1. Mwahaya bwaddi nigawoga wi mabasa owahudhiha athu enovulusa dhigumi?

MABASA owahudhiha athu wi ekale anamahara enovulusa dhigumi! Mwahaya bwaddi nigawoga ndo? Va Mateus 28:19, 20, Yesu ohuvaha nlamulo nna egi: ‘Mudhowe . . . mwahudhihe athu . . . mwabaddizaga.’ Teto ninga nnonilihu, muthu egi avulusiwe enohoweleya abaddiziwe. Muthu anafuna obaddiziwa onohowela orumedha mukutho wa Yesu ni orumedha wi ohuvenyihiwa muukwani. Bumwahaya, murumiwi Peduru adhe awogege ni makiristawu egi: ‘Obaddiziwa winere wuvulusani . . . mwaha wa Yesu ovenyihiwa muukwani.’ (1 Ped. 3:21) Bumwahaya, muthu abaddiziwa onokanna ejhehedhelo yovulusiwa.

2. Ninga munawogela 2 Timóteo 4:​1, 2, nikale tipo baani yanamahudhiha?

² Wihina nahudhihe athu wi ekale anamahudhiha nnohowela okanna makalelo ‘apama oohudhiha’. (Omwileri 1 Timóteo 4:1, 2.) Mwaha waddi? Mwaha Yesu ohunivaha nlamulo egi: ‘Mudhowe . . . mwaahudhihe athu wi ekale anamahara . . . mwahudhihaga.’ Murumiwi Pawulo ohuwoga egi enofuneya ‘ovilelana’ mabasa ala: ‘Mwaha werana yeyo onere wivulusa vamodha ni ale enuvuruwana.’ Ela ethu yamuthukulele murumiwi Pawulo wera: ‘Osugwerege pamadhene makalelo awo ohudhiha.’ (1 Tim. 4:16) Wahudhiha athu wi ekale anamahudhera enohoweleya ohudhiha, bumwahaya nnafuna niwomihedhe makalelo ehu ohudhiha..

3. Yohudhera ela enonihe addi makalelo omuhudhiha Bibliya?

³ Iyo nnowahudhiha matxikwi ni matxikwi athu. Ninga nonilihu ohudhera wamundduli nnafuna wi anamwinjhi wa athu yala ebaddiziwe. Muwari mwa yohudhera ela nnere woona dhithu tanu dhinahowela werana namahudhiha wihina amukavihere namahudhera ofiyedha obaddiziwa.

4. Mwahaya bwaddi egahoweleya wihinya wamuhudhihaga Bibliya? (Osugwe musiddo.)

⁴ Muselu wathabwa onidhivela nnothabwa owoga. Iyo nihikanna odhivela ni muselu wa mBibliyani. Nahuna ole onahudhiha — ohiya ohudhihave baahi wa Bibliya, mbwenye ohudhera wa Bibliya nNamasugwera ni ohudhera wa Bibliya wa mulogo kahiyo othabwaga owoga bure. Wihina amuhiye Bibliya ahudhihe namahudhihaya enofwanelela akala owihiha kahiyo owogaga dhatedhene ononniye wodhela dholebela dha mBibliyani. * (João 16:12) Kabiha wubuwela mudhidhi obaddiziwaga enolelo wanniwena. Enonelo ya mBibliyani yali vangono. (Heb. 6:1) Mbwenye peeno ohunona dhithu dhowinjhiva. Wihina okalena enonelo yela dhihivira yaka dhowinjhiva, bumwahaya wamuhudhihaga Bibliya kahiyo ohudhiha dhithu dhatedhene ononniwe mudhidhi mmodhave.

5. . (a) Ninga munawogela 1 Tessalonicenses 2:13 nnafuna wi namahudhera onelemo ddiniyani?(b)  Nnamukongomedhe addi namahudhera owoga ndhe anahudheriye?

