1. Vati tua tantekeya ngecize, cipanga ca ku puisa vantu vandongesi ce ku ovola miono?

CIPANGA ca ku puisa vantu vandongesi ce ku ovola miono ya vantu! Vati tua tantekeyamo? Yesu ua hele lisiko li va soneka ku Mateo 28:19, 20, ngueni: “Ngoco vene hamenu, puisenu vantu vandongesi vange na ku va mbatiza.” Vuno mbatizimu ya kala na seho ika? Ca pua cinanga ca na pande ku puisamo uose ua tonda ku kovoka. Uose a tonda ku mu mbatiza na pande ku tsiliela ngecize, a hasa lika ku ovoka ku hitila mu ku-tsa ca Yesu na ku sanguka ceni. Vikevio via lingisile kapostolo Petulu ku leka Vakua Kilistu ngueni “ku mbatiza” ci li “na ku mi ohiela vuovuno ha ku sanguka ca Yesu Kilistu.” (1 Pet. 3:21) Ngeci mukemuo, nga ndongesi va na mu mbatiza, ci na pu ku linoneka ha kati ka vaze va lavelela ku kovoka.

2. Kuliya na 2 Timoteo 4:1, 2, tua pande ku pua valongisi va cifua cika?

² Linga tu puise vantu vandongesi, tua pande ku kala na “vutongue mu ku longesa.” (Tandenu 2 Timoteo 4:1, 2.) Omo lia vika? Muomu Yesu ua tu sikile ngueni: “Ngoco vene hamenu.  . . , puisenu vantu vandongesi na ku va longesa.” Kapostolo Paulu ua handekele ngueni: “Kala vene mu viuma evi, muomu mu ku linga ngecize, u ka liohiela ove ivene na vaze va ku halakana.” Ngeci Paulu ua tu mamuine tu tale vuino ku ku longesa cetu. (1 Tim. 4:16) Mu ku linga, ku longesa va ci tokakana ku cipanga ca ku puisa vantu vandongesi, tua pande ku kala na vutongue mu ku longesa.

3. Vika tu simutuila ku tuala ha ku endesa vilongesa via Mbimbiliya, mu cilongesa cino?

³ Tue ku endesa makulukazi a makulukazi a vilongesa via Mbimbiliya mu mavu ose. Vunoni ngue mu ca longesele cilongesa ci na hiti, tu tonda ku tantekeya vati tu hasa ku va kuasa linga va hase ku pua vandongesi va ku mbatiza va Yesu Kilistu. Mu cilongesa cino, tu hilula viuma vikuavo vitanu via na pande ku linga nkala mulongisi ua Mbimbiliya linga a kuase ndongesi yeni ku heta ku mbatizimu.

4. Omo lia vika mulongisi ua Mbimbiliya ka pandele ku handeka mua kama, nga endesa cilongesa ca Mbimbiliya? (Talenu naua ha litota.)

⁴ Tua lema viuma via mu lizi lia Njambi vi tue ku longesa. Ngeci mukemuo, tu hasa ku uila mu cisevuka ca ku handeka mua kama viuma vi tua lema. Vunoni, ambe mu cilongesa ca Vutala, mu cilongesa ca Mbimbiliya mu cikungulukilo ni mu ku longesa ndongesi Mbimbiliya, mukua ku endesa cilongesa ka pandele ku handeka cikuma. Linga tu tavese Mbimbiliya i longese ikeyo, tua pande ku pokuesa lilimi lietu mangana kati tu lombolole viose vi tu tantekeya ku tuala ha cinimbu ca mu Mbimbiliya, ni ha cimo cimpande. * (Yoa. 16:12) Aci setekesenu viuma vi mua tantekeyele ku tuala ha Mbimbiliya ha ntsimbu i va mi mbatizile, nevi vi mu tantekeya ha ntsimbu ino. (VaHe. 6:1) Mua vusunga mu ka mona ngecize, ku ntsimbu ize mua tantekeyele lika vilongesa via ku putukila via mu Mbimbiliya. Kaha mu na ambata miaka ya ingi mu ku lilongesa viuma vi mu tantekeya lelo lino. Ngeci mukemuo, kati mu seteke ku longesa ndongesi viose vi mu tantekeya ha ntsimbu imo lika.

5. (a) Kuliya na 1 Tesalonika 2:13, tua tonda ndongesi yetu evuisise vika? (b) Vati tu hasa ku kaniamesa ndongesi a pue na ku handeka viuma vi ali na ku lilongesa?

