1. Kede mekera medengei el kmo a ureor er a omeruul el disaiplo a olsobel a klengar?

TIA el ureor er a omeruul el disaiplo a olsobel a klengar! Kede mekera medengei? A Jesus er a longelechel er a rechad el mo meruul a tekoi el ngar er a Mateus 28:19, 20, e ngdilu el kmo: “Morael . . . e moruul er tir el mo obengkek, e molecholb er tir.” Ngua ngera klungel a ultutelel a techolb? A lsoad el mo suobel e ngkired el mo metecholb. Ngike el soal el mo metecholb a kirel loumerang el kmo a osobel a ngar ngii e le Jesus a tilengetengii a klengar er ngii e milekiis er a kodall. Sei a uchul me a apostol Petrus a dilu er a rekldemel el Kristiano el kmo: “Me a techolb . . . a osebelemiu . . . el oeak okisel a Jesus Kristus.” (1 Pe. 3:21, NW) Me a beches el disaiplo sel bo lemetecholb, e ngmo er ngii a omeltkel el mo suobel.

2. A 2 Timothy 4:1, 2 ngmelekoi el kmo ngkirel mo uangera rolel a dolisechakl?

² Ngkired el mo meduch el “olisechakl” a lsoad el meruul er a remo disaiplo. (Monguiu er a 2 Timothy 4:1, 2.) E ngera uchul? E le Jesus a milengelechel er kid el kmo: “Morael . . . e moruul er tir el mo obengkek, . . . e molisechakl er tir.” A apostol Paulus a dilu el kmo, bo el blak a rengud er tia el ureor e le bo deuaisei e ‘kede osebelid kid me tirkel orrenges er kid.’ Sei a uchul me ngdilu el kmo: “Bo mkerekikl [a] . . . tekoi el molisechakl.” (1 Ti. 4:16) Ngkmal soad el mo ungil lolisechakl, e le osisechakl a dmak ngii me a omeruul disaiplo.

3. Ngera kede mo mesaod er tia el suobel el kirel a rolel a dosuub a Biblia lobengterir a rechad?

³ Kid a mesuub a Biblia lobengterir a rebetok el miliol el chad er a beluulechad el rokir. Engdi ngua dulsaod er sel mlo merek el suobel, ngsoad el mo medengelii a rolel e ngsebeched el ngosuterir  a rebetok er tir el mo metecholb el mo disaiplo er a Jesus Kristus. Ngar tia el suobel, e kede mo mesaod a lmuut el eim el tekoi el kirir tirke el olisechakl el meruul el ngosuir a chad el mesuub el olengeriakl el mo nguu a techolb.

4. Ngera me a chad el olisechakl a diak el kirel el di mengedecheduch sel losuub a Biblia lobengkel a chad? (Dirrek el momes er a footnote.)

⁴ Ngkmal soad aike el dolisechakl er a Tekingel a Dios. Me nglocha mo soad el di mengedecheduch. Me nguaisei, engdi a doungerachel er a Omesubel a Ongkerongel, Omesubel a Biblia el Ongdibel, me a lechub a omesubel a Biblia er a blil a chad, e ngdiak el kired el di mengedecheduch. Ngsoad el mo ungil a duch er kid el olisechakl el ousbech er a Biblia, me ngkired el mo kerekikl me ngdiak di dongedecheduch e dolasem el mesaod a bek el tekoi el dodengei el kirel a bades er a Biblia. * (Jn. 16:12) Ka momekesiu er a klungel a klemedengei er kau er a Biblia er sera ometecholb me chelechang. Seikid el taem, e ke di mle medengei aike el meklou a ultutelel el osisecheklel a Biblia. (Heb. 6:1) Nguluusbech er a klou el taem el mo sebechem el suub aike el modengei er chelechang, me lak molasem el olisechakl er a chad a rokui el tekoi er a di ta el taem.

5. (a) A doltirakl er a 1 Thesalonika 2:13, e ngera soad a chad el dosuub lobengkel a bo lodengei el kirel a omesubel? (b) Ngmekera dolisiich er ngii el mo mesaod el kirel aike el tekoi el losuub?

