1. I doodoo wa suā kɔ tam doo kɔ pya nɛɛ a nyɔɔnɛ dumɛ Jizɔs lu tam a kpɔā dum ni?

TAM doo kɔ pya nɛɛ a nyɔɔnɛ dumɛ Jizɔs lu tam a kpɔā dum! I tɛɛ̄ doodoo wa suā? Sɔ̄ Jizɔs bee nɛ lok a le bu kpa Matiu 28:19, 20, a bee kɔ: “Kiraa, . . . doo kɔ dɛ̄dɛɛ̄ edonyɔɔ alu pya a mɛ nyɔɔnɛ dumɛ . . . , wa doo baptism.” E na i suā akiiloo kɛ̄ liamaā kuī doo a? Alu nu pya a gbī e’ɛrɛ kpɔā ɛrɛ edoo. Nɛɛ a gaa le liamaā eyiga kɔ aba tɛ̄maloo luh waara zɔɔ Jizɔs na a dabe ɛrɛ kpɔā a. Nu anua lo sa nɛɛ lɛɛratam Pita bee kɔ nɛ pya Nɛɛ Kraist kɔ: “Baptism kpɔā i anyaawo . . . tɛ̄maloo aakɛ̄ bu luh lo Jizɔs Kraist.” (1 Pit 3:21) Nyɔɔwo, sɔ̄ ziī nɛɛ liamaā, a dap ɛrɛ bɛābu lo e’ɛrɛ kpɔā.

2. E na 2 Timɔti 4:1, 2 kɔ i doo doodoo pya a gaa tɔgɛnu a?

² Lokwa i dap doo kɔ pya nɛɛ a nyɔɔnɛ dumɛ Jizɔs, alu ebɛɛ̄ kɔ i para “tɔgɛnu.” (Buū 2 Timɔti 4:1, 2.) E na anua a? Nyɔnɛbee Jizɔs bee i nɛ lok kɔ: “Kiraa, . . . doo kɔ dɛ̄dɛɛ̄ edonyɔɔ alu pya a mɛ nyɔɔnɛ dumɛ . . . , wa tɔgɛnu.” Nɛɛ lɛɛratam Pɔɔl bee kɔ i “kiisī” bu lo tam, “nyɔnɛbee bu edoo pya lo nu ama, o kpɔā oloo loo le pya a a dā.” Nyɔɔwo, Pɔɔl bee kɔ, “Suāloo a leere le . . .o tɔgɛnu.” (1 Tim 4:16) Kuma sɔ̄ alu ebɛɛ̄ kɔ i tɔgɛnu pya nɛɛ lɛɛ ba gae nyɔɔnɛ dumɛ Jizɔs a, i gbī etɔgɛ wa nu bu sīdee a lee.

3. Bu ekobee ue ama, e na i gaa le nɔ akiiloo nɔɛ̄ Baibol pya nɛɛ a?

³ I gaa tɔgɛ kaka ue a le bu Baibol gbɛnɛ-edo miliɔn pya nɛɛ. Mɛ dookɛ̄ a bee le doo bu elua ekobee ue a, i gbī esuā  kɛ̄ i dap yerebah nɛ gbɛnɛ-edo aba kɔ ba a liamaā sa lu pya a nyɔɔnɛ dumɛ Jizɔs Kraist doo. Bu lo ekobee ue ama, i gaa le kɔ ue nyɔɔ dɔɔ̄na o’oo nu nɛɛ a gaa nɔɛ̄nu nɛɛ edoo lo eyerebah nɛ nɛɛ a gaa nyɔɔnɛ nɔnu kɔ a nyim ina loo liamaā.

