TAMACHTILIS 42
Keniuj uelis tikpaleuiskej akin tikmachtiaj maj moaui (ojpatika taxelol)
“Nochipa xikita ox kuali timonejnemiltijtok uan ox kuali titamachtijtok” (1 TIM. 4:16, TNM).
NEKUIKATIL 77 Tanex itech taltikpak kampa tayouayan
TEIN MOITAS *
1. ¿Keniuj tikmatij ke tanojnotsalis se tekit tein kinpaleuia taltikpakneminij maj makisakan?
TANOJNOTSALIS se tekit tein kinpaleuia taltikpakneminij maj makisakan. ¿Keniuj tikmatij? Itech Mateo 28:19, 20, Jesús tanauatij: “Xiyakan [...] uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan”. Uan tikmatij ke se moauis semi moneki. Komo tiknekij timakisaskej, moneki timoauiskej. Akin kineki moauis moneki takuaujtamatis ke sayoj uelis makisas porin Jesús toka momikilij uan oksepa nemik. Yejua ika, tatitanil Pedro kiniluij tokniuan: “Techmakixtij ya [...] ne taauilis”. Uan no kijtoj: “Porin tejuan titakuautamatij ya ke Cristo pankisak yoltok intsalan in animajme [oso mikemej]” (1 Ped. 3:21). Nejin kinextia ke keman se taltikpaknenkej moauia, uelis kichias nemis nochipaya.
2. Kemej kijtoua 2 Timoteo 2:24, ¿keniuj moneki titamachtiskej?
2 Moneki timochiuaskej kuali tamachtianij uan ijkon uelis tikinpaleuiskej akin tikinmachtiaj maj mochiuakan itatojtokakauan Cristo (xikonixtajtolti 2 Timoteo 2:24). ¿Keyej? Porin Jesús technauatij: “Xiyakan [...] uan xikinnextilikan nochi in taltikpakuani ma yejuan no ma mochiuakan nomomachtijkauan. [...] Uan xikinmachtikan”. Tatitanil Pablo kiluij Timoteo maj kisentokani kichiuani nejon tekit, uan no kiluij: “Ijkon timomakixtis tejua uan no akin mitskakiskej”. Yejua ika kiyolmajxitij: “Nochipa xikita [...] ox kuali titamachtijtok” (1 Tim. 4:16, TNM). Yejua ika tiknekij kuali titamachtiskej, porin ijkon uelis tikinpaleuiskej oksekin maj mochiuakan itatojtokakauan Cristo.
3. ¿Toni tikitaskej itech nejin tamachtilis?
3 Nochi semanas tikinmachtiaj ika Biblia millones taltikpakneminij. Sayoj ke kemej tikitakej itech tamachtilis 41, tiknekij tikmatiskej keniuj tikinpaleuiskej miakejok akin momachtijtokej Biblia maj moauikan. Itech nejin tamachtilis, tikitaskej makuil taman tein moneki tikchiuaskej uan ijkon uelis tikinpaleuiskej akin tikinmachtiaj maj moauikan.
MAJ NOCHIPA TIKUIKAN BIBLIA KEMAN TITAMACHTIAJ
Maj tikiluikan se tokniuj akin miakejya kinmachtiani maj techyolmajxiti toni techpaleuis maj okachi tikuikan Biblia keman titamachtiaj. (Xikonita párrafos 4 hasta 6). *
4. ¿Keyej keman titamachtiaj moneki timochikauaskej amo tikijtoskej nochi tein timomachtianij? (No xikonita nota).
