1. Akapeea tatou i kite ei, e e angaanga akaora te angaanga akariro i te tangata ei pipi?

TE AKARIRO i te tangata ei pipi, e angaanga akaora teia i te tangata! Akapeea tatou e kite ei? I te akaue anga a Iesu, tei tataia ia Mataio 28:19, 20, karanga aia: “Ka aere . . . e akariro . . . ei pipi; ka papetizo atu ei ia ratou.” Eaa te puapinga o te papetito? E umuumu anga teia no te aronga te kimi ra i te ora. Me rauka te akarongo, ka rauka te ora na roto i to Iesu mate akaatinga e kua tuakaou mai. Te tumu te reira i akakite ei te apotetoro ko Petero ki te au taeake Kerititiano: “Ko te bapetizo ïa e ora katoaʼi tatou i teianei . . . i te tuakaouanga o Iesu Mesia.” (1 Pete. 3:21) Me papetitoia tetai pipi ou, ka tapapa atu aia i te ora mutu kore.

2. Eaa ta 2 Timoteo 4:1, 2 e akamaroiroi maira ia tatou ei puapii?

² Me akariro i te tangata ei pipi, ka anoanoia tatou kia “apii marie” atu. (E tatau ia 2 Timoteo 4: 1, 2.) Eaa te tumu? No te mea te akaue maira a Iesu ia tatou: “Ka aere . . . e akariro . . . ei pipi; ka papetizo atu ei ia ratou.” Karanga te apotetoro ko Paulo “e tamou tika rai” i te reira angaanga, “tei te akapera oki e oraʼi koe, e te aronga katoa e akarongo mai ia koe ra.” Te tumu meitaki te reira i karanga ai a Paulo: “Kia matakite [i] taau e apii ra.” (1 Timo. 4:16) Mei te mea te piri atura te angaanga apii ki te akariro anga i te tangata ei pipi, ka anoanoia tatou ei aronga karape i te apii.

3. I teia atikara, eaa ta tatou ka uriuri me rave i te au apii Pipiria?

³ Te apii putuputu nei tatou i te tuatua mou Pipiria ki te  mirioni ua atu tangata. Mei tei akakiteia i te atikara i mua ake nei, ka inangaro tatou i te kite akapeea me tauturu ia ratou kia riro ei pipi papetitoia na Iesu Karaiti. I teia atikara, ka uriuri tatou e rima apinga ei tauturu i te tangata apii kia tere ki mua e kia papetitoia.

4. Eaa te puapii ka tapupu ei iaia uaorai me apii i te Pipiria? (Akara i te tataanga rikiriki.)

⁴ E reka ana tatou i te apii mei te Tuatua na te Atua. Penei ka timataia tatou kia tuatua maata. Me te raveia ra te Apii Punanga Tiaki, te Apii Pipiria a te Putuputuanga, me kore te apii Pipiria i te ngutuare, eiaa te puapii e tuatua maata. E tuku na te Pipiria e apii, ka anoanoia te puapii kia tapupu iaia uaorai, eiaa e akamārama i te au mea ravarai no te irava Pipiria me kore te tumu manako. * (Ioa. 16:12) Akaaite i toou kite Pipiria mei toou papetito anga ki teianei. Papu i mua ana, kua kite ua koe i te au apiianga puapinga. (Ebe. 6:1) Kua pou rai te tuatau te apii i taau i kite i teianei, no reira eiaa e apii i te au mea ravarai ki taau tangata apii.

5. (a) Ia 1 Tesalonia 2:13, eaa ta te tangata apii e anoanoia ra kia mārama? (e) Akapeea tatou me akamaroiroi i te tangata apii kia akakite mai i tana e apii ra?

⁵ Inangaro tatou i ta tatou tangata apii kia mārama i tana e apii ra mei te Tuatua akauruia a te Atua. (E tatau ia 1 Tesalonia 2:13.) Akapeea tatou me rave i teia? Akamaroiroi i te tangata apii kia akakite mai i tana e apii ra. Eiaa e akamārama ua i te au irava Pipiria ki te tangata apii, mari ra e pati iaia kia akamārama mai i te reira kia koe. Tauturu i te tangata apii akapeea aia me taangaanga i te Tuatua a te Atua i tona oraanga. E ui i te au uianga ei akakeu i tona manako e te ngakau—eaa tana e manako ra no te au irava tana e tatau ra. (Luka 10:25-28) Ei akaraanga, e ui kiaia: “Akapeea teia irava te tauturu anga ia koe kia kite i tetai o to Iehova au tu?” “Akapeea koe e puapinga ai mei teia tuatua mou Pipiria?” “Eaa toou manako i taau i apii?” (Mase. 20:5) Te mea puapinga, kare ko te maata tana i kite, mari ra te maata tana e akaperepere ra e te taangaanga ra.