4. E na anua nɛɛ a gaa nɔɛ̄nu nɛɛ e’aa loo ye sɔ̄ a gaa nyɔɔnɛ nɛɛ nɔ Baibol a? (Ɛp ue a le kɛɛ̄.)

⁴ Nu i nɔ aābu Muɛ̄ Ue Bari nia i. Nyɔɔwo i dap kɔ gbɛnɛ-edo nu akiiloo nu a i nia ama. Kerewo, kere a gaa lu e’aabaloo Enɔānu Tɔ Baɛloo, Enɔānu Baibol bu Bɔŋanaloo, ale enɔānu Baibol bie tɔ pya nɛɛ, nɛɛ a gaa aabaloo aa kɔ ue yeekɛ̄. Lokwa a dap lu esu Baibol tɔŋɛnu lo nɛɛ, nɛɛ a gaa nɔɛ̄nu nɛɛ a e’aa loo ye sa a naale ebaatɛ̄ dɛ̄dɛɛ̄ nu a suā nyɔɔ ziī dɔ Baibol ale ziī ekobee ue. * (Jɔn 16:12) Su suānu Baibol o bee ɛrɛ sɔ̄ o bee liamaā dooreloo lo o ɛrɛ anyaawo. Lo sɔ̄, o bee suā kunɛ pio kpog-bee kaka ue. (Hib 6:1) Esua a gbɛnɛ-edo zua bah lo esuā pya nu o suā anii’ee, nyɔɔwo, o aa su dɛ̄dɛɛ̄ nu o suā tɔgɛ nɛɛ o gaa nyɔɔnɛ nɔ nu aba sɔ̄.

5. (a) Dɛɛa nyɔɔ nu a le bu 1 Pya Tɛsalɔnaika 2:13, e na i gbī kɔ nɛɛ i gaa nyɔɔnɛ nɔnu a dābeeloo aāloo nu a gaa nɔ a? (b) I yerebah nɛ nɛɛ a gaa nɔnu kɔ a kɔ nu a gaa nɔ nɛ pya dɔɔ̄na doodoo wa?

⁵ I gbī kɔ nɛɛ i gaa nyɔɔnɛ nɔnu a suā kɔ nu a gaa nɔ aabu Muɛ̄ Ue Bari. (Buū 1 Pya Tɛsalɔnaika 2:13.) Bu mɛ sīdee na i doo wo a? Yere mɛm loo nɛɛ o gaa nyɔɔnɛ nɔnu kɔ a kɔ nu a gaa nɔ nɛ pya dɔɔ̄na. Taā o ye baatɛ̄ dɛ̄dɛɛ̄ dɔ kpa kaɛ nɛ, kɔ ye nɛ kɔ a baatɛ̄ pio lo dɔ kpa kaɛ. Yerebah nɛ nɛɛ o gaa nyɔɔnɛ nɔnu kɔ a muɛ̄ kɛ̄ a dap su nu a gaa nɔ aābu Muɛ̄ Ue Bari yere bu ye dogo doo. Bip ye ebip edoo kɔ a ɛrɛ ekɛɛrɛ nyɔɔ nu a buū aābu ziī dɔ kpa kaɛ. (Luk 10:25-28) Bu edoba, bip ye kɔ: “Dɔ kpa kaɛ ama yerebah a nɛ kɔ o muɛ̄ elap dogo Jɛhova doodoo wa?” “Bu mɛ sidee na kaka ue a le bu bu Baibol a dɔbiī nɛ a?” “Nu o nɔ ama tɔɔ̄ a loo doodoo wa?” (Kam 20:5) Naale kɛ̄ nɛɛ i gaa nɔɛ̄nu suānu doo na a i kuī loo a, mɛ kɛ̄ a wereloo nu a nɔ sa su yere bu dogo doo.