4 Tinochin tikuelitaj tikinmachtiskej oksekin tein kijtoua iTajtol Dios. Yejua ika xa tiknekiskej tikiniluiskej nochi tein timomachtianij. Sayoj ke, komo tikixyekanaj Nemachtil ika amaix Tanejmachtijkej, Nemachtil ika Biblia itech nechikol oso tikchiuaj se nemachtil ika Biblia moneki amo semi titajtoskej, ta moneki nochipa titamachtiskej ika Biblia. Yejua ika, keman tikitstoskej se tajkuilol oso se tamachtilis, maj timochikauakan amo tikijtoskej nochi tein timomachtianij (Juan 16:12). * Maj tiknemilikan toni tikmatiaj keman timoauijkej uan toni tikmatij axkan. Xa sayoj tikixmatiaj tamachtilismej tein tayekantokej (Heb. 6:1). Komo miak xiujmej techuikilij tikmatiskej tein axkan tikmatij, maj amo sepasaj tiknekikan tikmachtiskej nochi se taltikpaknenkej.
5. 1) Kemej kijtoua 1 Tesalonicenses 2:13, ¿toni tiknekij maj kiajsikamati akin tikmachtiaj? 2) ¿Keniuj uelis tikpaleuiskej akin tikmachtiaj maj kijto keniuj kiita tein momachtijtok?
5 Tiknekij maj akin tikmachtiaj kiajsikamati ke tein momachtijtok kisa itech iTajtol Dios (xikonixtajtolti 1 Tesalonicenses 2:13). Yejua ika, maj tikyolchikauakan maj kijto keniuj kiita tein momachtijtok. Maj amo nochipa tejuan tikmelauakan tein kijtosnekij tajkuilolmej, ta maj tikiluikan maj yejua techmelauili seki. Maj tikpaleuikan maj kiita keniuj iTajtol Dios no uelis kipaleuis yejua. Maj tikchiuilikan netajtanilmej tein tapaleuiskej maj kijto keniuj kiita tajkuilolmej tein kiixtajtoltia (Luc. 10:25-28). Kemej neskayot, uelis tiktajtaniskej: “¿Tikonita itech nejin tajkuilol se kualneskayot tein kipia Jiova?, ¿keniuj uelis mitsonpaleuis nejin tamachtilis?, ¿keniuj tikonita nejin tein tionmomachtij?” (Prov. 20:5). Amo okachi tayekantok ox kimati miak taman, ta ox kipatiuita uan kichiua tein momachtia.
6. ¿Keyej semi tapaleuis komo tikinyoleuaj tokniuan akin miakejya kinmachtianij maj touan yakan keman titamachtitij ika Biblia?
6 ¿Kemansa tikinyoleuaj tokniuan akin miakejya kinmachtianij maj touan yakan keman titamachtitij ika Biblia? Komo tikyoleuaj semej, maj tiktajtanikan keniuj kiitak kemej titamachtijkej uan ox nochipa tikuikej Biblia. Komo tiknekij okachi kuali titamachtiskej, moneki tiyeskij tiyolyemankej (no xikonita Hechos 18:24-26). No uelis tiktajtaniskej keniuj kiitak akin tikmachtijtokej: ox kiajsikamati tein momachtijtok oso amo. Komo amo tietoskej se oso okachi semanas, uelis tikiluiskej maj yejua kimachtiti. Ijkon, akin tikmachtiaj kisentokas momachtis uan kiitas ke nemachtil ika Biblia semi moneki. Maj amo keman tiknemilikan ke akin tikmachtiaj toaxka uan ke amo akin uelis techixpatas. Tein melauj, tiktemouaj tein okachi kipaleuis uan maj kisentoka okachi kiixmati tein melauak.
MAJ TIKNEXTIKAN KE TIKPATIUITAJ UAN KE TIKNELTOKAJ TEIN TITAMACHTIAJ
Maj tikpaleuikan akin tikmachtiaj maj kiita keniuj uelis kichiuas tein momachtijtok ika ininneskayo okseki tokniuan. (Xikonita párrafos 7 hasta 9). *
7. ¿Toni tapaleuis maj akin tikmachtiaj kineki kimatis okachi?
7 Akin tikmachtiaj moneki kiitas ke tikpatiuitaj uan ke tikneltokaj tein Biblia tamachtia (1 Tes. 1:5). Nejin xa tapaleuis maj kineki kimatis okachi. Xa uelis tiktapouiskej keniuj techpaleuiani tein tamachtia Biblia, uan ijkon kiitas ke no uelis kipaleuis.