⁵ Tu tonda vandongesi vetu vevuisise ngecize, viuma vi ve ku lilongesa vie ku tunda mu lizi lia Njambi, Mbimbiliya. (Tandenu 1 Tesalonika 2:13.) Vati tu hasa ku lingamo? Kaniamesenu ndongesi apue na ku handeka ku tuala ha viuma vi ali na ku lilongesa. Mu cihela ca ku lomboluela ndongesi vinimbu viose via mu Mbimbiliya, puenu na ku mu vundila a pue na ku lombololako ikeye. Kuasenu ndongesi a mone vati Lizi lia Njambi lia likuata neni mpundu. Puenu na ku mu linga vihula vize vi mu lingisa ku handeka visinganieka vieni na cifua ca ali na ku livuilamo, ku tuala ha vinimbu vi ali na ku tanda. (Luka 10:25-28) Ca ku muenako, mu hulenu nguenu: Vati eci cinimbu ci na mi kuasa ku mona cimo ca vifua vikuavo via kala navio Yehova? Vati viuma vi mu na tanda ku vinimbu evi vi hasa ku mi kuasa? Vati mu li na ku livua ku mutima ku tuala ha viuma vi mu na lilongesa? (Visi. 20:5) Ca seho, kati ku lana ca viuma via ali na ku lilongesa ndongesi, vunoni nga ali na ku vi lema kaha na ku vi pangesa?

6. Vika ca puila ca cili ku ya na umo mulongisi ua vutongue nga tu kendesa cilongesa ca Mbimbiliya?

⁶ Vuno vintsimbu vimo mue ku ya na valongisi va kuhia nga mu kendesa cilongesa ca Mbimbiliya ni? Nga mue ku lingamo, mu hasa ku vehula va mi leke ku tuala ha cifua ci mue ku endeselamo cilongesa ca Mbimbiliya, kaha nga mue ku pangesa vuino Mbimbiliya ni kuahi. Nga mu tonda ku pua vatongue mu ku longesa Mbimbiliya, mua pande ku li kehesa. (Setekesenu na Vilinga 18:24-26) Kaha mu nima yaco, hulenu uze muanetu ua vutongue, a mi leke nga mu ku mona ceni ndongesi ali na ku ivuisisa vi ali na ku lilongesa ni kuahi. Mu hasa naua ku vundila muanetu uaco linga a pue na ku mi endeselako cilongesa ceni ca Mimbiliya nga mu ya vungendzi mu simano imo ni ku tuvakana oho. Ku lingamo, ci ka mi kuasa linga cilongesa cenu kati ci hilukile mu nima, kaha na ndongesi a ka mona seho ya kala ha ku lilongesa. Kati mu litande ha ndongesi mu ku mona ngecize yenu lika mua pande ku endesa cilongesa ceni. Muomu vutumbe vuenu, ku kuasa ndongesi a tualeleho ku kola mu lutsilielo, kati ku litandaye.

7. Vika vie ku kuasa ndongesi a leme vi ali na ku lilongesa?

⁷ Ndongesi ua tondeka ku mona ngecize, mua lema vi a longesa Mbimbiliya kaha mua vi tsiliela na mutima uose. (1 Tes. 1:5) Nga mu lingamo kaha neni a ka putuka ku lema vi ali na ku lilongesa. Nga citava, mu lekenu vati ku kava vitume via mu Mbimbiliya ca mi kuasa yenu mpundu. Nga mu lingamo, ndongesi yenu a ka mona ngecize, nkuma mu Mbimbiliya mua kala vitume na vimamuna via seho vihasa ku mu kuasa neni.

8. Vika vikuavo mu hasa ku linga mangana mu kuase ndongesi yenu ua Mbimbiliya, kaha omo lia vika mu hasa ku lingilamo?

⁸ Omo mu li na ku endesa cilongesa, puenu na ku leka ndongesi yeni via mizimbu ya vamuanetu na vandumbuetu va kele na ku pinda na visoti ngue vi ali na ku pinda navio ikeye, kaha va hasele ku vi vula. Mu hasa ku tuhuka mu lihia na umo muanetu ua vulile cisoti cize ci ali na ku pinda naco ndongesi yeni. Ni tondenu umo muzimbu ua cili mu vimpande “Mbimbiliya ye ku alulula miono ya vantu.” * Mu maVutala a laza ni saiti jw.org. vimpande na vivideo viaco, vi ka kuasa ndongesi yeni, ku mona seho ya kala ha ku vitume via mu Mbimbiliya.

