1. Dikon nos por bisa ku e trabou di hasi hende disipel ta salba bida?

E TRABOU di hasi hende disipel ta salba bida! Dikon nos por bisa esei? Na Mateo 28:19 i 20, Hesus a duna e siguiente mandamentu: “Bai, i hasi hende . . .  disipel, i batisá nan.” I manera nos sa kaba, boutismo ta un rekisito pa tur hende ku ke ser salbá. Un hende ku ke batisá mester tin fe ku e por ser salbá solamente pasobra Hesus a duna su bida komo sakrifisio i a ser resusitá. Ta p’esei Apòstel Pedro a bisa e kristiannan: “Boutismo, ta loke ta salba boso . . . pa medio di e resurekshon di Hesukristu.” (1 Ped. 3:21) P’esei, ora un disipel nobo batisá, e ta haña e oportunidat di ser salbá.

2. Di akuerdo ku 2 Timoteo 4:1 i 2, ki tipo di maestro nos mester ta?

² Pa nos por hasi hende disipel, nos mester kultivá e “arte di siña.” (Lesa 2 Timoteo 4:1, 2.) Dikon? Pasobra Hesus a duna nos e mandamentu: “Bai, i hasi hende . . .  disipel . . . i siña nan.” Apòstel Pablo a bisa ku ta nesesario pa nos “perseverá” den e trabou ei “pasobra hasiendo esei lo bo salba bo mes i tambe esnan ku ta skucha bo.” Ku bon motibu Pablo a bisa: “Presta atenshon konstantemente na . . . e siñansa ku bo ta duna.” (1 Tim. 4:16) Ya ku pa hasi hende disipel nos mester siña nan, nos ke pa nos siñansa ta lo mihó posibel.

3. Kiko nos lo mira den e artíkulo akí?

³ Nos ta siña miónes di hende e bèrdatnan ku tin den  Beibel. Pero manera nos a mira den e artíkulo anterior, nos ke sa kon pa yuda mas studiante di Beibel yega na boutismo. Den e artíkulo akí, nos lo mira sinku kos mas ku tur maestro mester hasi pa yuda studiante yega na boutismo.

4. Dikon un maestro mester ehersé dominio propio ora di dirigí estudio di Beibel? (Wak tambe e nota.)

⁴ Generalmente, ora nos gusta algu hopi, nos ta papia hopi tokante dje. I nos ta stima e siñansanan di Beibel. Pero ora nos ta dirigí un estudio—sea ta estudio di Beibel, Estudio di Toren di Vigilansia òf Estudio di Beibel di Kongregashon—nos no mester papia hopi. Pa un maestro por usa Beibel pa siña hende, e mester ehersé dominio propio i no purba di splika tur loke e sa tokante un teksto òf tópiko di Beibel. * (Huan 16:12) Pensa riba kuantu bo tabata sa tokante Beibel tempu bo a batisá i kuantu bo sa awor. Probablemente, bo tabata sa solamente e kosnan fundamental. (Heb. 6:1) I kiko di awor? Bo konosementu a oumentá hopi, pero esei tabata un proseso ku a dura hopi aña. P’esei ora di dirigí estudio, no purba di siña un studiante nobo tur kos den un biaha.

5. (a) Di akuerdo ku 1 Tesalonisensenan 2:13, kiko nos ke pa nos studiante komprondé? (b) Kon nos por animá e studiante pa splika loke e ta siñando?

⁵ Nos ke pa nos studiante komprondé ku tur loke e ta siña ta bini di Beibel. (Lesa 1 Tesalonisensenan 2:13.) Kon nos por hasi esei? Pidi e studiante pa splika bo loke e ta siñando. En bes di semper splik’é teksto di Beibel, pidié splika bo algun di nan. Yuda e studiante mira kon Palabra di Dios ta apliká na dje personalmente. Hasié pregunta pa haña sa loke realmente e ta pensa i sinti tokante e teksto bíbliko ku el a lesa. (Luk. 10:25-28) Por ehèmpel, puntr’é: “Kon e teksto ei a yuda bo mira un kualidat di Yehova?” “Kon e bèrdat di Beibel ei por yuda bo?” “Kiko bo ta pensa tokante loke bo a kaba di siña?” (Pro. 20:5) E kos di mas importante no ta kuantu e studiante sa, pero kuantu e ta stima i ta apliká loke e sa.

