1. Haitʼéego nihił béédahózingo yisdáʼiildééh biniyé íhooʼaahii álnéehgo biʼoonish?

HAITʼÉEGO nihił béédahózingo yisdáʼiildééh biniyé íhooʼaahii álnéehgo biʼoonish? Jesus éí Matthew 28:19 dóó 20gi éí “ídahoołʼaahii danilı̨́įgo ádaahłeʼ, . . . [áádóó] baptize ádaahłeʼ,” nihidííniid. (New World Translation) Baptize áhoʼdilnéehgo haʼátʼíí biniyé ílíinii átʼé? Jó éí bee yisdáhóótʼiʼ. Łaʼda baptize áshidiʼdoolnííł nízingo éí Jesus nináʼádeetʼą́ągo daaztsą́ągi índa náábiʼdiilzáagi binahjįʼ hoolʼáágóó iiná há bohónéedzą́ągo joodlą́ą doo. Éí bąą yilʼaadii Peter éí Oodlání kwííłní: Baptism éí “Jesus Christ daaztsą́ą́dę́ę́ʼ náábiʼdiilzáii bee yisdájiikáhígíí” átʼé. (1 Pet. 3:21) Áko íhoołʼaahii yileehgo éí baptize álʼįįhgo yisdáʼiildééh góneʼ shá ahóótʼiʼ nízin doo.

2. 2 Timothy 2:24, 25 éí naʼnitinii haitʼéego nazhnitin doo ní?

² Íhoołʼaahii álnéehgi éí “naʼnitin jiichįįh doo.” (2 Timothy 2:24, 25 yíníłtaʼ.) Háálá Jesus ání: “Íhoołʼaahii danílı̨́įgo ádaahłeʼ, . . . nidanohtin.” Yilʼaadii Paul ání: “Tʼáá ni ádaa áhólyą́, bee naʼnítinígíí ałdóʼ baa áhólyą́ągo yínítąʼ, háálá díí baa nanináago yisdádíínááł, índa danółtsʼą́ąʼii yisdádookah.” (1 Tim. 4:16) Naʼnitingi dóó íhoołʼaahii álnéehgi ahídéétʼiʼ, éí bąą baa áhwiilyą́ągo naʼniitin doo.

3. Diyin Bizaad bínaʼniltin álʼı̨́įgi haitʼéego baa nídadíitʼįįł?

³ Nahasdzáán bikááʼgóó tʼóó ahayóí diné éí Diyin Bizaad bee nidaniitin. Łaʼda Jesus Christ yíhoołʼaahii dooleełgi éí haitʼéego ląʼígo bee bíká aʼdoowołgi baa nídasíitʼįįd.  Naʼnitiní jílı̨́įgo éí neinitinígíí baptize ádoolníiłgi ashdlaʼ bee haitʼéego bíká azhdoolwołgi kʼad baa nídadíitʼįįł.

4. Nazhnitinígíí éí Diyin Bizaad bee nazhnitingi haʼátʼíí bee ádaa áhojilyą́ą doo? (Footnote ałdóʼ níníłʼı̨́.)

⁴ Diyin Bizaad biiʼdóó bee nidaʼniitinígíí ayóóʼádeíníiʼní, áko łahda biniinaa baa háádíníidzih łeh. Bee Haʼídéesʼı̨́įʼii, Diyin God Bizaad Baa Yáʼátiʼ Biniyé Áłah Néidleehígíí, doodaiiʼ hooghangi Diyin Bizaad bee nazhnitingo éí tʼáadoo tʼáá nihí tʼéiyá ayóó yéiiltiʼí doo. Diyin Bizaadígíí naʼnitingo ííníilzingo éí nazhnitinígíí Diyin Bizaad biiʼ baa dahaneʼígíí tʼáadoo tʼáá átʼé baa hojilneʼí doo. * (John 16:12) Tʼóó baptize ániʼdiilyaa yę́ędą́ą́ʼ béénílniihgo Diyin Bizaad haa níłtsogo nił bééhózin ńtʼééʼ. Íídą́ą́ʼ shı̨́ı̨́ tʼóó áłtsé bee nandíʼnéeztą́ą́ʼ yę́ę tʼéiyá nił bééhózin. (Heb. 6:1) Kʼad éí ląʼí nááhai ląʼígóó bíhwiiniłʼą́ą́ʼ. Áko nanitinígíí tʼáá hooshchʼįʼ tʼáá ałtso bíhwiizhdoołʼááł tʼáadoo níníziní.