9. Vati mu hasa ku kaniamesa ndongesi yenu, a pue na ku lekako vavusoko na vusamba veni viuma via ali na ku lilongesa?

⁹ Nga ndongesi uaco ua ambata cipue ku somboka, vuno na mukua ndzivo yeni ue ku lilongesa ni? Nga kuahi, lanienu mukua ndzivo yenu linga va pue na ku lilongesela hamo. Kaniamesenu ndongesi yenu a pue na ku lekako vavusoko na va vusamba viuma vi ali na ku lilongesa. (Yoa. 1:40-45) Mu njila ika? Mu hasa ku mu hula lika nguenu: Vati mu hasa ku lomboluela ovu vusunga kuli umo kavusoko? Ni nguenu, cinimbu cika mu hasa ku pangesa mu ku muesa ovu vusunga kuli kavusamba? Nga mu lingamo, muli na ku longesa ndongesi yenu neni a ka pue mulongesi. Kaha mua ka puisamo vi tondeka, neni a ka hasa ku ambuluila hamo lika na cikungulukilo mu ku pua mukua ku ambulula ua ku hona ku mbatiza. Mu hasa ku hula ndongesi yeni nga a tantekeya umo muntu a tonda ku lilongesa Mbimbiliya. Nga kuali, lingenu cose mu ku simutuila na muntu uaco kaha na ku lihana mu ku lilongesa neni Mbimbiliya. Mu lekesenu video Vati Ve ku Endesa Cilongesa ca Mbimbiliya? *

10. Ngue mu ya muesa 1 Tesalonika 2:7, 8, vati mulongisi ua Mbimbiliya a hasa ku tambuluisa kapostolo Paulu?

¹⁰ Valongisi va pande ku muesa ngecize va haka seho ya kama ku va ndongesi vavo. Va monenu ngue vamuanoko va ku lutue. (Tandenu 1 Tesalonika 2:7, 8.) Ka ce ku va puila ca casi ku seza vavusamba vavo va mu mavu kaha na ku alulula miano yavo linga va hase ku pangela Yehova. Ngeci mukemuo, tua pande ku va kuasa va uane vavusamba va vusunga mu cikungulukilo. Puenu kavusamba ka ndongesi yenu, mu ku uana uana ntsimbu ya ku sikama neni, kati lika mu ntsimbu i mue ku mu longesa Mbimbiliya. Ku mu sana ku telefone, ku mu tuma mesaje ni ku mu endela ha matangua eka, ci ka muesa ngecize mua mu haka seho ya kama.

11. Tua tonda vandongesi vetu va uane vika mu cikungulukilo, kaha omo lia vika?

¹¹ Vakuluntu va tele cisimo nguavo: “Kuata oku na mukueni lika liove ci hongomoka.” Ngeci mukemuo valongisi va vutongue ve ku lekesa ndongesi yavo ku vakuavo mu cikungulukilo linga navo va hase ku mu kuasa. Ku likata na vamuanetu vaco ci ka kuasa ndongesi, a kolese vusamba vueni na Yehova, kaha na vamuanetu vaco vaka mu kuasa nga ali mu visoti. Tu tonda nkala ndongesi uose a livue ngecize ua pua mutamba ua cikungulukilo, kaha ua pua ka vusoko ketu mu lutsilielo. Tu tonda ntuima na cilemo ca civunga cose ca vamuanetu, vi koke nkala ndongesi ua Mbimbiliya. (Visi. 13:20) Ku likela ku likata na vantu vaze ka ve ku mu kuasa ku lema Yehova, ni ambe nga vavusamba veni va laza va mu mbila kuti, a ka tantekeya ngecize a hasa ku uana vavusamba va vusunga mu lukungulukilo lua Yehova.—Mako 10:29, 30; 1 Pet. 4:4.

12. Omo lia vika tua pande ku pua na ku handeka ha ku lihana na mbatizimu na vandongesi vetu?

¹² Puenu na ku simutuila ha seho ya ku lihana na mbatizimu kuli nkala muntu ue ku lilongesa Mbimbiliya. Muomu na laza vutumbe vuetu mu ku endesa vilongesa via Mbimbiliya, vua pua ku kuasa vantu va pue vandongesi va ku mbatiza va Kilistu. Nga ndongesi na lilongesa mu vimo vingonde, kaha cikuma-kuma nga na putuka ku kunguluka, na pande ku ivuisisa ngecize vutumbe vua ku mu longesa Mbimbiliya, vua pua ku mu kuasa linga a pue Mukaleho ua Yehova.

