ICIPANDE CA KUSAMBILILAMO 42
Vino Tungavwa Umusambi Ukulunduluka Ukufika na Kulubatizyo—Uluwali 2
“Uwayilolela we mweneco swinya uwalola ni misambilizizye yako.”—1 TIM. 4:16
ULWIMBO 77 Ulubuuto mu Calo ca Mfifi
VINO TWANDI TUSAMBILILE *
1. Twamanya wuli ukuti umulimo wa kupanga awasambi wulilenga awantu ukuwa nu wumi wa muyayaya?
UMULIMO wa kupanga awasambi, wulilenga awantu ukuwa nu wumi wa muyayaya. Twamanya co-o pa mulandu ni sundo lino likazanwa pe Mateo 28:19, 20, lino likati: “Yanji, . . . muleke wawe awasambilizi . . . muwawabatizya.” Ulubatizyo lwacindama nkaninye amuno lulilenga ukuti twize tuwe nu wumi wa muyayaya. Swinya pa mulandu wa kuti e Yesu wizile atufwila nu kuzyulupuka, wensinye wino akulonda ukubatizwa azipizile ukuzumila ukuti awino alilenga twize tuwe nu wumi wa muyayaya. Nu mutumwa Peter wawuzizye awina Klistu wawuye ukuti: Ibatizyo alino “Likawafyusya nanti ukumipususya . . . muno akuzyulupuka kwa kwe Yesu Klistu.” (1 Pet. 3:21) Fwandi umusambi nga wabatizwa akawa ni suwilo lya kuwa nu wumi wa muyayaya.
2. Uzye iwaliko lya kwe 2 Timoti 4:1, 2 likatuwuzya ukuti tuzipizile ukuwasambilizya wuli?
2 Pa kuti twavwe awasambi ukulunduluka ukufika na kulubatizyo, tuzipizile ‘tuwasambilizya icete.’ (Wazyani 2 Timoti 4:1, 2.) Amulandu ci? Amuno e Yesu watukonkomecezizye ukuti: “Yanji, . . . muleke wawe awasambilizi . . . , muwawasambilizya.” Umutumwa Paulo nawe walanzile ukuti: ‘uwalandalila nanti ukwikalilila’ mwe wonye umulimo, “amuno ndi ukucita wowonye apano ungayitula uyize utule na wanji wano wakukwivwa” walanzile nu ukuti: “Uwalola imisambilizizye yako.” (1 Tim. 4:16) Acino tuzipizile twasambilizya icete pa kuti twavwe awasambi ukulunduluka ukufika na kulubatizyo.
3. Avyani vino twandi tusambilile mwe co-o icipande pe vino tuzipizile ukutungulula amasambililo ye Baibolo?
3 Mu nsi yonsi tukatungulula amamillioni ya masambililo ye Baibolo. Lelo ndi wulyanye vino icipande cino cafumileko calanzile, cino tukulondesya akumanya vino tungawavwa pa kuti wabatizwe nu kuwa awasambi wa kwe Klistu. Co-o icipande candi cilande pa vintu 5 vino kasambilizya azipizile ukucita pa kuti ayavwe umusambi ukulunduluka ukufika na kulubatizyo.
MUWAWONVYA BAIBOLOPANO MUKUSAMBILIZYA
Kolowozyani wino wamanya ivya kutungulula amasambililo ye Baibolo ukumyavwa ukumanya ivya kuwonvya icete Baibolo (Lolani amaparagrafu 4-6) *
4. Amulandu ci wuno e kasambilizya atazipizile awalandapo nkani pano akutungulula isambililo lye Baibolo? (Lolani e futunoti)
4 Swensinye twakunda vino tukasambilizya, awuli umulandu wuno tukalondela twalandapo lyonsi. Lelo nga ca kuti amwewano mukutungulula Ulupungu lwa kwe Malonda, isambililo lye Baibolo ilya pi wungwe nanti isambililo lya ku ng’anda ni ng’anda, mutazipizile muwalandapo nkani. E kasambilizya wensinye azipizile ukuwonvya e Baibolo pa kusambilizya. Lelo atazipizile awalandapo nkani nanti ukulondesya ukulondolola vyonsinye vino wamanya pi lembo limwi nanti pe vino wakulandapo. * (Yoha. 16:12) Teyelenganyani vino mwamanyile pano mwabatizizwevye na vino mwamanya pe yo-o impindi. Mufwile mwamanyile vye amasambililo ya kutalicilapo ukumanya mwe Baibolo, swinya casenzile imyaka imivule pa kuti mumanye vino mwamanya pa kwe yo-o impindi. (Hebe. 6:1) Acino mutazipizile mwasambilizya umusambi umupya vyonsinye pa muku wonganye.