6. E na anua a lee e’aara nɛɛ a para tɔgɛnu siā wee nɔɛ̄nu nɛɛ a?

⁶ Sɔ̄ o gaa nyɔɔnɛ nɛɛ nɔnu, o wee aarage pya wuga ba para tɔgɛnu siā wee nɔɛ̄nu nɛɛ ni? Lo o doo wo, o dap wa bip sɛh o aage baloo lo enɔānu leere le kɔ o  suge Baibol tɔŋɛnu lo nɛɛ naa e. Lo o gbī enyim kiisī bu kɛ̄ o tɔgɛ nu doo, o ɛrɛ ekumalookɛ̄. (Dooreloo Doonu pya Nɛɛ lɛɛratam 18:24-26.) Sɔ̄ a esaa, bip lo wuga a bee a nyɔɔnɛ a sɛh nɛɛ a gaa nɔnu dāge beeloo kaka ue a gaa nɔ naa e. O dap nage kɔ nɛ lo wuga kɔ a nyɔɔnɛ ye nɔnu lo o si kiā sa tɔɔ̄ dee nu alu ziī ale baɛ kaɛ. Lo ama edoo kɔ lo enɔānu a wee kiisī sa edoo nage kɔ lo nɛɛ a suā kɛ̄ ye enɔānu kuī doo. O aa kɛɛrɛ kɔ ɛɛ nɛɛ “o” wee nyɔɔnɛe nɔnu, sa lɔgɔ nɛɛ naale edap ye nɔɛ̄nu. O gbī nu elee loo nɛɛ o gaa nyɔɔnɛ nɔnu, lokwa a dap nyim kiisī leere bu enɔ kaka ue.

7. E na eyerebah nɛ nɛɛ a gaa nɔnu kɔ nu a gaa nɔ a nia ye a?

⁷ Nɛɛ o gaa nyɔɔnɛ nɔnu a muɛ̄ kɔ o wereloo sa yiga nu o gaa tɔgɛ aābu Baibol. (1 Tɛs 1:5) Lo ama edoo kɔ nu a gaa nɔ a nia ye kaāna. Lo a waɛ, kɔ ye nɛ kɛ̄ su zuurabahtɔ̄ a le bu Baibol yere bu o dum eyerebah a nɛ doo. Dodoo wo edoo kɔ a suā kɔ Baibol aara pya zuurabahtɔ̄ a ye dap nage dɔbiī nɛ.

8. Dɔɔ̄na e na o dap doo lo eyerebah nɛ nɛɛ o gaa nyɔɔnɛ nɔnu a, e e na anua o doo wo a?

⁸ Sɔ̄ bui gaa nɔnu, kɔ ye nɛ nu akiiloo pya nɛɛ a bee kpesī dua kɛ̄tɔɔ̄ alɛ gaa kpesī sa ba be eebah. O dap aara nɛɛ a le bu bɔŋanaloo lo etɛ̄na bu pio nu lokwa a dap nage kɔ nu edɔbiī nɛ nɛɛ o gaa nyɔɔnɛ nɔnu. Ale o dap gbī nu a bee sira a ye dap yere mɛm loo aā i dɔ intanɛt jw.org kɛɛ̄ ekobee ue a kɔ “The Bible Changes Lives.” * Pya lo ekobee ue le vidio eyerebah nɛ nɛɛ o gaa nɔɛ̄nu kɔ a muɛ̄ suānu a le bu su pya zuurabahtɔ̄ a le bu Baibol yere bu ye dogo.

