ECIGABI C’OKUYIGA 42
Ebi Rhwakajira ly’Omwanafunzi Wirhu w’Ebibliya Ahikira Obubatizo—Cigabi ca Kabirhi
“Ocimanye wêne, omanye n’enyigirizo zawe.”—1 TM. 4:16.
LWIMBO 77 Nuru Katika Ulimwengu Wenye Giza
EBI RHWAYIGA *
1. Gurhi rhumanyiremwo oku omukolo gw’okujira abanafunzi guba gwakuciza abantu?
OMUKOLO gw’okujira abanafunzi guba gwakuciza abantu! Gurhi rhumanyiremwo ntyo? Erhi Yezu ahâna irhegeko liri omu Mateyo 28:19, 20, NWT, aderha ntya: “Gendagi, . . . mujire abanafunzi. . . , munababatize.” Bici birhuyeresire oku okubatizibwa kuli kwa bulagirire? Kuli kwa bulagirire lyo rhuyish’iba n’obuzîne bw’ensiku n’amango. Owabatizibwa akwanine abe n’obuyemere omu ngombôlo Yezu ahânaga n’olufû lwage, bulya byo byayish’ihashisa abantu babe n’obuzîne bw’ensiku n’amango. Eco co carhumâga entumwa Petro yabwîra ababo Bakristu ntya: “Obubatizo bummuciza bunola ninyu . . . obufûke bwa Yezu Kristu burhumire.” (1 Pt. 3:21) Co cirhumire erhi omwanafunzi w’Ebibliya akahikira aha abatizibwa, oko kunamuhe obulangalire bw’okuyishicunguka.
2. Bici olwandiko lwa 2 Timoteyo 4:1, 2, lurhubwizire rhujire rhwe nka balimu b’Ebibliya?
2 Ly’orhujira omukolo gw’okujira abanafunzi kuli kwa bulagirire rhube n’obulenga “bw’okuyigiriza.” (Osome 2 Timoteyo 4:1, 2.) Bulya gurhi? Bulya Yezu arhegesire ntya: “Gendagi, . . . mujire abanafunzi . . . , munababatize.” Entumwa Paolo yaderha erhi: “Osêremwo” ogo mukolo, “okajira ntyo waciciza wêne, onacize abakuyumvirhiza.” Co carhumaga Paolo aderha ntya: “Ocimanye wêne . . . n’enyigirizo zawe.” (1 Tm. 4:16) Co cirhumire rhushinganine rhube n’obulenga bw’okuyigiriza, akaba rhulonzize okuhikiriza omukolo gw’okujira abanafunzi bwinja.
3. Mw’eci cigabi bici rhwaganîrira okubiyerekire okulongoza ifunzo ly’Ebibliya?
3 Ngasi mango rhuli rhwayigiriza bantu banji bwenene Ebibliya omw’igulu lyoshi. Cikone, nk’oku ecigabi cirhanzi cayerekanâga, rhulonzize rhumanye gurhi rhwakarhabala bantu banji bamw’abo banafunzi bahikire aha babatizibwa babe banafunzi ba Kristu. Mw’eci cigabi, rhwaganîrira bindi bintu birhanu ngasi mwalimu w’Ebibliya akwanine ajire ly’arhabala omwanafunzi ajire amajambere kuhika ahikire obubatizo.
OLEKE EBIBLIYA EYIGIRIZE
Odose abalimu bagwerhe obulenga bw’okulongoza ifunzo entanya zabo okubiyerekire oku walongoza ifunzo n’omu njira ehi wakolesize bwinja Ebibliya (Olole ecifungo ca 4-6) *
4. Bulya gurhi omwalimu w’Ebibliya arhashinganini aderhe bintu binji nk’ali olongoza ifunzo? (Olole n’amahugûlo g’idako z’obukurasa.)
4 Rhuba rhuzigire ebi rhuyigiriza biba omu Akanwa ka Nnamahanga. N’oko kunarhume rhwalonza okuganîra bintu binji lugenda ebi rhwayizire. Co cirhumire nka kula oli walongoza enyigirizo z’Ilabiro ly’Akalalizi arhahunyirwi aderhe bintu binji nk’ali alongoza, oli walongoza ifunzo ly’Ebibliya naye arhashinganini aderhe bintu binji. Ciru akaba omwalimu w’Ebibliya akwanine aleke Ebibliya eyigirize, ashinganine abe wakucihasha ly’ayaka okuderha bintu binji okubiyerekire omwanzi amanyire erhi lwandiko lulebe. * (Yn. 16:12) Orhanye oku bintu okola obw’ohugûsirwe ene n’ebi wali hugûsirwe amango wabatizibagwa. Okengere oku amango wabatizibagwa nyigirizo ntangiriza z’Ebibliya zone wal’ihugûsirwe. (Hb. 6:1) Hagezire myaka minji ly’omanya n’okuhugûkwa ebintu okola ohugûsirwe mw’aka kasanzi, co cirhumire orhalonzagya okuyigiriza omwanafunzi ebintu byoshi caligumiza.
