ONTHELE YOKULILONGESWAE 42
Oñgeni Tupondola Okukuatesako Omulongwa Atee Ambatisalwa? — Onthele ya Vali
“Litala nawa ove muene netyi ulongesa.” — 1 TIM. 4:16.
OTYIIMBO 77 Otyimimi Mouye Uno Wenthiki
ETYI MATULILONGESA *
1. Oñgeni tutyii okuti otyilinga tyokulinga ovalongwa tyiyovola ovanthu?
OTYILINGA tyokulinga ovalongwa, tyihupisa omuenyo wovanthu. Oñgeni tutyii? Mu Mateusi 28:19, 20, Sesusi wapopia okuti: ‘Endei, kalingei ovalongwa, amuvembatisala.’ Omokonda yatyi tupopila okuti ombatisimu yesukisa unene? Omokonda opo omunthu ahupe, una okumbatisalwa. Aveho vahanda okumbatisalwa, vena okutavela okuti ovanthu mavakayovoka vala mokonda Sesusi wankhia, atutiliswa. Otyo apositolu Petulu apopilile ovakuatate vae okuti: ‘Ombatisimu, pehepano imuyovola mokonda yetutilo lya Sesusi Kilisitu.’ (1 Pet. 3:21) Ngotyo, tyina omunthu ambatisalwa, uli mondyila yomuenyo wahapu.
2. Oityi 2 Timotiu 4:1, 2, ipopia konthele yotyilinga tyokulongesa?
2 Opo tulinge ovalongwa, tuesukisa okukala ovanongo mokulongesa. (Tanga 2 Timotiu 4:1, 2.) Omokonda yatyi? Omokonda Sesusi wetutuma okuti: ‘Endei, kalingei ovalongwa, amuvelongesa.’ Tupu, apositolu Paulu wetupopila ‘tutualeko’ motyilinga otyo. Mokulinga ngotyo, ‘matuliyovola onthue muene, na vana vetutehela.’ Nthainyo, otyo Paulu etupopilila tutale nawa onkhalelo tulongesa. (1 Tim. 4:16) Opo tulinge ovalongwa, tuesukisa okukala ovaivisi vekahi nawa.
3. Oityi matulilongesa monthele ei konthele yokulongesa ovanthu Ombimbiliya?
3 Onthue tulongesa ovanthu ovanyingi-nyingi otyili tyo Mbimbiliya. Ngetyi tuelilongesa-le mothele yokualamba, onthue tuhanda okunoñgonoka oñgeni matukuatesako ovanthu ovo atee vambatisalwa. Monthele ei, matupopi ovipuka vitano ovaivisi vesukisa okulinga opo vakuateseko ovalongwa vavo okumbatisalwa.
LONGESA NO MBIMBILIYA
Ita komuivisi omunongo ekukuateseko okulongesa nawa (Tala ono palagrafu 4-6) *
4. Ovipuka patyi tuesukisa okulityilika tyina tulongesa ovalongwa vetu? (Tala pokatoi)
4 Onthue tuhanda okulongesa vakuetu otyili mokonda tuhole unene etyi Ombimbiliya ipopia. Mahi tyilinge tuendesa Omutala Womulavi, tyilinge Elilongeso Liombimbiliya Mewaneno, tyilinge tukahi nokulongesa omulongwa wetu, tuesukisa okuhapopi unene. Tuna okuyeka Ombimbiliya ilongese, atulityilika okupopia unene ovipuka twii. * (Suau 16:12) Eleka ovipuka ankho wii etyi wambatisalwa pahe, nevi wii pehepano. Motale okuti ankho wii vala ovipuka vihehi. (Heb. 6:1) Katutu-katutu, pahe ohimbika okunoñgonoka ovipuka ovinyingi wii pehepano. Ngotyo, wahalongese omulongwa wove ovipuka aviho wii.
5. (a) Ngetyi tyipopia 1 Ova Tesalonika 2:13, oityi tuhanda ovalongwa vetu vanoñgonoke tyina tuvelongesa? (b) Oityi tupondola okulinga opo ovalongwa vetu vetupopile etyi vasoka konthele yetyi tuna nokuvelongesa?
5 Onthue tuhanda ovalongwa vetu vanoñgonoke okuti etyi tuna nokuvelongesa tyatunda Mondaka ya Huku. (Tanga 1 Ova Tesalonika 2:13.) Oñgeni tupondola okutyilinga? Yeka omulongwa apopie oñgeni atala etyi ekahi nokulilongesa. Mongeleka, tyina tutanga otesitu, pamwe tupondola okumuyeka ahangunune otesitu oyo. Kuatesako omulongwa wove okutala, oñgeni Ondaka ya Huku ipondola omukuatesako momuenyo wae. Mupula ovipuka mavimulundu okupopia onkhalelo elitehelela, netyi asoka konthele yo tesitu atanga. (Luka 10:25-28) Mongeleka, mupula okuti: “Oityi otesitu ei ikulongesa konthele ya Siovaa?” “Oñgeni otesitu ei ipondola okukuatesako?” “Oityi usoka konthele yetyi tuelilongesa?” (Prov. 20:5) Tala okuti omulongwa kesukisile okunoñgonoka ovipuka ovinyingi. Etyi esukisa vala, okupanda etyi ekahi nokulilongesa, nokuendela-mo.