⁵ Nnafuna wi namahudhera onelemo wi dhithu anahudhereye dhinadhela mBibliyani. (Omwileri 1 Tessalonicenses 2:13.) Nnande addi? Omukongomedhe namahudhera owoga dhithu anahudheriye. Ohiya omutapulela dholebela dhatedhene dhiri muwari mwa ddima, omulobe wi oliye awogemo. Omukavihere wonelamo makalelo madhu a mBibliyani enamukaviheriwa. Omukohege namahudhera awo wi onone dhithu anubuweliye, obe makalelo ononeliyemo dholebela dha mBibliyani. (Luc. 10:25-28) Omukohe: “Yolebela ela enukavihera addi onona ekalelo ya Yehova?” “Ebaribari ya mBibliyani enukavihere addi?” “Ononelamo addi muselu ola nihudherihu?” (Pro. 20:5) Yathimaya kahiyo dhego dhinonne namahudhera, mbwenye enahoweleya bimakalelo onadhiveliwiye ni anaparihedheye ndhe anahudheriye.

6. Ekalele ddi yapama oveleeliwa nnamalaleya okovelele waadhowaga omuhudhiha namahudhera awo?

⁶ Wadhowaga ohudhiha onowathukulelawo anamahudhiha ekovelele wihina mudhowe vamodha? Akala oni hee, wakohe aliwa onone akala onomuhiya Bibliya ahudhihe. Wafunaga owomihedha makalelo awo ohudhiha okale owiyeviha. (Omusugwe Atos 18:​24-26.) Wamala omukohe namalaleya ole akovelele akala namuhudherawo onowonelamo eberibari. Woona wi onere wedda olenddo wa sumana modha obe dhowinjhivadhene omulobe ddibila oyo wihina ahale amuhudhihaga. Werana yeyo ohudhera kunagwaddeye, teto, namahudhera awo anere wona wi ohudhera fwathima. Kahiyo wubuwelaga wi namahudheraya a Bibliya “dawo weka” kavo muthu mmodha anafwanelela omuhudhiha. Mwebaribarene, ononfunana opama namahudhera awo ni onofuna wihina oliye ahudheregeve ebaribari.

7. Enamuthukulele namahudhera awo werana ele anahudheriye ddiniyani?

⁷ Sapama wihina namahudhera oonege wi oli owalene ni kunanganyedha — obe ohukanna odhivela ni onorumedha dhohudhiha dha mBibliyani. (1 Tes. 1:5) Wera ndo onere omuthukulela namahudhera awo werana ndhe anahudheriye. Dhenyeya omwaddele namahudhera awo yolebela yukavihere mwigumini mwawo. Eyo enere omukavihera wi dholaga dha mBibliyani podi omukavihera mwigumini mwaaye.

⁸Namahudhera awo aafwanyiwaga dhoweha omwaddele wihina adhari amodha a Yehova yahifwanyiwa makathamiho mamodhave nuwindo aliwa ogonjhiha. Odhowe vamodha nddibila ammulogoni okovelele anna dhikalelo dhapama wi namahudhera awo amutajhihe. Obe olabihedhe dhopadduwa dhili muwari mwa seriye “A Bíblia Muda a Vida das Pessoas.” * Ohudhera obe vidiyu ninga dhendho dhinoomukavihera namahudhera awo woona wi dholaga dha mBibliyani dhinokavihera egumi.

