1. Hana wa tola tawaʼö wa tola möi fangorifi niha halöwö fombaliʼö nifahaʼö?

HALÖWÖ fombaliʼö nifahaʼö nifaluada, tola möi fangorifi niha böʼö! Hana wa tola tawaʼö zimanö? Me ibeʼe Yesu fareta nisura ba Mataiʼo 28:19, 20, imane wangumaʼö, ”Miʼae mibaliʼö nifahaʼögu fefu niha . . . , mibayagö ira idanö.” Tohude sibai wamayagö idanö börö me moguna ifalua daʼö si samösa niha enaʼö tola teʼorifi ia ba iʼokhögö waʼauri si lö aetu. Moguna mamati niha somasi tebayagö idanö wa tola iʼokhögö dötönafö faʼauri si lö aetu börö me no mate Yesu salahida, ba no göi tesusugi ia moroi ba waʼamate. Daʼö mbörö wa imane sinenge sotöi Fetero ba niha Keriso, ’Fombayagö idanö zangorifi yaʼami iadaʼa börö wemaoso Yesu Keriso.’ (1 Fet. 3:21) Börö daʼö, na tebayagö idanö zi samösa niha, no tebeʼe khönia ginötö ba wangokhögö faʼauri si lö aetu.

2. Moloʼö 2 Timoteo 4:1, 2, hewisa zinangeania ita ba wamaʼema famahaʼö?

² Enaʼö tola mofozu ita ba wombaliʼö nifahaʼö, moguna taforege ba wondrouʼö ’faʼatua-tuada’ ba wamahaʼö. (Baso 2 Timoteo 4:1, 2.) Hadia mbörö? Börö me no ifaretakö ita Yesu, imane, ”Miʼae mibaliʼö nifahaʼögu fefu niha . . . . Mifahaʼö ira.” Ifahaʼö ita sinenge sotöi Faulo wa tola ’teʼorifi ita awö zamondrongo yaʼita’ na lö taböhöli ba wamahaʼö niha böʼö. Daʼö mbörö wa imane Faulo, ”Faigi-faigi hewisa ndraʼugö hegöi famahaʼöu.” (1 Tim. 4:16) Börö me moʼamakhaita sibai halöwö fombaliʼö nifahaʼö hegöi famahaʼö, moguna sibai onekhe ita ba wamaʼema famahaʼö Sura Niʼamoniʼö.

3. Hadia nitutunöda ba artikel daʼa?

³ Ba zi sagörö ulidanö, so zuta waʼato niha nifahaʼöda ba Zura Niʼamoniʼö. Hizaʼi, simane si no tatutunö ba artikel silalö, omasi sibai taʼila hewisa lala enaʼö itugu ato niha nifahaʼöda ba Zura Niʼamoniʼö si tebayagö idanö. Ba artikel daʼa, tatutunö lima ngawalö  lala tanö böʼö sinangea ifalua samahaʼö Sura Niʼamoniʼö, enaʼö tola itolo niha nifahaʼönia irege tedou ba wamati ba tebayagö idanö.

4. Na tafahaʼö niha böʼö ba Zura Niʼamoniʼö, hana wa moguna tataha dödöda enaʼö böi talafo oya wehededa? (Faigi göi nisura ba gahe zura.)

⁴ Börö me taʼomasiʼö sibai Daromali Lowalangi nifatunöda ba niha böʼö, tola manö omasi tadunö-dunö fefu zi no taʼila sanandrösa ba daʼö. Hizaʼi, lö moguna taʼoyaʼö wehededa na tadöniaʼö Wamahaʼö Manuriaigö, Famahaʼö Zura Niʼamoniʼö ba Gangowuloa, mazui famahaʼö Zura Niʼamoniʼö nifalua ba nomo. Moguna sibai tahaogö wangogunaʼö Sura Niʼamoniʼö ba wamahaʼö niha böʼö. Börö daʼö, moguna tataha dödöda enaʼö lö tatutunö khönia fefu zi no taʼila sanandrösa ba zi sambua ayati Zura Niʼamoniʼö. * (Yoh. 16:12) Angeragö atö: Me awena öfahaʼö ndraʼugö ba Zura Niʼamoniʼö, ha maʼifu waʼaboto ba dödö niʼokhögömö, tenga simane iadaʼa. Ba ginötö daʼö, tola manö ha dane-dane zindruhu zi no aboto ba dödömö. (Heb. 6:1) Moguna öfahaʼö ndraʼugö ba zi hauga fakhe faʼara irege tola öʼokhögö waʼaboto ba dödö si no öʼila iadaʼa. Börö daʼö, böi samuzaigö wamaʼema famahaʼö ba niha nifahaʼömö ba Zura Niʼamoniʼö.