5. (a) 1 Thessalonians 2:13 bikʼehgo naniitinígíí haʼátʼíí yaa ákonízin doo? (b) Naniitinígíí éí yíhoołʼaahígíí baa nahólneʼ bidiiʼníi dooleełgo haitʼéego bee bíká ánéilwoʼ doo?

⁵ Naniitinígíí éí Diyin Bizaad biiʼdę́ę́ʼ yíhoołʼaahgo átʼéegi yaa ákonízingo íínísin. (1 Thessalonians 2:13 yíníłtaʼ.) Yíhoołʼaahígíí baa yáníłtiʼ bidiʼní. Tʼáadoo tʼóó bee bił hoolneʼí, łaʼ bee shił hoolneʼ bidiní. Tʼáá bí sizı̨́įgi Diyin Bizaad haitʼéego bídéétʼiʼgi yee ádaa ákonízingo íínísin. Diyin Bizaad yółtaʼgo haitʼéego yaa nitsékeesgi éí kótʼéego naʼídíkid nabídíłkid: “Díí yíníłtaʼgo binahjįʼ, Jiihóvah yee átʼéii haitʼéego nił ííshjání áyiilaa?” “Diyin Bizaad haitʼéego níká adoolwoł?” “Díí bíhwiiniłʼą́ą́ʼígíí haitʼéego baa nitsíníkees?” (Prov. 20:5; Luke 10:25-28) Nanitinígíí éí ayóó ééhósin lá doo hwiindzin da, ndi yíhoołʼaahígíí ayóóʼáyóʼní índa yikʼehgóó áánííłjígo ílı̨́.

6. Naʼnitingi yiyiichįįhígíí éí haʼátʼíí biniyé nanishtinígíí bichʼįʼ diitʼash bidiiʼníi doo?

⁶ Nahalneʼé łaʼ naʼnitingi yiyiichįįhígíí łahdaásh níká análwoʼ? Éí haitʼéego naʼnitingi dóó Diyin Bizaadígíí daatsʼí nanítingo íínísingo átʼéegi shá hadíísił bididííniił. Yáʼátʼéehgo naʼnitiní deeshłééł nínízingo éí łaʼda naʼnitingi  yee ninááshidínóotı̨́ı̨́ł nínízingo nitsíníkees. (Compare Acts 18:24-26.) Áádóó nahalneʼé haníísid yę́ę nanitinígíí éí tʼáá aaníinii bee naʼnitingi yikʼiʼdiyiitįįh daatsʼígoósh átʼé, bididííniił. Haanízahjįʼda háágóó dah díníyáago tʼáá díí nahalneʼígíí díí shá baa nánídáahgo nanitin doogoósh tʼáá áko, bididííniił. Kótʼéego ánáʼiilʼįįhgo éí naʼnitingi doo neʼ ádooníił da. Áádóó nanitinígíí éí íhoołʼaahgi ílíinii átʼéego yaa ákodínóozįįł. “Díí shí nanishtin, náánáłaʼ éí dooda,” doo niidzin da doo. Nanitinígíí éí tʼáá aaníinii bee naʼnitingi yikʼehgóó átʼée dooleeł bá nínízin.

