NKHANI YOPHUNZILA 42
Mwatingayavyile Maphunzilo a Baibo Kuluta Pasogolo Mpaka Kubatizika—Mbali 2
“Nthawi zonse ukosamala na zaucita koma soti zauphunzisa.”—1 TIM. 4:16.
NYIMBO 77 Kuwala m’Calo ca Mfinzi
ZATI TIPHUNZILE *
1. Kansi tuziŵa tyani kuti nchito yopanga ophunzila yuyavya ŵanthu kuti akapulumuke?
NCHITO yopanga ophunzila yuyavya ŵanthu kuti akapulumuke. Kansi tuziŵa tyani? Yesu pecitwala lamulo yupezeka pa Mateyu 28:19, 20 elaŵila kuti: “Nkhoyani mukapange ophunzila . . . , noŵabatiza.” Ndaŵa yanji ubatizo ni wofunika? Ubatizo ni wofunika kuti tikapulumuke. Munthu ofuna kubatizika ofunika kukhulupilila kuti akapulumuke cifukwa cakuti Yesu etifwila noukishiwa. Niye cifukwa cake mtumwi Petulo euzhya Akhristu ayake kuti: “Ubatizo lomba niye ukupulumusani . . . mwa kuukishiwa kwa Yesu Khristu.” (1 Pet. 3:21) Ngati wophunzila wabatizika, onkhala na ciyembekezo cakuyonkhala na moyo wosasila.
2. Kansi 2 Timoteyo 4:1, 2 yutiyavya tyani seo monga aphunzisi?
2 Kuti tipange ophunzila, tufunika kukulisha “luso yasu yophunzisa.” (Ŵelengani 2 Timoteyo 4:1, 2.) Ndaŵa yanji? Cifukwa cakuti Yesu etilamula kuti: “Nkhoyani mukapange ophunzila . . . , noŵaphunzisa.” Mtumwi Paulo elaŵila kuti tufunika ‘kulimbikila’ pa nchito iyi, ‘cifukwa tikacita izi tikazipulumuse seka koma soti otimvwishila.’ Niye cifukwa cake elaŵila soti kuti: “Ukosamala na . . . zauphunzisa.” (1 Tim. 4:16) Tetyo, pofwana kuti kuphunzisa kukatizhyana na kupanga ophunzila, kaphunzisidwe kasu kofunika kunkhala kaweme.
3. Kansi mu nkhani ino tiphunzile cinji pa nkhani yosogoza maphunzilo a Baibo?
3 Tusogoza maphunzilo a Baibo mamiliyoni pacalo conse. Monga ni mwetephunzilila mu nkhani yapita, tufunika kuziŵa mwatingayavyile ŵanthu anyinji kuti abatizike nonkhala ophunzila a Yesu Khristu. Mu nkhani ino, tiphunzile vinthu viyakine 5 vamene mphunzisi aliyense ofunika kucita kuti ayavye wophunzila kuluta pasogolo nobatizika.
MUKOSEŴENZESHA BAIBO POPHUNZISA
Mukosenga mphunzisi waluso kuti akuyavyeni kuseŵenzesha Baibo mwaluso pophunzisa (Onani ndime 4-6) *
4. Ndaŵa yanji mphunzisi ofunika lini kulaŵilapo ngako ngati osogoza phunzilo ya Baibo? (Onani mau a m’nyansi.)
4 Tukonda zatuphunzisa kufumila m’Mau a Mulungu. Tetyo tingafune kulaŵila zinyinji zatukonda. Olo n’tetyo, ngati tusogoza Phunzilo ya Nsanja ya Mulonda, Phunzilo ya Baibo ya Mpingo olo phunzilo ya Baibo ya pang’anda, tufunika lini kulaŵilapo ngako. Kuti tiseŵenzeshe Baibo mwaluso, tufunika kunkhala wozilesha mwa kupewa kulaŵilapo ngako pa vinthu vatuziŵa vokhuza vesi olo nkhani yamene iyo. * (Yoh. 16:12) Ganizilani vinthu vemwenzoziŵa pemwebatizika koma soti vinthu vamuziŵa lomba. Pemwebatizika, payakine mwemvwisha tyala viphunziso vofunika ngako va m’Baibo. (Aheb. 6:1) Zekutolelani nthawi itali ngako kuti muziŵe vinthu vinyinji vamuziŵa lomba. Tetyo, mufunika lini kuuzhya wophunzila wanu vinthu vonse vamuziŵa pa nthawi imozi.