⁵ Ngsoad a chad el mesuub a bo lodengei el kmo a tekoi el losuub a mlara mlukreng el Tekingel a Dios. (Monguiu er a 1 Thesalonika 2:13.) Ngmekera doruul er tiang? Molisiich er ngii el mo mesaod el kirel a tekoi el losuub. Molengit er ngii me losaod a bebil bades er a Biblia leko er kau er a bai di el kau el blechoel el mesaod el mo er ngii. Mngesuir el mo mesa rolel e ngsebechel loltaut a Tekingel a Dios er a klengar er ngii. Moker er ngii a ker el rullii el mo omdasu e dirrek louchais aike el ngar er a rengul el kirel a bades el longuiu. (Lk. 10:25-28) El ua tiang, ngsebechem loker er ngii el kmo: “Ngmekera tia el bades e ngosukau el mesa ta er a blekerdelel a Jehovah?” “Ngmekera tekoi el dirk msilubii er a Biblia a lengesukau?” “Ngua ngera uldesuem er a tekoi el dirk msilubii?” (Osi. 20:5) Sel klou a ultutelel a klungel a bltkil a rengul me a otutel er aike el tekoi el lodengei, el diak el klungel a klemedengei er ngii.

6. Ngera uchul me nglocha ungil a dolengit er a ta er a chad el meduch el olisechakl me lobengked el mo mesuub lobengkel a chad?

⁶ Kau ke mla olengit er a ta er a meduch el olisechakl me ngobengkem el mo mesuub lobengkel a chad? A leuaisei, e ngsebechem el olengit er ngii me ngouchais a uldesuel el kirel a rolel a omolisechakl me a rolel a obecherei a Biblia me  lolisechakl. Ngkirel mo ngariou a rengum a lsekum e ngsoam el lmuut el mo ungil a duch er kau el olisechakl. (Momekesiu er a Rellir 18:24-26.) A uriul, e ngsebechem el oker er a uldesuel el kirel a chad el mesuub el kmo ngmedengei a tekoi el losuub me a lechub e ngdiak. Ngdirrek el sebechem el olengit er ngii el mo mesuub lobengkel ngika el chad sel bom dibus el ta el sandei me a lechub e ngbetok el sandei. Tia mo rullii a omesubiu me ngdi blechoel el ngar ngii e dirrek el rullii a chad el mesuub el mo mesa klungel a ultutelel a omesubel. Lak momdasu el kmo ngika “study” er kau me ngdiak a sebechel mesuub lobengkel. Kau a soam a kot el ungil el kirel, me bo el sebechel el melemolem el mesuub el kirel a klemerang.

7. Ngera sebechel ngosuir a chad el mesuub el mengal mo soal aike el tekoi el losuub?

⁷ A chad el mesuub a kirel mesa el kmo ngkmal soam e dirrek el oumerang aike el lolisechakl a Biblia. (1 Th. 1:5) Seikid e ngmengal mo soal aike el tekoi el losuub. A di lungil, e ngsebechem el louchais er ngii er a rolel e a omellach er a Biblia a mla ngosukau. Seikid e ngmo mtebengii el kmo a omellach er a Biblia a dirrek el sebechel el ngosuir.

8. Ngera lmuut el ta er a tekoi el sebechem el rullii el ngosuir a chad el mesuub, e ngera me ke meruul uaisei?

⁸ Ngar er a temel omesubiu e mouchais er ngii el kirir tirke el mlo chelebangel a osisiu el blekeradel el lechilebangel me a rolel e te mlo mesisiich er ngii. Ngsebechem el olengit er a ta er a chad er a ongdibel el kerebai er ngii a sebechel ngosuir ngike el mesuub me ngobengkem. Me a lechub e ke osiik a experience el sebechel melisiich er ngii el ngar er a suobel el “The Bible Changes Lives” * er a jw.org. A chouaika el suobel me a video a mo ngosuir el mesa el kmo ngllomeserreng a loltaut a omellach er a Biblia er a klengar er ngii.

9. Ngmekera omolisiich er a chad el mesuub el mo ouchais aike el tekoi el losuub el mora telungalek er ngii me a resechelil?

