov. 20:5) Seki pli inportan, se pa ki kantite to etidian kone, me se ki kantite li kontan seki li pe aprann ek li met li an pratik.

6. Ki bienfe to kapav gagne si to amenn enn ansegnan ki ena lexperyans avek twa kan to al fer letid?

⁶ Kan to fer bann letid Labib, eski to kapav amenn enn ansegnan ki ena lexperyans avek twa? Si to fer sa, to kapav demann li seki li panse lor fason ki to fer letid ek osi lor fason ki to servi Labib pou  ansegne. To bizin ena limilite si to anvi amelior to kapasite pou ansegne. (Konpar avek Zistwar Bann Apot 18:24-26.) Apre sa, to kapav demann proklamater ki ena lexperyans la, si li panse ki to etidian pe konpran seki li pe aprann. To kapav osi demann li pou fer letid to etidian si to pa la pou enn-de semenn. Koumsa, so letid pou regilie ek to etidian pou konpran ki so letid bien inportan. Fode pa to panse ki se “to” etidian ek ki personn pa pou kapav fer so letid dan to plas. Apre tou, nou tou nou anvi seki pli bon pou nou etidian pou ki li kapav kontign progrese ek aprann bann verite ki ena dan Labib.

7. Kouma to kapav ed to etidian pou kontan seki li pe aprann?

⁷ To etidian Labib bizin trouve ki to kontan ek ki to krwar bann verite Biblik ki to pe ansegne. (1 Tes. 1:5) Koumsa, sa pou ed li pou kontan seki li pe aprann. Kitfwa to kapav dir li kouma Labib inn ed twa dan to lavi. Lerla, li pou konpran ki Labib donn bann bon konsey ki kapav ed li osi.

8. Ki kitsoz ankor to kapav fer pou ed to etidian, ek kifer to pou fer sa?

⁸ Kan to etidie avek to etidian, to kapav explik li kouma sertin frer ek ser finn sirmont bann mem difikilte ki li pe gagne. To kapav amenn avek twa enn kikenn ki so lexanp kapav ankouraz to etidian. Ouswa to kapav partaz avek li bann biografi ki ena lor jw.org dan seri lartik « La Bible transforme des vies * ». Sa bann lartik ek video-la pou ed to etidian pou trouve kouma bann konsey ranpli ar sazes ki ena dan Labib kapav ed li.

9. Kouma to kapav ankouraz to etidian pou partaz seki li pe aprann avek so fami ek so bann kamarad?

⁹ Si to etidian marye, eski so konzwin osi pe etidie? Si li pa pe etidie, invit li pou asiste letid. Ankouraz to etidian pou partaz seki li pe aprann avek so fami ek so bann kamarad. (Zan 1:40-45) Kouma to kapav fer sa? Kitfwa to kapav dir li: “Kouma to ti pou explik sa lansegnman-la to fami?” ouswa “Ki verse Labib to ti pou servi pou explik sa to bann kamarad?” Kan to fer koumsa, to pe form to  etidian pou li vinn enn ansegnan. Lerla, kan li pou ranpli bann kondision ki bizin, li pou kapav koumans prese ansam avek bann frer ek ser lasanble. To kapav demann to etidian si li konn enn lot dimounn osi ki ti pou kontan etidie Labib. Si li kone, pa tarde pou rant an kontak avek dimounn-la pou propoz li enn letid Labib. To kapav montre dimounn-la video Kouma enn Letid Labib Deroule? *

10. Dapre 1 Tesalonisien 2:7, 8, kouma enn ansegnan kapav imit lexanp lapot Pol?

¹⁰ Bann ansegnan bizin vremem interese ar zot bann etidian. Zot bizin konsider zot bann etidian kouma zot bann fitir frer ek ser. (Lir 1 Tesalonisien 2:7, 8.) Li pa fasil pou bann etidian Labib pou abandonn bann kamarad ki zot ena dan sa lemond-la ek fer bann sanzman ki bizin pou zot servi Zeova. Nou bizin ed zot pou gagn bann vre kamarad dan lasanble. To kapav vinn kamarad to etidian kan to pas letan avek li, pa zis kan zot pe fer letid ansam, me osi dan lezot lokazion. To kapav telefonn li, avoy li enn ti mesaz, ouswa vizit li ant de letid pou montre li ki to vremem interese ar li.

11. Ki nou anvi nou bann etidian gagne dan lasanble, ek kifer?

¹¹ Enn proverb Afriken dir: “Bizin enn vilaz pou grandi enn zanfan.” Dan mem fason, nou kapav dir: “Bizin enn lasanble pou fer enn disip.” Se pou sa rezon-la ki bann bon ansegnan Labib, zot prezant zot etidian ar bann lezot manb lasanble ki kapav ena enn bon linflians lor li. Lerla, etidian-la pou kapav frekant bann serviter Bondie ki pou kapav ed li lor plan emosionel ek spiritiel. Nou anvi ki nou etidian santi ki li form parti lasanble ek ki li form parti nou fami spiritiel. Nou anvi ki li santi li atire par lamour ki ena parmi bann frer ek ser. Lerla, li pou pli fasil pou li aret frekant bann dimounn ki pa pou ed li vinn kamarad Zeova. (Prov. 13:20) Si so bann ansien kamarad rezet li, li pou kone ki li kapav gagn bann vre kamarad dan lorganizasion Zeova.​—Mark 10:29, 30; 1 Pier 4:4.