9. Bu mɛ sīdee na o dap yerebah nɛ nɛɛ o gaa nyɔɔnɛ nɔnu kɔ a kɔ nu a gaa nɔ nɛ pya ye butɔ le pya ye gbo a?

⁹ Lo nɛɛ a gaa nɔnu a e’ira wa ale e’iya dam, ye wa ale ye dam gaa nɔge nu ni? Lo a naale wo, kue ye dam ale ye wa kɔ a le kɛ̄ loo lo enɔānu. Yere mɛm loo nɛɛ o gaa nyɔɔnɛ nɔnu kɔ a kɔ nu a gaa nɔ nɛ pya ye butɔ le pya ye gbo. (Jɔn 1:40-45) Bu mɛ sīdee? O dap aadee bip kɔ: “O baatɛ̄ pya kaka ue ama nɛ pya o butɔ doodoo wa?” ale “Amunu dɔ kpa kaɛ na o su wa tɔŋɛ kɔ nu o gaa kɔ lu kaka a?” Bu lo sīdee, o dap  yerebah nɛ nɛɛ o gaa nyɔɔnɛ nɔnu kɔ a para tɔgɛ nu. E sɔ̄ a enyima tura, a dap bɔātɛ̄ esi uwe zue ue doodoo nɛɛ zue ue a sii liamaā. O dap bip nɛɛ a gaa nɔnu a lo a suāloo ziī nɛɛ a gaa gbī enɔ Baibol. Lo a suāloo ziī nɛɛ a le doo wo, o dap gbī lo nɛɛ aba sɔ̄ sa bɔātɛ̄ enyɔɔnɛ ye nɔ Baibol. Tɔgɛ ye vidio a kura Wee Lu E Aabaloo Enɔānu Baibol Doodoo Wa? *

10. Dookɛ̄ alu ebaatɛ̄ doo bu 1 Pya Tɛsalɔnaika 2:7, 8, Bu mɛ sīdee na nɛɛ a gaa nɔɛ̄nu nɛɛ enɔ edoba Pɔɔl a?

¹⁰ Nɛɛ a gaa nɔɛ̄nu nɛɛ ɛrɛ etɔgɛ kaāna taɛ bu nɛɛ a gaa nɔɛ̄nu. Ɛp wa doodoo pya elu o wuga bu bɔŋanaloo ziī dee a ee. (Buū 1 Pya Tɛsalɔnaika 2:7, 8.) Naa waɛ wa bah elɛɛbaloo pya gbo a le bu nyɔuwe sa kwabaloo wa dum lokwa ba dap taāŋabah Jɛhova. Alu ebɛɛ̄ kɔ i yerebah wa nɛ kɔ ba a yii gbo pya a le bu bɔŋanaloo. Naale aba sɔ̄ i gaa nyɔɔnɛ nɛɛ nɔnu na i le ye kpaɛ̄ a, mɛ i dap nage wa su sɔ̄ tɔ̄ma kpaɛ̄ pya dɔɔ̄na sɔ̄. Kue lo nɛɛ, yere ue ye ma, ale ina ye loo sɔ̄ a naale sɔ̄ bui gaa nɔnu edoo kɔ a suā kɔ o kuūe ye dɛɛ̄ loo.

11. E na i gbī kɔ pya nɛɛ i gaa nyɔɔnɛ nɔnu a muɛ̄ bu bɔŋanaloo a, e e na anua a?

¹¹ Wee lu ekɔ: “Sɔ̄ zoo bɔŋia na a aa nɔɔ̄ a.” Nyɔɔwo i dap nage kɔ: “Dɛ̄dɛɛ̄ nɛɛ a le bu bɔŋanaloo na a yerebah nɛ nɛɛ a gaa nɔnu kɔ a nyɔɔnɛ dumɛ Jizɔs a.” Nyɔɔwo sɔ̄ pya a gaa nɔɛ̄nu nɛɛ yerebah nɛ pya ba gaa nɔɛ̄nu kɔ ba a yii gbo pya a le bu bɔŋanaloo, edoo kɔ pya lo nɛɛ a yerebah nɛ nɛɛ a gaa nɔnu a kɔ a tɔɔ̄ waɛloo Jɛhova. Nɛɛ a gaa nɔnu a dap gbaaloo pya wuga bu bɔŋanaloo lo ba edap ye yerebah nɛ kɔ a ɛrɛ le gbanialoo kumaloo Jɛhova, sa ye yerebah nɛ sɔ̄ a le bu taāŋa. I gbī kɔ dɛ̄dɛɛ̄ nɛɛ a gaa nɔnu a suā kɔ a nuūna e bɔŋanaloo Jɛhova le kɔ a nuūna butɔ bu edɔɔ̄. I gbī kɔ a tɔɔ̄ waɛloo pya wuga bu bɔŋanaloo lo ba ɛrɛ wereloo. Wo edoo kɔ a waɛ ye loo e’ɔbɛ yii gbo pya a naale eyerebah ye nɛ kɔ a wereloo Jɛhova. (Kam 13:20) Lo pya gbo a wee ɛrɛ sɔ̄ akii adumɛ naa yiina ye loo, esuā kɔ a ɛrɛe pya gbo a le bu bɔŋanaloo Jɛhova.—Maak 10:29, 30; 1 Pit 4:4.

