1. ¿Imaraykun runakunata Jesuspa discipulon kanankupaq yanapasqanchis vidankuta salvanman?

RUNAKUNATA Jesuspa discipulon kanankupaq yachachispaqa, kausayninkuta salvanankupaqmi yanapashanchis. ¿Imarayku chayta ninchis? Mateo 28:19, 20 nisqanpin Jesús kamachiran: “Riychis”, “yachachimuychis discipuloykuna kanankupaq, jinaspa” “bautizamuychis”, nispa. Salvakuyta munaqkunaqa bautizakunankupunin. Pipas bautizakunanpaqqa iñinanmi Jesús noqanchisrayku wañusqanpi kausarimpusqanpipas. Chayraykun apóstol Pedro cristianokunata niran: “Bautismon kunanqa qankunatapas Jesucristoq kausarimpusqanwan salvashasunkichis”, nispa (1 Ped. 3:21). Chhaynapin pipas bautizakusqanmantapacha wiñay kausayta suyakunman.

2. 2 Timoteo 4:1, 2 nisqan jina, ¿imapaqmi kallpachakunanchis?

² Runakunata Jesuspa discipulon kanankupaq yanapananchispaqqa allin yachachiqmi kananchis (leey 2 Timoteo 4:1, 2). ¿Imarayku? Jesús kamachiwasqanchisrayku, paymi niran: “Riychis”, “yachachimuychis discipuloykuna kanankupaq”, nispa. Apóstol Pablopas kallpacharanmi Timoteota chayta ruwananpaq, chaymi niran:  ‘Chayta ruwaspan qan kikiykita salvakunki, uyariqniykikunapas salvakullanqakutaqmi’, nispa. Chaymantapas niranmi: ‘Allinta qhawarikuy [...] imaynatachus yachachishanki chayta’, nispa (1 Tim. 4:16). Runakuna Jesuspa discipulon kanankupaqqa, imayna yachachisqanchismantan kanqa. Chayraykun kallpachakunanchis allin yachachiq kananchispaq.

3. ¿Imatan kay yachachikuypi yachasun?

³ Sapa semanan millonninpi runakunaman Bibliamanta yachachishanchis. Ichaqa ñaupaq yachachikuypi yachamusqanchis jina, estudiantenchiskunatan bautizakunankupaq yanapayta munanchis. Chayraykun kaypi yachasun pisqa yanapaykunamanta.

4. ¿Imaraykun yachachishaspa mana nishuta rimananchischu? (Willakuyta qhaway.)

⁴ Llapanchismanmi Diospaq siminmanta yachachiyqa gustawanchis, chaymi noqallanchisña rimayta munasunman. Chayrayku Qhawaq qelqata yachachishaspa, Bibliata estudianapaq juñunakuyta aparishaspa otaq Bibliamanta juj runaman yachachishaspapas, manan nishutaqa rimananchischu, Biblian astawanqa rimanan. Chaymi kallpachakunanchis ama tukuy yachasqanchismanta rimananchispaq (Juan 16:12). * Manaraq bautizakushaspaqa pisillatan Bibliamanta yacharanchis kunan yachasqanchismantaqa (Heb. 6:1). Tukuy yachasqanchistaqa askha watakunapin yacharanchis, chaymi estudiantenchiskunamanqa mana llapa yachasqanchistachu juj p’unchayllapi yacharachiyta munananchis.

5. a) 1 Tesalonicenses 2:13 nisqan jina, ¿imatan estudiantenchis allinta entiendenan? b) ¿Imaynatan yanapasunman yachachisqanchis runa yachashasqanmanta rimananpaq?

⁵ Estudiantenchisqa entiendenanmi yachachisqanchisqa Diospa siminpuni kasqanta (leey 1 Tesalonicenses 2:13). Chaypaqmi ichaqa kallpachananchis yachasqanmanta rimananpaq. Noqallanchis textokunamanta yachachinanchismantaqa, kallpachasun entiendesqanmanta rimananpaq. Yanapasunmantaqmi Bibliaq nisqanman jina imatapas ruwananpaq piensananpaqpas. Chaypaqmi tapurisunman leesqanchis textomanta imatas piensan chayta (Luc. 10:25-28). Kaykunatan tapusunman: “¿Imatan kaypi yachanki Jehová Diosmanta? ¿Imaynatan kaypi yachasqayki yanapasunkiman? ¿Imaniwaqmi kay yachasqaykimanta?”, nispa  (Prov. 20:5). Aswan allinqa manan askhata yachasqanchu, aswanpas yachasqanta munakuspa chayman jina kausasqanmi.

6. ¿Imaraykun allinpuni kanman Bibliamanta yachachiq rishaspa allin yachachiq iñiqmasikunawan compañachikuy?