6. Omokonda yatyi otyiwa okuenda nomuivisi ulongesa nawa tyina tukalongesa omulongwa wetu?
6 Tyina ukalongesa omulongwa wove, upondola okuenda novakuatate no nomphange valongesa nawa. Upondola okuita vekukuateseko okutala ine ukahi umwe nokulongesa nawa, no ñgeni uhangununa Ombimbiliya. Pahe tyina amekupopila apa wesukisa okutala nawa pokulongesa, wesukisa okuliola omutima. (Tyieleka nomukanda Ovilinga 18:24-26.) Tupu, upondola okumupula etyi amona. Upondola okumupula okuti: ‘Tyina utala, okuti omulongwa wanoñgonoka umwe nawa etyi nemulongesa?’ Tyina wamatundu-po, upondola okumuita ekulongesile-ko omulongwa wove. Wesukisa okulinga ngotyo opo omulongwa “wove” elilongese apeho, nae amono umwe okuti okulilongesa Ombimbiliya tyesukisa unene. Wahasoke okuti omulongwa oo, owove vala, petupu vali ou upondola okukulongesila-ko. Soka ku etyi matyikuatesako omulongwa. Okulinga ngotyo tyikuatesako omulongwa okukula.
LONGESA NONTHUMBI
Popila omulongwa wove onongeleka mbovakuatate vamwe, opo anoñgonoke oñgeni apondola okuendela monondongwa mbo Mbimbiliya (Tala ono palagrafu 7-9) *
7. Oityi matyikuatesako omulongwa okupanda etyi ekahi nokulilongesa?
7 Omulongwa wesukisa okuimbuka okuti ove uhole etyi ukahi nokumulongesa. (1 Tes. 1:5) Ine ulinga ngotyo, omulongwa mapande etyi ekahi nokulilongesa. Tupu, inkha tyitavela, upondola okumupopila oñgeni onondongwa mbo Mbimbiliya mbekukuatesako. Okulinga ngotyo, matyikuatesako omulongwa okuimbuka okuti nae onondongwa mbo Mbimbiliya mbupondola okumukuatesako.
8 Tyina ulilongesa nomulongwa wove, upondola okupopia onongeleka mbovanthu vakalele novitateka ngo viae. Tupu, otyiwa umulekese kovakuatate vo mewaneno vena ovituwa vipondola okumukuatesako. Otyipuka otyikuavo upondola okulinga, okumulekesa ononthele mbokuati “Ombimbiliya Ipilulula Omuenyo Wovanthu,” * mbuli mo jw.org. Ononthele ombo, no novidiu ombo, mbupondola okukuatesako omulongwa wove okuimbuka okuti onondongwa mbo Mbimbiliya mbupondola okumukuatesako okupilulula omuenyo wae.
9. Oityi upondola okulinga opo ulunde omulongwa wove okupopila ombunga yae nomapanga ae etyi ekahi nokulongeswa?
9 Ine omulongwa wove wanepa ine wanepwa, okuti mukuavo nae ulongeswa? Ankho kalongeswa, upondola okumukonga, opo nae eye okulongeswa. Avela ondundo omulongwa wove apopile omapanga ae, nombunga yae etyi ekahi nokulongeswa. (Suau 1:40-45) Oñgeni upondola okutyilinga? Upondola okumupula ñgana: “Oñgeni upondola okupopila ombunga yove etyi walongeswa?” Ine, upondola okumupula okuti: “Oñgeni upondola okukuatesako omapanga ove no tesitu ei?” Okulinga ngotyo, ukahi nokufuika omulongwa wove opo ha etyivile okulongesa nawa. Tyina wamatale okuti omulongwa wove wafuapo, upondola okukala omuivisi. Tupu, upondola okumuita ekupopile ine una omunthu ei, uhanda okulongeswa Ombimbiliya. Inkha pena, ovola omunthu oo, uhimbike okumulongesa. Mulekesa ovidiu yokuati: Oñgeni Tyililongeswa Ombimbiliya? *