9. Onaamukavihere addi namahudhera wawaddela akwaye obe amudhaaye ndhe dhinahudheriye?

⁹ Namahudhera awo akala ohutela mwariye obe mamune annamuhudhera Bibliya? Akala kanamuhudhera, omulobe wihina mukalege vamodha mwahudheraga. Omukongomedhege namahudhera awo wihina awaddelege amudhaye vamodha ni akwaye dhithu anahudhereye. (João 1:40-45) Nimakalelo baani? Omukohe: “Makalelo baani waalabihedhiwe wi omwaddele mmudhawo ebaribari ela ya mBibliyani?” Obe “Yolebela baani walabihedhiwe wihina omukaviherena mukwawo?” Werana yeyo onere omuxagiha namahudhera awo wi akale namahudhiha. Oliye iwegeredha podi okala namalaleya oohubaddiziwa. Omukohe akala ohanona athu amodha enafuna omuhudhera Bibliya. Akala ohanona kasayele athu yayo ni wawerele wi ebajhe omuhudhera Bibliya. Omonihe vidiyu Enereya ddi ahudheriwaga Bibliya? *

10. Wona ori namahudhiha, onande addi omutajhiha Pawulo ninga munawogela 1 Tessalonicenses 2:​7, 8?

¹⁰ Ninga namahudhiha wonihege wi onowapwatha anamahudhera awo. Kadda namahudhera omoonege ninga ddibila amumroromeloni. (Omwileri 1 Tessalonicenses 2:7, 8.) Kahiyo yokweya namahudhera wasukuma akwaye ehiri makiristawu ni osaddula makalelo aye matene wihina amulabelege Yehova. Bumwahaya enohoweleya wakavihera okanna wandana ni addibila a mmulogoni. Wandane nnamahudhera awo. Mujhege mudhidhi muthapanyaga vamodha, ohiya mwahudheraga baahi mbwenye mudhidhi bu mudhidhi. Omuligarelege, onvavihedhege mensaje, obe ovire jala owaniwe, werana yeyo namahudhera awo onere wonelamo wi ononpwatha.

11. Nnafuna wi anamahudhera ehu efwanye ddi mmulogoni, ki mwahaya bwaddi?

¹¹ Ohukalawo musibe onihina “Nikwini nimodha kannathubanya motho.” Iyo podi orugunusedha musibe ola negi: “Namalaleya yeka kananda omuhudhiha muthu ofiyedha okala namahara.” Namahudhiha apama onomutonyihedha namahudhera aye addibila a mmulogoni enaamukavihere okanna mweddelo wapama. Erana yeyo namahudhera onokanna ofuru wotugumana ni athu amodha enaamukavihere omuzimuni ni mmubuweloni. Nnafuna wi kadda namahudhera akala mmulogoni oonege ninga ori vaade vaye, teto oonelemo wi onokosa epaddi ya emudhi yomuzimuni. Nnafuna wi odhivela ni nthebwa ekale ethu enamuthukulele oliye okala mwibaribarini. Eyo enere omukavihera wasukuma athu andanniyena ehiri Anamona a Yehova. (Pro. 13:20) Akala namahudhera ere onyanyaliwa ni akwaye amwilaboni, onere okanna ebaribari wi mmulogoni mwa Yehova onere wafwanya akwaye ebaribari. — Mar. 10:29, 30; 1 Ped. 4:4

12. Mwahaya bwaddi egahoweleya owoga nnamahudhera muselu wo wipeleka ni obaddiziwa?

¹² Malabwene osorihege ofuneya wowipeleka ni obaddiziwa. Mwebaribarene enanithukulela wahudhiha athu, fuwakavihera omunona Yehova ni obaddiziwa. Dhavira mweri vang’ono nimuhudheraga Bibliya ni muthu thabwa-thabwa muthu yoyo abajha oya omutugumanoni, enohoweleya wi oliye oonelemo wi enajhehiwa wa oliye fukaviheriwa okala Namona a Yehova.

