1. ¿Nda̱chun káʼa̱nyó ña̱ kivi ka̱ku na̱ yiví xa̱ʼa̱ chiñu ña̱ kéʼéyó?

CHIÑU ña̱ kúúmiíyó ña̱ chindeétáʼanyó xíʼin na̱ yiví ña̱ xa̱a̱na koona discípulo ta̱ Jesús, ña̱yóʼo sáka̱kuña miína. ¿Nda̱chun káʼa̱nyó ña̱yóʼo? Ná ndakaʼányó xa̱ʼa̱ ña̱ va̱xi nu̱ú Mateo 28:19, 20, ta̱ Jesús ni̱ka̱ʼa̱nra “kúáʼanndó”, “sanáʼa̱ndó na̱ yiví ná kundiku̱nna yi̱ʼi̱” ta “sandákuchindóna”. Kúnda̱a̱-iniyó ña̱ ndáyáʼviní ña̱ ndakuchina, saáchi ña̱yóʼo kúú iin ña̱ xíniñúʼu keʼéna ña̱ va̱ʼa ka̱kuna. Na̱ yiví na̱ kúni̱ ndakuchi xíniñúʼu kandíxana ña̱ kivi ka̱kuna tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó ta nda̱takura. Xa̱ʼa̱ ña̱yóʼo ta̱ apóstol Pedro ni̱ka̱ʼa̱nra xíʼin na̱ cristiano: “Ña̱ nda̱kuchindó [...] kúú ña̱ sáka̱ku ndóʼó [...] xa̱ʼa̱ ña̱ nda̱taku ta̱ Jesucristo” (1 Ped. 3:21). Ña̱kán tá ndákuchi iin na̱ yiví, saá kúú ña̱ ndátuna ndakiʼinna ña̱ kutakuna ndiʼi tiempo.

2. Nda̱a̱ táki̱ʼva káchi 2 Timoteo 4:1, 2, ¿ndáaña xíniñúʼu keʼé miíyó na̱ sánáʼa̱ na̱ yiví?

² Xíniñúʼu sakuaʼayó viíní sanáʼa̱yó na̱ yiví ña̱ va̱ʼa xa̱a̱na koona discípulo ta̱ Jesús (kaʼvi 2 Timoteo 4:1, 2). * ¿Nda̱chun? Saáchi ta̱ Jesús xa̱ʼndara chiñu nu̱úyó “kúáʼanndó” ta “sanáʼa̱ndó na̱ yiví [...] ña̱ ná kundiku̱nna yi̱ʼi̱”. Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná ndakundeéra chika̱a̱ra ndee̱ ña̱ keʼéra chiñu yóʼo, ta ni̱ka̱ʼa̱nkara xíʼinra: “Tá saá ná keʼún sakǎkún miíún ta saátu na̱ xíniso̱ʼo ña̱ sánáʼún”. Ña̱kán ta̱xira consejo yóʼo ndaʼa̱ra: “Kuentaní koún xíʼin [...] ña̱ sánáʼún” (1 Tim. 4:16). Xíniñúʼu viíní sanáʼa̱yó na̱ yiví tá kúni̱yó chindeétáʼanyó xíʼinna ña̱ xa̱a̱na koona discípulo ta̱ Jesús.

3. ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

 ³ Ku̱a̱ʼání na̱ yiví sánáʼa̱yó xa̱ʼa̱ ña̱ nda̱a̱ ña̱ va̱xi nu̱ú Biblia ndiʼi semana. Nda̱a̱ táki̱ʼva xi̱niyó nu̱ú artículo ña̱ ni̱ya̱ʼa kúni̱yó kunda̱a̱-iniyó ndáa ki̱ʼva kivika chindeétáʼanyó xíʼin na̱ yiví ña̱ kuaʼnuna xíʼin tu̱ʼun Ndióxi̱ ta xa̱a̱na ndakuchina. Nu̱ú ña̱ artículo yóʼo ka̱ʼa̱nyó xa̱ʼa̱ u̱ʼu̱n ña̱ʼa ña̱ xíniñúʼu keʼé miíyó ña̱ va̱ʼa chindeétáʼanyó xíʼin na̱ káʼviyó xíʼin ña̱ va̱ʼa xa̱a̱na ndakuchina.