5. (a) Molingana na 1 Atesalonika 2:13, kansi tufunika kuyavya wophunzila wasu kuti amvwishe cinji? (b) Tingayavye tyani wophunzila kuti akofotokoza vinthu vakuphunzila?
5 Patuphunzisa, tufunika kuyavya wophunzila kuzindikila kuti zakuphunzila zufumila m’Mau a Mulungu. (Ŵelengani 1 Atesalonika 2:13.) Kansi tingacite tyani zamene izi? Tingacite izi mwa kumulimbikisha kuti akofotokoza vinthu vakuphunzila. M’malo mwakuti nthawi zonse mukomufotokozela mfundo za m’Baibo, mungamusenge kuti akufotokozelenkoni. Mufunika kuyavya wophunzila wanu kuona mwamene Mau a Mulungu omukhuzila. Mukonsheni makonsho yamene yangamuyavye kufotokoza mwakuganizila na mwakumvwila pa malemba yawaŵelenga. (Luka 10:25-28) Mwacisanzo, mungamukonshe kuti: “Kansi lemba iyi yakuyavyani tyani kuona imozi ya minkhalidwe ya Yehova?” “Kansi zinthu zamwaphunzila m’Baibo zakuyavyani tyani?” “Kansi mukumvwa tyani na zinthu zamuphunzila?” (Miy. 20:5) Cofunika ngako ni vinthu lini vakuziŵa wophunzila, koma mwakukondela vinthu vakuphunzila noviseŵenzesha.
6. Ndaŵa yanji n’cinthu cofunika kutolako wofalisa waluso pakuyosogoza phunzilo?
6 Pakuyosogoza phunzilo, ko mutolako ofalisa amene ni aphunzisi aluso? Ngati niye zamucita, mungacite luweme kuŵakonsha pavuli pa phunzilo kuti alaŵilepo mwamwasogozela phunzilo koma soti mwamwaseŵenzeshela Malemba. Mufunika kunkhala olicefya ngati mufuna kunkhala mphunzisi waluso. (Linganizhyani na Mac. 18:24-26.) Pavuli pake, mungakonshe wofalisa waluso kuti afotokozepo ngati wophunzila okwanisha kumvwisha zakuphunzila. Nthawi ziyakine mungasenge wofalisa waluso kuti akakusogozelenkoni phunzilo ngati mweo mukacokepo kwa wiki imozi olo kupitililapo. Izi zicitishe kuti phunzilo ikocitika nthawi zonse koma soti ziyavye wophunzila kuona kufunika kophunzila. Tetyo, osankhala na maganizo akuti iyi ni phunzilo “yangu” ndipo paliye aliyense amene angasogoze. Koma cofunika ni kuyavya wophunzila kuti apitilizhye kuphunzila cendi.
ONESHANI KUTI MUKONDA NOKHULUPILILA ZAMUPHUNZISA
Mukouzhyako wophunzila visanzo va akwasu na azilongosi amene ekwanisha kucinja umoyo wao kuti aone kufunika koseŵenzesha zakuphunzila (Onani ndime 7-9) *
7. N’cinji cingayavye wophunzila kuti akosangalala na zinthu zakuphunzila?
7 Wophunzila ofunika kuona kuti mukonda nokhulupilila zayuphunzisa Baibo. (1 Ates. 1:5) Naye niye pati ayambe kukonda nosangalala na zakuphunzila. Ngati pali luweme mungamuuzhye mwamene mfundo za m’Baibo zekupindulishilani. Pavuli pake ayambe kuzindikila kuti Baibo ili na malangizo amene angamupindulishe.