5. (a) Simane nisura ba 1 Tesalonika 2:13, hadia zomasi ita aboto ba dödö niha nifahaʼöda? (b) Hadia nifaluada enaʼö terou dödö niha nifahaʼöda ba wanutunö hadia manö zi no ifahaʼö yaʼia?

⁵ Omasi ita na aboto ba dödö niha nifahaʼöda wa moroi khö Yehowa wamahaʼö nitemania andrö. (Baso 1 Tesalonika 2:13.) Hadia nifaluada enaʼö tola aboto ba dödönia daʼö? Farou ia ba wanutunö hadia manö zi no ifahaʼö yaʼia. Tola öʼandrö khönia fasakali ba wanutunö geluaha ayati nibasomi. Tolo ia enaʼö aboto ba dödönia wa moguna khönia mene-mene Zura Niʼamoniʼö andrö. Anofu khönia enaʼö tola itutunö hewisa dödönia ba ayati si no ibaso. (Luk. 10:25-28) Duma-dumania, tola ösofu khönia, ”Moroi ba ayati daʼa, hadia mbua-bua Yehowa si tola öfahaʼö yaʼugö?” ”Moloʼö yaʼugö, hadia mbua nitemamö na öʼoʼö mene-mene nisura ba ayati daʼa?” ”Hewisa dödömö ba wamahaʼö sawena tatutunö andre?” (Gamd. 20:5) Törö tödömö wa ohitö dödöda ba wamahaʼö si samösa niha ba Zura Niʼamoniʼö, tenga enaʼö itugu oya waʼaboto ba dödönia. Ohitö dödöda sabölö tohude yaʼia daʼö enaʼö adöni dödönia ba wamahaʼö nitemania, ba ifalua daʼö ba waʼaurinia.

6. Na tadöniaʼö wamahaʼö ba Zura Niʼamoniʼö, hana wa moguna taʼohe awöda zanuriaigö tanö böʼö si no ara mangai halöwö tobali samahaʼö Sura Niʼamoniʼö?

⁶ Na ödöniaʼö wamahaʼö ba Zura Niʼamoniʼö, hadia no irai öʼohe awöu zanuriaigö tanö böʼö, si no ara mangai halöwö tobali samahaʼö Sura Niʼamoniʼö? Tola öʼandrö khönia ba wonehegö hadia  no tefaudu lala wamahaʼö nifaluamö, ba hadia no öʼogunaʼö Zura Niʼamoniʼö ba lala sabölö sökhi. Na omasiʼö tobali samahaʼö sonekhe, moguna öʼokhögö wangide-ngideʼö. (Fatimbaisi Halöwö Zinenge 18:24-26.) Na no aefa mifalua wamahaʼö, sofu khö zanuriaigö andrö hadia no aboto ba dödö niha nifahaʼömö wamahaʼö nitemania. Na tebai ödöniaʼö wamahaʼö ba Zura Niʼamoniʼö ba niha nifahaʼömö ba zi samigu mazui töra, tola göi öʼandrö khönia ba wosalahini yaʼugö. Na öfalua daʼö, lö aetu itema wamahaʼö niha nifahaʼömö, ba tola aboto ba dödönia wa tohude sibai wamahaʼö nitemania. Böi waʼö tödömö wa ”tana khöu” niha nifahaʼömö andrö, ba ha yaʼugö zi tola mamahaʼö yaʼia. Börö me öʼangeragö zoguna ba niha nifahaʼömö, lö fatimba khömö na tenga yaʼugö zondröniaʼö famahaʼö khönia, asala lö aetu itema wamahaʼö sanandrösa ba zindruhu.