6. Eaa i meitaki ei kia apai i te puapii karape ki te apii Pipiria?

⁶ Me rave koe i te apii Pipiria, e apai ana ainei koe i te au papuritia karape ei puapii? Me koia ia, e ui eaa to ratou  manako i taau apii e te peea ra koe me tuku na te Pipiria e apii. Ka anoanoia te tu akaaka me te anoano ra koe i te akameitaki atu i taau apii. (Akaaite ia Angaanga 18:24-26.) I muri mai, e ui ki te papuritia karape me te mārama ra te tangata apii i te tuatua mou. Penei ka pati katoa koe i te papuritia kia rave i te apii ia koe e orote ra no tetai tuatau. Ka rave tamouia te apii e ka kite te tangata apii e e apinga puapinga te reira. Eiaa e manako e “naau” teia apii e kare tetai atu e rave i te reira. No te mea te anoano ra koe i te meitaki no taau tangata apii e kia tere ki mua i te pae vaerua.

7. Eaa te ka tauturu i te tangata apii kia oraora mei tana apii?

⁷ Kia kite mai te tangata apii i toou tu oraora ma te akaperepere i te tuatua mou i roto i te Pipiria. (1 Tesa. 1:5) Ka oraora te tangata apii i tana e apii ra. E akakite kiaia akapeea te au kaveinga Pipiria te tauturu anga ia koe. Ka kite aia e puapinga te au arataki anga tau i roto i te Pipiria.

8. Eaa taau ka rave no te akameitaki atu i te apii Pipiria, e eaa koe ka rave ei i te reira?

⁸ I te tuatau o te apii Pipiria, e akakite ki te tangata apii te au akaraanga aiteite te manamanata ki tona e kua autu ratou. Penei ka apai koe i tetai taeake e akaraanga meitaki tona kia puapinga taau tangata apii. Ka kite koe i te au akaraanga i runga i te jw.org “Taui te Pipiria i te Oraanga.” * Ka tauturu teia au atikara e te au vitio i taau tangata apii ma te taangaanga i te au kaveinga Pipiria i tona oraanga.

9. Akapeea koe me akamaroiroi i te tangata apii kia akakite i tana e apii ra ki tona ngutuare tangata e te au oa?

⁹ Me kua akaipoipo te tangata apii, te apii ra ainei tona tokorua? Me kare, e pati i te tokorua kia piri mai ki te apii. Akamaroiroi i taau tangata apii kia akakite i tana e apii ra ki tona ngutuare tangata e tona au oa. (Ioa. 1:40-45) Akapeea ra? Penei ka ui koe: “Akapeea koe me akamārama i teia tuatua mou ki toou ngutuare tangata?” me kore “Eaa te irava taau ka taangaanga no te akapapu i teia ki toou oa?” Te tereni ra koe i te tangata  apii ei puapii. Me papa aia, ka akamata aia i te tutu aere ei papuritia kare i papetitoia. E ui ki te tangata apii me kua kite aia i tetai tei inangaro i te apii i te Pipiria. Me kua kite aia, e aravei viviki atu i te reira tangata e e apii iaia. Akaari kiaia te vitio Eaa te Raveia Ana i ko i Tetai Apii Pipiria? *

10. Ia 1 Tesalonia 2:7, 8, akapeea te puapii me aru i te akaraanga o Paulo?

¹⁰ Ka akaperepere te au puapii i ta ratou aronga apii. Ka akono ia ratou ei au taeake e te au tuaine pae vaerua a te tuatau ki mua. (E tatau ia 1 Tesalonia 2:7, 8.) Kare i te mea māmā te akaruke i to ratou oa i teianei ao e kia rave i te au taui anga no te tavini ia Iehova. Ka tauturu tatou ia ratou kia kimi i te oa mou i roto i te putuputuanga. E akaoaoa atu i taau tangata apii na te akapou anga i tetai tuatau kiaia. Te taniuniu atu, te tuku karere, e te atoro anga poto i te pae i te au apii ei akaari e te manako atura koe iaia.

11. Eaa ta tatou ka inangaro i te aronga apii kia kite i roto i te putuputuanga, e no teaa ra?

¹¹ Kua karangaia e: “Ka anoanoia te oire ei utuutu i te tamaiti.” Ka karanga katoa tatou: “Ka anoanoia te putuputuanga kia akariro i tetai ei pipi.” No reira te au puapii ka akaaravei ei i ta ratou aronga apii ki te putuputuanga ei akamaroiroi ia ratou. Ka rekareka te aronga apii i te piri atu ki te iti tangata o te Atua, te ka turu ia ratou i te pae vaerua e te pae o te manako ngakau. Ka inangaro tatou i te tangata apii kia piri ki te putuputuanga e kia piri ki te ngutuare pae vaerua. Ka inangaro tatou iaia kia piri vaitata ki te akataeake anga Kerititiano. E ka māmā iaia i te akamutu i tona pirianga oa ki te aronga kare e inangaro ana ia Iehova. (Mase. 13:20) Me kopaeia aia e tona au oa i teianei ao, papu e ka kitea te au oa mou i roto i ta Iehova akaaerenga.—Mare. 10:29, 30; 1 Pete. 4:4.

