1. Marhẹ e ru rhe taghene owian aghwoghwo na o simi arhọ?

OWIAN aghwoghwo na o simi arhọ! Marhẹ e ru rhe? Ọke i Jesu o jurhi rọ ha Matthew 28:19, 20, nọ tare: “Are i nyarhẹn, . . . ye ruẹ idibo . . . , are i bru aye rhẹ ame.” Me ye rhe kpahen ọghanronmẹ omebrurhame? Ọrana yẹ oborẹ ihworho ri guọlọ vwo arhọ ine vi ru. Ihworho ri guọlọ bromarhame ine vi vwo imwẹro taghene aye ine vwo usimi nyoma izobo otan i Jesu ọvo ọrhẹ ẹrhọmọnuhwu ọnẹyen. Ọrana yọ soriẹ ọnyikọ Peter ọ ta rẹn Ilele Kristi: “Omebrurhame [yo] simi are vwarana . . . nyoma ẹrhọmọnuhwu i Jesu Kristi.” (1 Pet. 3:21) Omarana, ohworho orho bromarhame hin, no vwo ifiẹrorhọ ro no simirhọ.

2. Me yẹ 2 Timothy 4:1, 2 o dje rẹn ọwan ri rhiẹ iyono?

² Na sabu ruẹ idibo, o fori na ten “ona uyono.” (Se 2 Timothy 4:1, 2.) Mesoriẹ? Fọkime i Jesu o jurhi rẹn ọwan: “Are i nyarhẹn, . . . ye ruẹ idibo . . . , are i rhe yono aye.” Ọnyikọ Paul ọ tare taghene a “gbromarhọ” owian na, ‘fọkime erhe ru ọnana, ne ne simi oma ọwan ọrhẹ ihworho ri kerhọ.’ Fọkiẹ iroro ọghoghanren ọnana, Paul nọ tare: “Dabu tẹnrovi . . . uyono ọnọ.” (1 Tim. 4:16) Ra mẹriẹn taghene uyono o surhobọmwu owian re ruẹ idibo na, o fori nẹ ona re yono ihworho o mwidjẹn.

3. Me ye ne yono kpahen uvuẹn urhomu-ẹmro ọnana sekpahen ọrẹ a ha uyono i Baibol mwuẹ?

³ Ọwan e yono iduduru ihworho irhomẹmro ri ha uvuẹn i Baibol na. Ọrẹn, jerẹ oborẹ e yonirin uvuẹn urhomu-ẹmro rọ vrẹnren na, a guọlọ yono aye oborẹ aye ine ru rhiẹ idibo i Kristi ri bromarhame. Uvuẹn urhomu-ẹmro ọnana, ene  yono kpahen ekwakwa isionrin erọrọ ro fori nẹ iyono i ru nẹ aye i sabu ha userhumu rẹn erẹ aye e yono mwuovwan omebrurhame.

4. Mesoriẹ o fo nẹ oyono o vwo omerhesun ọke ro yono ohworho i Baibol na? (Se ekete ra djokarhọ.)

⁴ Ọwan i vwo ẹguọlọ kpahen oborẹ e yono ihworho nẹ i Baibol na. Ana sabu se rhẹ ufi ra tẹmro buẹn phan kpahen oborẹ e vwo ẹguọlọ kpahen. Omarana, sẹ a ha uyono Oghwa Odẹrẹ phia, Uyono i Baibol ọrẹ Ukoko yanghene a ha i Baibol yono ohworho uvuẹn oghwa ye, o fori nẹ oyono na ọ kẹnoma rẹn uruemru ra tẹmro buẹn phan. Na sabu ha uphẹn rẹn i Baibol na yono ọravwọ, o fori nẹ oyono na o vwo omerhesun, nọ ji kẹnoma rẹn uruemru ra na ta kpahen ọsoso oborẹ e rhe kpahen oghwẹmro i Baibol yanghene ekete re yono na. * (John 16:12) Ha irherhe wu vwori ọke we bromarhame vwanvwọn oborẹ wu rheri vwana. Itiọrurhomẹmro, ibiẹ iyono kirighwo ọvo wu vwẹruọ ye ọke ọrana. (Heb. 6:1) Ọrẹn, ẹgbukpe buebun rhe ne, wu yono ekwakwa buebun wu rheri vwarana ne, omarana kẹnoma rẹn uruemru re yono ohworho kemru kemru ukwọgbọ.

