1. Tukaminya tuti ngoko omubírí w’eriyira abigha ni w’erilamya esyongebe?

OMUBÍRÍ w’eriyira abigha ni w’erilamya esyongebe! Tukaminya tuti? Omughulu Yesu ahula ekyalayiro ekiri omo Matayo 28:19, 20, mwabugha ati: “Mugende, muyire abiga . . . , mubatisayebo.” Busanaki ni ky’omughaso eribatisibwa? Ni ky’omughaso eribatisibwa oko bakasondekanaya omulamo. Oyuwanzire eribatisibwa atolere inyikirirya ngoko omulamo akatokekana kundi Yesu mwahola busana netu kandi ngoko mwalubuka. Ekyo kyo kyaleka omukwenda Petero inyabwira Abakristo balikyabo ati: ‘Olubatiso [ni] lama lyenyu . . . busana n’erilubuka lya Yesu Kristo.’ (1 Pet. 3:21) Neryo omwigha akabya abibatisibwa, anganabya n’amaha w’erisyabyaho kera na kera.

2. Ngoko kiri omo 2 Timoteo 4:1, 2 tutolere itwabya bakangirirya abali bati?

² Eriyira abigha, tutolere itwigha “erikangiriryabo . . . ndeke.” (Soma 2 Timoteo 4:1, 2.) Busanaki? Kundi Yesu mwatulayira ati: “Mugende, muyire abiga . . . , mukangirirayebo.” Omukwenda Paulo mwabugha ati muyitsinge omo mubírí oyo, ‘kusangwa mwamakola mutya mwasyayilamya haguma n’abakabahulikirira.’ Kwesi, ekyo kyo kyaleka Paulo inyabugha ati: “Utegaye erikangirirya lyawe.” (1 Tim. 4:16) Kundi erikangirirya lihambene n’eriyira abigha, twanzire erikangirirya lyetu iryuwana kutsibu.

3. Omo mwatsi ono, ni byahi ebyo tukendikaniako ebilebirye erikandirirya abigha b’eBiblia?

³ Mughulu wosi tukakangiriraya amamiliyoni w’abandu ekwenene y’eBiblia. Aliwe ngoko kiri omo mwatsi owalaba, twanzire eriminya ngoko twangawatikya abangyi b’okw’ibo eribya bigha ba Kristo ababatisibwe. Omo mwatsi ono, tukendikania oko bindi  bindu bitano ebyo obuli mukangirirya atolere inyakola eriwatikya omwigha erikula bunya-kirimu erihika okw’ibatisibwa.

4. Busanaki omukangirirya atolere inyabya n’omubere w’eriyikakirya akakangirirya omwigha? (Lebaya n’omwatsi ahikwa.)

⁴ Twanzire emyatsi eyiri omo Kinywa ky’oMungu eyo tukakangiriraya. Neryo ekyo kyanganaleka itwanza erikania binene oko biri mukyo. Aliwe, wamabya iwukasondola Erigha lyʼAkaleberyo kʼOmuteya, Erigha ly’eBiblia ery’Endeko, kutse omwigha w’eBiblia, siwutolere ukakania binene. Eritoka erikolesya ndeke eBiblia, omukangirirya atolere inyabya n’omubere w’eriyikakirya kandi syatolere akakania obuli kindu ekyo asi ekilebirye omulondo mulebe kutse oko mwatsi mulebe w’eBiblia. * (Yoa. 16:12) Lengekanaya oko ebyo wabya wasi oko Biblia omughulu wabatisibawa n’ebyo wasi lino. Omughulu wabatisibawa wanganabya iwabya wasi amakangirirya makulu-makulu masa. (Ebr. 6:1) Wamabibugha myaka mingyi eriminya ebyo wasi lino, neryo siwutolere ukakangirirya omwigha ebindu byosi kughumerera.

5. (a) Ngoko kiri omo 1 Abanya Tesalonika 2:13 ni kyahi ekyo twanzire omwigha wetu inyaminya oko myatsi eyo akigha? (b) Twangahira tuti omo mwigha m’omuhwa w’erikania oko myatsi eyo akigha?