8. N’cinji ciyakine camungacite kuti muyavye wophunzila wanu, ndipo ndaŵa yanji mufunika kucita tetyo?
8 Pamuphunzila, mukouzhyako wophunzila wanu visanzo va akwasu na azilongosi amene ekumanako na mavuto olingana na ŵake ndipo eŵagonjesa. Pakuya kuphunzilo, mungatoleko wofalisa muyakine mumpingo wamene cisanzo cake cingankhale coyavya kuli wophunzila wanu. Olo mungapeze visanzo volimbikisha pa jw.org pa mbali yakuti “Baibo Yucinja Umoyo wa Ŵanthu.” * Nkhani zamene izi na mavidyo zingayavye wophunzila kuona kufunika koseŵenzesha mfundo za m’Baibo mu umoyo wake.
9. Kansi mungalimbikishe tyani wophunzila wanu kuti akouzhyako abanja ŵake na ayake zakuphunzila?
9 Ngati wamuphunzila naye ali pa banja, ko muyake naye ophunzila Baibo? Ngati ophunzila lini, mungamusenge kuti akopezekapo pa phunzilo. Limbikishani wophunzila wanu kuti akouzhyako abanja ŵake na ayake zakuphunzila. (Yoh. 1:40-45) Motyani? Mungamukonshe kuti: “Kansi mfundo iyi mungaifotokoze tyani kuli a banja ŵanu?” olo “Kansi mungaseŵenzeshe lemba yanji pofuna kusimikizhyila mfundo iyi kuli muyanu?” Mukacita izi, muyavye wophunzila wanu kunkhala mphunzisi. Ngati wakwanisha ziyeneleso angayambe kulalikila monga wofalisa wosabatizika. Mungakonshe wophunzila wanu ngati paliko aliyense waakuziŵa amene angakonde kuphunzila Baibo. Ngati alipo, mungamusenge nthawi yamene iyo kuti muyambe kuphunzila naye. Muonesheni vidyo ya mutu wakuti Kansi n’Cinji Cucitika pa Phunzilo ya Baibolo? *
LIMBIKISHANI WOPHUNZILA KUTI APEZE ASHAMWALI MUMPINGO
Mukolimbikisha wophunzila kupeza ashamwali mumpingo (Onani ndime 10-11) *
10. Molingana na 1 Atesalonika 2:7, 8, kansi mphunzisi angatolele tyani cisanzo ca Paulo?
10 Aphunzisi ofunika kuonesha kuti osamala za ophunzila ŵao. Mukoŵaona kunkhala akwasu na azilongosi ŵanu amsogolo. (Ŵelengani 1 Atesalonika 2:7, 8.) N’cinthu covuta kuti aleke kukatizhyana na ŵanthu akucalo nocinja umoyo ŵao kuti ayambe kutumikila Yehova. Tetyo, mufunika kuŵayavya kuti apeze ashamwali acendi mumpingo. Nkhalani shamwali wake osati tyala pophunzila naye koma mukopeza nthawi yotandala naye pa zocitika ziyakine. Mungamutumile foni, kumulembela meseji olo kumutandalila. Kucita izi kungaoneshe kuti musamala za yove.
11. Kansi tufunika kuyavya ŵanthu ŵatuphunzila nao kuti apeze cinji mumpingo, ndipo ndaŵa yanji?
11 Pali mwambi uyakine ulaŵila kuti: “Aliyense m’munzi oyavya kuti mwana akule.” Tetyo, tingalaŵile kuti, “Zudalila mpingo wonse kuti munthu ankhale wophunzila wa Khristu.” Niye cifukwa cake aphunzisi aluso oziŵikisha wophunzila wao kuli ayakine mumpingo, amene angamuyavye kuvwendela pafupi na Yehova. Ŵanthu ŵatuphunzila nao angasangalale ngati okatizhyana na akwasu na azilongosi. Akwasu na azilongosi amene aŵa, angaŵayavye kunkhala ashamwali a Yehova noŵalimbikisha akakumana na mavuto. Tufuna kuti wophunzila aliyense akokumvwa kuti ali mbali ya mpingo, yamene ni banja yauzimu. Tufuna soti kuti wophunzila wasu akokonda akwasu na azilongosi. Ngati tucita izi, tingamuyavye kuti aleke kukatizhyana na ŵanthu akucalo. (Miy. 13:20) Ngati ayake akucalo ayamba kumupewa, angapeze ayake acendi m’gulu ya Yehova.—Mko 10:29, 30; 1 Pet. 4:4.
