1. Hao nao iumi savve disfala waka for teachim pipol for kamap disaepol hem waka wea sevem laef?

DISFALA waka for teachim pipol for kamap disaepol hem wanfala waka wea sevem laef blo pipol! Hao nao iumi savve lo datwan? Taem Jesus givim komand lo Matthew 28:19, 20, hem sei: “Go, . . . and teachim pipol . . . , baptaesim olketa.” Why nao hem important for baptaes? For kasem laef, iumi mas baptaes. Samwan wea laek for baptaes hem mas bilivim dat hem savve kasem laef olowe only bikos Jesus hem dae for iumi and hem resurrect. Dastawe, aposol Peter talem olketa Christian: “Wei for baptaes . . . nao sevem iufala bikos Jesus Christ hem laef bak.” (1 Pet. 3:21) So taem wanfala niu disaepol hem baptaes, hem showimaot hem garem hope for laef olowe.

2. Lo 2 Timothy 4:1, 2 hem encouragem iumi for kamap wanem kaen teacher?

² For teachim pipol kamap disaepol, iumi need for mekem grow wei for “teach long gudfala wei.” (Readim 2 Timothy 4:1, 2.) Why nao olsem? Bikos Jesus givim iumi komand for “go and teachim pipol for kamap disaepol. . . . . Teachim olketa.” Aposol Paul sei for “gohed strong” for duim disfala waka bikos wei for duim olsem “bae mekem iu and olketa wea lisin long iu for kasem laef.” From datwan nao Paul hem sei: “Lukluk gud evritaem . . . lo samting wea iu teachim.” (1 Tim. 4:16) From wei for teach hem join witim wei for helpem pipol kamap disaepol, iumi laekem teaching blo iumi for barava gud.

3. Lo disfala study, wanem nao bae iumi storyim abaotem wei for conductim Bible study?

³ Iumi gohed for teachim staka million pipol abaotem truth wea stap insaed lo Bible. Bat olsem iumi storyim lo last study,  iumi laek for savve hao nao iumi savve helpem staka pipol moa for baptaes and kamap disaepol blo Jesus Christ. Lo disfala article, bae iumi storyim faevfala samting moa wea evri teacher need for duim for helpem wanfala student for muv ahed for baptaes.

4. Why nao wanfala teacher need for kontrolem seleva taem hem conductim wanfala Bible study? (Lukim tu footnote.)

⁴ Iumi lovem tumas wanem iumi teachim from Bible. So maet iumi bae laek for story tumas abaotem datwan. Bat nomata sapos iu conductim Wastaoa Study, Kongregeson Bible Study, or wanfala hom Bible study, conductor hem shud no toktok tumas. For letem Bible nao for teach, datfala teacher hem shud lane for kontrolem seleva and no trae for explainim evri samting wea hem savve abaotem wanfala verse lo Bible or wanfala subject. * (John 16:12) Hem gud for iu comparem savve wea iu garem abaotem Bible lo taem iu baptaes, and lo disfala taem. Luk olsem, lo datfala taem, iu savve lo olketa main teaching nomoa. (Heb. 6:1) Hem tekem staka year for iu lanem wanem iu savve distaem, so no trae for teachim wanfala niu student lo evri samting wantaem.

5. (a) Olsem 1 Thessalonica 2:13 storyim, wat nao iumi laekem student blo iumi for luksavve lo hem from study? (b) Hao nao iumi savve encouragem student for storyim olketa samting wea hem lanem?

⁵ Iumi laekem student blo iumi for savve dat wanem hem lanem hem kam from toktok blo God. (Readim 1 Thessalonica 2:13.) Hao nao iumi savve duim datwan? Encouragem student for storyim olketa samting wea hem lanem. Winim wei for iumi explainim lo hem nomoa olketa Bible verse, iumi savve askem hem for explainim lo iumi wanem hem lanem. Helpem student for luksavve hao wei for followim toktok blo God savve helpem hem lo laef blo hemseleva. Askem olketa kwestin wea bae helpem hem for talemaot tingting blo hem and hao hem feel abaotem scripture wea hem readim. (Luke 10:25-28) Olsem example, iumi savve askem hem: “Hao nao disfala scripture hem helpem iu for luksavve lo wanfala lo olketa wei blo Jehovah?” “Hao nao disfala truth insaed lo Bible savve helpem iu?” “Hao nao iu feel abaotem wanem iu just lanem?” (Provebs 20:5) Samting wea important, hem no hao big nao savve blo student abaotem Bible, bat hem wei wea hem lovem and laek for followim wanem hem lanem.