⁶ ¿Bibliamanta yachachiq rishaspa, compañachikunchischu allin yachachiq iñiqmasikunawan? Pipas compañawaqtinchisqa, tapusunmanmi: “¿Allinchu kashan Bibliamanta yachachisqay, icha imallapipas kallpachakunaychu kashan?”, nispa. Chaypaqmi ichaqa juch’uyaykukuq kananchis (tupanachiy Hechos 18:24-26 nisqanwan). Chaymantapas tapusunmanmi iñiqmasinchista, reparasqanman jina estudiantenchis entiendeshanchus icha manachus chayta. Yaqapaschá mayninpiqa maytapas viajananchis kanqa chhayna kaqtinqa chay iñiqmasinchistan valekusunman estudiantenchisman yachachinanpaq. Chhaynapin estudiantenchisqa yachashallanqa valoranqataqmi yachasqantapas. Chaymi manan jayk’aqpas piensananchischu estudiantechismanqa noqallanchis yachachinanchis kasqanta. Aswanpas iñiyninpi astawan wiñanantan munanchis.

7. ¿Iman estudiantenchista yanapanqa yachashasqan sonqonman chayananpaq?

⁷ Estudiantenchisqa reparananmi tukuy sonqomanta mana iskayaspa Bibliamanta yachachisqanchista (1 Tes. 1:5). Chhaynapin sonqonman chayanqa. Willasunmantaqmi imaynatas Bibliapi kaq allin yachachikuykuna yanapawaranchis chayta. Chaymi reparachinqa Bibliapi kaq yachachikuykunaqa allinninpaq kasqanta.

8. a) ¿Imaynatan astawan yanapasunman estudiantenchista? b) ¿Imarayku allinpuni chayta ruway?

⁸ Estudiashaspan willallasunmantaq imaynatas juj iñiqmasikunapas paypa jina sasachakuyninkuta atiparanku chayta. Chaymantapas yanapanmanmi iñiq t’aqanchispi mayqen iñiqmasiq kausayninmanta yachaypas. Chhayna kaqtinqa chay iñiqmasitan valekusunman compañawananchispaq. Willallasunmantaqmi “Bibliaq yanapayninwan cambianku” nisqa willakuykunatapas, chayqa kashan jw.org * nisqapin. Chay willakuykunamanta, videokunamanta yachaymi yanapanqa may allinpuni Bibliaq nisqanman jina kausay kasqanta.

9. ¿Imatan ruwasunman estudiantenchis yachasqanmanta familianman, amigonkunamanpas willananpaq?

 ⁹ Sichus estudiantenchispa qosan otaq esposan manaraq estudiashanchu chayqa, invitasunmanmi paypiwan estudiananchispaq. Chaymantapas estudiantenchista kallpachasun familianman, amigonkunamanpas yachasqanmanta willarinanpaq (Juan 1:40-45). Chaypaqmi tapurisunman: “¿Imaynatan kaymanta familiaykiman yachachiwaq? ¿Ima textowanmi amigoykiman kaymanta yachachiwaq?”, nispa. Chhaynapin estudiantenchista yanapasun allin yachachiq kananpaq. Sichus Diosmanta willaq purinanpaq listoña kashan chayqa iñiq t’aqawan kuskan Diosmanta willanqa. Chaymantapas yaqapaschá mayqen reqsisqan runapas Bibliamanta yachayta munashan, chhayna kaqtinqa usqhaylla chay runata yanapasun, qhawachisunmanmi ¿Imaynatan Bibliamanta yachachiyku? * nisqa videota.

10. 1 Tesalonicenses 2:7, 8 nisqan jina, ¿imaynatan kallpachakusunman Pablo jina kananchispaq?

¹⁰ Tukuy sonqomantan estudiantenchiskunata yanapananchis. Iñiqmasinchiskunata jinataqmi qhawarinanchispas (leey 1 Tesalonicenses 2:7, 8). Paykunapaqqa manan facilchu amigonkunata saqeyqa, Jehová Diospa munasqanman jina kausaypas. Chayraykun yanapananchis iñiq t’aqapi amigokunayoq kanankupaq. Sichus noqanchispas paykunata waturikusun chayqa paykunawan amigontin kasqanchistan rikuchisun. Chaymantapas paykunata celularpi wajaspa mensajeta apachispa iman rikuchillasuntaq paykunata munakusqanchista.

11. ¿Imaynatan estudiantenchiskunata chaskinanchis iñiq t’aqapi, imarayku?

¹¹ África ladomanta rimaymi nin: “Llaqtamasikunaraykun juj wawaqa allin wiñanqa”, nispa. Chhaynallataqmi juj estudiante Jesuspa discipulon kananpaqqa, iñiq t’aqa yanapanman. Chayraykun allin yachachiqqa estudiantenman iñiq t’aqapi hermanokunata reqsichin. Chhaynapin iñiqmasikunapas estudianteta kallpachanqaku iñiyninpi wiñarinanpaq. Munanchismi llapa estudiantekunapas iñiqmasinchiskunata familianta jina qhawarinanta. Sichus Diospa llaqtanta munakunqa chayqa, facil-llatan mana Diosta munakuq amigonkunata saqepunqa (Proverbios 13:20). Jehová Diospa llaqtallanpitaqmi cheqaq amigokunataqa tarinqa (Mar. 10:29, 30; 1 Ped. 4:4).