8. ¿Keniuj no uelis tikpaleuiskej akin tikmachtiaj ika Biblia, uan keyej moneki tikchiuaskej?
8 Keman iuan timomachtijtoskej akin tikmachtiaj, maj tiktapouikan keniuj seki tokniuan uelik kiixnamikkej ouijkayomej kemej tein yejua kipanotok. Uelis tikyoleuaskej se tokniuj akin ineskayo uelis kipaleuis maj touan youi keman tikmachtitij. No uelis tikuiskej neskayomej tein moajsij itech jw.org kampa kijtoua “ITajtol Dios kipatak ininnemilis”. * Nejon neskayomej kipaleuiskej maj kiita ke tein Biblia tamachtia semi tapaleuia.
9. ¿Keniuj uelis tikyolchikauaskej akin tikmachtiaj maj kintapoui tein momachtijtok ichankauan uan akin kuali iniuan mouika?
9 Komo akin tikmachtiaj kipia inamik uan amo momachtijtok, uelis tikyoleuaskej maj touan momachti. Uan no, maj tikyolchikauakan akin tikmachtiaj maj kintapoui tein momachtijtok ichankauan uan akin kuali iniuan mouika (Juan 1:40-45). Ueliskia tikiluiskej: “¿Keniuj tikinmelauiliskia mochankauan nejin tamachtilis?” oso “¿Katiyejua tajkuilol ika tikmelauiliskia nejin tamachtilis se akin kuali iuan timouika?”. Ijkon uelis tikpaleuijtiaskej maj satepan no tamachti, uan keman uelisya mochiuas tanojnotskej, uelis tanojnotsatiujya iniuan tokniuan itech nechikol. Uelis tiktajtaniskej ox kiixmati se taltikpaknenkej akin kiuelitaskia momachtis Biblia. Komo techiluia ke kemaj, maj niman tiktemokan uan maj tiktajtanikan ox kiuelitaskia kiselis se nemachtil ika Biblia. Maj tiknextilikan video ¿Keniuj mochiua se nemachtil ika Biblia? *
MAJ TIKYOLCHIKAUAKAN MAJ KUALI MOUIKA INIUAN OKSEKI TOKNIUAN
Maj tikyolchikauakan akin tikmachtiaj maj kuali mouika iniuan okseki tokniuan. (Xikonita párrafo 10 uan 11). *
10. Kemej kijtoua 1 Tesalonicenses 2:7, 8, ¿keniuj uelis tikchiuaskej kemej Pablo?
10 Moneki ininka timotekipachoskej akin tikinmachtiaj. Maj tiknemilikan ke yejuan no uelis mochiuaskej itekitikauan Dios (xikonixtajtolti 1 Tesalonicenses 2:7, 8). Ouij kinkisani kinkauaskej akin kuali iniuan mouikayaj uan amo kichiuaskejok tein achto kichiuayaj. Yejua ika, maj tikinpaleuikan maj kuali mouikakan iniuan tokniuan itech nechikol. Komo amo sayoj iniuan tietokej keman tikinmachtiaj, ta no itech okseki tonalmej, tiknextiskej ke tiknekij kuali timouikaskej iniuan. Komo tikinnotsaj, tikintajkuilouiliaj oso kemansa tikintajpalotij tiknextiskej ke ininka timotekipachouaj.
11. ¿Toni tiknekij maj kiajsikan itech nechikol akin momachtijtokej Biblia, uan keyej?
