1. Re tseba bjang gore modiro wa go dira batho barutiwa ke wa go phološa maphelo?

MODIRO wa go dira batho barutiwa ke wa go phološa maphelo! Re tseba seo bjang? Ge Jesu a be a nea taelo yeo e lego go Mateo 28:19, 20, o ile a re: ‘Eyang le dire batho barutiwa, le ba kolobetše.’ Re tseba bjang gore go kolobetšwa go bohlokwa? Gore motho a tle a phele ka mo go sa felago, o swanetše gore a kolobetšwe. Motho yo a nyakago go kolobetšwa o swanetše go dumela gore go a kgonega gore re tle re phele ka mo go sa felego feela ka gobane Jesu Kriste a ile a re hwela gomme Modimo a tla a mo tsoša. Ke ka baka leo moapostola Petro a ilego a botša Bakristegotee le yena gore: ‘Kolobetšo e a le phološa ka tsogo ya Jesu Kriste.’ (1 Pet. 3:21) Ka gona ge motho a kolobetšwa le yena o ba le kholofelo ya go tlo phela ka mo go sa felego.

2. Lengwalo la Timotheo wa Bobedi 4:1, 2 le re re swanetše go ruta bjang?

² Gore re dire barutiwa, re swanetše go ba le “bokgoni bja go ruta.” (Bala 2 Timotheo 4:1, 2.) Ke ka baka la’ng re swanetše go ba le bokgoni bja go ruta? Ka gobane Jesu o re laetše gore: ‘Eyang le dire barutiwa, le ba rute.’ Moapostola Paulo o ile a re go Timotheo: “O . . . hlokomele le go ruta ga gago. Dula dilong tše, gobane ka go dira se o tla iphološa wa ba wa phološa bao ba go theetšago.” (1 Tim. 4:16) Le rena lehono re swanetše go diriša keletšo ye. Ka ge modiro wa rena e le go dira batho barutiwa, re swanetše go kgona go ruta.

3. Sehlogong se re tlo ithuta’ng ka go swara dithuto tša Beibele?

³ Re ithuta le batho ba bantši kudu ditherešo tšeo di hwetšwago ka Beibeleng. Eupša bjale ka ge sehlogo se se fetilego se boletše, re nyaka go thuša barutwana ba bangwe gape ba Beibele gore le bona ba kolobetšwe. Mo sehlogong se re tlo ithuta ka dilo  tše dingwe tše hlano tšeo motho yo mongwe le yo mongwe yoo a swarago thuto ya Beibele a swanetše go di dira gore a thuše morutwana go dira tšwelopele gore mafelelong a kolobetšwe.

4. Ke ka baka la’ng motho yo a swerego thuto ya Beibele a se a swanela go bolela dilo tše dintši? (Bona le mongwalo wa tlase.)

⁴ Re rata seo re se rutago batho go tšwa ka Lentšung la Modimo. Seo se ka dira gore re nyake go bolela dilo tše dintši ge re ruta. Eupša ge e ba motho a swere Thuto ya Morokami, Thuto ya Beibele ya Phuthego goba thuto ya Beibele le motho yo a itšego, ga se a swanela go bolela dilo tše dintši. Gore re kgone go diriša Beibele gabotse ge re ruta, re swanetše gore re hlokomele re se ke ra bolela dilo tše dintši kudu le go leka go hlalosa dilo ka moka tšeo re di tsebago ka temana e itšego goba ka seo re boledišanago ka sona. * (Joh. 16:12) Nagana ka dilo tšeo o bego o di tseba ka Beibele ge o be o kolobetšwa le ka tšeo o di tsebago gona bjale. Ge o be o kolobetšwa, o be o kwešiša feela dilo tše bohlokwa tšeo Beibele e di rutago. (Baheb. 6:1) Go go tšere mengwaga e mentši go ithuta seo o se tsebago lehono, ka mo go swanago o se ke wa imetša morutwana ka go mo ruta dilo tše dintši ka nako e tee.

5. (a) Go ya ka Bathesalonika ba Pele 2:13, re nyaka gore motho yo re ithutago le yena Beibele a kwešiše eng? (b) Re ka kgothaletša bjang morutwana go bolela ka seo a ithutago sona?