12. E na anua i kɔ nɛ nɛɛ i gaa nyɔɔnɛ nɔnu nu akiiloo kiīloo nɛ le liamaā a?

¹² Tɔ̄ sɔ̄ o kɔ nɛ nɛɛ o gaa nyɔɔnɛ nɔnu nu akiiloo kiīloo nɛ le liamaā. Nu i seeasī  sɔ̄ i gaa nyɔɔnɛ nɛɛ nɔ Baibol na lo eyerebah ye nɛ kɔ a liamaā sa nyɔɔnɛ dumɛ Jizɔs. Sɔ̄ pio enɔɔ̄ etɛ̄na aā sɔ̄ lo nɛɛ bee bɔātɛ̄ enɔnu le aā sɔ̄ a bɔātɛ̄ esi enɔānu, nɛɛ a gaa nɔnu a edābeeloo kɔ nu anua a gaa nɔ Baibol na lo eyerebah ye nɛ kɔ a bɔātɛ̄ etaāŋabah Jɛhova sa lu ziī yɛɛ pya ye Ekeebee.

13. Pya amunu nu na nɛɛ a gaa nɔnu edoo lokwa a dap nyim ina loo liamaā a?

¹³ Kina kina, nɛɛ a gaa nɔnu dap nyim ina loo liamaā. Tuatua, nɛɛ a gaa nɔnu esuāloo Jɛhova, ye wereloo sa ye ɛrɛ yira bu. (Jɔn 3:16; 17:3) Lɛɛ lo nɛɛ ɛrɛ le gbanialoo kumaloo Jɛhova sa a yii gbo pya wuga a le bu bɔŋanaloo. (Hib 10:24, 25; Jem 4:8) Sɔ̄ sɔ̄ gaa kiisī, nɛɛ a gaa nɔnu a e’ɔbɛ edoo piya nu sa kiiya aaloo ye pɔrɔ. (Doonu pya Nɛɛ lɛɛratam 3:19) E yira a ɛrɛ ezū ye kɔ a nyɔɔnɛ pya dɔɔ̄na ponia kaka ue a gaa nɔ. (2 Kɔr 4:13) Lo sɔ̄ ekiīloo ye nɛ Jɛhova sa tɔgɛ lo kiīloo nɛ tɛ̄maloo eliamaā. (1 Pit 3:21; 4:2) E dee ama wee lu dee ɛɛbu nɛ dɛ̄dɛɛ̄ nɛɛ! Sɔ̄ nɛɛ a gaa nɔnu doo ziī ziī pya nu ama lokwa a dap ina loo nu a seea sī, kaɛgɛ ye sa ye yere mɛm loo lokwa a dap kiisī leere.

14. Nɛɛ a gaa nɔɛ̄nu nɛɛ etɛɛ̄ doodoo wa suā lo nɛɛ a gaa nɔɛ̄nu gaa nyim kiisī leere ni?

¹⁴ Alu ebɛɛ̄ kɔ i egerebu sɔ̄ i gaa yerebah nɛ nɛɛ i gaa nyɔɔnɛ nɔnu kɔ a nyim kiisī ina loo kiīloo nɛ le liamaā. Mɛ, a lunage ebɛɛ̄ kɔ i suā lo a le lo nɛɛ ɛrɛge taɛ lo etaāŋabah Jɛhova Bari naa e. O muɛ̄ge pya nu a tɔgɛ kɔ nɛɛ a gaa nɔnu a gbī egbaɛ̄tɔ̄ lok Jizɔs? Sɛh a aadee gbī enɔ kaka ue a le bu Baibol ni?