5. (a) Bici rhulonza omwanafunzi wirhu b’Ebibliya ahugûkwe nk’oku biyerekinwe omu 1 Abatesalonika 2:13? (b) Gurhi rhwakaha omwanafunzi w’Ebibliya omurhima akabwîra abandi ebi ali ayiga?
5 Rhuba rhulonzize rhurhabale omwanafunzi wirhu w’Ebibliya ahugûkwe oku ebi ali ayiga biri byarhenga omu Kanwa ka Nnamahanga. (Osome 1 Abatesalonika 2:13.) Gurhi rhwakajiramwo ntyo? Omuhe omurhima akaganîrira abandi kw’ebi ali ayiga. Ahali hw’okuhugûlira omwanafunzi amandiko goshi gali omu cigabi mwayiga, wanamubwira naye ahugûle maguma na maguma. Orhabale omwanafunzi ahugûkwe gurhi Akanwa ka Nnamahanga kakamurhabala omu kalamo kage. Lubero n’okumudosa amadoso gali omu citabu, wanamudosa entanya zage erhi oku aciyumvirhe okubiyerekire ago mandiko asomire. (Lk. 10:25-28) Kwa lwiganyo, wanamudosa ntya: “Gurhi olu lwandiko lukurhabire obone borhere bulebe bwa Yehova?” “Gurhi wakayunguka n’ebyo osomire mw’olo lwandiko?” “Ntanya zihi ogwerhe kuyerekera ebi oyizire?” (Mig. 20:5) Eby’obulagirire kurhali kuderha mpu omwanafunzi wani akola ayishi nyigirizo ndebe, cikone kuli kumanya kunganaci azigire ezo nyigirizo na kunganaci ali azikolesa.
6. Bulya gurhi kuli kwinja okuheka omuhubiri ogwerhe obulenga amango rhwajicifunza haguma n’omwanafunzi?
6 Ka nka wajilongoza ifunzo ly’Ebibliya, kw’onaheke abahubiri bagwerhe obulenga bw’okulongoza ifunzo? Akaba onajire ntyo, wanabadosa entanya zabo okubiyerekire oku walongoza ifunzo n’omu njira ehi wakalesire Ebibliya eyigiriza. Okwanini obe mwirhohye akaba olonzize obe mwalimu mwinja. (Oshushanye Ebj. 18:24-26.) Buzinda bw’aho, wanadosa oyo muhubiri erhi anabwine nk’omwanafunzi anahugûsirwe okuli. Ciru kandi wanabwira oyo muhubiri akurhabale okulongoza eyo funzo, nk’obwine oku arhayish’ibonekane. Oko kwanarhabala ifunzo ligendekere na ntyo omwanafunzi ahugûkwe oku ebi ali ayiga biri bya bulagirire bwenene. Orhakagirhanya mpu eryo liri ifunzo “lyawe wene,” nta wundi wakalilongoza. Okengere oku akantu kw’obulagirire, kuli kurhabala omwanafunzi ajire amajambere omu kuyiga bintu binji okubiyerekire okuli.
OYEREKANE OKU OZIGIRE ONAYEMIRE EBI OLI WAYIGIRIZA
Omuganirire enyiganyo zakamurhabala ahugûkwe bulya gurhi kuli kwa bulagirire okukolesa amakanuni g’Ebibliya omu kalamo kage (Olole ecifungo ca 7-9) *
7. Bici byakarhabala omwanafunzi azigire ebi ali ayiga?
7 Omwanafunzi ashinganine abone oku nawe wene ozigire ebi oli wayigiriza onabiyemire. (1 Ts. 1:5) Oko kwanamurhabala naye ayemere anazigire bwenene ebi ali ayiga. Akaba hali akasanzi wanamuganîrira gurhi okuli kw’Ebibliya kwakurhabire okuhindula akalamo kawe. Oko kwanamurhabala naye ahugûkwe oku Ebibliya erimw’amahano gashinganine gakamurhabala.