⁵ Twanzire omwigha w’eBiblia inyaminya ngoko ebyo akigha bikalua omo Kinywa ky’oMungu. (Soma 1 Abanya Tesalonika 2:13.) Ekyo twangakikola tuti? Hira omo mwigha m’omuhwa w’erikania oko myatsi eyo akigha. Omo kanya k’erimukumbulira amasako wosi mukigha, mubwire uti naye akukumbulire amasako malebe wa kugho. Watikaya omwigha erilangira ngoko angalolesya Ekinywa ky’oMungu. Mubulaye amabulyo awangaleka iwaminya amalengekania wiwe oko masako awo akasoma. (Luka 10:25-28) Eky’erileberyako, wanganamubulya uti: “Wanamalangira omo risako eri m’omubere mulebe wa Yehova?” “Ekwenene y’eBiblia eyi yangakuwatikya yiti?” “Wangabugha utiki oko byo wamigha ebi?” (Emi. 20:5) Eky’omughaso si y’emyatsi eyo mwigha abiriminya, aliwe eryanza n’erikolesya ebyo abiriminya.

6. Busanaki ni ky’omughaso erighenda n’omutuliri oyuwasi ndeke erikangirirya omughulu tukigha n’omwigha wetu?

⁶ Omughulu ukendiyigha eBiblia n’omundu, ukanaghenda n’abatuliri abasi erikangirirya ndeke? Kyamabya iko kiri kitya, iwanganababulya nga mubakalangira bati emibere yaghu ey’erikangirirya, kandi nga mo  ukanakolesaya ndeke eBiblia. Utolere iwayikehya wamabya iwanzire eryuwania emibere yawu y’erikangirirya. (Linganisaya Emib. 18:24-26.) Enyuma waho, bulaya omutuliri oyo wasi ndeke erikangirirya, omwigha waghu nga mwakanowa ndeke ebyo akigha. Kandi wanganasaba omutuliri oyo erigha n’omwigha wawu wamabya isiwendisyigha naye omo yenga nguma kutse amayenga mangyi. Ekyo ikikendileka omwigha inyabya inyanemwigha kandi inyalangira omughaso w’erigha liwe. Isiwayowa uti oyu ni mwigha “wawu” kandi nga sihali owundi oyuwangamw’ighisya. Kusangwa, wanzire omwigha wawu inyalola embere erigha bingyi oko ekwenene.

7. Ni kyahi ekikendiwatikya omwigha erianza ebyo akigha?

⁷ Omwigha wawu atolere inyalangira omuhwa wawu kandi ngoko wikirirye ekwenene y’eBiblia. (1 Tes. 1:5) Neryo inyangananza kutsibu ebyo akigha. Kyamatokekana, mubwire endundi eyo wabiribana erighendera oko syokanuni sy’eBiblia. Neryo inyakendiminya ngoko eBiblia yiri mw’amenge awanganamuwatikya.

8. Ni kindi kyahi ekyo wangakola eriwatikya omwigha w’eBiblia, kandi busanaki?

⁸ Mukigha, bwira omwigha wawu oko by’erileberyako byabalikyetu ababya bawite ebitsibu ebiri ng’ebiwe kandi babiribikinda. Wanganaghenda na mulikyetu oyo eky’erileberyako kiwe kyanganawatikya omwigha. Kutse wanganabana ebyalolawako ebikahimba ebiri oko jw.org ebibeghere eryasa omo “Ebiblia yikahindula esyongebe.” * Emyatsi ng’eyo n’esyovideo byanganawatikya omwigha wawu erilangira ngoko ni ky’amenge erighendera oko syokanuni sy’eBiblia omo ngebe yiwe.