5. (a) Ukulingana ni waliko lye 1 Watesalonika 2:13, avyani vino tukalonda ukuti umusambi amanye? (b) Tungacita wuli pa kuti twavwe umusambi ukulanda pe vino akusambilila?
5 Tukalonda awasambi wamanya ukuti vino wakusambilila vikufuma mwi Zwi lya kwe Leza Baibolo. (Wazyani 1 Watesalonika 2:13.) Acino pano mukusambilila muwaleka umusambi awalandapo. Nomba mungacita wuli wo-o? Mutazipizile mwamulondololela lyonsinye amawaliko, lelo muwaleka umweneco alondolola vino wasambilila. Muwamwavwa ukulola vino angawomvya amawaliko mu wumi wakwe. Asa vyo-o vyonga muwamukolowozya amawuzyo yano yangamyavwa ukumanya vino akwelenganya na vino akuyivwa pa mawaliko yano mwawazya. (Luka 10:25-28) Ku cakulolelako mungamukolowozya ukuti: “Uzye lyo-o iwaliko lya misambilizya vyani pa miwele ya kwe Yehova?” “Uzye vino mwasambilila mwe Baibolo vingamyavwa wuli mu wumi winu?” “Uzye vino mwasambilila vyalenga mwayivwa wuli?” (Imilu. 20:5) Muwakwizuka ukuti cino cacindama ku musambi asa kuvula kwa vyewo vino angamanya, lelo akukunda nu kuwonvya vino akusambilila mu wumi wakwe.
6. Amulandu ci wuno cacindamila ukusenda e kawizya wino wamanya ukutungulula icete amasambililo ye Baibolo?
6 Uzye pano mukutungulula amasambililo mukasendako wakawizya wano wamanya ukutungulula icete? Nga avino mukacita, mwawakolowozya pe vino temwatungulula isambililo na vino temwawonvya Baibolo. Pa kuti muwe mwe wakasambilizya awazima muzipizile ukuyicefya. (Linganyaniko ni waliko lya Imilimo 18:24-26.) Cinji aca kuti mungamukolowozya nga ca kuti umusambi akwivwicisya vino akusambilila. Nga ca kuti mukufumapo pe sabata wenga nanti ukucilapo mungamuwuzya ukuti atwalilile ukumutungulula. Co-o cililenga isambililo ukutwalilila swinya muliyavwa nu musambi ukulola ukuti ukusambilila acintu icicindame. Mutazipizile ukwelenganya ukuti alisambililo “lyinu” mwenganye pasi wino azipizile ukumutungulula. Lelo icicindamisye akulola vino vingazipila umusambi, pa kuti atwalilile ukusambilila icine.
MUWALANJIZYA UKUTI MUTEMILWE SWINYA MUSUWIZILE VINO MUKUSAMBILIZYA
Muwasimicilako umusambi pa wantu wamwi wano wapilusile alya kuti amanye ivya kuwomvya vino akusambilila (Lolani amaparagrafu 7-9) *
7. Avyani vino vingavwa umusambi ukukunda vino akusambilila?
7 Muzipizile ukulanjizya umusambi ukuti mwakunda nu kusuwila vino mukasambilizya. (1 Tes. 1:5) Nga mwacita wo-o umusambi alikunda nkaninye vino akusambilila. Nga cingalondekwa mungamuwuzyako pe vino Baibolo yamyavwa mu wumi winu. Co-o cililenga asinincizye ukuti nawenye e Baibolo yingamwavwa.