⁹ A lsekum a chad el mesuub a bechiil, e a bechil ngdirrek el mesuub? A lak, e mongemedaol er ngii el me teloi er a omesubiu. Molisiich er a chad el mesuub el mo ouchais aike el tekoi el losuub el mora telungalek er ngii me a resechelil. (Jn. 1:40-45) Ngokiu a ngera el rolel? Ngsebechem el oker er ngii el kmo: “Ngmekera omosaod er tia el tekoi el mora telungalek er kau?” me a lechub “Ngera el bades a sebechem lousbech el mesaod er tia el tekoi el mora sechelim?” Ngokiu tia el rolel, e ke osisecheklii a chad  el mesuub el mo olisechakl. E sel bo el rredemelel, e ngmo omuchel el oldingel el ta er a dirkak el metecholb el publisher. Ngsebechem el oker er ngii a lsekum ngmedengelii a chad el soal mesuub er a Biblia. E seikid e ngsebechem el mereched el mo mengedecheduch er ngii el chad e olengit el mo mesuub lobengkel. Ngdirrek el sebechem el lochotii er ngii a video el Ngera Meketmokl er a Omesubel a Biblia? *

10. Ngmekera chad el olisechakl e oukerebai er a Paulus el ua losaod a 1 Thesalonika 2:7, 8?

¹⁰ Tirke el olisechakl a kirir el olecholt el kmo te kmal melatk er tirke el losuub lobengterir. Momes er tir el ta er a mo beches el odam me a lechub e ngodos er kau er a klereng. (Monguiu er a 1 Thesalonika 2:7, 8.) Ngdiak lebeot a bo lecheroid er a resechelirir er tia el beluulechad e bo lolodech a tekoi er a klengar er tir me bo el sebechir el mesiou er a Jehovah. Ngkired el ngosuterir el mo metik er a remera el sechelirir er a ongdibel. Bo msechelil a chad el mosuub el obengkel loeak sel mobengkel er a kuk bebil er a taem, el diak di el temel a omesubiu. A dengua, text, me a kedeb el odngelem er a di mitil a taem a ochotii el kmo ke kmal melatk er ngii.

11. Ngsoad tirke el dosuub lobengterir a bo lebetik a ngera er a ongdibel, e ngera uchul?

¹¹ Ngmla medung el kmo: “Ngousbech er a beluu el mekurulii a ngalek.” Me ngsebeched el melekoi el kmo: “Ngousbech er a ongdibel el rullii a disaiplo.” Sei a uchul me a remeduch el olisechakl er a Biblia a ngosuterir tirke el mesuub lobengterir el mo medengelterir a rebebil el ngar er a ongdibel el sebechir el melisiich er tir. Seikid e tirka el mesuub a sebechir el mo obengterir a rechedal a Dios, el tir a sebechir el ngosuterir er a tekoi er a klereng me a mondai er tir. Ngsoad a chad el mesuub a bo lolechesuar el kmo ngchedal a ongdibel me a telungalek er kid er a klereng. Ngsoad a lolekeed er ngii er tia el klodam er kid a Rekristiano. Seikid e ngmo beot er ngii el mo diak lobengterir a rechad el tir a diak lolengeseu er ngii el mo betik a rengul er a Jehovah. (Osi. 13:20) Me a lsekum tirke el di mla sechelil a otngeklii, e ngmedengei el kmo ngsebechel metik er a remera el sechelil er a cheldebechelel a Jehovah.​—Mk. 10:29, 30; 1 Pe. 4:4.

12. Ngera me ngkired el mesaod er a telbilel a reng me a techolb lobengterir tirke el dosuub lobengterir?

¹² Ngkired el blechoel el mesaod er a klungel a ultutelel a chad a ltibir a klengar er ngii el mora Jehovah e bo lemetecholb. A uchul me kede mesuub a Biblia lobengkel a chad a  mo ngosuir el mo mesiou er a Jehovah e mo metecholb. A uriul er a lechib a bebil er a buil er a omesubiu, tokubets sel lomuchel el ngar er a miting, e ngkirel el mo medengei el kmo a moktek er a omesubel er a Biblia a ngosuir el mo omuchel el mesiou er a Jehovah el ta er a Sioning er ngii.

13. Ngera kirel a chad el mesuub el meruul me bo el sebechel mo metecholb?

¹³ Ngar ngii a bebil er a tekoi el sebechel a chad el mesuub el soal mo metecholb el mo meruul. A kot, e ngmo medengelii e mo betik a rengul er a Jehovah e mo oumerang er Ngii. (Jn. 3:16; 17:3) E mo mekur a klausechelei er ngii lobengkel a Jehovah me a rechad er a ongdibel. (Heb. 10:24, 25; Jak. 4:8) Cherengel a taem, e ngmo imikr a mekngit el omerellel e obult er a kngtil. (Rel. 3:19) Ngdirrek el klaumerang er ngii a odbechii el mo ouchais er a klemerang el mora rebebil. (2 Ko. 4:13) E mo tibir a klengar er ngii el mora Jehovah e ochotii lokiu a bo lemetecholb. (1 Pe. 3:21; 4:2) Tiang a mo sils er a deurreng el kirir a rokui el chad! Me sel mesa chad el mesuub el meruul aike el tekoi el kirel meruul me bo el sebechel mo metecholb, e molemolem el chemat er ngii. Molisiich er ngii me lolemolem el meruul ngii el tekoi.