11 Ompa Africa taltikpakneminij kijtouaj: “Nochin akin nemij itech se xolal tapaleuiaj maj kuali moskalti se konetsin”. No ijkon, ueliskia tikijtoskej: “Nochin akin moajsij itech se nechikol tapaleuiaj maj moajsi se yankuik itekitikauj Dios”. Yejua ika, tokniuan akin kuali tamachtiaj kinpaleuiaj akin kinmachtiaj maj kinixmatikan okseki tokniuan akin uelis kinpaleuiskej maj okachi kuali mouikakan iuan Jiova, uan uelis kinyolchikauaskej keman kipiaskej ouijkayomej. Tiknekij maj nochin akin momachtijtokej Biblia kimachilikan ke itech nechikol tikinpatiuitaj uan ke tikinitaj kemej tochankauan. Komo ueli tikinpaleuiaj maj kiuelitakan yetoskej iniuan tokniuan, okachi amo ouij kinkisas kinkauaskej akin kuali iniuan mouikayaj uan amo kinpaleuiaj maj kitasojtakan Jiova (Prov. 13:20). Komo akin iniuan mouikayaj kinixtopeuaj, kimatiskej ke itech inechikol Jiova uelis kinajsiskej akin kuali iniuan mouikaskej (Mar. 10:29, 30; 1 Ped. 4:4).
MAJ IKA TITAJTOKAN KE MONEKI SE MOTEMAKTIS UAN SE MOAUIS
Akin momachtijtok Biblia uan kineki moauis kichiua miak taman tein kipaleuis maj moaui. (Xikonita párrafo 12 uan 13).
12. ¿Keyej keman titamachtiaj moneki ika titajtoskej ke moneki se motemaktis uan se moauis?
12 Maj amo timouikan ika titajtoskej ke moneki se motemaktis uan se moauis. Tein melauj, keman titamachtiaj ika Biblia tiktemouaj tikinpaleuiskej akin tikinmachtiaj maj moauikan uan maj kitekitilikan Jiova. Komo tikinmachtianijya seki metsti uan okachiok komo yajtokejya nechikolmej, moneki kiajsikamatiskej ke tiknekij tikinpaleuiskej maj mochiuakan itaixpantijkauan Jiova.
13. ¿Toni kichiua akin momachtijtok Biblia uan ijkon uelis moauis?
13 Akin momachtijtok Biblia uan kineki moauis, achto kichiua miak taman. Yekinika, kiixmati Jiova uan peua kitasojta, uan iuan takuaujtamati (Juan 3:16; 17:3). Ompa, peua kuali mouika iuan uan no iniuan tokniuan itech nechikol (Heb. 10:24, 25; Sant. 4:8). No kikaua tein amo kuali uan moyolnonotsa oso moyolnemilia (Hech. 3:19). Uan no peua kintapouia oksekin tein kineltoka (2 Cor. 4:13). Satepan, motemaktia iuan Jiova uan moauia (1 Ped. 3:21; 4:2). Nejon tonal nochin semi yolpakij. Keman akin tikmachtiaj kichiujtias tein kipaleuis maj ueli moaui, maj tikiluikan ke kuali tein kichiujtok uan maj tikyolchikauakan maj ijkon kisentoka kichiua.
MAJ TIKITSTIAKAN OX KINEXTIA KE MOAUIS
14. ¿Keniuj uelis tikmatiskej ox se akin tikmachtiaj ika Biblia kineki kitekitilis Jiova?
14 Komo tiknekij tikpaleuiskej akin tikmachtiaj maj motemakti uan maj moaui, moneki amo tiyolijsiuiskej. Sayoj ke no moneki tikitaskej ox yekmelauj kineki kitekitilis Jiova. ¿Mochikaua kitakamatis tein Jesús tanauatij? ¿Oso sayoj momachtia porin kinemilia ke kualtsin maj se kimati tein kijtoua Biblia?
15. ¿Toni kinextia ox moauis akin tikmachtiaj?
15 Maj tikitstiakan ox akin tikmachtiaj kinextia ke moauis. Kemej neskayot, ¿kijtoua ke kitasojta Jiova? ¿Kitataujtia? (Sal. 116:1, 2). ¿Kiuelita kiixtajtoltis Biblia? (Sal. 119:97). ¿Nochipa youi nechikolmej? (Heb. 2:12). ¿Kipatakya seki taman itech inemilis? (Sal. 119:112). ¿Peuakya kintapouia ichankauan uan akin kuali iniuan mouika tein momachtijtok? (Sal. 9:1). Uan tein okachi moneki, ¿kineki mochiuas itaixpantijkauj Jiova? (Sal. 40:8). Komo amo kichiujtok nion se taman, maj tiktemokan tikmatiskej keyej. Keman tikmatiskejya, maj iuan titajtokan uan maj tiktemokan tikpaleuiskej. *
16. ¿Kemanian moneki amo tikmachtiskejok se taltikpaknenkej?