9. Wangahira uti omo mwigha wawu m’omuhwa w’eribwira abandu b’oko kihanda kiwe n’abanywani biwe oko myatsi eyo akigha?

⁹ Omwigha amabya inyane omo bunyumba, omwanze wiwe naye anemwigha? Amabya isyaligha, mukokaye oko funzo. Hira omo mwigha wawu m’omuhwa w’eribwira abandu b’oko kihanda kiwe n’abanywani biwe oko ebyo akigha. (Yoa. 1:40-45) Uti? Wanganamubulya uti: “Wangabwira uti ab’oko kihanda kyaghu oko kwenene eyi?” Kutse “ni risako lyahi eryo wangakolesya erikanirya omunywani wawu okw’ebi?” Omo nzira eyo, iwukendibya  iwukateghekanaya omwigha wawu eribya mukangirirya. Neryo amakola atya, inyakenditsuka erisangira omw’itulira ng’omutuliri oyutabatisibwe. Wanganabulya omwigha ng’anasi mundu mulebe oyuwanganza erigha eBiblia. Amakubwira omundu mulebe, aho n’aho sondekanaya omundu oyo n’erimubwira oko ndegheka y’erigha eBiblia. Mukanganaye evideo Tukigha n’abandu eBiblia tuti? *

10. Ngoko kiri omo 1 Abanya Tesalonika 2:7, 8 omukangirirya angakwama ati eky’erileberyako kya Paulo?

¹⁰ Abakangirirya batolere ibakangania ngoko batsomene kutsibu abigha babo. Balangirebo ng’abaghala n’abali betu abomo biro ebikasa. (Soma 1 Abanya Tesalonika 2:7, 8.) Sikyolobire okw’ibo erileka abanywani babo abomo kihugho n’erikola esyombinduka esyosi esisabirwe eritoka erikolera Yehova. Tutolere itwabawatikya eribana abanywani b’ekwenene omo ndeko. Ubye munywani w’omwigha wawu omw’isiba nayo butsira omughulu mukigha lisa aliwe n’omo bindi biro. Erimubirikira oko telefone, erimutumira emesaje, kutse erimubungira isikiro ky’erigha kikakanganaya ngoko umutsomene kutsibu.

11. Ni kyahi ekyo twanzire abigha betu ibabana omo ndeko, kandi busanaki?

¹¹ Bakanasimako bati: “Omwana si wa mundu mughuma.” Itwanganabugha tuti: “Omwigha ni w’endeko yosi.” Ky’ekikaleka abakangirirya b’eBiblia abasi bingyi ibawatikya abigha babo eriminya abandi omo ndeko abangabawatikya eriyitunda hakuhi na Yehova. Neryo abigha ibanganabya banywani b’abandu b’oMungu, abanganabawatikya bunya-kirimu kandi abangabasubya mutima omughulu bawite ebitsibu. Twanzire obuli mwigha inyayowa mo w’omo ndeko kandi w’oko kihanda ky’etu ky’obunya-kirimu. Twanzire omwigha inyayitunda hakuhi n’ekihanda kyetu ky’aBakristo abawite olwanzo. Neryo ikikendyoloba okwiye erileka obunywani n’abate bangamuwatikya erianza Yehova. (Emi. 13:20) Abanywani biwe abo bamamughana, inyakendiminya ngoko anganabana abanywani b’ekwenene omo ndeko ya Yehova.​—Mar. 10:29, 30; 1 Pet. 4:4.

12. Busanaki tutolere itwabwira omwigha wetu okw’iyiherera n’eribatisibwa?

¹² Ahate eribisa kanaya oko mughaso w’eriyiherera n’eribatisibwa. Kundi, ekyo tukakwamirira ly’erimuwatikya eribya mwigha oyubatisibwe. Omwigha enyuma sy’erigha omo misi mike kandi kutsibu-tsibu amabya inyabiritsuka  erihindana oko mihindano, atolere inyaminya ngoko ekikaleka inyigha ly’erimuwatikya eritsuka erikolera Yehova ng’omwimiri wiwe.