12. Kifer nou bizin explik nou etidian ki li inportan ki enn kikenn vwe so lavi ar Zeova ek pran batem?

¹² Nou bizin explik nou etidian ki li inportan ki enn kikenn vwe so lavi ar  Zeova ek pran batem. Apre tou, nou lobzektif kan nou fer enn letid Labib, se pou ed dimounn-la pou pran batem. Apre de-trwa mwa ki etidian-la inn koumans etidie Labib ek sirtou apre ki li’nn koumans asiste bann renion, etidian-la bizin konpran ki lobzektif enn letid Labib se pou ed li vinn enn Temwin Zeova.

13. Ki bann kitsoz enn etidian Labib bizin fer pou ki li kapav pran batem?

¹³ Ena plizir kitsoz ki enn etidian Labib, ki anvi pran batem, kapav fer. Li bizin aprann konn Zeova, kontan Li, ek ena lafwa an Li. (Zan 3:16; 17:3) Lerla, etidian-la pou vinn kamarad Zeova ek li pou koumans ena bann kamarad dan lasanble. (Ebre 10:24, 25; Zak 4:8) Avek letan, li pou rezet bann move labitid ek li pou repanti pou so bann pese. (Zist. 3:19) So lafwa pou pous li pou partaz avek lezot seki li pe aprann. (2 Kor. 4:13) Lerla, li pou vwe so lavi ar Zeova ek li pou pran batem. (1 Pier 3:21; 4:2) Sa zour-la pou enn zour bien zwaye pou tou dimounn! Amezir ki to etidian pe fer bann progre pou li pran batem, kontign felisit li ek ankouraz li pou ki li kontign fer sa bann progre-la.

14. Kouma enn ansegnan kapav analiz progre ki so etidian pe fer?

¹⁴ Nou bizin ena pasians kan nou pe ed enn etidian pou progrese pou pran batem. Me ariv enn moman, nou bizin kone si li anvi servi Zeova. Eski to trouve ki to etidian pe fer zefor pou obeir bann komannman Zezi? Ouswa eski li zis anvi aprann plis lor Labib?

15. Ki kitsoz pou montre enn ansegnan ki so etidian pe progrese pou pran batem?

¹⁵ Regilierman, analiz bann progre ki to etidian pe fer. Par exanp, eski li dir seki li resanti pou Zeova? Eski li priye Zeova? (Ps. 116:1, 2) Eski li kontan lir Labib? (Ps. 119:97) Eski li asiste bann renion regilierman? (Ps. 22:22) Eski li’nn fer bann sanzman dan so lavi? (Ps. 119:112) Eski li’nn koumans partaz seki li pe aprann ar so fami ek so bann kamarad? (Ps. 9:1) Me pli inportan, eski li anvi vinn enn Temwin Zeova? (Ps. 40:8) Si to etidian pa pe fer okenn progre dan sa  bann domenn-la, avek takt, esey kone kifer. Apre sa, avek zantiyes, koz avek li dan enn fason fran. *

16. Kan eski nou bizin aret fer letid enn kikenn?

¹⁶ Parfwa, to bizin demann tomem si to bizin kontign fer letid avek enn etidian. Poz tomem sa bann kestion-la: ‘Eski etidian-la pe prepar so letid? Eski li kontan vinn renion? Eski li ankor ena bann move labitid? Eski li ankor form parti fos relizion?’ Repons pou sa bann kestion-la pou ed twa kone si to bizin kontign etidie avek li. To pa pou aprann enn kikenn naze si li pa anvi mouye, pa vre? Alor, si to etidian pa vremem apresie seki li pe aprann, ek ki li pa anvi fer bann sanzman, kifer eski to bizin kontign etidie avek li?

17. Dapre 1 Timote 4:16, ki tou bann ansegnan Labib bizin fer?

¹⁷ Li bien inportan ki nou asim nou responsabilite pou fer bann disip, ek nou anvi ki nou bann etidian progrese ziska batem. Se pou sa rezon-la ki nou pou servi Labib kan nou ansegn zot, ek nou pou montre ki nou kontan ek nou krwar seki nou pe ansegne. Nou pou ankouraz nou etidian pou ena bann kamarad dan lasanble. Nou pou osi explik nou etidian ki li inportan ki enn kikenn vwe so lavi ar Zeova ek pran batem, ek nou pou analiz bann progre ki li pe fer. (Get lankadre “ Seki Bann Ansegnan Bizin Fer pou Ed Zot Etidian Progrese Ziska Batem.”) Nou bien kontan ki nou pe partisip dan travay predikasion ki pe sov lavi bann dimounn! Alor, anou bien determine pou fer nou best pou ki nou bann etidian Labib progrese ziska batem!