14. Ngmekera chad el olisechakl e merriter el kmo a chad el mesuub a olengeriakl?

¹⁴ Ngkired el oba kllourreng sel dolengeseu er a chad el mesuub me bo lolengeriakl el mo meruul er a telbilel a rengul el mo metecholb. Engdi ngdirrek el kired el mo medengei el kmo ngar ngii a urungulel el mo mesiou er a Jehovah me a lechub e ngdiak. Kid, kede mesa el kmo ngmelasem el olengesenges a omellach er a Jesus? Me a lechub e ngdi soal mesuub a ungil tekoi er a Biblia?

15. Ngera sebechel ngike el olisechakl el merriter me bo lodengei el kmo a chad el mesuub a olengeriakl?

¹⁵ Bo blechoel el merriter el kmo a chad el mesuub ngolengeriakl ngdiak. El ua tiang, ngmesaod a uldesuel el kirel a Jehovah? Ngmeluluuch el mora Jehovah? (Psa. 116:1, 2) Ngsoal menguiu er a Biblia? (Psa. 119:97) Ngblechoel el mei er a miting? (Psa. 22:22) Ngmla remuul a omelodech er a klengar er ngii? (Psa. 119:112) Ngmla omuchel el ouchais aike el tekoi el losuub el mora telungalek er ngii me a resechelil? (Psa. 9:1) E a klou a ultutelel er ngii, ngsoal el mo ta er a Sioning er a Jehovah? (Psa. 40:8) A lsekum a chad el mesuub a diak loruul a ngii di ta er aika el tekoi e mokekokau el mo medengelii a uchul  e di bleketakl el mesaod er ngii lobengkel engdi bo moba delemedemek. *

16. Nglocha ngera sebechel lochotii el kmo ngmla mo kirel meterob a omesuub?

¹⁶ Cherengel a taem e morriter el kmo a chad ngungil dirk lolemolem el mesuub. Di lekau el oker: ‘Ngika el mesuub ngdiak longetmokl er ngii el kirel a omesubel? Ngdiak el soal el mei er a miting? Ngdirk ngar ngii a mekngit el omerellel? Ngdirk chedal a klsuul klechelid?’ A lsekum a nger a choi, e a omolemolem el mesuub el obengkel e ngdi uai sel molasem el olisechakl er a chad el diak el soal mo dekimes el mo mengikai! Me a lsekum a chad el mesuub a diak el soal a tekoi el losuub e diak lekengei el meruul a omelodech er a klengar er ngii, e ngera me ke dirk melemolem el mesuub lobengkel?

17. A doltirakl er a 1 Timothy 4:16, e ngera kirir a rokui el olisechakl er a Biblia el meruul er ngii?

¹⁷ Ngkmal klou a ultutelel a doltaut er tia el ngerecheled el meruul er a remo disaiplo, me ngsoad el ngosuterir tirke el dosuub lobengterir el olengeriakl el mo nguu a techolb. Sei a uchul me kede mecherei a Biblia me ngolisechakl, e olecholt el kmo ngkmal soad e oumerang a tekoi el dolisechakl. Kede melisiich er a chad el mesuub el mo omak er a klausechelei er ngii me a rechad er a ongdibel. Kede dirrek el mo blechoel el mesaod el kirel a telbilel a reng me a techolb, e a cherengel a taem e kede merriter el kmo a chad el mesuub ngolengeriakl ngdiak. (Momes er a baks el “ Aike el Kirel a Chad el Olisechakl el Meruul el Ngosuterir a Remesuub el Mo Metecholb” el ngar er a 13 el llel.) Ngkmal dmeu a rengud el sebeched el teloi er tia el ureor el olsobel a klengar! Me derellii er a rengud el mora tkurrebab el sebeched el ngosuterir tirke el dosuub el obengterir el mo metecholb.