8. Avyani vino mungacita pa kwavwa isambililo lye Baibolo, swinya amulandu ci wuno muzipizile ukucitila wo-o?
8 Pano mukusambilila nu musambi, mungamuwuzyako pa ntazi zimwi zino awanawitu na wankazi wamwi wapisilemo izikolane na zino akupitamo na vino wazicinvizye. Nga asa wowo mungasendako wumwi mwi wungwe, wino mukulola ukuti angalenga umusambi ukuwomelako nga ca kuti wamusimicila vino wapisilemo. Nanti mungavwambilizya ivya kumwavwa pa jw.org pano pakati: “Baibolo Yikacinja Awantu.” * Vyo-o ivipande na mavidyo, viliyavwa umusambi ukulola ukuti ukukonka ukusunda kwa mu Baibolo mu wumi wakwe kwacindama nkaninye.
9. Mungawomelezya wuli umusambi pa kuti awanenako walupwa lwakwe ni viwuza pe vino akusambilila?
9 Nga ca kuti wino mukasambilizya Baibolo watwala nanti ukutwalwa, uzye e wakwakwe akazanwako pano mukusambilila? Ndi asizanwapo mungamuwuzya ukuti awazanwapo. Mwawomelezya umusambi ukunenako walupwa ni viwuza vino akusambilila. (Yoha. 1:40-45) Nomba mungamuwomelezya wuli? Pano mukusambilila mungamukolowozya ukuti: “Uzye mungalondololela wuli walupwa lwinu ni viwuza vyo-o vino twasambilila?” nanti “Uzye mungawonvya wuli ya-a amawaliko ukwavwa iviwuza vinu ukwivwicisya icisinka?” Ukucita wo-o kuliyavwa umusambi ukuwa we kasambilizya. Nga afisilepo angawa we kawizya wino atabatizwa. Swinya mungamukolowozya ukuti amiwuzye uwili wensinye wino angakunda ukusambilila Baibolo. Nga ca kuti wamanyako wumwi mungatantika nawe uwanda wuno mungiza muye mumutandalile nu kumutambisya e vidyo yino yikati Uzye Acani Cino Cikacitika pi Sambililo lye Baibolo? *
MWAWOMELEZYA UMUSAMBI UKUPANGA IVIWUZA MWI WUNGWE
Muwawomelezya umusambi ukupanga iviwuza mwi wungwe (Lolani amaparagrafu 10-11) *
10. Ukulingana ni waliko lye 1 Watesalonika 2:7, 8, uzye e kasambilizya angakolanya wuli e Paulo?
10 Wakasambilizya wazipizile ukusakamala awasambi nu kuwalanjizya ukuti wawawikako amano. Muzipizile mwawalola ukuti wangawa awanawitu nanti wankazi. (Wazyani 1 Watesalonika 2:7, 8.) Muwakwizuka ukuti citapepuka ku musambi ukusya iviwuza vino wakweti ku nsi nu kutalika ukuwombela Yehova. Acino mwamuwomelezya ukupanga iviwuza mwi wungwe. Lelo namwemwenye mungamupanga ukuwa we ciwuza winu nga mukuzanwako nawe ponga na pampindi vye yinji pano mutakusambilila. Manda yamwi mungamulembelako e meseji, ukumutumila foni nanti ukumutandalila vye ku ng’anda. Co-o cililenga awalola ukuti mwamuwikako amano.
11. Uzye tukalonda ukuti awasambi wayivwa wuli swinya amulandu ci?
11 Pa kuti umusambi alunduluke afike na ku lubatizyo, iwungwe lizipizile ukuwombela ponga wulyanye vino ni Cinamwanga cikavwanga ukuti, “uluwanzi akulemezyania.” Acino e kasambilizya muzima azipizile ukumanyisya umusambi ku wa mwi wungwe wano wangalenga ukuti apalamile kwe Yehova. Tukalonda awasambi wayivwa ukuti awa mwi wungwe swinya alupwa lwitu ulwa ku muzimu. Cinji aca kuti, tukalonda wapalamile sana ku wanawitu na wankazi. Nga twacita wo-o cilipepucila umusambi ukulewuka iviwuza vino vingalenga aleke ukukunda Yehova. (Imilu. 13:20) Ndi walola ukuti iviwuza vino wizyanga navyo vyamutaluka, alimanya ukuti angazana iviwuza vyacisinka mwi wungwe.—Mar. 10:29, 30; 1 Pet. 4:4.
