1. Sar đanaja so i šukar vest koja propovedinaja šaj te spasini e manušengo đivdipe?

I ŠUKAR vest koja propovedinaja šaj te spasini e manušengo đivdipe. Sar đanaja odova? Ko Matej 28:19, 20, o Isus dinđa jekh zapovest: „Ðan hem ćeren učenikonen... hem krstinen len.“ Kobor tano važno i osoba te krstini pe? Odova tano uslov aso okola kola mangena te oven spasime. O kandidati aso krštenje valjani te verujini so o spasenje tano moguće samo sebepi so o Isus dinđa po đivdipe hem uskrsninđa. Sebepi odova, o apostol Petar phenđa e hrišćanenđe: „O krštenje... akana hem tumen spasini prekalo uskrsenje ando Isus Hrist“ (1. Petr. 3:21). Odolese, ked jekh nevo učeniko krstini pe, ov šaj te ovel le nada so ka ovel spasimo.

2. Premali 2. Timoteju 4:1, 2, save učiteljija valjani te ova?

² Te šaj te ćere učenikonen, valjani te ove „vešto đi sikaveja.“ (Čitin 2. Timoteju 4:1, 2.) Sose? Odolese sose o Isus zapovedinđa: „Ðan hem ćeren učenikonen... [hem] sikaven len.“ O apostol Pavle phenđa „istrajin“ ki odija buti, „sose ked ćereja odova ka spasine hem tut hem okolen so šunena tut.“ Sebepi odova, o Pavle phenđa: „Pazin šukar sar... sikaveja“ (1. Tim. 4:16). Ako mangaja te ćera učenikonen, amen bi valjani te da sa amendar te ova but šukar učiteljija.

3. So ka razmotrina ko akava članko?

³ Amen redovno proučinaja bute manušencar hem sikavaja len o ćaćipa andi Biblija. Sar so dikhljam ko okova članko,  amen mangaja te đana sar šaj te pomožina pobuter manušenđe te oven krstime učenikija ando Isus Hrist. Ko akava članko, ka razmotrina panđ buća kola svako učitelj valjani te ćerel te šaj te pomožini e studentese te napredujini đi o krštenje.

4. Sose o učitelj na valjani te vaćeri but ko e biblijako kurs? (Dikh i fusnota.)

⁴ Amen mangaja odova sostar sikavaja averen ando e Devleso Lafi. Odolese šaj te ova ko iskušenje te vaćera but. Ama, bizo obzir da li vodineja o Proučibe andi Stražarsko kula, e Skupštinako proučibe andi Biblija ja e biblijako kurs, tu na valjani but te vaćere. Ako mangela te mukhel i Biblija te sikavi e osoba, o učitelj na valjani but te vaćeri hem na valjani te pokušini te objasnini sa so đanela ando disavo stih ja andi disavi tema * (Jov. 16:12). Uporedin odova so akana đaneja andi Biblija odoleja so đanđan ked krstinđan tut. Verovatno tegani, đanđan samo o osnovna buća andi Biblija (Jevr. 6:1). Valjanđe te nakhen but berša te sikljove odova so avdije đaneja. Odolese, ma pokušin te sikave e studente sa kotar jekhvar.

5. (a) Premali 1. Solunjanima 2:13, so mangaja o studenti te haljol? (b) Sar šaj te podstaknina e studente te vaćeri so mislini ando odova so sikljola?

⁵ Amen mangaja amaro studenti te haljol so odova so sikljola avela ando e Devleso Lafi. (Čitin 1. Solunjanima 2:13.) Sar šaj te ćera odova? Podstaknin e studente te vaćeri so mislini ando odova so sikljola. Umesto uvek tu te objasnine lese o stihija andi Biblija, puć le ov tuće te objasnini len. Pomožin lese te haljol sar odova so sikljola kotar e Devleso Lafi šaj te primenini ko po životi. Postavin lese pućiba kola ka mothoven so mislini ando stihija kola čitinđa hem sar on utičinena upro leste (Luka 10:25-28). Na primer, puć le: „Kola e Jehovase osobine šaj te dikhe ko akava stih?; Sar šaj te pomožini tuće odova so akana sikljiljan andi Biblija?; So mislineja ando akava so akana sikljiljan?“ (Posl. 20:5). Nane najvažno kobor o studenti đanela, već kobor mangela hem primenini odova so đanela.