7. Naniitinígíí éí yíhoołʼaahii haitʼéego yíneedlı̨́į doo?

⁷ Nanitinígíí éí Diyin Bizaad bee naʼnitingi bínindlı̨́įgo áádóó yinídlą́ągo binááł bee naʼnitin. (1 Thess. 1:5) Áko yíhoołʼaahígíí ayóó yíneedlı̨́į doo. Diyin Bizaad binahjįʼ naʼnitinii bikʼehgóó neʼiinaʼ yíłtʼihgo éí níká análwoʼgo átʼé bidiʼníigo bee bił hoolneʼ. Áko Diyin Bizaad shíká análwoʼgo átʼéé lá dínóozįįł.

8. Diyin Bizaad bee naʼnítingi haʼátʼíí ałdóʼ bee áká anánílwoʼ doo, éí haʼátʼíí biniyé?

⁸ Nanítinígíí éí ndaʼnółtłʼaii bee hólǫ́ǫgo áádóó tʼáá ákótʼéego łaʼda bee bichʼįʼ nahwiisʼnáaʼgo yiiʼ chʼéheeskaigo yikʼeh dadeesdlı̨́ʼígíí bee bił hoolneʼ. Brothers índa sisters łaʼ kótʼéego bee bichʼįʼ nidahwiisʼnááʼígíí łaʼ bił baa dííʼash. Doodaiiʼ jw.org biiʼ kótʼéego łaʼ baa dahaneʼgo átʼé, bididííniił. * Kódaatʼéhígíí yaa hodiitsʼaʼgo éí Diyin Bizaad bikʼehgo oodáałgo yáʼátʼééh lá dínóozįįł.

9. Nanitinígíí yíhoołʼaahígíí éí bikʼéí dóó bikʼis yee yił halneʼ dooígi haitʼéego bił ííshjání íilʼı̨́į doo?

⁹ Nanitinígíí bichʼooní hólǫ́ǫgo, éísh ałdóʼ íhoołʼaah? Nda ládą́ą́ʼ, nihił íhoołʼaah bididííniił. Bóhoołʼaahígíí nikʼéí áádóó nikʼis bee bił hoolneʼ bidiní. (John 1:40-45) Díí éí haitʼéego bee bíká adiilwoł? Éí kóbidiiʼníi doo: “Nikʼéí díí haitʼéego bił chʼídííʼááł?” doodaiiʼ “Diyin Bizaad biiʼdóó haaʼígi éí díí tʼáá aaníigo átʼéegi nikʼis bił ííshjání ádíílííł?” Kótʼéego bee naʼnitingo éí nanitinígíí naʼnitinii dooleełgi bee hádílééh. Áko unbaptized publisher  dooleełgo bá bohónéedzą́ą doo. Łaʼdaásh Diyin Bizaad bíhwiideeshʼááł nízin bidiníigo nabídíłkid. Łaʼ bił bééhózingo tʼáá tsı̨́łígo baa díínááł áádóó tʼáásh bíighah Diyin Bizaad baa íhwiilʼaahgo bididííniił. Naalkidgo ályaaígíí Diyin Bizaad Binaʼnitingi éí Haitʼéego Ánáʼálʼįįh? * wolyéhígíí bił dínííłʼįįł.

10. 1 Thessalonians 2:7, 8 áníigi éí naʼnitinii haitʼéego Paul yeʼełʼı̨́įgo naʼnitin doo?

¹⁰ Nazhnitinígíí baa jijoobaʼ doo. Nibrother doodaiiʼ nisister dooleełgo átʼéego baa nitsíníkees. (1 Thessalonians 2:7, 8 yíníłtaʼ.) Dabikʼis ńtʼééʼ yę́ę nahjįʼ kwíidoolííł. Áádóó Jiihóvah yá naalʼaʼ dooleełgo yikʼehgóó átʼéego dooleełgi bá nantłʼa doo. Brothers dóó sisters bikʼis dadooleełgi bíká anánílwoʼ. Bikʼis nílı̨́įgo tʼáadoo leʼé bił áníłʼı̨́. Nanitingo tʼéiyá ndagaʼ. Bichʼįʼ náhólnih, text áníłʼı̨́, doodaiiʼ tʼóó baʼidzáhí ndi éí baa jijoobaʼgo átʼé.