6. Dikon ta bon pa pidi un maestro ku eksperensia kompañá bo na bo estudio?

⁶ Bo tin kustumber di pidi un maestro  ku eksperensia kompañá bo na bo estudio? Si ta asina, pidié su opinion tokante e manera ku bo ta dirigí estudio. Puntr’é si bo ta usa Beibel pa siña hende. Si bo ke mehorá bo abilidat di siña, bo mester ta humilde. (Kompará ku Echonan 18:24-26.) Despues, puntra e publikadó ku mas eksperensia si e ta pensa ku e studiante ta komprondé loke e ta siñando. Bo por pidi e publikadó tambe pa dirigí e estudio pa bo si bo no t’ei. Di e manera ei, e estudio ta keda regular i bo studiante lo mira e importansia di e estudio. Nunka pensa ku ta “bo” estudio i ku niun otro hende por dirigié. Al fin al kabo, bo ke lo mihó pa e studiante i pa e sigui siña mas tokante e bèrdat.

7. Kiko por yuda un studiante stima loke e ta siñando?

⁷ Un studiante mester nota bo entusiasmo i konvikshon—esta, ku bo ta stima loke bo ta siña for di Beibel i ta kere den dje. (1 Tes. 1:5) E ora ei, probablemente lo e ta mas entusiasmá ku loke e ta siñando. Ora ta apropiá, bis’é kon algun prinsipio bíbliko spesífiko a yuda bo. Esei lo yud’é mira ku e konsehonan di Beibel por yuda e tambe.

8. Kiko mas bo por hasi pa yuda bo studiante, i dikon lo bo hasi esei?

⁸ Durante e estudio, konta bo studiante tokante ruman ku tabatin e mesun difikultatnan kuné. Bo por bai e estudio ku un ruman di kongregashon ku e studiante por imitá su bon ehèmpel. Òf usa eksperensia animante ku tin riba jw.org bou di e seri “Beibel Ta Kambia Bida di Hende.” * Artíkulo i vidio asina por yuda bo studiante mira ku sigui prinsipio di Beibel ta e mihó desishon ku e por tuma.

9. Kon bo por animá un studiante pa kompartí loke e ta siñando ku su famia- i amigunan?

⁹ E studiante ta kasá òf tin un partner? E tambe ta studiando? Si no ta asina, invit’é pa djòin e estudio. Animá bo studiante pa kompartí tur loke e ta siñando ku su famia- i amigunan. (Huan 1:40-45) Kon? Puntr’é: “Kon bo por splika e punto ei na bo famia?” òf “Ki teksto lo bo usa pa proba esei na un amigu?” Di e manera ei, bo ta entrenando e studiante pa  e bira un maestro. I ora e ta kla, e por bira un publikadó no batisá. Puntra e studiante si e konosé otro hende ku lo ke studia Beibel. Si ta asina, kisas e por traha un afsprak pa mustra e hende e vidio Kon un Kurso di Beibel Ta Bai? *

10. Kon un maestro por imitá e ehèmpel di Pablo skirbí na 1 Tesalonisensenan 2:7 i 8?

¹⁰ Abo, komo maestro, mester demostrá interes sinsero den bo studiantenan. Mira kada un di nan komo bo futuro ruman. (Lesa 1 Tesalonisensenan 2:7, 8.) No ta fásil pa un studiante laga su amigunan den mundu i hasi e kambionan nesesario pa sirbi Yehova. P’esei, nos mester yud’é haña berdadero amigu den kongregashon. Sea un amigu pa bo studiante. Pasa tempu kuné, no solamente durante e estudio, pero tambe na otro okashon. Entre su estudionan, hasi un yamada, manda un mensahe òf hasi un bishita kòrtiku na su kas. Si bo hasi esei, bo studiante lo sinti ku realmente bo ta interesá den dje.

11. Kiko nos ke pa nos studiantenan haña den e kongregashon, i dikon?

¹¹ Un proverbio ta bisa: “Tur hende den un pueblo ta nesesario pa lanta un mucha.” Nos por adaptá e proverbio ei pa: “Tur ruman den kongregashon ta nesesario pa hasi un disipel.” Un bon maestro ta introdusí su studiante na otro ruman den kongregashon ku por ta un bon influensia p’e. Di e manera ei, e studiante tin oportunidat di asosiá ku adoradó di Dios ku por yud’é den sentido spiritual i emoshonal. Nos ke pa kada studiante sinti nan na kas den kongregashon i sinti ku nan ta parti di nos famia spiritual. Nos ke pa nan sinti nan atraí pa e amor i kariño ku ta eksistí den nos hermandat kristian. Asina ei, lo ta mas fásil pa nan stòp di asosiá ku hende ku no por yuda nan stima Yehova. (Pro. 13:20) I si nan amigunan di ántes bira lomba pa nan, nan sa ku nan por haña berdadero amigu den Yehova su organisashon.—Mar. 10:29, 30; 1 Ped. 4:4.