13. Thalo baani dhinerana namahudhera wihina abaddiziwe?

¹³ Wihina afiyere obaddiziwa namahudhera a Bibliya onowerana thalo dhowadda. Yobajha, onohudhera wodhela Yehova, makalelo omudhivela ni okanna nroromelo nuliye. (João 3:16; 17:3) Vasogolova anowenjhedhedha odhivela onniyena ni Yehova vamodha ni addibila ammulogoni. (Heb. 10:24, 25; Tia. 4:8) Mwaha wa yeyo, namahudhera onosukuma dhego dhabure ni otwaruwa dhothega dhaye. (At. 3:19) Mudhidhi yoyo nroromelo nnere omuthukulela wawaddela akwaye wodhela nroromelo naye ni ebaribari anahudhereye mBibliyani. (2 Cor. 4:13) Omagomihedhowa onere wipeleka wa yehova ni anere obaddiziwa. (1 Ped. 3:21; 4:2) Nafiya nlabo nobaddiziwa, nnakala nlabo na thima na mulogo watene! Namahudhera ahariha thalo dhinamuthukulele obaddiziwa omutamalelege ni murima wamutene. Malabwene omukongomedhege wunnuwelavo wodhela werana dhithu dhapama.

14. Namahudhiha ikohege ddi wi ampendde namahudhera aye?

¹⁴ Mwebaribarene enohoweleya okala ovilela namukaviheraga namahudhera wunnuwelagavo ofiyedha obaddiziwa. Nahuna malabo mamodha, enohoweleya onona akala mwebaribarene oliye onofuna omulabela Yehova obe naari. Wikohe: ‘Namahudhera aga anowoniha wi onna ohariha malamulo a Yesu? Obe oliye onafuna ohudherave dhego dhili mBibliyani baahi?’

15. Dhithu baani namahudhiha anafwaneleliye osayela wa namahudhera aye?

¹⁵ Malabwene openddege wunnuwelavo wa namahudhera awo. Motajhiha, oliye onosoriha dhithu anahudheriye wodhela Yehova? Ohukanna elemelelo yoolobela wa Yehova? (Sal. 116:1, 2) Onodhiveliwa omwileri Bibliya? (Sal. 119:97) Onodhowa malabwene omutugumanoni? (Sal. 22:22) Onosaddula egumaye? (Sal. 119:112) Oliye onowawaddela amudhaaye obe akwaye dhithu onahudheriye mBibliyani? (Sal. 9:1) Yathimaya, sera ki oliye onofuna okala namona a Yehova? (Sal. 40:8) Akala namahudhera kanerana thalo dhendha, osayela onona mwahaya bwaddi eganvila. Wamala owoge nuuliye ni makalelo apama ohumukuwilena ethu. *

16. Dhithu baani dhinoniha wi egahikala yapama ogwadda ohudhera ni muthu?

¹⁶ Wavira mudhidhi opendde akala sapama odidelave omuhudhiha Bibliya namahudhera awo. Wikohe: ‘Oliye ohukanna elemelelo yohegeredha ohudhera? Onowoniha wi kanafunawene odhowa omutugumanoni? Ohukanna dhikalelo dhabure? Ohudidelave odhowa ogereja waye?’ Akala siyeyo, emodhave omuhudhiha muthu okubuwa wula ahifunaga winyethiha. Akala namahudhera kanavaha thima ndhe dhinahudheriye teto kanafuna osaddula egumaye, kahiyo osapela omuhudhiha.

¹⁷Iyo nnovaha thima mutholo wehu wowahudhiha athu wi ekale anamahara. Nnofuna wi anamahudhera ehu yunnuwelevo ni efiyedhe obaddiziwa. Bumwahaya, enohoweleya omuhiye Bibliya ahudhihe, osuzihege owalene nuuhaganyedha. Omukongomedhege namahudhera wandana ni addibila ammulogoni. Malabwene osorihege ofuneya wowipeleka ni obaddiziwa! Teto kadda mudhidhi openddege wunnuwelavo wa namahudhera. (Osugwe kwaduru eli epaddi 13 “ Enahoweleya ddi namahudhiha aafunaga omukavihera namahudhera ofiyedha obaddiziwa.”) Mohanganyedha enohagalasa wapara mabasa yala enoobola dhigumi. Bumwahaya werena ele onandiwe wihina omukavihere namahudhera awo ofiyedha obaddiziwa.