8. Kundi gurhi wakajira ly’orhabala omwanafunzi wawe na gurhi wakajiramwo ntyo?
8 Omu kasanzi k’ifunzo oganîrire omwanafunzi bene wirhu na bali birhu bagwerhe amazibu gashushine na gage na gurhi bahikire aha bagahimamwo. Akaba omu cigamba muli mwene wirhu erhi mwali wirhu wâli lamire akalamo kashushine n’akage, wanayisha naye lyo aba lwiganyo kw’oyo mwanafunzi. Erhi kandi wanalola enyiganyo ziri oku jw.org ziri omu cigabi “Biblia Inabadilisha Maisha ya Watu.” * Eyo myanzi n’ezo video zanamurhabala ahugûkwe bulya gurhi kuli kwa bulagirire okukolesa amakanuni g’Ebibliya omu kalamo kage.
9. Gurhi wakarhabala omwanafunzi ahikire aha arhondera aganîrira bene wabo n’abîra bage okubiyerekire ebi ali ayiga?
9 Akaba omwanafunzi ajîre omu buhya, ka mukage erhi iba naye anayige Ebibliya? Akaba hali muguma mulibo orhasagirhondera ayiga, wanamuyegereza naye ayishe okw’ifunzo. Ohe omwanafunzi omurhima akaganîrira bene wabo n’abîra bage kw’ebi ali ayiga. (Yn. 1:40-45) Gurhi wakajiramwo ntyo? Wanamudosa ntya: “Gurhi wakahugûlira bene winyu ebi bintu ociyigirizize?” Erhi wanamudosa: “Lwandiko luhi wakakolesa ly’orhaba abîra bawe bayemere ogu mwanzi?” Okujira ntyo kuli kukomereza omwanafunzi ahikire aha aba mwalimu. Na ntyo, erhi akahikira aha ayeneza ebihunyîrwe, anaba muhubiri orhali mubatize. Wanadosa omwanafunzi erhi hali omuntu amanyire olonzize okuyiga Ebibliya. Nk’akakubwira oku hali oyu amanyire wanamubwira akuyerese ye, na ho n’aho wanarhondera wayiga naye Ebibliya. Omuyereke evideo Tunajifunzaka Biblia na Watu Namna Gani? *
ORHABALE OMWANAFUNZI ACIJIRIRE ABÎRA OMU CIGAMBA
Omurhabale acijirire abîra omu cigamba (Olole ecifungo ca 10-11) *
10. Nk’oku biyerekinwe omu lwandiko lwa 1 Abatesalonika 2:7, 8, gurhi omwalimu w’Ebibliya akayiga olwiganyo lwa Paolo?
10 Abalimu b’Ebibliya bashinganine bashibirire abanafunzi babo. Bashinganine bababone nka bene wirhu na bali birhu b’irhondo. (Osome 1 Abatesalonika 2:7, 8.) Lyo bakolera Yehova kurhakaba kulembu baleke abîra babo erhi kujira empindûlo duba-duba. Co cirhumire rhushinganine rhubarhabale babe n’abîra bw’omu cigamba. Obe mwîra w’okunali w’omwanafunzi wawe, omu kumulambagirira agandi mango kuleka aga mucifunza gone. Okumuhamagala oku telefone, okumurhumira emesaje n’okumulambagirira omu kasanzi murhacifunza kwanayerekana oku omushibirire.
11. Bici rhulonza abanafunzi babe nabyo omu cigamba na bulya gurhi?
11 Banakaderha oku: “Kuba kwa bulagirire obe n’olugo lwinja ly’olera omwana.” Nirhu rhwanaderha ntya: “Kuba kwinja obe n’ecigamba ly’ojira abanafunzi.” Co cirhuma abalimu b’Ebibliya bajira obulenga, banakayereka abanafunzi babo bene wirhu na bali birhu bakabarhabala bajire amajambere g’ekiroho. Na ntyo abanafunzi banaba babidu okukolera Nnamahanga, bulya oko kwanabarhabala bahugûkwe oku baja omu cinyabuguma c’abantu bakabashibirira n’okubarhabala bakule kiroho. Rhunarhabale ngasi mwanafunzi ahugûkwe oku rhumuzigire anali muguma w’omu mulala gw’Ecikristu gw’omw’igulu lyoshi. Rhunalonze abo banafunzi babone ecinyabuguma ciru n’obuzigire rhujiranako. Kwanaba kuzibu kuli ye okujira amajambere, erhi akaba akomerine n’abantu barhakamurhabala okujira obwîra haguma na Yehova. (Mig. 13:20) Erhi abîra bage bakamushomba bulya anarhôzire ogo muhigo, anahugûkwa oku agwerhe abîra bamuzigire omw’ikubuliro lya Yehova.—Mk. 10:29, 30; 1 Pt. 4:4.