4. ¿Nda̱chun va̱ása xíniñúʼu ku̱a̱ʼání ka̱ʼa̱nyó tá sánáʼa̱yó iin na̱ yiví? (Koto nota).

⁴ Ndiʼiyó kútóoyó sanáʼa̱yó xa̱ʼa̱ tu̱ʼun Ndióxi̱. Ña̱kán sava yichi̱ kúni̱yó ku̱a̱ʼání ka̱ʼa̱nyó xa̱ʼa̱ ña̱yóʼo. Soo tá táxiyó Tutu Ña̱ Nátúʼun xíʼinyó ti̱xin reunión á tá táxiyó Estudio ña̱ Congregación, ta saátu tá sánáʼa̱yó inka na̱ yiví xa̱ʼa̱ Biblia, xíniñúʼu kiʼinyó kuenta ña̱ va̱ása ku̱a̱ʼání ka̱ʼa̱nyó. Va̱ʼaka ná kuniñúʼuyó Biblia tá sánáʼa̱yó. Ña̱kán tá sánáʼa̱yó xíniñúʼu kiʼinyó kuenta ña̱ va̱ása ka̱ʼa̱nyó xa̱ʼa̱ ndiʼi ña̱ xíni̱yó xa̱ʼa̱ iin ña̱ʼa á xa̱ʼa̱ iin texto (Juan 16:12). * Sana tá nda̱kuchiyó loʼova ña̱ʼa xi̱kunda̱a̱-iniyó xa̱ʼa̱ Biblia soo vitin xa̱a̱ ku̱a̱ʼáníka ña̱ kúnda̱a̱-iniyó xa̱ʼa̱, va̱ása xíniñúʼu kamaní sanáʼa̱yó na̱ yiví xa̱ʼa̱ ndiʼi ña̱ xa̱a̱ xíni̱yó (Heb. 6:1). Ña̱kán tá ku̱a̱ʼá ku̱i̱ya̱ ni̱ya̱ʼa saáví ni̱xa̱a̱yó ku̱nda̱a̱-iniyó xa̱ʼa̱ ndiʼi ña̱ xa̱a̱ xíni̱yó, va̱ása xíniñúʼu kama sanáʼa̱yó iin na̱ yiví xa̱ʼa̱ ndiʼi ña̱yóʼo.

5. a) Nda̱a̱ táki̱ʼva káchi 1 Tesalonicenses 2:13, ¿ndáaña kúni̱yó ná kunda̱a̱-ini na̱ káʼviyó xíʼin? b) ¿Ndáaña kivi keʼéyó ña̱ va̱ʼa natúʼunna xíʼinyó ndáaña ndákanixi̱nína xa̱ʼa̱ ña̱ sákuaʼana?

⁵ Tá sánáʼa̱yó iin na̱ yiví kúni̱yó ña̱ ná kunda̱a̱-inina ña̱ ndiʼi ña̱ sákuaʼana nu̱ú tu̱ʼun Ndióxi̱ va̱xiña (kaʼvi 1 Tesalonicenses 2:13). * Ña̱kán ná nda̱ka̱tu̱ʼunyóna ndáaña ndákanixi̱nína xa̱ʼa̱ ña̱ sákuaʼana. Su̱ví ndiʼi yichi̱ xíniñúʼu ka̱ʼa̱nyó xíʼinna ndáaña kúni̱ kachi iin texto, va̱ʼaka ná taxiyó ka̱ʼa̱n miína xíʼinyó ndáaña kúni̱ kachiña. Ná chindeétáʼanyó xíʼinna ña̱ kotona ndáa ki̱ʼva keʼéna ña̱ káʼa̱n Biblia. Viíní ná nda̱ka̱tu̱ʼunyóna ña̱ va̱ʼa ka̱ʼa̱nna xíʼinyó ndáaña ndákanixi̱nína á ndáaña ndóʼona tá káʼvina iin texto (Luc. 10:25-28). Kivi nda̱ka̱tu̱ʼunyóna: “¿Ndáa ki̱ʼva chíndeétáʼan texto yóʼo xíʼún ña̱ kunda̱a̱-iniún ndáa ki̱ʼva íyo Jehová?”, “Ña̱ sa̱kuaʼún yóʼo, ¿ndáa ki̱ʼva chíndeétáʼanña xíʼún?”, “¿Á kúsi̱í-iniún xa̱ʼa̱ ña̱ sa̱kán sa̱kuaʼún?” (Prov. 20:5). Va̱ása ndáyáʼviví á ku̱a̱ʼá ña̱ʼa sákuaʼana chi ña̱ ndáyáʼvika kúú ña̱ kuʼvi̱-inina kunina ña̱ sákuaʼana ta keʼénaña.