MUWALANDAPO LYONSINYE PA KUYIPA NU KUBATIZWA
Umusambi angafika na mukubatizwa! (Lolani amaparagrafu 12-13)
12. Amulandu ci wuno tuzipizile twalanda pa kuyipa nu kubatizwa pano tukutungulula isambililo lye Baibolo?
12 Lyonsinye muzipizile muwalandapo umulandu wuno cacindamila ukuyipa nu kubatizya. Amuno cino tukatungululila amasambililo ye Baibolo, akwavwa awantu ukulunduluka ukufika ku lubatizyo. Pa nsizi ya kusambilila nu musambi pa myezi mitici, swinya watalika nu kuzanwa mu kulongana, azipizile ukumanya ukuti umulandu wuno mu kamutungululila isambililo akumwavwa ukuwa Inte ya kwe Yehova.
13. Ayani vino umusambi azipizile ukucita pa kuti alunduluke ukufika na kulubatizyo?
13 Kwawa ivintu ivivule vino umusambi wino akulonda ukubatizwa azipizile ukucita. Ica kutalicila, azipizile ukumanya e Yehova, ukumukunda nu kumusuwila. (Yoha. 3:16; 17:3) Cinji azipizile ukupanga wuciwuza ne Yehova na wanawitu. (Hebe. 10:24, 25; Jemu. 4:8) Swinya azipizile ukulapila kwe vino wacitanga nu kuvilecelela. (Imili. 3:19) Mukupita kwa mpindi akatalika nu kunenako wanji pe vino asambilizile. (2 Kor. 4:13) Nga wacita vyonsinyene vyo-o apano angayipa kwe Yehova nu kubatizwa. (1 Pet. 3:21; 4:2) Wo-o wukawa awanda wa nsansa kwe wonsinye wano wakulolako. Acino tuzipizile twasalifya umusambi impindi yonsinye yino wacita cimwi pe vyo-o pa kuti afikepo ukubatizwa.
MUWALOLA NGA CA KUTI AKULUNDULUKA
14. Avyani vino e kasambilizya azipizile ukucita pa kuti alole nga ca kuti umusambi atalisile ukulunduluka?
14 Tuzipizile ukuwa awatekanye pano tukwavwa umusambi ukulunduluka ukufika na kulubatizyo. Lelo icicindamisye cino tuzipizile ukucita, akumanya nga ca kuti akulondesya ukutalika ukuwombela Yehova. Uzye pali vimwi vino vikulanjizya ukuti atalisile ukukonka vino Yesu wasambilizyanga? Nanti uzye akalondavye ukumanya ivivule pe Baibolo?
15. Avyani vino viliyavwa e kasambilizya ukulola nga ca kuti umusambi afisilepo ukubatizwa?
15 Lyonsinyene muwalola nga ca kuti umusambi akucita vino vikulanjizya ukuti akulunduluka. Ku cakulolelako, uzye akulanjizya ukuti wakunda Yehova? Uzye akapepa lyonsinye kwe Yehova? (Amalu. 116:1, 2) Uzye akawazya Baibolo lyonsi? (Amalu. 119:97) Uzye akazanwa lyonsinye mu kulongana? (Amalu. 22:22) Uzye pali vimwi vino vikulanjizya ukuti akuwonvya vino akusambilila? (Amalu. 119:112) Uzye watalika ukuwuzyako walupwa ni viwuza pe vino akusambilila? (Amalu. 9:1) Ni cicilepo, uzye akuvwambisya ukuwa Inte ya kwe Yehova? (Amalu. 40:8) Nga ca kuti asa kucita nanti cimwi pe vyo-o, muzipizile ukuvwambilizya mu mucenjelo cino cilenzile nu kulanzyanya nawe mu cikuku lelo ukwasowa ukumupita mu mbali. *