LUNDA OMULONGWA WOVE OKUKALA NOMAPANGA MEWANENO
Kuatesako omulongwa wove okukala nomapanga mewaneno (Tala ono palagrafu10-11) *
10. Ngetyi tyipopia 1 Ova Tesalonika 2:7, 8, oñgeni ovaivisi vapondola okuhetekela ongeleka ya apositolu Paulu?
10 Omuivisi, wesukisa okulekesa okuti wesuka nomulongwa wae. Wesukisa okumutala nolusoke luokuti makala omukuatate wae ine omphange yae. (Tanga 1 Ova Tesalonika 2:7, 8.) Katyapepukile komulongwa okusapo omapanga ae, nokupilulula ovituwa viae opo akale omuumbili wa Siovaa. Wesukisa okuvasa omapanga omawa mewaneno. Omuivisi wesukisa okukala epanga liae, una okutaindya omuvo wokukala nae, ehemuovola vala tyina mavelilongesa. Mongeleka, upondola okumulikalela kotelefone, nokumuhonekela omesasi, nokukemutalaila-po pamwe. Ine ulinga ngotyo, molekesa okuti wesuka umwe nomulongwa wove.
11. Oityi tuhanda omulongwa wetu avase mewaneno, iya omokonda yatyi?
11 Kuna omuhe umwe wati: “Omona ukuliswa novanthu aveho vo potyilongo.” Onthue tupondola okupilulula omuhe oo, atuti: “Omulongwa ukuliswa novanthu aveho vo mewaneno.” Otyo omuivisi esukisila okulekesa omulongwa wae kovakuatate aveho vo mewaneno. Omulongwa wesukisa okukala nomapanga aumbila Siovaa, maemukuatesako okupama motyili, nokumukuatesako tyina ena oviatateka. Onthue tuhanda omulongwa wetu elitehelele okuti ovakuatate mewaneno vemwii. Tuhanda anoñgonoke okuti nae ombunga yetu. Tupu, tuhanda omulongwa wetu akale epanga liovakuatate ouye auho. Okulinga ngotyo, tyimupepukila okusapo omapanga ehemukuatesako okuumbila Siovaa. (Prov. 13:20) Tyina amasiwapo nomapanga ae, muene utyii-ale okuti mavasi omapanga ekahi nawa meongano lya Siovaa. — Malu. 10:29, 30; 1 Pet. 4:4.
POPIA KONTHELE YOKULIPAKULA, NOKUMBATISALWA
Katutu-katutu, omulongwa mahande okumbatisalwa (Tala ono palagrafu 12-13)
12. Omokonda yatyi tuesukisila okupopia nomulongwa wetu konthele yokulipakula, nokumbatisalwa?
12 Popila nawa omulongwa wove omokonda yatyi omunthu esukisila okulipakula, nokumbatisalwa. Etyi tuhanda, okukuatesako omulongwa atee ambatisalwa. Tyina tuamelilongesa onohanyi mbumwe nomulongwa wetu, na tyina amehimbika okuenda komaliongiyo, una okunoñgonoka okuti onthue tumulongesa Ombimbiliya mokonda tuhanda okumukuatesako okufenda Huku, akala Ombangi ya Siovaa.
13. Ovipuka patyi omulongwa esukisa okulinga opo ambatisalwe?
13 Katutu-katutu, omulongwa upondola okuhanda okumbatisalwa. Otyipuka tyo tete esukisa okulinga, okunoñgonoka Siovaa, akala nekolelo Mwe. (Suau 3:16; 17:3) Tupu, wesukisa okukala noupanga omuwa na Siovaa, nokuenda komaliongiyo. (Heb. 10:24, 25; Tia. 4:8) Wesukisa okuyekapo ovituwa ovivi. (Ovil. 3:19) Ekolelo liae, lina okumulunda okupopila vakuavo etyi ekahi nokulongeswa. (2 Kol. 4:13) Una okulipakula ku Siovaa, ambatisalwa. (1 Pet. 3:21; 4:2) Onthiki mambatisalwa, aveho mavahambukwa unene. Tyina wamamono okuti omulongwa wove ukahi nokulinga ovipuka vilekesa okuti uhanda okumbatisalwa, mupandula, omupopila atualeko okulinga ovipuka ovio.
TALA INE OMULONGWA UKAHI UMWE NOKUKULA
14. Oñgeni tupondola okutala ine omulongwa uhanda umwe okuumbila Siovaa?
14 Onthue tuesukisa okupwa-elundo tyina tukuatesako omulongwa okukula atee elipakule, ambatisalwa. Mahi tuesukisa okutala ine omulongwa uhanda umwe okuumbila Siovaa. Mongeleka, tupondola okulipula okuti: Okuti uhanda umwe okutavela ovitumino vya Sesusi? Ine uhanda vala okulilongesa Ombimbiliya tyapwa?