7. Hadia zi tola manolo niha nifahaʼömö ba Zura Niʼamoniʼö ba woʼameʼegö tödö famahaʼö nitemania?

⁷ Moguna iʼila niha nifahaʼömö wa terou sibai dödömö ba wamahaʼö sindruhu si so ba Zura Niʼamoniʼö, ba öfaduhusi tödö sibai nösinia. (1 Tes. 1:5) Buania, tola manö itugu iʼameʼegö tödö wamahaʼö nitemania. Na tefaudu, tola göi ötutunö khönia hadia manö mbua nitemamö börö me no öfalua goi-goi Zura Niʼamoniʼö ba waʼaurimö. Tola möi fanolonia daʼö irege aboto ba dödönia wa moguna göi ifalua mene-mene Zura Niʼamoniʼö ba waʼaurinia.

8. Hadia nasa zinangea tafalua ba wanolo niha nifahaʼöda ba Zura Niʼamoniʼö, ba hana wa moguna tafalua daʼö?

⁸ Tola manö so wanandraigö nitaögö niha nifahaʼömö ba Zura Niʼamoniʼö. Ba ginötö ödöniaʼö khönia wamahaʼö ba Zura Niʼamoniʼö, tola ötutunö khönia duma-duma ndra talifusöda si no mofozu ba wanaögö fanandraigö simane daʼö. Tola öʼohe awöu zi samösa dalifusöda ba mbanua niha Keriso si tola tobali duma-duma si sökhi khönia. Mazui, tola öʼalui waö-waö waʼauri si tola mangabölöʼö yaʼia ba seri ”Alkitab Mengubah Kehidupan” si so ba jw.org. * Artikel hegöi video andrö zi tola manolo niha nifahaʼömö irege aboto ba dödönia wa tola ibulöʼö waʼaurinia Sura Niʼamoniʼö.

9. Hewisa lalada ba wamarou dödö niha nifahaʼöda ba Zura Niʼamoniʼö enaʼö itutunö ba niha böʼö hadia zi no ifahaʼö yaʼia?

⁹ Na no mongambatö niha nifahaʼömö ba Zura Niʼamoniʼö, hadia fao göi woʼomonia ba wamalua famahaʼö? Na löʼö, tola ökaoni ia enaʼö fao ia ba wamahaʼö. Baero daʼö, farou dödö niha nifahaʼömö ba Zura Niʼamoniʼö enaʼö itutunö  ba nösi nomonia hegöi khö ndra awönia, hadia zi no ifahaʼö yaʼia. (Yoh. 1:40-45) Tola manofuʼö khönia, ”Moloʼö yaʼugö, hewisa zinangeania wanutunömö famahaʼö andre ba nösi nomomö?” mazui, ”Hadia ayati si tola öforomaʼö khö ndra awömö ba wamaduhuʼö famahaʼö andre?” Na öfalua daʼö, no ötolo niha nifahaʼömö enaʼö tola tobali ia samahaʼö. Ba zi so miföna, na no sinangea ia tobali sanuriaigö si lö mubayagö idanö, tola göi fao ia ba wamalua halöwö fanuriaigö. Tola göi ösofu khönia hadia so zi faʼila khönia somasi mamahaʼö yaʼia ba Zura Niʼamoniʼö. Na so, tola iʼanemaiʼö öfalukhaisi niha daʼö ba ösofu khönia hadia omasi ifahaʼö ia ba Zura Niʼamoniʼö. Futa khönia video Hewisa Halöwö Famahaʼö ba Zura Niʼamoniʼö Nifaluama? *

10. Simane nisura ba 1 Tesalonika 2:7, 8, hewisa zamahaʼö Sura Niʼamoniʼö ba woloʼö duma-duma Waulo?

¹⁰ Moguna iforomaʼö samahaʼö Sura Niʼamoniʼö wa iʼameʼegö tödö niha nifahaʼönia. Moguna öwaʼö tödömö wa no niha sedöna tobali talifusöda ba wamati ia. (Baso 1 Tesalonika 2:7, 8.) Tatu abua khönia ba wondröi ndra si fahuwu khönia ba zilalö, hegöi ba wamalua fombulöʼö enaʼö tola ifosumange Yehowa. Börö daʼö, moguna ötolo ia ba wangalui si fahuwu sindruhu bakha ba mbanua niha Keriso. Baero daʼö, moguna göi tobali ndraʼugö si fahuwu ba niha nifahaʼömö. Duma-dumania, tola öbeʼe ginötöu fariawö khönia ba ginötö tanö böʼö, baero na mifalua wamahaʼö ba Zura Niʼamoniʼö. Tola öforomaʼö wa sindruhu-ndruhu öʼameʼegö tödö ia na ötelefo, öfaʼoheʼö khönia sms, ba möiʼö manörö ba nomonia.