⁵ Re nyaka gore bao re ithutago le bona Beibele ba kwešiše gore seo ba ithutago sona se tšwa ka Beibeleng, ga se tšwe go rena. (Bala 1 Bathesalonika 2:13.) Re ka dira seo bjang? Kgothaletša morutwana go bolela ka dilo tšeo a ithutago tšona. Go e na le gore e be wena ka mehla o hlalosago ditemana tša Beibele, mo kgopele gore e be yena a go hlalosetšago tše dingwe tša tšona. Thuša morutwana go bona gore a ka diriša bjang Lentšu la Modimo bophelong bja gagwe. Mmotšiše dipotšišo tšeo di tlago go mo thuša go bolela gore o ikwa bjang goba o nagana eng ka lengwalo leo le le badilego. (Luka 10:25-28) Ka mohlala, mmotšiše gore: “Lengwalo le le go thušitše bjang go bona se sengwe sa dika tša Jehofa?” “Dilo tšeo o sa tšwago go ithuta tšona ka Beibeleng di ka go thuša bjang?” “O ikwa bjang ka dilo tšeo o sa tšwago go ithuta tšona?” (Die. 20:5) Selo sa bohlokwa ga se gore morutwana o tseba dilo tše dintši gakaakang, eupša ke gore o rata seo a ithutago sona le go se diriša.

6. Ke ka baka la’ng go le bohlokwa gore ka dinako tše dingwe ge o eya go swara thuto o ye le mogoeledi yoo a nago le phihlelo?

⁶ Na ka dinako tše dingwe ge o eya go swara thuto ya Beibele o ya le bagoeledi bao ba nago le phihlelo? Ge e ba o dira bjalo, o ka ba botšiša  gore ba nagana eng ka tsela yeo o swarago thuto ka yona. E bile o ka ba botšiša ge e ba o diriša Beibele gabotse. O swanetše go ba le boikokobetšo ge e ba o nyaka go ba le bokgoni bja go ruta. (Bapiša le Ditiro 18:24-26.) Ka morago ga thuto, botšiša mogoeledi yoo ge e ba a bona eka morutwana a kwešiša seo a ithutago sona. O ka kgopela mogoeledi yoo gore a go swarele thuto ge e ba o ka se be gona dibekenyana. Se se tla dira gore thuto e se ke ya emišwa e bile sa bontšha le morutwana gore go ithuta go bohlokwa. O se ke wa tsoga o naganne gore ye ke thuto ya gago o nnoši, ga go na motho yo a ka go thušago ka yona. Ge o ithuta le motho Beibele, o nyaka go dira dilo tšeo di tlago go mo hola gore a tšwele pele a ithuta therešo.

7. Ke’ng seo se ka thušago morutwana go rata seo a ithutago sona?

⁷ Morutwana o swanetše go bona gore o rata le go dumela seo Beibele e se rutago. (1 Bathes. 1:5) Se se tla mo thuša gore le yena a rate seo a ithutago sona. Ge e ba go kgonega, o ka mmotša kamoo Beibele e go thušitšego ka gona. Le yena a ka thoma go bona gore Beibele e ka kgona go mo thuša.

8. Ke’ng se sengwe gape seo o ka se dirago go thuša motho yoo o ithutago le yena, gona ke ka baka la’ng o dira seo?

⁸ Ge le dutše le ithuta, botša motho yoo ka bana babo rena le dikgaetšedi bao ba kilego ba ba le mathata a go swana le a gagwe le gore ba a fentše bjang. Ge o yo swara thuto, o ka sepela le yo mongwe ka mo phuthegong yoo mohlala wa gagwe o ka thušago morutwana. Goba o ka mmontšha diphihlelo tšeo di kgomago pelo tšeo di lego go jw.org/nso dihlogong tšeo di rego “Beibele e Fetoša Maphelo.” * Diphihlelo tše bjalo le dibidio di ka thuša morutwana go bona gore Beibele e ka mo thuša go dira diphetogo.