11. Naniitinígíí éí congregationgi haʼátʼíí yaa ákonízin doo, éí haʼátʼíí biniyé?

¹¹ “Baa dajiląʼígo awééʼ nilzéh,” haʼníi łeh. Áádóó “baa dajiląʼígo éí íhoołʼaahii álʼįįh,” haʼníi doo. Éí bąą Diyin Bizaad bee nazhʼnitinii éí nazhnitinígíí brothers índa sisters yił ahéédahodoolzįįłgo ázhdoolííł. Áko Diyin bidineʼé yił hólǫ́ǫgo bił hózhǫ́ǫ doo. Háálá éí binahjįʼ Diyin bikʼeh holʼı̨́įgi dóó yíniʼ siláagi yee bíká anájah doo. Nihizhdiiyáagi baa nihił dahózhǫ́. Áhą́dígo nihił hójílǫ́ǫ doo dahwííníiʼní. Áko Jiihóvah ayóóʼóʼóʼníi dooleełgi doo yee háká adoojahii éí doo béézhdiilwoʼ da doo. (Prov. 13:20) Éí doo béézhdiilwoʼgóogo Jiihóvah bidineʼé ayóó hakʼis dadooleełgo átʼéegi bił bééhodoozįįł.—Mark 10:29, 30; 1 Pet. 4:4.

12. Diyin baa ádidootʼáałgi dóó baptize áʼdoolníiłgi haʼátʼíí biniyé baa yáłtiʼ doo?

¹² Tʼáadoo tʼą́ą́ʼ nilínígo Diyin baa ádítʼáahgi dóó baptism baa yáłtiʼ. Jó, éí íiyisí biniyé Diyin Bizaad bee naʼnitin. Diyin Bizaad bee nanitingo kʼad hodiiʼná áádóó áłah náʼádleehgóó naaghá. Éí Jiihóvah bá nijilʼaʼ doo biniyé Diyin Bizaad bee nahoʼdinitingo átʼéegi hoł bééhózin.

13. Haʼátʼíí ahíłkééʼ honíʼą́ągo nanítinígíí baptize ádoolníiłgi yeʼoolíił doo?

¹³ Ahíłkééʼ honíʼą́ągo baptism há baa  hodoolzhish. Áłtsé éí, Jiihóvah ayóóʼájóʼníigo bééhozhdoosįįłgo joodlą́ą doo. (John 3:16; 17:3) Áádóó éí áhą́dígo bił kʼéʼahizhdiʼníi doo, índa brothers dóó sisters ayóóʼájóʼníigo nooséeł doo. (Heb. 10:24, 25; Jas. 4:8) Doo yáʼádaashóonii yóóʼazhdidooʼáałgo hashtʼeʼ nitsínázdookos. (Acts 3:19) Díí beʼjolíiłgo éí joodlánígíí diné bee bił hashneʼ doo jidínóozįįł. (2 Cor. 4:13) Nááʼákóneʼ éí, Jiihóvah baa ázhdidootʼáałgo baptize áhodiʼdoolnííł. (1 Pet. 3:21; 4:2) Díí éí tʼáá ałtso yaa bił dahózhǫ́! Kótʼéego ahíłkééʼ yeʼoolíiłgo nizhónígo íʼiiʼlííł bidiníigo bá baa nił hózhǫ́.