13. Vinanga vika ue ku puisamo ndongesi linga a hete ku mbatizimu?

¹³ Kamandende-kamandende, ndongesi ua Mbimbiliya ua haka seho ku cilongesa ceni, a hasa ku heta ku mbatizimu. Ha katete, ndongesi ue ku putuka ku tantekeya Yehova na ku mu lema, kaha na ku tsiliela muli Ikeye. (Yoa. 3:16; 17:3) Mu nima ya ntsimbu, ndongesi ue ku likuata vusamba na Yehova kaha na ku putuka ku likata na cikungulukilo. (VaHe. 10:24, 25; Tia. 4:8) Kaha ndongesi, ue ku viana vilinga via vipi na ku aluluka ku vipi vieni. (Vili. 3:19) Kaha naua lutsilielo lueni, lue ku mu sindiya ku leka vakuavo vusunga vu ali na ku lilongesa. (2 Kol. 4:13) Mu nima yaco ue ku lihana kuli Yehova kaha na ku muesa ku lihana ceni ku hitila mu mbatizimu. (1 Pet. 3:21; 4:2) Kaha litangua liaco lie ku pua lia ndzolela ya kama ku mbunga yose! Kaha omo ndongesi a lihakelako ku puisamo evi vinanga, kati mu mu umine visangala na ku kaniamesa ca a tondeka linga a tualelelaho ku kola mu lutsilielo.

14. Vati mulongisi a hasa ku hilula ku kola ca ndongesi yeni?

¹⁴ Tua pande ku kala na lukakatela omo tu kuasa ndongesi linga a kole mu lutsilielo mu ku lihana na ku heta ku mbatizimu. Vunoni tua pande naua ku tantekeya nga ali na cizango ca ku pangela Yehova Njambi. Vuno ndongesi ue ku muesa ngecize, ali na ku lihakela kapandi ka ku ononoka masiko a Yesu ni? Ni ali na ku lilongesa lika linga a tantekeye mizimbu ya mu Mbimbiliya?

15. Vitantekeyeso vika via ku kola mu lutsilielo, mulongisi na pande ku tonda muli ndongesi yeni?

¹⁵ Puenu na ku tonda ku hilula ku kola ca ndongesi kusua kumo. Ca ku muenako: Vuno ue ku handeka vati ue ku livua ku tuala hali Yehova ni? Ue ku vundila kuli Yehova ni? (Visa. 116:1, 2) Ua lema ku tanda Mbimbiliya? (Visa. 119:97) Ali na ku kunguluka ntsimbu yose? (Visa. 22:22) Ku li vimo via na alulula mu muono ueni ni? (Visa. 119:112) Vuno na putuka ku lekako vavusoko na vavusamba viuma via na ku lilongesa ni? (Visa. 9:1) Kaha ca seho ya kama, vuno a tonda ku pua Mukaleho ua Yehova ni? (Visa. 40:8) Nga ndongesi kesi na ku linga na vimo viahi ku tuala ha vi njila evi vi tua tumbula, kaha na liano, setekenu ku tantekeya omo lia vika, kaha mu nima yaco simutuilenu neni na ngozi, vunoni ca ku hona ku mu ongoloka. *

16. Vika vi hasa ku muesa ntsimbu ya ku likela ku lilongesa na muntu?

¹⁶ Vintsimbu vimo, puenu na ku hilulaho nga mua pande ku tualelelaho ku lilongesa na muntu ni kuahi. Lihulenu nguenu: Vuno ndongesi ke ku liviukisila cilongesa ceni ni? Vuno ka kale na cizango ca ku kunguluka ni? Vuno kasi ua kala na vilinga via ku vihia ni? Vuno kasi ue ku tualelelaho kuya ku vulombelo vua makuli ni? Nga ndongesi ue ku linga viose evi, kaha ku tualelelaho ku mu longesa, ci na pu ngue ku seteka ku longesa muntu ku tana ni ku puua, vunoni ikeye ka tondele ku zula! Nga ndongesi ka hakele seho ku viuma vie ku lilongesa kaha ke ku alulula muono ueni, uali mu tualelelaho ku longesa?

17. Kuliya na 1 Timoteo 4:16, vika va na pande ku linga valongisi vose va Mbimbiliya?

¹⁷ Tua haka seho ku cipanga cetu ca ku puisa vantu vandongesi, kaha tua tonda ku kuasa vandongesi vetu va Mbimbiliya va kole mu lutsilielo na ku heta ku mbatizimu. Ngeci mukemuo, tu puenu na ku tavesa Mbimbiliya i longese ikeyo. Tu puenu na ku longesa na ndzolela kaha na mutima uose. Tu puenu na ku kaniamesa vandongesi vetu, va likuate vusamba vua kama na vamuanetu mu cikungulukilo. Kaha tu puenu na ku ntsidika ha vutumbe vua ku lihana na mbatizimu na ku hilula ku kola ca ndongesi mu lutsilielo. (Talenu cikasa “ Vi va Tondeka ku Linga Valongisi mu ku Kuasa Vandongesi Vavo va Hete ku Mbatizimu.”) Tue ku viukilila omo lia civezikiso ca ku kala na mutamba mu cipanga eci ca ku ovola miono! Ngeci mukemuo, tu lihakelenu kapandi ka ku kuasa vandongesi vetu va Mbimbiliya va kole mu lutsilielo na ku heta ku mbatizimu.