11. Hadia zomasi ita irasoi niha nifahaʼöda ba Zura Niʼamoniʼö, ba hadia mbörö?

¹¹ So sambua gamaedola ba Afrika sangumaʼö, ”Moguna fao fefu niha ba zi sambua banua, ba wangebuaʼö zi samösa iraono.” Tola göi tamane wangumaʼö, ”Moguna fao fefu niha ba mbanua niha Keriso ba wanolo enaʼö tola tobali nifahaʼö zi samösa niha.” Börö daʼö, samösa samahaʼö si sökhi, hasambalö iʼohe niha nifahaʼönia ba Zura Niʼamoniʼö ba wamalukhaisi ndra talifusöda ba mbanua niha Keriso. Na tafalua daʼö, tola fariawö ia ba nono mbanua Lowalangi si tola manolo yaʼia ba wangokhögö fahuwusa saro khö Yehowa ba sangabölöʼö yaʼia na alua khönia gabula dödö. Omasi ita na irasoi wa no tobali ia ösi mbanua niha Keriso ba ahatö ia khö ndra talifusöda ba wamati. Omasi göi ita na adöni dödönia ba waʼafatalifusötada ba wamati safönu faʼomasi. Na irasoi zimane daʼö, itugu aoha khönia ba wamöhöli fariawö ba niha si tebai manolo yaʼia ba wangokhögö fahuwusa khö Yehowa. (Gamd. 13:20) Hewaʼae na lö omasi fariawö  khönia ndra awönia ba zilalö, no aboto ba dödönia wa tola iʼokhögö zindruhu si fahuwu bakha ba organisasi Yehowa.​—Mrk. 10:29, 30; 1 Fet. 4:4.

12. Hadia mbörö wa moguna taʼaseseʼö tafatunö ba niha nifahaʼöda, hawaʼamoguna wolulu faʼauri ba famayagö idanö?

¹² Aseseʼö fatunö ba niha nifahaʼömö ba Zura Niʼamoniʼö, hawaʼamoguna wolulu faʼauri ba famayagö idanö. Böi olifugö hadia gohitö dödömö ba wamahaʼö yaʼia ba Zura Niʼamoniʼö, yaʼia daʼö ba wanolo yaʼia tobali samosumange Yehowa si no tebayagö idanö. Na no ifahaʼö ia ba Zura Niʼamoniʼö ba zi hauga waŵa, ba mendrua manö saʼae na no ibörötaigö möi ia ba gangowuloa, tatu no aboto ba dödönia hadia gohitö dödö wa mufalua khönia wamahaʼö ba Zura Niʼamoniʼö, yaʼia daʼö ba wanolo yaʼia tobali Samaduhuʼö Yehowa.

13. Hadia manö zinangea ifalua niha nifahaʼöda enaʼö tola tebayagö ia idanö?

¹³ So ösa zinangea ifalua niha nifahaʼöda ba Zura Niʼamoniʼö enaʼö tola tebayagö ia idanö. Si oföna, moguna aboto ba dödönia Yehowa, iʼomasiʼö ia, ba mamati ia khönia. (Yoh. 3:16; 17:3) Moguna fahuwu ia khö Yehowa hegöi khö ndra talifusöda ba mbanua niha Keriso. (Heb. 10:24, 25; Yak. 4:8) Aefa daʼö, moguna mangesa ia ba ngawalö zi lö sökhi si no irai ifalua ba lö saʼae ifuli ifalua daʼö. (Hal. 3:19) Moguna göi ifatunö ba niha böʼö, hadia zi no ifaduhusi tödö iadaʼa. (2 Kor. 4:13) Aefa daʼö, moguna ilulu waʼaurinia khö Yehowa ba iforomaʼö daʼö na tebayagö ia idanö. (1 Fet. 3:21; 4:2) Tatu omuso dödöda fefu ba ginötö tebayagö ia idanö! Na iforege niha nifahaʼöda ba Zura Niʼamoniʼö ba wamalua fefu daʼö enaʼö tebayagö ia idanö, moguna asese tasuno ia ba tafarou dödönia.