MUKOGOGOMEZELA NGAKO PA NKHANI YOZITWALA NA KUBATIZIKA
Patontho-patontho wophunzila Baibo angayenelele kubatizika (Onani ndime 12-13)
12. Ndaŵa yanji tufunika kulaŵila mosapita m’mbali za kuzitwala nobatizika na wophunzila wasu?
12 Mukomuuzhya mosapita m’mbali kufunika kozitwala kwa Yehova nobatizika. Cifukwa cikulu catuphunzisila munthu, n’cakuti timuyavye kuyamba kutumikila Yehova nobatizika. Pavuli pophunzila Baibo kwa miyezi itontho, ndipo wayamba kupezeka pa misonkhano, wophunzila wasu ofunika kuzindikila kuti colinga catuphunzilila ni kufuna kumuyavya kuti ayambe kutumikila Yehova nonkhala Mboni ya Yehova.
13. Ni masitepu otyani yakufunika kutola wophunzila kuti abatizike?
13 Pali vinthu vinyinji vakufunika kucita wophunzila Baibo kuti afwike pobatizika. Coyamba, ofunika kuziŵa Yehova, kumukonda nomukhulupilila. (Yoh. 3:16; 17:3) Wophunzila ofunika soti kunkhala pa ushamwali na Yehova na akwasu na azilongosi mumpingo. (Aheb. 10:24, 25; Yak. 4:8) Ciyakine, wophunzila ofunika kumvwa cisoni na kulapa macimo ŵake. (Mac. 3:19) M’kuluta kwa nthawi cikhulupililo cake cingamusonkhezele kuyamba kuuzhyako ayakine cendi. (2 Akor. 4:13) Cosilizhyila, yove ozitwala kwa Yehova nobatizika. (1 Pet. 3:21; 4:2) Iyi yunkhala siku yosangalasha ngako kuli aliyense. Ngati wophunzila ocita zakufunikila kucita kuti abatizike, tufunika kumuyamikila nomulimbikisha kuti apitilizhye kupita pasogolo.
NTHAWI NA NTHAWI MUKOONA NGATI WOPHUNZILA WANU OPITA PASOGOLO
14. Kansi mphunzisi angaziŵe tyani ngati wophunzila opita pasogolo?
14 Tufunika kunkhala oleza mtima poyavya ophunzila Baibo kuti azitwale nobatizika. Koma nthawi ziyakine, tufunika soti kuona ngati ali na cifuno cotumikila Yehova Mulungu. Kansi wophunzila oonesha kuti oyesayesa kumvwila malamulo a Yesu? Olo osangalala tyala na zakuphunzila m’Baibo?
15. Kansi mphunzisi ofunika kuona zinthu zotyani zamene zingaoneshe kuti wophunzila ni wokonzeka kubatizika?
15 Nthawi zonse mukoona ngati wophunzila opita pasogolo nocinja mbali ziyakine mu umoyo wake. Mwacisanzo, kansi oonesha kuti okonda Yehova? Kansi okwanisha kupemphela kwa Yehova? (Sal. 116:1, 2) Kansi osangalala na kuŵelenga Baibo? (Sal. 119:97) Ko opezeka pa misonkhano nthawi zonse? (Sal. 22:22) Kansi pali zawacinjako mu umoyo wake zoonesha kuti oseŵenzesha zakuphunzila? (Sal. 119:112) Ko eyamba kuuzhyako abanja ŵake na ayake zakuphunzila? (Sal. 9:1) Kansi ni wofunishisha kunkhala wa mboni za Yehova? (Sal. 40:8) Ngati wophunzila ocitako lini olo cimozi pa mbali izi, mosamala mungafunike kuziŵa cupangisha ndipo mungalaŵizhyane naye mwaubwenzi koma soti mosapita m’mbali. *