6. ¿Nda̱chun iin ña̱ va̱ʼa kúú ña̱ ka̱ʼa̱nyó xíʼin na̱ xa̱a̱ ku̱a̱ʼá ku̱i̱ya̱ kúú publicador ña̱ ná ku̱ʼu̱nna xíʼinyó ña̱ sanáʼa̱yó iin na̱ yiví?

 ⁶ ¿Á xa̱a̱ káʼa̱nyó xíʼin iin na̱ xa̱a̱ ku̱a̱ʼá ku̱i̱ya̱ kúú publicador ña̱ ná ku̱ʼu̱nna xíʼinyó ña̱ sanáʼa̱yó iin na̱ yiví? Tá ná ku̱ʼu̱nna xíʼinyó kivi nda̱ka̱tu̱ʼunyóna ndáaña túvina xíʼin ki̱ʼva ña̱ sa̱náʼa̱yó na̱ yiví kán, ta ná ka̱ʼa̱nna xíʼinyó á xi̱niñúʼuyó Biblia ña̱ sa̱náʼa̱yóna á iinlá miívayó ni̱ka̱ʼa̱n. Xíniñúʼu vitá koo iniyó tá kúni̱yó viíka sanáʼa̱yó (chitáʼanña xíʼin Hechos 18:24-26). Kivitu nda̱ka̱tu̱ʼunyó na̱ publicador kán á ki̱ʼinna kuenta á ku̱nda̱a̱-ini na̱ káʼviyó xíʼin xa̱ʼa̱ ña̱ sa̱náʼa̱yóna. Tá va̱ása kívi ku̱ʼu̱nyó kotoyóna iin á u̱vi̱ semana kivi ka̱ʼa̱nyó xíʼin na̱ publicador kán ña̱ ná ku̱ʼu̱nna kaʼvina xíʼinna. Tasaá va̱ása sandákoona kaʼvina ta kunda̱a̱-inina ña̱ ndáyáʼviní ña̱ sákuaʼana. Ná va̱ása ndakanixi̱níyó ña̱ iinlá miíyó kúú na̱ kivi kaʼvi xíʼin na̱ yiví yóʼo. Saáchi ña̱ kúni̱yó kúú ña̱ ná kuaʼnuna xíʼin tu̱ʼun Ndióxi̱, ta nda̱a̱ ni iin ña̱ʼa ná va̱ása kasi nu̱úna ña̱ keʼéna ña̱yóʼo.

7. ¿Ndáa ki̱ʼva kivi kusi̱í-ini na̱ káʼviyó xíʼin xa̱ʼa̱ ña̱ sákuaʼana?

⁷ Ndáyáʼviní koto na̱ káʼviyó xíʼin ña̱ xíʼin ña̱ si̱í-ini sánáʼa̱yó ña̱ va̱xi nu̱ú Biblia ta kándíxayóña (1 Tes. 1:5). Saá kúú ña̱ kusi̱íka-inina xíʼin ña̱ sákuaʼana. Ta saátu kivi ka̱ʼa̱nyó xíʼinna ndáa ki̱ʼva xa̱a̱ chíndeétáʼan ña̱ va̱xi nu̱ú Biblia xíʼinyó ña̱ viíka íyo ña̱ tákuyó. Tasaá xa̱a̱na kunda̱a̱-inina ña̱ kivitu chindeétáʼan ña̱ va̱xi nu̱ú Biblia xíʼin miína.