5. (a) Lele oborẹ ọ ha uvuẹn 1 Thessalonians 2:13, me ya guọlọre nẹ ọrẹ ọwan e yono na o vwẹruọ ye? (b) Marhẹ ene ru ha urhebro rẹn ọre yono nọ ta kpahen oborẹ o yono na?

⁵ A guọlọre nẹ ihworho re yono i vwẹruọ oborẹ aye e yono nẹ i Baibol na. (Se 1 Thessalonians 2:13.) Marhẹ ene ru ruẹ ọrana? Jirie rẹn ohworho we yono na nọ ta kpahen ekwakwa ro yono. Ukperẹ wu ne dje oghwẹmro i Baibol ephian rẹn ohworho we yono na, ta riẹn no dje ezẹko fiotọre wẹn. Ha userhumu riẹn rhe oborẹ i Baibol na o ru hobọte yi. Nọ yen enọ kirighwo ri sekpahen oborẹ o yono na, nọyẹ oborẹ o roro kpahen ekete ro seri na. (Luke 10:25-28) Jerẹ udje, nọ yen: “Marhẹ ekete i Baibol ọnana o ru ha userhumu wẹn mẹrẹn iruemru irhorhomu i Jehova vwrurhe?” “Marhẹ wu ne ru mẹrẹn erere nẹ irhomẹmro i Baibol na?” “Me wu roro kpahen oborẹ wu yono ne na?” (Prov. 20:5) Oborẹ ọ mai ghanren yẹ oborẹ ohworho re yono na, o vwo ẹguọlọ kpahen iyono na te ọrhẹ oborẹ ọ haye ruiruo lele, orhiẹ oborẹ o yono bun te-e.

6. Mesoriẹ ọ ghanren na ha oyono rọ ten ona lele oma ọke re ye yono ihworho?

⁶ Ọke we ye yono ihworho i Baibol na, wa ha oyono rọ ten ona lele oma? We rhe ruẹ omaran, wu na sabu nọ yen nọ  ta wẹn kpahen oborẹ wu ha uyono na phia lele, ọrhẹ oborẹ wu ru ha i Baibol na yono ohworho na. O fori wu vwo omeriotọre orhianẹ wu guọlọ ru riarorhọ uvuẹn ona wa ha yono. (Haye vwanvwọn Acts 18:24-26.) Orho ru, nọ oyono rọ ten ona na, sẹ ohworho wa ha i Baibol yono o vwẹruọ uyono na. Wu na ji sabu ta rẹn omizu na no yono ohworho na orhianẹ wu ne riẹ ekete uvwre ọkprughwre owu yanghene ikprughwre buebun. Ọrana ọnọ lẹrhẹ uyono na rhiẹ ọrẹ ọke ephian, ji lẹrhẹ ohworho re yono na rhe taghene uyono na ọghoghanren. Wu vwe roro taghene ọnana uyono “ọnọ” ọvo-o, ọwọrọ ọ sabu yonie-e. Fọkime, wu guọlọ oborẹ ọ mai rhomu rẹn ọrẹ we yono na, nọ sabu ru riarorhọ uvuẹn uyono sekpahen urhomẹmro na.