12. Eaa tatou ka tuatua ai no te akatapuanga e te papetitoanga Kerititiano ki te tangata apii?

¹² E tuatua maoraora no te akatapuanga e te papetitoanga Kerititiano. Te akakoroanga o te apii Pipiria ko te  tauturu i tetai tangata kia papetitoia ei pipi. I nga marama o te apii Pipiria tamou i muri ake i te aere anga ki te uipaanga, kia mārama te tangata apii i te akakoro anga o te apii Pipiria kia tavini ia Iehova ei Au Kite Nona.

13. Eaa te au takainga ta te tangata apii ka rave kia tere ki mua e kia papetito?

¹³ Me aruia te au takainga meitaki, ka akakeuia te tangata apii Pipiria kia papetito! Te mea mua, ka apii te tangata apii ma te akaperepere ia Iehova e te tuku i te akarongo ki roto iaia. (Ioa. 3:16; 17:3) Ka piri vaitata te tangata apii kia Iehova e te putuputuanga. (Ebe. 10:24, 25; Iako. 4:8) Ka kopae te tangata apii i te au peu kino e ka tataraara i tana au ara. (Anga. 3:19) Ka akakeu tona akarongo iaia kia tutu aere i te tuatua mou ki tetai ke. (2 Kori. 4:13) Ka akatapu aia iaia uaorai kia Iehova e ka akaari i teia na te papetito anga. (1 Pete. 3:21; 4:2) Mei teaa atura i te rā mataora no te katoatoa! I te tangata apii e rave ra i teia au takainga meitaki, e akameitaki iaia ma te ngakau tae e e akamaroiroi iaia kia tere ki mua.

14. Akapeea te puapii me akara i te turanga o te tangata apii?

¹⁴ Ka anoanoia tatou kia akakoromaki me tauturu i te tangata apii kia tere ki mua ki te akatapuanga e te papetitoanga. E kimi me te inangaro ra aia i te tavini i te Atua ko Iehova. Te kite ra ainei koe me te tauta ra aia i te akarongo ki te akauenga a Iesu? Me te inangaro ua ra aia i te apii i te au tika no roto i te Pipiria?

15. Eaa te au turanga ka akara te puapii me te tere ra te tangata apii ki mua?

¹⁵ E akara putuputu i te turanga o te tangata apii. Ei akaraanga, te akakite maira ainei aia i tona akaperepere ia Iehova? Te pure ra ainei aia kia Iehova? (Sala. 116:1, 2) Te reka ra ainei aia i te tatau i te Pipiria? (Sala. 119:97) Te aere putuputu ra ainei aia ki te uipaanga? (Sala. 22:22) Kua rave ainei aia i te au tauianga i tona oraanga? (Sala. 119:112) Kua akamata ainei aia i te tutu aere i tana e apii ra ki tona ngutuare tangata e te au oa? (Sala. 9:1) Te mea puapinga,  te inangaro ra ainei aia kia riro ei Au Kite no Iehova? (Sala. 40:8) Me kare te tangata apii e tere ana ki mua i te pae vaerua, e ui maru kiaia eaa te tumu e e uriuri i te reira kiaia. *

16. Eaa te ka akaari mai e ka akamutu te apii Pipiria?

¹⁶ Akara meitaki me ka apii ua atu koe i te reira tangata. Ui kia koe uaorai: ‘Te akapapa ra ainei te tangata apii i tana apii? Kare ainei aia e inangaro i te aere ki te uipaanga? Te rave ra ainei aia i te au peu tau kore? E mema ainei aia no te akonoanga pikikaa?’ Me koia ia, me ka apii ua atu kiaia, ka aite te reira ki te apii anga i te kau inara kare aia e inangaro kia mau aia! Me kare te tangata apii e āriki ana i tana e apii ra e kare i rave i te au taui anga, eaa i reira ka apii ua atu ei kiaia?

17. Ia 1 Timoteo 4:16, eaa ta te au puapii Pipiria ka rave?

¹⁷ E angaanga pakari ana tatou i te akariro i te tangata ei pipi, e ka inangaro tatou i te tauturu i te aronga apii Pipiria kia papetitoia. No reira ka tuku tatou na te Pipiria e apii ma te akaperepere i ta tatou e irinaki ra. Ka akamaroiroi tatou i te tangata apii kia kimi i te oa i roto i te putuputuanga. Ka akakite tatou i te akakoro anga o te akatapuanga e te papetitoanga, ma te akara i te turanga o te tangata apii. (Akara i te pia “ Ta te au Puapii ka Rave Kia Papetitoia te Aronga Apii.”) Mataora tatou i te rave i teia angaanga akaora i te tangata! E tauta pakari i te rave i te au apii Pipiria te ka taki atu ki te papetito anga.