9. O ka kgothaletša bjang morutwana go botša ba gabo le bagwera ba gagwe ka seo a ithutago sona?

⁹ Ge e ba motho yo o ithutago le yena a nyetše goba a nyetšwe, na molekane wa gagwe le yena o a ithuta? Ge e ba go se bjalo, kgopela molekane yoo gore a be gona ge le ithuta. Kgothaletša motho yo o ithutago le yena gore a botše ba gabo le bagwera ba gagwe ka seo a ithutago sona. (Joh. 1:40-45) O ka dira seo bjang? O ka thoma ka go mmotšiša gore: “O ka hlalosetša bjang motho wa geno ka seo re sa tšwago go ithuta sona?” goba “O ka diriša lengwalo lefe  go bontšha mogwera wa gago gore taba yeo o mmotšago yona ke therešo?” Ge o dira bjalo o tla be o thuša morutwana gore le yena a tle a kgone go ruta ba bangwe. Mafelelong ge a swanelega, a ka thoma go tšwa le phuthego ge e eya tšhemong. O ka botšiša motho yo o ithutago le yena ge e ba a tseba yo mongwe gape yo a ka nyakago go ithuta Beibele. Ge e ba a le gona, mohlomongwe motho yo o ithutago le yena a ka rulaganya gore o yo bontšha motho yoo bidio yeo e rego Ke Eng Seo se Diregago Thutong ya Beibele? *

10. Go ya ka Bathesalonika ba Pele 2:7, 8, o ka ekiša mohlala wa Paulo bjang?

¹⁰ Ge re ithuta le batho Beibele, re swanetše go ba bontšha gore re na le taba le bona. Go ka direga gore le bona e tle e be bana babo rena le dikgaetšedi ka mo phuthegong. (Bala 1 Bathesalonika 2:7, 8.) Ga go bonolo gore ba tlogele bagwera ba bona ka moka ke moka ba dire diphetogo tšeo di hlokegago gore ba hlankele Jehofa. Re swanetše go ba thuša gore ba hwetše bagwera ba kgonthe ka mo phuthegong. Eba mogwera go motho yo o ithutago le yena ka go ba le yena ka dinako tše dingwe, e sego feela ge le ithuta. Go mo founela, go mo romela molaetša goba go no feta o mmona go tlo mmontšha gore o tloga o na le taba le yena.

11. Re nyaka gore bao re ithutago le bona ba hwetše eng ka mo phuthegong, gona ka baka la’ng?

¹¹ Go na le polelwana yeo e rego batho ka moka mo setšhabeng ba ka thuša go godiša ngwana. Rena re ka re, phuthego ka moka e ka thuša morutwana gore a fetoge Hlatse ya Jehofa. Ke ka baka leo bagoeledi bao ba nago le bokgoni ba thušago bao ba ithutago le bona gore ba tlwaelane le ba bangwe ka phuthegong. Batho bao ba ka ba thuša gore ba be le segwera se sebotse le Jehofa. Se se tla thuša barutwana gore ba thabele segwera le bana babo rena le dikgaetšedi, e bile bana babo bao ba tlo ba thekga ge ba na le mathata. Re nyaka gore morutwana yo mongwe le yo mongwe a ikwe e le karolo ya phuthego e bile e le karolo ya lapa la Jehofa. Le gona re nyaka gore a rate bana babo rena le dikgaetšedi ka phuthegong. Se se tla dira gore go be bonolo gore a tlogele go gwerana le batho bao ba ka se mo thušego go rata Jehofa. (Die. 13:20) Ge batho bao e bego e le bagwera ba gagwe ba se sa nyaka go gwerana le yena, o tla tseba gore a ka hwetša bagwera ba kgonthe ka phuthegong.—Mar. 10:29, 30; 1 Pet. 4:4.

12. Ke ka baka la’ng re swanetše go bolela ka boineelo go Modimo le ka kolobetšo le motho yo re ithutago le yena?

¹² O swanetše go fela o bolela gore go  bohlokwa gore motho a ineele go Jehofa le go kolobetšwa. Lebaka la gore re ithute le motho ke gore mafelelong re mo thuše gore a hlankele Jehofa le go kolobetšwa. Ge morutwana a na le dikgwedi tše mmalwa a ithuta e bile a thomile go tla dibokeng, o swanetše go tseba gore re nyaka go mo thuša gore e be Hlatse ya Jehofa.

13. Morutwana o swanetše go dira dilo dife gore mafelelong a kgone go kolobetšwa?

¹³ Go na le dilo tše mmalwa tšeo morutwana yo a nyakago go kolobetšwa a swanetšego go di dira. O swanetše go thoma ka go tseba Jehofa, go mo rata le go ba le tumelo go yena. (Joh. 3:16; 17:3) Ke moka o ba le segwera le Jehofa e bile o gwerana le bana babo rena le dikgaetšedi ka phuthegong. (Baheb. 10:24, 25; Jak. 4:8) Mafelelong o a itshola ke moka a tlogela dilo ka moka tše mpe tšeo a bego a di dira. (Dit. 3:19) Morutwana yoo o botša ba bangwe seo ga bjale a se dumelago. (2 Bakor. 4:13) Ke moka o bontšha boineelo go Jehofa ka go kolobetšwa. (1 Pet. 3:21; 4:2) Ka letšatši leo a kolobetšwago ka lona phuthego ka moka e tlo thaba. Ge morutwana a dira dilo tšeo a swanetšego go di dira gore mafelelong a kgone go kolobetšwa, o swanetše go mo reta e bile o mo kgothaletše gore a se ke a tlogela go dira dilo tšeo.

