1. Woosoo jeit daut biem Jinja moaken doarom, Läwes to raden?

BIEM Jinja moaken jeit daut doarom, Läwes to raden! Woosoo? En Matäus 28:19-20 jeef Jesus daut Jeboot: “Got . . . un moakt an to Lieelinja un deept an”. Woo wichtich es daut, sikj deepen to loten? Bloos doaderch kjenn wie jerat woaren. Soone, waut sikj wellen deepen loten, motten doaraun jleewen, daut eena bloos doaderch kaun jerat woaren, wiels Jesus fa ons storf un vom Doot oppstunt. Doawäajen säd de Apostel Petrus to siene Gloowesbreeda: “Dee Taufe - es nu uk ne Radunj fa onns . . . derch Jesus Christus sien oppstone fom Doot” (1. Pet. 3:21, Reimerbibel). Wan sikj doa wäa deepen lat, dan kjricht dee de Hopninj fa emma to läwen.

2. Waut sell wie no 2. Timotäus 4:1-2 no doonen?

² Om Jinja to moaken, mott wie feine Liera woaren (läs 2. Timotäus 4:1-2). Wuarom? Wiels Jesus säd: “Got . . . un moakt an to Lieelinja un . . . lieet an”. Un de Apostel Paulus säd, wan wie bie dit Woakj bliewen wudden, dan wudd wie ons “selfst seelich moaken, un uk dee,” dee no ons horchen. Doawäajen säd hee noch: “Sorj . . . fa diene Lia” (1. Tim. 4:16). Wie wellen biem lieren ons bastet doonen, daut wie fein kjennen Jinja moaken.

3. Waut woa wie en disen Artikjel seenen?

³ Wie studieren met millionende Menschen oppe gaunze Welt de Bibel. Oba soo aus wie en dän väajen Artikjel jeseenen haben, well wie lieren, woo wie noch mea von dee halpen kjennen, daut dee sikj kjennen deepen loten. En disen Artikjel woa wie noch eemol fief Sachen seenen, waut jieda eena doonen saul, daut siene Bibelschiela fein veraunkomen.

4. Fa waut mott een Bibelliera oppaussen, un wuarom? (See uk de Footnoot.)

⁴ Wäajen wie daut sea jleichen, waut wie ut Gott sien Wuat lieren, kaun daut leicht passieren, daut wie selfst too väl räden. Oba soo saul daut nich sennen, endoont aus wie daut Woaktorm-Studium leiden ooda daut Bibelstudium von de Vesaumlunk ooda een aundret Studium. Daut wie wäm met de Schreft lieren kjennen, mott wie oppaussen, daut wie nich too väl räden un nich aules utlajen, waut wie äwa een Teema ooda äwa eenen Bibelvarsch weeten (Joh. 16:12). * Denkj mol han, woo väl du von de Schreft wist, aus du die deepen leetst, un woo väl du nu weetst. Secha kjansd du bie diene Doop noch mau bloos de wichtichste Lieren ut de Schreft (Heb. 6:1). Daut dieed Joaren, bat du daut aules jelieet hautst, waut du nu weetst. Doawäajen proow nich dienen Bibelschiela aules opp eemol bietobrinjen.

5. (a) Waut saul ons Bibelschiela vestonen, soo aus 1. Tessalonicha 2:13 sajcht? (b) Woo kjenn wie eenen Bibelschiela halpen, von daut to räden, waut dee lieet?

⁵ Wie wellen onsen Bibelschiela halpen to vestonen, daut daut, waut hee lieet, ut de Schreft kjemt (läs 1. Tessalonicha 2:13). Woo kjenn wie daut doonen? Lot dän Bibelschiela von daut räden, waut dee lieet. Lot dän mol eenje Bibelvarzh utlajen, enne Städ daut du daut emma deist. Halp dän to vestonen, waut dee ut Gott sien Wuat lieren kaun. Stal dän soone Froagen, daut dee sajcht, waut dee äwa de Bibelvarzh denkjt (Luk. 10:25-28). Du wurscht biejlikj kjennen froagen: “Waut wiest dis Bibelvarsch die von Jehova? Woo kaun die daut halpen, waut du hia ut de Schreft jelieet hast? Waut denkjst du äwa daut, waut du jelieet hast?” (Spr. 20:5). Daut kjemt nich soo sea doaropp aun, woo väl een Bibelschiela aul weet, oba doaropp, woo sea dee daut leeft un brukt, waut dee weet.

6. Wuarom es daut eene goode Iedee, erfoarne Vekjindja met no onse Bibelstudiums to nämen?

⁶ Nemst du bieaun mol erfoarne Vekjindja met no dien Bibelstudium? Dan wurscht du dee lota kjennen froagen, waut see doaräwa denkjen, woo du daut Studium leiden un de Schreft brucken deist. Wan eena een bätra Liera woaren well, dan mott eena deemootich sennen (see uk Aposteljeschicht 18:24-26). Froag dän erfoarnen Vekjindja uk, aus hee jleeft, daut de Bibelschiela daut fein vestonen kaun. Un wan du mol fa eene Wäakj ooda noch lenja nich doa best, dan kaust du krakjt disen  Vekjindja froagen, aus hee daut Bibelstudium fa die moaken well. Dan brukt eena daut nich utloten un de Bibelschiela kaun seenen, woo wichtich daut es, daut eena räajelmässich studieet. Denkj kjeenmol, daut daut bloos dien Bibelstudium es un daut kjeen aundra daut wudd moaken kjennen. Du west je dienen Bibelschiela halpen, daut dee de Woarheit emma bäta kjanen lieren kaun.