16 No maj tikitstiakan ox moneki tiksentokaskej tikmachtiskej se taltikpaknenkej. Maj timotajtanikan: “¿Achto momachtia tein tikitaskej? ¿Kineki yas nechikolmej? ¿Kikauakya tein amo kuali? ¿Kikauakya taneltokalis tein amo melauak?”. Komo titanankiliaj ke amo uan tiksentokaj tikmachtiaj, kemej yeskia tikmachtijtoskiaj maj ueli moatamota oso ajkui se taltikpaknenkej akin amo kineki mokalakis itech at. Komo akin tikmachtiaj amo kipatiuita tein momachtijtok uan amo kineki mopatas, okachi kuali maj amo tikmachtikanok.
17. Kemej kijtoua 1 Timoteo 4:16, ¿toni moneki tikchiuaskej akin titamachtiaj ika Biblia?
17 Tikitaj ke semi moneki tikinpaleuiskej oksekin maj mochiuakan itekitikauan Dios, uan tiknekij tikinpaleuiskej akin tikinmachtiaj maj moauikan. Yejua ika, maj nochipa tikuikan Biblia keman titamachtiaj uan maj tiknextikan ke tikpatiuitaj uan ke tikneltokaj tein kijtoua. Maj tikyolchikauakan akin tikmachtiaj maj kuali mouika iniuan okseki tokniuan, maj ika titajtokan ke moneki se motemaktis uan se moauis uan maj tikitstiakan ox kinextia ke moauis. (Xikonita recuadro “ Tein moneki kichiuas akin tamachtia ika Biblia”). ¡Semi techyolpaktia titapaleuiskej itech nejin tekit tein kinpaleuia taltikpakneminij maj makisakan! Yejua ika, maj timochikauakan tikinpaleuiskej akin tikinmachtiaj maj moauikan.
NEKUIKATIL 79 Xikinpaleui maj taxikokan
^ párr. 5 Keman titamachtiaj ika Biblia, Jiova techmaka tatiochiualis maj tikinmachtikan taltikpakneminij keniuj kineki maj tanemilikan uan toni kineki maj kichiuakan. Itech nejin tamachtilis tikitaskej okseki tayolmajxitilis tein techpaleuis maj okachi kuali titamachtikan.
^ párr. 4 Xikonita tamachtilis “Amo xikonchiua nejin keman tiontamachtis ika Biblia”, itech amaix Tein timomachtiaj itech nechikol septiembre 2016.
^ párr. 8 Xikontemo TIAKONIMEJ > TEIN KIPANOUANIJ ITAIXPANTIJKAUAN JIOVA.
^ párr. 9 Itech JW Library®, xikontemo MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ párr. 15 Xikonita tamachtilismej “Netasojtalis tein tikpialiaj Jiova techolinis maj timoauikan” uan “¿Uelisya tionmoauis?”, itech amaix Tanejmachtijkej marzo 2020.
^ párr. 77 TEIN NESI ITECH TAIXKOPIMEJ: Tokniuj siuat akin miakejya kinmachtiani kiluia tokniuj siuat akin iuan tamachtito toni uelis kipaleuis maj amo semi tajto keman tamachtia.
^ párr. 79 TEIN NESI ITECH TAIXKOPIMEJ: Itech inemachtil ika Biblia, siuat momachtia keniuj uelis kinextilis inamik okachi netasojtalis. Satepan, kitapouia inamik tein momachtij.
^ párr. 81 TEIN NESI ITECH TAIXKOPIMEJ: Siuat uan inamik yetokej ichan semej tokniuan siuamej akin kiixmatik itech nechikol.