8. ¿Ndáaña kivi keʼékayó ña̱ va̱ʼa chindeétáʼanyó xíʼin na̱ káʼviyó xíʼin, ta nda̱chun?

⁸ Tá káʼviyó xíʼin iin na̱ yiví ná natúʼunyó xa̱ʼa̱ na̱ hermano na̱ ku̱chiñu ni̱ya̱ʼa nu̱ú tu̱ndóʼo táʼan ña̱ kúúmiína. ¿Á íyo iin na̱ hermano ti̱xin congregaciónyó na̱ ku̱chiñu ni̱ya̱ʼa nu̱ú táʼan tu̱ndóʼo ña̱ ndóʼona? Tá saá, ná ka̱ʼa̱nyó xíʼin na̱ hermano ña̱ ku̱ʼu̱nna xíʼinyó sanáʼa̱yó na̱ yiví. Ta saátu kivi kuniñúʼuyó experiencia ña̱ va̱xi nu̱ú jw.org * ti̱xin serie ña̱ naní “La Biblia les cambió la vida”. Artículo xíʼin video ña̱ kána ti̱xin serie yóʼo chindeétáʼanña xíʼinna ña̱ kunda̱a̱-inina ña̱ ku̱a̱ʼání ña̱ va̱ʼa ndakiʼinna tá ná keʼéna ña̱ káʼa̱n Biblia.

9. ¿Ndáaña kivi keʼéyó ña̱ va̱ʼa chindeéyó na̱ káʼviyó xíʼin ña̱ ná natúʼunna xíʼin na̱ veʼena á na̱ migona xa̱ʼa̱ ña̱ sákuaʼana?

⁹ Tá xa̱a̱ na̱ ti̱ndaʼa̱ kúú na̱ káʼviyó xíʼin, ¿á kivi ka̱ʼa̱nyó xíʼin yiína á ñá síʼina ña̱ kivitu kaʼvi na̱yóʼo xíʼinyó? Ta saátu ná ka̱ʼa̱nyó xíʼinna ña̱ natúʼunna xíʼin na̱ migona á na̱ veʼena  xa̱ʼa̱ ña̱ sákuaʼana (Juan 1:40-45). Va̱ása yo̱ʼvi̱ví keʼéyó ña̱yóʼo, kivi nda̱ka̱tu̱ʼunyóna: “¿Ndáa ki̱ʼva ka̱ʼún xa̱ʼa̱ ña̱yóʼo xíʼin iin na̱ veʼún?” á “¿Ndáa texto kuniñúʼún ña̱ va̱ʼa ka̱ʼún xa̱ʼa̱ ña̱yóʼo xíʼin na̱ migoún?”. Tá ná keʼéyó ña̱yóʼo, saá kúú ña̱ chindeétáʼanyó xíʼinna ña̱ xa̱a̱na sanáʼa̱na inkana chí nu̱únínu. Tasaá, tá ná xa̱a̱na kuuna publicador kivi kixáʼana ku̱ʼu̱nna xíʼin na̱ congregación ña̱ natúʼunna xa̱ʼa̱ Ndióxi̱. Ta saátu kivi nda̱ka̱tu̱ʼunyóna á xíni̱na iin na̱ yiví na̱ kúni̱ sakuaʼa xa̱ʼa̱ Biblia. Tá saá íyoña, ná nandukúyó na̱ yiví kán ta ná nda̱ka̱tu̱ʼunyóna á kúni̱na kaʼviyó xíʼinna. Ta ná na̱ʼa̱yó nu̱úna video ña̱ naní ¿Ndáa ki̱ʼva sánáʼa̱ na̱ testigo Jehová na̱ yiví? *

10. Nda̱a̱ táki̱ʼva íyo ña̱ ni̱ka̱ʼa̱n ta̱ apóstol Pablo nu̱ú 1 Tesalonicenses 2:7, 8, ¿ndáa ki̱ʼva kivi kundiku̱nyó yichi̱ra?