6. Why nao maet hem gud for invaetem wanfala pablisa wea garem experience for joinim iu lo study?

⁶ Taem iumi conductim wanfala Bible study, waswe, iu invaetem wanfala pablisa wea garem experience for joinim iu lo study? Sapos iu duim  datwan, iu savve askem hem for lukluk lo hao iu conductim study and sapos iu letem Bible nao for teach. For kamap moabeta lo hao iu teach, iu mas hambol. (Comparem Acts 18:24-26.) Bihaen, iu savve askem datfala pablisa wea garem experience sapos hem tingse student hem kasem datfala truth wea hem lanem. Iu savve askem datfala sem pablisa for conductim study for iu sapos iu bae no stap for wanfala week or winim datwan. Datwan bae helpem study for gohed evritaem and student bae luksavve hao wei for study hem barava important for hem. Iu mas no tingse Bible study hem blo “iuseleva” nomoa and no eni narawan shud conductim. Tru samting nao, iu laekem best samting for student blo iu mekem hem savve gohed for lanem truth.

7. Wanem nao bae helpem wanfala student for hapi abaotem wanem hem lanem?

⁷ Wanfala student need for lukim hao iu barava laekem olketa truth wea stap lo Bible, and herem hao iu barava bilivim datwan. (1 Thess. 1:5) Then datwan bae mekem hem hapi abaotem wanem hem lanem. Sapos fitim, storyim lo hem hao olketa Bible principle helpem iu lo laef blo iuseleva. Then hem bae luksavve hao Bible garem olketa gudfala advaes wea savve helpem hem for kasem gud samting tu.

8. Wanem moa iu savve duim for helpem Bible student, and why nao iu duim datwan?

⁸ Taem iutufala study, storyim lo student eni example blo olketa wea feisim semkaen challenge olsem hem and olketa winim datwan. Iu savve askem samwan lo kongregeson for joinim iu lo study wea example blo hem savve helpem student. Or iu savve faendem eni experience lo jw.org anda lo sekson “Bible Changem Laef Bilong Pipol” * wea bae encouragem hem. Olketa kaen article and video olsem bae helpem student blo iu for luksavve hao hem wise for followim olketa Bible principle lo laef blo hem.

9. Hao nao iu savve encouragem wanfala student for sharem wanem hem lanem witim olketa fren and famili blo hem?

⁹ Sapos student hem marit, waswe, marit partner blo hem study tu? Sapos nomoa, invaetem hem for joinim study. Encouragem student blo iu for sharem wanem hem lanem witim famili blo hem and olketa fren. (John 1:40-45) Hao nao for duim datwan? Iu maet askem hem olsem: “Hao nao iu savve explainim disfala truth lo famili blo iu?” or “Wanem scripture nao iu bae iusim for pruvim diswan lo wanfala fren blo  iu?” Taem iu duim olsem, iu trainim student blo iu for kamap teacher. Then taem hem qualify, hem bae start for joinim ministry olsem wanfala anbaptaes pablisa. Iu savve askem student sapos hem savve lo eniwan wea laek for studyim Bible. Sapos hem savve, stretawe contactim datfala man and offerim wanfala Bible study. Showim hem datfala video Hao Nao Mifala Conductim Wanfala Bible Study? *

10. Olsem 1 Thessalonica 2:7, 8 storyim, hao nao wanfala teacher savve followim example blo Paul?

¹⁰ Teacher mas showimaot hem barava interest lo olketa student blo hem. Ting lo olketa olsem olketa spiritual brata or sista blo iu lo future. (Readim 1 Thessalonica 2:7, 8.) Hem no isi for olketa lusim olketa old fren lo world, and for mekem samfala change wea olketa need for duim for servem Jehovah. Iumi need for helpem olketa for faendem olketa tru fren lo kongregeson. Fren witim student blo iu lo wei for spendem taem witim hem no just lo taem blo Bible study nomoa bat lo olketa nara taem tu. Wei for ringim hem, sendem text message, or shortfala visit hem showimaot hao iu barava tingim hem.

11. Wanem nao iumi laekem olketa student blo iumi for faendem lo kongregeson, and why nao olsem?

¹¹ Pipol savve sei: “Full vilij nao savve help for teachim wanfala pikinini.” Iumi savve sei: “Full kongregeson nao savve helpem wanfala study for kamap wanfala disaepol.” Dastawe, wanfala gud Bible teacher savve introducem student blo hem lo olketa narawan lo kongregeson wea olketa tu savve helpem hem for kamap moa klos lo Jehovah. Student savve enjoyim wei for associate witim pipol blo God, wea savve givim hem sapot lo spiritual wei and olketa savve encouragem hem taem hem garem olketa problem. Iumi laekem each student for feel dat hem part lo kongregeson and lo spiritual famili blo iumi. Iumi laekem student for feelim love blo evri brata and sista raonem full world. Then datwan bae mekem hem isi for hem stop for associate witim pipol wea no helpem hem for lovem Jehovah. (Provebs 13:20) Nomata sapos olketa old fren blo hem no laekem hem, hem savve hao insaed organization blo Jehovah hem savve faendem olketa tru fren.—Mark 10:29, 30; 1 Pet. 4:4.