7. Me yọ nọ ha userhumu rẹn ọre yono na vwo omamerhomẹ kpahen oborẹ o yono na?

⁷ O fori nẹ ohworho we yono na ọ mẹrẹn oruru ọrhẹ imwẹro wu vwo kpahen irhomẹmro ri ha Baibol na. (1 Thess. 1:5) Ọke ọrana, oma nọ nọ merhiẹn kpahen oborẹ o yono na. Orho serhọ, ta riẹn oborẹ iruemru-urhi Baibol o ru ha userhumu wẹn ne. Ọke ọrana nọ nọ mẹrẹnvwrurhe taghene i Baibol na o vwo ọkpọvi ri na yẹ ye erere.

8. Me wu na sabu haba uyono i Baibol na, mesoriẹ wu ne ruie?

⁸ Uvwre ọke uyono na, ta rẹn ohworho we yono na ikuegbe akpenyerẹn imizu ri dẹrughwaroghwu aruẹ ebẹnbẹn enẹyen, ri ji fie kparobọ. Wu na sabu ha use rẹn omizu uvuẹn ukoko na ro vwo udje rọ nọ sabu ha userhumu riẹn. Yanghene wu na sabu guọlọ omamọ idje uvuẹn jw.org usuẹn irhomu-ẹmro na “Baibol na o Wene Akpenyerẹn.” * Aruẹ irhomu-ẹmro enana ọrhẹ ividio sansan, ina ha userhumu riẹn mẹrẹn ọghanronmẹ rọ nọ ha iruemru-urhi Baibol ruiruo uvuẹn akpenyerẹn yen.

9. Marhẹ wu ne ru ha urhebro rẹn ohworho we yono no ghwoghwo oborẹ o yono rẹn ekrun ọrhẹ igbehian yen?

⁹ Orhianẹ ohworho we yono na ọ rọnmọ ne, ọreva ye o ji yono i Baibol? Orhiomara-an, ha use riẹn no kwomakugbe uyono na. Ha urhebro riẹn no ghwoghwo oborẹ o yono na rẹn ekrun ọrhẹ igbehian yen. (John 1:40-45) Izede ọgo? Wu na sabu nọ yen: “Marhẹ wu ne ru dje urhomẹmro ọnana fiotọre rẹn ekrun ọnọ?” yanghene “Oghwẹmro i Baibol ọgo wu na ha  dje ọnana rẹn ugbehian?” Nyoma izede ọnana, we yono ohworho na oborẹ ono ru rhiẹ oyono. Omarana, orho mwuovwan ne, nọ nọ sabu rhiẹ oghwoghwẹmro Uvie na ro vwo ji bromarhame. Wu na sabu nọ ohworho we yono na sẹ o rhe ohworho ọrọrọ rọ guọlọ yono i Baibol na. Ọrhọ havwiẹ, guọliẹ ogege ne wu ha uyono i Baibol mwu riẹn. Kporo ividio na riẹn Marhẹ Uyono i Baibol ọ Havwọ? *

10. Jerẹ oborẹ ọ ha 1 Thessalonians 2:7, 8, marhẹ oyono ono ru hẹrokele udje i Paul?

¹⁰ Imizu ine vi dje ọdamẹ okokodo phia rẹn erẹ aye e yono. Aye i ni aye rhiẹ ihworho ri ne rhiẹ imizu uvuẹn ukoko na ọke rọ sa na. (Se 1 Thessalonians 2:7, 8.) Ọ phẹrẹ aye ine tiobọnu igbehian uvuẹn akpọ na, ji ru ewene ro fori ne aye i sabu rhiẹ ugbehian i Jehova-a. O fori na ha userhumu rẹn aye guọlọ omamọ igbehian uvuẹn ukoko na. Rhiẹ ugbehian rẹn ọrẹ we yono na, nyoma wu na ghwọghọ ọke kugbe rhẹ ọye, orhiẹ ọke uyono i Baibol ọvo-o, ọrẹn uvuẹn ọke erọrọ. Wu na sabu ha ifonu se yi, dje urhomu vwe yi nyoma ifonu, yanghene kọn bruie bọmọke wu na rharhumu ye yonie, ne wu djephia taghene wu vwo ọdamẹ kpahiẹn.