7. Waut woat een Bibelstudium halpen, daut dee daut noch dolla jleicht, waut dee lieet?

⁷ Een Bibelschiela mott seenen, daut wie daut, waut de Schreft lieet, selfst jleewen un väl räakjnen (1. Tess. 1:5). Dan woat dee daut secha uk selfst dolla jleichen. Veleicht kjenn wie dän vetalen, woo de Schreft ons aul bie eenen Trubbel jeholpen haft. Aun daut kaun dee seenen, daut de biblischa Rot am uk halpen kaun.

8. Met waut kjenn wie onsen Bibelschiela noch halpen, un waut woat daut aun dän doonen?

⁸ Räd met dienen Bibelschiela uk von Breeda un Sestren, waut biejlikj soone Trubbels hauden, waut hee haft, un woo dee doamet foadich worden. Ooda du kaust wäm von de Vesaumlunk met doahan nämen, waut fa dienen Bibelschiela een goodet Biespel es. Ooda du kaust die opp jw.org bie daut Poat “De Woarheit veendat de Menschen” een poa scheene Erfoarungen rutsieekjen. * Derch soone Videos kaun dien Bibelschiela vestonen, woo goot daut utkjemt, sikj no de Schreft to rechten.

9. Woo kaun eena sienen Bibelschiela tooroden, daut dee met siene Famielje un Frind von daut rät, waut dee lieet?

⁹ Wan dien Bibelschiela befriet es, moakt dän sien Poatna dan uk biem Bibelstudium met? Wan nich, dan froag dän, aus dee doa nich wudd wellen met bie sennen. Rod dienen Bibelschiela too, daut dee met siene Famielje un Frind von daut vetalt, waut dee lieet (Joh. 1:40-45). Woo wudd eena daut doonen kjennen? Du wurscht kjennen froagen: “Woo wurscht du diene Famielje dit erkjläaren? Waut fa eenen Bibelvarsch wurscht du brucken, om eenen Frint dit uttolajen?” Soo woascht du dienen Bibelschiela doaropp reedmoaken, daut dee lota selfst een Liera woat. Un wan dee ieescht soo wiet es, dan kaun dee aunfangen aus ojjedeepta Vekjindja to prädjen. Du  wurscht dän kjennen froagen, aus dee wäm kjant, dee daut uk wudd jleichen, de Bibel to studieren. Un wan dee wäm kjant, dan räd met dänjanjen un proow met dän de Bibel to studieren. Wies dän daut Video Woo schauft een Bibelstudium met Jehova siene Zeijen?. *

10. Woo kaun een Bibelliera daut doonen, waut 1. Tessalonicha 2:7-8 sajcht?

¹⁰ Aus Bibelliera mott wie opp iernst om onse Bibelstudiums bekjemmat sennen. Dee kjennen irjentwanea eent von onse Breeda un Sestren sennen! (Läs 1. Tessalonicha 2:7-8.) Daut dee Jehova deenen kjennen, motten dee äa Läwen endren un äare väaje Frind oppjäwen. Un daut es nich leicht. Doawäajen mott wie dee halpen, daut dee mank onse Breeda un Sestren Frind finjen. Moak die dien Bibelstudium toom Frint. Bruck diene Tiet nich bloos toom met dän de Bibel studieren, oba uk toom sestwanea met dän toop sennen. Wie wudden dän uk mol kjennen fonen ooda schriewen ooda doa mol em tweschen hanfoaren, wan wie uk nich studieren wullen, om dän to wiesen, daut wie om dän bekjemmat sent.

11. Waut sellen onse Studiums en de Vesaumlunk finjen, un wuarom?

¹¹ Eenjemol woat doa jesajcht: “Daut brukt eene Häad Menschen toom een Kjint opptrakjen.” Soo wudd eena uk kjennen sajen: “Daut brukt eene gaunze Vesaumlunk toom eenen Jinja moaken.” Doawäajen moaken goode Bibelliera äare Studiums met soone von de Vesaumlunk bekaunt, waut een goodet Biespel fa dee sent. Soo kjennen de Bibelschiela met Gott siene Deena toop sennen un dee kjennen an dan em jeisteljen unjastetten un Moot toospräakjen. Wie wellen, daut jieda Bibelschiela Poat von de Vesaumlunk un von onse jeistelje Famielje woat un daut dee wellich met de leeftolje Gloowesbreeda toop sennen well. Dan woat dän daut leichta sennen, soone Frind tochtoloten, waut am nich halpen, Jehova to leewen (Spr. 13:20). Un wan siene väaje Frind nich mea met am toop sennen wellen, dan woat dee weeten, daut dee en Jehova sien Volkj woare Frind finjen kaun (Mar. 10:29-30; 1. Pet. 4:4).