16. N’cinji cingacitishe kuti tileke kuphunzila Baibo na munthu?
16 Nthawi na nthawi mukoona ngati mufunika kupitilizhya kuphunzila na munthu. Mungazikonshe kuti: ‘Kansi okangiwa kukonzekela phunzilo? Kansi ofuna lini kupezeka pa misonkhano? Kansi akali na minkhalidwe iipa? Ko akali membala wa cipembezo cawenye?’ Ngati yankho ni yakuti eee, niye kuti kupitilizhya kuphunzila naye kuli monga ni kuphunzisa munthu kunyaya wamene ofuna lini kunana. Ngati wophunzila oyamikila lini zakuphunzila ndipo ocinja lini, pangankhale luweme kuleka kuphunzila naye.
17. Molingana na 1 Timoteyo 4:16, kansi aphunzisi onse a Baibo ofunika kucitanji?
17 Tuona kuti nchito yopanga ophunzila ni yofunika ngako, ndipo tufunishisha kuyavya ophunzila ŵasu kuti apite pasogolo nobatizika. Niye cifukwa cake tipitilizhye kuseŵenzesha Baibo pophunzisa noonesha kuti tukonda nokhulupilila zatuphunzisa. Tikolimbikisha wophunzila kupeza ashamwali mumpingo. Tikogogomezela ngako pa nkhani yozitwala na kubatizika, ndipo nthawi na nthawi tikoona ngati wophunzila wasu opita pasogolo. (Onani bokosi yamutu wakuti “ Zakufunika Kucita Aphunzisi Kuti Ayavye Ophunzila Kubatizika.”) Nise osangalala kuti tutolako mbali pa nchito yopulumusa ŵanthu. Nise osimikizhya kucita zilizonse zatingakwanishe kuti tiyavye ophunzila Baibo kuti abatizike.
NYIMBO 79 Aphunziseni Kunkhala Otang’a Mtima
^ par. 5 Patusogoza maphunzilo a Baibo, tunkhala na mwai woyavya ŵanthu kuyamba kuganiza na kucita vinthu m’njila ingakondweleshe Yehova. Nkhani ino ifotokoze mfundo zoyangizhyilika zokhuza mwatingakulishile maluso ŵasu pophunzisa.
^ par. 4 Onani nkhani yakuti “Zinthu Zatuwamila Kupewa Posogoza Phunzilo ya Baibo” mu Kabuku ka Misonkhano ya Umoyo na Utumiki ka September 2016.
^ par. 8 M’Chichewa lutani polemba kuti ZOKHUDZA IFEYO > ZOCHITIKA PA MOYO WA A MBONI ZA YEHOVA.
^ par. 9 Pa JW Library®, m’Cinyanja lutani polemba kuti MEDIA > OUR MEETINGS AND MINISTRY > TOOLS FOR THE MINISTRY.
^ par. 15 Onani nkhani yophunzila yakuti “Kukonda Yehova na Kumuyamikila Kungakusonkhezeleni Kuti Mubatizike” na yakuti “Kansi Nimwe Okonzeka Kubatizika?” mu Nsanja ya Mulonda ya March 2020.
^ par. 77 MAU OFOTOKOZA VITHUNZITHUNZI: Pavuli pa phunzilo ya Baibo, kalongosi wa luso oyavya kalongosi enzosogoza phunzilo kuti ofunika kupewa kulaŵilapo ngako pophunzisa.
^ par. 79 MAU OFOTOKOZA VITHUNZITHUNZI: Pa phunzilo, wophunzila waphunzila mwaangankhalile mkazi wabwino. Pavuli pake ouzhyako mulume wake zaaphunzila.
^ par. 81 MAU OFOTOKOZA VITHUNZITHUNZI: Wophunzila na mulume wake osangalala pakutandala ku ng’anda kwa m’mozi mwa ashamwali ŵecikumana nao ku Ng’anda ya Ufumu.