11. Me ya guọlọre nẹ ihworho ọwan e yono i mẹrẹn uvuẹn ukoko na, mesoriẹ?

¹¹ A tare taghene: “Owuọwan ọvo o vwo vwiẹ ọmọ-ọ.” Ana sabu ta taghene: “Ọsoso ukoko na ye ruẹ idibo.” Ọrana yọ soriẹ iyono i Baibol ri ten ona, e dje ihworho aye e yono rẹn imizu erọrọ uvuẹn ukoko na, ri na sabu ha userhumu rẹn aye. Ohworho we yono na nọ nọ sabu riamerhen okugbe rhẹ ihworho Osolobrugwẹ, ri na sabu hobọtua ye. A guọlọre nẹ kohworho kohworho ra ha i Baibol yono, o vwo ẹhẹn ro te otọre taghene ọye ọ ha ukoko na jeghwai usuẹn ekrun ọwan. A guọlọre nọ dabu tikẹrẹ imizu ukoko na ephian. Ọrana nọ nọ ha userhumu riẹn sabu dobọ igbehian yen ri vwa ga i Jehova ji. (Prov. 13:20) Orhianẹ igbehian yen ri vwa ga i Jehova i ten riẹn, nọ nọ sabu mẹrẹn omamọ igbehian uvuẹn ukoko i Jehova.—Mark 10:29, 30; 1 Pet. 4:4.

12. Mesoriẹ o fo na ta kpahen omẹhakpahontọre ọrhẹ omebrurhame rẹn ohworho re yono?

¹² Dabu ta kpahen omẹhakpahontọre ọrhẹ omebrurhame Olele Kristi. Fọkime  oborẹ ọsoriẹ a ha i Baibol yono ihworho yẹ, ọrẹ ana ha userhumu rẹn aye rhiẹ idibo ri bromarhame. Uvwre ibiamo ezẹko ra ha uyono i Baibol mwu hin, ọrhẹ ọke ohworho re yono na ọ tuẹn uyono rhọ ne, jenẹ ohworho we yono na o vwẹruọ ye taghene oborẹ ọsoriẹ a ha i Baibol yonie, yẹ ọrẹ ọnọ ga i Jehova ji rhiẹ Oseri Jehova.

13. Idjaghwẹ ego yẹ ohworho we yono na ọ kpara nọ sabu mwuovwan omebrurhame?

¹³ Nẹ udjoghwẹ owu riẹ ọrọrọ, ohworho ro ghini vwo ẹguọlọ kpahen i Babiol na ọnọ sabu nyamwu ẹkẹ ro no bromarhame! Ọrukaro, ọre yono na ono rhe jeghwai vwo esegburhomẹmro ọrhẹ ẹguọlọ kpahen Jehova. (John 3:16; 17:3) Ọke ọrana ọre yono na no vwo omamọ onyerẹnkugbe rhẹ i Jehova kugbe imizu uvuẹn ukoko na. (Heb. 10:24, 25; Jas. 4:8) Orho ru, ohworho re yono na nọ tiẹn orharhere iruemru ji ghwẹriẹ nẹ edandan yen. (Acts 3:19) Ọrẹn uvwre ọke ọrana, esegburhomẹmro ọnẹyen no mwuie ghwoghwo iyẹnrẹn esiri na rẹn awọrọ. (2 Cor. 4:13) Orho ru, nọ homakpahontọre rẹn Jehova ji dje yi phia nyoma omebrurhame. (1 Pet. 3:21; 4:2) Ọrana ẹdẹ aghọghọ rẹn ihworho ephian! Ohworho re yono na ọrhọ kpare udjoghwẹ owuowu nọ sabu mwuovwan omebrurhame, jirie ne wu ji ha urhebro riẹn no rho ruẹ riarorhọ.