OKASEGEZA OMUHIGO GW’OKUCIHÂNA N’OKUBATIZIBWA
Bunyi-bunyi omwanafunzi mwirhohye anahikira aha ahikiriza omuhigo gw’okubatizibwa! (Olole ecifungo ca 12-13)
12. Bulya gurhi kuli kwa bulagirire okuhugûlira omwanafunzi n’obwalagale okucihâna kw’Omukristu n’okubatizibwa kw’okuderha gurhi?
12 Okamuhugûlira n’obwalagale okucihâna kw’Omukristu n’okubatizibwa kw’okuderha gurhi. Ensiku zoshi rhukakengera oku omuhigo gwirhu gw’okuyigiriza omuntu Ebibliya kuli kumurhabala ahikire aha abatizibwa. Myezi misungunu omwanafunzi ali acifunza n’okukusanyika, ashinganine ahugûkwe oku omuhigo gw’ifunzo kuli kumurhabala abe muguma w’Abahamirizi ba Yehova.
13. Bici omwanafunzi w’Ebibliya akajira nk’alonzize abatizibwe?
13 Bunyi-bunyi omwanafunzi mwirhohye anahikira aha ahikiriza omuhigo gw’okubatizibwa! Burhangiriza, omwanafunzi ashinganine amanye Yehova, amuzigire nʼokuba n’obuyemere muli Ye. (Yn. 3:16; 17:3) Omu kujira ntyo anaba mwîra wa Yehova anakola ali ajira obwîra haguma na bene wirhu na bali birhu bw’omu cigamba. (Hb. 10:24, 25; Yk. 4:8) Kandi omwanafunzi analeka olugenzi lubi n’okuciyunjuza ebyaha byage. (Ebj. 3:19)Nk’amahikira aho, obuyemere bwage bwanamushumya akaganirira abandi ebi ali ayiga. (2 Kr. 4:13) Buzinda anacihâna emwa Yehova n’okubatizibwa. (1 Pt. 3:21; 4:2) Olo luba lusiku lwa bushagaluke bwenene! Amango omwanafunzi wawe ali acihangana okujira kantu kaguma-kaguma ly’ahikiriza omuhigo gwage, wanakamuvuga omunkwa n’obwalagale n’okumuha omurhima agendekere ajira amajambere g’ekiroho.
OKALOLA ERHI OMWANAFUNZI ALI AJIRA AMAJAMBERE
14. Gurhi omwalimu w’Ebibliya akamanyamwo oku omwanafunzi ali ajira amajambere?
14 Kuli kwinja rhube bakulembera amango rhuli rhwarhabala omwanafunzi ahikire aha acihâna n’okubatizibwa. Cikone hali bintu biguma-biguma byakarhurhabala okumanya erhi agwerhe irala ly’okukolera Yehova. Ka hali ebimanyiso biyerekine oku omwanafunzi ali acihangana okurhumikira amarhegeko ga Yezu? Erhi omuhigo gwage kuli kulonza amanye enyigirizo z’Ebibliya zone?
15. Bimanyiso bihi byakayereka omwalimu w’Ebibliya oku omwanafunzi alonzize abatizibwe?
15 Ngasi mango okalabiriza erhi hali amajambere omwanafunzi ali ajira. Kwa lwiganyo, k’ali ayerekana oku azigire Yehova? K’akola amuganiza kugerera isala? (Enna. 116:1, 2) K’anayumve ashagalukire okusoma Ebibliya? (Enna. 119:97) K’anaje oku ntimanano ngasi mango? (Enna. 22:22) Ka hali empindûlo ali ajira omu kalamo kage ziyerekine oku ali akolesa abi ali ayiga? (Enna. 119:112) K’akola aganîrira abîra n’abantu bw’omulala gwage kw’ebi ali ayiga? (Enna. 9:1) N’akantu kw’obulagirire, k’ali ayerekana irala lw’okuba muguma w’Abahamirizi ba Yehova? (Enna. 40:8) Erhi akaba omwanafunzi nta majambere ali ayerekana, wanakolesa obwenge ly’omanya ebimuhanzize na buzinda wanamuganîza n’obwalagale cikone obe mutûdu. *