13. Ni byahi ebyo omwigha atolere erikola erihika okw’ibatisibwa?

¹³ Lyolo-lyolo, omwigha oyutsomene emyatsi anganahika okw’ibatisibwa! Omwigha akaminya eryanza Yehova n’erimwikirirya. (Yoa. 3:16; 17:3) Neryo inyabya munywani wa Yehova n’abalikyetu omo ndeko. (Ebr. 10:24, 25; Yak. 4:8) Erighunzerera, omwigha inyanganaleka emibere mibi n’eriyisubako. (Emib. 3:19) Kandi, erikirirya liwe iryanganaleka inyanza eribwira abandi oko kwenene. (2 Kor. 4:13) Neryo inyanganayiherera oko Yehova n’eribatisibwa. (1 Pet. 3:21; 4:2) Kandi omo kiro ekyo obuli mundu akatsema! Neryo omwigha amaberererya obuli kika, kumbe iwamusima erilua oko mutima n’erimuhira m’omuhwa w’erilola embere.

14. Omukangirirya angalangira ati erikula bunya-kirimu ly’omwigha?

¹⁴ Tutolere itwakangania omutima w’erilindirira tukawatikya omwigha erikula erihika okwiyiherera n’eribatisibwa. Aliwe, tutolere itwaminya ngananzire erikolera Yehova Mungu. Unemulangira ebiminyikalo ebikakanganaya ngoko omwigha anemuyikasa erighendera oko bihano bya Yesu? Kutse ukalangira nganzire eriminya ebyo Biblia yikabugha bisa?

15. Ni byahi ebikendikangania omukangirirya ngoko omwigha anemukula bunya-kirimu?

¹⁵ Mughulu wosi ubye ukalebya erikula ly’omwigha. Eky’erileberyako, akanakanganaya ngananzire Yehova? Akanasaba Yehova? (Esy. 116:1, 2) Akanatsemera erisoma eBiblia? (Esy. 119:97) Anemuhindana mughulu wosi? (Esy. 22:22) Anemukola esyombinduka esikakanganaya ngoko anemukolesya ebyo akigha? (Esy. 119:112) Anabiritsuka eribwira abandu b’oko kihanda kiwe n’abanywani biwe oko myatsi eyo akigha? (Esy. 9:1) Ekikulu kutsibu, ananzire eribya Mwimiri wa Yehova? (Esy. 40:8) Omwigha amabya isyalikola n’ekighuma ky’okw’ebi, omo menge minya ekikaleka, neryo kanaya naye oko mwatsi oyo omo lukogho aliwe burora-rora. *

16. Ni byahi ebyangakangania nga uleke erigha n’omwigha?

¹⁶ Ubye ukayibulya kangyi-kangyi nga  wanganalola embere erigha n’omundu. Yibulaye amabulyo ano: ‘Omwigha akanayiteghekanaya oko funzo? Akanahika oko mihindano? Anabirilekana n’emitsye mibi? Anabirilekana n’ekisomo ky’amabehi?’ Erisubirya lyamabya iyehe, erilola embere erigha naye liri ng’erikangirirya omundu erinaba isyanzire eritsapa! Omwigha amabya isyanzire ebyo akigha kandi isyanzire erikola esyombinduka, busanaki iwalola embere erigha naye?

17. Ngoko kiri omo 1 Timoteo 4:16, ni byahi ebyo abakangirirya bosi b’eBiblia batolere ibakola?

¹⁷ Tukalangira omubírí wetu w’eriyira abigha mo w’omughaso, kandi twanzire eriwatikya abigha betu b’eBiblia erikula bunya-kirimu n’erihika okw’ibatisibwa. Neryo ky’ekikaleka itwakolesya eBiblia erikangirirya n’omuhwa kandi itunikirirye. Tukendihira omo mwigha m’omuhwa w’eriyira abanywani omo ndeko. Kandi tukendihira omuwato okw’iyiherera n’eribatisibwa, n’eribya tukalebya erikula ly’omwigha. (Lebaya akasanduku, “ Ebyo abakangirirya b’eBiblia bangakola eriwatikya abigha bʼeBiblia erikula bunya-kirimu erihika okw’ibatisibwa.”) Tutsemire erisangira omo mubírí w’erilamya esyongebe oyu! Tuyisoghe erikola ekyosi-kyosi eriwatikya abigha b’eBiblia erikula bunya-kirimu erihika okw’ibatisibwa.