12. Why nao iumi shud feel free for storyim Christian dedication and baptism lo student?

¹² Feel free for storyim Christian dedication and baptism. Really, goal blo iumi taem  iumi conductim wanfala Bible study hem for helpem student for kamap wanfala baptaes disaepol. Insaed lo tu-thri month wea iumi study witim samwan, and especially bihaen hem attendim olketa meeting, datfala student shud luksavve goal blo wanfala study hem for helpem hem for servem Jehovah olsem wanfala Witness blo Hem.

13. Olketa wanem samting nao wanfala student need for duim bifor hem savve baptaes?

¹³ For wanfala Bible study kasem goal blo hem for baptaes, hem need for duim samfala samting! First samting, student hem mas savve and lovem Jehovah and garem faith lo Hem. (John 3:16; 17:3) Then student savve mekem grow wei for fren witim Jehovah and start for fren witim olketa narawan lo kongregeson. (Heb. 10:24, 25; Jas. 4:8) Gogo, datfala student mas lusim olketa nogud samting wea hem duim and repent from olketa sin blo hem. (Acts 3:19) And tu, faith blo hem bae muvim hem for sharem truth witim olketa narawan. (2 Cor. 4:13) Then hem savve dedicatem hemseleva lo Jehovah and baptaes. (1 Pet. 3:21; 4:2) And hem wanfala day wea evriwan hapi! Taem datfala student hem duim each samting for kasem goal blo hem, iumi need for kaen lo hem, praisem hem and encouragem hem for gohed for duim olketa samting wea lead go lo wei for baptaes.

14. Hao nao wanfala teacher savve ting raonem wei wea student muv ahed?

¹⁴ Iumi need for patient taem iumi helpem wanfala student wea muv ahed for dedicate and baptaes. Bat samfala taem, iumi need for faendaot sapos hem really laek for servem Jehovah God. Waswe, iu lukim eni saen wea showimaot student hem traem best for obeyim olketa komand blo Jesus? Or waswe, hem just laek for savve nomoa lo samfala interesting samting lo Bible?

15. Olketa wanem saen nao wanfala teacher need for lukluk for hem lo wanfala Bible student?

¹⁵ Evritaem hem gud for lukluk lo hao Bible student blo iu hem muv ahed. Olsem example, waswe, hem storyim feeling blo hem abaotem Jehovah? Waswe, hem prea lo Jehovah? (Sams 116:1, 2) Waswe, hem enjoyim wei for readim Bible? (Sams 119:97) Waswe, hem attendim olketa meeting evritaem? (Sams 22:22) Waswe, hem mekem finis olketa change wea hem need for duim lo laef blo hem? (Sams 119:112) Waswe, hem gohed for sharem wanem hem  lanem witim olketa famili and fren blo hem? (Sams 9:1) Samting wea moa important, waswe, hem laek for kamap wanfala Jehovah’s Witness? (Sams 40:8) Sapos iu no lukim olketa change hia lo student blo iu, trae for faendaot why nao olsem then story witim hem lo kaenfala wei bat iu need for tok stret tu. *

16. Wanem nao hem showimaot iumi shud stop for study witim wanfala Bible student?

¹⁶ Samfala taem hem gud for ting raonem sapos iu bae gohed study witim samwan. Askem iuseleva: ‘Waswe, hem no prepare for study? Waswe, hem nating interest for attendim olketa meeting? Waswe, hem still garem olketa nogud wei? Waswe, hem still member blo wanfala false religion?’ Sapos ansa blo olketa kwestin hia hem yes, for study witim hem, bae hem olsem iu laek for trainim samwan hao for swim bat hem no laek for tuwet! Sapos student hem no tinghae lo wanem hem lanem, and hem no willing for change, then why nao iu laek for gohed study witim hem?

17. Olsem 1 Timothy 4:16 storyim, wanem nao evri Bible teacher mas duim?

¹⁷ Hem barava important for iumi fulfillim disfala responsibility blo iumi for helpem pipol kamap disaepol, and iumi laek for helpem olketa student blo iumi for muv ahed for baptaes. Dastawe, iumi laek for letem Bible nao for teach and iumi laek for showimaot iumi laekem and barava bilivim wanem iumi teachim. Encouragem student for fren witim olketa narawan lo kongregeson. And iumi strongim goal for dedicate and baptaes, and samfala taem hem gud for ting raonem wei wea student hem muv ahed. (Lukim box, “ Wanem Olketa Teacher Need for Duim for Helpem Olketa Student for Baptaes.”) Iumi hapi tumas for share insaed disfala waka for sevem laef blo pipol! Iumi laek disaed strong for duim best blo iumi for conductim olketa Bible study wea muv ahed for baptaes.