6. Sose tano šukar te vićine jekhe iskusno objavitelje te avel tuvaja ko kurs?

⁶ Da li ko to kurs dijekh puti vićineja e objaviteljen kola tane iskusna učiteljija? Ako ja, tegani puć len so mislinena ando odova sar vodineja o kurs hem da li šukar koristineja i Biblija đi sikaveja e studente. Ako mangeja te ove pana pošukar učitelj, valjani te ove ponizno (Uporedin e stihonencar ando Dela  apostolska 18:24-26). Palo odova, puć odole iskusno objavitelje so ov mislini da li o studenti haljola odova so sikljola. Isto ađahar, ako na ka ove odothe jekh ja nekobor kurće, puć odole objavitelje te proučini odole osobaja đi na irineja tut. Ađahar o studenti redovno ka proučini hem ka haljol so oleso kurs tano važno. Niked ma mislin so odova tano „to“ kurs hem so niko aver našti te vodini le. Tu mangeja odova soj tano najšukar e studentese, a odova tano hem ponodri te sikljol ando ćaćipe.

7. So ka pomožini e studentese te ovel oduševimo odoleja so sikljola?

⁷ O studenti valjani te dikhel so hijan oduševimo hem uverimo ko odova so i Biblija sikavi (1. Sol. 1:5). Palo odova, verovatno hem ov ka ovel oduševimo odoleja so sikljola. Možda šaj te vaćere lese sar o načelija andi Biblija pomožinđe tuće. Ađahar, ov ka haljol so o savetija andi Biblija šaj hem olese te pomožinen.

8. So šaj pana te ćera te šaj te pomožina e studentese hem sose valjani te ćera odova?

⁸ Ko kurs, vaćer e studentese ando avera phralja hem phenja kola hine len slična problemija sar ov hem sar borinđe pe olencar. Šaj te vićine nekas andi skupština ko kurs kaso primer šaj te pomožini e studentese. Ja šaj te arakhe disave ohrabrujuća iskustvija ko amaro sajt jw.org, ki serija ando člankija „Biblija menja živote.“ * Asavke člankija hem kratka filmija ka pomožinen e studentese te haljol kobor tano mudro te primenini e biblijake načelija ko po životi.

9. Sar šaj te podstaknine e studente te vaćeri pe familijaće hem pe amalenđe ando odova so sikljola?

⁹ Ako tano o studenti ko brako, da li hem oleso bračno drug proučini? Ako na, tegani vićin le te ovel tumencar ko kurs. Podstaknin te studente te vaćeri pe familijaće hem pe amalenđe ando odova so sikljola (Jov. 1:40-45). Sar šaj te ćere odova? Šaj te puće le: „Sar bi akava objasnineja te familijaće?“ ja „Kova stih bi koristineja te dokažine akava te amalese?“ Ko asavko način, tu ka sikave e studente te ovel učitelj jekh dive. Ked ka ispunini o uslovija aso nekršteno objavitelj, šaj te počmini te đal ki služba. Šaj te puće e studente da li đanela pana nekas ko bi mangela te proučini i Biblija. Ako đanela, tegani odmah upoznajin odole osoba  hem puć la da li mangela te proučini. Mothov laće o kratko film Sar šaj te sikljova andi Biblija? *

10. Premali 1. Solunjanima 2:7, 8, sar šaj o učitelj te oponašini e Pavleso primer?

¹⁰ O učiteljija valjani te mothoven so brininena pe ando pe studentija. Dikh upro lende sar upro te budućo duhovno phralja hem phenja. (1. Solunjanima 2:7, 8.) E studentenđe nane lokho te aćhaven pe amalen ando sveto hem te ćeren sa o promene kola valjani te šaj te služinen e Jehovase. Odolese, amen valjani te pomožina len te arakhen pese šukar amala ki skupština. Ov amal te studentese, ađahar so ka ove oleja na samo ked proučinena nego hem ko avera prilike. Odova so ka vićine le ko telefoni, ka pisine lese poruka, ja odova so kratko ka posetine le hem ked nane tumen kurs, ka mothovi so ćaće brinineja tut olestar.

11. Sar mangaja amare studentija te osetinen pe ki skupština hem sose?

¹¹ Jekh poslovica phenela: „Valjani celo gav te šaj te barjaćeri pe jekh ćhavo.“ Amen šaj te phena: „Valjani celo skupština te šaj te ćerel pe jekh učeniko.“ Odolese, o šukar učiteljija ka upoznajinen pe studenten averencar ki skupština kola šukar ka utičinen upro lende. Tegani, o studentija šaj te uživinen ko odova te oven e Devlese narodoja, kova šaj te del len duhovno hem emocionalno podrška. Amen mangaja svako studenti te osetini so pripadini ki skupština hem soj tano deo andi amari duhovno porodica. Isto ađahar, mangaja hem ov te osetini kobor tano šukar ked ko celo sveto isi tut duhovno porodica koja mangela tut. Tegani, ka ovel lese polokho te aćhavi pe amalen ando sveto kola na pomožinena lese te mangel e Jehova (Posl. 13:20). A ki aver strana, ako on više na mangena te družinen pe oleja, tegani ov ka đanel so šaj te arakhi prava amala ki e Jehovasi organizacija (Mar. 10:29, 30; 1. Petr. 4:4).