16. Avyani vino vingalenga muleke ukusambilila nu musambi?
16 Nga ca kuti mukulonda ukumanya nga mungatwalilila ukusambilila nu musambi, muzipizile muwayikolowozya ukuti: ‘Uzye akayipekanizizya isambililo? Uzye akazanwa mu kulongana? Uzye waleka imiwele miwipe yino walinji nayo kali? Uzye waleka ukuya ku mipepele yino wayangako kali?’ Nga ca kuti icasuko kwe ya-a mawuzyo we awe, lyo tutazipizile ukutwalilila ukusambilila nawe amuno cingawa ngati tukusambilizya umuntu ukucowa wino asakulonda ukunyeka.
17. Ukulingana ni waliko lya kwe 1 Timoti 4:16, acani cino wakasambilizya wonsinyene wazipizile ukucita?
17 Twacindamika sana umulimo wa kupanga awasambi nu kuwavwa ukulunduluka ukufika ku lubatizyo. Fwandi lyonsinye tuzipizile twaleka Baibolo yiwasambilizya nu kulanjizya ukuti twakunda nu kusuwila vino tukusambilizya. Tuzipizile ukutwalilila ukuwawomelezya awasambi ukupanga iviwuza mwi wungwe. Swinya tuzipizile lyonsinye twanena awasambi umulandu wuno cacindamila ukuyipa nu kubatizwa. Nu kutwalilila ukulola nga ca pali vimwi vino vikulanjizya ukuti wakulunduluka. (Lolani akambokosi kano kakuti “ Vino Wakawizya Wazipizile Ukucita pa Kwavwa Amasambililo Ukulunduluka Ukufika na Kulubatizyo.”) Ala tukawa ni nsansa nkaninye ukuwombako wo-o umulimo wakwavwa awantu ukwizawa nu wumi wa muyayaya ku nkolelo. Acino lekani tutwalilile ukuwombesya na maka ukutungulula amasambililo yano yangalunduluka ukufika ku lubatizyo.
ULWIMBO 79 Basambilisheni Ukwiminina Ndi
^ par. 5 Ukutungulula amasambililo ye Baibolo lwawa alongo nkaninye. Amuno tukakwavwa awantu ukutalika ukwelenganya nu kucita ivintu mu nzila yino Yehova akalonda. Co-o icipande candi cilande pe vino vingatwavwa ukuzifyako imisambilizizye.
^ par. 4 Lolani icipande cino cikuti “Vino Tutazipizile Ukucita Pano Tukutungulula Isambililo lye Baibolo” mu Kalibuku ka Ciwemba aka Mikaliile nu Mulimo Wuno Tukawomba aka September 2016.
^ par. 8 Yanji pano pakati ABOUT US > EXPERIENCES.
^ par. 9 Yanji pa JW Library®, apano muye pano watili MEDIA > OUR MEETINGS AND MINISTRY > TOOLS FOR THE MINISTRY.
^ par. 15 Lolani ivipande vino vikuti “Ukukunda Yehova Akuno Kukalenga umuntu Ukubatizwa” na cino catinji “Uzye Muipekinye Ukubatizwa?” mu Lupungu lwa kwe Malonda ulwa March 2020.
^ par. 77 UKULONDOLOLA IVIKOPE: Pa nsizi yisambililo e nkazi wino wamanya ivya kutungulula icete amasambililo, akwavwa e kawizya ivya kukanalandapo nkani pano akutungulula.
^ par. 79 UKULONDOLOLA IVIKOPE: Umusambi wasambilila ivya kuwa umuci umuzima, akuwuzyako e wakwakwe pe vino wasambilila.
^ par. 81 UKULONDOLOLA IVIKOPE: E nkazi, umusambi wakwe, nu mulume wa musambi wakwizizya ponga ku ng’anda ye nkazi wino tewali nawe pa Ng’anda ya Wufumu.