14. Marhẹ oyono ono ru ni eru riaro ohworho ro yono na so?

¹⁴ O fori ne vwo erhionrin ọke ra ha userhumu rẹn ohworho re yono no mwuovwan omẹhakpahontọre ọrhẹ omebrurhame. Ọrẹn uvuẹn erhirhiẹ owu, o fori ne rhe sẹ ohworho na o vwo oruru rọ nọ ga i Jehova. Wa mẹrẹn oka ro djephia taghene ọ damoma rọ nọ huvwele ekama i Jesu? Gbinẹ ọ guọlọ ghwai rhe kpahen iyono i Baibol na ọvo?

15. Me yẹ oyono na ono niso uvuẹn ohworho ro yono na?

¹⁵ Rhe nie ọkezẹko sẹ ohworho we yono na o ruẹ riaro. Jerẹ udje, ọ nẹrhomo vwe i Jehova? Ọ ta ọsoso edamẹ enẹyen riẹn? (Ps. 116:1, 2) Ọ riamerhen isese i Baibol na? (Ps. 119:97) O riẹ uyono ukoko ọke ephian? (Ps. 22:22) O ruẹ ewene ra guọlọre uvuẹn akpenyerẹn yen ne? (Ps. 119:112) O ghwoghwo oborẹ o yonorin rẹn  ekrun ọrhẹ igbehian yen? (Ps. 9:1) Ọrọ mai ghanren, ọ ghini guọlọ rhiẹ owuọwan usuẹn Iseri Jehova? (Ps. 40:8) Orhianẹ ọre yono na o vwo ruẹ riaro uvuẹn erhirhiẹ enana-a, damoma guọlọ oborẹ ọsoriẹ ne wu ji lelie ta kpahiẹn. *

16. Me yo no djephia taghene a dobọ uyono na ji?

¹⁶ Rhe nie sua ọkezẹko sẹ wu ne rhe ji lele ohworho na yono. Nọ oma: ‘Ohworho mie yono na o mwuegbe rhẹ uyono na? O vwo ọdamẹ ro no riẹ uyono ukoko? O ji vwo erharhere iruemru? O ji riẹ ẹga efian?’ Ẹkpahenrhọ na orhiẹ ee, ọrẹn e ji yonie, nọ nọ họhọ ọke ohworho o yono ohworho rọ vwọ guọlọ nẹ omayen ọ kpọtọ, oborẹ a rhẹnrhẹn! Orhianẹ ọre yono na o vwo ọdamẹ kpahen oborẹ o yono-o, ọ ji guọlọ ruẹ ewene uvuẹn akpenyerẹn ye-en, o fo ne yonie-e.

17. Lele oborẹ ọ ha 1 Timothy 4:16, me yẹ iyono ephian ine ruo?

¹⁷ O fori na ha owian re ne ruẹ idibo ghanghanren, a ji guọlọ ha userhumu rẹn ihworho re yono mwuovwan omebrurhame. Ọrana yọ soriẹ o fo na ha uphẹn rẹn i Baibol na no yono aye, ji yono aye rhẹ oruru kugbe imwẹro. Ana ha urhebro rẹn ọre yono na no mwu igbehian uvuẹn ukoko na. Ana ji kanrunumwu ọghanronmẹ omẹhakpahontọre ọrhẹ omebrurhame, ene rhe ji nie sua ọkezẹko sẹ ọre yono na o ruẹ riaro. (Se ekpeti na, “ Oborẹ Oyono Ono Ruo nẹ Ohworho ro Yono ọ Sabu Mwuovwan Omebrurhame.”) Oma ọ merhen ọwan taghene e vwobọrhọ owian ro simi arhọ! Jene vwo omwemẹ re ne ruẹ ekete omẹgbanhon ọwan o teri ha userhumu rẹn ihworho re yono mwuovwan omebrurhame.