¹⁰ Xíniñúʼu kundi̱ʼi̱-iniyó xa̱ʼa̱ na̱ káʼviyó xíʼin, ta ná kotoyóna nda̱a̱ táki̱ʼva íyo na̱ hermanoyó (kaʼvi 1 Tesalonicenses 2:7, 8). * Sana íxayo̱ʼvi̱ña xíʼinna ña̱ va̱ása kutáʼankana xíʼin na̱ migona, ta nasamana ña̱ kéʼéna ña̱ va̱ʼa xa̱a̱na kachíñuna nu̱ú Jehová. Xa̱ʼa̱ ña̱kán ná chindeétáʼanyó xíʼinna ña̱ koo migona ti̱xin congregación. Tá ná taváyó tiempo ña̱ kutáʼanyó xíʼinna, na̱ʼa̱yó ña̱ kúúyó migona. Ta kivi na̱ʼa̱yó ña̱ ndíʼi̱-iniyó xa̱ʼa̱na tá ná ka̱ʼa̱nyó xíʼinna, ta chindaʼáyó iin mensaje ndaʼa̱na ta saátu tá ná ku̱ʼu̱nyó kotoyóna inka ki̱vi̱ ña̱ va̱ása káʼviyó xíʼinna.

11. ¿Ndáaña kúni̱yó ndani̱ʼí na̱ káʼviyó xíʼin ti̱xin congregación, ta nda̱chun?

¹¹ Nda̱a̱ táki̱ʼva íyo ña̱ káʼa̱nna chí África: “Iníísaá na̱ ñuu kúú na̱ chindeétáʼan xíʼin iin ta̱ loʼo ña̱ va̱ʼa kuaʼnura”. Ki̱ʼva saá íyo ña̱ kivi ka̱ʼa̱nyó ña̱: “Iníísaá na̱ congregación kúú na̱ kivi chindeétáʼan xíʼin iin na̱ yiví ña̱ va̱ʼa xa̱a̱na koona discípulo ta̱ Jesús”. Ña̱kán tá chíndeétáʼanyó xíʼin na̱ káʼviyó xíʼin ña̱ kuxini̱kana na̱ hermano na̱ íyo ti̱xin congregación. Na̱yóʼo kivi chindeétáʼanna xíʼinna ña̱ kuyatinkana nu̱ú Jehová, ta saátu kivi chindeétáʼanna xíʼinna tá yáʼana nu̱ú tu̱ndóʼo. Ta saátu kúni̱yó ña̱ vií ná kutáʼanna xíʼin na̱ congregación ta ná kotona na̱yóʼo nda̱a̱ táki̱ʼva íyo na̱ veʼena. Tá ná kutóokana kutáʼanna xíʼin na̱ ñuu Ndióxi̱, va̱ása ixayo̱ʼvi̱ña xíʼinna ña̱ sandákoona kutáʼanna xíʼin na̱ yiví na̱ va̱ása chíndeétáʼan xíʼinna ña̱ kuʼvi̱ka-inina kunina Jehová (Prov. 13:20). Tá ná kuxíka na̱ xi̱kuu migona nu̱úna, kunda̱a̱-inina ña̱ kivi ndani̱ʼína na̱ koo migona ti̱xin ñuu Jehová (Mar. 10:29, 30; 1 Ped. 4:4).

12. ¿Nda̱chun xíniñúʼu ka̱ʼa̱nyó xíʼin na̱ káʼviyó xíʼin xa̱ʼa̱ ña̱ ndataxina miína ndaʼa̱ Ndióxi̱ ta ndakuchina?