14. Nanítinígíí beʼoodląʼ nooséełgi haʼátʼíí biniyé bá baa ákoniidzin doo?

¹⁴ Nanítinígíí éí Diyin yaa ádidootʼáałgo baptize ádoolníiłgi bíká anéiilwoʼgo bił haʼíínílníi doo. Jiihóvah bá naashʼaʼ daatsʼí nízingi bee hailzíid doo. Jesus bikʼeh hóʼı̨́įgiísh yikʼehgóó átʼéego baa ákonínízin? Doodaiiʼ tʼóósh tʼáadoo leʼé bee ahił hwiilneʼ doo nízin?

15. Nazhnitinígíí beʼoodląʼ daatsʼí nooséełgi haʼátʼíí bee baa ákozhnízin doo?

¹⁵ Beʼoodląʼ tʼáá noosééł daatsʼígi baa ákonínízin. Éí Jiihóvah ayóóʼáyóʼníigiísh yaa yáłtiʼ? Jiihóvaásh yichʼįʼ sodilzin? (Ps. 116:1, 2) Diyin Bizaadísh yíneedlı̨́įgo yółtaʼ? (Ps. 119:97) Tʼáásh ahą́ą́h áłah náʼádleehgóó naaghá? (Ps. 22:22) Diyin bikʼehgoósh beʼiinaʼ hashtʼééyoodlííł? (Ps. 119:112) Yíhoołʼaahígíísh bikʼéí dóó bikʼis yee yił halneʼ? (Ps. 9:1) Íiyisí éí Jiihóvah Yá Halneʼé deeshłeełísh nízin? (Ps. 40:8) Díí łaʼ doo yikʼeh átʼéégóogo haʼátʼíí biniyé ákótʼéegi hazhóʼó nabididííłkił, áádóó ajoobaʼ bee hazhóʼó bił baa nídíitʼįįł. *

16. Nazhʼnitingi neʼ ádoolníiłgo haʼátʼíí bee bééhózin doo?

¹⁶ Tʼáá ahą́ą́h éí naʼniitingi díí baa nitsíikees doo: ‘Íhoołʼaahgi baa nahalzhishgo yiniyéésh tʼáá bilą́ąjįʼ hashtʼéédiitʼįįh? Áłah náʼádleehígíísh doo yíneedlı̨́į da? Doo yáʼáshóonii ádaatʼéiísh tʼahdii yaa ninádanídááh? Doo  tʼáá aaníí oodląʼísh tʼahdii yee atah?’ Kótʼéego tʼah yaa naagháago nazhnitingo éí łaʼda naʼałkǫ́ǫ́ʼ bee bóhojiiłʼaahgo, ndi éí nídooltłohgi doo íinízin da nahalinígíí átʼé. Yíhoołʼaahígíí doo yaa ahééh nízin da índa doo akʼehgóó ádeeshníił da nízingo, haʼátʼíí biniyé naniitin doo?

17. 1 Timothy 4:16 éí Diyin Bizaad yee ndaʼnitinii haʼátʼíí ádajooníił doo ní?

¹⁷ Íhoołʼaahii álnéehgi bindeilnishgo ayóó ílíinii átʼéego baa nitsídeikees. Áádóó naniitinígíí baptize bá bohónéedzą́ą doo daniidzin. Éí bąą Diyin Bizaadígíí naʼnitingo ádeíníilzin. Bídaniidlı̨́ áádóó deiniidlą́ągo bee ndaʼnitin. Brothers dóó sisters nikʼis danilı̨́įgo ádanileʼ bidiiʼníi doo. Diyin baa ádidootʼáałgo baptize áʼdoolníiłgi bił baa nánítʼı̨́. Beʼoodląʼ daatsʼí nooséełgi bee hanisííd. (Page 13gi, “Naʼnitinii éí Nazhnítinígíí Baptize Ádoolníiłgo éí Díí Beʼíílíił Doo” níníłʼı̨́.) Yisdáʼiildéehgi atah bineilnishgo baa nihił dahózhǫ́. Wołí bee ádeitʼı̨́įgo Diyin Bizaad bee nidaʼnitingo baptize bá bohónéedzą́ą doogo biniyé ndaʼnitin.