14. Hadia zinangea ifalua samahaʼö Sura Niʼamoniʼö ba wamareso faʼatedou niha nifahaʼönia?

¹⁴ Moguna taʼokhögö waʼebolo dödö ba wanolo niha nifahaʼöda enaʼö tedou ba wamati, irege tola ilulu waʼaurinia ba tebayagö idanö. Hizaʼi, moguna göi taʼila hadia sindruhu-ndruhu omasi ia tobali samosumange Yehowa. Hadia so dandra-tandra sangoromaʼö wa iforege ba woloʼö oroisa Yesu? Mazui ha börö me so wamahaʼö sadöni dödönia wa ifahaʼö ia ba Zura Niʼamoniʼö?

15. Hadia manö dandra-tandra waʼatedou ba wamati sinangea tafareso ba niha nifahaʼöda?

¹⁵ Aseseʼö fareso hadia waʼatedou niforomaʼö niha nifahaʼömö. Duma-dumania, hadia itutunö nösi dödönia khö Yehowa? Hadia khö Yehowa itandrösaigö wangandrönia? (Zin. 116:1, 2) Hadia  omasi ia wombaso Sura Niʼamoniʼö? (Zin. 119:97) Hadia lö iböhöli weʼamöi ba gangowuloa? (Zin. 22:23) Hadia no iforege ba wombulöʼö lala waʼaurinia? (Zin. 119:112) Hadia no itutunö ba nösi nomonia hegöi khö ndra awönia hadia zi no ifahaʼö yaʼia? (Zin. 9:2) Sabölö tohudenia, hadia omasi ia tobali Samaduhuʼö Yehowa? (Zin. 40:9) Na lö manö mufaluania zi no mututunö andrö, si fao faʼatua-tua tandraigö alui hadia mbörö wa lö mufaluania daʼö, ba böi taha-taha ba wamatunöisi khönia si fao faʼasökhi. *

16. Hadia manö dandra-tandra sangoromaʼö wa moguna taböhöli wamalua famahaʼö ba zi samösa niha?

¹⁶ Aseseʼö fareso hadia moguna ötohugö wamahaʼö ba zi samösa niha. Sofu khöu samösa, ”Hadia lö mufaʼanönia ia fatua lö mabörögö wamahaʼö? Hadia lö omasi ia weʼamöi ba gangowuloa? Hadia lö nasa iböhöli wamalua amuata si lö sökhi? Hadia farahu nasa ia ba agama sofaya? Na yaʼia, tola manö zaya-zaya gölö na ötohugö khönia wamahaʼö. Hulö zameʼe famomaha wolangi ndraʼugö ba niha si lö omasi abasö. Na tenga soroi ba dödönia ba woʼameʼegö tödö famahaʼö si no itema ba lö ifalua wombulöʼö ba waʼaurinia, hadia moguna nasa ötohugö khönia wamahaʼö?

17. Hadia manö zinangea tafalua enaʼö tola taʼoʼö mene-mene si so ba 1 Timoteo 4:16?

¹⁷ Tohude sibai ba wamaigida noro dödö ba wombaliʼö nifahaʼö, ba omasi ita tatolo niha nifahaʼöda ba Zura Niʼamoniʼö enaʼö tedou ba wamati ba tebayagö idanö. Börö daʼö, moguna tahaogö wangogunaʼö Sura Niʼamoniʼö na tafalua wamahaʼö. Moguna tafaʼema wamahaʼö si fao faʼaterou dödö hegöi faʼafaduhu dödö. Moguna göi tatolo niha nifahaʼöda ba Zura Niʼamoniʼö enaʼö tola isöndra zi fahuwu khönia ba mbanua niha Keriso. Baero daʼö, moguna göi asese tafatunö khönia wa moguna sibai wolulu faʼauri ba famayagö idanö, ba moguna tafareso ero inötö hewisa waʼatedounia ba wamati. (Faigi kotak ” Sinangea Ifalua Samahaʼö Sura Niʼamoniʼö ba Wanolo Niha Nifahaʼönia Enaʼö Tedou ba Wamati ba Tebayagö Idanö”.) Omuso sibai dödöda, me tola fao ita ba wamalua halöwö si tola möi fangorifi niha andre! Dataforege ba wanolo niha nifahaʼöda ba Zura Niʼamoniʼö enaʼö tedou ia ba wamati ba tebayagö idanö.