¹² Ná va̱ása yi̱ʼvíyó ña̱ ka̱ʼa̱nyó xíʼinna xa̱ʼa̱ ña̱ ndataxina miína ndaʼa̱ Ndióxi̱ ta ndakuchina. Saáchi tá káʼviyó xíʼin na̱ yiví ña̱ kúni̱yó kúú ña̱ ná ndakuchina ta xa̱a̱na kachíñuna nu̱ú Jehová. Tá xa̱a̱ ku̱a̱ʼá yo̱o̱ káʼviyó xíʼin iin na̱ yiví ta xa̱a̱ ki̱xáʼana xáʼa̱nna reunión, xíniñúʼu kunda̱a̱-inina ña̱ káʼviyó xíʼinna chi kúni̱yó chindeétáʼanyó xíʼinna ña̱ xa̱a̱na koona testigo Jehová.

13. ¿Ndáaña xíniñúʼu keʼé na̱ káʼviyó xíʼin ña̱ va̱ʼa xa̱a̱na ndakuchina?

¹³ Na̱ káʼviyó xíʼin xíniñúʼu keʼéna sava ña̱ʼa tasaá xa̱a̱na ndakuchina. Siʼna xáa̱na sákuaʼana xa̱ʼa̱ Jehová, kúʼvi̱-inina xíninara ta kándíxanara (Juan 3:16; 17:3). Tasaá xáa̱na ndúuna migora, ta saátu kítáʼanna xíʼin na̱ hermano na̱ íyo ti̱xin congregación (Heb. 10:24, 25; Sant. 4:8). Tá yáʼa tiempo sándakoona ña̱ va̱ása va̱ʼa kéʼéna, ta ndándikó-inina xa̱ʼa̱ ku̱a̱china (Hech. 3:19). Ta xa̱ʼa̱ ña̱ kándíxanína Ndióxi̱ kíxáʼana nátúʼunna xíʼin inka na̱ yiví xa̱ʼa̱ ña̱ nda̱a̱ (2 Cor. 4:13). Tándi̱ʼi ndátaxina miína ndaʼa̱ Ndióxi̱ ta ndákuchina (1 Ped. 3:21; 4:2). Tá kíxaa̱ ki̱vi̱ ña̱ ndákuchina ndiʼiyó kúsi̱í-ini. Tá kíxáʼa na̱ káʼviyó xíʼin kéʼéna ña̱yóʼo ná ka̱ʼa̱nyó xíʼinna ña̱ va̱ʼaní íyo ña̱ kéʼéna, ta ná chika̱a̱yó ndee̱ xíʼinna ña̱ ndakundeéna keʼénaña.

14. ¿Ndáaña kivi keʼéyó ña̱ va̱ʼa kotoyó á xa̱a̱ ku̱a̱ʼa̱n xáʼnuna xíʼin tu̱ʼun Ndióxi̱?

¹⁴ Xíniñúʼu kúee koo iniyó ña̱ va̱ʼa chindeétáʼanyó xíʼin na̱ káʼviyó xíʼin ña̱ ndataxina miína ndaʼa̱ Ndióxi̱, ta ndakuchina. Soo saátu xíniñúʼu kunda̱a̱-iniyó á kúni̱na kachíñuna nu̱ú Jehová á va̱ása. ¿Á chíka̱a̱na ndee̱ ña̱ keʼéna ña̱ ni̱ka̱ʼa̱n ta̱ Jesús? ¿Á káʼvina xa̱ʼa̱ ña̱ kútóo kuitína ña̱ sákuaʼana nu̱ú Biblia?

15. ¿Ndáaña kúú ña̱ na̱ʼa̱ nu̱úyó ña̱ xa̱a̱ ku̱a̱ʼa̱n xáʼnuna xíʼin tu̱ʼun Ndióxi̱?