15. Pya e na nɛɛ a gaa nyɔɔnɛ nɛɛ nɔnu e’ɛp lokwa a dap suā lo a le nɛɛ a gaa nyɔɔnɛ nɔnu a gaa nyimge kiisī leere a?

¹⁵ Wee ɛp kɛ̄ nɛɛ a gaa nɔnu nyim kiisī doo. Bu edoba, a tɔgɛge nia loo Jɛhova ni? A wee yerege kara nɛ Jɛhova ni? (Yɔɔ 116:1, 2) Buū Baibol wee ye niage ni? (Yɔɔ 119:97) A gaa sige enɔānu eree sɔ̄ loo ni? (Yɔɔ 22:22) Enyaanage ye sīdee tɔɔ̄dum ni? (Yɔɔ 119:112) E’inage gaa nyɔɔnɛ pya ye butɔ le pya ye gbo ponia nu a gaa nɔ aābu Baibol ni? (Yɔɔ 9:1) E lo a kuī eera, a gbīge elu ziī nɛɛ Ekeebee Jɛhova ni? (Yɔɔ 40:8) Lo a le nɛɛ a gaa nɔnu naa gaa nyim kiisī bu pya sīdee ama, su kari ye bima nu anua, lɛɛ o  nyɔɔnɛ ye kɔnia ue bu fɛgɛ mɛ bu e’agaloo. *

16. Mɛ sɔ̄ na a bɔloo e’ɔbɛ enyɔɔnɛ ziī nɛɛ nɔnu a?

¹⁶ Tɔ̄ sɔ̄, o wee ɛp sɛh o lege gaa kiisī lo enyɔɔnɛ ziī nɛɛ nɔnu naa e. Bip aba ɔɔ kɔ: ‘Nɛɛ a gaa nɔnu a naa wee kpɛ̄naloo loo ye enɔānu ni? Naa wee gbī esi enɔānu ni? A gaa kiigesī lo edoo piya nu ni? A lege gaa gbaaloo pya ekwɔ sīdee yigabari ni?’ Lo o ture loo pya ebip ama na aiī, nyɔɔnɛ nɛɛ a le doo wo nɔnu le doodoo tɔ̄ maā dumɛ kɔɔ̄. Lo a le lo nɛɛ naa tɔgɛ nia loo nu a gaa nɔ sa a naa gbī enyaana ye elap dogo, o dap ɔbɛ enyɔɔnɛ lo nɛɛ nɔnu.

17. Dookɛ̄ 1 Timɔti 4:16 kɔ doo, e na dɛ̄dɛɛ̄ pya a gaa nɔɛ̄ Baibol nɛɛ edoo a?

¹⁷ I su tam doo kɔ pya nɛɛ a nyɔɔnɛ dumɛ Jizɔs nua tam a i kuī loo kaāna, e i gbī kɔ pya i gaa nyɔɔnɛ nɔnu a nyim kiisī sa liamaā. Nu anua sa i su Baibol tɔŋɛnu lo nɛɛ sa i tɔgɛ ye nu bu sīdee edana taɛ le kɔ i yiga nu i gaa tɔgɛ lo. I yere mɛm loo nɛɛ i gaa nɔɛ̄nu kɔ a yii gbo pya a le bu bɔŋanaloo. E i dap ye baatɛ̄ nɛ kɔ a su kiīloo nɛ le liamaā seea sī, kuma sɔ̄ i gaa ɛp kɛ̄ a kiisī leere doo. (Buū ekpo a le 13 naɛsī a kura “ Nu Pya A Gaa Nɔɛ̄nu Nɛɛ Edoo Lokwa Lo Nɛɛ Dap Nyim Kiisī Sa Liamaā.”) A nia i kaāna kɔ i gaa si tam a kpɔā dum ama! Doraa i biaɛfii lo edoo kuma kɛ̄ i dap doo lo enyɔɔnɛ nɛɛ nɔ Baibol bu sīdee ekiisī leere mmɛ loo liamaā.