14. Mogoeledi a ka dira’ng go bona ge e ba morutwana a dira tšwelopele?

¹⁴ Re swanetše gore re se ke ra fela pelo ge re thuša motho yo re ithutago le yena gore mafelelong a ineele go Jehofa gomme a kolobetšwe. Eupša re swanetše go tseba ge e ba motho yoo a nyaka go hlankela Jehofa. Na morutwana yo o a bontšha gore o leka go dira dilo tšeo Jesu a re laetšego gore re di dire? Goba na o no nyaka feela go ithuta ditaba tše di kgahlišago tša ka Beibeleng?

15. Ke dilo dife tšeo di ka bontšhago mogoeledi gore bjale morutwana a ka kolobetšwa?

¹⁵ Dula o lebelela ge e ba morutwana a dira tšwelopele. Ka mohlala, na o go botša ka tsela yeo a ikwago ka yona ka Jehofa? Na o diriša leina la Jehofa ge a rapela? (Ps. 116:1, 2) Na o thabela go bala Beibele? (Ps. 119:97) Na o tla dibokeng ka mehla? (Ps. 22:22) Na o dirile diphetogo bophelong go bontšha gore o diriša seo a ithutago sona? (Ps. 119:112) Na o botša ba gabo goba bagwera ba gagwe ka seo a ithutago sona? (Ps. 9:1) Potšišo ya bohlokwa ke gore, na yena o nyaka go ba yo mongwe wa Dihlatse tša Jehofa? (Ps. 40:8) Ge e ba motho yoo o ithutago le yena a sa dire tšwelopele dilong ka moka  tšeo re boletšego ka tšona, ka bohlale leka go hwetša gore ke ka baka la eng a sa dire tšwelopele ke moka ka botho le ka go se pepetletše o boledišane le yena ka taba yeo gomme o mo thuše. *

16. Ke neng moo re swanetšego go kgaotša thuto?

¹⁶ O swanetše go fela o lebelela ge e ba go le bohlokwa go tšwela pele o ithuta le motho yo a itšego. Ipotšiše gore: ‘Na motho yo ga a lokišeletše pele re tlo bala? Na ga a nyake go tla dibokeng? Na o sa dira dilo tšeo Modimo a sa di amogelego? Na o sa tsena kereke e itšego?’ Ge e ba karabo ya gago dipotšišong tše ka moka e le ee, gona go no tšwela pele o ithuta le motho yo bjalo go swana le ge o ruta motho yo a itšego go rutha eupša a sa nyake go koloba! Ge e ba motho yo o ithutago le yena a sa rate seo a ithutago sona e bile a se a ikemišetša go dira diphetogo, gona ga go bohlokwa go tšwela pele o ithuta le yena.

17. Go ya ka Timotheo wa Pele 4:16, bagoeledi ka moka ba swanetše go dira’ng?

¹⁷ Re tšea modiro wa rena wa go dira batho barutiwa o le bohlokwa, e bile re nyaka go thuša batho bao re ithutago le bona gore ba dire tšwelopele gomme mafelelong ba kolobetšwe. Ke ka baka leo re dirišago Beibele ge re ruta, le gona re rata le go dumela seo re se rutago ba bangwe. Re kgothaletša bao re ithutago le bona go ba le bagwera ka phuthegong. Re dula re bolela le bona ka bohlokwa bja go ineela go Modimo le go kolobetšwa e bile re lebelela ge e ba ba dira tšwelopele. (Bona lepokisi leo le rego, “ Seo Bagoeledi ba Swanetšego go se Dira go Thuša Barutwana Gore Mafelelong ba Kolobetšwe.”) Re thabela go ba le karolo modirong wo wa go phološa maphelo! Ke ka baka leo re dirago sohle seo re ka se kgonago go thuša bao re ithutago le bona gore mafelelong ba kolobetšwe.