15. Ovipuka patyi omuivisi esukisa okuimbuka, vilekesa okuti omulongwa wae upondola okumbatisalwa?
15 Omuivisi wesukisa okutala apeho ovipuka vilekesa okuti omulongwa ukahi nokukula. Tupondola okulipula okuti: Okuti omulongwa wange una nokulekesa okuti uhole Siovaa? Okuti ulikuambela apeho ku Siovaa? (Sal. 116:1, 2) Okuti utanga Ombimbiliya? (Sal. 119:97) Okuti wenda komaliongiyo? (Sal. 22:22) Okuti ukahi nokupiluluka? (Sal. 119:112) Okuti ukahi nokupopila omapanga ae, nombunga yae etyi ena nokulilongesa? (Sal. 9:1) Tupu epulu limwe omuivisi esukisa okulipula olieli: Okuti omulongwa wange, uhanda umwe okukala Ombangi ya Siovaa? (Sal. 40:8) Ankho omulongwa kalingi ovipuka ovio tuapopia opo, opo wesukisa okutomphola nae. Mahi popia nokankhenda. *
16. Oityi tyipondola okulekesa okuti tuna okuyekapo okulilongesa nomulongwa wetu?
16 Tupu pamwe, tuesukisa okutala ine matutualako umwe okulongesa omulongwa wetu. Upondola okulipula okuti: ‘Okuti omulongwa wange uhole umwe okutanga apa matulilongesa? Okuti wenda komaliongiyo? Okuti nkhele una ovituwa ovivi? Nkhele wenda kokapela kae?’ Ine omakumbululo aeho wati yoo, opo okutualako okulongesa omunthu oo, tyikahi ngokulongesa omunthu okuyoa, mahi ngwe kahande okutalala. Ine omulongwa wove kalekesa okuti wapanda etyi ekahi nokulongeswa, kesukile nokupiluluka, opo oityi utuailako okumulongesa?
17. Ngetyi tyipopia 1 Timotiu 4:16, oityi ovaivisi aveho vesukisa okulinga?
17 Onthue tutyii okuti otyilinga tuna-tyo tyokulinga ovalongwa, tyesukisa unene. Iya tuhanda okukuatesako ovalongwa vetu atee vambatisalwa. Ngotyo, matuyeke Ombimbiliya ilongese; matulongesa nonthumbi; matukuatesako ovalongwa vetu okukala nomapanga mewaneno; apeho matupopi navo konthele yokulipakula, nokumbatisalwa; matutale ovipuka vilekesa okuti vekahi nokukula. (Tala okakasa pefo 13, kati: “Oityi Omuivisi Esukisa Okulinga opo Alongese Omulongwa Ambatisalwa?”) Onthue tuna ehambu liokuundapa motyilinga etyi tyiyovola omienyo viovanthu. Ngotyo, onthue tuhanda okukuatesako ovalongwa vetu, atee vambatisalwa.
OTYIIMBO 79 Velongesa Vakale Tyapama
^ pal. 5 Tyina tulongesa ovanthu Ombimbiliya, tuna otyilinga tyokukuatesako ovanthu okuhimbika okusoka nga Siovaa, nokulinga ovipuka vimuhambukiswa. Onthele ei, maihangununa oñgeni tupondola okuyawisa kounongo wetu wokulongesa.
^ pal. 4 Tala onthele yati: “Ovipuka Una Okulityilika Tyina Ulongesa Omunthu Ombimbiliya.” Onthele oyo ili momukanda Omuenyo Wetu Woukilisitau Novilinga Vietu wa Setembro yo 2016.
^ pal. 8 Enda pana pati: ONTHUE VALIE > ONONGELEKA.
^ pal. 9 Mo Jw Library®, enda pana pati: MEDIA > OMALIONGIYO, NOVILINGA VIOKUIVISA > OVITI VIOKULONGESA.
^ pal. 15 Tala onthele yati: “Okuhumba Siovaa, Nokumupandula Tyitulunda Okumbatisalwa,” no yokuati: “Okuti Ove Wafuapo Opo Umbatisalwe?” Ononthele ombo, mbuli Momutala Womulavi wa Março yo 2020.
^ pal. 77 ONONDAKA MBOKUHANGUNUNA OLUTALATU: Omuivisi utyivila okulongesa nawa, ukuatesako mukuavo opo ahapopie unene tyina alongesa.
^ pal. 79 ONONDAKA MBOKUHANGUNUNA OLUTALATU: Vekahi nokulilongesa, iya omulongwa una nokulongeswa oñgeni makala omukai ukahi nawa. Pahe, uli nokupopila omulume wae etyi ankho ena nokulongeswa.
^ pal. 81 ONONDAKA MBOKUHANGUNUNA OLUTALATU: Omulongwa nomulume wae veli meumbo liomukuatate umwe vanoñgonoka Mondyuo Yomaliongiyo.