12. Wuarom sell wie met onsen Bibelschiela äwa de Hangow un de Doop räden?

¹² Räd foaken doavon, daut eena sikj saul Jehova hanjäwen un sikj deepen loten. Wie  studieren je doaropp met de Menschen, daut dee Jehova deenen un sikj deepen loten. Wan doa wäa aul een poa Moonat studieet haft un besonda, wan dee aul no de Toopkomes kjemt, dan mott dee vestonen, daut wie am halpen wellen, eent von Jehova siene Zeijen to woaren.

13. Waut mott een Bibelschiela doonen, daut dee sikj kaun deepen loten?

¹³ Een opprechtja Bibelschiela kaun Schrett fa Schrett doaropp schaufen, daut dee sikj kaun deepen loten. Low dän emma sea, wan dee veraunkjemt. Un spräakj dän Moot too, daut dee nich opphieet, doano hantooabeiden, sikj deepen to loten. Daut ieeschte lieet dee Jehova kjanen un jleeft aun dän un fangt aun dän to leewen (Joh. 3:16; 17:3). Dan woat dee Frint met Jehova un uk met de Breeda un Sestren von de Vesaumlunk (Heb. 10:24-25; Jak. 4:8). Met de Tiet lat dee de schlajchte Jewanheiten toch un haft een Leetsennen äwa siene Sinden (Apj. 3:19). Un sien Gloowen brinjt am uk bat doa, met aundre äwa de Woarheit to räden (2. Kor. 4:13). Dan jeft dee sikj Jehova han un bewiest daut derch siene Doop (1. Pet. 3:21; 4:2). Daut es fa aulem eene groote Freid!

14. Woo kjenn wie rutfinjen, aus een Bibelschiela aul veraunjekomen es?

¹⁴ Wan wie eenen Bibelschiela halpen, daut dee sikj Gott hanjäwen un deepen loten kaun, dan mott wie jeduldich sennen. Oba irjentwanea mott wie uk rutfinjen, aus dee Jehova Gott werkjlich deenen well. Es daut bie dän to seenen, daut dee Jesus siene Jebooten hoolen well? Ooda well dee bloos intressaunte Jeschichten ut de Bibel hieren?

15. Aun waut es daut to seenen, daut een Bibelschiela wiedakjemt?

¹⁵ Kjikj emma wada doano, woo de Bibelschiela wiedakjemt. Rät dee biejlikj doavon, daut dee Jehova väl räakjent? Bät dee to Jehova? (Psa. 116:1-2). Läst dee wellich de Bibel? (Psa. 119:97). Es dee räajelmässich bie de Toopkomes? (Psa. 22:23). Haft dee sikj aul en eenje Stekjen jeendat, wua daut needich wia? (Psa. 119:112). Rät dee aul met siene Famielje un Frind doaräwa, waut dee jelieet haft? (Psa. 9:2). Un daut wichtichste es: Well dee eent von Jehova siene Zeijen woaren? (Psa. 40:9). Waut, wan de Bibelschiela nich en eent von dise  Stekjen wiedakjemt? Dan proow väasechtich ruttofinjen, wuarom daut soo es, un räd met dän gaunz op un leeftolich doaräwa. *

16. Aun waut kaun daut to seenen sennen, aus wie een Bibelstudium tochloten sellen?

¹⁶ Unjasto die daut emma wada, aus du met een Bibelstudium wiedamoaken saust. Du wurscht kjennen äwalajen: “Deit dee sikj goanich reedmoaken fa daut Studium? Well dee nich no de Toopkomes komen? Haft dee noch emma schlajchte Jewanheiten? Jehieet dee noch emma to eenen faulschen Gloowen?” Wan daut soo es un du met dän wiedastudieren deist, dan wudd daut soo sennen, aus wan du wurscht wellen wäm schwamen lieren, dee goanich well naut woaren. Wuarom wudd wie sellen met wäm wiedastudieren, wan dee daut goanich väl räakjent, waut dee lieet, un sikj goanich endren well?

17. Waut sellen aule Bibelliera doonen, soo aus 1. Timotäus 4:16 sajcht?

¹⁷ Wie nämen daut sea iernst, daut wie sellen Jinja moaken, un wie wellen, daut onse Bibelstudiums sikj deepen loten. Doawäajen lia wie dee met de Schreft un wiesen dee, daut wie daut, waut wie an lieren, selfst jleewen un väl räakjnen. Wie halpen dee uk, daut dee Frind kjrieen von de Vesaumlunk. Un wie räden uk foaken doavon, sikj Gott hantojäwen un sikj deepen to loten, un kjikjen emma wada doano, woo dee wiedakomen. (See dän Kausten “ Woo eena een Bibelstudium halpen kaun, daut dee sikj deepen lat”.) Wie freien ons, daut wie bie dit Woakj metmoaken kjennen, waut Läwes rat! Doawäajen well wie ons bastet doonen, om feine Bibelliera to sennen, waut äare Bibelstudiums halpen, sikj deepen to loten.