12. ¿Imaraykun estudiantenchiswan rimananchis Diosman prometekuspa bautizakuymanta?

¹² Mana manchakuspan estudiantenchiskunawan rimananchis Diosman prometekuspa bautizakuymanta. Paykunataqa yachachishanchis bautizakuspa Diosta servinankupaqmi. Sichus estudiantenchis unayña Bibliata estudiashan juñunakuykunamanpas rishan chayqa, entiendenanmi yachachisqanchisqa Jehová Diospa testigon kananpaq kasqanta.

13. ¿Imakunatan ruwanan juj estudiante bautizakunanpaq?

¹³ Juj estudiante bautizakunanpaqqa kaykunatan ruwanan. Ñaupaqta, Jehová Diosta reqsispan munakunan paypitaq iñinanpas (Juan 3:16; 17:3). Chaymantapas Dioswanmi amigontin kapunan, iñiqmasikunawanpas (Heb. 10:24, 25; Sant. 4:8). Tiempowanqa manañan mana allin ruwaykunatapas ruwananchu juchankunamantapas pesapakunanmi (Hech. 3:19). Iñiynintaqmi yanapanan yachasqanmanta jujkunaman willananpaq (2 Cor. 4:13). Chhaynapin Diosman prometekuspa bautizakunqa (1 Ped. 3:21; 4:2). Chay p’unchayqa, ancha kusikunapaqmi llapanchispaqpas. Estudiantenchis ñauparishan chayqa munakuywan kallpachasun astawan iñiyninpi wiñananpaq.

14. ¿Imaynatan reparasunman estudiantenchis iñiyninpi wiñashanchus icha manachus chayta?

¹⁴ Pacienciawanmi estudiantenchista yanapananchis Diosman prometekuspa bautizakunanpaq. Ichaqa reparananchismi Jehová Diosta serviyta munashanchus icha manachus chayta. Chayta yachanapaqmi kayta tapukunanchis: “¿Kallpachakushanchu Jesuspa kamachikuyninkunata kasukunanpaq? Icha Bibliamanta yachayta munaspallachu estudiashan”, nispa.

15. ¿Imakunapin estudiante rikuchinman iñiyninpi wiñashasqanta?

¹⁵ Qhawarinanchismi imakunatas estudiante iñiyninpi wiñananpaq ruwashan chayta. Rimasqanpi, ¿rikuchinchu Jehová Dios munakusqanta? ¿Mañakunchu? (Sal. 116:1, 2.) ¿Gustanchu Bibliata leey? (Sal. 119:97.) ¿Kallpachakunchu juñunakuykunaman mana faltakunanpaq? (Sal. 22:22.) ¿Ñaupaqpi mana allin ruwayninkunata saqepunñachu?  (Sal. 119:112.) ¿Willanchu Bibliapi yachasqanmanta familiankunaman amigonkunamanpas? (Sal. 9:1.) Astawanqa, ¿munanchu Jehová Diospa testigon kayta? (Sal. 40:8.) Manachus kaykunapi kallpachakushan chayqa, sumaqllata tapurisunman imaraykus mana chaykunata ruwashanchu chayta, munakuywantaq allinta rimapayasun. *

16. ¿Imaraykun estudiantenchista saqepunanchis kanman?

¹⁶ Chaymantapas qhawarillasunmantaqmi estudiantenchisman yachachishallasunmanchus icha manachus chayta. Chaymi kaykunata tapukunanchis: “¿Sapanka estudiopaqchu preparakun? ¿Munanchu juñunakuykunaman riyta? ¿Saqepunchu mana allin ruwaykunata? ¿Lloqsinñachu pantasqa religionmantapas?”, nispa. Sichus mana chaykunata ruwashanchu chayqa, mana unuman jaykuyta munaq runamanpas nadayta yachachishasunman jinachá kanman. Manataq valoranmanchu yachachisqanchista nitaq cambiaytapas munanmanchu chayri, ¿imapaqñataq yachachisunman?

17. 1 Timoteo 4:16 nisqan jina, ¿imakunatan ruwana Bibliamanta allin yachachiq kananchispaq?

¹⁷ Juj runakunata Jesuspa discipulon kanankupaq yanapayqa ancha allin llank’aymi. Chaymi estudiantenchiskunataqa bautizakunankukama yanapananchis. Chaypaqmi, Bibliawanpuni yachachinanchis tukuy sonqowan mana iskayaspa. Kallpachananchismi iñiq t’aqapi amigokunayoq kananpaq, yuyarichishanallanchismi Diosman prometekuspa bautizakunanta, jinaspapas reparananchismi iñiyninpi wiñashanchus icha manachus chayta. (Qhaway “ ¿Imakunatan ruwananchis Bibliamanta yachachispa?”, nisqata.) ¡May kusikunapaqmi runakuna kausayninta salvanankupaq yanapakuyqa! Chayrayku, tukuy atisqanchista kallpachakusun estudiantenchiskuna bautizakunankupaq.