¹⁵ Ná kotoyó á xa̱a̱ ku̱a̱ʼa̱n xáʼnuna xíʼin tu̱ʼun Ndióxi̱. Tá kúú, ¿á káʼa̱nna ña̱ kúʼvi̱-inina xínina Jehová? ¿Á kéʼéna oración? (Sal. 116:1, 2). ¿Á kútóona kaʼvina Biblia? (Sal. 119:97). ¿Á xáʼa̱n ni̱ʼina reunión? (Sal. 22:22). ¿Á xa̱a̱ na̱samana ña̱ kéʼéna? (Sal. 119:112). ¿Á xa̱a̱ nátúʼunna xíʼin na̱ veʼena á xíʼin na̱ migona xa̱ʼa̱ ña̱ sákuaʼana? (Sal. 9:1). Soo ña̱ ndáyáʼvika kúú, ¿á kúni̱na koona testigo Jehová? (Sal. 40:8). Tá xítoyó ña̱ kǒo kéʼéna nda̱a̱ ni iin ña̱yóʼo, ná kotoyó nda̱chun kúú ña̱ íxayo̱ʼvi̱ña xíʼinna,  tándi̱ʼi vií ná ka̱ʼa̱nyó xíʼinna xa̱ʼa̱ña soo káxi ná ka̱ʼa̱nyó xíʼinna. *

16. ¿Ndáaña na̱ʼa̱ nu̱úyó ña̱ xíniñúʼu sandákooyó kaʼviyó xíʼin iin na̱ yiví?

¹⁶ Ta saátu ná kotoyó á xíniñúʼu ndakundeéyó kaʼviyó xíʼin iin na̱ yiví. Ná ndakanixi̱níyó xa̱ʼa̱ ña̱yóʼo: “¿Á xa̱a̱ káʼvi kúeena tá kúma̱níka ku̱ʼu̱nyó sanáʼa̱yóna? ¿Á kúni̱na ku̱ʼu̱nna reunión? ¿Á kǒo kéʼékana ña̱ va̱ása va̱ʼa? ¿Á xa̱a̱ sa̱ndákoona ña̱ kutáʼanna xíʼin na̱ veʼe-ñu̱ʼu vatá?”. Soo tá ta̱ʼán keʼéna ña̱yóʼo, nda̱a̱ táki̱ʼva íyo na̱ kúni̱ sanáʼa̱ iin na̱ yiví ña̱ kunúuna nu̱ú ti̱kui̱í á su̱tíana soo va̱ása kúni̱na ndaxina saá kooyó. Tá va̱ása chíndayáʼvina ña̱ sákuaʼana ta va̱ása násamana ña̱ kéʼéna va̱ása xíniñúʼu ndakundeékayó kaʼviyó xíʼinna.

17. Ña̱ va̱ʼa kiʼinyó kuenta xíʼin ña̱ sánáʼa̱yó nda̱a̱ táki̱ʼva káchi 1 Timoteo 4:16, ¿ndáaña xíniñúʼu keʼé miíyó na̱ sánáʼa̱ na̱ yiví?

¹⁷ Kúni̱yó viíní keʼéyó chiñu ña̱ kúúmiíyó ña̱ chindeétáʼanyó xíʼin na̱ yiví ña̱ xa̱a̱na koona discípulo ta̱ Jesús. Ta kúni̱yó chindeétáʼanyó xíʼin na̱ yiví ña̱ xa̱a̱na ndakuchina. Ña̱kán ná kuniñúʼuyó Biblia tá sánáʼa̱yóna, xíʼin ña̱ si̱í-ini ná keʼéyó ña̱yóʼo ta ná na̱ʼa̱yó ña̱ kándíxayó ña̱ sánáʼa̱yó. Ná chika̱a̱yó ndee̱ xíʼin na̱ káʼviyó xíʼin ña̱ ná koo migona ti̱xin congregación, ná ka̱ʼa̱nyó xíʼinna xa̱ʼa̱ ña̱ ndataxina miína ndaʼa̱ Ndióxi̱ ta ndakuchina, ta saátu ná kotoyó á xa̱a̱ ku̱a̱ʼa̱n xáʼnuna xíʼin tu̱ʼun Ndióxi̱. (Koto recuadro “ Ña̱ xíniñúʼu keʼé na̱ sánáʼa̱”). Kúsi̱íní-iniyó kéʼéyó chiñu yóʼo chi sáka̱kuña na̱ yiví. Ña̱kán ná chika̱a̱níyó ndee̱ ña̱ chindeétáʼanyó xíʼin na̱ káʼviyó xíʼin ña̱ xa̱a̱na ndakuchina.