16. Bici byakakurhabala oleke okuyiga Ebibliya haguma na muntu mulebe?
16 Ngasi mango oshinganine okacidosa erhi kobinali wagendekeza ifunzo haguma na mwanafunzi mulebe. Wanacidosa wene ntya: ‘Bici birhuma oyu mwanafunzi arharheganya ebi ayish’iyiga? Bulya gurhi arhasima kuja oku ntimanano? K’acigendekire n’enkômedu zage mbi? K’enkômedu zage ziciyerekine oku aciri muguma w’omw’idîni ly’obunywesi?’ Akaba ishuzo kw’ago madoso ali neci, kwanaba nk’oku wakalonza mpu oyigirize muntu mulebe okubayoga omu lwishi erhi omu nyanja n’obu arhalonzizi aje kw’amishi! Erhi akaba omwanafunzi arhashagalukiri ebi ali ayiga arhanajijiri mpindûlo zoshi-zoshi, bulya gurhi wakacilibuza busha n’okuheza akasanzi kawe kw’okugend’ikamuyigiriza?
17. Nk’oku biyerekinwe omu lwandiko lwa 1 Timoteyo 4:16, bici abalimu b’Ebibliya boshi bashinganine bajire?
17 Rhunakarhôla omukolo gwirhu gw’okujira abanafunzi kwa buzibu-zibu, na ntyo rhunalonze okurhabala omwanafunzi ajire amajambere kuhika ebwa bubatizo. Co cirhumire rhushinganine rhuyigirize n’obushagaluke n’omu njira eyerekine oku rhuyemire ebi rhuli rhwayigiriza n’okuleka Ebibliya yone eyigirize. Rhwanarhabala omwanafunzi w’Ebibliya acijirire abîra omu cigamba. Na kandi rhwanakasegeza omuhigo gw’okucihâna n’okubatizibwa. Ngasi mango rhwanakalâba erhi hali amajambere omwanafunzi ali ajira. (Olole ecisanduku cidesire “ Ebi Abalimu Bakajira lyo Barhabala Abanafunzi Bahikire Obubatizo.”) Rhushagalusire bwenene okubona nirhu rhuli rhwajira kw’ogu mukolo gw’okucungula abantu! Rhuhizire okugendekera rhwajira okwirhu koshi lyo rhurhabala omwanafunzi w’Ebibliya ahikire aha abatizibwa.
LWIMBO 79 Wafundishe Kusimama Imara
^ kip. 5 Amango rhuli rhwalongoza ifunzo ly’Ebibliya, rhunabe rhugwerhe olukengwa lw’okurhabala abandi bahugûkwe entanya zihi na bijiro bihi Yehova alonzize babe nabyo. Eci cigabi carhuhugûlira gurhi rhwakakubula obulenga bwirhu bw’okuyigiriza.
^ kip. 4 Olole ecigabi “Epuka Mitego Hii Wakati Unaongoza Funzo la Biblia” ciri omu Buku la Mukutano Utumishi na Maisha ya Mukristo lya Mwezi gwa 9, 2016.
^ kip. 8 Oje oku jw.org aha bayandisire HABARI JUU YETU > USHUHUDA WA MASHAHIDI WA YEHOVA.
^ kip. 9 Oku jw.org, oje aha bayandisire MAKTABA > VIDEO > MIKUTANO NA KAZI YETU YA MAHUBIRI > VYOMBO KWA AJILI YA MAHUBIRI.
^ kip. 15 Olole ebigabi bidesire “Kumupenda Yehova na Kuwa Mwenye Shukrani Kutakuchochea Ubatizwe” na “Uko Tayari Kubatizwa?” omu Ilabiro ly’Akalalizi ly’Omwezi gwa 3, 2020 (Ciswahiri c’e Congo).
^ kip. 77 AMAHUGÛLO G’ENFOTO: Enyuma z’okubona gurhi mwali wirhu muguma alongozagya ifunzo, oyu mwali wirhu ogwerhe obulenga bw’okulongoza ifunzo akola ali amuvuga omunkwa n’okumuyereka bulya gurhi arhakwanini okuderha bintu binji amango ali alongoza ifinzo.
^ kip. 79 AMAHUGÛLO G’ENFOTO: Omu kasanzi k’ifunzo oyu mukazi amahugûkwa gurhi akabamwo mukazi mwinja. Enyuma z’aho, akola ali aganîrira iba ebi anayizire.
^ kip. 81 AMAHUGÛLO G’ENFOTO: Omwanafunzi w’Ebibliya n’iba balambagirire bîra babo baguma bamanyanaga nabo aha Nyumpa y’Entimanano.