12. Sose amare studenteja valjani te vaćera ando predanje hem krštenje?

¹² Vaćer phravdo e studenteja ando predanje hem krštenje. Amaro cilj sose vodinaja e biblijako kurs tano te pomožina e osobaće te krstini pe. Palo odova so nekobor masek redovno proučini, a posebno palo odova so počminđa te avel ko sastankija, o student valjani te haljol so o cilj ando kurs tano te  pomožini lese te počmini te služini e Jehovase sar oleso Svedoko.

13. So o studenti valjani te ćerel te šaj te ispunini po cilj te krstini pe?

¹³ Hari po hari, o studenti kova tano ozbiljno, ka ispunini po cilj te krstini pe. Najangleder, o studenti valjani te upoznajini hem te zamangel e Jehova hem te razvijini vera upro leste (Jov. 3:16; 17:3). Palo odova, ov ovela amal e Jehovaja hem e phraljencar hem e phenjencar (Jevr. 10:24, 25; Jak. 4:8). Isto ađahar, o studenti ćhinavi pekle lošna navike hem pokajini pe aso pe grehija (Dela 3:19). Uzo odova, ov trudini pe te vaćeri o ćaćipe averenđe (2. Kor. 4:13). Ko krajo, ov predajini po đivdipe e Jehovase hem odova mothovi ađahar so krstini pe (1. Petr. 3:21; 4:2). Odova dive sare hijam bahtale! Ði o studenti hari po hari ispunini po cilj, vilestar pohvalin le hem podstaknin le hem ponodri te napredujini.

14. Sar šaj o učitelj te dikhel da li o studenti napredujini?

¹⁴ Amen valjani te ova strpljiva đi pomožinaja e studentese te avel đi o predanje hem o krštenje. Ama, ko jekh trenutko, amen valjani te dikha da li ov isi le želja te služini e Jehovase. Da li o studenti mothovi so trudini pe te šunel e Isusese zapovestija ja samo mangela te đanel disave buća andi Biblija?

15. So šaj e učiteljese te mothovi so o studenti tano spremno te krstini pe?

¹⁵ Redovno puć tut da li o studenti napredujini. Na primer, puć tut: „Da li vaćeri ando pe osećanja premalo Jehova? Da li molini pe e Jehovase?“ (Ps. 116:1, 2). „Da li ov uživini te čitini i Biblija?“ (Ps. 119:97). „Da li redovno avela ko sastankija?“ (Ps. 22:22). „Da li ćerđa bilo koja promena ko po đivdipe?“ (Ps. 119:112). „Da li počminđa te vaćeri pe familijaće hem pe amalenđe ando odova so sikljola?“ (Ps. 9:1). Soj tano najvažno, da li mangela te ovel e Jehovaso svedoko? (Ps. 40:8). Ako o studenti na napredujini ko nijekh ando akala buća, taktično pokušin te dikhe kaj tano o problemi hem palo odova vaćer oleja odolestar ljubazno, ama ov phravdo. *

16. Ked valjani te ćhinave o kurs?

¹⁶ Te šaj te đane da li valjani te ćhinave nekasa o kurs ja na, sar đala o vreme, puć tut:  „Da li o studenti pripremini pe aso po kurs? Da li mangela te avel ko sastankija? Da li aćhavđa pe lošna navike? Da li mukhlja i hovavni religija?“ Ako tano odgovor ko akala pućiba na, tegani ako bi nastavineja o kurs odova bi ovela sar ked mangeja te sikave nekas te plivini, a ov na mangela te sapanćeri pe. Ako o studenti ćaće na cenini odova so sikljola hem nane spremno te ćerel promene, tegani razmislin da li hem ponodri valjani te proučine oleja.

17. Premali 1. Timoteju 4:16, so valjani te ćeren o učiteljija?

¹⁷ Amen ozbiljno dikhaja ko amaro zadatko te ćera učenikonen hem mangaja te pomožina e studentenđe te napredujinen đi o krštenje. Sebepi odova amen ka dozvolina i Biblija te sikavi len hem ka mothova so hijam oduševime hem uverime đi sikavaja len. Ka podstaknina e studente te arakhi pese amala ki skupština. Ka vaćera oleja ando predanje hem krštenje hem sar đala o vreme ka dikha da li o studenti napredujini (Dikh o okvir „ Panđ buća kola o učitelj valjani te ćerel“). Amen hijam bahtale te propovedina i šukar vest koja šaj te spasini e manušengo đivdipe! Mangaja te ova odlučna te da sa amendar te pomožina amare studentenđe te napredujinen đi o krštenje.