12. Dikon nos mester papia ku nos studiante tokante dedikashon i boutismo?

¹² Semper papia tokante e importansia di dedikashon i boutismo. Al fin i al  kabo, e motibu ku nos ta studia Beibel ku un hende ta pa yud’é sirbi Yehova i yega na boutismo. Despues di un par di luna di un estudio di Beibel regular, i spesialmente despues ku e studiante a kuminsá asistí na reunion, e studiante mester komprondé ku e meta di su estudio ta pa yud’é bira un Testigu di Yehova.

13. Kiko un studiante mester hasi pa yega na boutismo?

¹³ Pa un studiante yega na boutismo e mester hasi vários kos! Promé, e mester konosé Yehova, siña stim’é i pone fe den dje. (Huan 3:16; 17:3) Djei, e mester bira amigu di Yehova i di e rumannan den kongregashon. (Heb. 10:24, 25; Sant. 4:8) E ta stòp ku mal hábito i ta arepentí di su pikánan. (Echo. 3:19) Na e mesun tempu, su fe ta motiv’é pa papia tokante e bèrdat ku otro hende. (2 Kor. 4:13) Finalmente, e ta dediká su mes na Yehova i batisá. (1 Ped. 3:21; 4:2) Esei ta un dia masha spesial pa henter e kongregashon! Segun ku e studiante ta hasi e kosnan ei pa yega na boutismo, sigui elogi’é. I semper anim’é pa sigui riba e kaminda korekto.

14. Ki pregunta un maestro mester hasi su mes pa evaluá progreso di un studiante?

¹⁴ Ta bèrdat ku nos mester tene pasenshi ora nos ta yuda un studiante progresá pa yega na dedikashon i boutismo. Pero, tin biaha nos mester purba di haña sa si realmente e ke sirbi Yehova Dios. Puntra bo mes: ‘E studiante ta demostrá ku e ta purbando di obedesé e mandamentunan di Hesus? Òf e ke djis siña kos interesante for di Beibel?’

15. Ki progreso un maestro mester mira den un studiante?

¹⁵ Analisá regularmente progreso di e studiante. E ta bisa ku e tin un amistat ku Yehova? E ta hasi orashon na Yehova? (Sal. 116:1, 2) E gusta lesa Beibel? (Sal. 119:97) E ta asistí regularmente na reunion? (Sal. 22:22) E ta hasiendo e kambionan nesesario den su bida? (Sal. 119:112) E tin kustumber di konta su famia- i amigunan di loke e ta siñando? (Sal. 9:1) I mas importante ainda, e ke bira un Testigu di Yehova? (Sal. 40:8) Si bo studiante no ta hasiendo progreso  den niun di e áreanan ei, purba di saka afó dikon. Despues, papia kuné na un manera bondadoso pero franko. *

16. Kiko por indiká ku no ta bale la pena pa sigui ku un estudio?

¹⁶ Tempu tempu, evaluá si bo mester sigui ku un estudio. Puntra bo mes: ‘E studiante ta prepará pa e estudio? E ta interesá pa asistí na e reunionnan? El a stòp ku mal hábito? El a sali for di religion falsu?’ Si e kontesta pa e preguntanan ei ta nò i si bo sigui studia kuné, lo bo ta meskos ku un hende ku ta duna lès di landa na un persona ku no ke drenta awa. Si e studiante no ta balorá loke e ta siñando i no ta dispuesto pa hasi kambio, ki sentido tin pa sigui ku e estudio?

17. Di akuerdo ku 1 Timoteo 4:16, kiko tur maestro mester hasi?

¹⁷ Nos ta tuma nos responsabilidat di hasi hende disipel na serio, i nos ke pa nos studiantenan yega na boutismo. P’esei, usa Beibel pa siña e studiantenan i siña nan ku entusiasmo i konvikshon. Animá nan pa sera amistat den kongregashon. Anto semper enfatisá e importansia di dedikashon i boutismo, i tempu tempu evaluá progreso di e studiante. ( Wak e kuadro “Un Maestro Mester . . . .”) Siguramente nos lo ta masha felis di partisipá den e trabou ku ta salba bida! P’esei, laga nos ta determiná pa hasi nos esfuerso pa yuda studiante yega na boutismo.